Adũndó mbi na 1955. Mbi ndó nyingambi ti taa ka pɛko ayata mbi sɛ ti kɔli. Mbi maindó dã na Sudi ti Finland, kaya kɔdɔrɔ mɛ ando ili ni ndɛ ya, Vantaa.

Mama tɛ mbi mundó batisimɔ, wa lo tindó Tɛmwɛ tɛ Yehova nyi bulu yakere uzu ti nɛngɔ ya lo dũ mbi. Kanda, to mbi ndo temelandó mbilimbili wa ta lo ndo zindó lége hɛ̃ mama tɛ e ya, lo manda na e Ngbangɔ wa lo gwe nga na e bombi ma. Ni la mama tɛ e ndo mandandó na e Ngbangɔ na ngoi mɛndó ta to e ndo du da ma.

Na ngoi mɛndó mbi dɛ nyingambi ko, mbi mandandó lingɔ se bɛ Yehova. Na ndakisa, ngoi mɛndó mbi na bulu mbalambala ko, mɛtrɛsɛ tɛ mbi atindó na ngɔnzɔ na lo tɛ mbi na lo mɛ ya, mbi kɛ̃ndó tɛngɔ verilättyjä (aye mɛ ali ni na mɛ̃nɛ). Lo pɛtɛndó ngbonga mbi na mbage ti lo kɔi, wa na mbage ti lo mɛndɛ̃ lo ndo gingisandó ti kpãngɔ kanya ti tɛ mɛ ali ni na mɛ̃nɛ ka yanga mbi. Kanda, mbi longandó gbulangɔ kanya niko ka ti lo.

To mbi kpindó na ngoi mɛ mbi dɛ na bulu 12. Na gesi mbi bandandó gwengɔ bombi. Ayata kɔli ti ya bombi kpãndó tɛrɛ la na ndo tɛ mbi, wa ni lindó ya, mbi mai naya nyingɔ. Mbi bandandó mandangɔ Ngbangɔ nga na dingɔ ambeti tɛ e awakristo bi zu. Seliye niko ti nzɔ̃ni lindó ya, mbi mu batisimɔ na 08/08/1969 na ngoi mɛndó mbi na bulu 14.

 Na ngoi mɛndó mbi onzi kalasi tɛ mbi ti sɛgɔ̃ndɛrɛ ko, mbi bandandó lingɔ kwa tɛ wa sungɔ lége ti ngoi zu. Nyi pɔsɔ yakere na gesi, mbi gwendó ka ndo mɛ gwɛ̃ tɛ awa fangɔ tɛnɛ da gba ka Pielavesi mɛndó dã na kɔdɔrɔ ti Finland.

Ka Pielavesi ndó la mbi tengbi na ya mbi ­Sirkka. Mbi yendó lo na lo mɛ ya, lo mbilimbili, lo na zungɔ na tɛrɛ, wa lo ndo ye ngandó Yehova gba. Ta lo ndo gindó lokumu bere dungɔ na gwɛ̃ ti aye ti lɛ gigi gba ma. E zu sɛ e ndo lindó zu ti vɔrɔngɔ Yehova nga na kokisangɔ kumba mɛndó e na ni. E lindó libala tɛ e na 23/03/1974. Na se lɛ gwengɔ ka ndo mɛ nzɔ̃ni ti nɛngɔ ya e sepala na libala tɛ e ko, e mundó ekateli ti gwengɔ ka Karttula ka ndo mɛndó gwɛ̃ tɛ awa pangɔ nzɔ̃ pa ti Lo-lengɔ Gbia da gba.

Na ngoi mɛndó e li libala tɛ e ko, Yehova fandó na e ya, lo na zangɔ e na aye mɛ e na gwɛ̃ ni se du ya, e kpã Lo-lengɔ Gbia tɛ lo na ndo ti uzu. (Mat. 6:​33) Na ndakisa, ka Karttula ta e ndó na kamiɔ̃ ma. Na e bandeli, e ndo nɔndó nɔ na velo. Na ngoi ti kpengba de ko, température ndo zundó kpɛngbani tee na zero. E ndo na gwɛ̃ ti kamiɔ̃ ti nɛngɔ ya, e fa tɛnɛ kaya bombi mɛ na teritwarɛ ti kotani. Kanda, ta e ndó na falanga ti vɔ̃ngɔ na ni ma.

Lá kɔi, yaya tɛ mbi kɔi gandó ti bangɔ e. Na songo zu, lo ziandó hɛ̃ e kamiɔ̃ tɛ lo. Lo vɔ̃ndó ambeti ti kamiɔ̃ ni zu. Kumba tɛ e adu bondó ti vɔ̃ngɔ essence. Na gesi, e luandó kamiɔ̃ mɛ e na gwɛ̃ ni.

