Ke belegwe ka 1955 gomme ke nna wa mafelelo go bašemane ba bararo. Ke goletše kgauswi le lebopo la borwa bja Finland, lefelong leo ga bjale le tsebjago e le toropo ya Vantaa.

Mma o ile a kolobetšwa gore e be yo mongwe wa Dihlatse tša Jehofa mengwaga e sego kae pele ke belegwa. Eupša Tate e be e se Hlatse ya Jehofa e bile o be a sa dumelele Mma gore a re rute Beibele goba a ye le rena dibokeng. Ka gona Mma o be a re ruta ditherešo tša motheo tša Beibele ge Tate a se gona.

Ke ile ka emela leina la Jehofa go tloga ke sa le ngwana. Ka mohlala, ka letšatši le lengwe ge ke be ke na le mengwaga e šupa, morutiši wa ka o ile a galefa kudu ge ke be ke gana go ja dijo tše di bitšwago verilättyjä (e lego Finnish blood pancakes). O ile a leka go bula molomo wa ka gore a tsenye di-pancake tšeo ka foroko. Ke ile ka kgona go kgapha letsogo la gagwe gomme foroko yeo ya wela fase.

Tate o hlokofetše ge ke be ke na le mengwaga e lesomepedi. Ka morago ga moo ke ile ka kgona go ya dibokeng. Bana bešo ka phuthegong ba ile ba mpontšha gore ba a nthata, gomme se se ile sa nthuša gore ke tšwele pele ke gola moyeng. Ke ile ka thoma go bala Beibele letšatši le lengwe le le lengwe le go ithuta ka mo go tseneletšego dikgatišo tša rena tšeo di theilwego Beibeleng. Go dira dilo tše go ile gwa nthuša gore ke kgone  go kolobetšwa ge ke be ke na le mengwaga e lesomenne ka di 8 tša August, 1969.

Gateetee ge ke se no fetša sekolo, ke ile ka thoma go ba mmulamadibogo gomme ka morago ga dibeke tše sego kae, ke ile ka hlankela moo go nago le tlhokagalo kua Pielavesi, e lego motse wa bogare bja Finland.

Ge ke le moo ke ile ka kopana le kgarebe e rategago yeo e ilego ya feleletša e le mosadi wa ka yo a rategago, Sirkka. Ke ile ka mo rata ka ge a be a ikokobeditše e bile a rata Jehofa kudu. O be a sa rate maemo goba dilo tše di bonagalago. Re be re nyaka go dira sohle seo re ka se kgonago gore re hlankele Jehofa, go sa šetšwe ditokelo tša tirelo tšeo re bego re na le tšona. Re nyalane ka di-23 tša March, 1974. Go e na le gore re ye maikhutšong ka morago ga lenyalo, re ile ra ya go hlankela Karttula mo go bego go na le tlhokagalo e kgolo ya Bagoeledi ba Mmušo.

Go tloga ge re be re sa tšwa go nyalana, Jehofa o ile a bontšha gore o tlo re hlokomela ka dilo tšeo re di hlokago gore re phele ge e ba re etiša Mmušo wa gagwe pele. (Mat. 6:33) Ka mohlala, re be re se na koloi ge re be re dula kua Karttula. Re thomile re sepela ka paesekela. Eupša marega a moo a be a tonya kudu. Re be re hloka koloi gore re kgone go ya tšhemong e kgolo ya phuthegong yeo. Eupša re be re se na tšhelete ya go reka koloi.

Buti waka o ile a re etela re sa letela ke moka a re nea koloi ya gagwe. O be a feditše go lefa inšorentshe ya gona. Go be go no nyakega gore rena re tšhele makhura. Re be re hweditše koloi yeo re bego re e hloka.

Jehofa o ile a bontšha gore o a re hlokomela ka go re nea dilo tšeo re di hlokago. Rena re be re swanetše go no etiša Mmušo wa gagwe pele.

