Mam doga yʋʋmd 1955. M roagdbã ra tara kom-dibli a tãabo, tɩ maam la yaoã. M doga tẽng a ye sẽn be Fẽnlãnd rɩtg sẽnesã mogrã noore. B boonda tẽn-kãng rũndã-rũndã tɩ Vantaa.

Mam ma wã reega lisg n lebg a Zeova Kaset soab yʋʋm a wãn nand tɩ mam doge. M baaba ra pa nong sɩdã, n pa rat tɩ m ma zãms tõnd Biiblã wall a tall-d n kẽng tigissã ye. Rẽ n so t’a ra soosd n zãmsd tõnd Biiblã bũmb kẽere, m baaba sã n wa pa be yambẽ.

Hal mam yãadmẽ, m yãka yam n na n zĩnd a Zeova poorẽ. Wala makre m sẽn wa n tar yʋʋm a yopoe wã, tõnd karen-saambã sũur yika wʋsg ne maam, m sẽn zãgs tɩ m pa na n dɩ rɩɩb b sẽn maand ne zɩɩm yĩnga. (B boonda rɩɩbã tɩ verilättyjä.) A wẽooga mam noorã m sẽn da mumã ne a nug a ye sẽn na yɩl tɩ yaage, la a yãk rɩɩbã ne fursɛt n modg n na n sʋɩ mam noorẽ wã. La m tõog n pẽsga fursɛtã tɩ yi a nugẽ wã n lʋɩ.

Mam sẽn wa n tar yʋʋm 12, m baaba maana kaalem. Rẽ tɛka, m da kẽnda tigissã tɩ gɩdgr kae ye. Tigingã neb wilgame tɩ m yell pak-b lame. Rẽ sõnga maam tɩ m maneg n pẽneg a Zeova. M sɩnga Biiblã kareng daar fãa, la m maagd m yĩng n zãmsd siglgã sɛbã. M sẽn maan woto wã, sõnga maam tɩ m wa tõog n deeg lisg  yʋʋmd 1969, sa-sik kiuug rasem a 8 wã. Rẽ tɩ m tara yʋʋm 14.

Mam sẽn wa n karem n sa wã bala, m lebga wakat fãa so-pakda. Rẽ poor bilfu, m yik n kẽnga zĩig koe-moondb sẽn pa waooge. Yaa Pielavesi sẽn be Fẽnlãnd tẽn-sʋk sẽnesã.

Yɩɩ Pielavesi la m bãng pʋg-sad yʋʋr sẽn boond t’a Sirkka. Yẽ n wa n lebg m pagã m sẽn nong wʋsgã. Bũmb ning sẽn kɩt tɩ m yamã kẽ-a wã yaa a sik-m-mengã, la a tẽebã sẽn da tar pãngã. A ra pa baood ziir wall naar ye. Tõnd d yiibã fãa ra rat n tʋma a Zeova tʋʋmdã wa d sẽn tõe tɛka, baa sẽn yaa tʋʋmd ning fãa la b na n kõ-do. D kẽe kãadem yʋʋmd 1974, tʋʋlg kiuug rasem 23. D kãadmã poore d pa rɩk vʋʋsem ye. D kẽnga Kartula sẽn yaa zĩig b sẽn da rat Rĩungã koe-moondb n yɩɩdã.

D sẽn kẽ kãadmã tɛka, a Zeova wilgdame tɩ d sã n dengd n baood a Rĩungã, a na n gesa d yelle. (Mat. 6:33) Wala makre d sẽn wa n be Kartula wã d ra pa tar mobill ye. Sɩngrẽ wã d ra zaoo weefo. La waoodã wẽnde, zĩigã maagda be wʋsgo. Sẽn na yɩl n moon tigingã mooneg zĩig sẽn yaa yalengã, ra yaa tɩlɛ tɩ d paam mobilli. La d ra pa tar ligd n na n da mobill ye.

M kẽem a ye n wa n kaag tõnd tɩ d ra pa tẽed a waoong ye. A kõo tõnd a mobillã. Asirãnsã ra zoe n yaoome. Sẽn da ket bal yaa d ning esãens n tar n kẽnda. D paama mobillã d sẽn da ratã.

A Zeova wilgame t’a na n gesa d yell tɩ d paam bũmb ning sẽn yaa tɩlɛ ne-dã. D sẽn da segd n maan bal yaa d lʋɩɩs Rĩungã yɛl taoore.

