Ngabelethwa ngo-1955, ngingomncani emadodaneni amathathu. Ngakhulela hlanu kweligu elise sewula ye-Finland, edorobheni elibizwa ngokuthi yi-Vantaa.

Umma wabhajadiswa waba nguFakazi kaJehova iminyaka embalwa ngaphambi kobana ngibelethwe. Kodwana ubaba bekangalifuni iqiniso, yeke bekangamvumeli umma bona afunde nathi namkha akhambe nathi esifundweni. Nanyana kunjalo, bekasifundisa iqiniso ubaba nakangekho.

Kusekela ngisese mntwana bengifuna ukulalela uJehova. Ngokwesibonelo, ngelinye ilanga nangineminyaka elikhomba, utitjherami wangikwatela ngebanga lokuthi bengingafuni ukudla i-verilättyjä (Ipanakuke leengazi lesi-Finnish). Ngesandla sinye wagandelela umhlathami alinga ukuvula umlomami, ngesinye isandla aphethe iforogo enesiqetjhana sepanakuke afuna ukulifaka emlonyenami. Ngabetha iforogo ebeyisesandleni sakhe.

Nangineminyaka eli-12, ubaba wahlongakala. Ngemva kwalokho, besele ngikghona ukuya esifundweni. Abafowethu bebangitjheja begodu lokho kwangenza ngathuthuka etjhebiswaneni lami noJehova. Ngathoma ukufunda iBhayibheli neencwadi zethu ezisekelwe eBhayibhelini qobe lilanga. Indlela le yokufunda ngiyo eyangenza  ngabhajadiswa nangineminyaka eli-14, ngo-Arhostosi 8, 1969.

Nangiqeda isikolo, ngathoma ukuphayona. Ngemva kweenyanga ezimbalwa, ngafudukela lapha kunetlhogeko yabatjhumayeli khona, e-Pielavesi eduze nekaba ye-Finland.

Ngahlangana nodade obekazokuba mkami engimthandako u-Sirkka e-Pielavesi. Into engayithandako ngaye kukuthi bekathobekile begodu athanda uZimu. Bekangafuni ukuqalwa njengomuntu oqakatheke khulu namkha ukunjinga. Sobabili besifuna ukulotjha uJehova ngendlela esingakghona ngayo, kunganandaba ukuthi silotjha kuphi. Satjhada ngoMatjhi 23, 1974. Kunokobana siye e-honeymoon, saya e-Karttula, lapha bekunetlhogeko ekulu yabatjhumayeli bomBuso khona.

Kusukela ekuthomeni komtjhadwethu, uJehova usitjengisile ukuthi uzositlhogomela nasibeka umBuso qangi. (Mat. 6:33) Ngokwesibonelo, e-Karttula besinganayo ikoloyi. Ekuthomeni besikhamba ngetsikiri. Ebusika bekuba makhaza khulu. Nasizakutjhumayela isimu ekulu yebandla lethu, besitlhoga ikoloyi. Kodwana besinganayo imali yokuyithenga.

Singakalindeli, umfowethu wasivakatjhela. Wasiboleka ikoloyakhe. I-intjhorense yekoloyi besele ibhadelwe. Bekufuze sithenge kwaphela i-petrol. Ngemva kwalokho, besele sinekoloyi esiyitlhogako.

UJehova wasitjengisa ukuthi nguye ozosinikela izinto esizitlhogako. Thina umsebenzethu bekukuthi eze qangi ekuphileni kwethu.

Njengombana besiye esikolweni samaphayona ngo-1978, omunye obekasifundisa u-Raimo Kuokkanen, a wasikhuthaza bona sifake isibawo sokuya esikolweni se-Gilead. Sathoma ukufunda isiNgisi ngomnqopho wokuya esikolweneso. Kodwana ngo-1980, ngaphambi kokuthi sifake isibawo, samenyelwa ukuyokusebenza egatjeni le-Finland. Ngesikhatheso, abasebenza e-Bethel bebangakavunyelwa ukufaka isibawo sokuya e-Gilead. Besifuna ukuya lapha uJehova afuna khona, ingasi lapha ekufuna khona thina. Yeke sasamukela isimemo. Nanyana kunjalo, saragela phambili sifunda isiNgisi ukwenzela bona nakungavela ithuba lokuya e-Gilead, sifake isibawo.

 Ngemva kweminyaka embalwa, isiHlopha esiBusako savumela nalabo abasebenza e-Bethel bona bangafaka iimbawo zokuya e-Gilead. Safaka isibawo khonokho kodwana ingasi ngombana besingakathabi e-Bethel. Besithabile tle! Besifuna ukusebenza lapha kunetlhogeko ekulu khona nange sifaneleka. Samukelwa e-Gilead begodu saphothula iimfundo zethu etlasini lama-79 ngoSeptemba 1985. Sathunyelwa ukuyokusebenza e-Colombia.

