Tumbu ndraʼo me döfi 1955. Yaʼo ziakhi ba so darua gaʼagu ono matua. Teʼebuaʼö ndraʼo ba mbanua nifotöi Vantaa iadaʼa, sahatö ba pantai selatan Finlandia.

Tebayagö idanö mamagu tobali Samaduhuʼö Yehowa mato hauga fakhe fatua lö si tumbu ndraʼo. Hizaʼi, fatuwu sibai bapagu ba zindruhu ba lö itehegö na ifahaʼö ndraʼaga mamagu ba Zura Niʼamoniʼö mazui na iʼohega ba gangowuloa. Andrö na lö hadöi bapagu ba nomo, ifahaʼö ndraʼaga mamagu dane-dane wamahaʼö si so ba Zura Niʼamoniʼö.

Iʼotarai me iraono ndraʼo, no uhalö gangetula wa lö uröi Yehowa. Duma-dumania, me fitu fakhe ndröfigu, mofönu sibai gurugu ba sekola börö me lö uʼa kue verilättyjä (Kue si no lafaruka do). Andrö wa iferaʼö mbawagu ba izozo faoma kue. Hizaʼi, utimba sendro andrö ba dangania.

Mate bapagu me 12 fakhe ndröfigu. Me no aefa mate ia, awena tola uʼondrasi gangowuloa. Laforomaʼö ira talifusöda ba mbanua niha Keriso wa laʼameʼegö tödö ndraʼo. Daʼö zanolo yaʼo enaʼö ahatödo khö Yehowa. Ibörögö ubaso Zura Niʼamoniʼö ero maʼökhö ba ufahaʼö ndraʼo ba publikasida. Börö me lö tebulö ufalua daʼö ero maʼökhö, tebayagö ndraʼo idanö me 8 Mbaŵa si Walu 1969, me 14 fakhe ndröfigu.

 Me no aefa tamado sekola, ibörögö ulau merintis biasa. Mato hauga migu aefa daʼö, findrado ba mbanua si lö ato sanuriagö, yaʼia daʼö ba Pielavesi, sahatö ba Finlandia.

Ba Pielavesi falukha ndraʼo khö nono alawe sotöi Sirkka, si tobali foʼomogu ba gafuriata. Adöni dödögu khönia börö me iʼokhögö gamuata fangide-ngideʼö ba iʼomasiʼö sibai Yehowa. Lö omasi ia na teʼosambuaʼö dödö niha khönia ba lö iʼalui waʼakayo. Yaʼaga si darua, omasiga mabeʼe zabölö sökhi khö Yehowa ba mafalua noro dödö si no tebeʼe khöma. Mangowalu ndraʼaga me 23 Mbaŵa si Fitu 1974. Moroi na möiga manörö-nörö börö me awena mangowaluga, abölö sökhi möiga ba Karttula, ba mbanua si lö ato sanuriagö.

Iʼotarai me awena mangowaluga, no iforomaʼö Yehowa wa iʼameʼegö tödö zoguna khöma börö me maʼofönaiʼö Wamatörönia. (Mat. 6:33) Duma-dumania, lö motoma me toröiga ba Karttula, ba okafu sibai cuaca ba daʼö. Börö daʼö, enaʼö tola manuriaigö ndraʼaga ba mbanua böʼö, moguna khöma moto. Hizaʼi, lö kefema ba wowöli moto.

Hizaʼi ba zi lö mudöna-döna, möi ba nomoma gaʼagu saʼa. Si fao faʼasökhi dödö, ibeʼe khöma motonia. No ahori ibuʼa asuransinia, hatö böli wanikha nibeʼema. Iʼotarai daʼö, maʼokhögö moto.

Iforomaʼö Yehowa wa iʼonorogö tödö ba wombönökhi soguna khöma. Halöwöma yaʼia daʼö ba wangofönaiʼö Famatörö Lowalangi.