Yehova fandó ya, lo mu kumba ti kokisangɔ agwɛ̃ tɛ e ti mi. Kwa mɛndó e na ni adu bondó ti kpãngɔ Lo-lengɔ Gbia na ndo ti uzu.

Na ngoi mɛndó e onzi kalasi tɛ awa sungɔ lége ti kotani na bulu ti 1978 ko, Raimo Kuokkanen a kɔi tɛ awa hangɔ kalasi ni sandó ngunu bɛ e ya, e tondisa fɔrmulɛrɛ ti kalasi ti Gileade. Ni la, e bandandó mandangɔ anglais ti nɛngɔ ya aza e, e li kalasi ni. Kanda, na 1980 uzu ti nɛngɔ ya, e tondisa formulɛrɛ ti gwengɔ kalasi niko, ailindó e ti nɛngɔ ya, e li kwa ka Bethel ti Finland. Uzu ndó ko, ta ahɛ̃ndó lége hɛ̃ ayata mɛ ka Bethel ya, ala li kalasi ti Gileade ma. E yendó lingɔ kwa hɛ̃ Yehova na ndo mɛ lo nvɛ̃ni lo hũ nzɔ̃ni, kanda ta bo na ndo mɛ e nvɛ̃ni e hũ nzɔ̃ni ma. Ni la, e yendó invitasiɔ̃  ni mbala kɔi. E ngbã bondó lá kwɛ mandangɔ anglais ti nɛngɔ ya, bi kɔi se e lua lége ko, e tondisa mbala kɔi fɔrmulɛrɛ ti gwengɔ kalasi ti Gileade.

Abulu yakere so pɛni, Bombi tɛ Adonzi zindó lége hɛ̃ ayata mɛ ndo li kwa ka bethel ti nɛngɔ ya, ala tondisa fɔrmulɛrɛ ti lingɔ kalasi ti Gileade. E tondisandó mbala kɔi fɔrmulɛrɛ ti kalasi ni ti Gileade, ta e lindó ni na lo mɛ ya, e zanga dengɔ bɛ ka Bethel ma. Kanda, adu bo na lo mɛ ya, e ndó dã ti gwengɔ hɛ̃ngɔ ti e ka ndo mɛ gwɛ̃ tɛ awa fangɔ tɛnɛ da gba se aye e. Ailindó e ka Gileade, wa e mundó diplɔmɛ tɛ e na kalasi ti 79 na nzɛ ti 09/1985. Atondó e ka Colombie.

Kwa tɛ e ti uzu ka Colombie adundó ka Bethel. Mbi lindó zu ti kokisangɔ kumba tɛ mbi, kanda na pɛ bulu kɔi mɛndó mbi li kwa ka bethel ko, ayɔndó ya, e gbinyangbi akpale mɛndɛ̃. Adu fãni ti uzu na ya dungɔ lɛ ngɛ̃́ tɛ mbi hũndangɔ ya, ahɛ̃ mbi kumba mɛndɛ̃. Na gesi, atondó e amisiɔnɛrɛ ka Neiva ka province ti Huila.

Mbi ndo yendó kwa ti fangɔ tɛnɛ gba. Ngoi mɛndó mbi dɛ mɔdo nga wa sungɔ lége ti ngoi zu ka Finland ko, mbi ndo sindó kwa ti fangɔ tɛnɛ bandangɔ ndapelele tee ndɔ. Na pɛ libala tɛ e ko, mbi ná ya mbi Sirkka e ndo lekisandó ngoi gba na ya kwa ti fangɔ tɛnɛ. Ngoi mɛndó e ndo li kwa ti fangɔ tɛnɛ ka téritwarɛ mɛ yɔngɔrɔni ko, ngoi mɛndɛ̃ e ndo landó kaya kamiɔ̃ tɛ e. Ni ndo zandó e ya, ta e gwe yada wa e diri e ga ma, ni ndo lindó e ya, e zingɔ na ndapelele ti nɛngɔ ya e banda kwa ti fangɔ tɛnɛ.

Na ya kwa tɛ e ti misiɔnɛrɛ ka teritwarɛ ko, e luandó dengɔ bɛ nga ma se mɛndó e na ni uzu kaya kwa ti fangɔ tɛnɛ. Bombi tɛ e maindó, wa ayata kɔli ná ayata wali ti Colombie atindó na aseliye ti songo, tɔndɔngɔ, nga na hɛ̃ngɔ sia kɔli.

