Tua semuka tu vatatu, yange kasulantsongo, kaha nja semukile mu 1955. Nja kolelele ku Finlândia, ku cihela ca ntsimana nguavo mbonge ya Vantaa.

Vanana va va mbatizile mu kupua Mukaleho ua Yehova, tele kanda nji semuke. Vatata va kele na ku luisa vusunga, ngeci va vindikile vanana ku tu longesa Mbimbiliya ni ku tu tuala ku viuano. Vunoni vatata mu va kele na ku tuhuka hembo, vanana va kele na ku tu longesa vilongesa via ku putukila via mu Mbimbiliya.

Fume ku vunike nja kele na kuononoka Yehova. Ca ku muenako, tele njili na miaka 7 mulongisi uange ku sikola ua nji tenukilile, muomu nja vianene kulia verilättyjä (Vimo via kulia via maninga). Ngeci ua nji fukuile ku kanua ku ndzili, kaha ua setekele ku nji haka via kulia viaco mu kanua. Vunoni nja hasele ku nakula livoko liendi.

Vatata va tsile tele njili na miaka 12. Kaha mu nima yaco, nja putukile ku kunguluka. Vamuanetu mu cikungulukilo va nji muesele seho, kaha ca nji kuasele ku suena mu hiehi na Yehova. Ngeci nja putukile ku tanda Mbimbiliya tangua na tangua, na ku lilongesa vuino mikanda yetu. Kaha va nji mbatizile tele njili na miaka 14, lia 8 ya Agosto ya 1969.

 Mu nja manene sikola, nja putukile vupioneru vua ntsimbu yose. Mu nima ya visimano lika, nja nungulukilile kuze kua tondekele vukuasi vua vakua kuambulula ku mbonge ya Pielavesi, ku Finlândia.

Ku Pielavesi kukekuo ku nja uanene mpueyange Sirkka. Nja mu lema cikuma, muomu ua pua ua ku likehesa kaha ua lema Yehova, cikuavo naua, ka lemene vupite. Tu vose tua tondele ku pangela Yehova na ndzili yetu yose, kaha tua kele na cizango ca ku linga cipanga cose-oco ci va tu hele. Tua liambatele lia 23 ya Março ya 1974. Kaha tua ile ku Karttula, imo mbonge ya indende mu Finlândia, kua tondekele vakua kuambulula.

Fume ku vuputukilo vua vulo vuetu, Yehova ue ku tu muesa ngecize, a ka tu hana vi tua tondeka nga tu tuameka Vuangana vuendi. (Mat. 6:33) Ca ku muenako, ka tua kele na likalu mu tua kele ku Karttula. Ha katete, tua pangesele kinga (bicycle). Vunoni mu cisika kua kele na ku tontola cikuma, ngeci mukemuo linga tuambuluile ku vihela via kama, tua tondekele likalu. Vunoni ka tua kele na vimbongo.

Vayaya vezile mu ku tu meneka, kaha va tu hele likalu liavo. Tua tondekele lika ku landelamo mazi. Tua kele honi na likalu li tua tondekele.

Yehova ua tu muesele ngecize ua puisilemo citeli ceni, ca ku tu hana vi tua tondeka. Tua pandele lika ku lingako mutamba uetu mu ku tuameka Vuangana vuendi.

Mu tua kele ku Sikola ya Vupioneiro mu 1978, muanetu Raimo Kuokkanen ua puile mulongisi, a ua tu kaniamesele ku tuma petição linga tuye ku Sikola ya Ngileande. Ngeci tua putukile ku lilongesa Inglês. Vunoni ntsimbu kanda tu tume petição, va tu laniene ku ka pangela ha mbetele ya ku Finlândia. Mu ntsimbu yaco, Vakua Mbetele ka va va tavesele ku tuma petição ya Sikola ya Ngileande. Tua tavele cilanio, muomu cizango cetu ca puile ku pangela kua tu tumine Yehova, kati ku tua tondele yetu. Vunoni kasi tua tualeleho ku lilongesa Inglês, halumo  tue ku kele na vukovelelo vua kuya ku Sikola ya Ngileande.

Mu nima ya imo miaka, Civunga ca Vantuamena ca tavesele Vakua Mbetele vaye ku Sikola ya Ngileande. Ngeci vuasi-vuasi, tua tumine petição. Tua lingilemo kati muomu ka tua lemene ku pangela ha Mbetele, vunoni muomu tua tondele ku lihana linga tu pangele kuose-oko kua tondekele vukuasi. Va tu tavele kuya ku Sikola ya Ngileande. Kaha mu tua manusuile sikola mu Setembro ya 1985, va tu tumine ku ka pangela ku Colômbia.

Mu Colômbia tua putukile ku pangela ha Mbetele. Mu muaka ua mutuntu, nja lihakelele kapandi ka ku puisamo cipanga ci va nji hele. Vunoni nja muene ngecize tua tondekele kualulula cipanga. Kaha tua pingile va tu hane cipanga ceka, ngeci va tu tumine ku kambuluila ku mbonge ya Neiva mu Huila.