Me no aefa faoga Sekolah Dinas Perintis me döfi 1978, samösa instrukturma sotöi Raimo Kuokkanen a, ifarou ndraʼaga ba wamoʼösi formulir Sekolah Gilead. Ibörögö mafahaʼö ndraʼaga ba li Inggris enaʼö tola faoga ba sekolah andrö. Hizaʼi, me döfi 1980 fatua lö mafaʼoheʼö formulir daʼö, lakaoniga wohalöwö ba gödo ndraha Finlandia. Me luo daʼö, lö latehegö niha Mbetieli wefao ba Sekolah Gilead. Hizaʼi, omasiga na Yehowa zotatugöi hezo mohalöwö ndraʼaga, tenga yaʼaga zotatugöi. Andrö wa matemaʼö wogaoni andrö. Hewaʼae simanö, lö tebulö mafahaʼöga ba li Inggris, ma samuza inötö dania latehegö faoga ba Sekolah Gilead.

Hauga fakhe aefa daʼö, lawaʼö ira Boto Solohe wa tola fao niha Mbetieli ba Sekolah Gilead. Maʼanemaiʼö mafoʼösi formulir daʼö tenga börö wa  lö omuso dödöma ba Mbetieli. Hizaʼi na latehegö khöma, omasiga malulu waʼaurima gofu hadia lala halöwö nibeʼe khöma. Lakaoni ndraʼaga ba Sekolah Gilead aefa daʼö lawisuda ba kelas 79 me baŵa si Siwa 1985. Lafataro ndraʼaga ba Kolombia.

Ba Kolombia, halöwö si oföna sibai nibeʼe khöma yaʼia daʼö mohalöwö ba gödo ndraha. Ba halöwö andre, ufalua wondrege zi sökhi. Hizaʼi, me no döfi mohalöwöga ba gödo ndraha, marasoi wa so zinangea mabulöʼö. Daʼa zi oföna sibai ba waʼaurigu, uʼandrö enaʼö tola lafaböʼöni halöwögu. Aefa daʼö, lafatenge ndraʼaga tobali misionaris ba Neiva, ba mbanua Huila.

Omasido sibai wamalua halöwö fanuriaigö. Me ulau merintis me ono matua ndraʼo ba Finlandia, ulau manuriaigö iʼotarai si hulö wongi irugi tanö owi. Börö me no mangowalu ndraʼaga foʼomogu, faoga wanuriaigö maʼö-maʼökhö. Na aröu mbanua si möi yaʼaga, itaria möröga ba moto. Lö oya ginötö nitiboʼöma ba lala ba alio mabörögö wanuriaigö moluo mahemolunia.

Börö me tobali ndraʼaga utusan injil, ifuli zui marasoi waʼomuso dödö si no irai marasoi ba zilalö. Itugu tedou mbanua niha Keriso si farahu yaʼaga, ba ira talifusö si so ba Kolombia faoma laʼomasiʼö, lafosumange ba laʼameʼegö tödö nawöra.

So ösa mbanua sebua sahatö ba Neiva, banua nifataro yaʼaga, lö hadöi ira Samaduhuʼö Yehowa ba daʼö. Aombö dödögu, hewisa enaʼö tola ofeta duria somuso dödö ba daʼö. Börö me ato ngawawa niha si lö sökhi ba daʼö, ataʼu niha somasi möi ba mbanua andrö. Ulau mangandrö, enaʼö so fazamösa moroi ba mbanua andrö zi tobali Samaduhuʼö Yehowa, hizaʼi moguna ua toröi ia sakali ba Neiva enaʼö ifahaʼö ia ba zindruhu. Aefa daʼö ulau mangandrö, na no aefa tebayagö ia idanö, tobali ia niha saro ba wamati ba ifuli ia ba mbanuania ba manuriaigö ia ba daʼö. Moguna aboto ba dödögu wa ha Yehowa zangila hadia zabölö sökhi.

Lö ara aefa daʼö, ubörögö ufahaʼö zi samösa ono matua ba Zura Niʼamoniʼö sotöi Fernando González. Toröi ia ba Algeciras, banua si lö hadöi Samaduhuʼö Yehowa. Faʼaröu danö nitörö Fernando ero migu na möi ia mohalöwö ba Neiva, arakhagö 50 KM. Ihaogö ifaʼanö ia fatua lö mafalua wamahaʼö ba ibörögö iʼondrasi fefu faosatö gangowuloa. Iʼotarai ba migu siföföna me no ifahaʼö ia, manuriaigö Fernando ba mbanuania ba itutunö hadia zi no ifahaʼö yaʼia.

