Lau na laḡani 1955 ai na vara, taumai na tatoi bona lau na mero orena. Lau na bada sitina na Vantaa, una na Finland ena saut kahana ai.

Lau do asina vara ai sinagu na de bapatiso bena Iehova ena Witnes hahinena ta ai ela. To, sinagu na hereva momokani dainai tamagu ese e daḡedaḡe heniava, una dainai se urava sinagu na ai baine stadi henimai eiava kongrigeisin heboudia baine laohaimai. Tamagu lasihianai sinagu ese Baibul ena hereva momokani badadia e hadibalaimaiva.

Maraḡigu ai, asina urava Iehova baina habadua. Nega ta laḡanigu seven ai, egu teacher ese e hamaorogu Finnish blood pancakes (verilättyjä) baina ania. To lau na asina ura dainai teacher na e badu dikadika. Imana ta ai vahagu e gigidia unu amo udugu e kehoa, a imana ma ta ai be una pancake na foka ai e gwadaia udugu ai e atoava. To lau ese imana fokana na pataia siri.

Laḡanigu 12 neganai, tamagu na e mase. Una negana ai, lau na da baina hebou diba. Kongrigeisin tadikakadia ese lau na e laloguva dainai e duruguva, una dala amo lau na lauma dalana ai na goada. Bona dina ta ta ai Baibul na duahiava bona Kristen  pablikeisindia na stadilaiva. Una stadi karana ese lau na e durugu bada. Bena August 8, 1969 ai na bapatiso, una nega ai laḡanigu na 14.

Egu skul na haorea neganai, maoromaoro regula painia na hamatamaia. Wiki haida muridiai, pablisa dia momo gabuna ta nala, una na Pielavesi ai, Finland ena gabu ta, unuseni ai baina noho bona baina haroro totona.

Pielavesi ai, adavagu lalokauna Sirkka ida a hedavari. Ia na ura henia, badina ia na manau kekenina bona Iehova e lalokau heniava. Bona ia na simple maurina e ura heniava kekenina ta. Herevana dahaka asainmen bae henimai, emai ura badana na mai kudoumai ibounai ida Iehova baia hesiai henia. Ai na March 23, 1974 ai a headava. Emai headava murinai na asia holidei, to ai na Karttula ala unuseni ai baia noho, badina pablisa na dia momo.

A headava matama negana amo, ai na a laloparara Iehova ese na be narimaimu bema ai ese Basileia baia atoa gunamu. (Mat. 6:33) Heḡereḡere, Karttula ai, ai na asi emai motuka. Una dainai basikol amo a loava. Ai a nohova gabuna na keru gabuna bona baia haroro gabudia momo na dadaudau. Una dainai ai na mokuta amo unu gabu baiala. To emai moni na dia heḡereḡere motuka ta baia hoia totona.

Ai na a hoa, lau kakagu ese e vadivadimai neganai. Ai dekemai ema badina na iena motuka na ai baine henimai. Una motuka ena insurance davana na ia ese de peia. Ai na fuel mo baia hoi. Una motuka ese ai na e durumai, emai teritori baia karadia namonamo.

Dala unu bamona amo ai na a laloparara Iehova ese tauanina dalana ai ai na be narimaimu. Ai hari baia hekwarahi Basileia baia atoa guna.

Laḡani 1978 ai, ai na Pioneer Service School ala. Emai instructor ta Raimo Kuokkanen a ese e hagoadamai Gilead Skulina baiala totona aplikeisin ta baia hahonua. Una dainai ai ese English gado a stadilaia  matama badina a urava una skuli baiala. To asia aplai lalonai, ai na e boirimai Finland ena brens ofesi ai baia ḡaukara, una na laḡani 1980 lalonai. Unu negadiai, Betele taudia na Gilead skulina dainai do basie aplai. Ai na a urava dia ai sibomai ese baia abia hidi gabuna baiala, to Iehova ese baine siaimai gabuna baiala. Una dainai Finland Betelena ena boiboi na a abia dae. Ena be Betele ai a nohova, ai na dounu English gadona a stadilaiava, unu amo bema dala baine hekeho Gilead skulina baiala.

Laḡani haida muridiai, Gavanin Bodi ese Betele taudia iboudiai na gwaumaoro e henidia Gilead skulina totona bae aplai diba. Maoromaoro emai aplikeisin a hahonudia bena a siaidia, to basioto emai ḡaukara Betele ai na asia moalelaiava. Lasi, to ai na a urava bema bae abimai dae, ai na heduru e urava gabudia ai baia heduru diba. September 1985 ai, klas namba 79 amo a gradueit bona e siaimai gabuna na Colombia.