Mueka nja lema cipanga ca kuambulula, kaha tele kanda njambate nja kele na kuambulula litangua lia mutuntu. Ngeci mu nima ya kuambata, nange na mpueyange Sirkka kasi tua tualeleleho kuambulula litangua lia mutuntu. Kaha vintsimbu vimo, tua kele na ku kosa mu likalu, mu tua kele na kuambuluila ku lahako. Omo liaco, tua kele na ku livanga kuambulula linga kati tu vihisile ntsimbu mu kuenda.

Kupua vamisionaliu mu lihia, ca tu kuasele ku kala na ntuima i tua kele nayo laza. Cikungulukilo cetu ca kolele, kaha vamuanetu na vandumbuetu ku Colômbia va puile vakua kasingimiko, cilemo na vakua ku santsela.

Vimbonge via kele mu hiehi na Neiva, ka mua kele Vakaleho. Ngeci nja kele na ku lisosomua vati muzimbu ua cili ue ku hetele ku vihela viaco. Kaha mu ku linga mu cifuti mua kele vakua kualulukila nguvulu, vimbonge viaco via puile vusonde ku vantu va ku vimbonge vieka. Ngeci nja vundilile Yehova linga mu nkala mbonge mu kale Mukaleho. Nja singaniekele nguange linga muntu uaco a lilongese vusunga, ua pandele ku yoyela ku Neiva. Ngecinja vundilile linga muntu uaco a hie mu lutsilielo mu nima ya ku mu mbatiza, na ku hiluka kuimbo liavo a kambuluileko. Vunoni Yehova ua tantekeyele njila ya cili ku hiana i nja singaniekele.

Mu nima ya matangua a andende, nja putukile ku lilongesa Mbimbiliya na Fernando González. Ua yoyelele ku Algeciras, kaha ka kua kele Vakaleho va Yehova. Fernando ua kele na kuenda vikilometro 50 aye ku Neiva na ku panga. Ua kele na ku livuahesela vuino cilongesa, kaha ua putukile ku kunguluka ntsimbu yose. Fume mu simano ya katete mua putukile ku lilongesa, muanetu Fernando ua kele na ku kungulula vakuavo ku mbonge ya kele, na ku va leka via kele na ku lilongesa mu Mbimbiliya.

Fernando va mu mbatizile mu Janeiro ya 1990, mu nima ya ku lilongesa mu vingonde 6. Mu nima yaco, ua puile pioneiro. Mu ku linga mu Algeciras mua kele honi Mukaleho, ngeci Mbetele ya tumineko vapioneiro va ku lifuila. Kaha mu Fevereiro ya 1992, va tumbikile cikungulukilo mu mbonge yaco.

 Vuno muanetu Fernando uambuluilile lika mu mbonge ya kele ni? Houe. Mu nima ya kuambata, nendi na mpueyendi va nungulukilile ku mbonge ya São Vicente do Caguán, ka kua kele Vakaleho. Kaha va kuasele ku tumbika cikungulukilo mu mbunge yaco. Mu 2002, muanetu Fernando va mu hanguile kupua kaniungi ua ku zinguluka. Kaha nendi na mpueyendi Olga, vali na ku tualelaho mu cipanga caco na lelo lino.

Ku muzimbu uaco, nja lilongesa seho ya kupua na ku vundila ku tuala vimpande via likuata na vipanga via mu lutsilielo. Kaha Yehova ue ku linga vize ka tue ku hasa. Mua vusunga, via pua vimbuto viendi kati vietu.—Mat. 9:38.

Va tu tumine mu vuniungi vua ku zinguluka mu 1990. Kaha tua putukile ku mbonge ya Bogotá. Vunoni tua kele na vuoma nguetu ka tu puisamo vuino cipanga caco, muomu ka tua kele na vumo vutongue vuahi. Cikuavo naua, ka tuezililile ku yoyela mu mbonge ya kama. Vunoni Yehova ua puisilemo cikulaheso ceni ca ku Filipu 2:​13, nguaco: ‘Njambi ikeye mukua ku tu hana cizango na ngolo ya ku linga viuma.’

Mu nima ya ntsimbu, va tu tumine mu vuniungi vua ku zinguluka ku mbonge ya Medellín i nja tumbula ku vuputukilo. Vantu mu mbonge yaco, vezilile na vukenia vua keleko, kaha ka va kele na kuivua liova. Ca ku muenako, tangua limo mu nja kele na kuendesa cilongesa ca Mbimbiliya, ha mbandza vantu va putukile ku liloya umo na mukuavo. Kaha ha handende nji uile ha mavu, vunoni ndongesi ua tualeleho ku tanda ca ku hona kuivua liova. Mua manene ku tanda, ua tuhukile ha mbandza. Mu nima ya kantsimbu, uezile na vanike vavali, kaha ua handekele nguendi: “Njecelenu muane, nji na ka hiangele vana vange.”

