Tita ge 1955 ge ǃnaehe tsî ǃnona-aore ǀgôagu ǃnâ a ǀuniga. Finlandi suides hurib ǀkhāb ai ta ge ge kai. ǁNā ǃās ge Vantaa ti ge ǂansa i.

Ti mamas ge tita nî ǃnaehes aiǃâ Jehovab ǃoaba-aon ǀguise ge ǁāǁnâhe. Xaweb ge ti papa amaba gere mâǃoa tsî ge mā-am tama hâ i, îs ǁîsa Elobmîsa ǁkhāǁkhā ge tamas ka io ǀhaode ǃoa ū sao ge. ǁNā-amagas ge ti papab gere ǀkhai, o Elobmîs di amaba gere ǁkhāǁkhā ge.

ǀGôasisa xu ta ge Jehovaba hoaǁae gere ǁnâuǀnam. Aiǁgause, hû kurixa ta a hînas ge ǁgauǃnâ-aosa kaise tita ǀkha ge ǁaixa, ǀaob ǀkha amhe hâ perete ta ge ǂû ǂgao tama io. ǀGui ǃommi ǀkhas ge ti xora gere ǁgâi îs ti amsa ǁkhowam tsîs ge nau ǀkhāb ǃommi ǀkha ǂkhōn perete ti ams ǃnâ gere ǁgâiǂgā. Ferkheba ta ge ǁîs ǃomma xu ge ǂnauǂûi hō.

Ti pab ge 12 kurixa ta hîna ge ǁō. ǁNās khaoǃgâ ta ge ǀhaohâb ǀhaode ge hâǃnâ ǁkhā i. ǀHaohâb ǃnâ ge hâ i ǃgâsan ge ǃgâiǃgâibasensa tita ǃnâ ge ǁgau tsîs ge nēsa ge ǂkhâǃnâte î ta gagasise aiǃgû. Elobmîsa tsēs hoasa khomai tsî ta ge sida ǂkhanina ǂōrisase gere ôaǃnâ. Nē xūna ta gere dī amaga ta ge 14 kurixa ta a hîna Augustub 8, 1969 ge ǁāǁnâhe.

 Skoli khaoǃgâ ta ge ǁnaetisa aimâba-aose ge ǃoaba tsoatsoa. Tsî ta ge ǀoro wekhegu ǃnâ aoǁnâ sîsenni ǂhâsib hâba Pielavesis ǃnâ sī ge ǃoaba tsoatsoa Finlandi ǀgūse.

Pielavesis ǃnâ ta ge ti ǀnamǀnamsa taras Sirkkas ǀkha ge ǀhao. ǁÎs ǃgamǃgamsenxasib tsî Jehovabas kaise a ǀnam ǃkhais xa ta ge ge ǂgae-e. ǂAnǂansasib tsî ǃkhūsib tsînas ge ge ôabasen tama hâ i. Hoam ge ǁkham a-e Jehovab ǃoabas ǃnâ gere dī ǂgao tsî māsenxase ǁgaumâide gere ūǃoa. Sîm ge Maarti 23, 1974 ge ǃgamme. ǃGamme toa tsîm ge Karttulasa ǃoa ge doe, ǁnāpa i ge aoǁnâ-aon ǂhâsiba ge hâ i.

ǃGamem ge tsēsa xub ge Jehovaba ge ǁgau, Gaosibam ga ǂgurose mâi, ob ǂhâm hâ xūn ǀkha nî kōǃgâmmi ǃkhaisa. (Mat. 6:33) Aiǁgause, Karttulas ǃnâm ge audo-e ge ūhâ tama hâ i. Tsîm ge ǂgurose ǀurihāb ǀkha gere ǃgāpimâ. Xawe i ge saob ǃnâ kaise gere ǃkhai. Kai ǂkharidi ǃnâ aoǁnâs ǃaromam ge audo-e ge ǂhâhâ i. Xawem ge audosam a ǁama-ū ǁkhā mari-e ge ūhâ tama hâ i.

