Nenipepilwe ka 1955, mwa mba yaluna lu baana babalaalu mi ki na ñomba. Nenihulezi mwa sibaka sesili bukaufi ni liwate kwa mboela wa Finland, mi sibaka seo cwale sesibizwa Vantaa.

Bo ma nebakolobelizwe ni kuba yomuñwi wa Lipaki za Jehova lilimonyana pili nisika pepwa kale. Nihakulicwalo, bo ndate nebalwanisa niti mi nebasa lumelezangi bo ma kuituta ni luna Bibele kamba kuya ni luna kwa mikopano ya puteho. Kacwalo, neba lulutanga litaba za matatekelo za mwa Bibele bo ndate hane babanga siyo.

Kuzwa feela kwa bwanana, neniikatulezi kuutwa Jehova. Ka mutala, hane ninani lilimo ze 7, bo muluti baka neba ninyemezi hahulu bakeñisa kuli nenihanile kuca sico sesibizwa verilättyjä (ili keke ya kwa Finland yepangilwe fa mali ni lika zeñwi). Baniswala ni kusina malama aka kuli banicise keke yeo ka foloko. Ka litohonolo nafasula foloko yeo mwa lizoho labona.

Hane ninani lilimo ze 12, bo ndate batimela. Hamulaho wa fo, nenikona kuyanga kwa mikopano ya puteho. Mizwale mwa puteho neba niisize hahulu pilu, mi taba yeo neitahisize kuli nieze zwelopili ya kwa moya. Nakala kubalanga Bibele zazi ni zazi ni kuituta ka tokomelo lihatiso zaluna zetomile fa Bibele. Kueza cwalo neku nitusize kuunga muhato wa kukolobezwa inze ninani lilimo ze 14, ili la August 8, 1969.

 Nenibile paina wa kamita nakonyana kuzwa fonifeleza sikolo. Lisunda lisikai kuzwa fo, natutela kwa Pielavesi, kone kutokwahala hahulu bakutazi ba Mubuso.

Kwa Pielavesi ki kona kone nizibanezi ni bo Sirkka bane ninyalani ni bona hasamulaho. Neni batabezi kakuli nebaikokobeza mi nebalata hahulu Jehova. Nebasa bati kundongwama sifumu kamba kuli bazibahale hahulu. Bubeli bwaluna nelubata kusebeleza Jehova ka mone lukonela kaufela, mi neluitukiselize kueza musebezi ufi kamba ufi one lukafiwa. Nelunyalani la March 23, 1974. Kufita kuyo pumula hamulaho wa sinawenga, neluikatulezi kuyo sebeleza kwa Karttula, ili kone kutokwahala hahulu bakutazi ba Mubuso kufita mane ni kwa Pielavesi.

Kuzwa feela folunyalanela, Jehova ubonisize kuli uka lutusa kufumana lika zelutokwa kwa mubili ibile feela lubeya za Mubuso mwa sibaka sapili. (Mat. 6:33) Ka mutala, hane luli mwa Karttula nelusina mota. Kwa makalelo, neluzamayanga ka kuitusisa njinga. Nihakulicwalo, nekubatanga hahulu ka nako ya maliha. Kuli lukutaleze mwa kalulo ya simu ya puteho yeneli yetuna hahulu, nelutokwa kuba ni mota. Kono nelusina masheleñi a kuleka mota.

Ka kusalibelela, bahulwani baka bone nitatama bato lupotela. Balufa mota yabona. Mitelo ya mota yeo neilifezwi kale. Nelutokwa feela kulekela mwateñi mafula. Hasamulaho, lwaba ni mota yene lutokwa.

Jehova naabonisize kuli ki yena yanaanani buikalabelo bwa kulutusa kufumana zene lutokwa kwa mubili. Zene luswanela feela kueza, ki kubeya za Mubuso mwa sibaka sapili.