Ge re be re le sekolong sa babulamadibogo ka 1978, yo mongwe wa bahlahli ba rena e lego ngwanabo rena Raimo Kuokkanen, a o ile a re kgothaletša gore re dire kgopelo ya go ya Sekolong sa Gilead. Ka gona re ile ra thoma go ithuta Seisemane e le gore re kgone go ya sekolong seo. Lega go le bjalo, ka 1980 pele re ka dira kgopelo yeo, re ile ra laletšwa gore re ye go hlankela Ofising ya Lekala ya kua Finland. Ka nako yeo, bana babo rena ba Bethele, ba be ba ka se kgone go dira kgopelo ya go ya Gilead. Eupša re be re nyaka go hlankela moo Jehofa a rego re ye gona,  e sego moo rena re bego re nyaka go ya gona. Ka gona re ile ra amogela taletšo ya go ya Bethele. Ge re fihla re ile ra tšwela pele re ithuta Seisemane gore ge go ka tšwelela sebaka sa gore re dire kgopelo ya go ya Gilead, re tle re se diriše.

Mengwaga e sego kae ka morago, Sehlopha se Bušago se ile sa bolela gore bana babo rena bao ba lego Bethele le bona ba ka dira kgopelo ya go ya Sekolong sa Gilead. Re ile ra tlatša difomo kapelapela eupša seo se be se sa bolele gore re be re se ra thaba kua Bethele. Re be re no nyaka go hlankela moo go nago le tlhokagalo ge e ba re swanelega. Re ile ra amogelwa kua Gilead gomme ra aloga klaseng ya bo-79 ka September 1985. Re ile ra hwetša kabelo ya go ya Colombia.

Kabelo ya rena ya mathomo kua Colombia e be e le Ofising ya Lekala. Ke ile ka leka go dira sohle seo nka se kgonago kabelong ya ka eupša ka morago ga go fetša ngwaga re le Ofising ya Lekala, ke ile ka kwa gore ke duma go hwetša kabelo e mpsha. E be e le la mathomo e bile e le la mafelelo bophelong bja ka moo ke ilego ka kgopela go newa kabelo e fapanego. Kabelo ya rena ya boromiwa e bile toropong ya Neiva motseng wa Huila.

Ke be ke dula ke thabela go šoma tšhemo. Ge ke be ke sa le mmulamadibogo yo a sego lenyalong kua Finland, ka dinako tše dingwe ke be ke thoma go šoma tšhemo e sa le mesong, gomme ke tšhaiša mantšiboa. Nakong ya ge nna le Sirkka re sa tšwa go nyalana, re be re fetša letšatši ka moka re šoma tšhemo. Ka dinako tše dingwe ge re šoma tšhemo yeo e lego kgole, re be re robala ka koloing. Go dira bjalo go be go re thuša gore re se ke ra fetša nako e ntšhi re le tseleng le gore re kgone go thoma tšhemo e sa le mesong letšatšing le le latelago.

Bjalo ka baromiwa, re ile ra kgona go ba le mafolofolo ao re bego re na le ona mathomong a go šoma tšhemo. Phuthego ya rena e ile ya gola gomme bana babo rena le dikgaetšedi ba kua Colombia ba be ba na le tlhompho, ba na le lerato e bile ba dula ba leboga.

Kgauswi le moo re bego re dula gona go be go na le mafelo ao a bego a se na Dihlatse. Ke be ke ipotšiša gore batho ba moo ba tlo hwetša bjang ditaba tše dibotse. Eupša ka ge go be go na le dintwa tša marabele, go be go sa bolokega gore batho ba sa tšwego mafelong ao ba ye go wona. Ka gona ke ile ka rapelela gore yo mongwe wa batho ba go tšwa lefelong leo e be Hlatse. Ke be ke nagana gore motho yoo o be a swanetše go dula Neiva gore a ithute therešo. Ka gona, ke ile ka rapelela gore ka morago ga gore a ithute therešo ngwanabo rena yoo e be motho yo a godilego moyeng gomme a boele motseng wa gabo gore a bolele ditaba tše dibotse moo. Nkabe ke tsebile gore Jehofa o be a na le leano le le kaone kudu go feta la ka.

Ka morago ga moo, ke ile ka thoma go ithuta Beibele le moswa yo mongwe yo a bitšwago Fernando González. O be a dula Algeciras, e lego le lengwe la mafelo ao a bego a se na Dihlatse. Fernando o be a sepela leeto la dikhilomithara tše fetago tše 50 gore a ye mošomong Neiva. O be a lokišeletša thuto e nngwe le e nngwe gabotse e bile a e ba gona dibokeng ka mehla. Go tloga bekeng ya mathomo ya ge re be re ithuta, Fernando o be a kgobokanya batho ba motseng wa gabo gomme a ba ruta ka seo re ithutilego sona thutong ya gagwe ya Beibele.