Dã na teritwarɛ mɛndó e ka da ka Neiva ko, ta Atɛmwɛ tɛ Yehova ndó kai ma. Mbi ndó na sɔngɔ bɛ gba na ndo ye mɛ mbi li ti nɛngɔ ya, kwa ti fangɔ tɛnɛ asi kaya akɔdɔrɔ niko. Na lo ti to mɛndó ndo tiri kai ko, ta ala ndo yendó ya, azi ti kɔdɔrɔ mɛndɛ̃ ga li kaya kɔdɔrɔ tɛ ala ma. Ni la, mbi ndo lindó sambela ya, zo kɔi kaya kɔdɔrɔ niko ti Tɛmwɛ tɛ Yehova. Mbi ndó na dangɔ bɛ ya, zo niko lengbi ti dungɔ ka Neiva ti nɛngɔ ya, lo manda mbilimbili. Na lo ni la, mbi ndo li ngandó sambela ya, se zo niko mu batisimɔ ko, lo mai na ya nyingɔ wa lo diri ka kɔdɔrɔ tɛ la so pangɔ nzɔ̃ pa. Mbi ga mbi hĩnga ya, Yehova na dangɔ bɛ ti nzɔ̃ni ɔngɔ tɛ mbi.

Nyi ngoi yakere na gesi, mbi bandandó mandangɔ Ngbangɔ na palanga kɔli kɔi mɛ ili lo la Fer­nando González. Lo ndo dundó ka Algeciras kɔi ti akɔdɔrɔ mɛ ta Atɛmwɛ tɛ Yehova kai ma. Fer­nando ndo lindó vuayajɛ ɔngɔ kilomɛtrɛ 50 ti gwengɔ kwa ka Neiva. Lo ndo lɛkɛndó buku tɛ lo ti mandangɔ nzɔ̃ni, wa lo banda ngandó mbala kɔi gwengɔ abombi zu. Pɔsɔ ti uzu mɛndó lo banda mandangɔ Ngbangɔ ko, lo bombindó azi ti kɔdɔrɔ tɛ lo ti hangɔ ala na aye mɛ lo manda kaya Ngbangɔ.

Na pɛ anzɛ 6 mɛndó Fernando manda Ngbangɔ ko, lo mundó batisimɔ na nzɛ ti 01/1990. Na gesi, lo tindó wa sungɔ lége ti ngoi zu. Na lo mɛ ya, zo kɔi ka Algeciras ti Tɛmwɛ tɛ Yehova ko, mbi hũ ya, biro ti filialɛ na tongɔ awa sungɔ lége ti kotani ka kɔdɔrɔ niko. Na nzɛ ti 02/1992 azindó bombi ka kɔdɔrɔ niko.

 Fernando ngbã bondó pangɔ nzɔ̃ pa ka kɔdɔrɔ tɛ lo? Ipɔ! Na pɛ libala tɛ ala ko, lo ná ya Olga gwendó ka San Vicente del Caguán ka lo kɔdɔrɔ mɛndɛ̃ mɛndó ta Atɛmwɛ tɛ Yehova ka da ma. Na lo ti ge ge ge tɛ ala ko, azindó bombi kɔi kaya kɔdɔrɔ niko. Na 2002, Fernando tindó wa bangɔ ndo kɛlɛkɛlɛ, wa tee ndɛ lo ná ya lo Olga ala dɛ bo li kwa ni.

Kpale mɛ aza mbi ya, mbi manda nda mɛ adu gbondoni lingɔ sambela na ndo akumba mɛ e ndo lua ge ya linɔ tɛ Nzapa. Yehova ndo li ye mɛ ta elengbi ti lingɔ ma. Hãngɔ ni zingɔ, ni du lé tɛ tɛ lo kanda ta tɛ e ma.​—Mat. 9:38.

Na 1990, e luandó kumba tɛ awa bangɔ ndo kɛlɛkɛlɛ. E bandandó kwa tɛ e ti bangɔ ndo kɛlɛkɛlɛ ka kɔdɔrɔ gbia ti Bogotá. E tindó na mbɛtɔ ya, ta e na kokangɔ lingɔ kwa ni na seni ma. Na lo mɛ ya, ta mbi ná ya mbi e dɛ e tindó na makoki gba ti lingɔ kwa niko ma. Ta e mɛsɛnɛndó na kpale nga na dungɔ lɛ ngɛ̃́ ti kota gbata ma. Kanda Yehova zandó e na bangɔ tɛnɛ tɛ lo mɛ kaya mbeti ti Filipɛ 2:​13: mɛ ndo tɛnɛ ya, “Nzapa ndo li kwa kaya bɛ ĩ ngoi zu ya, ĩ ye aye mɛ bɛ ni ndo dɛ na lo ni, wa lo ndo hɛ̃ ĩ gwɛ̃ nga na ngunu ti lingɔ ni.”