ǃÂubasen tamam hâ hînab ge ti ǀgamǁî abutiba ge sari. ǁÎb audosab ge ge māmî îm sîsenū. Audos ge ǀnai ge matare-e toa hâ i tsîm ge petroli ǀgui-e nî ǁai ge is ge. ǂHâm ge hâ i audosam ge ge hō.

Jehovab ge ge ǁgau, ǂhâm hâ xūn ǀkhab nî kōǃgâmmi ǃkhaisa. Sîm di ǃâb ge Gaosiba ǂgurose mâisa.

Aoǁnâ-aon skola ǃoam ge 1978 ge ǁkhauhe, Raimo Kuokkanen ti ǀon hâ ǃās ǃnâ. a ǁNā skola gere ǁkhāǁkhā ǃgâsab ge ge ǂkhâǃnâmi, îm Gilead skoli ǃaroma xoaǂgāsen. ǁNāpaxūm ge ǀapaǃaogowaba ge ǁkhāǁkhāsen tsoatsoa îm ǁnā skoli ǃnâ xoaǂgāsen. Xawem ge 1980 xoaǂgāsenam nîs aiǃâ Finlandi ǁnâub berosa ǃoa ge ǁkhauhe. ǁNā ǁaeb ain ge Betels tawa ra ǃoaba ǃgâsana, Gilead skola ǃoa xoaǂgāsensa ge mā-amhe tama hâ i. Jehovabam ge ǁîb ra ǂhâba ǀgaub ǃnâ gere ǃoaba ǂgao, sîm ra ǂgao ǀgaub ǃnâs ose. ǁNās ǀkham ge nē ǁkhauǂuisa ge ūǃoa. Xawem ge ǀapaǃaogowaba ǁkhāǁkhāsens ǀkha ge aiǃgû, ǀnîsim Gilead skola ǃoa īs aiǂhanuba nî hō amaga.

 ǀOro kurigu khoaǃgâ i ge ǂGaeǂguira sorosa, Betels tawa hâ ǃgâsana aiǂhanuba ge mā în Gildead skoli ǃnâ xoaǂgāsen ǁkhā. ǁNā ǁaeb aim ge ge xoaǂgāsen. Betels tawam ge ǂkhîoǃnâ i ǃkhais ǃaromas ose. Kaisem ge ge i ǂkhî ǁnāpa ǃoabasa. Kai aoǁnâ sîsenni ǂhâsib hâbam ge gere ǃoaba ǂgao, ūǃoahem ga o. Septemberi 1985 ǃnâm ge 79ǁî klas Gileadi dis ǃgao ge ūǃoahe. Sîm ǁgaumâis ge Kolombiab ǃnâ ge hâ i.

Kolombiab ǃnâm ge ǂgurose ǁnâub berosa ǃoa ge ǁgaumâihe. ǁKhā ta a-i hoa-e ta ge ti ǁgaumâis ǃnâ gere dī tsî ta ge kurib khaoǃgâ ǀkharaǀkharana gere ǂhâba. Tsî ta ge ǂguro ǃnās ase ti ûib ǃnâ ǀkhara ǁgaumâisa ge ǂgan. ǁNās khaoǃgâm ge sîsabese Neivasa ǃoa ge sî-e, Huila ǀkharib ǃnâ.

Tita ge aoǁnâ sîsen-e hoaǁae dīs xa ge ǁkhoaxabahe ī. ǃGame tama khoeb ase ta ge ǀnî ǁaega ǁgoasa xu ǃui karab kōse aoǁnâ sîsen-e gere dī. ǀAsase ǃgame hâ khoera asem ge Sirkka hama hoa tsēsa aoǁnâ sîsen-e gere dī. Sîm omsa xum ge ǃnūse aoǁnâ, om ge ǀnî ǁaega audos ǃnâ gere ǁom. Nēs ge ǃnaris ǁaeba gere ǃnubuǃnubu tsîm ge saora tsē sores ǂoas aiǃâ ge tsoatsoa ǁkhā i.

Sîsaben asem ge ǁkhā ôasasib ǂgurom ge aoǁnâ sîsenni ǃnâ ūhâ îba gere hōǃâ. Sîm ge hâǃnâ i ǀhaohâb ge ge kai tsîn ge Kolombiab ǃgâsana kaise, khoe ǃgôaxa, ǀnamxaǃnâ tsî ǃgôaǃgâxasiba gere ǁgau.