 Fernando o kolobeditšwe ka January 1990 e lego dikgwedi tše tshela ka morago ga gore a thome go ithuta. Ka morago ga moo, o ile a ba mmulamadibogo wa ka mehla. Ka ge ga bjale go be go na le Hlatse e tee kua Algeciras, go be go bolokegile gore Ofisi ya Lekala e romele babulamadibogo ba kgethegilego lefelong leo. Go ile gwa hlongwa phuthego toropong yeo ka February 1992.

Fernando ga se a bolela ditaba tše dibotse motseng wa gabo feela. Ka morago ga gore yena le mosadi wa gagwe ba nyalane, ba ile ba hudugela toropong ya San Vicente del Caguán e lego lefelo le lengwe leo le bego le se na Dihlatse. Gona moo ba ile ba thuša gore go hlongwe phuthego. Ka 2002, Fernando o ile a kgethwa gore e be molebeledi wa tikologo gomme yena le mosadi wa gagwe Olga, ba sa dutše ba tšwela pele ka mošomo woo le lehono.

Phihlelo ye e nthušitše go bona gore go bohlokwa go bolela ka go lebanya ge re rapelela dilo tšeo di sepedišanago le kabelo ya rena. Jehofa o dira seo re ka se kgonego go se dira. Re a tseba gore ke yena Mong wa puno.—Mat. 9:38.

Ka 1990 re ile ra newa kabelo ya modiro wa bosepedi. Tikologo ya mathomo yeo re šomilego go yona, e bile toropong ya Bogotá. Kabelo yeo e ile ya re tšhoša kudu. Nna le mosadi wa ka re be re no ba batho feela bao ba tlwaelegilego e bile re be re se ra tlwaela go dula ditoropong tšeo di nago le leemaema. Lega go le bjalo, Jehofa o ile phethagatša seo a se tshepišitšego lengwalong la Bafilipi 2:​13, leo le rego: “Modimo ke yena yo a le fago mafolofolo, a le neago kganyogo le matla a gore le dire dilo tšohle tšeo a di ratago.”

Ka morago, re ile ra abelwa go šoma tikologong ya Medellín, e lego toropo yeo ke boletšego ka yona pejana. Batho ba moo ba be ba tlwaetše dintwa kudu moo di bego di se sa ba tšhoša. Ka mohlala, ka letšatši le lengwe ge ke be ke swere thuto ya Beibele, batho ba ile ba thoma go thuntšhana ka ntle ga ntlo yeo ke bego ke le go yona. Ke be ke tšhogile kudu eupša mong wa ntlo o ile a no tšwela pele a bala serapa a išitše maswafo fase. Ge a fetša go bala, o ile a kgopela go tšwela ka ntle. Ka moragonyana o ile a boa le bana ba babedi gomme a re go nna: “Tshwarelo, ke be ke sa latile bana ba ka.”

Go bile le dinako tše dingwe moo re ilego ra ikhwetša re le kotsing. Ka letšatši le lengwe ge re be re le tšhemong, mosadi wa ka o ile a tla go nna a kitima, a tšhogile kudu e bile a thothomela. O ile a re go be go na le motho yo a bego a nyaka go mo thunya. Seo se ile sa ntšhoša kudu. Eupša ka morago re ile ra lemoga gore monna yoo o be a sa nyake go thunya Sirkka; o be a nyaka go thunya monna o mongwe yo a bego a feta kgauswi le Sirkka.

Ge nako e dutše e eya re ile ra thoma go tlwaela dintwa tša moo. Re ile ra kgothatšwa ke tsela yeo bana babo rena le dikgaetšedi ba moo ba bego ba kgotlelela ka yona ge ba lebeletšana le maemo ao. Re ile ra phetha ka gore ge eba Jehofa a kgona go ba thuša le rena o tla re thuša. Re be re dula re diriša keletšo yeo bagolo ba re neago yona, re itšhireletša gomme re tlogelela dilo tše dingwe go Jehofa.

