Kiyariwe mu 1955, nave kamukhaani wa asinnaka araru. Kiphwiiwe waacamela o kosta suli o Filantiya, makupa yaawo olelo osuweliwe ntoko epooma ya Vantaa.

Amamaaka yaahipatisiwa ntoko mmoha a Anamoona a Yehova iyaakha vakhaani muculi kihaakumve oyariwa. Nyenya apapaaka hiyaasiveliwa ni eparipari nave hiyaaweemererya amama wi enihusiheke Piipiliya naari onikuxa ntakhara mithukumano sa muloko. Mwawiihiiha, amama yaanihusiha iparipari sa Mpiipiliyani soochuneya vaavaa apapa yahaakhalaaya vakhiviru.

Ovinyerya kiri mwaana kaalakelela omwiiwelela Yehova. Ntoko yootakiherya, ekwaha emoha vaavaa kaaryaakano iyaakha thanu napiili, aprofesoora aka yaahinyeenyeya ni miyaano nthowa nawi nkaalya (yoolya ya nikhami). Ni ntata nimoha, awo yaahiphara nrama naka mwakuru wi ehule iyano saka, ni ntata nikina yaahererya ovoliiha mwaano mwaka ekarfu erivo epetasu ya enama yeele. Nyenya kaawerya okapasa ekarfu yeele.

Vaavaa kaaryaakano iyaakha 12 apapaaka yaahikhwa. Voocharela, kaapacerya ophwanyeya mmithukumano sa muloko. Anna a mmulokoni yaahooniherya osivela ni opwacha wa miyaano, nave eyo yaahikiceenyerya wunnuwa omunepani. Kaapacerya omwaalakhanyaka Piipiliya mahiku oothene ni ohuserya mwawiixeela soolaleeryiwa sahu. Sookhovelela seiya sa ohuserya saahikikhaviherya vancipale ophiyerya wi kaahipatisiwa kirino iyaakha 14, mu 8 a Akostu a 1969.

 Voocharela kimalinhe ohuserya oxikola, kaahikhala pioneero a elukuluku yoothene. Ivinrevo isumana vakhaani, kaahithaamela wi kakhaviherye weiwo waariwo othowa otokweene, o Pielavesi waacamela o Filantiya.

O Pielavesi, kaahimusuwela mwaaraka oosiveliwa, Sirkka. Kaahilekcheya ni mukhalelo awe wa wiiyeviha ni wunnuwa wawe omunepani. Owo haachuna wiivuwiha nave aanahakalala ni ichu sa vakhaani seiyo aareiyeno. Oothene ahu naahikhalano nchuno ntokweene na omurumeela Yehova moomalela, moohipwacha murici vyakala wa mmarehereryo. Naahipaka othela wahu mu 23 a Marsu a 1974. Ohiya oteteiwa opuha othela wahu, naahicimula niyaaka orumeela o Kartula weiwo waariwo othowa otokweene wa alaleeryi a Omwene.

Ovinyerya omapacereryo wa othela wahu, Yehova aahinooniherya wi aahaala okhapelela soothowa sahu soomwiilini wakhala wi nookuha mu nipuro noopacerya Omwene awe. (Mat. 6:33) Ntoko yootakiherya, o Kartula hinaarino ekaaro. Omapacereryo, neeca ni ecika. Nto, mu elukuluku ya murupi wanatepa oriiryawo ciiii. Wi niwerye olaleerya ekulucu etokweene ya muloko, naanachuna okhalano ekaaro. Nyenya hinaawarino ekhorowa wi nthume ekaaro.

Moohiwehererya munnaka amutokotoko aarwa wi anixekurye. Owo mooreera murima aahinivaha ekaaro awe. Owo aahilivela itukumentu. Pahiru naaphwanela omukulelakamo kasolina. Vano naahikhalano ekaaro yeeyo naachunaahu.

Yehova aahooniherya wi aahikhapelela soothowa sahu soomwiilini. Muteko ahu waari pahiru okuha Omwene mu nipuro noopacerya.

Vaavaa naaryaahu mu exikola ya opioneero mu 1978, munna Raimo Kuokkanen, a mmoha a ahusiha aahiniceenyerya orepela epetisau ya exikola ya Kiliyati. Voocharela naahipacerya ohuserya Enkelesi ni yoolakelela ya ophwanelela ntakhara oya oxikola. Nyenya mu 1980, nihaakumve orepela epetisau, naahiwompwa wi narumeele Opeteli yo Filantiya. Mu elukuluku yeele Mapetelita hiyaaphwanela orepela epetisau ya Kiliyati. Nto hiyo naachuna orumeela weiwo Yehova aachuneiyewo, ohiya weiwo hiyaano naachunaahuwo. Ti nthowa nene neemerenryaahu nwopelo. Naamwihiiha, naahititelela ohuserya enkelesi ni yoolakelela yawi wakhala wi noowompwa o kiliyati.