Tõnd sẽn wa n maand So-pakrã tʋʋmd lekoll yʋʋmd 1978 wã, a Raimo Kuokkanen a sẽn yaa sẽn zãmsd-b tõndã nin-yendã sagl-d lame tɩ d gʋls n kos n kẽng Galaad lekollã. Rẽ n so tɩ d sɩng Ãngilindã zãmsg sẽn na yɩl n wa tõog n kẽng lekollã. La yʋʋmd 1980 wã, nand tɩ d gʋls demandã n kos n kẽnge, b boola tõnd tɩ d wa tʋm Fẽnlãnd filyallẽ wã. Wakat kãng tɩ Betɛllẽ tʋm-tʋmdbã ra pa tõe n gʋls n kos n kẽng Galaad ye. D sẽn da  rat yaa d tʋm zĩig ning a Zeova sẽn get tɩ yaa sõma n yɩɩda, la pa tõnd mengã sẽn get tɩ yaa sõma ye. Rẽ n so tɩ d sak n tɩ tʋm Betɛllẽ wã. La baa ne rẽ d ra ket n zãmsda Ãngilindã, n tagsdẽ tɩ daar ning bɩ tõe tɩ d wa paam weer n gʋls n kẽng Galaad lekollã.

Yʋʋm a wãn poore, Siglgã taoor lʋɩtb Sull kõo sor tɩ Betɛllẽ tʋm-tʋmdb tõe n gʋls n kẽng Galaad lekollã. D gʋlsa demandã zĩig pʋgẽ, la pa rat n yeel tɩ d sẽn tʋmd Betɛllẽ wã ra pa noom-d ye. D sẽn da rat bal yaa d kõ d mens ne yamleoogo, n tɩ tʋm zĩig ning fãa raab sẽn beẽ, sã n mik tɩ d paama zãmsg rẽ yĩnga. B boola tõnd tɩ d kẽng Galaad lekoll 79 soabã. D karem n saa yʋʋmd 1985 bõn-bɩʋʋng kiuugã pʋgẽ. Rẽ poore b tʋm-d-la Kolõmbi.

D sẽn ta Kolõmbi wã, b kɩtame tɩ d reng n tɩ tʋm filyallẽ wã. M modgame n tʋm m tʋʋmdã sõma Betɛllẽ wã. La yʋʋmd poore, m tagsame tɩ yɩta sõma tɩ d toeeme. Rẽ n yɩ pipi m sẽn kos n na n toeem tʋʋmde, la m pa le kos a buud me ye. Rẽ poore b kɩtame tɩ d kẽng Neiva sẽn be Huila soolmẽ wã, n tɩ yɩ misioneer-dãmba.

Mam sɩng n nonga koɛɛgã moonego. Mam sẽn wa n yaa so-pakd n be Fẽnlãnd n nan pa kẽ kãadmã, m da mi n sãda yibeoog n sɩng koɛɛgã moonego, n moon n tãag yʋngo. Maam ne a Sirkka sẽn wa n kẽ kãadem paalmã, d ra mi n moona koɛɛgã daarã tõre. D sã n da kẽng zĩ-zãrgẽ n tɩ moone, d ra mi n kell n gãanda d mobillẽ wã. Rẽ ra kɩtdame tɩ d tõogd n sɩngd koɛɛgã mooneg pĩnd vẽkembeoogã, tɩ pa yɩ tɩlɛ tɩ d tog sor n lebg n wa ye.

D sẽn wa n lebg misioneer-dãmbã, d le paama d pĩnd yẽesmã koɛɛgã mooneg pʋgẽ. Tõnd tigingã neb sõor fɩɩgame. Kolõmbi saam-biisã la saam-bi-pogsã yaa neb sẽn mi ned waoogre, n tar nonglem, la sõm-mitba.

Tẽn-bõones n da pa zãr wʋsg ne Neiva sẽn yaa tẽng ning b sẽn tʋm tõndã, tɩ koe-moond baa a ye ra pa be be ye. M da rata ne m sũur fãa tɩ koe-noogã ta zĩ-kãense, la m pa mi m sẽn na n maaneg ye. Bala tõatbã sẽn da be be wã yĩng kɩtame tɩ sãan da pa tõe n kẽng be tɩ b pa maan-a yell ye. Rẽ n kɩt tɩ m pʋʋs a Zeova n kos tɩ tẽn-kãens ned lebg a Zeova Kaset soaba. M da tagsdame tɩ ned a woto na n bãnga sɩdã Neiva. Rẽ n so tɩ m pʋʋs a Zeova n kos me tɩ ned a woto sã n deeg lisg bɩ a tẽebã paam pãnga, t’a lebg n leb a ba-yirã n tɩ moon koɛɛgã. M da segd n bãngame t’a Zeova tara a sẽn na n maan tɩ yɩ sõma n yɩɩda.

