Inini ndakabahwa mu gore ra 1955, takabahwa tiri varongomuna, inini ndiri wokupejisira. Inini ndakakurira phedo no costa dhu sur ku Finland ku ndau inozivikanwa nyamasi uno inga dhorobha ro Vantaa.

Mai wangu vakabhabhatijwa pa makore manganani akhirira inini ndicito ndabahwa. Asi baba wangu avazivi kuzvidakarira kuti mai wangu vave capupu, ivona avacaitotendera kuti mai wangu vajije na inini pamwepo no hama jangu kana kwenda na itusu ku musongano. Ndiyo ndava, mai wangu vaitijijisa Bhaibheri baba wangu pavainga vacipo.

Kuvhira ndiri mudoko andizivi kumbodakarira kutama kuzwira Jehovha. Inga muezaniso, pandainga ndino makore anokwana kuita 7, prosora wangu wakanyangajwa maningi ngokuti ndainga ndicikadi kuha verilättyjä, iyi ndi pankeka imweni inohiwa ku Finland ino sangi. Iyena wandipsinya matama ngo nyara imwe kuti ndifunungure muromo, perapo oshandisa nyara yake imweni kuti aeje kundihisa pedhaso imwe yo pankeka ngo garfu. Inini ndakataka nyara yake iya, garfu riya rophwanyika ro mbhwera pasi.

Pandainga no makore anokwana kuita 12, baba wangu vakafa. Pasure pa izvi, inini ndakakwanisavo kwenda kumusongano. Hama jo ku ungano jakakhombija kunaka mwoyo kwandiri, izvi zvakandibesera kuti ndivangisire ku divi ro ku mujimu. Inini ndakatanga kuverenga Bhaibheri njiku jese no kuverenga mabhuku akacijikira mu Bhaibheri. Kujija kwandaaitari mukuvo wese kwakandibesera kuti nditeme civaringo cokubhabhatijwa. Ndakabhabhatijwa  mu njiku 8 ya Agosto wo 1969 pandainga no makore anokwana kuita 14.

No pakhirira mukuvo mushomani nondapeja kujija shikora, ndakatanga kushanda inga piyona wo nguva jese. No pakhirira sumana imwe, ndakathutha ndoenda kwaidiwa maningi vacumaeri ku Pielavesi, phedo no dhorobha ro Finland.

Ku Pielavesi ndakaziva musikane waizova mukaji wangu anodiwa Sirkka. Inini ndakamudakarira ngokuti iyena wainga mundhu waijidodokesa no waida Jehovha. Iyena aacaijipsakira nduma nokuda zviro zvakawanda zvokunyama. Itusu taida kuita zvese zvataikwanisa kuti tishandire Jehovha azvinenyi no basa ro taizogajwa. Itusu takacadha mu njiku 23 ya Março wo 1974. Kusiyapo kwenda ku ruwa dhi meri, takaenda koshandira ku Karttula ndau yaidiwa maningi vacumaeri.

Kuvhira patakacadha Jehovha wakakhombija kuti waizotipa zvese zvataida kudari tikadira Umambo hwake pakutanga. (Mateu 6:33) Inga muezaniso, pakutanga ku Karttula, aticainga no karu. Taaita hwendo ngo bhasikoro. Mukuwo wokutondhora, ku nyika iyi kwaiita maningi mbhepo. Kuti tikwanise kucumaera ku ndima yo ku ungano kwedu, taidikana kuva no karu. Asi aticainga no mare kuti titenge.

Hama yangu yo mukuru yakaviya kuzotivhakacira pa njiku yatainga ticikaveteri. Ivona vakatipa karu yavo inga cipo. Ivona vainga vapera kupagari maphepha o karu. Itusu taidikana basi kutenga mafuta. Pakupejisira takazova no karu yatainga tecida.

Jehovha wakakhombija kamare kuti waizotipa zvese zvataida. Itusu taidikana basi kudira Umambo hwa Mwari pakutanga.

Patainga tecikurusari Cikora co Mapiyona mu gore ro 1978, hama Raimo Kuokkanen  a wainga umwe mujijisi wo cikora ici wakativangisa kuti tiperensheri petisau kuti tiende ku Cikora co Griyadhi. Ngo kudaro, takatanga kujija Cingezi no murangariro wokuti tizokwanirisa kuti tiende kucikora. Mu gore ra 1980 ticito taperensheri petisau iyi, takadanwa kuti tiende koshanda ku Bheteri ro ku Finland. Pa mukuwo wiya Mabheterita aacaidikana ku perensheri petisau jokwenda ku Giriyadhi. Itusu taida kushandira kuri kwese hako kwataizogajwa ndi Jehovha haiwa kwataida. Itusu takatendera mukoka uwu. Asi pikija zvakadaro, takaenderera mberi tecijija Cingezi tecivetera kuti njiku iri yese vanozotikoka kuti tiende ku Giriyadhi.