Tebayagö idanö Fernando me baŵa si Sara 1990, önö waŵa me aefa ifahaʼö ia. Aefa daʼö, tobali ia perintis biasa. Börö me no so samösa Zamaduhuʼö Yehowa ba Algeciras, lawaʼö gödo ndraha wa no tola lafatenge perintis istimewa ba daʼö. Ba me baŵa si Dua 1992, tebörögö tefasindro mbanua niha Keriso ba mbanua andrö.

Hadia ha ba mbanua si toröi yaʼia manuriaigö Fernando? Tenga. Me no aefa mangowalu ia, yaʼia hegöi foʼomonia findra ira ba San Vicente del Caguán, banua si lö hadöi Samaduhuʼö Yehowa. Ba daʼö, labörögö wamasindro banua niha Keriso. Me döfi 2002, lafataro Fernando tobali satua samasui. Yaʼia hegöi foʼomonia sotöi Olga, lö tebulö lahalö halöwö famasui irugi iadaʼa.

 Moroi ba zalua andre, ufahaʼö ndraʼo wa moguna sibai muzara-zara mutötöi ba wangandrö fefu ngawalö zoʼamakhaita ba halöwö ba wamati. Ifalua Yehowa hadia zi tebai tafalua. Börö me yaʼia zokhö mbasitö, tenga yaʼita.—Mat. 9:38.

Me 1990, labeʼe khöma halöwö famasui. Wilayah si oföna sibai maʼondrasi yaʼia daʼö banua sebua nifotöi Bogotá. So khöma waʼataʼu ma lö mofozu ndraʼaga ba wamalua halöwö daʼa. Yaʼo hegöi foʼomogu niha si toʼölö manö ba lö hadöi khöma faʼatua-tua hegöi nekhe-nekhe danga. Ba lö toʼolö toröiga ba mbanua segebua sato niha. Hizaʼi, ifalua mbuʼusa linia Yehowa nisura ba Wilifi 2:​13, ”Lowalangi zamarou tödömi, ibeʼe khömi waʼedöna ba faʼabölö ba wamalua somasi ia.”

Aefa daʼö, tefataro ndraʼaga ba wilayah mbanua Medellín, banua nitötöigu moroi yawa. Niha si toröi ba daʼö, no asese laʼila waʼalösökhi salua ba lala irege lö khöra faʼataʼu saʼae. Duma-dumania, me udöniaʼö wamahaʼö Zura Niʼamoniʼö ba zi sambua omo, ibörögö urongo li wana niha samana awöra föna nomo andrö. Börö waʼataʼugu, atata dölagu irege edöna ufalögudo tou ba zalo hizaʼi lö tokea niha nifahaʼögu andrö, itohugö manö wombaso. Aefa daʼö, me no awai mombaso ia, ilau mangona khögu ba möi ia baero. Mangawuli ia ba fao khönia darua ndraono side-ide ba imane khögu, ”Bologö dödömö he, awena ufaondragö ndraonogu.”

So zalua tanö böʼö sametaʼu yaʼaga. Me möiga manuriaigö ba nomo-omo, ilau fagohi foʼomogu möi ia khögu ba no afusi mbawania. Imane wangumaʼö wa so niha sedöna mamana yaʼia. Tokea ndraʼo. Hizaʼi, ba gafuriata awena aboto ba dödögu wa tenga Sirkka zomasi ifana ira matua andrö, hizaʼi so niha böʼö zanörö singa Sirkka, daʼö zomasi ia ifana.

Itugu ara, itugu toʼölö manö ndraʼaga na marongo alua waʼalösökhi. Ira talifusöda ba mbanua andrö, lö awuwu ira ba wanaögö salua simane daʼö hegöi abula dödö sabölö ebua moroi ba daʼö. Sindruhu-ndruhu teʼabölöʼö ndraʼaga ba duma-duma niforomaʼöra. Marasoi wa hasambalö itolo ndraʼaga Yehowa simane me itolo ira. Baero daʼö, maforege göi ba woloʼö fanuturu lala moroi khö ndra satua sokubaloi, maʼalui lala ba wolumöʼö faʼaurima, ba sindruhu-ndruhu maʼodaligö Yehowa.

Itaria so zalua ba marasoi wa tola möi famaʼala waʼaurima daʼö, hizaʼi sindruhunia löʼö. Duma-dumania, hulö urongo so darua ndra alawe siʼao föna nomo niha niʼondrasigu ba faoma lawaʼö wehede fangoʼaya. Lö omasido menaʼö ba wamaigi zi faʼudu andrö, hizaʼi iʼandrö khögu sokhö omo ba wamaigi hadia zalua ba newalinia. Sindruhunia ”si faʼudu” andrö dombua wofo beo samadumaisi si faola omo si no irai faʼudu.