Ka nako yene lukena Sikolo sa Sebelezo ya Bupaina ka 1978, muzwale yabizwa Raimo Kuokkanen, a yanaali yomuñwi wa baluti baluna, alususueza kuli lukupe kukena Sikolo sa Giliadi. Kacwalo, lwakala kuituta Sikuwa ilikuli lukwanise zetokwahala kuli lukene sikolo seo. Nihakulicwalo, ka 1980, pili lusika kupa kale kukena sikolo seo, nelumemilwe kuyo sebeleza fa ofisi ya mutai mwa Finland. Ka nako yeo, bane basebeleza fa Betele nebasa koni kukupa kukena Sikolo sa Giliadi. Nelubata kusebeleza kwanaaka luisa Jehova isiñi kone lubata luna. Kacwalo, lwaamuhela memo yeo. Nihakulicwalo, neluzwezipili kuituta Sikuwa  kuli mwendi kwapili nelukaba ni kolo ya kukupa kukena Sikolo sa Giliadi.

Lilimonyana kuzwa fo, Sitopa Sesietelela nesifile bane basebeleza fa Betele kolo ya kukona kukupa kukena Sikolo sa Giliadi. Nelutalelelize mafomu honafo feela, kono taba yeo neisa talusi kuli nelusa tabeli kusebeleza fa Betele. Nelulata hahulu kusebeleza fa Betele! Nelubata feela kuifana kuyo sebeleza kone kutokwahala hahulu bakutazi ba Mubuso hane lukafiwa kolo yeo. Nelumemilwe kuyo kena Sikolo sa Giliadi mwa kilasi ya bu 79, mi nelukwazize sikolo seo mwa September ka 1985. Hasamulaho, lwalumiwa kuyo sebeleza kwa Colombia.

Mwa Colombia, musebezi one lufilwe sapili neli wa kusebeleza fa ofisi ya mutai. Neniezanga mone nikonela kaufela kupeta musebezi one nifilwe, kono hamulaho wa silimo, neniikutwile kuli nenitokwa kufiwa musebezi usili. Lo neli lona lwapili ni lwa mafelelezo mwa bupilo bwaka kukupa kuli nifiwe musebezi usili. Hamulaho wa fo, nelulumilwe kuyo sebeza sina balumiwa mwa muleneñi wa Neiva kwa Huila.

Kuzwa feela kwamulaho, niikozi hahulu bukombwa. Hane nisali paina wa likwasha kwa Finland, fokuñwi nenikutazanga kuzwa kakusasana kuisa manzibwana hase kuunsufezi. Hane lusazo nyalana, na ni bo Sirkka hape fokuñwi nelukutazanga lizazi kaufela. Hane luyo kutalezanga kwa libaka zeneli kwahule, fokuñwi nelulobalanga mwa mota yaluna. Kueza cwalo neku lutusanga kuli lusike lwasinyeza nako kwa kuzamaya musipili omutelele mi nelukona kukala kukutaza isali kakusasana.

Hane luli balumiwa, hape nelutukufalezwi hahulu mwa bukombwa sina feela kwamulaho. Puteho yaluna yahula, mi mizwale ni likaizeli ba kwa Colombia nebanani likute, lilato, ni buitumelo.

Nekunani litolopo zeneli bukaufi ni kwa Neiva kone lusebeleza, ili mone kusina Lipaki. Nenibilaezwanga hahulu ka za mo taba yende neika kona kuyo kutalezwa mwa libaka zeo. Kono bakeñisa kuli nekunani mifilifili mwa libaka zeo, batu bane bazwa kusili nebakona kubulaiwa. Kacwalo, nenilapezi ku Mulimu kuli kube ni mutu yazwa ku yeñwi ya litolopo zeo yanaakaba Paki. Neninahana kuli mutu yo naaswanela kupila mwa Neiva kuli aitute niti. Mi hape nenilapezi kuli mutu yo hasaakolobelizwe, uswanela kuhula kwa moya kihona akakutela kwa tolopo yahabo yena kuyo kutaza. Nenisa zibi kuli Jehova naanani nzila yende hahulu ya kutatulula ka yona butata bo.

Nakonyana kuzwa fo, nakala kuituta Bibele ni mucaha yabizwa Fernando González. Naapila mwa Algeciras, yeñwi ya litolopo mone kusina Lipaki. Fernando naazamayanga musipili oeza likilomita zefitelela 50 kutaha kwa Neiva kwanaasebeleza. Naaitukisezanga hande tuto ni tuto mi honafo feela akala kufumanehanga kwa mikopano kaufela ya puteho. Kuzwa feela sunda yapili hakala kuituta, Fernando naatalusezanga batu bane bapila mwa tolopo yahabo yena litaba zanaaituta mwa Bibele.

