Ndibaliwile muyawa ya 1955, thitho ndili mwana ogomi-edha mwaa-ima aalombwana araru. Ndaulukulele duzi na kombela n’nango mavirelo adhuwa wa ilambo ya Filandia weo va-eeni utokala sidadi la Vantaa.

M’manga atoobadiziwa nokala wa Mboni dha Yohova unga-adhi vyawa vyoyeva ira ndibaliwe. Mbwenye babanga anooruni-a maningi imbarimbari thitho kaarumeli-a ira m’manga anifunji-enga Bibilya venango nitukula adhowanga migumanoni. Mbwenye m’manga anoonifunji-a makundo oroma a Bibilyani babi-u akumavo.

Romela ndingali zombwe, ndanoodhilimbi-edha m’vwela Yohova. Mofwanafwani-a, vahora yana miyo vyawa 7, purusoranga anoondinyanyuela maningi namwasa oi ndanookonda udya mapakeka enao tapiiwa mothangani-iwa na sangiri (venango mabolu enao tapiiwa mothangani-iwa na sangiri). Na dhandha limbo-i atoondifinya moira ndipuwali-a matama ira ndidhule lomwanga, dhandha n’nango mwali garufu (venango kuyeri) na bolulo ira andidyi-e. Mbwenye ndatooda thatha mwakoplo garufulo.

Babanga akwide ndingana vyawa 12. Angakwide ndatooroma fwanyeya vamigumanoni. Abali naarongola pingoni tanoondidhiveliwana maningi thitho vyevi vyatoondikami-a ira ndikale vauxamwali na Nlungu. Ndatooroma leri Bibilya dambo nlilothene thitho funjedha mabukhwi-u  mwathindhi. Vyevyo vyatoiri-a ira ndibadiziwe ndingana vyawa 14, va 8 wa Agosto wa 1969.

Ndingamari-dhe funja xikola, ndatooroma upainiya okaatheya. Vangavirile masumana oyeva ndatoothamela weo wafuneela anamalaleya anjinji. Isa yen’na yali ya Pielavesi thitho ili vari va ilambo ya Filandia.

Wu Pielavesi ndi weo wagumanena miyo i-yana wenuo afuna dhakala i-yananga odhiveliwiwa, Sirkka. Ndatookopeya nodhiyevi-awee thitho anoom’dhiveliwana maningi Yohova. Liye kaafuna kaana vyongo vinjinji venango kala ovweya. Nothenene nanoofuna m’labela Yohova ninga mwemo mwaodele i-yo vaurumiwi uliwethene wava-iwe i-yo. Nathelane va 23 wa Março wa 1974. Malo modhowa wu limburo n’nangolee dhowa masangalala vasogolo va kazemetwi-u, natoodhowa wu Karttula weo wafuneela maningi anamalaleya anjinji a Umwene wa Nlungu.

Romela va dambo lathelane i-yo, Yohova atoothonyi-edha ira unongo nisamalela na-ela vyongo vyokuza Umwene valimburo loroma. (Mat. 6:33) Mofwanafwani-a, vahora yali i-yo wu Karttula, kanana karo voi nawenda nanjinga. Hora yodidila wanoodidila maningi voi ma-inje tanoomangeya kala ninga libwe. Ira niode laleela tatamo la pingwi-u lelo lali nlukulu maningi, nafuneela karo mbwenye kanana kobiri.

Balanga wa ndimuwa angadhidhe niona, atoonireyela rima noniva-a karwee. Misoko yothene ya karwiyo ali angamadhi pagali wale. Nafuneela gula makura baa-i. Voi e-no natokaana karo yafuneela i-yo.

Veva Yohova atookwakwaneli-edha izoyee voniva-a vyongo vyafuneela i-yo vaingumini. Nafuneela e-la vyongo vya Umwene wa Nlungu valimburo loroma.