Na gesi, atondó e awa bangɔ ndo kɛlɛkɛlɛ ka Medellín, kɔdɔrɔ mɛ fale mbi tɛnɛ tɛnɛ ni uzu. Kai ko, azi mɛsɛnɛndó na kakulu lo mɛ ndo li tɛrɛ lo kaya akartier, wa ta ala di dɛ ngandó na mbɛtɔ ni ma. Na ndakisa, ngoi mɛndó mbi ndo manda na zo kɔi Ngbangɔ kaya da ko, e mandó bɔ̃mbe kpale ka gigi. Mbi ndó dã ti tingɔ ka tise, kanda zo mɛndó e ndo manda na lo Ngbangɔ ta lo ndo na mbɛtɔ ma, wa lo ngbã bondó dingɔ paragrafɛ. Na ngoi mɛndó lo onzi ko, lo yɔndó pardɔ̃ ka ti mbi wa lo sindó ka gigi. Na gesi, lo gandó na ayangambi sɛ wa lo pandó hɛ̃ mbi na zungɔ na tɛrɛ zu ya, “limbisa mbi, mbi gwe fale ti gingɔ ayati mbi.”

E tengbi ngandó na akpengba kpale mɛndɛ̃. Lá kɔi, na ngoi mɛndó e ndo e li kwa ti fangɔ tɛnɛ nyɔ da na nyɔ da ko, ya mbi gandó na kpɛ ka gunda mbi, wa lo ndó na mbɛtɔ. Lo pandó hɛ̃ mbi ya, ali mabere ya zo kɔi sɔ̃ ngombe tɛrɛ mbi. Ni hɛ̃ndó mbi mbɛtɔ. Na gesi, e gbɔ̃ndó ndani ya, ta zo ni sɔ̃ndó ngombe niko tɛrɛ Sirkka ma; kanda, lo sɔ̃ndó ni tɛrɛ zo kɔi mɛ ndo ɔ so gunda lo.

Yɛkɛ yɛkɛ, mbɛtɔ ti akakulu lo ni mɛndó ndo li tɛ tɛrɛ lo ka kɔdɔrɔ niko awɛndó ya e. Hũngɔ ya, ayata e Atɛmwɛ tɛ Yehova ti kɔdɔrɔ ni ndo gbendó bɛ la na ndo akpengba kpale mɛ ndo si kai ko, asandó ngunu bɛ e. E ndo tɛnɛndó ya, na lo mɛ ya Yehova ndo zandó ala ko, lo nga na zangɔ e. Ngoi zu, e ndo landandó awangɔ tɛ abiazi ti kɔdɔrɔ ni nga tɔndɔngɔ ekateli mɛndó ala ndo mu, wa tãnga akpale ni e ziandó ni ka ti Yehova.

Biani, ta akpale zu adundó siɔni gba nga ma se mɛndó e ndo da na bɛ e ma. Lá kɔi, ngoi mɛndó mbi ndo fa tɛnɛ kaya da tɛ zo kɔi ko, mbi mandó mabere awali sɛ ndo pa pa ka gigi. Ta Mbi ndó na gwɛ̃ ti gwengɔ ka ndo ti pa ni ma, ni la nvɛ̃ da pandó hɛ̃ mbi ya, mbi gwe ka kuluarɛ. Mbi gandó mbi hĩnga ya, legɔ̃ awali niko sɛ mɛndó mbi ndo ma ko, ta adu legɔ̃ azi ma, kanda adundó “akukulu” sɛ la ndo manda gbɛgɔ̃ azi ti kartier.

Na 1997 ko, mbi tindó wa hangɔ kalasi tɛ awa pangɔ nzɔ̃ pa ti Lo-lengɔ Gbia (EFM). b Ngoi zu, mbi ndo sepalandó na kalasi tɛ awa pangɔ nzɔ̃ pa ti Lo-lengɔ Gbia. Kanda, ta mbi ndo dandó bɛ mbi ya, mbi na luangɔ nzɔ̃ tangɔ li gɛrɛ ti tingɔ wa hangɔ lo ka kalasi niko ma.

