Ngazalwa ngo-1955 futhi ngangilicinathunjana, ngilabanewethu ababili. Ngakhulela edolobheni eselibizwa ngokuthi yiVantaa eliseduze lolwandle oluseningizimu yeFinland.

Umama wabhabhathizwa waba nguFakazi kaJehova kusasele iminyaka emilutshwana nje ukuthi ngizalwe. Ubaba wayengafuni ukuthi sibe ngoFakazi njalo wayengavumi ukuthi umama asifundise iBhayibhili lokuthi ahambe lathi emihlanganweni yebandla. Kodwa wayesithi nxa engekho umama asale esifundisa.

Kusukela ngisesemncane ngangizimisele ukulalela uJehova sonke isikhathi. Ngokwesibonelo ngelinye ilanga umbalisi wami wangizondela kakhulu ngoba ngangingafuni ukudla amabhanzi ayephekwe ngegazi. Ngalesosikhathi ngileminyaka engu-7. Wangifithizela emihlathini efuna ukuthi umlomo wami uvuleke. Ngesinye isandla wayethwele ifologwe eyayilebhanzi efuna ukungidlisa amabhanzi lawo. Ngatshaya ifologwe leyo yawela phansi.

Ubaba wafa sengileminyaka engu-12. Engasekho ngasengikhululekile ukuya emihlanganweni yebandla. Abazalwane ebandleni babengithanda kakhulu futhi lokho kwanginceda ukuthi ngiqhubeke ngisondela kuJehova. Ngaqalisa ukubala iBhayibhili nsuku zonke njalo ngangikukhuthalele ukubala amabhuku enhlanganiso. Ukuthanda ukutaditsha yikho okwanginceda ukuthi ngenze isinqumo sokuthi ngibhabhathizwe ngileminyaka  engu-14. Ngabhabhathizwa mhlaka 8 August ngo-1969.

Ngathi ngiqeda nje isikolo ngahle ngaqalisa ukuba liphayona lesikhathi sonke. Ngemva kwamaviki amalutshwana ngathutha ngaya lapho okwakulabamemezeli abalutshwana khona ePielavesi, idolobho eliseFinland.

EPielavesi yikho engahlangana khona lentombi eyacina isingumkami, uSirkka. Ngamthanda kakhulu ngibona indlela ayethobeke ngayo layemthanda ngayo uJehova. Wayengafuni ukuba ngumuntu odumileyo futhi engelandaba lenotho. Sobabili sasizimisele ukwenza konke okusemandleni ethu sisebenzela uJehova futhi sasizimisele ukwenza loba yiwuphi umsebenzi esasingawuphiwa. Satshada mhlaka 23 March ngo-1974. Sathi siqeda ukutshada asizange siyevakatsha, kodwa sahle saya eKarttula lapho okwakulabamemezeli boMbuso abalutshwana kakhulu ukwedlula ePielavesi.

Sisanda nje ukutshada uJehova wahle wasitshengisa ukuthi wayezasinakekela nxa singaqhubeka sifuna uMbuso kuqala. (Mat. 6:33) Ngokwesibonelo sifika eKarttula sasihamba ngamabhayisikili ngoba sasingelamota. Ebusika kwakuqanda kakhulu, yikho kwakumele sibe lemota ukuze senelise ukuyitshumayela yonke insimu yebandla lethu. Kodwa sasingelamali yokuthi siyithenge.

Sathi silibele umnewethu wafika ezosivakatshela futhi wasinika imota yakhe. Umthelo wemota le wawusubhadaliwe, okwethu kwakuyikuthela amafutha kuphela. Sasesilayo imota.

UJehova wasitshengisa ukuthi wayengasoze asilahle, wayezahlala esinakekela. Thina okwasekumele sikwenze yikufuna kuqala uMbuso.

