Ngwasemukile mumwaka wa 1955, kaha yami ngwapwile kanyike chikuma hali vayaya jami vamalunga vavali. Ngwakolelele kusulo yaFinland, kuze jino vanakuvuluka ngwavo nganda yaVantaa.

Mama vamumbapachishile nakupwa Chinjiho chaYehova shimbu kanda ngusemuke. Chipwe ngocho, tata ketavilile muchanoko, kaha nawa ketavishile mama atunangule Mbimbiliya chipwe kuya nayetu kukukungulukako. Ngocho atunangwilenga muchano wamuMbimbiliya wamaputukilo kachi nge tata nafumuho.

Kufuma vene kuunyike wami, ngunalinginga vyuma vize navivwisa Yehova kuwaha. Chakutalilaho, omu ngwapwile namyaka yakusemuka 7, mulongeshi wami apihililile chikuma nayami mwomwo ngwakanyine kulya jimbolo jakutungisa manyinga jize vavulukilenga ngwavo verilättyjä, jize valilenga vaka-Finland. Ou mulongeshi achokele chihanda chimwe chambolo nangalafwa nakungukwata hajimbangi nakushishinyika mbolo kana mukanwa kami. Ngwakwachile ngolo, ngocho ngwatapwile yize ngalafwa mulivoko lyenyi.

Tata afwile omu ngwapwile namyaka yakusemuka 12. Kufuma vene halwola kana, ngwaputukile jino kukungulukanga lwola lwosena. Vandumbwetu muchikungulwilo vanguzangile chikuma, kaha echi changulingishile nguzovoloke kushipilitu. Ngwaputukile kutanganga Mbimbiliya hakumbi hakumbi, nakulinangulanga kanawa mikanda yetu. Kulinga vyuma kana changukafwile nguzovoloke nakungumbapachisa omu ngwapwile namyaka 14 ha August 8, 1969.

Omu ngwakumishile shikola, ngwaputukile kuzata upayiniya washimbu yosena. Omu mwahichile vyalumingo vyavindende, ngwayile muPielavesi  kwakamwihi nambaka yaFinland muze mwapwile nakusakiwa vaka-kwambulula vavavulu.

MuPielavesi mukiko ngwawanyine mwanapwevo walijina lyaSirkka, uze nangukambata kupwa puwami. Kulinyisa chenyi nakupwa wakuhya kushipilitu vikiko vyangukunywile. Kafwililile kuya puho chipwe kufwila luhetoko. Tuvosena twafwililile kuzachila Yehova namuchima wetu wosena, chamokomoko nakala mulimo navatuhana. Twalimbachile ha 23 March, 1974. Muchishishisa chakuya nakulihizumuna hanyima yakulimbata, oloze twayile kuKarttula, kuze kwapwile nakusakiwa vaka-kwambulula Wangana vavavulu.

Kufuma vene hakulimbata chetu, Yehova asolwele hatoma ngwenyi mwatuzakamanga muvyuma twasakiwa, kachi nge natutonda chatete Wangana wenyi. (Mateu 6:33) Chakutalilaho, muKarttula katwapwile namunyauko. Hakavanga twazachishilenga kinga. Oloze katwapwile najimbongo jakulanda munyauko.

Halwola kana, yayami ejile nakutumenekela. Kaha atuhanyine munyau wenyi. Munyau kana, wapwile wakusonekesa lyehi kuishuwalesi, yetu twapwile kaha namulimo wakulanjilamo maji. Kufumaho, twapwile jino namunyau twapwile nakusakiwa.

Yehova asolwele hatoma ngwenyi ikiye ali namulimo wakutuzakama etu. Shikaho etu mulimo wetu shina, kuhaka kaha Wangana wenyi kulutwe.

Omu twapwile kuShikola yavaPayiniya mu 1978, ndumbwetu Raimo Kuokkanen, a uze apwile umwe wavaka-kutunangula atukolezezele tusoneke fwomu yakuya kushikola yaNgileyate. Ngocho twaputukile kulinangula Chingeleshi, mangana tukatemo kuya kushikola kana. Kuheta mumwaka wa 1980, shimbu kanda tusoneke fwomu kana, vatusanyikile kuya nakuzachila haofesi yamutango muFinland. Halwola kana vaka-Mbetele kavasonekelenga fwomu yakuya kuNgileyateko. Etu twasakile kuzata kala kweshokwo Yehova namono ngwenyi kunatuwahila keshi kuze tunasake etu vaveneko. Ngocho twetavilile kuya hamutango. Chipwe ngocho, twatwalilileho lika kulinangula Chingeleshi, mwomwo twamwene ngwetu kulutwe pamo tunahase kukasoneka fwomu yakuya kuNgileyate.