Rẽ poor bilfu, m sɩnga Biiblã zãmsg ne bi-bɩɩg yʋʋr sẽn boond t’a Fernando González. A ra bee Alzesiras sẽn naag tẽn-bõones nins pʋsẽ a Zeova Kaset soab baa a ye sẽn ka be wã. A Fernando ra yita kɩlo 50 la zak zĩigẽ n wat n tʋmd Neiva. A ra segenda a meng sõma zãmsg fãa yĩnga. Pa yã n kaoos me t’a sɩng tigissã fãa waoong ye. A sẽn sɩng Biiblã zãmsg pipi semennã pʋgẽ bala, a ra tigimda a tẽngã neb n zãmsd-b bũmb ning a sẽn bãng a Biiblã zãmsg sasa wã.

 A Fernando reega lisg yʋʋmd 1990 yʋʋm-vẽkr kiuugã, a sẽn sɩng Biiblã zãmsg kiuug a yoob poore. Rẽ poore, a lebga wakat fãa so-pakda. D sẽn paam t’a Zeova Kaset soab a ye be Alzesiras masã wã, filyallã tõe n tʋma zall so-pakdb beenẽ n pa yɛɛs wʋsg ye. Yʋʋmd 1992 wao-fugdg kiuugã, b lugla tiging tẽn-kãngã.

A Fernando ra moonda a ba-yirã bal bɩ? Ayo! B kãadmã poore, yẽ ne a pagã yik n kẽnga Sãvisente dɛl Kaguan sẽn yaa tẽn-bil a Zeova Kaset soab sẽn ka be wã. Beenẽ, b sõng n lugla tiginga. Yʋʋmd 2002 a Fernando lebga tigims sull yel-gɛta. Yẽ ne a pag a Olga ket n gilgd n kaagda tigimsã hal n tãag rũndã.

Kiba-kãngã sõnga maam tɩ m bãng tɩ tara yõod tɩ d pʋʋs n kos bũmb takɩ, tʋʋm nins b sẽn kõt tõnd Wẽnnaam tũubã pʋgẽ wã wɛɛngẽ. A Zeova maanda bũmb ning tõnd sẽn pa tõe n maanã. Sɩd me, yaa yẽ la tigsgã soaba, pa tõnd ye.—Mat. 9:38.

Yʋʋmd 1990 wã, b kɩtame tɩ d gilgd n kaagd tigimsã. Tõnd pipi tigims sullã ra bee Bogota sẽn yaa na-tẽngã. Tʋʋmdã ra kẽesd-d-la rabeem. Maam ne m pagã ra pa tar minim wʋsg ye. Sẽn paase, d ra pa minim tẽn-bedr pʋgẽ vɩɩm ye. La a Zeova pidsa bũmb ning a sẽn pʋlem tɩ be Filip rãmb 2:13 pʋgẽ wã. Be b yeelame: “Wẽnnaam n yaa soab ning sẽn kõt yãmb pãnga, soab ning sẽn kõt yãmb raab la tõog sẽn na yɩl tɩ y maan sẽn noom-a wã.”

B wa n tʋma tõnd tigims sull a ye sẽn be Medelin sẽn yaa tẽng ning yell m sẽn gom sɩngrẽ wã. Zĩ-kãng nebã ra minim n yãta nen-kɛglem tʋʋm zĩig fãa, hal tɩ pa le yɛɛsd-b ye. Wala makre daar a ye, m da zãmsda Biiblã ne neda, n wa wʋmd b sẽn wẽed bug-raad yɩngã. M da baood n gãanda tẽnga, la Biibl karen-biigã ra ket n karemda sullã, tɩ yaa wa bũmb pa maan ye. A sẽn wa n karem sullã n sa wã, a yeelame t’a na n yiime la a wa. Sẽn yɩ bilfu, a lebg n waa ne kom-bõoneg a yiibu, n bʋk a koɛɛgã n yeel maam yaa: “Maan-y-m sugr tɩ m da segd n tɩ talla m kambã n wa.”

Bũmb toor-toor n maan tɩ ra tõe n tũ ne d yõore. Daar a ye d sẽn wa n moond zak-zaka, m wa n nee m pagã sẽn zoet n wat mam nengẽ ne rabeem wʋsgo. A yeelame tɩ ned n tão yẽ ne bug-raoogo. Rẽ yɛɛsa maam wʋsgo. La d wa n bãngame tɩ pa a Sirkka la raoã ra rat n tão ye. Yaa rao a to sẽn da loogd a sɛɛgẽ.

Kaoosg zugẽ, nen-kɛglmã wa n pa le kẽesd-d rabeem wʋsg ye. D tẽed-n-taas nins sẽn yaa tẽng-n-nebã sẽn mao ne zu-loees a woto buudu, la zu-loees wẽnem sẽn yɩɩd rẽ ne raoodã kenga tõnd me raoodo. D yeela d mens t’a Zeova sẽn sõngd-bã, a na n sõnga tõnd me. Wakat fãa d ra tũuda kãsem-dãmb nins sẽn yaa tẽng-n-nebã saglsã, n gũusd d meng la d bas sẽn ketã ne a Zeova.