Sathi siseSikolo Senkonzo Samaphayona ngo-1978, omunye umzalwane owayesifundisa, uRaimo Kuokkanen, a wasikhuthaza ukuthi sifake isicelo sokuya eSikolo SeGiliyadi. Yikho saqalisa ukufunda isiNgisi silungiselela ukuya esikolo lesi. Kodwa ngo-1980 singakasifaki isicelo leso sacelwa ukuthi siyesebenza ewofisini yegatsha yeFinland. Ngalesosikhathi izisebenzi zeBhetheli zazingavunyelwa ukufaka isicelo sokuya eGiliyadi. Kodwa thina sasibona kungcono ukuthi uJehova asikhethele lapho esasingamsebenzela ngcono  khona, hatshi lapho thina esasifuna khona. Ngakho savuma ukuya egatsheni. Lanxa kunjalo, saqhubeka sisifunda isiNgisi sisenzela ukuthi nxa ithuba lingavuleka sifake isicelo sethu sokuya eGiliyadi.

Ngemva kweminyaka emilutshwana nje iQula Elikhokhelayo lathi izisebenzi zeBhetheli lazo zasezingafaka izicelo zokuya eGiliyadi. Safaka izicelo zethu ngokuphangisa lanxa sasikukholisa ukuba seBhetheli. Esasikufuna yikuthi inhlanganiso ibe kwazi ukuthi thina sasizimisele ukuyasebenza loba ngaphi nxa sifanele. Sabizwa eSikolo SeGiliyadi sangena ikilasi yesi-79 njalo saphiwa izicoco ngoSeptember 1985. Sathunywa ukuthi siye eColombia.

Sathi sifika eColombia kwathiwa siyesebenza ewofisini yegatsha. Ngazama ukwenza konke okusemandleni ami emsebenzini engangiwenza. Kodwa sathi sesilomnyaka sisegatsheni ngafisa ukutshintsha umsebenzi. Ngakho ngacela ukuthi siphiwe omunye umsebenzi futhi kwakungokokuqala njalo kungokokucina ukuthi ngenze njalo. Ngemva kwalokho kwathiwa siyekuba ngabanali edolobheni leNeiva elisesabelweni seHuila.

Mina ngiyakuthanda ukutshumayela. Ngingakatshadi ngisaphayona eFinland kwezinye izikhathi ngangitshumayela kusukela ekuseni kakhulu kuze kube sebusuku. Sisanda kutshada mina lomkami sasitshumayela ilanga lonke. Ngezinye izikhathi kwakusithi nxa sitshumayela ezindaweni ezikhatshana silale emoteni. Lokho kwakusinceda ukuthi ngelanga elilandelayo singahambi imango emide kodwa sihle siqalise ukutshumayela ekuseni.

Sathi sesingabanali saphinda satshiseka emsebenzini wokutshumayela njengakuqala. Ibandla esasingena kulo lakhula futhi abafowethu labodadewethu beColombia babesithanda, besihlonipha futhi besiqakathekisa.

Eduze leNeiva lapho esasikhona kwakulamanye amadolobho kodwa wona ayengela oFakazi. Ngangizibuza ukuthi ngubani owayezatshumayeza abantu abasendaweni lezo. Njengoba kwakulamalwecatsha, kwakuyingozi ukuya emadolobheni lawo ikakhulu nxa wawungadabuki khona. Ngakho ngathandaza ngicela ukuthi kube lomunye nje emadolobheni lawo owayengaba nguFakazi. Ngangifisa ukuthi umuntu lo abe ehlala eNeiva ukuze afunde iqiniso. Yikho ngaphinda ngathandaza ngicela ukuthi nxa umuntu lowo esebhabhathiziwe njalo wathuthuka ekukhonzeni, abuyele edolobheni lakibo ayetshumayela khona. Kwangimangalisa ukuthi uJehova wayelelinye icebo elalilihle kakhulu ukwedlula elami.

Ngemva kwesikhatshana nje ngaqalisa ukufunda iBhayibhili lelinye ijaha okwakuthiwa nguFernando González. Wayehlala kwelinye idolobho elalingela ngitsho oFakazi okwakuthiwa yi-Algeciras. UFernando wayehamba amakhilomitha adlula angu-50 esiya emsebenzini eNeiva. Wayesilungiselela kuhle isifundo ngasinye esasizakuba laso futhi masinyane nje waqalisa ukungena yonke imihlangano. Kusukela ngeviki yokuqala siqalise ukufunda, uFernando wayebuthanisa abantu edolobheni lakibo abesebafundisa lokho ayekufunde eBhayibhilini.

