Kʼiaa nga nó 1955 kitsian, jan mani xtindsʼe kʼoa an xi maʼndía. Yaa Finlandia koanjchínga ya jñani Vantaa ʼmi ndʼaibi.

Kʼiaa kisʼenngindá mana nga kjesa tsinjian. Je pana alikui kisasenle je Énle Niná, alikui kitsjoaʼndele mana nga tsakakóyanajin xi tʼatsʼe Jeobá kʼoa nga ya koaikaonajin nga satío kjoajtín. Kʼianga tsín je pana kʼiaa tsoyanajin je mana xi tʼatsʼe Jeobá.

Saʼnda nga sʼa ʼndí kjiʼe̱ koanmena nga kixi kjuítʼale Jeobá. Tobʼelañá, kʼianga ñato nóna, nʼio koanjtile je maestrana nga tsín tsakje̱n je niochji̱ xi verilättyjä ʼmi, nga̱ njín tjínle je tsojmi xi sinyáʼnyo. Je maestra kjoanʼio tsakʼéjtínʼa ndso̱ʼba nga ska̱níjenna tonga tsakjaʼaxinña ntsja kʼoa tokitsaonni je nʼio.

Kʼiaa kʼien pana nga 12 nóna kʼoa jeni koan tsangínjin kjoajtín nga kʼia. Nga kuenta kisʼinna je ndsʼee tsakasenkaona nga je Jeobá kisixále. Nyaon nyaon tsakʼexkia Biblia kao xo̱n xi bʼasje naxinandále Niná. Nga kʼoakisʼian tsakasenkaona nga koan kisʼe̱nngindá nga 14 nóna nga 8 sá agosto nó 1969.

Kʼianga jejetʼana skuela, precursor regular sʼin kisixá. Nga koanskanni, yaa Pielavesi kikatejna jngo ʼnde xi tiya tíjnani Finlandia nga kixinyasoan Énle Niná.

 Nga kichoa̱ ya ʼnde jebi yaa tsaʼbexkoan je tichjaa Sirkka, xi chjoónna koan nga koanskanni. Kisasenna josʼín nga̱ nangitokon, nʼio nda tísíxále Jeobá, alikui to yaole fini kʼoa tomanile je tsojmi xi tjínle. Kui xi koanmenajin nga joaijin nga ngisa nda si̱xálaijin Jeobá kʼoa nga tiyondaijin tojme xá xi kʼoainajin. Kʼiaa chixainjin nga 23 sá marzo nó 1974. ʼNdele nga koanngínkitsoma pasiaijin nga jechixainjin tosaa ya tsangínkʼainganʼuijin ya Karttula jñani ngisa machjén xi tsoyason.

Saʼnda nga chixainjin, nga kui títjon xále Jeobá tinikʼéjnaijin, jé títsjoánajin xi machjénnajin (Mat. 6:33). Tobʼelañá, kʼianga tsakiyuijin ya Karttula tsínnajin carro. To bicicleta kinichjainjin nga tsakitsomaijin. Kʼianga cha̱nnyʼán ñʼai koannajin nga kʼoasʼin tsakitsomaijin. Nga nʼio tse mani ʼnde jñani tsoyason je jtín jña tsakiyuijin, carro koanchjénnajin tsakai tonga tsínnajin tao̱n xi tsakindanijin.

Ñandia nga kichokonnajin je ndsʼe kʼoakitsonajin nga sikájnanajin carrole, alikui tsakaténanajin kʼoa alikuijin tsakʼechjíjin segurole carro, to gasolinakjoán xi jin tsakindaijin. Jeni kisʼejnanajin carro xi tsakitsomakoaijin.

Nga kʼoakoantʼainjin yaa tsaʼyanijin nga je Jeobá títsjoánajin xi machjénnajin kʼoa tokui xi machjén xi sʼiainjin nga ngisa nda si̱xálaijin Jeobá.