Tangua limo, tua hitile mu vumo vusonde tele tuli na kuambulula ku ndzivo na ndzivo. Mpueyange ua tuntilile kuli yange na ku nji leka nguendi va na mu loyo. Nja vuile liova, vunoni tua nongonuene nguetu, yala uaco vutumbe vuendi kati ku loya mpueyange. Ua tondele ku loya umo yala ua kele na ku hita mu hiehi na mpueyange.

Mu ku hita ca ntsimbu, tua lilongesele mua ku pindila na visoti viaco. Ku kolesa ca vamuanetu va kele na ku pinda na visoti ngeci muetu, ca tu kaniamesele. Tua nongonuene nguetu, nga Yehova ua va kuasele, netu vene ue ku tu kuasele. Ngeci ntsimbu yose, tua kele na kuononoka vimamuna via vakuluntu mu cikungulukilo via ku liniunga, kaha na ku seza viose mu mavoko a Yehova.

Vimo vitanga ka via puile via vusonde ngue mu tua singaniekele. Tangua limo, mu nja kele na kuambulula, nja vuile ngue vamo vampuevo vavali va kele na ku lituka ha mbandza. Ka nja tondele ku halakana ku ku licokota caco, vunoni ivene ndzivo ua nji lekele tu tuhuke ha mbandza. Mu nja hetele ha mbandza, nkuma tulimba vavali va kele na ku temunuina vantu va kele na ku licokota.

Mu 1997, va nji hanguile kupua mulongisi ua Sikola ya Treinamento Ministerial. b Nja lema cikuma visikola via Vuangana. Vunoni ka nja singaniekele nguange, nji ka kala na civezikiso ca kupua mulongisi ua imo sikola.

Mu nima ya ntsimbu, va nji hanguile kupua kaniungi ua muhato. Vunoni cipanga caco ka ca tualeleleho, ngeci nja hilukile mu vuniungi vua ku zinguluka. Mu miaka i tuvakana 30, nja lemene kupua mulongisi na kaniungi ua ku zinguluka. Mu vipanga viaco, tua tambuile vivezikiso via vingi. Vunoni, tua hitile mu vitanga. Nji vi lombolola.

Nja pua mukua ku kolesa, kaha ca nji kuasele ku pinda na visoti. Vunoni vintsimbu vimo, nja hianeselemo mu ku seteka ku sungamesa viuma mu cikungulukilo. Nja mamuine vamuanetu mu njila ya ku pihia. Tangua limo, nja va lekele va lileme na kupua va ku votsika ku umo na mukuavo. Vunoni, ha ntsimbu yaco nange vene ka nja kele na vifua viaco.—Loma 7:​21-23.

Visevuka viange via nji zeyesele cikuma. (Loma 7:24) Ngeci nja vundilile kuli Yehova na ku mu leka nguange, cili ku lutue nji likele cipanga ca vumisionaliu na ku hiluka ku Finlândia. Kaha tangua liaco, nja ile mu ku kunguluka. Vi nja vuile ku ciuano, via nji hele vusunga nguange, ka nja pandele ku likela cipanga cange. Nja pandele ku lihakela kapandi ka ku pangela ha visevuka viange. Na lelo lino, ce ku nji kuata ku mutima ku mona vati Yehova ua kumbulula civundilo cange. Cikuavo naua, nje ku mu santsela cikuma mu ku nji muesa ngozi na ku nji kuasa ku vula vuzeye vuange.

Nange na mpueyange Sirkka, tue ku santsela cikuma kuli Yehova omo lia civezikiso ca ku pangesa muono uetu mu cipanga ca ntsimbu yose. Cikuavo naua, nje ku santsela kuli Yehova omo lia ku nji hana mpuevo ua cilemo na lukakatela mu miaka yose eyi.

Vuovuno nji puisa miaka 70, kaha nji likela cipanga ca mulongisi na vuniungi vua ku zinguluka. Vunoni ka vie ku nji vuisa vusiua. Omo lia vika? Muomu nja tantekeya nguange tue ku zungambeya Yehova nga tu mu lemesa na ku konkama na ku mu sangaziala na mutima uose. (Mika 6:8; Mako 12:​32-34) Ngeci mukemuo, linga tu zumbangeye Yehova ka ci tondeka tu kale na citeli ca ku lifuila.

Mu nje ku singanieka ha vipanga vi nja tambuile, nje ku nongonona nguange ka nja vi tambuile muomu nja hiana vakuetu. Ni nja vi tambuile omo lia vuhasi vuange, houe. Vunoni, Yehova ua nji hele vipanga viaco omo lia ngozi yendi. Kaha ua nji helevio, vutuhu nja kele na ku sevuka. Mua vusunga, nja puisilemo vipanga viaco omo lia vukuasi vua Yehova. Ngeci mukemuo, vuzeye vuange vua zumbangeyele ngolo ya Njambi.—2 Kol. 12:9.