Mu iyaakha vakhaani Nikhuuru Noolamulela naaheemererya wi Mapetelita eweryeke ovolowa mu  exikola ya Kiliyati. Mu elukuluku ene yeele hiyaano naahirepela ipetisau wi niye oxikola. Tahi wi naamuhisiveliwa ni muteko wa Opeteli. Chiryene hiyaari yeeyo! Mweeparipari hiyaano naachuna wiiveleela wi nrumeele weiwo waariwo othowa otokwene waakanle wi noheemereryiwa. Naahiwoompwa wi navolowe mu eturma 79 ya exikola ya Kiliyati mu Setempuru a 1985. Naahiwoompwa wi niye o Kolombiya.

Vaavaa naaphinyaahu o Kolombiya, naahiwompwa wi narumeeleke Opeteli. Kaahipaka owetha waka woothene wi kiikhovelelihe mmuteko wa Opeteli, nave evinrevo eyaakha emoha kaahiveka wi epakiwe matorokelo wa muteko. Ela yaari ekwahaaka yoopacerya ni yookuchula mu okumi aka weerano yeela. Voocharela, naahiwompwa ntoko mamisiyonaario wi n’ye epooma yo Neila, mu etepartamento yo Huila.

Ovinyerya khalai kinnasiveliwa ni muteko woolaleerya. Vaavaa kaaryaaka pioneero meekhaaka o Finlantiya, vakina vaya kaanapacerya olaleerya wooxiixelo ophiyerya oxekuwa. Kimanle othelana ni mwaaraka Sirkka naanamaliha nihiku nantero mmuteko woolaleerya. Vaavaa naalapaahu mu ikulucu soorakameela, ikwaha ikina naanakona mukaaroni mwahu. Ela yaananeeriha ovukulela elukuluku ya mukwaha nave tho yaananikhaviherya opacerya muteko elukuluku yaphaama mu nihiku noocharela.

Ntoko mamisiyonaario, wanaawiili tho naahikhalano ohakalala omohamoha yoowo naaryaahuno khalai wa mmuteko woolaleerya. Muloko ahu waahunnuwa, nave anna ni arokora o Kolombiya yaari ancicimiho, oosivela ni oopwacha.

Waacamela weiwo naarumeelaahuwo o Neiva, haawaariwo Namoona a Yehova naari mano mmoharu. Miyaano kaahikhala awuukhuwaxa vooloca sa mukhalelo michaka saphaama saahaalaaya ophiya mmapuro yaale. Nto, wa nthowa na owanawana wa achu, mapuro yaale hiyaari ookhapeleleya wa anamarwa. Mwawiihiiha, kaahivekela wa Yehova kivekaka wi muchu mmoha a ipooma seiya akhale Namoona. Kaahuupuwela, waakhanle wooweryeya wi muchu a ipooma seiye oorwa anakhala o Neiva wenno wi ahuserye eparipari nave apatisiwe. Kaahivekela tho wi amannle opatisiwa, aye vahoolo mmakupa oomunepani nave akookele mu epooma awe wi alaleeryeke. Miyaano kaaphwanela osuwela wi Yehova aakhalano mukhalelo waphaama wa orehererya nikacamiho nenle okipwaha miyaano.

Moohilekela, kaahipaceriha yoohuserya ya Piipiliya ni mmiravo awiicaniwa Fernando González. Owo aakhala o Alxesira, emoha wa ipooma seiyo yaahiryaayawo Anamoona a Yehova. Fernando aanapaka mukwaha opwaha akilometru 50 wi alape o Neiva. Owo aaniirehererya phaama wa yoohuserya tiyoohuserya nave mwawaakuveya aanaphiya mmithukumano soothene. Ovinyerya esemana yoopacerya ya yoohuserya awe, Fernando aanaathukumanya achu akina a mu epooma awe nave aanahusiha wa yeeyo aahuseryeiye mu yoohuserya awe ya Piipiliya.