Bo Fernando nebakolobelizwe mwa January ka 1990, ili likweli ze 6 kuzwa fobakalela kuituta Bibele. Hasamulaho, baba paina wa kamita. Bakeñisa kuli nese kunani Paki alimuñwi mwa Algeciras, ofisi ya mutai cwale neikona kuluma mapaina  babaipitezi kuli bayo sebeleza mwa sibaka seo. Mwa February ka 1992, puteho yatomiwa mwa tolopo yeo.

Kana bo Fernando nebakutalezanga feela mwa tolopo yahabo bona? Batili! Hamulaho wa kunyala, bona ni bakubona batutela kwa San Vicente del Caguán, ili yeñwi ya litolopo mone kusina Lipaki. Teñi koo batusa kuli puteho itomiwe. Mwa 2002, bo Fernando nebaketilwe kuba muokameli wa mupotoloho, mi bona ni bakubona, bo Olga, bazwezipili kupotelanga liputeho kuto fita ni kacenu le.

Zebonwi zeo neli nilutile kuli ki kwa butokwa kulapelanga ka kunonga ka za misebezi yelueza mwa kopano. Jehova uezanga lika zelusa koni kueza. Mane ki yena muñaa kutulo, isiñi luna.—Mat. 9:38.

Mwa 1990, nelufilwe musebezi wa kupotela liputeho. Mupotoloho waluna wapili neuli mwa muleneñi o mutuna wa Bogotá. Neluikalezwi kuli mwendi haluna kupeta hande musebezi wo. Na ni bo musalaaka haluna buikoneli bobuipitezi. Mi nelusika twaela kupila mwa muleneñi opatehile hahulu. Nihakulicwalo, Jehova naatalelelize sepiso yahae ye kwa Mafilipi 2:​13, yeli: “Mulimu kabakala kulata kwahae ki yena yamifa maata, ili kumifa takazo ni maata a kuunga muhato.”

Hasamulaho, nelulumilwe kuyo sebeleza mwa mupotoloho one uli mwa Medellín, ona muleneñi oni bulezi kwa makalelo. Batu ba mwa muleneñi wo nebatwaezi hahulu kubona mifilifili, kuli mane nebatuhezi kuba ni sabo. Ka mutala, nako yeñwi hane nizamaisa tuto ya Bibele, batu babañwi bakala kukunupana litobolo fande a ndu ya muituti waka. Nenisabile hahulu kuli mane nenibatile kuwela fafasi, kono muituti waka yena naazwezipili kubala paragilafu mi naasa bonahali kuikalelwa. Hasaafelize kubala paragilafu, anitaluseza kuli wataha pili mi azwela fande. Hamulaho wa nako, ataha ni bana bahae babanyinyani bababeli, mi abulela ka kuwa kuli: “Muniswalele, neniizo nga bana baka.”

Hape nekunani linako zeñwi fone bubezi mwa lubeta bupilo bwaluna. Zazi leliñwi hane lukutaza fa ndu ni ndu, bo musalaaka bataha ku na inze bamata, mi nebabonahala kusaba hahulu. Banitaluseza kuli kunani mutu yanaa bakunupa tobolo. Taba yeo nei nisabisize hahulu. Hasamulaho, lwalemuha kuli kanti mane muuna yo naasakunupi bo Sirkka, kono naakunupa muuna yanaafita bukaufi ni bona.

Nako hane inze iya, lwafita fa kutuhela kusaba mifilifili ya mwa silalanda. Nelususuelizwe hahulu ki buitiiso bwa mizwale ba mwa sibaka seo bane bakopana ni miinelo yecwalo mane ni yemiñwi yemaswe hahulu nikufita. Taba yeo nei lutusize kukolwa kuli Jehova naaka lutusa sina feela mwanaa batuseza. Kamita nelumamelanga kelezo yezwa kwa baana-bahulu, kueza lika zeñwi kuli luisileleze, ni kusiya lika kaufela mwa mazoho a Jehova.