Me döfi 1997, tefataro ndraʼo tobali instruktur Sekolah Pelatihan Pelayanan. b Uʼameʼegö tödö sibai ginötö si no latehegö khögu wefao ba ngawalö sekolah teokratis, hizaʼi lö irai ukhalaigö wa tola tobali ndraʼö samahaʼö ba zi sambua sekolah andrö.

 Aefa daʼö, labeʼe khögu halöwö tobali pengawas distrik. Me so wombulöʼö wa lö hadöi saʼae pengawas distrik, lafuli labeʼe khögu halöwö tobali satua samasui. Börö daʼö, töra 30 fakhe uhalö halöwö tobali instruktur hegöi satua samasui. Halöwö andre zangaʼasogö khögu faʼowua-wua dödö. Hizaʼi, lö aoha ba wamalua daʼö fefu. Daʼututunö.

Yaʼo niha si lö alio tebulö tödö ba gangetula si no uhalö. Itaria moguna daʼö ba ginötö alua khögu gabula dödö. Hizaʼi itaria fatandro sibai ndraʼo na so gabula dödö niʼasiwaigu ba mbanua niha Keriso. Hauga kali, terou sibai dödögu ba woʼamenesi ira talifusöda enaʼö abölö laʼomasiʼö nawöra ba laʼangeragö nirasoi niha böʼö. Hizaʼi, yaʼo samösa lö niforomaʼögu gamuata daʼö ba ginötö ubeʼe mene-mene andrö.—Ro. 7:​21-23.

Itaria urasoi waʼide-ide dödö, ero na so zi lö mofozu ufalua. (Ro. 7:24) Samuza inötö ufatunö khö Yehowa ba wangandrö, te abölö sökhi na ubato halöwö tobali misionaris ba ufulido ba Finlandia. Bonginia, uʼondrasi gangowuloa. Hadia nirongogu ba gangowuloa möi famaduhuʼö ba dödögu wa moguna lö uböhöli wamalua halöwö si no tebeʼe khögu ba lö uröi halöwö andrö hewaʼae na lö moʼahonoa ndraʼo. Irugi iadaʼa, tofakha sibai ba dödögu börö me ifondrondrongo wangandrögu Yehowa. Ba uʼameʼegö tödö sibai hewisa wanolo Yehowa ndraʼo ba wolawa falömoʼahonoagu.

Sirkka hegöi yaʼo, maʼandrö sibai saohagölö khö Yehowa börö me no itehegö khöma wangai halöwö safönu inötö. Uʼandrö göi saohagölö khö Yehowa börö me ibeʼe khögu woʼomo ira alawe safönu faʼomasi ba si lö faröi.

Arakhagö 70 fakhe ndröfigu ba lö ara tö aheta khögu halöwö tobali instruktur hegöi satua samasui. Hewaʼae simanö, lö ide-ide dödögu. Hadia mbörö? Börö me faduhu sibai dödögu wa sabölö moguna yaʼia daʼö famosumange Yehowa si fao fangide-ngideʼö ba tasuno ia soroi ba dödö si fao faʼomasi hegöi fangandrö saohagölö. (Mik. 6:8; Mrk. 12:​32-34) Lö balazi tatema halöwö si tohude awena tola tafosumange Yehowa.

Na ifuli itörö tödögu ngawalö halöwö si no irai utema, aboto ba dödögu wa tebeʼe khögu halöwö andrö tenga börö me abölö tohude ndraʼo moroi ba niha böʼö mazui börö me so waʼatua-tua hegöi nekhe-nekhe danga niʼokhögögu. Tenga börö daʼö! Hizaʼi, ibeʼe fefu halöwö andrö Yehowa börö waʼomasinia si tenga sinangea utema. Ifaduhusi tödö ndraʼo ba ibeʼe khögu noro dödö hewaʼae na lö moʼahonoa ndraʼo. Aboto göi ba dödögu wa tola ufalua fefu halöwö andrö börö wanolo moroi khö Yehowa. Möi fangabölögu waʼabölö Lowalangi andrö.—2 Ko. 12:9.