Sîm gere hâǃnâ ǃāsa xu i ge Jehovab ǃoaba-aona ūhâ tama ǃāde ge hâ i. ǁNā ǃādi ǃnâs ǃgâiǂhôasa nî sī ǀgaub xa ta ge gere ǂâiǂhansen. ǂKhabadīb hîna ge hâ îb xa i ge khoen ǃaroma ge ǃnorasa tama hâ i. Tsî ta ge gere ǀgore î-i ǁnā ǃāsa xu ǀgui khoe-e Jehovaba ǃoaba tsoatsoa. ǂÂi ta ge gere ǁnā khoe-i Neivas ǃnâ nî hâsa î-i amaba ǁkhāǁkhāsen. ǁNā-amaga ta ge gere ǀgore î-i ǁāǁnâs khaoǃgâ gagasise kai tsî ǁnā ǃās ǃoa oa tsî sī aoǁnâ. ǂAn ta ga hâ o, Jehovab tita xa ǃgâi ǀapesa ūhâsa.

ǁNās khaoǃgâ ta ge Elobmîs ǁkhāǁkhāsa Fernando González ti ǀon hâ ǂkham khoeb ǀkha ge tsoatsoa. ǁÎb ge Algesiras ti ǀon hâ ǃās Jehovab ǃoaba-aon a ǀkhais tawa gere hâ. Fernandob ge 50 kilometerna Neivas ǃoa gere sîsen ǃgû. Elobmîs ǁkhāǁkhāsens ǃaroma ge ǃamkuse gere aiǂhomisen tsî ǀhaohâb ǀhaode ge hâǃnâ tsoatsoa. ǂGuro wekheb ǁîb Elobmîs ǁkhāǁkhās diba xub ge Fernandoba ǁîb ǃās ǃnâ hâ khoena ǀhaoǀhao tsî ǁîna gere ǁkhāǁkhā.

Fernandob ge Januari 1990 ge ǁāǁnâhe, Elobmîsab ǃnani ǁkhâga ǁkhāǁkhāsen toa hâs khaoǃgâ. ǁNās khaoǃgâb ge ge ǁnaetisa aimâba-ao kai. Nēsisa i Algesiras ǃnâ ǀgui ǁanǂgāsabe-i Jehovaba ra ǃoaba-e hâ amaga î ge ǁnâub bērosa ge ǃnorasaba i, ǀgui ǀō-aisa aimâba-ao-e ǁnāpa sîsa. Februarib 1992 î ge ǁnā ǃās ǃnâ ǀhaohâba ge tsoatsoahe.

Fernandoba ǁîb ǃās ǃnâ ǀgui gere aoǁnâ? Hî-î. ǃGame toab ges khaoǃgâ i ge ǁîb tsî ǁîb taras tsîna San Vicente del Kaguánsa ǃoa ge doe. ǁNās ge ǀnîhâ ǃās hîna Jehovab ǃoaba-aona ūhâ tamasa. ǁNāpab ge ge hui ǀhaohâba  omsa. Fernandob ge 2002 ǃnarimâra mûǂam-aob ase ge ǁgaumâihe. ǁÎb tsî ǁîb taras Olgas tsîn ge nētsēs kōse ǃnarimâra sîsenni ǃnâ ra ǃoaba.

Nēba xu ta ge ge ǁkhāǁkhāsen kaise i a ǂhâǂhâsasa î da sida ǁgaumâide ǃkhōǂgā hâ xūn ǃaroma ǀgore. Jehovab ge sida dīǁoa xūna ra dī. Tsēs ǀams ai, nēb ge ǁîb di ǃhanaba sida di tama hâ.—Mat. 9:38.

