Ku̱i̱ya̱ 1955 ka̱kui̱, u̱ni̱ kúú ñanii̱ ta yi̱ʼi̱ kúú ta̱ loʼoka. Chí costa sur ña̱ Finlandia xa̱ʼnui̱ ta tiempo vitin ñuu loʼo yóʼo naníña Vantaa.

Tá kúma̱níka kakui̱ siʼíi̱ nda̱kuchiñá ta ndu̱uñá testigo Jehová. Soo yivái̱ kǒo níxiinra ña̱ sakúaʼa siʼíi̱ xa̱ʼa̱ Jehová ta ni̱ka̱ʼa̱nra xíʼin siʼíi̱ ña̱ kǒo sánáʼa̱ñá ndi̱ʼi̱ xa̱ʼa̱ Biblia ni ña̱ ku̱ʼu̱nndi̱ xíʼinñá reunión. Ña̱kán tá kǒo yivándi̱ níxi̱yo veʼe, xi̱sanáʼa̱ñá ndi̱ʼi̱ xa̱ʼa̱ Jehová.

Nda̱a̱ tá ni̱xi̱yo loʼovíi̱ chi̱kaa̱-inii̱ ña̱ ndasakáʼnui̱ Jehová. Tá kúú, tá xi̱kuumiíi̱ 7 ku̱i̱ya̱ ñá maestrai̱ ni̱sa̱a̱níñá xíʼi̱n saáchi kǒo níxii̱ kuxui̱ iin torta loʼo ña̱ kéʼéna ñuu Finlandia ña̱ naní verilättyjä saáchi ni̱i̱ táanna xíʼinña. Xíʼin iin ndaʼa̱ñá xu̱náñá yuʼíi̱ ta xíʼin inka ndaʼa̱ñá xi̱kuni̱ñá chikaa̱ñáña yuʼíi̱, soo chi̱ndaʼíi̱ ndaʼa̱ñá tasaá nda̱kava ña̱ xi̱kuni̱ñá chikaa̱ñá yuʼíi̱.

Tá xi̱kuumiíi̱ 12 ku̱i̱ya̱ ni̱xi̱ʼi̱ yivái̱, tasaá ki̱xáʼíi̱ xáʼi̱n reunión. Xa̱ʼa̱ ña̱ ni̱ndi̱ʼi̱-ini na̱ hermano xa̱ʼíi̱ ña̱yóʼo chi̱ndeétáʼanña xíʼi̱n ña̱ kuni̱kai̱ sakúaʼi̱ xa̱ʼa̱ Jehová. Tasaá ndiʼi ki̱vi̱ ki̱xáʼíi̱ káʼvii̱ Biblia xíʼin tutu ña̱ tává na̱ ñuu Ndióxi̱. Ña̱yóʼo chi̱ndeétáʼanña xíʼi̱n ña̱ va̱ʼa ni̱xa̱i̱ nda̱kuchii̱ 8 tí agosto ña̱ ku̱i̱ya̱ 1969 tá kúúmiíi̱ 14 ku̱i̱ya̱.

 Tá xa̱a̱ ndi̱ʼi ka̱ʼvii̱ escuela, ki̱xáʼíi̱ kúi̱ precursor regular. Tá ni̱ya̱ʼa loʼo semana nda̱kiʼi̱n ku̱a̱ʼi̱n ñuu Pielavesi, iin ñuu loʼo ña̱ ndíkaa̱ chí centro ña̱ ñuu Finlandia ña̱ va̱ʼa natúʼi̱n xa̱ʼa̱ Ndióxi̱.