Fernando aapatisiwa mu Yaneru a 1990, sivinre miyeeri mithanu nammoha ovinyerya vaava aapacenryeiye omuhuserya Piipiliya. Voocharela, owo aakhala piyoneeru ookilaatheya. Nave woona wi o Alxesira, vano aakhalawo Namoona a Yehova mmoha, Epeteli yaahaathanla mapiyoneero avameekhaaya wi eye muceche yoole. Mu Fevereru a 1992, muloko waahitikitheryiwa mu epooma yeele.

 Apwanne Fernando alaleerya pahiru mu epooma awe? Hooye! Amanle othela, owo ni amwaariye yaathamela o São Vicente del Caguán, epooma ekina weiwo yahaariwo Anamoona a Yehova. Weiwo, awo yaahikhaviherya otikitherya muloko. Mu 2002, Fernando aathanliwa okhala ooweherya a ekulucu nave owo ni amwaariye Olga, annatitelela mmuteko yoola ophiyerya olelo.

Ni yaweereya yeela, koohuserya wi ti woochuneyaxa okhala ooluluwanya mmavekelo ahu vooloca sa orummwa ahu ni muteko yoowo onavolowelavo. Yehova onanwerya opaka yeeyo nihinaweryaahu opaka. Opwaha sootehene, muteko wa ohaca ti wawawe, ohiya wawihu.—Mat. 9:38.

Mu 1990 naahithanliwa nikhala ooweherya a ekulucu. Nave nipuro noopacerya naakelaahuwo naari o epooma etokweene, o Pokota. Ela yaahineeriha okhala awuukhuwa woona wi hiyaano hinaakhovelenle okhala mu epooma etokweene ni yawaaciwawo. Miyaano ni amwaraka na achu pure nave hinaano mavyakelo vyakala avameekhaaya. Nyenya, nohoona mukhalelo Yehova aakhwanihenryeiye yeeyo owo olonceiye mu Afilipi 2:13: “Vawi Muluku, ti yoowo onaphara muteko mwa nyuwo, oovahakaani nchuno ni owerya wa weerano yeeyo enamuhakalaliha.”

Voocharela, naahithanliwa wi narumeele ntoko ooweherya ekulucu mukuma wo Metelin, epooma yeele kiloncaaka woopaceryani. Achu a weiwo yaakhovelelaxa opaka sa nlala mu arampha ophiyerya wi awo hiyaapwacha echu vooloca sa yeeyo. Ntoko yootakiherya, nihiku nimoha keecihaka yoohuserya ya Piipiliya, akapuchi yaapacerya oruma vaate va empa yeeyo kaaryaakamo. Miyaano kaahanle vakhaani okona vachayani, nto oohuserya a Piipiliya aatitelela waalakhanya eparakrafo moomaaleleya, ntoko wi hiyaavo yeereya. Vaavaa aamalinheiye waalakhanya, owo aahikiveka nave apwahavo. Mu elukuluku vakhaani, owo aakooka ni anamwane awe eeli nave aaloca moomaaleleya wa miyo ariki: “Mukikhurumuwele, nto kaakele waakuxawo anamwane aka.”

Hiyaano tho noohoolela mikhalelo mikina sawoopiha. Mu ekwaha emoha, nlaleeryaka empa ni empa, mwaaraka aarwa wa miyo achimakaka, oovaka vancipale nave murima ommanlemo. Owo aaloca wi ookhala muchu aachuna omoopela. Kaahikhala awoova. Nyenya voocharela naahisuwela wi muchu owo, mweeparipari, haachuna omoopela Sirkka, nto owo aachuna omoopela mulopwana mukina yoowo aavira vakhiviru vawe.

Moovira wa elukuluku, hiyaano hinoova tho vancipale mukhalelo yoowo wa nlala. Hiyaano naanalipiheya ni ikuru sa Anamoona a Yehova avanipuroni yaawo yaahoolela mikhalelo soolikana ni seiya ni ikina soopwahaxa. Naahiphiyerya makuchuwelo awi, waakhanle wi Yehova onnaakhaviherya anna, owo tho onanwerya onikhaviherya. Ohiya yeeyoru, ilukuluku soothene naanachariha ikano sa atokweene avanipuroni, naaniikasoopa vancipale nave naanahiya ichu mmatani mwa Yehova.

Nto mweeparipari, mikhalelo mikina hisaari sawoopihaxa hiiha ntoko nuupuwelaahu. Mu ekwaha emoha, kimuxekuryaka muchu mukina, kaahiiwa yeeyo yaakhala ntoko wi yaari athiyana eeli yaanyakula ni yaakhulana mmakupa makina a vaate kaaryaakavo. Miyaano nkaachuna owoona achu yaakhulanaka, nto mwaneene a vaate aakilekecha  wi kiye okintaale wi koone yeeyo yeereya. Wookuchulani, kaahoona wi, “waakhulana” yoole, mweeparipari, yaari apalame apiili awiichaniwa papakayu yaawo yaatakiherya amwaacamani.

