Onitlakat ipan 1955, niman nikinpiya omemej nokniuan akin más iuejueyimej. Oninoskalti ne Finlandia ipan costa sur, kampa aman kixmatij ken kalpan de Vantaa.

Nonan onoapolakti achto nitlakatiskia. San ika, notaj xkikauiliaya matechmachti Biblia niman matechuika tlanechikoltin. Ika yejon, nonan san techmachtiaya ijkuak notaj xnemiya tochan.

Ijkuak nipitentsin katka, onikijto ika niknekiya niktekichiuilis Jehová. Ijkuak nikpiaya chikome xiuitl, nomaestra okualan pampa xoniknek nijkuas verilättyjä (yejuin kichijchiuaj ken se tlaxkajli niman kitlaliliaj yestli). Nomaestra kinekiya nechkualtis niman onechkamatlapoj, san ika, nejua onikmapeuili niman oniktlajkalili.

Ijkuak nikpiaya 12 xiuitl, notaj omik. Kuakon, opeuj niauj tlanechikoltin niman tokniuan melak onechpaleuijkej, yejon okichiuj más manikneki maninomachti. Opeuj mojmostla nikamapoua Biblia niman kuajli ninomachtiaya toamatlajkuiloluan. Nochi yejuin melak onechpaleui, niman ouel oninoapolakti ipan 8 de agosto de 1969, ijkuak nikpiaya 14 xiuitl.

Ijkuak onikis escuela, oninochiuj precursor regular. Sakin, onichantito Pielavesi para más nitenojnotsas, yejuin kalpan nisiuj nokauaya itlajkotian Finlandia.

 Ne Pielavesi, onikixmat nosiuatsin Sirkka. Nejua melak onikuelitak pampa yejua melak kitlasojtlaya Jehová niman melak yolyemanki katka. Noijki, yejua xkinekiya kipiyas miyek tlemach. Tiomemej tiknekiyaj chikauak tiktekichiuiliskej Jehová maski san kanon. Otonamiktijkej ipan 23 de marzo de 1974. Sakin ika otonamiktijkej, xotipaxalotoj, yej otitlapaleuitoj Karttula, kampa xmás nemiyaj tokniuan.

Desde ijkuak otonamiktijkej, yotikitakej kenijki Jehová nochipa yotechmakak tlen techpoloua pampa chikauak tiktekichiuilijtinemij (Mat. 6:33). Nikneki nimechijlis tlen topan opanok ijkuak tinemiyaj ne Karttula. Tejuamej san tikistinemiyaj ipan bicicleta pampa xtikpiayaj carro. San ika, xueliya tikistinemiyaj ipan tobicicleta ijkuak melak seua katka. Noijki, seki kalpamej melak uejka nokauayaj niman san ueliskia tajsiskiaj ipan carro, san ika, xtikpiayaj tomin para tijkouaskej.

Se tonajli, san otikitakej oyejkok se nokniuj. Yejua otechijli ika techtlayokoliskia icarro niman ika yokitlaxtlajka iseguro carro, san nonekiya tiktlalilijtiaskej gasolina. ¡Aman itikpiayaj tocarro!

Jehová kuajli otechititi ika nochipa techmakaskia tlen techpoloskia tla chikauak tiktekichiuiliayaj.

Ipan 1978, ijkuak tinemiyaj ipan Tlamachtijli tlen kiselia se Precursor, tokniuj Raimo Kuokkanen, a akin techmachtijtoya, otechijli matiktemiltikan se solicitud para tiaskej Galaad. Ika yejon, opeuj tomajmachtiaj inglés niman ijkon ueliskia tiaskej. San ika, xkeman otiktemiltijkej solicitud pampa ipan 1980 otechnotskej matitlapaleuitij sucursal de Finlandia. Ijkuakon, akin nemiyaj Betel xueliyaj kitemiltiayaj solicitud para yaskej Galaad. Tejuamej tiknektoyaj tiktekichiuiliskej Jehová maski san kanon, ika yejon, otiknejkej tokauaskej Betel. San ika, ok tomajmachtijtoyaj inglés para tla kemantika ueliya tiktemiltiayaj se solicitud para Galaad.

Seki xiujtin sakin, Grupo akin Tlayekana ipan nochi tlanechikoltin, okijto ika betelitas ueliskiaj yaskiaj Galaad. Kuakon, nimantsin otiktitlankej tosolicitud. Maski melak tipakiyaj tinemiskej  Betel, noijki tiknekiyaj tiaskej kampa más ueliskia titlapaleuiskiaj. Otiajkej ipan iTlamachtil Galaad número 79. Niman ipan septiembre de 1985, otitlankej ika tomachtiaj niman otechtitlankej Colombia.

Otechtitlankej isucursal Colombia. Onikyejyeko kuajli nikchiuas notekiyo, san ika, ijkuak opanok se xiuitl, oniknemili ika nonekiya matechpatlakan. Kuakon, onikteijli matechpatlakan, xkeman ijkon nikchiuaya niman xkeman oksejpa ijkon onikchiuj. Kuakon, otechtitlankej ken misioneros ne Neiva tlen nokauaya Huila.

