Niyolik itech xiuit 1955, uan nikpia ome nokniuan akin nechyekanaj. Nimoskaltij itech se xolal tein axkan moixmati kemej Vantaa ompa Finlandia.

Nomaj moauij seki xiujmej achto ke nejua niyoliskia. Sayoj ke nopaj peuak kiixnamiki uan amo kikauak maj techmachti Biblia uan maj techuika nechikolmej. Yejua ika, technojnotsaya de Jehová keman nopaj amo yetoya.

Desde ke katka nikonetok nikixtalij amo keman nikauas Jehová. Keman nikpiaya chikome xiuit, akin nechmachtiaya kaltamachtiloyan kualanik porin amo niknekia nikuas verilättyjä (tein katka kemej se taxkal tilauak tein kipiaya esti). Ika se imay nechkantapoj uan ika okse kinekia nechtenakis tepitsin ika se tenedor. Nikmatopeuj uan tenedor uetsik itech piso.

Keman nikpiaya 12 xiujmej momikilij nopaj. Satepan uelia niayaya nechikolmej. Tokniuan noka motekipachojkej uan nejon nechpaleuij maj okachi niktekitili Jehová. Peuak nikixtajtoltia Biblia mojmostaj uan okachi kuali nimomachtiaya amaixmej. Nejin nechpaleuij maj ueli nimoaui itech 8 de agosto xiuit 1969, keman nikpiaya 14 xiujmej.

 Keman amo niayaok escuela, nimochiuak precursor regular. Seki semanas satepan, niajki nitanojnotsato Pielavesi, se xolaltsin tein moajsi ompa Finlandia.

Ompa Pielavesi, nikixmatik Sirkka, akin satepan iuan nimonamiktij. Semi nechyolnotsak porin amo moueyimatia uan semi kitasojtaya Jehová. Yejua amo kitemouaya maj nochin kiitakan tein kichiuaya nion kipias miak taman. Tiomen tiknekiaj kuali tiktekitiliskej Jehová uan tiaskej kampa yeski techtitaniskiaj. Timonamiktijkej itech 23 de marzo xiuit 1974. Uan satepan ke timonamiktijkej amo kanaj tinemitoj, ta tiajkej titapaleuitoj Karttula, kampa amo onkayaj miakej itaixpantijkauan Jehová.

Niman ke timonamiktijkej, tikitakej ke Jehová techpaleuiskia maj tikpiakan tein monekiskia komo nochipa tiktekitiliaj (Mat. 6:33). Ompa Karttula amo tikpiayaj carro. Achto tinentinemiaj ika se bicicleta. Sayoj ke keman tel taseseyaya amo uelia tikuiaj bicicleta. Uan no, kemej tel uejka monekia titanojnotsatiuij monekia se carro, sayoj ke amo tikpiayaj tomin para tikouaskej.

Se tonal, semej nokniuan akin techkalpanoko techiluij ke techtayokoliaya icarro. Amo teyi monekia tikixtauaskej, sayoj monekia tiktaliliskej gasolina. ¡Axkan tikpiayajya se carro!

Jehová technextilij ke yejua techmakaskia tein techpolos. Sayoj monekia tiktayekanaltiskej tiktekitiliskej.

Itech xiuit 1978, keman tietoyaj itech Tamachtilis tein kiselia akin tekiti kemej Precursor, Raimo Kuokkanen, a semej akin techmachtij techiluij maj tikpexontikan amat tein kijtouaya ke tiknekiaj tikseliskej Tamachtilis tein motemaka Galaad. Yejua ika, peuak timomachtiaj inglés, ijkon ueliskia tiaskej. Sayoj ke amo tiktitankej nejon amat porin itech xiuit 1980 techyoleujkej maj titapaleuitij itech sucursal de Finlandia. Ijkuak, akin tapaleuiayaj Betel amo ueliaj kipexontiayaj amat para yaskej Galaad. Tiknekiaj tiktekitiliskej Jehová kampa yejua techtitaniskia uan amo kampa tejuan  tiknekiskiaj, yejua ika tiajkej. Sayoj ke tiksentokayaj timomachtiayaj inglés porin tiknemiliayaj ke xa satepan ueliskia tiaskej.

Seki xiujmej satepan, tokniuan Oloch Taojtokaltianij kiixtalijkej ke tokniuan akin tapaleuiayaj Betel ueliskiaj kiseliskej Tamachtilis tein motemaka Galaad. Yejua ika niman tiktitankej amat. Semi tiyolpakiaj titapaleuiskej ompa Betel, sayoj ke komo techseliayaj tiknekiaj tiaskej kampa okachi ueliskia titapaleuiskej. Techyoleujkej maj tikselikan tamachtilis 79 de Galaad, uan nejon tamachtilis tamik septiembre xiuit 1985. ¡Uan techtitankej Colombia!