Kʼianga nó 1978 nga tiyuijin Skuela xi tsʼe Precursor, je ndsʼee xi Raimo Kuokkanen ʼmi a xi kitsoyanajin kʼoakitsonajin nga koa̱n kʼoéndaijin solicitud tsa menajin koanngínjin Skuela xi tsʼe Galaad, én inglés kichotʼayaijin ánni nga koa̱n koanngínsínijin skuela jebi. Alikuini tsakʼendaijin solicitud jebi nga̱ yaa kinokjoanajin sucursal xi tíjna Finlandia nga nó 1980. Nga kui nichxin, je ndsʼee xi ya tjío Betel alikui ma fi Skuela xi tsʼe Galaad. Nga kui xi koanmenajin nga ya si̱xálaijin Jeobá tojñani nga kuitso, kuinga tsangínijin nga kinokjoanajin  ya Betel. Tonga tosi tonda kichotʼayaijin én inglés nga̱ kʼoasʼin kinikjaʼaitsjainjin tsa totsejinni koanngínjin Skuela xi tsʼe Galaad.

Nga koanskanni, je Cuerpo Gobernante kʼoakitso nga je xi tjío Betel koaan koai Skuela xi tsʼe Galaad tsa je xi mele kʼoa tokjoan kinikasénníjin solicitudnajin. Ningalani tsjoa kisatio tokuinjin nga tsakiyuijin Betel, tonga kʼoati kui xi koanmenajin nga koanngínjin Skuela xi tsʼe Galaad kʼiatsa kuinókjoanajin, nga̱ tiyondaníjin nga kʼoainganʼiuijin jñani ngisa machjén xi tsoyason. Tsangínníjin skuela jebi xi mani 79 kʼoa kʼiaa jetʼanajin nga sá septiembre nó 1985 kʼoa yaa Colombia kinikasénnajin.

Yaa kinikasénnajin ya sucursal xi tíjna Colombia. Tsakʼenele yaona nga nda kisixá tonga kʼianga jekicho ñanó kʼoasʼin kisikjaʼaitsjen tsa koa̱n nga tsín tiya Betel kuiyonijin. Tokʼiakjoánní nga kʼoasʼin kisijé nga katanikʼantjaiyana je xá xi tisʼian. Jo misionero sʼin kinikasénnajin ya Neiva, naxinandá xi Huila tíjna.

Nʼio tsjoake̱ nga xinyasoan. Nga sʼa toʼan tijna precursor sʼin kisixá ya Finlandia, tsʼajnda nichxin kixinyasoan. Kʼianga tokʼia chixainjin kʼoati tsʼajnda nichxin tsakʼinyasuinjin kʼoa nga kjintʼa tsangínkʼinyasuinjin sakʼoa toya soyofeyaijin carro. Nga kʼoakinʼiaijin ngisaa tanjio ʼmiyason ijngokʼaijin nga manyaonni.

Kʼianga kitjuijin Betel tojo kʼoakji tsjoa kisatio ijngokʼa tokuinjin nga tsakʼinyasuinjin jokinʼiaijin ngasʼa. Ya jtín jña kinikasénnajin koannkjínya je chjota xi kiskotʼaya Énle Niná kʼoa je ndsʼee xi ya tsʼe nda chjota, ndʼéní kʼoa nʼio tjínle kjoaxkóntokon.

Ya chrian Neiva, nkjín ʼnde tjío jñani nijngojin testigole Jeobá tjín. Nga tsʼen chjota xi ya tsʼe alikui ʼya xi nanda bichó xi xin tsʼe. Kui kisikjaʼaitsjenjin ʼndeʼnde jókoa̱nni skoe̱ xi tʼatsʼe Jeobá je chjota xi ya tsʼe. Kʼianga tsakʼetsʼoale Jeobá kʼoakixinle nga katamakjainle xi tʼatsʼe ninga tojngo chjota xi ya tsʼe ʼnde jebi tonga xi ya Neiva tíjna. Kʼoati kixinle Jeobá kʼianga jekoaisʼenngindá chjota jebi nga katafi ijngokʼani ʼndele nga koaikakóyasonle je chjota xi ya tsʼe. Kʼoasʼin kisikjaʼaitsjen xi an tonga je Jeobá ngisaani nda tjínndajinle josʼin.