Nejua melak nikuelita nitenojnotsas. Ijkuak niprecursor katka ne Finlandia niman xninonamiktiaya, kemantika nipeuaya nitenojnotsaya san kualkantsin niman nitlamiya hasta ijkuak itlayoua. Niman ijkuak kemach oninonamikti, Sirkka niman nejua tisetonalouayaj titenojnotsayaj. Ijkuak uejka tontenojnotsayaj, kemantika tikochiyaj ipan tocarro niman ijkon san kualkantsin tipeuayaj titenojnotsayaj.

Melak techyolpaktiaya oksejpa chikauak titenojnotsaskej. Ipan tlanechikojli kampa titlapaleuijtoyaj, opeuj más miyekej nosentlaliaj, niman tokniuan melak tetlakaitayaj, tetlasojtlayaj niman tetlasojkamachiliayaj.

Nisiuj Neiva onkatkaj kalpantsitsintin kampa nion se xnemiya iteixpantijkauj Jehová. Ompa melak xkuajli tlen nochiuaya niman akin xchanejkej katkaj xueliyaj ompa yayaj. ¿Kenijki ueliskia kinnojnotsaskej akin ompa chantiyaj? Nochipa yejon niknemilijtoya. Ika yejon, opeuj niknotsa Jehová niman nikijliaya ika maski san se akin ualeuaya ipan yejon kalpantsitsintin niman chanti Neiva makineki manomachti Biblia, manoapolakti, makichikaua itlaneltok niman sakin manokuepa kampa ualeua niman ompa matenojnotsa. Yejon tlen melak niknekiya mapano, san ika, Jehová más kuajli ken yokinemilijka kichiuas.

Opeuj nikmachtia se telpochtli akin itoka Fernando González. Yejua chantiya ne Algeciras, kampa nion se xnemiya iteixpantijkauj Jehová. Yejua ontekitiya nochi semanas ne Neiva, tlen nokauaya ipantsin 50 kilómetros. Yejua melak kuajli nomachtiaya tlen tomachtiskiaj, niman ipan kachtopa semana ijkuak opeuj nomachtia, nimantsin opeuj yauj tlanechikoltin. Noijki, nimantsin opeuj kinsentlalia ichanikniuan niman opeuj kinmachtia tlen nomachtijtoya itech Biblia.

Ipan enero de 1990, Fernando onoapolakti maski san kuikaya chikuasen metstli ika nomachtijtoya, niman nimantsin onochiuj precursor regular. Sucursal ouel okintitlan precursores especiales ne Algeciras pampa aman ompa inemiya se iteixpantijkauj Jehová. Niman ipan febrero de 1992, onochiuj se tlanechikojli.

San ika, Fernando xonokauj Algeciras. Ijkuak ononamikti, yejua niman isiuatsin, Olga, ochantitoj ipan se kalpan tlen itoka San Vicente del Caguán, kampa noijki xnemiyaj iteixpantijkauan Jehová. Ompa otlapaleuijkej para maonia se tlanechikojli. Niman ipan 2002, okititlankej ken tlayekanketl ipan circuito, niman hasta aman ijkon tlapaleuijtokej.

 Yejuin onechmachti ika melak noneki matikijlikan Jehová tlenon tiknekij makichiua kampa tiktekichiuilijtokej. Yejua ueli kichiua tlen tejuamej xueli tikchiuaj. Matikilnamikikan ika Jehová yejua akin pixka niman tejuamej san tikpaleuiyaj (Mat. 9:38).

Ipan 1990, onechtitlankej ken tlayekanketl ipan circuito ne Bogotá. Nosiuauj Sirkka niman nejua xkeman otiknemilijkej tla techmakaskiaj yejuin tekitl niman melak tomojtiayaj tla xkuajli otikchiujkej totekiyo. Noijki, xtomatiyaj tichantiskej ipan se ueyi kalpan. San ika, Jehová okichiuj tlen kijtoua Filipenses 2:13: “Yejua kichiua para xnekikan niman xchiuakan on tlen yejua kineki”.

Sakin, otechijlijkej ika aman titetlajpaloskiaj Medellín. Ken yonimechijlijka, ompa melak tlatemojmojtijkan katka. Akin ompa chantiyaj yonomatkaj kitaskej tlen melak xkuajli niman xok nomojtiayaj. Sejpatipan, nitemachtijtoya niman opeuj nomojmotlalo. Nejua ininotlajkaliskia ipan tlajli, san ika, akin nikmachtijtoya nion achijtsin xonomojti pampa hasta xokikajkauj ika tlaamapoujtoya. Ijkuak otlan tlaamapoua, onechijli achijtsin manikchia. Yejua okis niman sakin san onikontak ika kinuajuikaya ikoneuan niman nesiya ika nion xnomojtiayaj, yejua onechijli: “Xnechtlapopolui, nonekiya nikonmonanas nokoneuan”.

