In nul itzʼje toj 1955 ex aʼyine mas chʼin kyxol oxe wermane. In jaw chʼiye nqayin tiʼj costa sur te Finlandia toj jun lugar tok tbʼi toj ambʼil jaʼlo te Vantaa.

Bautisarin ntxuʼye ex ok te testigo de Jehová tej atxtoq junjun abʼqʼi tuʼn wul itzʼje. Noqtzun tuʼnj, mintiʼ xi tqʼoʼn nmane ambʼil te ntxuʼye tuʼn ttzaj tqʼoʼn xnaqʼtzbʼil qeye ex tuʼn qxiʼye kyoj chmabʼil. Pero tzaj tqʼoʼn xnaqʼtzbʼil qeye tiʼj Jehová qa mi aʼltoq nmane.

Atxix tej kʼwalx qiʼne, kubʼ nximane tuʼn nnimane te Jehová. Jun techel, tej qʼiʼntoq 7 abʼqʼi wuʼne, tzaj tqʼoj maestra wiʼje tuʼnju mintiʼ xi nwaʼne jun wabʼj tok tbʼi verilättyjä, aju bʼinchaʼn ik tzeʼn jun panqueque pero at chikʼ toj. Tukʼil jun tqʼabʼ tajtoq tuʼn tjaw tkʼabʼin ntziye ex tukʼil juntl tajtoq tuʼn tokx tqʼoʼn jun piẍ wabʼj toj. Pero mintiʼ kubʼ nyoʼne ex el nxoʼne tenedor toj tqʼabʼ.

Kyim nmane tej qʼiʼntoq 12 abʼqʼi wuʼne. Tuʼntzunju, ya jakutoq chinxe kyoj chmabʼil. Tuʼnju kubʼ kyyekʼin erman kykʼujlabʼil wiʼje, chʼiy wamiwbʼile tukʼil Jehová. Xi tzyet tuʼn tjaw wuʼjine Biblia tkyaqil qʼij ex tuʼn nxnaqʼtzane kyiʼj uʼj in che etz tuʼn ttnam Jehová. Onin jlu wiʼje tuʼn tkubʼ nximane tuʼn nbautisarine toj 8 te agosto te 1969 tej qʼiʼntoq 14 abʼqʼi wuʼne.

 Tej tkubʼaj tuʼn nxnaqʼtzane toj escuela, in noke te precursor regular. Tej tikʼ junjun seman, in xiʼye anqʼil atz Pielavesi jun lugar nqayin tiʼj centro te Finlandia tuʼntzun wonine tiʼj pakbʼabʼil.

Toj Pielavesi ok wojtzqiʼne Sirkka, aju ok te nxuʼjile yajxitl. Tbʼanel ela tmod toj nwitze tuʼnju kubʼ tin tibʼ ex kʼujlaʼntoq Jehová tuʼn. Kubʼ tyekʼin qa mintiʼ ok tqʼoʼn twiʼ tiʼj qʼinumabʼil ex tuʼn tten nim tiʼchaq te. Qajtoqe tuʼn t-xi qqʼoʼne aju mas tbʼanel te Jehová ex tuʼn t-xi qbʼinchaʼne alkyexku oklenj toj qajbʼebʼile te. O kubʼ mojeʼye toj 23 te marzo te 1974. Kubʼ qximane tuʼn miʼn qxiʼye toj luna de miel sino tuʼn qxiʼye ajbʼel Karttula jatumel kyajtoq erman onbʼil tiʼj pakbʼabʼil.

Atxix tej qkubʼ mojeʼye, o kubʼ tyekʼin Jehová qa tzul tqʼoʼn aju at tajbʼen qeye qa ma kubʼ qqʼoʼne Tkawbʼil tnejel toj qanqʼibʼile (Mat. 6:33). Jun techel, tej qajbʼene atz Karttula mintiʼtoq jun kar tuʼn tajbʼen quʼne sino oʼkx bisiklet. Pero ya mintiʼ bʼant jlu quʼne tej ttzaj nim cheʼw. Nya oʼkxju, ax ikx tuʼn qxiʼye pakbʼal kyoj lugar najchaq iltoq tiʼj tuʼn qxiʼye toj kar, pero mintiʼ qpwaqe tuʼn ttzaj qlaqʼoʼne jun.