Colombia ala neganai, emai asainmen ginigunana na brens ofis ai baia ḡaukara. Laḡani ta brens ai a ḡaukara murinai, na laloa asainmen idauna ta baia karaia na namo. Una dainai tadikaka na noidia emai asainmen na do bae haidaua. Egu mauri ai una na nega ginigunana noinoi unu bamona ta na karaia. Huila rijin ai siti ta ladana Neiva e siaimai lao, misinari ḡaukarana baia kara.

Lau ese haroro ḡaukara na na moalelaiava. Finland ai do asina headava neganai, nega haida na na haroro dina dihova. Sirkka ida na headava matama ai danu unu a kara tomava. Gabu daudaudia ai a harorova neganai, nega haida emai mokuta ai a mahutava. Unu amo murina dinana ai haroro ḡaukara na baia hamatamaia haraḡa.

Colombia ai emai misinari ḡaukarana na a moalelaiava, bona guna emai haroro ai a mamia moalena ma a abia lou. Unuseni ai emai kongrigeisin na e tubu, bona tadikaka taihu na hemataurai, lalokau bona moale taudia.

Neiva badina taonidia ai, Witnes taudia na lasi. Na lalova sivarai namona be ede baia harorolaia tomamu. To, tuari dainai idau taudia unu baela na dia seif. Una dainai na ḡuriḡuriva unu taoni amo ta na Witnes tauna ai bainela. Bona na lalo una taoni tauna ta na Neiva ai bema noho, bena hereva momkani bema dibaia. Una dainai ma na ḡuriḡuri, una tau na baine bapatiso bona lo tauna ai bainela. Lau na na diba Iehova ese dala ta na be kehoamu, badina iena diba ese lauegu diba na e hereaia.

Bena se daudau, lau na tau matamatana ta ladana Fernando González ida Baibul a stadilaia matama. Ia na Algeciras ai e nohova, una taoni ai Witnes ta na lasi. Wiki ta ta ai, Fernando na kilomita 50 mai kahana e laova, Neiva ai baine ḡaukara. Ia na nega iboudiai ena stadi dainai e heḡaeḡaeva bona hanaihanai hebou e laova. E stadi matama negana amo Fernando na ena gabu taudia e haboudiava bona Baibul stadi amo e dibava ḡaudia na idia e hadibalaidiava.

 Fernando na hua siks e stadi murinai e bapatiso. Una na January 1990 ai. Una murinai ia na regula painia ai ela. Ia e bapatiso dainai una ese dala e kehoa brens ofesi ese spesol painia bae siaidia lao Algeciras. Bena February 1992 ai, unuseni ai kongrigeisin ta e hamatamaia.

Fernando be ena gabu ai mo e haroro, a? Lasi! Ia na e headava murinai, adavana ida ela San Vicente del Caguán, una gabu ai danu Witnes tauna ta se nohova. Bena unuseni ai kongrigeisin ta e hamatamaia. Laḡani 2002 ai, ia na e abia hidi seket ḡaukarana baine karaia. Una nega amo ema bona hari ia adavana Olga ida na una ḡaukara e karaiamu.

Una ekspiriens amo na diba, eda asainmen ta ta ai baita kara ḡaudia daidiai baita ḡuriḡuri na mai anina bada. Iehova ese ita basita karaia diba ḡauna na ia ese be karaiamu, badina una na iena ḡaukara.—Mat. 9:38.

Laḡani 1990 ai, ai na seket ḡaukarana a karaia matama. Emai vadivadi ginigunana na siti badana, Bogotá ai. A laloava ai na dia heḡereḡere badina adavagu ida emai diba na dia bada. Bona siti badana maurina na asia manada. To Iehova ese ena gwauhamata Filipi 2:13 ai na e haḡuḡurua, e gwaumu: “Dirava na emui goada badina, ia ese e ura henimu ḡaudia ikaradia urana bona goadana na e henimuimu.”—New World Translation.

Gabeai, ai na ma e siaimai, siti ta ladana Medellín ai seket ḡaukarana baia karaia, una na matamanai name herevalaia gabuna. Una gabu taudia ese taunimanima edia daḡedaḡe karadia na de manadalai dainai e varava neganai idia na se hoava. Nega ta, lau na ruma ta ai Baibul stadi ta na karaiava lalonai na kamonai murimuri ai haida na e hepidi heheniva. Bena na tomava floa ai baina goru diho, to stadi tauna na dounu paragraf e duahiava bona se gariva. E duahiduahi murinai e gwa ekskius bena do e raka lasi. Nega sisina murinai maraḡidia rarua ida e raka vareai, bena e gwa “Na sorimu, to lau na do nala natugu na hakaudia lao.”