Totjíchoa̱ tsee jaʼato nga kixinyale Biblia jngo ti xi Fernando González ʼmi, xi ya jña Algeciras ʼmi tsʼe. Ti jebi yaa bichósíxá ʼndeʼnde ya Neiva kʼoa 50 kilómetro kjin tsʼe. Tongini kotʼayajin jmeni xi chotʼayaijin kʼoa tokjoan ki je kjoajtín xi satíoná. Nga tikuini xomana, kisikatíojtín kʼa chjota xi ya tsʼe ʼndele nga kitsoyale jmeni xi tíkotʼaya.

Tosʼa jaon sá tjínle nga tíkotʼaya ti jebi nga kisʼenngindá nga sá enero nó 1990 kʼoa tokjoan precursor regular sʼin kisixá. Nga jetíjna jngo testigole Jeobá ya Algeciras, je sucursal nkjín ndsʼee xi precursor especial sʼin tjíosíxá kisikasén kʼoa nga sá febrero nga nó 1992 jejngo jtín kisʼejna ya ʼnde jebi.

Tonga je ndsʼee Fernando ali tsa toyajin kitsoyasonntsjai ya Algeciras. Kʼianga jechixan  kao jngo tichjaa xi Olga ʼmi yaa kikakóyason ya jña San Vicente del Caguán ʼmi. ʼNde jebi kʼoati jngo jtín kisʼejna, kʼoa tjen nó 2002 superintendente xi tsʼe circuito sʼin tísíxá ndsʼee jebi saʼnda ndʼaibi.

Choa̱ jebi kui tsakakóyana nga koa̱n kʼoakʼuínkixilee Jeobá josʼin mená si̱xálee. Je Jeobá alijme xi ñʼai male nga̱ tsʼee xá xi kjima nga tíʼmiyason (Mat. 9:38).

Kʼianga nó 1990, superintendente koan kʼoa yaa kinixatʼaijin je jtín xi tjío ya Bogotá. Je chjoónna kao an toxkia ʼndíchjotaníjin alijme xi manajin kʼoa alikui nganajin nga ya biyuijin jñani naxinandáyʼai, me kinokjon choaijin nga ya kinikasénnajin ʼnde jebi. Tonga je Jeobá kisitjoson jmeni xi tso Filipenses 2:​13, nga i̱ tso: “Je Niná nda tísíxájin ni̱ma̱no, josʼin nga mele kjoandale, jméni nga kʼoakuitsosínitakon nga jon, kʼoa jméni nga kʼoasʼiansínio”.

Xijekoan, tosa yaa tsangínnixatʼangáijin je tjín xi tjío ya Medellín, ya naxinandá xi kasikʼaxki̱ná nga títjon. Chjota xi ya tsʼe jekoanngakaole nga kʼoasikji kjoatsʼen tjín kʼoa alikui titsokjónni. Ñandia nga Biblia tixinyale jngo chjota, toʼikoan kitjotsin chʼinsá, yaa koajnatʼa nangi tsakai tonga je chjota xi tixinyale tosi tonda tsakʼéxkia, tsínkui kuenta kisʼin jme xi kjima. Kʼianga jekoan tsakʼéxkia kʼoakitsona nga kuitjo ngotjo, jao xtiʼndí tjenkao nga jaʼaini kʼoa i kitsona: “Xtiʼndína kafikʼakjoanla”.

Ali tsa tokʼiajin nga kʼoasʼin kixinyaxkoán. Ñandia nga tiʼmiyasuinjin, kichotokanrʼoena chjoónna, ñaki jetokjichxoaʼasa nga títsokjón. Kʼoakitsona nga chʼinsáxó kisatele kʼoa nʼio kitsokjoan tsanda an. Skaanni tsaʼyaijin nga tsínni tsa je xi chʼinsá kisatele, nga jéni chjota xi ya jaʼa jñani séjna.

Nga jetse tiyuijin chaanni koanngakaonajin tsanda jijin nga kʼoasikji kjoatsʼen tjín. Tsakinyakaonajin je choa̱le ndsʼee nga chókjoajinle nga kʼoasikji kjoa faʼatojin. Kʼoati koanjinnajin nga kʼoati je Jeobá koasenkaonajin josʼin tjíobinyakao je ndsʼee. Kichʼaʼénníjin jokitsonajin je xi chjotajchínga sʼin tjío, kinikuindaníjin yaonajin jokji tjen kʼoakoannajin kʼoa kʼoati je Jeobá kininʼiotʼaijin.