Yawa ya 1978, natoodhowa xikolani ya urumiwi wa upainiya, bali Raimo Kuokkanen, a wenuo ali m’mbo-i mwaanamalangi-a, atoonilimbi-a ira nilembele formulariyo Xikola ya Giliyadi. Voi ee-no natooroma funjedha Ingles ira nimavolowe xikolila. Mbwenye muyawa ya 1980, na-analembele formulariyo xikolaniwo, natooitaniwa ira nimalabenga wu ofesi ya tambi ya Filandia. Vahora yen’na, arumiwi avabeteli katana ngari yodhowa xikolani ya Giliyadi. Mbwenye nanoofuna laba weo wafuna  Yohova a-kala wafuna i-yo. Ningaitaniwile ira nimalabenga wu Filandia natoorumela. Mbwenye natoodhowanave funjedha Ingles ira venango sogolou ninodha kaana ngari yodhowa xikola ya Giliyadi.

Vangavirile vyawa vyoyeva, Gulu Lotonga latoorumeli-a ira arumiwi avabeteli anooda dhowa xikola ya Giliyadi. Vahora yeniyene ndatoolemba formulariyo, mbwenye kaiira kandasangalala na urumiwi wava beteli kabe. Nafuna ira nikale okozeya malaba uliwethene weo wafuneele i-yo. Natooitaniwa dhowa mavolowa kalasi ya numero 79 ya xikola ya Giliyadi. Thitho natoomari-a mafunji-edhwi-u mu Setembro wa 1985. Ningamari-idhe natoorumiwa wu Colombia.

Wu Colombia, urumiwi-u oroma ali wu ofesi ya tambi. Ndanoodhilimbi-edha irana vyevyo vyaode miyo vaurumiwanga, mbwenye vangavirile yawa imbo-i ndaona ira tandichinje. Fendo yoroma waingumi yanga ndatoovepa ira tandiva-e urumiwi unango. Voi ee-no ndatoorumiwa ninga misionariyo musidadi la Neiva isa ya Huila.

Basa yolaleela inondisangalali-a maningi. Nda-anathele vahora yaira miyo upainiya wu Filandia, hora dhinango ndaroma laleela namaebe-i maningi fiyedha maulo. Ndingathenle wene miyo na Sirkka, nanoolaleela thitho dambo nlilothene. Nalaleelanga wu isa indendai, hora dhinango nagona karonimwi-u. Vyevi vyanoonikami-a ira na-amalenga hora indendai niwendanga thitho dambo lo-arela nanooroma laleela mombaranya.

Ninga-eliwile kala misionariyo, natooroma okoka sangalala na urumiwi ninga voroma vene. Pingwi-u watoulukula thitho abali awu Colombia tali alemezo, audhivela na osimba.

Duzi na Neiva weo walaleela i-yo, watookala masidadi menli weo wa-ali Amboni. Ndanoofunechecha thitho ira milanyu yapama ya Umwene ifiye mumasidadi enala. Mbwenye namwasa oi muvisa vyevi mwanooireya khondo maningi, alendo katakala obareleya. Ee-no ndanoolobela ira mumasidadi menlala mufwanyeye mutu ofunjedha imbarimbri nokala wa Mboni. Ndanoofunechecha thitho ndingaguman’nena mutu okumela mumasidadi menlala wu Neiva, adhamala funjedha imbarimbari awelele waniwa ira amalaleelenga vya Umwene wa Nlungu. Kandaidhiwa ira Yohova utokaana ndhila yapama maningi kwaranya yeniyo yathuulela miyo.

Va-anavire hora indendai ndatooroma funjedha Bibiliya na zombwe mwinango dhinalee Fernando González. Liye akala wu Algeciras, limbo-i mwamasidadi weo wa-ali Amboni. Fernando anoowenda sizo wa makilometru 50, dha wu Neiva dhalaba basa. Anookozeela pama yofunjedha iliyothene thitho atooroma fwanyeya vamigumanoni yothene. Romela va sumana yaromile liye funjedha Bibilya, Fernando anoogumanyei-a atu asidadinimweemo noafunji-anga vyongo vyafunjedha liye Bibilyani.