Ñuu Pielavesi xi̱nitáʼi̱n xíʼin ñá Sirkka ta ñáyóʼo kúúñá ti̱ndaʼa̱ xíʼi̱n. Ni̱kutóoníi̱ ña̱ kéʼéñá saáchi va̱ʼaní-iniñá ta ndíʼi̱ní-iniñá xa̱ʼa̱ chiñu Ndióxi̱, kǒo níxi̱kuni̱ñá kindo̱o va̱ʼañá nu̱ú inkana ni ña̱ koo ku̱a̱ʼá xu̱ʼúnñá. U̱vi̱ saándi̱ xi̱kuni̱ndi̱ kachíñu ku̱a̱ʼákandi̱ nu̱ú Jehová ta ni̱ka̱ʼa̱nndi̱ ña̱ keʼéndi̱ nda̱a̱ ndáaka chiñu ña̱ taxina ndaʼa̱ndi̱. Ki̱vi̱ 23 tí marzo ña̱ ku̱i̱ya̱ 1974 ti̱ndaʼa̱ndi̱. Nu̱úka ña̱ ku̱ʼu̱n si̱índi̱ va̱ʼaka nda̱kiʼinndi̱ ku̱a̱ʼa̱nndi̱ ñuu Karttula ña̱ natúʼunndi̱ xa̱ʼa̱ Ndióxi̱.

Nda̱a̱ tá ti̱ndaʼa̱ndi̱ ki̱ʼinndi̱ kuenta ña̱ tá siʼna chiñu Jehová kéʼéndi̱ miíra taxi ndiʼi ña̱ xíniñúʼundi̱ (Mat. 6:33). Tá kúú, tá ni̱xa̱ʼa̱nndi̱ ñuu Karttula kǒo carrondi̱ níxi̱yo chi xíʼin bicicleta xi̱xikandi̱, soo tá xi̱kuun nieve kǒo níxi̱kuchiñu ku̱ʼu̱nndi̱ xíʼin túyóʼo chi vi̱xinní ni̱xi̱yo. Saátu káni̱ní xi̱xaʼa̱nndi̱ xi̱natúʼunndi̱ xíʼin na̱ yiví, ña̱kán xi̱xiniñúʼundi̱ iin carro loʼo. Soo kǒo níxi̱kuumiíndi̱ xu̱ʼún ña̱ satándi̱nú.

Iin ki̱vi̱ ñanii̱ ni̱xa̱ʼa̱nra xi̱tora ndi̱ʼi̱, ta̱xira carrora ndaʼa̱ndi̱ ta kǒo níxiinra kiʼinra xu̱ʼún. Ña̱kán ña̱ xi̱niñúʼu keʼé kuitíndi̱ kúú ña̱ chika̱a̱ndi̱ gasolinanú.

Ki̱ʼinndi̱ kuenta ña̱ tá chíkaa̱ndi̱ ndee̱ ña̱ kachíñundi̱ nu̱ú Jehová kǒo ña̱ kuma̱ní nu̱úndi̱, ña̱ xi̱niñúʼu keʼé kuitíndi̱ kúú ña̱ kachíñundi̱ nu̱ú Jehová.

Ku̱i̱ya̱ 1978 tá ñúʼundi̱ escuela na̱ precursor, iin ta̱ xi̱sanáʼa̱ ndi̱ʼi̱ ta̱ naní Raimo Kuokkanen, a ni̱ka̱ʼa̱nra xíʼinndi̱ ña̱ ná sandákutúndi̱ solicitud ña̱ ku̱ʼu̱nndi̱ Escuela ña̱ Galaad. Ña̱kán ki̱xáʼandi̱ sákuaʼandi̱ tu̱ʼun inglés ña̱ va̱ʼa ku̱ʼu̱nndi̱ escuela yóʼo. Soo kǒo nísandákutúvíndi̱ solicitud saáchi ku̱i̱ya̱ 1980 ni̱ka̱ʼa̱nna xíʼinndi̱ ña̱ kuñúʼundi̱ Betel ña̱ Finlandia. Tiempo saá na̱ ñúʼu Betel kǒo kíví chikaa̱na solicitud ña̱ ku̱ʼu̱nna Galaad. Ta  xi̱kuni̱ndi̱ kachíñundi̱ nu̱ú Jehová nu̱ú kúni̱ miíra ta su̱ví nu̱ú kúni̱ miíndi̱. Ña̱kán ka̱ndíxavandi̱ keʼéndi̱ ña̱yóʼo, soo chi̱kaa̱vandi̱ ndee̱ ña̱ sakúaʼandi̱ tu̱ʼun inglés saáchi xi̱kuni̱ndi̱ ku̱ʼu̱nndi̱ escuela ña̱ Galaad.

