Nitlakatki ipan 1955, tielij eyij tiiknimej uan na más nipilsiltsi. Nimoskaltik nechka mar, ika sur tlen Finlandia, nama kiiljuiaj altepetl Vantaa.

Nonana moatsonpoliuiltik kema na ayamo nitlakatiyaya. Notata tlauel kualanki uan kiiljuik amo ma techmachti Biblia yon ma techuika tlanechikoli. Yeka, kema notata amo itstoya, nonana techmachtiyaya tlen Jehová.

Kema nieliyaya nipilsiltsi, ya nijnekiyaya nijyolpakiltis Jehová. Se neskayotl, kema nijpixtoya chikome xiuitl, katli nechmachtiyaya tlauel kualanki pampa amo nijnejki nijkuas verilättyjä (tlen eli kej se tekoko tlen kitlaliliaj estli). Ika se ima nechkamajchaloltik, uan ika seyok ima, ika se tenedor kinejki nechkamatlalilis se achi. Nijmatlatsinik uan kiampa uetski nopa tenedor.

Kema nijpixtoya 12 xiuitl, notata mijki. Kema kiampa panok, ya uelki nia tlanechikoli. Toikniuaj kinextijkej nechikneliyayaj uan nopa nechpaleuik kuali ma nitlaneltoka. Pejki mojmostla nijpoua Biblia uan kuali nimomachtiyaya amatlajkuiloli. Nochi ni tlamantli nechpaleuik ma nimoatsonpoliuilti kema nijpixtoya 14 xiuitl, ipan agosto 8, 1969.

Kema tlanki nimomachtia escuela, pejki nitlatekipanoua kej precursor regular. Kema panok se keski semanas, niajki Pielavesi, se pilaltepetsi tlen mokaua nechka tlatlajko tlen Finlandia,  pampa nijnekiyaya nitlapaleuis ipan tlajtolmoyaualistli.

Ipan Pielavesi nikixmatki Sirkka, katli teipa elki nopilsiua. Tlauel nechpaktiyaya pampa nikitak ya amo moueyimatiyaya uan tlauel kiikneliyaya Jehová. Ya amo kinekiyaya tlauel ma kiixmatikaj yon amo kinekiyaya tlauel tlapijpias. Tiomej tijnekiyayaj tijtekipanosej Jehová ika nochi toyolo uan tijchiuasej tlen ueli tekitl tlen techmakaskiaj ipan Jehová itlanechikol. Timosenkajkej ipan marzo 23, 1974. Amo tiajkej tijpaxaloto uan tiajkej titlatekipanotoj Karttula, kampa monekiyayaj tlajtolmoyauanij.

Desde que timosenkajkej hasta nama, Jehová techmakatok nochi tlen moneki pampa tikachtouitlalijtokej tijtekipanosej (Mat. 6:33). Ipan Karttula amo tijpiayayaj carro uan san tinemiyayaj ipan bicicleta. Pero kema tlauel tlaseseyayaya, amo ueliyaya tiauij ika bicicleta. Nojkia, tijnekiyayaj se carro pampa monekiyaya uejka tiasej titlajtolmoyauatij, pero amo tijpiayayaj tomij.

Se tonali, se noikni techpaxaloko maske amo tijchiayayaj uan techmakak icarro. Amo monejki titlaxtlauasej yon se tlamantli, san monekiyaya tijtlalilijtinemisej gasolina. ¡Tlauel tiyolpajkej pampa ya tijpixtoyaj se carro!

Ika nopa tlamantli, Jehová kinextik techmakaskia nochi tlen techpolouayaya. San monekiyaya tikachtouitlalisej tijtekipanosej.