Fernando abadiziwile mu Janeiro wa 1990, vangavirile myedi 6 kumela vevo varomile liye funjedha Bibilya. Va-anavire hora indendai atooroma upainiya okaatheya. Voi wu Algeciras va-eeni utokala Mboni, vyali vyo-orucha ira ofesi ya tambi irumeo apainiya avakundu. Va Fevereiro wa 1992, sidadimo mwatokaathei-iwa pingo.

N’nga Fernando alaleela musidadilee baa-i? Kabe! Angathenle liye na i-yanee tatoothamela  sidadi ya San Vicente del Caguán. Leli ndi sidadi n’nango mwemo mwa-ali Amboni. Aliwa tatookami-a ira sidadinimo mukaathei-iwe thitho pingo. Muyawa ya 2002, Fernando atoo-eliwa kala namaing’anela isa thitho liye na i-yanee Olga, anaadhowanave laba urumiula.

Kumela vavyevyo vyaireilevi, nditofunjedha funeya oonga mo-ovira kundu mwasa okuza Umwene unolobelela i-yo. Yohova unoirana vyongo vyevyo vya-anaode i-yo irana. Thitho basa yolaleela kai yi-u njee.—Mat. 9:38.

Muyawa ya 1990, natoova-iwa urumiwi wa owendawenda. Isa yi-u yoroma yali musidadi ya Bogotá. Lelo ndi sidadi nlukulu la ilamboi. Nanouova maningi urumiula. Miyo na-iyananga, kanana dodoliso nlilothene lavakundu thitho nali na-analemeele makalanga sidadi nlukulu. Mbwenye Yohova atookwakwaneli-edha yolanyedhayee inofwanyeya va lemba la Afilipi 2:13 vanoonga ira: “Nlungu ngunoulimbi-ani. Unouva-ani rima ofuna irana vyongo vinofuna liye na kopolo dhoirana vyongovyo. Liye unoirana vyevyo namwasa oi ndi vyevyo vinom’sangalali-a.”

Vasogolovee natoodhowa malaba muisa inango ya sidadi ya Medellín, lelo liongile i-yo maromelou. Atu aweo tali tangamadhi lemeela vyongo vyauwalanga vyevyo vyaireya ndhila, moi kataviona kala vyorucha. Mofwanafwani-a, vahora inango ndiiri-anga funjedha wa Bibilya, atu tatooroma li-edhana futi vandhe va nyumba yali i-yomo. Ndanoofuna gona vathi ira bala ya-andifwanye mbwenye ndatoodabwa ira namafunjedhuo kaaovile thitho atoodhowanave leri ndima. Angamari-idhe leri atookumela vandhe. Vangavirile hora yoyeva atoadhana a-imee ambili ang’ono thitho atoonga ira: “Pepani ndadhowile matukula a-imala.”

Mbwenye vatookala hora dhinango vevo ingumi yi-u vyali aliwa vangovini. Dambo n’nango nilaleelanga i-yananga atoodha atamanganga thitho aoneya ira aira ova maningi. Liye atoonga ira mutu mwinango afuna am’li-edhe futi. Vyevi vyatoondiovi-a maningi. Mbwenye vasogolovee natoozindiyela ira mutu ana futuo, kaafuna m’li-edha Sirkka mbwenye mutu mwinango wenuo avira vaduzi na liye.

Vira wahora natooroma lemeela thitho kanaova vyauwalanga vyaireya ndhila. Nanoolimbi-iwa nolimba rima wa Amboni aisa yei enao talimbanana vyorucha ninga vyevi, venango vyokwaranya veva. Nanoona ira akala Yohova unoakami-a pyoi na-iyene thitho unodha nikami-a. Hora dhothene nanoo-arela malangi-o aandimuwa avapingoni, iranga vyongo mosamala thitho i-ya vyongo vyothene mandhani mwa Yohova.

Mbwenye hora dhinango vyongo kavyafiya voopi-a ninga mwemo mwathuulela i-yo. Mofwanafwani-a, dambo n’nango ndingali m’mba ndatoovwa ninga a-iyana ambili anaakangana undhe wa nyumbiyo. Kandadhiveliwa ona atu takangananga. Mbwenye mwinyaa vandhuo, atoondiitana ira ndikale konde. Vasogolovee ndatoozindiyela ira kai atu takanganao mbwenye dhali mbalame dhinoitaniwa Papagaiyo. Thitho dhafwanafwani-edha mwemo atu amanyumba owandamana vyaira aliwa.