Jun qʼij, pon jun kyxol ntzike visitaril qeye ex kyaj tqʼoʼn tkar qeye. Mintiʼ xi qchjoʼne twiʼ nix aju seguro. Oʼkx tuʼn tkuʼx qqʼoʼne gasolina toj.

Tzaj tyekʼin Jehová qa ok tzul tqʼoʼn aju at tajbʼen qeye qa ma kubʼ qqʼoʼne Tkawbʼil tnejel toj qanqʼibʼile.

Toj 1978, o tene toj Xnaqʼtzbʼil kye Pakbʼal toj tkyaqil Ambʼil. Tzaj tqʼamaʼn jun kyxol instructor qeye, aju Raimo Kuokkanen tbʼi tuʼn tkuʼx qnojsaʼne solicitud te Xnaqʼtzbʼil te Galaad. a Tuʼntzunju, xi tzyet tuʼn qxnaqʼtzane tiʼj yol inglés tuʼntzun kyjapun requisito quʼne. Noqtzun tuʼnj, ya mintiʼ xi qsamaʼne solicitud tuʼnju tzaj qʼoʼn txokbʼil qiʼje tuʼn qajbʼene toj sucursal te Finlandia toj 1980. Ex mintiʼ tzaj qʼoʼn ambʼil kye betelita tuʼn t-xi kysamaʼn solicitud. Qajtoqe tuʼn qajbʼene te Jehová noq jaxku tumel tzaj tqʼamaʼn, tuʼntzunju xi qkʼamoʼne  txokbʼil. Pero kukx o xnaqʼtzane tiʼj inglés qa matoq tzaj qʼoʼn ambʼil qeye tuʼn qxiʼye toj Galaad.

Tej tikʼ junjun abʼqʼi, tzaj tqʼoʼn Cuerpo Gobernante ambʼil tuʼn kyxiʼ betelita toj Galaad. Tuʼntzunju, xi qsamaʼne solicitud. In qo tzalajtoqe toj Betel, pero qajtoqe tuʼn tbʼant mas quʼne toj qajbʼebʼile te Jehová qa in che japun requisito quʼne. Tzaj qʼoʼn txokbʼil qiʼje tuʼn qxiʼye toj clase 79 te Galaad ex kubʼaj toj septiembre te 1985. Ex o xi samaʼne atz Colombia.

O xi samaʼne aqʼunal toj sucursal tej qpone Colombia. Ok tilil wuʼne tuʼn tbʼant jun tbʼanel aqʼuntl, pero tej tikʼ jun abʼqʼi kubʼ nximane qa mastoq bʼaʼn tuʼn qajbʼene toj juntl lugar. Tuʼntzunju, xi nqanine jun chʼixpubʼil ex oʼkx jun maj bʼant jlu wuʼne. O xi samaʼne te misionero toj tnam Neiva toj departamento te Huila.

Kukx in chin tzalaje tiʼj pakbʼabʼil. Tej naʼmxtoq nkubʼ mojeʼye ex tej wajbʼene te precursor toj tnam Finlandia, xi tzyet tuʼn npakbʼane te prim ex kubʼaj te qonikʼen. Ex tej nkubʼ mojeʼye tukʼil Sirkka, ax jlu bʼant quʼne. Ex tej qxiʼye pakbʼal najchaq, at maj ax o kyaj jtane toj kar tuʼntzun miʼn qviajarine nim ex tuʼn t-xi tzyet qpakbʼaʼne te juntl qʼij.