Pa makore manganani akazotevera Mukhumbi Unotonga wakazotendera kuti Mabheterita aende ko kurusari Cikora co Giriyadhi. Pamukuvo  wondhowo kamare itusu takaperensheri petisau kuti tiende ku Cikora co Giriyadhi. Asi atizivi kuita izvi ngokuti aticaidakarirepi basa ro pa Bheteri. Zvakatosiyana kamare. Asi itusu tainga takanasiririka kuti tiende kwaidiwa vashandi, basi kudari tikatendehwa. Takakokwa kuti tiende ku Cikora co Giriyadhi mu turma 79 mu mweji wa Setembro wo gore ra 1985. Takagajwa kuti tiende koshandira ku Colombia.

Ku Colombia takagajwa kuti tishandire pa Bheteri. Ndakaita zvese zvandaikwanisa kuti ndirovejane no basa ro pa Bheteri. No papera gore rimwe ndakakumbira kuti ndicinje basa randainga ndakagajwa, uwu wakava hwendo hwokutanga no hwokupejisira wondakaita izvi mu upenyu hwangu. Takagajwa kuti tiende koshanda inga mamisiyonariyo ku dhorobha ro Neiva pa dhepartamento ro Huila.

Mukuwo wese inini ndinodakarira basa ro kucumaera. Pandainga ndicito ndashanda inga piyona ku Finland ndaipeja mukuwo wakareba mu basa ro kucumaera zvokuti ndaitoviya hwaausiku. Nopapera mukuvo mushomani, inini na Sirkka no tacadha, taipeja njiku yese mu basa rokucumaera. Potaiita hwendo kwenda ku ndima iri ndhambo no kumuzi, itusu taivata mu karu yedu. Ngo njira iyi, taikwanisa kunasa kuita hwendo nokukwanisa kucumaera no mangwanani pa njiku yaizotevera.

Kushanda inga mamisiyonario mu basa rokucumaera kwakatibeserazve kuti tive no cido cokuda kuita basa iri inga catainga naco pakutanga. Ungano yakaenderera mberi yecikura, itusu takazwisisazve kuti hama no hambzaji jo ku Colombia jinokhombijirana maningi rudo, nderemejo no cido.

Phedo no kwataishandiraro ku Neiva, kwainga kucina nee Capupu cimwe. Inini ndaida kuti ticumaere maningi masoko akanaka mu ndau jiya. Ngo ndava yo hondo, ndau iyi aicainga yakangwaririka kuitira vandhu vaya vokuti avacainga vo mu madhorobha o ndhowo. Ndiyo ndava, ndaiita mukumbiro kuna Jehovha ndecikumbira kuti ari wese wo mudhorobha riya ave Capupu. Inini ndairangarira kuti mundhuwo waidikana kuva ecipona mu Neiva kuti iyena akwanise kujijira cokwadi. Ndiyo ndava, ndaiita mukumbiro kuti paanozopera kubhabhatijwa mundhuwo aenderere mberi ecikura ku divi ro kumujimu ahwirire ku dhorobha rake raakabarihwa kuti akwanisevo kucumaera masoko akanaka ku vandhu vondhovo. Andicaizviziva kuti Jehovha wainga ecitorangariravo zviro zvimweni zvaushoni maningi kupinda zvandairangarirari.

Pasure pa izvi ndakatanga kujija Bhaibheri no mujaha umweni waidanijwa kuti Fernando González. Iyena waigara Algeciras dhorobha riya raingaya ricina Zvapupu zva Jehovha. Fernando waiita hwendo hwo makiromita aikwana kuita 50 ecienda ku basa kwake ku dhorobha ro Neiva. Iyena wainasa kunasirira cijijo cimwe nga cimwe, ngokukasika wakatanga kupinda musongano. Kutangira sumana yake yokutanga yo jijo, Fernando wainga wojijisavo vandhu zvese zvaiingavo ecijija mu Bhaibheri no vandhu vo mu dhorobha rake.