Tá ni̱ya̱ʼa loʼo ku̱i̱ya̱ na̱ Cuerpo Gobernante ni̱ka̱ʼa̱nna ña̱ kiviva chikaa̱ na̱ ñúʼu Betel solicitud ña̱ va̱ʼa ku̱ʼu̱nna Galaad. Ña̱kán ndi̱ku̱n kama chi̱ndaʼándi̱ solicitud, soo xi̱kusi̱íníva-inindi̱ ña̱ xi̱ñuʼundi̱ Betel. Soo ña̱ xi̱kuni̱níkandi̱ kúú ña̱ ku̱ʼu̱nndi̱ inka ñuu ña̱ natúʼunndi̱ xa̱ʼa̱ Ndióxi̱ xíʼin na̱ yiví. Ni̱ka̱ʼa̱nna xíʼinndi̱ ña̱ ku̱ʼu̱nndi̱ clase 79 ña̱ Galaad, ta septiembre ña̱ ku̱i̱ya̱ 1985 sa̱ndíʼindi̱ ka̱ʼvindi̱, ta ñuu Colombia chi̱ndaʼána ndi̱ʼi̱.

Tá ni̱xa̱a̱ndi̱ ñuu Colombia ni̱ka̱ʼa̱nna xíʼinndi̱ ña̱ kachíñundi̱ Betel chi̱kai̱ ndee̱ ña̱ viíní keʼíi̱ chiñu kán. Soo tá ni̱ya̱ʼa iin ku̱i̱ya̱ nda̱kanixi̱níi̱ ña̱ xi̱niñúʼu keevandi̱. Iinlá saá kúú ña̱ ni̱ka̱ʼi̱n xíʼinna ña̱ nasamana ndi̱ʼi̱ ña̱ va̱ʼa keʼéndi̱ inka chiñu. Saá chi̱ndaʼána ndi̱ʼi̱ ña̱ ku̱ʼu̱nndi̱ koondi̱ misionero ñuu Neiva ta ña̱yóʼo ndíkaa̱ña ñuu ña̱ Huila.

Ndiʼi tiempo kúsi̱íní-inii̱ ña̱ natúʼi̱n xa̱ʼa̱ Ndióxi̱. Tá ni̱xi̱yoi̱ ñuu Finlandia xi̱kui̱ precursor regular ta xi̱kitai̱ xi̱ta̱an tasaá xi̱ndikói̱ nda̱a̱ tá xa̱a̱ ñuú ña̱ xi̱natúʼi̱n xíʼin na̱ yiví xa̱ʼa̱ Ndióxi̱. Ta tá ti̱ndaʼíi̱ xíʼin ñá Sirkka sava yichi̱ iníí ki̱vi̱ xi̱natúʼunndi̱ xíʼin na̱ yiví xa̱ʼa̱ Ndióxi̱. Ta xi̱xaʼa̱ndi̱ xi̱sanáʼa̱ndi̱ na̱ yiví sava ñuu ña̱ xíkaní xi̱kindo̱o. Sava yichi̱ xi̱kisi̱ndi̱ ini carro ña̱ va̱ʼa ya̱chi̱ xa̱a̱ndi̱ natúʼunndi̱ xíʼin na̱ yiví xa̱ʼa̱ Ndióxi̱.

Xa̱ʼa̱ ña̱ ki̱xáʼa tukundi̱ nátúʼunndi̱ xíʼin na̱ yiví xa̱ʼa̱ Ndióxi̱ ki̱xáʼa tukundi̱ kúsi̱í-inindi̱ keʼéndi̱ chiñu yóʼo. Congregación nu̱ú xi̱ñuʼundi̱ xa̱ʼnuña. Na̱ hermano na̱ ñuu Colombia to̱ʼóní-inina va̱ʼaní-inina ta si̱íní-inina.