UFernando wabhabhathizwa ngoJanuary 1990 ngemva kwenyanga eziyisithupha eqalise ukufunda iBhayibhili. Ngemva kwalokho waba liphayona  lesikhathi sonke. Njengoba kwasekuloFakazi oyedwa e-Algeciras, kwasekuvuma ukuthi iwofisi yegatsha ihambise amaphayona aqakathekileyo endaweni leyo. NgoFebruary 1992 kwabunjwa ibandla edolobheni lelo.

UFernando watshumayela edolobheni lakibo kuphela yini? Hatshi. Wathi esetshadile, yena lomkakhe bathuthela kwelinye idolobho elalingela oFakazi okuthiwa yiSan Vicente del Caguán. Bancedisa ukuvula ibandla edolobheni lelo. Ngo-2002 uFernando waba ngumbonisi wesiqinti futhi yena lomkakhe u-Olga balokhu besahambela lakhathesi.

Lokhu kwangifundisa ukuthi kuqakathekile ukuthi ngithandaze kuJehova ngimtshele khona kanye engiyabe ngikufisa emisebenzini angipha yona. UJehova uyenelisa ukwenza lokho thina esingeke senelise ukukwenza. Phela umsebenzi wokuvuna ayisiwo wethu, ngowakhe.—Mat. 9:38.

Ngo-1990 ngaqalisa ukuhambela amabandla. Isiqinti sokuqala esasihambelayo sasisesigodlweni eBogotá. Umsebenzi lo wawusesabisa. Phela mina lomkami singabantu nje abangamangalisiyo futhi asilaziphiwo ezitheni. Kanti njalo sasingakujayelanga ukuhlala edolobheni elikhulu eliphithizelayo. Kodwa uJehova wakwenza lokho asithembisa khona kuFiliphi 2:13 othi: “Kuyamthokozisa uNkulunkulu ukuliqinisa aliphe isifiso lamandla okwenza okumthokozisayo.”

Ngemva kwesikhathi sahambela isiqinti esisedolobheni leMedellín engikhulume ngalo ekuqaliseni. Edolobheni lelo kwakugcwele udlakela okokuthi labantu babengasethuki. Ngokwesibonelo ngelinye ilanga ngathi ngifundisa omunye ubaba iBhayibhili, abantu baqalisa ukudubulana phandle kwendlu esasikuyo. Mina ngasengifuna ukulala phansi kodwa ubaba lo engangimfundisa kazange ethuke, waqhubeka ezibalela indima. Eseqedile ukuyibala wathi usake aphume phandle. Ngemva kwesikhatshana waphenduka ehamba labantwana ababili abancane wasesithi, “Ngiyaxolisa bengiyethatha abantwabami.”

Kwakusiba lezinye izikhathi esasisiba sengozini khona. Ngelinye ilanga sitshumayela endlini ngendlu umkami wabuya kimi egijima eyethukile wathi kulomuntu obezama ukumdubula. Ngaphelelwa, kodwa sananzelela ukuthi umuntu lo wayengafuni ukudubula uSirkka, wayefuna ukudubula enye indoda eyayidlula eceleni kwakhe.

Ngokuhamba kwesikhathi lathi sasingasethuki kangako nxa kungaba lodlakela. Kwakusikhuthaza ukuthi oFakazi ababehlala endaweni le eyayiyingozi kangaka babesenelisa ukuphila khona. Saphetha ngokuthi nxa uJehova wayebancedisa, lathi wayezasincedisa. Sasilalela lokho esasikutshelwa ngabadala njalo sasizama ukuthi sihlale sivikelekile. Okunye sasikutshiyela kuJehova.

Kwezinye izikhathi sasisesaba umnyama ongelampisi. Ngelinye ilanga sathi sikwenye indlu ngezwa angathi phandle kulabesifazana ababili abatshingelanayo. Ngangingafuni ukuzwa ukuthi babebangani kodwa umuntu engangifunda laye wathi ngibuye evulandini lakhe ngizobona. Ngathi ngifika khona ngathola ukuthi kwakungasibantu ababetshingelana kodwa kwakuzinyoni okuthiwa ngama-parrot ezazilingisela okwakujayele ukwenziwa ngomakhelwane.