Ipan 1978, kema tiajkej Kampa kinmachtiaj precursores, Raimo Kuokkanen, a se katli techmachtiyaya techiljuik ma tijtemitikaj se solicitud para ma techtlaneuikaj Kampa momachtiaj ipan Galaad. Pejki timomachtiaj inglés pampa tijnekiyayaj tiasej timomachtitij nopaya. Pero amo tijtitlankej nopa solicitud pampa ipan 1980 techtlanejkej ma titlatekipanotij ipan kali Betel tlen Finlandia. Ipan nopa tonali, katli tlatekipanouayayaj Betel amo kintlaneuiyayaj Galaad. Tijnekiyayaj tijtekipanosej Jehová kampa ya kinekiyaya, uan amo kampa tojuantij tijnekiyayaj, yeka tiajkej titlatekipanotoj Betel. Pero nojua timomachtijkej inglés pampa timoiljuiyayaj uelis teipa kena techtlaneuiskiaj Galaad.

 Kema panok se keski xiuitl, Katli kinyakanaj Jehová itlajtoltemakauaj kiijtojkej katli tlatekipanouayayaj Betel nojkia ueliskiaj kitemitisej nopa solicitud para momachtitij Galaad. Yeka, nima tijtitlankej se solicitud. Maske tlauel tiyolpakiyayaj ipan Betel, tlaj ueliskia, tijnekiyayaj tiasej kampa ueliskia más titlapaleuisej. Techtlanejkej ma timomachtitij ipan clase 79, uan tlanki timomachtiaj ipan septiembre 1985. Uan techtitlankej Colombia.

Kema tiasitoj Colombia, techtitlankej ma titlatekipanokaj ipan kali Betel. Maske nijchijki kampeka kuali nijchiuas noteki, kema panok se xiuitl nijnekiyaya nitlatekipanoti sejkanok. Amo kema nitlajtlantoya sejkanok ma nechtitlanikaj, uan ayokmo sampa kiampa nijchijki. Techtitlankej ma titlatekipanotij kej misioneros ipan altepetl Neiva, ipan tlali Huila.

Nochipa tlauel nechpaktijtok nitlajtolmoyauas. Ipan Finlandia, kema nieliyaya nitelpokatl uan precursor, peuayaya nitlajtolmoyaua tlauel ijnalok uan nitlamiyaya tlauel tlayoua. Uan kema ya timosenkajtoyaj, Sirkka uan na titlajtolmoyauayayaj se tonal. Kema tiauiyayaj titlajtolmoyauaj tlauel uejka, kemantika tikochiyayaj ipan tocarro. Kiampa kuali tijtekiuiyayaj tonali uan ualmostla nima peuayaya titlajtolmoyauaj.

Kema pejkej titlatekipanouaj kej misioneros, sampa tlauel techpaktik titlajtolmoyauasej kej achtouia. Ipan tlanechikoli kampa tiitstoyaj pejkej momiakiliaj, uan toikniuaj tlen Colombia tlauel techikneliyayaj, techtlepanitayayaj uan techtlaskamatiliyayaj.

Nechka Neiva onkayaya altepemej kampa amo itstoya yon se Jehová itlajtoltemajka. Toikniuaj amo ueliyayaj yauij nopaya pampa soldados tlen tlaijixnamikiyayaj ueliskia kinchiuilisej tlen amo kuali. ¿Kenijkatsa ueliskia titlajtolmoyauasej nopaya? San nimoiljuijtoya ipan nopa tlamantli. Pejki nimomaijtoua uan nikiljuiyaya Jehová se akajya katli itstoskia Neiva uan euayaya ipan nopa pilaltepetsi kampa amo ueliyaya tikalakij, ma mochiua se toikni. Uan kema ya moatsonpoliuiltijtoskia, ma kipaleui kuali tlaneltokas uan ma tlakuepili ialtepe para tlajtolmoyauas. Nimoiljuiyaya tlauel kuali tlen nitlajtlaniyaya, pero tlen Jehová moiljuijtoya eliyaya más kuali.

Teipa pejki nijmachtia se telpokatl katli itoka Fernando González, ya euayaya Algeciras, nopaya amo itstoya yon se Jehová itlajtoltemajka. Sejse semana yauiyaya ontekiti Neiva, iuejkaka eliyaya kipano 50 kilómetros. Ya achtoui iselti momachtiyaya tlen sansejko timomachtiskiaj, uan nima pejki yaui tlanechikoli. Nojkia, ipan nopa achtoui semana, kinnechikok se keskij maseualmej tlen ialtepe uan pejki kinmachtia tlen kiyekojtoya.