Omu mwahichile myaka yayindende, Lizavu lyaKutwaminyina, lyetavishile jino vaka-Mbetele kusoneka fwomu yakuya kuNgileyate. Hahaze vene twasonekele jifwomu kana. Katwalingile ngocho  mwomwo yakuhona kulivwisa kuwaha kuzachila haMbeteleko. Nduma. Oloze twalingile ngocho mwomwo twasakile kuzachila kuze kwapwile nakusakiwa chikuma kukafwa, kachi nge tunatemo. Shikaho vatusanyikile kuShikola yaNgileyate, kaha twakumishile shikola yetu yakusokesa 79 muSeptember 1985. Kaha vatutumine kuya nakuzachila muColombia.

Omu twayile muColombia, chatete twayile nakuzachila haofesi yamutango. Ngwazachilenga nangolo mangana ngutesemo mulimo wami. Oloze omu ngwatwamine mwaka umwe hamutango, ngwamwene ngwami tunakusakiwa kutuhana mulimo weka. Elu lukiko lwapwile lwola lwatete kaha nawa lwamakumishilo mukuyoya chami ngwalombele vanguhane milimo yeka. Kutwala muze, vatulwezele tuzate mulimo waumishonali wamuwande munganda yaNeiva, mungalila yaHuila.

Ngunalivwisanga kuwaha kuzata mulimo wakwambulula. Omu ngwapwile payiniya wamujike muFinland, ngwapwilenga nakwambulula kufuma chimene nakuheta kuchingoloshi. Kahomu twalimbachile napuwami Sirkka, twazachilenga nawa likumbi lyamuundu mumulimo wakwambulula. Shimbu jimwe, twasavalilenga mumunyau wetu, kachi nge tunayi nakwambulwila kujingalila jakwakusuku. Echi chatulingishilenga tuputuke kuzata washi halikumbi lyakavangijileho.

Hakupwa tuvamishonali vamuwande, twazachilenga cheka natwima ngana muze twazachilenga hakavanga. Chikungulwilo chetu chazovolokele kaha vandumbwetu muColombia vatuvumbikilenga nakutusolwela zangi nakutusakwilila.

Mujingalila jize japwilenga kwakamwihi naNeiva, kamwapwilenga Vinjihoko. Ngocho ngwalizakaminyine nakushinganyeka omwo mujimbu wamwaza unahase kuheta kujingalila kana. Chipwe ngocho jingalila kana kajapwile jakukingiwa kuli vatu vakufuma kwekako, mwomwo mwapwilenga vasamalyamba. Ngocho ngwalombele ngwami, kachi mujingalila kana mukapweko mutu umwe uze mwakapwa Chinjiho. Ngwalombele ngwami mutu kana akayoyelenga muno muNeiva mangana alinangule muchano. Kaha nawa ngwalombele ngwami mutu kana, atela kuzovoloka nahanyima yakumumbapachisa nakukinduluka kwimbo lyavo mangana akazate mulimo wakwambulula. Kangwatachikijile ngwami Yehova apwile najila yenyi yeka kuhambakana yize ngwashinganyekele yamiko.

Kutwala muze, ngwaputukile kulinangula Mbimbiliya namukweze walunga walijina lyaFernando González. Atwaminenga munganda yaAlgeciras, muze kamwapwilenga Vinjihoko. Fernando atambukilenga jikilomita jakuzomboka 50 kuya nakuzachila kuNeiva. Aliwahishilenga kanawa chilongesa hichilongesa chize mwalinangula. Nakushimbula chiku aputukile kukunguluka lwola lwosena. Kufuma vene muchalumingo chatete aputukile kulinangula, Fernando akungulwilenga vakwavo vamunganda yenyi nakuvanangula vyuma alinangwilenga.