Fernando wakazobhabhatijwa mu mweji wa Janeiro wo 1990, wainga aano mweji mutandhatu basi naatanga kujija Bhaibheri. Perapo wakatanga kushanda inga piyona wo nguva jese. Zvecivoneka kuti ku dhorobha ro Algeciras kwainga kwaano Capupu cimwe zvainga zvakajiviririka kuti Bheteri ritumire mapiyona anosisira kuti aende ku ndau yondhoyo. Ngo kudaro, mu mweji wa Fevereiro wo 1992, ku Algeciras kwakaumbhwa ungano.

Asi Fernando aazivi kugara ecicumaera basi mu dhorobha rake. Paakapera kucadha no mukaji wake,  ivona vakathutha kuti vaende San Vicente del Caguán ku dhorobha rokuti kwainga kucitonavo Capupu ca Jehovha. Konayo vakabesera pakuumba ungano. Mu gore ra 2002 Fernando wakagajwa inga muvonereri wo ndharaundha, iyena no mukaji wake Olga vari kwenderera mberi vecishanda pa basa iri ravakagajwari mbhera nyamasi uno.

Na zvese izvi zvakaitikari, ndajija kuti ngozvaushoni maningi kunasa kujekesa zvatiri kudaro patinonga teciita mukumbiro mukuzwirana no basa redu rotakagajwa no zvese zvinobatanijwepo. Jehovha angaita zviro zvokuti itusu atikwanisi kuzviita. Kunasa kunanga, munda ngo wake asipi wedu.—Mateu 9:38.

Mu gore ro 1990 ndakagajwa kuti ndishande inga muvonereri wo ndharaundha. Takagajwa kwenda koshandira ku dhorobha ro Bogotá. Izvi zvakatiita kuti tithimwe-thimwe padoko. Ngokuti itusu tainga ticizivi kuroveja kupona mu dhorobha rakakura maningi. Inini no mukaji wangu tiri vandhuvo havo vacikazivivo zvakawanda. Mukusiyana, Jehovha wakakwanirisa cigondiso cake cinowanika pana Vafiripi 2:13: “Mwari ndiyena anomuvangisa no kumupa cido no simba ro kuita, ngokuti anoda kuti muzviite.”

Nopadarika mukuvo mushomani takagajwa kuti tiende koshandira ku dhorobha ro Medellín, dhorobha randambonangaya pakutanga. Vandhu vakonayo vainga vatoroveja kuita zvouphanga basi, zvokuti cainga cataacirovejeso cavo. Inga muezaniso, njiku imweni pandainga ndeciitisa jijo yo Bhaibheri, vandhu vakatanga kutofurana ngo sure ko nyumba yo mundhu wandaiitisaro jijo yo Bhaibheri. Inini ndainga ndoda kutowa pasi, asi mujiji wangu wakaenderera mberi eciverenga ndima akagajana inga kuti apana zviri kutoitika. Paakapejisa kuverenga, wakakumbira sesa odarika. Nopapera mukuvo mushomani, iyena wakaviyazve no vana vake vaviri vadoko, wakabhuya na inini naakagajana eciti: “Munondiregereravo, ndainga ndaenda kotora vana vangu.”

Mukuvo umweni taisonganavo no mugariro jinothyisa. Vhaza imweni patainga tecicumaera muzi ngo muzi, mukaji wangu wakaviya kwandiri ecigogoma, ecihasaira no kuthya ecinananga kuti aripo waida kumufura. Izvi zvakandibharusa hana. Perapo, takazozwisisa kuti mundhu waingaro ananga mukaji wangu kuti waida kumufura, aacaidepi kufura iyena, asi waida kufura mwanarume umweni wainga ecidarika ngo phedo paingaro no mukaji wangu Sirkka.

Pakufamba ko nguva, atizivi kuzogara tecithyazve zvouphanga zvaiithwari mu ndau iyi. Takavangiswazve maningi ngokuvona cicunge cainga no hama no hambzaji jo mu nyika iyi ijona jaikwanisa kuhwisana no mugariro jakadari no jimweni jainga jakatoshatisisa. Itusu takazoguma pakuzwisisa kuti kudari Jehovha waibesera hama no hambzaji iji iyena waizotibeseravo. Mukuvo wese taizwira mbhangiro jataipuwa ngo vakuru vokuungano kwedu nokutema civaringo cokusiya zvimweni zvese mu nyara ja Jehovha.

Asi zvakajeka kuti mugariro jimweni ajisaithyisa maningi inga manera atairangarira. Vhaza imweni ndakazwa maizwi maviri o vanakaji vaitukana no kunesana, ngo sure ko nyumba yandaingaro ndecicumaera. Inini andicaidepi kwenda kovona vandhu vainesana asi mune wo nyumba iya wakandivangisa kuti tiende ku ndau yo zvaiitikaro kuti tivone zvicinyi zvainga zveciitika. Kunasa kunanga “musindo” wiya aucaingepi wokadi kamare jainga shiri mbiri jaiita musindo jecitevejera mavhizinyu.