Fernando moatsonpoliuiltik ipan enero 1990, san panotoya chikuasej metstli pejtoya momachtia Biblia, uan nima pejki tlatekipanoua kej precursor regular. Ipan nopa pilaltepetsi ya itstoya se toikni, yeka kali Betel uelki kintitlani precursores especiales nopaya. Uan ipan febrero  1992, mochijki se tlanechikoli ipan nopa altepetl.

Pero Fernando amo mokajki nopaya, kema ya mosiuajtijtoya, ya uan isiua Olga yajkej tlatekipanotoj San Vicente del Caguán, kampa amo itstoya yon se toikni. Nopaya nojkia tlapaleuijkej ma mochiua se tlanechikoli. Uan ipan 2002, Fernando pejki tlatekipanoua kej katli tepaxaloua chijchikuasej metstli uan ipan ni tonali nojua kiampa tlatekipanoua.

Ni tlamantli kinextia moneki xitlauak tikiljuisej Jehová kenijkatsa tijnekij ma techpaleui ipan nopa tekitl tlen techmakatok. Jehová ueli kichiua tlamantli tlen tojuantij amo tiuelij, pampa ya kiyakana tlajtolmoyaualistli (Mat. 9:38).

Ipan 1990 nechiljuijkej ma nitlatekipano kej katli tepaxaloua chijchikuasej metstli, uan achtoui techtitlankej ipan Bogotá, Colombia. Sirkka uan na amo tlauel techixmatiyayaj pampa amo tijchiuayayaj se tlamantli tlen tlauel pankisa. Nojkia, amo timomajtoyaj tiitstosej ipan se ueyi altepetl. Yeka, timajmauiyayaj se kentsi. Pero Jehová kichijki tlen kiijtoua Filipenses 2:13: “Yajaya Toteko tlen tekiti ipan inmoyolo uan inmechchiua xijnekikaj xijchiuakaj ipakilis, uan yajaya inmechmakas chikaualistli para inkichiuasej”.

Teipa techtitlankej Medellín, nopaya techpanok tlen nikijtok achtoui. Nopaya miakej ayokmo majmauiyayaj pampa ya momajtoyaj kiitaj tlasisinijkayotl. Nikilnamiki, se tonali kema nitlamachtiyaya ika Biblia, kalteno pejkej mototopotsaj. Na ya nimokuamajkauaskia tlalchi pero katli nijmachtiyaya amo momajmatik uan nojua kipouayaya Biblia. Kema tlanki tlapoua, nechiljuik kisaskia se tlalochtli. Teipa asiko ininuaya omej ikoneuaj uan nechiljuik: “Xinechtlapojpoljui pero monekiyaya nikinkuiti nokoneuaj”.

Amo san ya nopa techpanok. Se tonali, kema titlajtolmoyauayayaj kajkalpa, nosiua ualajki kampa niitstoya, nesiyaya tlauel chipaktik. Tlauel momajmatijtoya uan nechiljuik se akajya kinekiyaya kitoponis, uan na nojkia nimomajmatik. Teipa tikitakej nopa tlakatl amo kitoponisnekiyaya nosiua, kitoponisnekiyaya se tlakatl katli panoyaya inechka.

Teipa timomatkej se kentsi tiitstosej nopaya. Timosentlachiliyayaj pampa tikitayayaj toikniuaj kiixnamikiyayaj uan kiijiyouiyayaj nopa tlamantli uan sekinok tlamantli tlen tlauel amo kuali. Tikitakej tlaj Jehová kinpaleuiyaya, tojuantij nojkia techpaleuiskia. Nochipa tijchiuayayaj tlen techiljuiyayaj ueuejtlakamej katli nopaya euaj, kuali timomokuitlauiyayaj uan sekinok tlamantli tijkauayayaj imako Jehová.