Kono niti ki kuli, miinelo yemiñwi neisa koni kutahisa kozi sina mone lunahanela. Nako yeñwi, neniutwile inge kuli basali bababeli nebatapaulana fande a ndu ya mutu yene nikutaza ku yena. Nenisa tabeli kubona batu babaomana, kono muñaa ndu anikupa kuli luyo ina fande. Haluzwela fande lwalemuha kuli kanti mane nesi basali bane  baomana, kono neli linyunywanu zepeli za mufuta wa macikwele zenesweli kulikanyisa basali banaayahile mabapa ni bona mutu yene nikutaza ku yena.

Ka 1997, neniketilwe kuba muluti wa Sikolo sa Tuto ya Bukombwa. b Kamita neniitebuhanga hahulu kukena likolo zeonga-ongilwe ki kopano, kono nenisa nahanangi kuli nako yeñwi nenikaba muluti wa sesiñwi sa likolo zeo.

Hasamulaho neniketilwe kuba muokameli wa sikiliti. Tukiso ya kuba ni baokameli ba likiliti hane ifelisizwe, nakupiwa kuba muokameli wa mupotoloho hape. Kacwalo, ka lilimo zefitelela 30, niikozi kueza musebezi wa buluti ni wa kupotela liputeho. Misebezi yeo initahiselize limbuyoti zeñata hahulu. Kono fokuñwi nenikopananga ni miinelo yetaata. Kashe nimitaluseze ka za teñi.

Ni mutu yanani hahulu bundume. Taba yeo initusize kutiyela miinelo yetaata. Nihakulicwalo, fokuñwi neniisanga hahulu pilu kwa kulukisa mafosisa mwa puteho, mi neniezanga cwalo ka kutula tikanyo. Fokuñwi nenihapelezanga babañwi kuli babonise lilato ni kutwisiso ku babañwi. Kono niti ki kuli, mwa miinelo yeo ni na nenipalelwanga kubonisa tulemeno to.—Maro. 7:​21-23.

Bufokoli bwaka nebutahisanga kuli niikutwe hahulu kuzwafa ka linako zeñwi. (Maro. 7:24) Nako yeñwi nenibulelezi Jehova mwa tapelo kuli neikaba hande hane nikatuhela kuba mulumiwa ni kukutela kwa Finland. Zazi leo manzibwana nenifumanehile kwa mukopano wa puteho. Litaba zene niutwile kwa mukopano wo neli nitusize kukolwa kuli nenitokwa kuzwelapili kueza musebezi one nifilwe ni kuzwelapili kusebeleza fa bufokoli bwaka. Kuto fita ni la kacenu le, nizwezipili kuitebuha hahulu mo Jehova naaalabezi tapelo yaka. Kutuha fo, niitumela hahulu ku Jehova kakuli unitusize kufelisa bufokoli bwaka.

Na ni bo Sirkka luitumela hahulu ku Jehova kabakala tohonolo yelubile ni yona ya kuba mwa sebelezo ya nako kaufela ka lilimo zeñata. Mi hape niitumela hahulu ku Jehova kabakala kunifa musali yanilata ni yasepahalile ku na ka lilimo ze kaufela.

Nituha nikwanisa lilimo ze 70 mi nikatuhela kuba muluti ni muokameli wa mupotoloho. Nihakulicwalo, haniikutwi bumaswe. Kabakalañi? Kakuli nikozwi kuli nto yekutekehisa hahulu Jehova ki kumusebeleza ka buikokobezo ni kumulumbeka kabakala kuli lumulata hahulu kuzwelela kwatasaa pilu mi lwaitebuha zaluezeza. (Mika 6:8; Mare. 12:​32-34) Kuli lukutekehise Jehova, halutokwi kuba ni buikalabelo bobuipitezi.

Hanihupula misebezi yeniikozi, nilemuha kuli nenisika fiwa misebezi yeo ka libaka la kuli ni wa butokwa kufita babañwi, kamba ka libaka la kuli ninani buikoneli bobutuna kufita babañwi. Kutokwa nihanyinyani! Kono Jehova naanifile misebezi yeo kabakala sishemo sahae. Naanifile misebezi yeo, kusina taba ni bufokoli bone ninani bona. Naziba kuli nikonile feela kupeta misebezi yeo ka tuso ya Jehova. Kabakaleo, bufokoli bwaka butahisize kuli niiponele maata a Mulimu amatuna.—2 Makor. 12:9.