Keman tiajsikej ompa Colombia, techtitankej maj titapaleuitij itech sucursal tein ompa yetoya. Nimochikauak kuali nitekitis, sayoj ke panok se xiuit uan niknemilij ke okachi kuali maj techpatanij. Sayoj ijkuak nitajtanka maj techpatakan. Techtitankej maj titapaleuitij kemej misioneros ompa Neiva, itech ueyi xolal de Huila.

Nochipa nikuelitani nitanojnotsas. Ompa Finlandia keman amo nikpiaya nosiuatsin uan katka niprecursor, nitanojnotsaya desde kualkan hasta tayouak. Uan keman nimonamiktij iuan Sirkka titanojnotsayaj nochi tonal. Kemansa tikochiaj itech carro keman tiayaj titanojnotsatij uejka. Ijkon mostika uelia niman titanojnotsayaj porin amo monekia uejka tiaskej.

Keman oksepa peuak titanojnotsaj peuak oksepa tiyolpakij kemej achto. Itech nechikol kampa titapaleuijtoyaj peuak momiakiliaj, uan tokniuan de Colombia techpoujkaitayaj, techtasojtayaj uan motasojkamatiaj.

Itech seki xolalmej tein amo uejka moajsiaj de Neiva amo moajsia nion se itaixpantijkauj Jehová. Sayoj ke kemej ompaka moajsiaj akin semi tateuiayaj, akin amo ompa nemiaj ueliskia kinchiuiliskej tein amo kuali. ¿Keniuj akin ompa nemiaj ueliskia kiixmatiskiaj tein Biblia tamachtia? Semi itech nitanemiliaya. Niktataujtiaya Jehová para maj aksa akin katka de nejon xolalmej mochiuani itaixpantijkauj Jehová sayoj ke maj nemini Neiva. No niktajtaniaya maj satepan ke moauiskia nejon tokniuj kisentokani kitekitiliani Jehová uan satepan maj mokepani kampa nemia para tanojnotsas ompa. Niknemiliaya ke nejon tapaleuiskia, sayoj ke Jehová kiixtalijtoya kichiuas okse taman tein okachi kuali.

Peuak nikmachtia ika Biblia se takaokichpil akin monotsaya Fernando González, uan nemia ompa Algeciras, semej xolalmej kampa amo onkayaj itaixpantijkauan Jehová. Yejua nochi semanas yaya tekititi Neiva, tein uejka katka panoua 50 kilómetros. Achto kuali momachtiaya tein timomachtiskiaj nejon tonal, uan desde ke peuak momachtia yaya nochi nechikolmej. Uan no, itech yekinika semana peuak kinsentilia sekin akin nemiaj itech ixolal para kinmachtis tein momachtijtoya.

Chikuasen metsti satepan ke peuak momachtia, Fernando moauij itech metsti enero xiuit 1990, uan niman mochiuak precursor  regular. Kemej yetoyaya se itaixpantijkauj Jehová ompa Algeciras, tokniuan akin kiixyekanayaj sucursal uelik kintitankej precursores especiales ompa. Uan itech metsti febrero xiuit 1992 mochiuak se nechikol.

Sayoj ke Fernando amo mokauak ompa Algeciras, ta satepan ke monamiktij yejua uan isiuatsin Olga, yajkej tapaleuitoj itech okse xolal kampa amo onkayaj itaixpantijkauan Jehová: San Vicente del Caguán. Ompa no tapaleuijkej maj mochiua se nechikol. Itech xiuit 2002 kintitankej maj kinkalpanotij nechikolmej, uan hasta axkan kisentokaj takalpanouaj.

Tein panok nechmachtij ke semi moneki maj tiktajtanikan Jehová keniuj tiknekij maj techpaleui itech tein yeski tekit tein tikchiujtoskej para tiktekitiliskej. Yejua ueli kichiua tein tejuan amo, porin iaxka tatok (Mat. 9:38).

Itech xiuit 1990, peuak nikinkalpanoua nechikolmej. Kampa yekinika techtitankej katka ompa ueyi xolal Bogotá. Sirkka uan nejua amo tikixmatiaj miak taman uan seki taman amo uelia tikchiuayaj. Uan amo no timomattoyaj tinemiskej itech se ueyi xolal. Yejua ika timouiaj amo kuali tikchiuaskej nejon tekit. Sayoj ke Jehová kichiuak tein kijtoua Filipenses 2:13: “Dios namechchikaua uan kichiua xiknejnekikan nankichiuaskej nochi tein kiuelita porin yejua ijkon kineki”.

Satepan techtitankej xolal Medellín, xolal tein achto ika nitajtoj. Akin ompa nemiaj momatkajya kiitaskej maj moteuikan, yejua ika amo momoujtiayajok. Nikelmamiki ke se tonal keman nikmachtijtoya se takat, kalampa peuak motatojtoponiliaj. Nejua yaya nimotamotatia talpan, sayoj ke akin nikmachtijtoya kisentokak taixtajtoltij kemej yeskia amo teyi panotoskia. Keman matamik nechiluij ke yaya kisati. Satepan mokepak iuan ome iokichpipil, uan nechiluij: “Xinechontapojpolui, monekia nikinkuitiuj nokoneuan”.