San ika, xsan yejon tlen otikixnamijkej. Sejpatipan, ijkuak titenojnotstinemiyaj, nosiuatsin onotlalo kampa nejua ninemiya niman melak nomojtijtiaya hasta yoistayaka. Yejua okinemili ika kinekiyaj kimojmotlaskej niman nejua noijki onechmojti. San ika, sakin otikitakej ika xnosiuatsin kinekiyaj kimojmotlaskej, yej kinekiyaj kimojmotlaskej se tlakatl akin inakastlan panotiaya.

Sakin otomatkej tikitaskej tlen xkuajli panouaya. Techmojkatlachialtiaya kenijki tokniuan tlaxikouayaj maski kitayaj tlen melak xkuajli. Niman otikitakej ika tla Jehová kinpaleuiaya, yejua noijki techpaleuiskia. Nochipa tikchiuayaj tlen tlayekankej techijliayaj niman melak totlajpiayaj. Noijki, nochipa tiktlajtlaniliayaj Jehová matechpaleui.

San ika, xnochipa nochiuaya tlen xkuajli ijkon ken tiknemiliayaj. Nikilnamiki ika sejpatipan ijkuak ninemiya techan, onijkak ika kiyauak nokualanijtoyaj niman notsajtsilijtoyaj omemej siuamej. Nejua xniknekiya nontlachias kampa nokualanijtoyaj, san ika, akin chantiya ipan yejon kajli onechijli manontlachia. ¡Onikitak ika akin tsajtsitoyaj katkaj omemej pericos! Yejuamej kijtojtoyaj tlen yokinkakilijkaj akin ompa nisiuj chantiyaj.

Ipan 1997, onechijlijkej manitemachti ipan Escuela de Entrenamiento Ministerial. b Nochipa onikuelitak nias ipan yejuin tlamachtijli. San ika, xkeman oniknemili tla ajsiskia se tonajli ijkuak nejua nitemachtiskia ipan yejon Escuela.

 Sakin, onitlapaleui ken tlayekanketl ipan distrito. San ika, ijkuak okikixtijkej yejon, oksejpa onitlapaleui ken tlayekanketl ipan circuito. Inikuika ipantsin 30 xiuitl ken tlayekanketl ipan circuito niman ika nitemachtia ipan tlamachtiltin. Melak kualtsin tlen nopan yopanok pampa ijkin nitlapaleuiya. San ika, kemantika noijki xkuajli ninomachiliani. Manimechijli tleka ijkon nikijtoua.

Nejua ijkuak itlaj nikijtoua, nikneki ijkon manochiua, niman yejon yonechpaleui manikxiko miyek tlemach tlen ouijtika. San ika, kemantika nikinmajuaya sekimej tokniuan ipan tlanechikoltin pampa niknekiya nochi kuajli manochiua. Niman kemantika chikauak nikimijliaya tokniuan ika nonekiya tetlasojtlaskej niman teasikamatiskej, san ika, nejua xnikimititijtoya ika nikintlasojtlaya niman nikinmasikamatiya (Rom. 7:​21-23).

Kemantika melak xkuajli ninomachilia pampa melak ninopopoloua (Rom. 7:24). Sejpatipan, melak oninajman niman onikijli Jehová ika más kuajli yeskia tla xok nimisionero niman tla ninokuepaya Finlandia. San ika, yejon tonajli otiajkej tlanechikojli niman ompa okijtojkej tlen onechpaleui manikita ika noneki nitlaxikos niman ninokojtilis ninopatlas. Xkeman nikilkauas yejon tonajli pampa ijkuakon onikmachili kentla Jehová nechijlijtoskia yejon. Noijki melak niktlasojkamachilia Jehová pampa melak yonechpaleui maninopatla.

Sirkka niman nejua melak tiktlasojkamachiliaj Jehová pampa yotechkauili chikauak matiktekichiuilikan. Noijki melak niktlasojkamachilia Jehová pampa onechmakak se nosiuatsin akin melak nechtlasojtla niman yonechpaleui nochi yejuin xiujtin.

Sa achijtsin poliui ijkuak nikpiyas 70 xiuitl. Ijkuakon, xok nitlayekanketl yes ipan circuito niman xok nitemachtis ipan tlamachtiltin. San ika, yejon xnechajmana pampa kuajli nikmatstika ika para tikueyiteneuaskej Jehová xnoneki tikpiyaskej se ueyi tekitl ipan ikalpan, yej más noneki matiktekichiuilikan ika yolyemanilistli niman matikueyiteneuakan pampa tiktlasojtlaj niman tiktlasojkamachiliaj nochi tlen yejua yotechmakak (Miq. 6:8; Mar. 12:​32-34).

Melak miyek tekitl yonikchiuj ipan ikalpan Jehová. San ika, yonikitak ika xnechmakayaj tekitl tla pampa nejua melak niueliya xijkon ken oksekimej. Maski xnechnamikiya nikpiyas se ueyi tekitl, Jehová nochipa onechmakak pampa melak nechtlasojtla; niman tla yejua xnechpaleuiskia, xkeman ueliskia nikchiuas itekiyo. Ikojtilis toTajtsin yonoteititi ijkuak xnikojtik (2 Cor. 12:9).