Yatin ñuu Neiva ni̱xi̱yo ñuu válí ña̱ kǒo ni iin na̱ testigo Jehová níxi̱yo. Soo xa̱ʼa̱ ña̱ xi̱ndikaa̱ ku̱a̱chi i̱yoní ki̱ʼvi inka na̱ yiví ñuu kán chi nda̱a̱ kivi kaʼnínana. Sava yichi̱ xi̱ndakanixi̱níi̱ ta xi̱kaʼi̱n ndáa ki̱ʼva kunda̱a̱-ini na̱ yiví yóʼo xa̱ʼa̱ Jehová. Ña̱kán ni̱ka̱ʼi̱n xíʼin Jehová ña̱ iin na̱ ñuu kán ná ku̱ʼu̱nna ñuu Neiva ta nduuna testigora, tasaá ndikóna ñuuna ña̱ sanáʼa̱na na̱ yiví xa̱ʼa̱ra. Va̱ʼaní ña̱ nda̱kanixi̱níi̱ túvii̱, soo va̱ʼaníkava ña̱ ke̱ʼé Jehová.

Tá ni̱ya̱ʼa loʼo tiempo ki̱xáʼíi̱ káʼvii̱ xíʼin iin ta̱ loʼo ta̱ naní Fernando González ta̱yóʼo ñuu Algeciras ni̱xi̱yora, ta kǒo níxi̱kivi ku̱ʼu̱nndi̱ natúʼunndi̱ xa̱ʼa̱ Ndióxi̱ ñuu yóʼo. Ndiʼi ki̱vi̱ xi̱xaʼa̱nra xi̱kachíñura ñuu Neiva ña̱ xi̱kindo̱o ki̱ʼva 50 kilómetro (30 milla). Ta xi̱kaʼvi kúeera tutu ña̱ xi̱kaʼvindi̱ xíʼinra ta saátu xi̱xaʼa̱nra ndiʼi reunión. Saátu semana ña̱ nu̱ú ña̱ ki̱xáʼara káʼvira, sa̱ndátakara sava na̱ ñuura ña̱ va̱ʼa natúʼunra xíʼinna xa̱ʼa̱ ña̱ sákuaʼara.

Sa̱kán i̱ñu̱ yo̱o̱ kuití sákuaʼara xa̱ʼa̱ Ndióxi̱ tasaá nda̱kuchira enero ña̱ ku̱i̱ya̱ 1990, tasaá ndi̱ku̱n ki̱xáʼara kúúra precursor regular. Xa̱ʼa̱ ña̱ xi̱kuu ta̱ Fernando testigo Jehová  ñuu Algeciras, na̱ káchíñu Betel chi̱ndaʼána na̱ precursor especial ña̱ ku̱ʼu̱nna ñuu kán. Ta yo̱o̱ febrero ña̱ ku̱i̱ya̱ 1992 ki̱xáʼa íyo iin congregación ñuu kán.

Soo ta̱ Fernando kǒo níndo̱ora ñuura chi tá xa̱a̱ ti̱ndaʼa̱ra xíʼin ñá Olga nda̱kiʼinna ku̱a̱ʼa̱nna iin ñuu nu̱ú kǒo na̱ testigo Jehová íyo ña̱ va̱ʼa natúʼunna xíʼin na̱ yiví xa̱ʼa̱ Ndióxi̱, ñuu kán naníña San Vicente del Caguán. Ta saátu ki̱xáʼa íyo iin congregación kán. Ta ku̱i̱ya̱ 2002 ni̱ka̱ʼa̱nna xíʼinra ña̱ koora superintendente ña̱ circuito ta chiñu yóʼo kúú ña̱ kéʼéra nda̱a̱ vitinva.

Ña̱yó’o chi̱ndeétáʼanña xíʼi̱n ña̱ kunda̱a̱-inii̱ ña̱ xíniñúʼu káxiní ka̱ʼi̱n xíʼin Jehová ndáa chiñu kúú ña̱ kúnii̱ keʼíi̱ nu̱úra. Jehová kéʼéra ña̱ kǒo kíví keʼé miíyó, saáchi chiñu miíra kúú ña̱yóʼo (Mat. 9:38).