Amo sayoj ijkuak techmoujtijkej. Se tonal titanojnotstoyaj kajkalpan keman nosiuatsin nechajsiko uan moitaya ke teisa kimoujtijka. Yejua nechiluij ke se takat kitatoponilij, uan nejua no nimomoujtij. Sayoj ke satepan tikmatkej ke amo yejua kitatoponilijtoya ta okse takat akin panotoya inakastan.

Yolik timomatkej tikitaskej maj semi moteuianij. Tikmojkaitayaj keniuj tokniuan taxikouayaj uan yolchikaujkej katkaj keman kipanouayaj ouijkayomej kemej nejin. Tikitakej ke kemej Jehová kinpaleuijtoya yejuan, no techpaleuiskia tejuan. Nochipa tikchiuayaj tein techyolmajxitiayaj tayekananij itech nechikolmej, semi timoyekpiayaj uan tikauayaj maj Jehová techpaleui.

Sayoj ke amo nochipa panouaya tein amo kuali. Nikelnamiki ke se tonal keman nitakalpanojtoya kalampa mokakia kemej yeskia ome siuamej motsajtsajtsilijtoyaj.  Nejua amo niknekia nikitas, sayoj ke siuatsin akin nikalpanoto nechiluij maj ninaltachia. ¡Sayoj katkaj ome loritos tein kintajtamachiujtoyaj akin ompa nemiaj!

Itech xiuit 1997, nechixtalijkej maj nitamachti itech Tamachtilis tein kinpaleuia Tokniuan Takamej itech iTekiyo Dios. b Nochipa nikuelitak nikselis tamachtilis, sayoj ke amo keman niknemilij ke nejua no nitamachtiskia.

Satepan no nitakalpanouaya itech distrito. Sayoj ke keman techiluijkej ke amo ijkon titakalpanoskiajok tiksentokakej tikinkalpanojkej okseki nechikolmej. Panouaya 30 xiujmej ke nitakalpanoua itech nechikolmej uan nitamachtia. Itech nejin tekit nechpanouani miak taman tein kualtsin, sayoj ke amo nochipa ijkon katka. ¿Keyej?

Nejua niman nikijtoua tein niknemilia. Nejin nechpaleuiani maj nikixnamiki seki ouijkayomej, sayoj ke nejon kichiuani maj amo nikinajsikamati tokniuan keman monekia okachi kuali mochiuas teisa itech nechikol. Kemansa chikauak nikinnojnotsaya tokniuan keman nikiniluiaya ke monekia kinajsikamatiskej uan kintasojtaskej oksekin. Sayoj ke keman nikinnojnotsaya, nejua amo niknextiaya nejon (Rom. 7:​21-23).

Kemansa niknekia nimosenkauas porin miakpa nimopolouaya (Rom. 7:24). Se tonal, tel amo kuali nimomachiliaya uan nikiluij Jehová ke amo niknekiaok niyeski misionero uan ke nimokepaskia Finlandia. Sayoj ke nejon tonal, itech nechikol nikakik tein nechpaleuij maj niksentoka niktekitili Jehová kampa nietoya uan maj niksentoka nikpata tein monekia. Amo keman nikelkauas keniuj Jehová nechnankilij. Uan semi niktasojkamatilia porin nechpaleuiani maj nikpata tein moneki.

Sirkka uan nejua semi tiktasojkamatilianij Jehová porin miak xiujmejya uelini kuali tiktekitilianij. Uan no semi niktasojkamatilia maj nechmakani se nosiuatsin akin semi nechtasojta uan nechpaleuiani nochi nejin xiujmej.

Amo uejkaua nikajxitis 70 xiujmej, yejua ika amo nitamachtisok uan amo uelisok nitakalpanos itech nechikolmej. Sayoj ke nejon amo nechtayokoltia. ¿Keyej amo? Porin nikmati ke para uelis se kiueyitalis Jehová amo moneki tikpiaskej tekimej tein semi ika techixmatiskej. Ta tein okachi moneki yejua tiktekitiliskej Jehová kemej kineki uan tikueyichiuaskej porin tiktasojtaj uan timotasojkamatij (Miq. 6:8; Mar. 12:​32-34).

Desde ke peuak niktekitilia Jehová nikseliani miak tekimej tein semi nechyolpaktianij. Sayoj ke keman itech nitanemiliani, nikitani ke amo nikpiani nejon tekimej porin okachi kuali nikchiua teisa ke oksekin oso porin kuali niueli teisa, ta Jehová nechmakani nejin tekimej porin semi nechtasojta. Komo yejua amo nechpaleuiskia amo ueliskia nikchiuas nejin tekimej. Ueli nikijtoua ke ichikaualis Dios nechpaleuiani keman amo nichikauak (2 Cor. 12:9).