Na gesi, mbi tindó wa bangɔ ndo district. Na ngoi mɛndó kwa tɛ awa bangɔ ndo district wɛ ko, mbi dirindó ndo kwa tɛ mbi ti bangɔ ndo kɛlɛkɛlɛ. Abulu 30, mbi ndó na dengɔ bɛ ti lingɔ kwa nga ma, wa hangɔ kalasi tɛ awa pangɔ nzɔ̃ pa ti Lo-lengɔ Gbia nga wa bangɔ ndo kɛlɛkɛlɛ. Kumba niko alindó ya, mbi lua anzɔ̃ sulu gba. Kanda ta akpale ni zu ndo dundó woni ma. Ĩ zia mbi kambisa nda mɛ mbi tɛnɛ ngaso.

Mbi dundó zo ti kakulu lo. Ni lindó ya, mbi gbe bɛ mbi na ngoi ti akpengba kpale. Kanda ngoi mɛndɛ̃, na ngoi mɛndó mbi ndo gi lɛkɛngɔ akpale kaya abombi ko, mbi ndo lindó ye mɛ aɔ nyɔ kpɔ̃ ni. Mbi bandandó hɛ̃ngɔ wangɔ hɛ̃ azi mɛndɛ̃ ya, ala fa songo wa ala ndo ye nga azi mɛndɛ̃. Kanda, ta mbi nvɛ̃ni ndó na aseliye niko ma.​—Roma 7:21-23.

Na lo ti zangangɔ lengbingɔ tɛ mbi ko, ni lindó ya mbi ti na nzɛ̃ngɔ ti kpengbani. (Roma 7:24) Na ya ngoi mɛndɛ̃ mbi lindó sambela hɛ̃ Yehova ya se du nzɔ̃ni ko, mbi zia kwa tɛ mbi ti misiɔnɛrɛ wa mbi diri ka Finland. Na ndɔ niko, mbi gwendó bombi. Tɛnɛ ti sangɔ ngunu bɛ mɛndó mbi ma kai alindó ya, mbi ngbã na ya kwa tɛ mbi abɛse mbi du zo ti zangangɔ lengbingɔ. Ndɛ lo mɛ ko, mbi hũ yangondo se mɛ Yehova ndo hɛ̃ gbinya ti sambela. Mbi ndo sepala na songo mɛndó ayata fa na mbi ti nɛngɔ ya, mbi nwɔ nzɛ̃ngɔ tɛ mbi.

Mbi ná Sirkka e ndo hɛ̃ Yehova sia kɔli mawoma na nzɔ̃ tangɔ li gɛrɛ mɛ lo hɛ̃ e ti lekisangɔ dungɔ lɛ ngɛ̃́ tɛ e na ya kwa tɛ lo. Mbi ndo hɛ̃ nga Yehova sia kɔli na ndenge mɛ lo hɛ̃ mbi wali mɛ na songo nga na loyengɔ na ya abulu niko zu.

Angbã yakere mbi ti na bulu 70, wa mbi na ziangɔ kwa ti hangɔ kalasi tɛ awa pangɔ nzɔ̃ pa ti Lo-lengɔ Gbia nga na kwa tɛ awa bangɔ ndo kɛlɛkɛlɛ. Kanda, ta ni ndo hɛ̃ mbi nzɛ̃ngɔ ma. Na lo nɛ? Na lo mɛ ya, mbi hĩnga ya ye mɛ ndo hɛ̃ Yehova gonda gba adu lingɔ kwa hɛ̃ lo na mbilimbili, vɔrɔngɔ lo na songo, nga hɛ̃ngɔ lo sia kɔli. (Mika 6:8; Mar. 12:32-34) Ti hɛ̃ngɔ Yehova gonda ko, ta ayɔ bo ya, e du na kumba mɛ ngbondoni ma.

Na ngoi mɛ mbi ndo binga li mbi na ndo akumba mɛndó mbi na ni ko, mbi hĩnga ya, ta mbi luandó ni na lo mɛ ya, mbi du ngbondoni mbi ɔ azi mɛndɛ̃ ma, wa ta mbi lua ngandó ni na lo mɛ ya, mbi hĩnga alo gba ɔngɔ azi mɛndɛ̃ ma. Kanda mbi hĩnga ya, se Yehova hɛ̃ndó mbi kumba niko, adundó na lo ti nzɔ̃ bɛ tɛ lo. Lo hɛ̃ndó mbi nzɔ̃ tangɔ li gɛrɛ ni abɛse na ya yungɔ ndo tɛ mbi. Mbi tindó na makoki ti kokisangɔ kumba ni bo na lége ti lisalisi tɛ lo. Ni la, nzɛ̃ngɔ tɛ mbi lindó ya, mbi ti na ngunu na ya kwa tɛ Yehova.​—2 Kɔr. 12:9.