Muyawa ya 1997, ndatoo-eliwa kala namalangi-a wa xikola yofunji-a urumiwi. b Ndanoosangalala wachela mafunji-edho a xikola ya gulu. Mbwenye ndali nda-anathuulelevo ira dambo n’nango ndinodha kaana ngari yofunji-a maxikolala.

Voi ee-no ndatoodhowa malaba ninga namaing’anela wa gawo. Vyoi vakalenga namaing’anela wa gawo vingamadhi, ndatoowelela dhowa makala namaing’anela isa. Ee-no wa vyawa vyokwaranya 30, ndanoosangalala laba ninga namalangi-a thitho namaing’anela owenda wenda. Ndatoofwanya maraeli-o manjinji namwasa olaba maurumiwi enala. Mbwenye kaiira hora dhothene vyongo vyanoondiwendela pama. Dedi-ani ndoowandeleni.

Mwaibaliwelo ndili olimba rima. Kaleloli likadhi lindikami-anga ndagumanana vyorucha. Mbwenye hora dhinango ndikadhi ndiiranga vyongo motamanga rima vofuna samalela vyongo pingoni. Mofwanafwani-a, ndikadhi ndilimbi-anga abali enango ira tathonyi-edhenga udhivela thitho tathuulelenga afwiwa. Mbwenye onga imbarimbari, vahora imbo-ive yeniyo miyo thitho ndanoorucheya thonyi-edha makalelwao.—Aro. 7:21-23.

Hora dhinango ndanoosukwala namwasa wa vyongo vyadawi-a miyo. (Aro. 7:24) Dambo n’nango ndatoom’mwandela Yohova mulobelo ira ndi-iye vyanga umisionariyo ndiwelele wu Filandia. Maulo adambo lelo ndatoodhowa migumanoni yapingo. Vyafunjedhile miyovyo vyatoondikami-a ona ira kandinofwanela i-yachi urumiula mbwenye ndivilimbi-edhe saka-edha vyongo vinodawi-a miyo. Kumela vahora yeniyo ndinolimbi-iwa namwasa wa mwemo Yohova muwakulele liye malobelwanga. Ndinom’simba thitho ira utondikami-a moriya rima ira ndilimbanena vyongo vinodawi-a miyo.

Miyo na Sirkka ninom’simba Yohova namwasa oniva-a ngari yokala muurumiwi wahora dhothene wa vyawa vinjinji ee-ni. Ndinom’simba thitho Yohova namwasa ondiva-a i-yana ororomeleya thitho waudhivela.

Vachineneeva ndinokwakwani-a vyawa 70 thitho ndino-iya laba ninga namalangi-a na namaing’anela isa. Mbwenye vyevi kavinondisukwali-a. Ndinoonga ee-no namwasa oi ndinororomela ira ninom’lemeza Yohova nam’labelanga modhiyevi-a thitho m’lambela namwasa om’dhiveliwana nom’simba. (Mik. 6:8; Mrk. 12:32-34) Mutu unodhowanave m’lemeza Yohova angalive ira kanoira urumiwi ooneya waatu.

Ndathuulela maurumiwi akadhi miyo ndaalabanga, ndinoona ira kandaawanchele namwasa oi ndili okwaranya atu enango venango namwasa oi ndatookaana dodoliso n’nangolee lavakundu. Malo mwavyevyo, Yohova atoondiva-a urumiula namwasa oriya rimawee ulukulu. Thitho atoondiva-a angalive ira ndanoodawi-a vyongo vinango. Ndinoidhiwa ira ngu Yohova ukadhi andikami-anga ira ndiode laba maurumiwala. Ee-no ndinooda onga ira fooka wanga utoiri-a ira kopolo dha Nlungu dhioneele.—2 Ak. 12:9.