Fernando vamumbapachishile muJanuary 1990, omu mwahichile kaha tukweji 6 kufuma haze aputukile kulinangula Mbimbiliya. Kufumaho, aputukile kuzata upayiniya washimbu yosena. Hakuwana nge muAlgeciras mwapwile jino ndumbwetu, ngocho chapwile chachashi ofesi yamutango kutumamo vapayiniya vakulipwila. Kaha kuheta muFebruary 1992, munganda kana vatungilemo chikungulwilo.

 Uno Fernando ambulwililenga kaha munganda yenyi tahi? Nduma. Omu ambachile ayile hamwe napuwenyi kunganda yaSan Vicente del Caguán, munganda muze kamwapwile nawa Vinjihoko. Vatungile chikungulwilo munganda kana. Kaha kuheta mumwaka wa 2002, Fernando vamutongwele kupwa kalama wakutambwoka. Kaha noholyapwa vene ngana ikiye napuwenyi Olga, vachili lika nakuzata mulimo wakujinguluka.

Kumujimbu kanou ngunalinangulako nge, chapwa chachilemu kulomba vyuma vyakutalisa kumulimo wetu wamuliuka. Yehova eji kulinganga vyuma vize katweshi kuhasa kulingako. Mwomwo mulimo wakwaha wapwa mulimo wenyi keshi wetuko.—Mateu 9:38

Mumwaka wa 1990 vatulwezele kuya nakuzata mulimo wakutambwojoka. Twaputukile kuzachila munganda yayinene yaBogotá. Twevwilenga woma kuzata mulimo kana. Ami napuwami katwapwile nauhashi wakuzata milimo yimweko, kaha nawa katwejililile kutwama mujimbakako. Chipwe ngocho, Yehova ateselemo lushiko lwenyi luze lwatwama hali Wavaka-Fwilipi 2:13 lwakwamba ngwalwo: “Kalunga ikiye eji kumijikijisanga, nakumihana muchima wakufwila kulinga vyuma nangolo jakulingamo nawa, nge omu evwila kuwaha.”

Kutwala muze, vatutumine nawa muchihanda chamunganda yaMedellín, nganda yize ngwavulukanga hakavanga. Munganda kana mwapwile vilinga vyaulyanyi chikuma, kaha echi chalingishile vatu vahone kwivwa nawoma. Chakutalilaho, likumbi limwe omu ngwapwile nakutetekela chilongesa chaMbimbiliya, twevwile haweluka vatu vali nakutambakana. Ngwasakile kuholoka hamavu oloze chilongesa chami atwalileho lika kutanga palangalafu oku naundu. Omu akumishile kutanga alombele lisesa mangana ayenga haweluka, kahomu mwahichile lwola lwalundende ejile navana vavali nakuhanjika mujila yakuunda ngwenyi: “Ngukonekelenuko, ngwayanga nakumbata vana vami.”

Kwapwilenga nawa lwola lukwavo luze twapwilenga muponde. Omu twapwile mumulimo wakwambulwila kuzuvo hizuvo, puwami ejile lumbushi kuli ami oku nasoloka kuhomba. Ambile ngwenyi vanamwase chilyanga. Echi changwivwishile kumuchima kupihya. Chipwe ngocho, twawanyine nge uze lunga kasakile kwasa puwami Sirkkako, oloze apwile nakusaka kwasa lunga umwe uze apwile nakuhita kwakamwihi naikiye.

Kutwala muze, twomikilenga chamokomoko naukalu kana. Twomikile hakumona omu vandumbwetu vamunganda kana vomikilenga haukalu kana nahaukalu weka waunene. Twamwene ngwetu nge Yehova ali nakukafwa ava vandumbwetu, kaha nayetu nawa mwatukafwa. Twakavangijile vyuma vatulwezelenga vakululwane muchikungulwilo, nakukavangiza jindongi jamwakupwila vakuvanguluka, nakuseza vyuma vyosena mumavoko aYehova.