Tonga sakʼoa tokjoatjao kinokjuinjin. Tobʼelañá, kʼianga kichosixatʼa ñandia jngo chjota, kinrʼoeña nga jao yánchjín tjíofáoti ya nditsián, tsínkui kuenta kisʼian jmeni xi tjíotso tonga je chjoón xi ya tsʼe kʼoakitsona nga skotsensʼenntje ventana kʼoa to jao mani perico xi nyajta nga tjíosíyale je chjota xi tjíofáonajmí xingoani.

Kʼianga nó 1997, kui xá kisʼenena nga an xínya nga sʼe̱jna je Escuela de  Entrenamiento Ministerial. b Nʼio tsjoake̱ koan nga kia je skuela xi satío ya naxinandále Niná tonga tsín ʼbe tsakui kjoanda sʼe̱na nga an xínya skuela jebi.

Kʼoati superintendente xi tsʼe distrito koan. Kʼianga jekichangi jebi, superintendente xi tsʼe circuito koan ijngokʼa. Jetsʼato 30 nó tjínle nga an xinya je skuela xi satío kʼoa nga superintendente sʼin tisixá. Nʼio tse kjoanda tísʼena nga kʼoasʼin titsjoanganʼioa tonga tsín tongantsjai nga choa ñʼai mana.

ʼBeña nga nʼioʼa kʼoa nga ñaki kʼoaxin kixia jotjínni kjoa. Nga kʼoakjoan basenkaona nga kjoa faʼatojian tonga sakʼoa ñʼai mana kʼianga kjoa bʼendajinjin ya jinjtín. Tobʼelañá, sakʼoa nʼio fakoa je ndsʼee nga kʼoaxinle nga tjínnele koako kjoatsjoacha kʼoa nga sijinle yaole jotjío kon je ndsʼee. Tonga tosani an xi tjínnele kʼoasʼian (Rom. 7:​21-23).

Sakʼoa tsín nda sʼe tokoan nga kʼoakjoan (Rom. 7:24). Ñandia nga tsín sin kisʼena, kʼoakixinle Jeobá nga tosa nda nga tsínti misionero sʼin sixáña kʼoa nga kjuí ngindiaña Finlandia. Kʼianga kia kjoajtín, je xi kinrʼoe kui xi tsakasenkaona nga tosi tonda ya sixále Jeobá jñani kisikasénna kʼoa nga tosi tonda sindaya yaona jokjoan. Je Jeobá kinrʼoéna kʼianga tsakʼetsʼoale kʼoa tsjoale kjoanda nga tíbasenkaona nga tisindaya yaona.

Nʼio tse kjoanda bʼailaijin Jeobá nga ñaki toje tinixálaijin kao chjoónna. Kʼoati tsjoale kjoanda Jeobá nga tsjoakena chjoónna kʼoa nga títsjoánganʼiona nga kjima tisixále Jeobá.

Jekjoena 70 nó. Nga kuichona nó xotjín alikui tiʼan xínyaña je skuela xi satío kʼoa tsínti superintendente xi tsʼe circuito koa̱nña. Ninga kʼoalani, tojo tsjoa tjín tokoan nga̱ tojo jé Jeobá sixále ninga tsín tijme xá sʼe̱nina. Je xi ngisa chjíle kuinga nangitokon koaan kʼoa nga ñaki ni̱ma̱ná kjuinroajinni nga si̱xálee Jeobá (Miq. 6:8; Mar. 12:​32-34).

Jokji tse tijna, nʼio nkjín koya josʼin tisixále Jeobá. Kʼianga sikjaʼaitsjenjian majinna nga je Jeobá tíbasenkaona nga tíbitjosonna je xá xi tíbánena ninga sakʼoa ñʼai mana. Tsa tsínlani je Jeobá tíbasenkaona alikuijin tíbitjosonna jmeni xi tisʼian (2 Cor. 12:9).