Nasifika e-Colombia, besabelwe ukuyokusebenza e-ofisini legatja. Ngalinga ukwenza koke okusemandlenami ukwenza isabelo ebenginikelwe sona kodwana ngemva komnyaka egatjeni, sazizwa ngasuthi sitlhoga ukwenza umsebenzi ohlukileko. Bekukokuthoma nokokugcina ekuphileni kwami ngibawa ukwenza isabelo esihlukileko. Sabelwa ukuthi siyokuba ziinthunywa zevangeli, edorobheni le-Neiva emnyangweni we-Huila.

Kusukela kade bengikuthanda ukutjhumayela. Nangisese liphayona elingakatjhadi e-Finland, bengithoma ukutjhumayela ekuseni khulu ngiqede ebusuku. Nasiqeda ukutjhada sino-Sirkka, besitjhumayela ilanga loke. Nasitjhumayele esimini ekude, ngasikhathi besilala ekoloyinethu. Lokho bekuphungula isikhathi esisiqeda endleleni begodu bekusivumela ukuthi sithome kusese sekuseni ngelanga elilandelako.

Njengombana besele siziinthunywa zevangeli, sazizwa sikhuthazeke khulu njengombana bekunjalo nasithoma ukusebenzela uJehova. Ibandla lethu lakhula begodu abafowethu nabodadwethu be-Colombia bebahlonipha, banethando begodu bathokoza.

Eduze nalapha besabelwe khona e-Neiva bekunamadorobha anganaboFakazi. Bengitshwenyekile ukuthi iindaba ezimnandi zizokufika njani eendawenezo. Kodwana ngebanga lezipi zamavukelambuso, iindawo ezinjenga lezo bezingakaphephi nawungasi mumuntu walapho. Ngathandazela ukuthi kwanga kungaba nomuntu ohlala emadorobheni lawo ongaba nguFakazi. Ngacabanga ukuthi umuntu loyo kufuze eze azokuhlala e-Neiva bona afunde iqiniso. Ngemva kwalokho, ngathandazela ukuthi ngokukhamba kwesikhathi, abhajadiswe begodu ithando lakhe ngoJehova nasele lithuthukile abuyele edorobheni lekhabo ayokutjhumayela. UJehova wayisombulula ngendlela ethileko indaba le.

Kungasikade, ngathoma ukufunda iBhayibheli nesokana elibizwa ngokuthi ngu-Fernando González. Bekahlala e-Algeciras, elinye lamadorobha anganaboFakazi. U-Fernando bekakhamba amakhilomitha angaba ma-50 aya emsebenzini e-Neiva. Bekalungiselela kuhle ngaphambi kobana sifunde begodu wathoma ukuya kiyo yoke imihlangano khonokho. Ngeveke athoma ngayo ukufunda, u-Fernando bekabuthelela abanye edorobheni lekhabo abafundise akufunde esifundweni sakhe seBhayibheli.

U-Fernando wabhajadiswa ngoJanabari 1990, ngemva kweenyanga ezisithandathu athome ukufunda. Ngemva kwalokho, waba liphayona  lesikhathi esizeleko. Njengombana besele kunoFakazi munye ohlala e-Algeciras, nje besele kuphephe ngokwaneleko bona i-ofisi legatja lingathumela amaphayona akhethekileko endaweni le. NgoFebherbari 1992, kwathonywa ibandla edorobheneli.

Kghani u-Fernando bekatjhumayela edorobheni lekhabo kwaphela? Awa! Ngemva kokuthi atjhadile, yena nomkakhe bafudukela e-San Vicente del Caguán, elinye idorobha elinganabo aboFakazi. Lapho basiza ekuthomiseni ibandla. Ngo-2002, u-Fernando wabekwa njengomjikelezi, yena nomkakhe u-Olga, baragela phambili nokukhambela amabandla bekube namhlanjesi.

Kilokhu, ngifunde ukuthi kuqakathekile ukuthandaza kuJehova umtjele ngokunqophileko ngezinto ezithinta umsebenzi akunikele wona. UJehova ufuna ukwenza lokho thina esingakghoni ukukwenza. Ngaphezu kwalokho, lesi sivuno sakhe ingasi sethu.—Mat. 9:38.

Ngo-1990 sabelwa ukuthi sikhambele amabandla. Ihlokodorobha yokuthoma esabelwa kiyo, bekuyi-Bogotá. Besisithusa isabelwesi. Mina nomkami sibabantu abavamile begodu asinawo namakghono akhethekileko. Besingakajayeli ukuhlala emadorobheni aphithizelako. Kodwana uJehova wazalisa isithembiso sakhe esikwebeFilipi 2:13 esithi: “UZimu nguye oniqinisako, oninikela kokubili isifiso namandla wokusebenza.”

Ngokukhamba kwesikhathi, sabelwa ukuthi siyokukhambela amabandla, endaweni ebizwa ngokuthi yi-Medellín, idorobha ekhengakhuluma ngalo phambilini. Abantu balapho besele bazijayele izipi ezenzeka endleleni kangangokuthi bezingasabathusi. Ngokwesibonelo, ngelinye ilanga ngiraga isifundo seBhayibheli, bathoma ukudumuzana ngaphandle kwendlu ebengiraga isifundo kiyo. Ngapheze ngawela phasi kodwana umuntu ebengifunda naye waragela phambili afunda isigaba, bekanganavalo. Ngemva kokufunda wabawa ukuya ngaphandle. Ngemva kwesikhatjhana, wabuya nabantwabakhe ababili, ehlise umoya njalo wathi, “Ngilibalela, bekufuze ngiyokuthatha abantwabami.”