Chipwe ngocho, ukalu umwe kawapwilenga waponde chikumako ngana muze twashinganyekele. Lwola lumwe ngwevwile mapwevo vavali vali nakulitukana haweluka wazuvo yize ngwapwile nakwambulwila. Kangwasakile kumona vaze vatu vapwile nakulikokojwesako, ngocho uze ngwapwile nakwambulila angulwezele tuyenga hembo lyenyi. Omu twahetele haze hembo, twawanyine nge vize vikokojwola twapwile nakwivwa kavyapwile vyamapwevo vavaliko, oloze vyapwile tulongo vavali vaze  vapwile nakulondezeza vatu vaze valihachile nalimbo kana, vaze valikokojwesele.

Mu 1997, vangutongwele kupwa muka-kunangula muShikola Yakulinangula Milimo YamuLiuka. b Lwola lwosena ngweji kwivwanga kuwaha kupwa kumashikola amuliuka, oloze kangwashinganyekele ngwami nangukapwa namulimo wakupwa muka-kunangulako.

Kutwala muze, vangutongwele kupwa ngukalama wangalila. Omu kulongesa chakupwa natulama vangalila vachifumishileko, vangulwezele cheka kuya nakuzata mulimo wakujinguluka. Shikaho hamyaka yakuzomboka 30, ngunalivwisanga kuwaha kuzata mulimo wakupwa muka-kunangula namulimo wakujinguluka. Yehova natukisulanga chikuma hakuzata milimo kana. Chipwe ngocho, ngunamononga ukalu. Manenu ngumilumbunwine.

Ngwapwa ngumutu wakulifwelela chikuma, ngocho echi changukafwile ngulipike naukalu waunene chikuma. Chipwe ngocho, shimbu jimwe ngwafwilililenga kwolola vyuma muvikungulwilo. Halwola lumwe, ngwapwile nakukafwa vatu vamwe vapwenganga nazangi nakwashiwisa muchima. Chaluvinda, halwola kana nayami kangwapwile namuchima kanako.—Loma 7:​21-23.

Shimbu jimwe, ngwahombelenga mwomwo yatutenga twami. (Loma 7:24) Halwola lumwe, ngwalwezele Yehova mukulomba ngwami, ngwechenga mulimo waumishonali nakukinduluka kwimbo lyetu kuFinland. Halikumbi kana, ngwayile kukukunguluka nachingoloshi. Vyuma ngwalinangwile kukukunguluka kana vyangukunywile ngumone ngwami, ngwatela kutwalaho lika kuzata mulimo wami nakuzachila hatutenga twami. Kufuma vene halwola kana, ngweji kwanukanga omwo Yehova akumbulwile kulomba kana. Kaha ngweji kumusakwililanga hakumonomu nangukafwenga nguhonese tutenga twami.

Ami napuwami Sirkka twasakwilila chikuma Yehova, hakutuhana milimo yayivulu yize tunazatenga mumulimo washimbu yosena mukuyoya chetu chosena. Kaha nawa ngweji kusakwililanga Yehova hakunguhana pwevo wazangi kaha nawa wakushishika, uze ngunazachilanga nenyi hamwe hamyaka yoseneyi.

Kalinwomu nguhetese myaka 70, nakwecha kuzata mulimo wakupwa muka-kunangula nawakujinguluka. Chipwe ngocho, chuma kana kachangwivwisa kupihyako. Mwomwo ika? Mwomwo ngwafwelela ngwami chuma cheji kwivwisanga Yehova kuwaha shina, kumuzachila namuchima wakulikehesa nakumwalisa chakufuma kumuchima mwomwo yakumuzanga. (Mika 6:8; Mako 12:​32-34) Kuvumbika Yehova kachasakiwa ngwavo kuvanga tuzate milimo yayilemu chikumako.

Omu ngweji kwanukanga milimo ngunalivwisa kuwaha kunyima, ngweji kumonanga ngwami, kangwazachilenga milimo kana mwomwo ngwapwilenga nguwamulemu kuhambakana vakwetu chipwe mwomwo ngwavo ngwapwile nauhashi wakulipwilako. Oloze Yehova anguhanyine milimo kana mwomwo yalikoji lyenyi lyalinene. Anguhanyine milimo kana chamokomoko natutenga twami. Ngwatachikiza ngwami, Yehova ikiye nangukafwenga ngutesemo milimo kana. Shikaho nangwamba ngwami, Kalunga nangujikijisanga chikuma chamokomoko natutenga twami.—Koli. 2, 12:9.