Ku̱i̱ya̱ 1990 ni̱ka̱ʼa̱nna xíʼi̱n ña̱ koi̱ superintendente ña̱ circuito. Ta circuito ña̱ nu̱ú ña̱ ni̱xa̱ʼa̱nndi̱ xi̱kuu ñuu Bogotá ña̱ kúú capital ña̱ Colombia. Ñá Sirkka xíʼin yi̱ʼi̱ kǒo kéʼévindi̱ ña̱ʼa ña̱ ndáyáʼviní táʼan ña̱ kéʼé inkana. Nda̱kanixi̱níndi̱ ña̱ káʼnuní ñuu yóʼo, saáchi nina ñuu válíva xi̱ndoondi̱ ña̱kán xi̱yiʼvíndi̱ keʼéndi̱ chiñu yóʼo. Soo, Jehová sa̱xínura ña̱ káʼa̱n Filipenses 2:13. Texto yóʼo káchiña: “Saáchi Ndióxi̱ kúú ta̱ táxi ndee̱ ndaʼa̱ndó ña̱ va̱ʼa kuni̱ndó keʼéndó iin ña̱ʼa, ta saátu ña̱ koo ndee̱ ndaʼa̱ndó ña̱ keʼéndóña”.

Tá ni̱ya̱ʼa loʼo tiempo na̱samana ndi̱ʼi̱ ta nda̱kiʼinndi̱ ku̱a̱ʼa̱nndi̱ ñuu Medellín. Ñuu kán, na̱ yiví kǒo níxi̱yiʼvíkana tá xi̱xitona ña̱ xi̱kanitáʼan na̱ yiví saáchi ndiʼi ki̱vi̱ xi̱xitona ña̱ xi̱xiyoní ku̱a̱chi. Ndákaʼíi̱n ña̱ iin ki̱vi̱ táxii̱ estudio ndaʼa̱ iin ta̱a, tasaá ki̱xáʼa káʼndi tu̱xi̱í. Yi̱ʼi̱ xi̱kunii̱ sakánai̱ miíi̱ nu̱ú ñuʼú, soo ta̱ xi̱kaʼvii̱ xíʼi̱n kǒo níyi̱ʼvíra ta sa̱ndíʼira ka̱ʼvira párrafo. Saá ni̱ka̱ʼa̱nra xíʼi̱n: “Kundatu loʼún yi̱ʼi̱, tikáʼan ndikói̱”. Tá xa̱a̱ ndi̱kóra ki̱xaa̱ u̱vi̱ na̱ va̱lí xíʼinra tasaá ni̱ka̱ʼa̱nra xíʼi̱n: “Káʼnu koo iniún, soo xi̱niñúʼu ku̱ʼi̱n ndakiʼi̱n na̱ va̱lí se̱ʼi̱”.

Ndeéní ni̱yi̱ʼvíi̱, soo su̱ví iinlá ña̱yóʼo kuití níndoʼondi̱. Iin yichi̱ tá nátúʼunndi̱ veʼe tá veʼe ñá síʼíi̱ ndeéní ni̱yi̱ʼvíñá ta ni̱ka̱ʼa̱nñá xíʼi̱n: “Kúni̱na kaʼnína yi̱ʼi̱, saáchi ki̱xáʼana kínina á xátana ka̱a nu̱ú ndíkai̱”. Ta saátu yi̱ʼi̱va ni̱yi̱ʼvíníi̱. Soo, tá ni̱ya̱ʼa loʼo na̱kunda̱a̱-inindi̱ ña̱ su̱ví miívíñá níxi̱kuni̱na kaʼnína, chi iin ta̱a ta̱ ni̱ya̱ʼa síi̱nvañá xi̱kuni̱na kaʼnína.