Ngo-1997 kwathiwa ngiyefundisa eSikolo Sokuqeqetshelwa iNkonzo. b Ngangikuthanda ukungena izikolo zenhlanganiso kodwa ngangikaze ngiziphuphe ngithole isibusiso sokuthi ngiyefundisa ezikolo lezo.

Ngemva kwesikhathi ngaba ngumbonisi wesigaba. Kwathi uhlelo lokuba lababonisi bezigaba selumisiwe, ngabuyela ekubeni ngumbonisi wesiqinti. Okweminyaka edlula engu-30 bengifundisa ezikolo zenhlanganiso futhi ngihambela. Ngithole izibusiso ezinengi ngokwenza imisebenzi le. Kodwa ayisikho ukuthi izinto zonke bezihlala zitshelela. Kahle ngichasise.

Mina ngingumuntu ongesabiyo ukukhuluma lokho akucabangayo. Lokho kungincedile ezimeni ezinzima kodwa kwezinye izikhathi bengidlulisa amalawulo nxa ngizama ukulungisisa izindaba emabandleni. Ngangike ngitshiseke ngitshela abanye ukuthi kumele babe lothando futhi bazwisise abanye. Kodwa ngezikhathi ngikwenza lokho ngangiyabe ngingaboni ukuthi yimi engiyabe ngingaselalo uthando futhi ngingazwisisi.—Rom. 7:​21-23.

Ngezinye izikhathi amaphutha engiwenzayo ayake angidanise. (Rom. 7:24) Ngelinye ilanga ngathandaza kuJehova ngimtshela ukuthi kungaba ngcono ukuthi ngitshiye ukuba ngumnali ngizibuyelele kithi eFinland. Mhlalokho ntambama ngaya emhlanganweni webandla. Engakuzwa emhlanganweni lo kwangikhuthaza. Kwangenza ngaqiniseka ukuthi akumelanga ngitshiye umsebenzi wenkonzo engangiwuphiwe kodwa kumele ngizame ukulungisisa lapho engiphambanisa khona. Lalamuhla ilokhu ingimangalisa indlela uJehova aphendula ngayo umthandazo wami. Kanti njalo ngiyambonga kakhulu ngokungincedisa ukuthi ngilungisise lapho engisilela khona.

Mina loSirkka siyambonga kakhulu uJehova ngesibusiso asinike sona esokuba senkonzweni yesikhathi sonke okweminyaka eminengi. Kanti njalo ngiyambonga kakhulu uJehova ngokunginika inkosikazi elothando futhi ethembekileyo, engikhonze layo iminyaka yonke le.

Sekuseduze ukuthi ngifikise iminyaka engu-70 futhi ngingayifikisa ngizakuma ukufundisa ezikolo zenhlanganiso lokuhambela. Kodwa lokho akungidanisi. Kungani ngisitsho njalo? Ngenxa yokuthi angithandabuzi ukuthi okwenza uJehova athokoze yikuthi senze lokho esenelisa ukumenzela khona njalo simdumise ngenhliziyo yonke ngenxa yokuthi siyamthanda lokuthi siyambonga ngalokho asenzele khona. (Mik. 6:8; Mak. 12:​32-34) Akudingi ukuthi senze umsebenzi wenkonzo okhanya uqakathekile ukuze sidumise uJehova.

Nxa sengikhangela yonke imisebenzi yenkonzo engike ngayenza, ayisikho ukuthi ngayiphiwa ngenxa yokuthi ngingcono ukwedlula abanye kumbe ukuthi ngilesinye isiphiwo esimangalisayo. UJehova wangipha imisebenzi le ngenxa nje yomusa wakhe omkhulu. Wangipha yonke imisebenzi le yenkonzo lanxa kwakulalapho engangisilela khona. Engikwaziyo yikuthi ngiphumelele ukwenza imisebenzi le ngenxa yokuthi yena ubengincedisa. Lokho kwenze amandla kaNkulunkulu akhanya lapho engangisilela khona.—2 Khor. 12:9.