Kubʼ qnaʼne tzalajbʼil juntl maj toj pakbʼabʼil ik tzeʼn toj ambʼil ojtxe. Chʼiy congregación jatumel o ajbʼene ex kubʼ kyyekʼin erman te Colombia tbʼanel kymod qukʼile, ok kyqʼoʼn qoklene ex kubʼ kyyekʼin kykʼujlabʼil qiʼje.

Kyoj tnam ateʼ nqayin tiʼj Neiva, mintiʼtoq jun testigo de Jehová at. Kukxtoq in chin ximane tiʼj tzeʼn tuʼn t-xi pakbʼet tbʼanel tqanil kyoj lugar lu. Pero jakutoq tzaj nya bʼaʼn kyiʼj xjal te juntl lugar tuʼn guerrilla qa ma che okx kyoj tnam lu. Tuʼntzunju, xi nqanine toj naʼj Dios te Jehová tuʼn tel tnikʼ jun xjal kye lugar lu tiʼj axix tok atz toj tnam Neiva. Ax ikx, xi nqanine te Jehová tuʼn tbautisarin xjal lu ex tuʼn tchʼiy toj tokslabʼil tuʼntzun tmeltzʼaj pakbʼal toj ttnam. Kubʼ nximane qa atzun jlu mas tbʼanel, pero mastoq tbʼanel t-ximbʼetz Jehová.

Tej tikʼ chʼin ambʼil, xi tzyet tuʼn t-xi nqʼoʼne xnaqʼtzbʼil te Fernando González, jun xjal te Algeciras ex jun kyxol qe lugar jatumel mintiʼ Testigo at. Tkyaqil seman bʼet junlo 50 kilómetro tuʼn tpon aqʼunal atz Neiva. Kubʼ tbʼinchaʼn tten tiʼj tkyaqil xnaqʼtzbʼil ex jun rat xi tzyet tuʼn t-xiʼ kyoj chmabʼil. Toj seman tej t-xi tzyet tuʼn t-xnaqʼtzan, ok tchmoʼn junjun xjal jatumel in nanqʼin tuʼntzun t-xi tyekʼin kye aju otoq tzʼel tnikʼ tiʼj.

Tej tikʼ qaq xjaw t-xilen tzyet tuʼn t-xnaqʼtzan Fernando, kubʼ t-ximen tuʼn tbautisarin toj enero te 1990 ex jun rat xi tzyet tuʼn tajbʼen te precursor regular. Tuʼnju ya attoq jun testigo de Jehová toj lugar Algeciras, mastoq segur tuʼn ttzaj tsamaʼn  sucursal qe precursor especial toj tnam lu. Ex toj febrero te 1992 xi tzyet jun congregación toj lugar lu.

Pero nya oʼkx pakbʼan Fernando toj tnam Algeciras. Tej tkubʼ mojeʼ tukʼil Olga, xiʼ pakbʼal toj tnam te San Vicente del Caguán, jatumel mintiʼ qe Testigo at. Ex toj lugar lu, e onin tuʼn tten jun congregación. Toj 2002, xi qʼoʼn kyoklen tuʼn kyajbʼen toj circuito ex kukx in bʼant jlu kyuʼn toj ambʼil jaʼlo.

In tzaj tyekʼin jlu weye qa nim toklen tuʼn t-xi qqʼamaʼn te Jehová tzeʼn qaj tuʼn tonin qiʼj toj lugar jatumel in qo ajbʼen te. Jaku che bʼant tiʼchaq tuʼn Jehová aʼyeju mlay che bʼant quʼn tuʼnju a tajaw awal (Mat. 9:38).

Toj 1990, tzaj qʼoʼn woklene te superintendente viajante ex atz o ajbʼene toj tnejel circuito Bogotá, aju capital te Colombia. Nya mas nim qoklene kywitz txqantl xjal ex nya naqʼli qoʼye tuʼn qanqʼine toj jun matij tnam. Tuʼntzunju, tzaj chʼin xobʼil qiʼje. Pero ok qkeʼyine tzeʼn japun kywi tyol Jehová tkuʼx toj Filipenses 2:13: «Porke ate Dios in aqʼnan tuj kyanmiye tuʼn tten kyganiye tiʼj ju tajbʼil ax ikx tuʼn kybʼinchanteye».