Soo, tándi̱ʼi kǒo níyi̱ʼvíkandi̱ saáchi xa̱a̱ ni̱ka̱anvandi̱. Xi̱ndakandaní-inindi̱ tá xi̱xitondi̱ ña̱ xi̱kundeé-ini na̱ hermano xi̱yaʼana nu̱ú ndiʼi tu̱ndóʼo. Ña̱kán, ni̱ka̱ʼi̱n xíʼin ñá síʼíi̱: “Tá Jehová ndáara na̱ hermano yóʼo, saátu kundaara miívayó”. Ndiʼi tiempo xi̱keʼéndi̱ ña̱ xi̱kaʼa̱n na̱ anciano xíʼinndi̱. Xi̱kiʼinníndi̱ kuenta nu̱ú xi̱xikandi̱. Ta saátu xi̱ndaa-inindi̱ Jehová ña̱ kundaara ndi̱ʼi̱.

Sava yichi̱ xi̱yiʼvíníndi̱ soo tándi̱ʼi kǒo ña̱ʼa níxi̱kuuví. Tá kúú, iin ki̱vi̱ tá ni̱xa̱ʼi̱n xi̱toi̱ iin na̱  yiví xi̱niso̱ʼi̱ ña̱ ndeéní náa u̱vi̱ ná si̱ʼí. Kǒo níxi̱kuni̱víi̱ kotoi̱ ndáaña kúu, soo náná ñá ni̱xa̱i̱ nu̱ú kán ni̱ka̱ʼa̱nñá xíʼi̱n ña̱ kotoi̱ chí ventana. Tá xi̱toi̱ ki̱ʼi̱n kuenta ña̱ u̱vi̱ loro xi̱kuu tí xi̱ndanaʼa̱ yuʼú na̱ yiví.

Ku̱i̱ya̱ 1997 ni̱ka̱ʼa̱nna xíʼi̱n ña̱ koi̱ instructor ña̱ Escuela del Entrenamiento Ministerial. b Xi̱kuni̱níi̱ ku̱ʼi̱n escuela yóʼo, soo kǒo níndakanixi̱níi̱ ña̱ miíi̱ koo ta̱ sanáʼa̱ ti̱xin escuela yóʼo.

Saátu, xi̱kui̱ superintendente ña̱ distrito, soo tá ni̱ka̱ʼa̱nna ña̱ kǒoka na̱ superintendente ña̱ distrito koo, saá ki̱xáʼa tukui̱ kúi̱ superintendente ña̱ circuito. Xa̱a̱ yáʼaka 30 ku̱i̱ya̱ sánáʼi̱ ti̱xin ña̱ escuela yóʼo, saátu ña̱ kúi̱ superintendente ña̱ circuito. Xa̱a̱ ku̱a̱ʼání bendición ndákiʼi̱n xa̱ʼa̱ ña̱ kéʼíi̱ chiñu yóʼo, soo saátu xa̱a̱ ku̱a̱ʼá tu̱ndóʼo yáʼi̱ nu̱ú. ¿Nda̱chun káʼi̱n ña̱yóʼo?

Saáchi ku̱e̱ʼe̱níi̱, soo ña̱yóʼo xa̱a̱ va̱ʼaní chíndeéña yi̱ʼi̱ ña̱ yaʼi̱ nu̱ú tu̱ndóʼo ña̱ ndeéní. Soo, ña̱yóʼo kǒo chíndeétáʼanña xíʼi̱n tá xa̱a̱ kéʼíi̱ chiñu ti̱xin congregación. Xa̱ʼa̱ ña̱ ku̱e̱ʼi̱ kúnii̱ ña̱ keʼé na̱ hermano nda̱a̱ táki̱ʼva káʼi̱n. Sava yichi̱ xi̱ndaʼyii̱ nu̱ú na̱ hermano ta xi̱kaʼi̱n xíʼinna ña̱ xíniñúʼu kuʼvi̱-inina kunitáʼanna ta kunda̱a̱-inina xíʼin ña̱ ndóʼo inkana. Xi̱ndaʼyii̱ nu̱úna ña̱ keʼéna ña̱yóʼo, soo ña̱yóʼo kúú ña̱ xi̱xiniñúʼu keʼé miívai̱ (Rom. 7:​21-23).