Mu 1997, kaahithanliwa ntoko muhusiha a Exikola ya Arummwa. b Wa miyaano, ilukuluku soothene koona okhala ekari ophwanyeya mu ixikola seiha sa marehereryo a Yehova. Nto miyo nkaantonke waanyiherya mano wi nihiku nimoha kaahaala okhala muhusiha a emoha a ixikola seiha.

Voocharela, kaahirumeela ntoko ooweherya a etistritu. Vaavaa muteko yoola waakwateleliwaaya, kaahikookela orumeela ntoko ooweherya a ekulucu. Vano, opwaha iyaakha 30, kinnahakalala orumeela ntoko muhusiha ni ooweherya a ekulucu. Mirici seiha, sookiruuhela mareeliho mancipale. Nyenya, tahi wi soothene saari sookhweya. Mukihiye wi koothariheleeni phaama ntakhara heeni.

Miyaano kookhalano moonelo woolipa nave ti yeela ekikhavihenrye ohoolela mikhalelo sincipale soovila. Nyenya, mu ikwaha ikina, kaaneererya orehererya miyaha mikina sa mmulokoni akhweya mmukhalelo woolipaxa. Mu ekwaha emoha, kaahiloca ni anna ochuneya waya okhala oosivela ni oophimelela wa akina. Nto vaavaa kaavahaaka ekano yeela, kaalonce mmukhalelo woolipaxa ni mooluluwanyaxa, ophiyerya wi yoomi ene tho kaahiya okhala oosivela ni oophimelela.—Aro. 7:21-23.

Mu ikwaha ikina, kinnakhala ooceecheya wa nthowa na soohesa saka. (Aro. 7:24) Mu ekwaha emoha, kaaphiyerya ovekela wa Yehova kilocaka wi, yaamukhala yaphaama waakhanle wi koohiya muteko wa omissionaariyu ni okookela o Finlantiya. Nto mu nihiku nene nenle, kaahiya omuthukumano. Nave yeeyo kiiwalaaka weiwo yaahikilekecha wi miyo kaaphwanela otitelela mmurici aka ni wiilipixerya ovootha soohesa saka. Kaawuupuwelaka nivekelo nenlo kaapankaaka ni woona mukhalelo Yehova aakhunleiye, kinnakhala ootikhiniheya ophiyerya olelo. Mwawaaceererya, kinnamuthamalela vancipale Yehova nthowa na okhala oopixa murima ni miyaano ni okikhaviherya ovootha sooceecheiha saka.

Sirkka ni miyaano ninnamuthamalela mwawiiseela Yehova wa nthowa na onivaha ekari ya omaliha elukuluku yincipale ya okumi ahu nimurumeelaka yoowo mmuteko wa elukuluku yoothene. Kinnamuthamalela tho Yehova wa nthowa na okivaha muthiyana oororomeleya ni oosivela mu iyaakha soothene seiya.

Moohilekela, kinahaala waakhwaniha iyaakha 70 onahala ochuneya ohiya muteko wa okhala muhusiha ni ooweherya a ekulucu. Nyenya, ela henakiceecheiha naari mano vakhaani. Moosuwela ntakhara heeni? Nthowa nawi, kinnaroromela ni murima woothene wi, wa Yehova, echu eri yoochuneya ori omurumeela yoowo mwa wiiyeviha ni murima woosareya osivela ni othamalela. (Mik. 6:8; Mar 12:32-34) Ti yeeyo enamuruuhela ncicimiho Yehova.

Kaawuupuwelaka mirici seiyo kaaryaakano, kinniiwexexa wi, nkaawaakhenle seiyo nthowa nawi kaari aphaama waapwaha akina naari nthowa na okhalano mavyakelo avameekhaaya. Hooye, tahi yeeyo! Moohiyana, Yehova aakivaha mirici seiha wa nthowa na mahala awe matokweene. Owo aakivaha mirici seiha moohipwacha sooceecheiha saka. Miyaano koosuwela wi kiwenrye okhwaaniherya mirici soothene seiha pahiru nnikhaviheryo na Yehova. Mmukhalelo yoola, sooceecheiha saka sinnavuwiha ikuru sa Muluku.—2 Ako. 12:9.