Yajxitl o xiʼye toj juntl circuito toj tnam Medellín, aju ma qo yolin tiʼj tej saj tzyet xnaqʼtzbʼil. Tuʼnju attoq nim bʼiybʼel toj tnam, ya mintiʼtoq in che jaw labʼin xjal tiʼj. Toj jun ambʼil tej in chin qʼone xnaqʼtzbʼil, ok jun balacera. Kubʼ nximane tuʼn tkubʼ nxoʼn wibʼe twitz piso, pero kukx in nuʼjintoq xjal in xnaqʼtzan wukʼile. Tej tkubʼaj tuʼn tuʼjin, tzaj tqʼamaʼn weye qa kʼelextoq jun rat. Tej tikʼ chʼin ambʼil, meltzʼaj kyukʼil kabʼe kʼwal ex mintiʼtoq in xobʼ tej ttzaj tqʼamaʼn jlu weye: «Najsama, ma chin exe qʼil qe nkʼwale».

Ax ikx o qo ikʼe toj junjuntl nya bʼaʼn. Naʼnx wuʼne qa tej in qo pakbʼantoqe ttziyele kyja xjal, ul ojqelan nxuʼjile wukʼile ex el nnikʼe tiʼj qa otoq tzaj xobʼ. Tzaj tqʼamaʼn weye qa tzaj tdispararin jun xjal tiʼj. Tej tok nbʼiʼne, ax ikx weye in tzaj xobʼe. Pero yajxitl, el qnikʼe tiʼj qa nya tiʼj Sirkka tzaj dispararin, sino tiʼj juntl xjal tzmatoq in nikʼ ttxlaj.

Tej tikʼ ambʼil, ya mintiʼ o tzaj xobʼe tiʼj tkyaqilju bʼaj toj tnam. Onin qiʼje tej toj qkeʼyine tzeʼn ikʼx nya bʼaʼn lu kyuʼn erman ex junjuntl mas kwest. Tuʼntzunju kubʼ qximane, qa in nonin Jehová kyiʼj erman ax ikx jaku tzʼonin qiʼje. Kukx ok qxqʼuqin qibʼe ik tzeʼn tzaj kyqʼamaʼn ansyan toj congregación ex kyaj qqʼoʼne aju mlay bʼant quʼne toj tqʼabʼ Jehová.

At maj, mintiʼ bʼaj jun tiʼ ik tzeʼn kubʼ qximane. Jun techel, tej qpone toj jun ja, ok nbʼiʼne nim bulla ik tzeʼn in che ilin kabʼe xuʼj. Nyatoq waje tuʼn tok nkeʼyine tiʼ in bʼaj, pero tzaj tqʼamaʼn tajaw ja weye tuʼn t-xi nkeʼyine. Ex ok nqʼoʼn nwitze tiʼj qa ateʼ kabʼe lor in nel kykanoʼn tzeʼn che yolin vesin.

Toj 1997 tzaj qʼoʼn woklene tuʼn t-xi nqʼoʼne xnaqʼtzbʼil toj Escuela de Entrenamiento Ministerial. b Kubʼ nnaʼne nim tzalajbʼil tej nxiʼye kʼamol xnaqʼtzbʼil in tzaj tqʼoʼn ttnam Jehová. Pero mintiʼ kubʼ nximane qa tzul qʼoʼn woklene tuʼn t-xi nqʼoʼne xnaqʼtzbʼil.