Sava yichi̱ ndákavaní-inii̱ xa̱ʼa̱ ña̱ kéʼíi̱ ña̱yóʼo (Rom. 7:24). Iin yichi̱ nda̱kavaní-inii̱ ta ni̱ka̱ʼi̱n xíʼin Jehová ña̱ va̱ʼaka ndikói̱ ñuu Finlandia ta va̱ása kookai̱ misionero. Soo, ki̱vi̱ saá ti̱xin reunión xi̱niso̱ʼi̱ iin ña̱ chi̱ndeétáʼanní xíʼi̱n. Ña̱ xi̱niñúʼu chikai̱ ndee̱ ña̱ viíka keʼíi̱ chiñu ña̱ xi̱kuumiíi̱ ta saátu ña̱ nasamai̱ ki̱ʼva ña̱ íyoi̱. Káxiní nda̱kuiin Jehová oración ña̱ ni̱ka̱ʼi̱n xíʼinra ta kǒo nandósó-inii̱ xa̱ʼa̱ ña̱yóʼo. Saátu, táxiníi̱ tíxa̱ʼvi ndaʼa̱ra chi xa̱a̱ va̱ʼaní chíndeétáʼanra xíʼi̱n ña̱ nasamai̱ ki̱ʼva ña̱ íyoi̱.

Ñá Sirkka xíʼin miíi̱ táxiníndi̱ tíxa̱ʼvi ndaʼa̱ Jehová xa̱ʼa̱ ña̱ táxira ña̱ xa̱a̱ ku̱a̱ʼání ku̱i̱ya̱ káchíñundi̱ nu̱úra. Saátu táxiníi̱ tíxa̱ʼvi ndaʼa̱ Jehová xa̱ʼa̱ ña̱ va̱ʼaní-ini ñá síʼíi̱ chi kúni̱níñá xíniñá yi̱ʼi̱ ta va̱ʼaní chíndeétáʼanñá xíʼi̱n ña̱ ndasakáʼnui̱ Jehová.

Si̱lóʼo tasaá xi̱nui̱ 70 ku̱i̱ya̱, ña̱kán va̱ása kookai̱ superintendente ña̱ circuito ni va̱ása kookai̱ instructor. Soo, kǒo kúsuchí-inii̱ ña̱ kǒo keʼékai̱ chiñu yóʼo, ¿nda̱chun? Saáchi kúnda̱a̱-inii̱ ña̱ kiviva ndasakáʼnuyó Jehová ni kǒo iin chiñu ña̱ ndáyáʼviní kúúmiíyó ti̱xin ñuura, chi ña̱ ndáyáʼvika kúú ña̱ vitá koo iniyó ta saátu ña̱ kuʼvi̱-iniyó kuniyóra xíʼin ndiʼi níma̱yó (Miq. 6:8; Mar. 12:​32-34).

Xa̱a̱ ku̱a̱ʼání ku̱i̱ya̱ ndásakáʼnui̱ Jehová, ta xa̱a̱ ku̱a̱ʼání chiñu kéʼíi̱ ti̱xin ñuura. Soo, tá xa̱a̱ ndákanixi̱níi̱ xa̱ʼa̱ ndiʼi ña̱ kéʼíi̱, su̱ví ña̱yóʼo kúni̱ kachiña, ña̱ kéʼíi̱ña xa̱ʼa̱ ña̱ ndíchiníi̱ á xa̱ʼa̱ ña̱ xíni̱níi̱. Ni kúi̱ ta̱ ku̱a̱chi, Jehová ta̱xira ña̱yóʼo ndaʼíi̱ chi kúʼvi̱ní-inira xínira yi̱ʼi̱. Mií Jehová chi̱ndeétáʼan xíʼi̱n ña̱ va̱ʼa ku̱chiñui̱ keʼíi̱ chiñu yóʼo. Saátu, miíra chi̱ndeé yi̱ʼi̱ ña̱ kǒo sa̱a̱ kamai̱ (2 Cor. 12:9).