Kunezinye godu iinkhathi esazithola sisengozini. Ngelinye ilanga sitjhumayela endlini ngendlu, umkami weza kimi agijima, atshwenyekile tle! Wathi kunomuntu obekamdumuza. Kwangitshwenya khulu lokho. Kodwana ngokukhamba kwesikhathi salemuka ukuthi umuntu lo bekangafuni ukudumuza u-Sirkka, bekafuna ukudumuza indoda ebeyidlula hlanu kwakhe.

Ngokukhamba kwesikhathi inturhu beyingasasithusi kangako. Sakhuthazwa sibindi saboFakazi ebebahlala endaweni le, ebebaqalana nobujamo ebesiqalana nabo nokungaphezu kwalokho. Saphetha ngokuthi nange uJehova abasiza, nathi uzosisiza. Besihlala silalela iseluleko sabadala balapho, sazivikela begodu satjhiyela koke ezandleni zakaJehova.

Kuliqiniso, obunye ubujamo bebungasiyingozi ngendlela ebesicabanga ngayo. Ngelinye ilanga, ngezwa ngasuthi abomma ababili bayaphikisana  ngaphandle. Bengingafuni ukubabona baphikisana kodwana umuntu ebengitjhumayela kuye wathi siye ethurini. Nangilapho ngabona ukuthi “ukuphikisanokho” bekuhlangana neenyoni ezimbili ezibizwa ngokuthi ma-parrots zilingisela abomakhelwana.

Ngo-1997, ngakhethwa ukuthi ngiyokufundisa e-Ministerial Training School. b Bengikuthanda ukuya eenkolweni ezifundisa ngoJehova. Kodwana akhenge ngizicabange ngifundisa kizo.

Ngokukhamba kwesikhathi ngaba mbonisi wesifunda. Ilungiselelwelo nalingasekho, ngabuyela emsebenzini wokukhambela amabandla. Yeke iminyaka engaphezu kwema-30 , bengifundisa begodu ngikhambela amabandla. Izabelwezi zangilethela iimbusiso ezinengi. Kodwana akutjho ukuthi koke bekulula. Akhengihlathulule.

Ngumumuntu onesibindi. Lokho kwangisiza ngaqalana neenkhathi ezibudisi. Kodwana ngezinye iinkhathi benginetjiseko ekulu yokufuna ukulungisa izinto emabandleni. Kobunye ubujamo, ngaluleka abanye ngobukhali bona kufuze bathande abanye begodu bazwisise kodwana kukulapho nami ngitlhoga ubuntu obunjalo khona.—Rom. 7:​21-23.

Ngebanga lokubhalelwa kwami, ngezinye iinkhathi bengizizwa ngidane khulu. (Rom. 7:24) Kwafika lapho ngithandaza khona, ngitjela uJehova bona kungaba kuhle ngingasaba sithunywa sevangeli ngibuyele e-Finland. Mhlokho ebusuku, ngaya esifundweni. Isikhuthazo engasifumanako kukuthi kufuze ngihlale esabelweni sami, ngisebenze budisi ebuthakathakeni bami. Bekube kunamhlanjesi, isangithinta indlela uJehova aphendula ngayo ngokukhanyako umthandazwami. Ukungezelela kilokho, ngithokoza khulu ngendlela enomusa angisize ngayo ngahlula ubuthakathaka bami.

Sino-Sirkka sithokoza khulu ngelungelo lokusebenzela uJehova isikhathi esizeleko, isikhathi eside. Ngithokoza uJehova khulu ngokuthi anginikela umfazi onethando nothembekileko yoke iminyaka le.

Kungasikade ngizokuhlanganisa iminyaka ema-70, angekhe ngisaba yi-field instructor nokukhambela amabandla. Kodwana lokho akungidanisi. Kubayini? Ngikholwa ngokusuka ehliziyweni ukuthi okuthabisa uJehova kukobana simlotjhe ngokuthobeka. Kufuze simlotjhe ngehliziyo ezele ukumthanda nokumthokoza. (Mik. 6:8; Mar. 12:​32-34) Ukuthi sithabise uJehova, akutjho ukuthi kufuze sibe nesabelo esiqakathekileko ehlanganwenakhe.

Nangiqala emva ezabelweni ekhengazithabela, ngiyalemuka ukuthi angikazifumani ngebanga lokuthi ngihlakaniphe khulu namkha nginamakghono aphuma phambili, kunalokho uJehova unginikele izabelwezi ngomusakhe ongakangifaneli. Unginikele zona naphezu kobuthakathaka bami. Ngiyazi nokuthi ngikghone ukwenza izabelwezi ngesizo lakaJehova. Yeke, ukubogaboga kwami kukhanyise amandla kaZimu.—2 Kor. 12:9.