ǃNarimâra mûǂam-aob ase ta ge 1990 ge ǁgaumâihe. Bogotá ti ǀon hâ ǃās ǃnâm ge ǂgurose ge tsoatsoa. Nē ǁgaumâis ǃnâm ǃgâise dī tidesam ge gere ǃao. Tita tsî taras tsîn ge ǀō-aisa ǂansa ge ūhâ tama hâ i tsî kai ǃās ǃnâ hâs tsîna. Xaweb ge Jehovaba Filipeǁîn 2:13 ǃnâ hâ mîmâisa ge dīǀoaǀoa, mî rasa: “Elob hoaǁae sadu ǃnâ ra sîsen xui-ao, māsenxa tsî du nî ǁîb di ǃgâi ǂâibasens ǃaroma ǁkhāse.”

Egam ge Medellins ǀkhab ai hâ ǃās, tsoatsoas ai ta go mîsa ǃoa ge ǁgaumâihe. ǁNāpa ra hâ khoen ge ǂkhabadība ǁnaedī tsî nēs xa ge ǃhuri tama hâ i. Aiǁgause i ge ǀgui tsē ta Elobmîs ǁkhāǁkhāsa ra dī hîna khoena ǃauga ge ǂnoagu tsoatsoa. ǃHūb ai ta gere ao-ǁguisen ǂgao xaweb ge Elobmîsa ta gere ǁkhāǁkhā khoeba xoaǀgorade ǃnomsase ge khomai toa. ǁÎb ge toa ob ge ǀhapio kaisen tsî ǃauga ge ǂoa. ǁAeroba ǃkharu tsîb ge ǁîb ǀgam ǀgôaroga ǀkha ge ǂgâxa tsî ǃnomsase ge mî, ‘ǀhapio kaisens ti ǀgôaga ta ge sī goro ū.’

ǀNî hâ ǁaegu tsîn ge ge hâ i ǁkhōǁkhōsasib ǃnâm gere hōsente. ǀGui tsēm omsa xu oms ǀkha ra aoǁnâ hînas ge ti tarasa tita ǃoa ge ǃkhoe ǀkhī tsî ǃhuri hâse gere mûsen. ǁÎs ge ǀnî khoeb gere ǂnoasi ti ge mî. ǁNās ge kaise ge ǃao kaite. Xawem ge ega ge mûǂan, khoeb ge Sirkkasa ǂnoa tama hâ isa xawe ǁîs xōǀkha gere ǃkharu khoeba gere ǂnoa ǂgaosa.

ǁAeb ra ī khamim ge ǂkhabadīb xa ǁnātikōse ge ǃhuri kaihe tama hâ i. ǁNā ǃās di ǃgâsan hîna ge nēti ī mâsib tsî sîm xa ǁgai xūna gere ǃkharuǃnân ge sîma ge ǂkhâǃnâ. Jehovab ga ǁîna hui ob sîm tsîna ni hui tim ge ge ǂâi. ǁNā ǃās ǀhaohâb ǃûi-aogu di ǀapemāsa sao, ǂanbasen tsîm ge hoana Jehovab ǃomǁae ge ǁnāxū.

ǀNî mâsigu ge ǁnātikōse ge ǁkhōǁkhōsa tama hâ i. ǀGuitsē ta ge ǀgam tarekhoera ǂnôagu tsî ra mîǁgaiǁgai gu sa ge ǁnâu, sari ta gere oms ǃauga. ǁNā ǂkhabas ǃnâ ta ge ǃgâiǃgâibasensa ge ūhâ tama hâ i. Xawes ge oms kaikhoesa ge ǂgaite î ta sī ǃgâ. ǁNāpa î ge 2 ǃhoara anika (Papegaai) khoedi gere ǂkhaba ǀgausa gere ǁgae.

ǀHaohâb hui-aoga nî ǁkhāǁkhāse ta ge 1997 ge ǁgaumâihe. b Hoaǁae ta ge gagasi skola hâǃnâsa kaise gere ǃgôaǃgâ. Xawe ta ge tātsē ge ǂgom tama hâ i nē skolga ǁgauǃnâs aiǂhanuba ta nî hōsa.

 Ega ta ge ǀkharib mûǂam-aob ase ge ǁgaumâihe. ǁNā ǁgaumâis ge sîsenūhe ǀû, o ta ge ǃnarimâra mûǂam-aob ase ǁkhawa ge ǃoaba tsoatsoa. Tita ge 30 kuriga ǃnā hâse ta ge skolgu ǁgauǃnâ-aob tsî ǃnarimâra mûǂam-aob ase ge ǃoaba. Nē ǁgaumâidi ge ǂgui ǀkhaega ge māte. Xawe hoa xūn ge ge supu tama hâ i. Hā re î ta ǁguiǃā.