Mu gore ra 1997, ndakagajwa inga mujijisi wo Cikora co Treinamento Ministerial. b Kwandiri ici cainga cidakajiso ku kurusari cikora co Bhaibheri, asi inini ndainga ndicizivi kumborangarira kuti ndaizova mujijisi wo cimwe co zvikora izvi.

Nopadarika mukuvo mushomani, ndakatanga kushanda inga muvonereri wo ndharaundha imweni yainga dokowani. Asi nasiriro iyi payakaimiswa, ndakahwirirazve koshanda inga muvonereri wo ndharaundha. Pamakore anokwana kuita 30 ndakadakara maningi ngokushanda inga mujijisi no mubeseri wo muvonereri wo ndharaundha. Mabasa aya akava cinyuke co makomborero mazinji. Asi zvese izvi azvizivi kuva zvakareruka. Imanyi ndizvisanangure.

Inini ndiri mundhu wakavanga no anojithemba. Izvi zvakandibesera kuti ndihwisane no mugariro jinonesa maningi. Mukusiyana, mukuvo jimweni ndaidikana kuva mundhu anovangisira maningi kuti ndiitise nane zviro zvimweni mujiungano. Ko vhaza jakawanda ndakabesera vamweni kuti vave vandhu vanokhombijira rudo no kuzwisisa vamweni. Pikija zvakadaro, zvinoshamaisa ngo zvokuti pamukuvo wonawo ndairuza maningi mugariro jandaidikana kuva najo.—Varoma 7:​21-23.

Ngo ndava yo zviro zvimweni zvondaiposa kazinji ndaigara ndakasuruvara. (Varoma 7:24) Pa vhaza imweni ndakavhunja Jehovha pa mukumbiro kuti zvainga zvaushoni kuti ndisiye basa iri inga misiyonario ndihwirire ku Finland. Pa usiku hwiya ndakava pamusongano umweni wo ungano. Pamusongano uwu ndakaashira vangiso imweni yakandibesera kuvona kuti ndaidikana kwenderera mberi ndeciita basa randakagajwa nokwenderera mberi ndecishanda ngo simba kuti ndiitise nane zvandaiposa. Mbhera na nyamasi ndinonasa kuzviziva kuti Jehovha wakanasa kudavira mukumbiro wangu wiya ngo njira yakajeka. Kunja kwa zvondhozvo ndinodakara maningi ngo manera aakakhombijaro rudo kwandiri nokundibesera kuti ndihwisane nokurembejeka kwangu.

Inini no mukaji wangu Sirkka takavona inga kuti tainga no magava na Jehovha o makomborero ese aakatipa ngokupeja mukuvo wese uwu mu upenyu hwedu tiri mu nguva yakazara. Cimwenizve, ndinobongesera maningi Jehovha ngokundipa kwake mukaji ano rudo wakagondeka pa makore ese aya.

Sambiri pano ndinokwanisa makore anokwana kuita 70, ndinozoima kuita basa rangu inga mujijisi no muvonereri wo ndharaundha. Ngo kudaro, izvi azvindisuruvarisi. Ngenyi izvi azvindisuruvarisi? Ngokuti ndinonasa kuthemba kamare kuti zvinokuja maningi Jehovha ngozvokuti takamushandira no kujidodokesa kwese tomukuja no kumunamata ngo mwoyo wese no rudo no kubongesera. (Mikeya 6:8; Marko 12:​32-34) Kuti tikwanise kukuja Jehovha atidikani kuva vandhu vano nduma.

Pandinoima ndosota sure ndovona mabasa ese andakaita, ndinozwisisa kuti mabasa aya andizivi ku maashira ngokuti ndainga ndakakhwirira kupinda vamweni haiwazve ngokuti ndaisisira kupinda vamweni. Andizvopi kamare. Kunja kwa izvi, Jehovha wakandipa makomborero ese aya nokundigaja mabasa aya ese ngo ndava yo unyasha hwake ucikaezaniswi. Iyena wakandipekeja makomborero ese aya pikija no kurembejeka kwangu. Ndinonasa kuzviziva kuti ndakanasa kukwanirisa mabasa ese andakagajwari ngo besero ra Jehovha. Ngo njira iyi kurembejeka kwangu kwakavonesa simba ra Mwari.—2 Vakorinte 12:9.