Dia una mo, to nega haida ai na kahirakahira dika ai a vareai. Nega ma ta be ruma ta ruma ta ḡaukarana a karaiava lalonai, adavagu na mai garina ida lau dekegu e heau mai. Bona e gwauva tau ta na e urava ia baine pidia. Na hoa to gabeai a laloparara una tau na dia Sirkka baine pidia, to ia badina amo e hanaiva tauna baine pidia.

Gabeai a manada dainai asia gariva, dia guna bamona. Una gabu ai e nohova tadikaka taihu ese e hagoadamai. Idia danu daḡedaḡe unu bamodia bona dika hereadia e davariva to e haheaukava. Una dainai a laloparara bema Iehova ese idia e durudiamu, ai danu be durumaimu. Ai na hanaihanai elda taudia edia hahekau daladia a badinava, a henahua tohova bona Iehova enai a tabekauva.

 Momokani, daḡedaḡe haida na dia dika herea, dia ai ese a lalova bamona. Nega ta, lau na hahine ta na vadivadia, na kamonai iena ruma murimurinai na e kara hahine rarua e heaiva. Lau na asina urava baina herarai to ruma tauna ese e hamaorogu do baina lasi dehe. Na raka lasi neganai, na laloparara una na manu (parrot) rua e heaiva. Idia na badi taudia e tohotohodiava.

Laḡani 1997 ai, lau na e abigu hidi Ministerial Training School b ai instructor ai bainala. Hanaihanai tiokratik sikuli ilao henidia karana na na moalelaiava. To asina lalo una sikuli ta ai baina hahediba.

Gabeai lau na distrik ovasia ḡaukarana na karaia. To una ḡaukara na vada e koua dainai seket ḡaukarana ma na karaiava. Una dainai laḡani 30 mai kahana lalodiai, tiokratik skulidia ai hahediba bona seket ḡaukarana na moalelaia. Unu asainmen amo hahenamo momo na davari. To mai hekwarahina danu, mani aina herevalaidia.

Ena be lau na lalo goada taugu bona una ese e durugu nega aukadia na haheaukalai. To, nega haida kongrigeisin ai ḡau haida ihamaoromaorodia ai egu kara na auka. Una dainai, ena be haida na hagoadadiava lalokau bae hahedinaraia, to lau sibogu ese una kara na asina hahedinaraiava.—Roma 7:​21-23.

Egu manoka ḡaudia daidiai nega haida na lalomanokava. (Roma 7:24) Nega ta na Iehova na noia, misinari ḡaukarana na baina rakatania bona baina lou Finland. To una hanuaboi ai kongrigeisin hebouna nala. Na kamonai herevadia amo na diba, misinari ḡaukarana na basina rakatania, to egu manoka ḡaudia hari baina hanamodia. Iehova ese una ḡuriḡuri e haerelaia dalana na doini na laloataomu. Bona na moalemu badina Iehova ese mai lalokauna ida e durugu, egu manoka ḡaudia na hanaidia.

Lau bona Sirkka na Iehova a tenkiu henia badamu badina emai mauri ai laḡani momo na fultaim hesiai ḡaukara ai Iehova a hesiai henia. Danu Iehova na tenkiu heniamu badina ia ese adavagu lalokauna e henigu.

Kahirakahira laḡanigu na vada 70 be abiamu dainai field instructor bona sekit ḡaukarana basina karadiamu. To asina lalohisihisimu. Iehova na be moalemu bema lau na mai manaugu ida ia baina hesiai henia. (Mika 6:8; Mar. 12:​32-34) Iehova baita imodaia totona asainmen badadia baita abi eiava lasi na dia ḡau badana.

Egu asainmen na lalodia loumu neganai, na dibamu unu na dia lau ese haida na hereadia eiava egu diba na bada dainai e henigu. Lasi, to Iehova ena harihari bada dainai e henigu. Ena be mai egu manoka ḡaudia to unu hahenamo na na moalelai. Bona na abia dae vaitanimu unu asainmen na Iehova ena heduru amo na haḡuḡurudia. Oibe, egu manoka ḡaudia na Iehova ena heduru amo na hanaidia.—2 Kor. 12:9.