Tita ge kaise ǀgaisa ǂūba ūhâ. Nēs ge ge huite î ta ǃgom mâsiga ǃkharuǃnâ. Xawe ta ge ǀnî ǁaegu ai ǀhaohâb ǃnâ xūna ǃgâiǃgâis ǃnâ kaise ge ǃgâi i. ǀGui ǃnā-i ai ta ge hoaragase ôasase ǀgui khoe-e ge ǂgōǀau î-i ǀnamxaǃnâ tsî nauna ǁnâuǃā. Xawe nē mâsigu ǃnâ ta ge ǀnî ǃgâi ǀgaugu ai ga sîsen hâ.—Rom. 7:​21-23.

Ti ǃnubusigu xa ǃaromahe hâse ta ge ǀnî ǁaegu ai gere ǂkhabuǂâi. (Rom. 7:24) ǀNî ǁaeb ai ta ge Jehovaba ǀgores ǃnâ ge mîba, ǃgâi-i nîsa î ta sîsabe ǁgaumâisa ǁnāxū tsî Finlanda ǃoa oa. ǁNā karab ai ta ge ǀhaohâb ǀhaosa ge hâǃnâ. ǁNāpa ta ge ǁnâu ǂkhâǃnâs ge ge hōhōǃnâte î ta ti ǁgaumâis ǃnâ hâ tsî ti ǃnubusigu ai sîsen. Nētsēs kōse ta ge ra tsâǀkhāhe Jehovab ge mati ti ǀgoresa ǁnâu-am ǀgaus xa. ǁNās ǂam-ai ta ge kaise ra ǃgôaǃgâ, ǃgâi ǀgaub ǃnâb ge huitesa î ta ti ǂkhabusasiga sîsenǂam.

Sirkka ham ge kaise Jehovaba ra ǃgôaǃgâ, ǃnāsa ǁaeb sîm ûib dibab ge Jehovaba ǀoasase ǃoaba ǃkhais ǃaroma. Kaise ta ge Jehovaba ra ǃgôaǃgâ, ǀnamxaǃnâ tsî ǂgomǂgomsa tarasab ge nē kurin hoan ǃnâ māte o.

ǀGūǁae ta ge ra 70 kurixa tsî ta ti ǁgaumâis, ǁgauǃnâ-aob tsî ǃnarimâra mûǂam-aob disa ni ǀû. Nēs ǃaroma ta ge tsûaǂgao tama hâ. Tae-i ǃaroma? Tita ge ra ǂgom Jehovab ra ǃgôaǃgâsa ǁîba ta ra ǃgamǃgamsenxasib ǀkha ǃoabasa. Tsî da ǁîba ǀnammi tsî ǃgôaǃgâxasib xa ǀoahâ ǂgaob ǀkha ra ǃoabasa. (Mix. 6:8; Mrk. 12:​32-34) Jehovaba ǃgôasiba ūhâbas ge ǂâibasen tama hâ ǂhâǂhâsa ǁgaumâi-e da nî ūhâsa.

Dī ta gere ǁgaumâide ǃoa ta ga kō oa, o ta ge ra mûǂan. Nē ǁgaumâite ta ge nau khoen xa ta a ama ai, amaga hō tama hâ isa. Tamas ka io da ǁîn xa ta ǂoaǂamsa ǂansa ūhâ amaga ge hō tama hâ isa. Xawe Jehovab ge nē ǁgaumâide ge māte anu tama ta hâ ǀkhomxaǂgaosib ǁîb diba xu. Nē aiǂhanugab ge ti ǂkhabusasigu ǂam-ai ge māte. Jehovab huib ǀkha ǀgui ta ge nē ǁgaumâite a dīǀoaǀoa ǃkhaisa ta ge ra muǂan. Nē ǀgaub ǃnâ î ge ti ǂkhabusasiga Elob di ǀgaiba ge ǁgau.—2Kor. 12:9.