Sɩd-sɩda pa wakat fãa la yɛlã ra yaa wẽng wʋsg wa d sẽn da tẽedã ye. Vugri m kẽe zak a yembr n wʋmd pagb a yiib sẽn be yɩng n  gomd tɩ yaa wa b tʋʋda taaba. M da pa rat n ges zabrã ye. La zakã soab yeela maam tɩ m dʋ teraasã zugu. M wa n bãngame tɩ pa neb n zabd taaba, la tɩ yaa kẽes a yiib n togsd yagsã goama.

Yʋʋmd 1997 wã, b yãka maam tɩ m lebg Wẽnnaam tʋʋmdã zãmsg lekoll b karen-saamba. Mam sɩng n nonga siglgã lekoll-dãmbã. La m zɩ n tags tɩ m na n wa lebga lekoll-kãensã a ye karen-saamb ye.

B wa n yãka maam tɩ m lebg distrik yel-gɛta. B sẽn wa n yeel tɩ distrik yel-gɛt pa na n le zĩndã, m le lebga tigims sull yel-gɛta. Yʋʋm 30 la zak pʋgẽ, m yɩɩ karen-saamb la tigims sull yel-gɛta. Tʋʋm-kãens maasem yĩnga m paama bark buud toor-toore. La pa wakat fãa la yɩ nana ye. Tɩ m wilg-y bũmb ning sẽn kɩt tɩ m yet woto wã.

Mam yaa ned sẽn tar yẽesem wʋsgo. Rẽ sõnga maam tɩ m mao ne zu-loe-kɛgemse. Wakat ninga, m baoome n na n toeem yɛl kẽer tigimsã pʋsẽ ne yẽesem tɩ looge. Wakat n zĩnd tɩ m sagl neb kẽer tɩ b tall nonglem ne b taabã, la b ra yɩ dem-dem wʋsg ne-b ye. Sẽn maand laadã yaa tɩ m maana rẽ ne yẽesem tɩ looge, n bãng tɩ mam mengã pa maand woto ye.—Rom. 7:21-23.

Mam pãn-komsmã mi n kɩtame tɩ m koms raood wʋsgo. (Rom. 7:24) M wa n pʋʋsa a Zeova, n yeel-a tɩ yɩta sõma tɩ m bas misioneer tʋʋmdã, n lebg n leb Fẽnlãnde. Daar-n-kãng zaabre, m kẽnga tigsga. Bũmb ning mam sẽn wʋm tigsgã sasa wã sõnga maam tɩ m bãng tɩ m segd n kell n tʋma m tʋʋmdã, la m kell n mao ne m pãn-komsmã. Hal n tãag rũndã, m sũur ket n nooma ne a Zeova sẽn leok m pʋʋs-kãng vẽeneg to-to wã. Sẽn paase, m sũur nooma wʋsg ne a sẽn sõngd-m tɩ m ket n maood ne m pãn-komsmã.

Maam ne a Sirkka pʋʋsda a Zeova bark wʋsgo, d sẽn paam n kẽes d meng zãng-zãng a tʋʋmdã pʋgẽ d vɩɩmã tõr la balã. Sẽn paase, m pʋʋsda a Zeova bark a sẽn kõ-m pag sẽn nong-m la a teend-m yʋʋm-kãensã fãa pʋgẽ wã.

Ka la bilfu m na n taa yʋʋm 70 tɩ yɩ tɩlɛ tɩ m bas n pa le yaa karen-saamb la tigims sull yel-gɛt ye. La rẽ pa sãamd m sũur ye. Bõe yĩnga? Bala m kɩsa sɩd tɩ bũmb ning sẽn noom a Zeova n yɩɩd yaa d sẽn na n tũ-a ne sik-m-menga, la d pẽgd-a d sẽn nong-a la d sũur sẽn noom ne-a yĩnga. (Mis. 6:8; Mark 12:32-34) Pa tɩlɛ tɩ d paam tʋʋm-kãseng n yaool n tõog n pẽg a Zeova ye.

M sã n tags tʋʋm nins b sẽn kõ maamã yelle, m miime tɩ pa mam sẽn zems ne tʋʋm-kãens n yɩɩd neb a taabã yĩng ye. Leb n pa mam sẽn tar minim wʋsg yĩng ye. Ayo. A Zeova maana maam lohorem n kõ-m tʋʋm-kãense. A kõ-m-la tʋʋm-kãens baa ne m sẽn tar pãn-komsmã. M miime tɩ yaa ne a Zeova sõngr bal la m sẽn tõog n tʋmã. Rẽ n so tɩ m yetẽ tɩ mam pãn-komsmã wilgame tɩ Wẽnnaam pãngã yaa kãsengã.—2 Kor. 12:9.