Yajxitl tzaj qʼoʼn woklene te superintendente te distrito. Pero tej ya mintiʼ ten, tzaj qʼoʼn juntl maj woklene te superintendente te circuito. Ya ma tzikʼ 30 abʼqʼi ttzajlen qʼoʼn woklene tuʼn t-xi nqʼoʼne xnaqʼtzbʼil ex te superintendente viajante. O tzaj nkʼmoʼne nim kʼiwlabʼil pero ax ikx o chin ok weʼye twitz nim nya bʼaʼn. ¿Tiquʼn in xi nqʼamaʼne jlu?

Nya jun rat in chin tzaj xobʼe ex o tzʼonin jlu wiʼje kyoj ambʼil tej wok weʼye kywitz nya bʼaʼn. Pero tuʼn nmode lu, at maj in chin oke estricto aj kyxi bʼinchet junjun tiʼchaq toj congregación. Jun techel, at maj xi nqʼamaʼne kye txqantl qa iltoq tiʼj tuʼn tkubʼ kyyekʼin kykʼujlabʼil kyxolx ex tuʼn kyximen kyiʼj txqantl. Noqtzun tuʼnj, kwest ela toj nwitze tuʼn tkubʼ nyekʼine qe mod lu toj ambʼil aju (Rom. 7:​21-23).

At maj tzaj bʼaj nkʼuʼje kyuʼn npaltile (Rom. 7:24). Jun maj, tzaj nim nbʼise ex xi nqʼamaʼne te Jehová qa mas bʼaʼn tuʼn tkyaj ntzaqpiʼne tuʼn wajbʼene te misionero ex tuʼn waj meltzʼaje Finlandia. Pero toj qʼij aju, ok nbʼiʼne toj chmabʼil qa tbʼanel tuʼn kukx tok tilil quʼn tuʼn tjapun twi qoklen ex tuʼn kyten tbʼanel qmod. Mlayx tzikʼ tnaʼl wuʼne tzeʼn tzaj ttzaqʼweʼn Jehová nnaʼj Diose. Ax ikx in xi nqʼoʼne chjonte te tuʼnju o tzʼonin wiʼje tukʼil kʼujlabʼil tuʼn tkubʼ kyiʼj npaltile.

In xi qqʼoʼne nim chjonte te Jehová tukʼil Sirkka tuʼnju tzaj tqʼoʼn ambʼil qeye tuʼn qajbʼene te toj tkyaqil ambʼil. Ax ikx in xi nqʼoʼne chjonte te Jehová tuʼnju o tzaj tqʼoʼn jun tbʼanel nxuʼjile kʼujlaʼn qiʼne tuʼn ex o tzʼonin wiʼje.

Ya chʼix njapune twi 70 abʼqʼi ex kyjel ntzaqpiʼne woklene tuʼn nqʼone xnaqʼtzbʼil ex te superintendente viajante. Pero mintiʼ in tzaj nbʼise tuʼn jlu tuʼnju nya il tiʼj tuʼn kyten junjun tbʼanel qoklen tuʼn tjaw qnimsaʼn Jehová. Aju mas nim toklen aju tuʼn qajbʼen te Jehová tukʼil tkyaqil qanmi, tukʼil kʼujlabʼil ex tuʼn t-xi qqʼoʼn chjonte te (Miq. 6:8; Mar. 12:​32-34).

O chin tzalaje kyiʼj junjun tbʼanel woklene toj wanqʼibʼile. Pero mintiʼ tzaj nkʼamoʼne qe oklenj jlu tuʼnju mas tbʼanel in che bʼant qe tiʼchaq wuʼne kywitz txqantl. Sino o tzaj tqʼoʼn Jehová ambʼil weye tuʼn kyxi nbʼinchaʼne noq tuʼn t-xtalbʼil in kubʼ tyekʼin wiʼje. Noqwit mintiʼ onin Jehová wiʼje mintiʼwtlo e japun woklene. Jaku txi nqʼamaʼne qa tuʼn tipumal Dios o kubʼ kyiʼj npaltile (2 Cor. 12:9).