Maemo a mangwe a be a se kotsi go etša kamoo re bego re nagana ka gona. Ka letšatši le  lengwe, ke ile ka kwa seo e kago ke basadi ba babedi bao ba roganago ka ntle ga motse woo ke bego ke o etetše. Ke be ke sa nyake go bona batho ba elwa, eupša mong wa ntlo o ile a mpitša gore ke tle ke bone seo se bego se direga. Ke itše ge ke tšwela ka ntle, ka hwetša “ngangišano” yeo ge e le gabotse e le gare ga dinonyana tše pedi tšeo di kgonago go ekiša mantšu a batho e lego di parrots, gomme di be di ekiša baagišani.

Ka 1997, ke ile ka kgethwa gore ke be mohlahli Sekolong sa Tlwaetšo sa Bodiredi. b Ke be ke dula ke thabela go ba gona dikolong tša tirelo, eupša ga sa nka ka lora gore nka ba le tokelo e kgolo ya go ruta go tše dingwe tša dikolo tšeo.

Ka morago, ke ile ka hlankela bjalo ka molebeledi wa selete. Ka morago ga gore kabelo yeo e emišwe, ke ile ka boela ka ba molebeledi wa tikologo. Ka gona ka godimo ga mengwaga e 30, ke ile ka thabela ya go ba mohlahli le ya go ba molebeledi wa mosepedi. Dikabelo tše di tlišitše ditšhegofatšo tše dintšhi. Lega go le bjalo, ga se ka mehla go bego go le bonolo go phetha dikabelo tše. E re ke hlalose.

Ke motho yo a sa tšhabego go bolela kamoo ke ikwago ka gona. Se se nthušitše go lebeletšana le maemo a thata. Eupša se se dirile gore ka dinako tše dingwe ke fišege kudu ge ke leka go lokiša mathata ka diphuthegong. Ka dinako tše dingwe, ke be ke gapeletša batho gore ba be le lerato le tekatekano mola nna ka lehlakoreng le lengwe ke sa kgone go bontšha dika tšeo.—Baroma 7:​21-23.

Ka baka la diphošo tša ka, ka dinako tše dingwe ke be ke ikwa ke nyamile kudu. (Baroma 7:24) Ka nako e nngwe ke ile ka rapela Jehofa, ka mmotša gore go kaone gore ke tlogele tirelo ya boromiwa gomme ke boele Finland. Bošegong bjo ke ile ka ya dibokeng. Kgothatšo yeo ke ilego ka e hwetša dibokeng tšeo e ile ya nthuša gore ke dule kabelong ya ka e bile ke šome ka thata go lokiša mafokodi a ka. Go fihlela le lehono le, ke sa kgongwa kudu ke go bona kamoo Jehofa a ilego a araba thapelo ya ka ka gona. Godimo ga moo, ke leboga kudu tsela yeo a nthušitšego ka yona go fenya mafokodi a ka.

Nna le Sirkka re tloga re leboga Jehofa ka baka la tokelo yeo a re neilego yona ya gore re fetše moo e ka bago bophelo bja rena ka moka re le tirelong ya nako e tletšego. Ke leboga le gore Jehofa o nneile mosadi yo lerato le yo a botegago.

E se kgale ke tla be ke na le mengwaga e 70 gomme ke tlo tlogela go hlankela bjalo ka mohlahli le molebeledi wa mosepedi. Eupša se ga se dire gore ke nyame. Ka baka la’ng? Ka gobane ke tloga ke dumela gore seo se kgahlišago Jehofa le go feta ke gore re mo hlankela ka boikokobetšo e bile re mo tumiša ka dipelo tšeo di tletšego lerato le go leboga. (Mika 6:8; Mar. 12:​32-34) Ga re hloke dikabelo tše di kgethegilego go bontšha gore re hlankela Jehofa go tšwa pelong.

Ge ke nagana ka dikabelo tšeo ke bilego le tšona, ke lemoga gore ga se ka di hwetša ka gobane ke le bohlokwa go feta batho ba bangwe goba ka gobane ke na le bokgoni bjo bo fapanego. Go ena le moo, Jehofa o nneile dikabelo tše ka moka ka baka la botho bja gagwe bjo bo bogolo. O nneile dikabelo tše le ge ke be ke na le mafokodi. Ke a tseba gore Jehofa ke yena a nthušitšego go phetha dikabelo tše ka moka. Ruri mafokodi a ka a bonagaditše matla a Modimo.—2 Bakor. 12:9.