Pero amo nochipa techpanoyaya san tlen amo kuali. Se tonali, kema niitstoya techaj, nijkajki kalteno kejuak omej siuamej mokualaniyayaj. Na amo nijnekiyaya nijmatis tlake panoyaya, pero nopa siuatl katli iuaya nikamanaltitoya nechiljuik ma niontlachia. Uan nikitak eliyayaj omej cotorros katli kintlejtlekaljuiliyayaj ikalnechkauaj.

Ipan 1997 nechiljuijkej peuaskia nitlamachtis ipan Escuela de Entrenamiento Ministerial. b Nochipa nechpaktijtok nias kampa kinmachtiaj Jehová itlajtoltemakauaj pero amo kema nimoiljuik tlaj na nojkia nitlamachtiskia nopaya.

Teipa, nojkia pejki nikinpaxaloua tepaxalouanij. Kema ayokmo mochijki nopa tekitl, sampa pejki nitepaxaloua chijchikuasej metstli. Kipano 30 xiuitl nikinmachtijtok toikniuaj uan nitepaxalojtok chijchikuasej metstli. Ipan ni tekitl nijselijtok miak tlateochiualistli pero kemantika ouij nijmajtok. ¿Kenke kiampa nikijtoua?

Na kemantika achi niyoltetik. Nopa nechpaleuijtok ma nikixnamiki tlaouijkayotl, pero nojkia kichijtok ma nijneki nima ma mopatla se keski tlamantli ipan tlanechikoli. Se neskayotl, kemantika chikauak nikiniljuiyaya toikniuaj monekiyaya teiknelisej uan kinkuamachilisej toikniuaj. Pero kema kiampa nikiniljuiyaya, nikitayaya na nechpolouayaya kiampa nijchiuas (Rom. 7:21-23).

Kemantika nimokuesouayaya pampa nikitayaya nojua nechpolouayaya nijpatlas kej nieli (Rom. 7:24). Se tonali tlauel nimokuesojtoya uan yeka nikiljuik Jehová ayokmo nijnekiyaya nielis misionero uan nijnekiyaya nitlakuepilis Finlandia. Pero ipan nopa tonali, ipan tlanechikoli nijkajki se tlamachtili tlen nechpaleuik ma nikita nojua monekiyaya nijchijtos kampeka nitlatekipanos nopaya uan nijpatlas kej nieli. Amo kema nikilkauas kenijkatsa Jehová nechnankilik kema nimomaijtok. Nojkia, tlauel nijtlaskamatilia pampa ika miak tlaiknelili nechpaleuijtok ma nijpatla tlen amo kuali nijchiua.

Sirkka uan na tlauel tijtlaskamatiliaj Jehová pampa techkauilijtok senkistok ma tijtekipanokaj miak xiuitl. Nojkia tlauel nijtlaskamatilia pampa nechmakak nosiua, katli tlauel nechiknelia uan nechpaleuijtok miak xiuitl.

Nechka nikaxitis 70 xiuitl uan ayokmo nitlamachtis yon nitepaxalos chijchikuasej metstli. Pero nopa amo kichiua ma nimokueso. ¿Kenke? Pampa nijmati para nijtekipanos Jehová amo moneki nijpias tekitl tlen tlauel pankisa. Tlen más ipati eli tijtekipanosej Jehová kej tiuelij uan tijueyichiuasej ika nochi toyolo pampa tikikneliaj uan tijtlaskamatiliaj (Miq. 6:8; Mar. 12:32-34).

Ipan nochi nonemilis nijselijtok miak tekitl tlen tlauel nechpaktijtok. Pero kema nimoiljuia ipan nopa tlamantli, nikita amo nijselijtok nopa pampa más nijmati kej sekinok o pampa ueli nijchiua tlen sekinok amo uelij. ¡Amo! Eli pampa Jehová kipixtok ueyi iyolo nouaya maske tlauel nimokuapoloua. Tlaj ya amo nechpaleuijtoskia, amo ueltoskia nijchiuas nochi nopa tekitl. Ichikaualis Dios tlauel nechpaleuijtok kema nimoiljuia amo niuelis (2 Cor. 12:9).