Nkazaarwa 1955, kandi niinye muto aha boojo bashatu. Nkakurira haihi n’omwaro gwa bukiizi-bwa-buryo bwa Finland, hati ahari kumanywa nk’orurembo Vantaa.

Maawe akabatizibwa nk’omwe aha Bajurizi ba Yehova emyaka mikye ntakazairwe. Kwonka, tata akaba naahakanisa amazima, kandi atarikwikiriza maawe kutwegyesa nari kututwara omu nteerane z’ekibiina. N’ahabw’ekyo, akaba atwegyesa amazima g’omu Baibuli agarikutandikirwaho tata ku yaabaire aba atariho.

Okuruga omu buto, nkaba ninyorobera Yehova. Nk’eky’okureeberaho, eizooba rimwe obu naabaire nyine emyaka mushanju, omushomesa wangye akaguubwa kubi ku naayangire kurya verilättyjä (obubanda bwa Finland oburimu eshagama). Akankwata amatama n’omukono gumwe kwashamya akanwa kangye, reero yaakoresa ogundi kuteeraho kuntamika akabanda akaabaire kari aha huuma. Nkabaasa kuteera ehuuma ei yaabaire akwaitse yaaragara.

Tata akafa niinye emyaka 12. Bwanyima nkaba nimbaasa kuza omu nteerane. Ab’eishe-emwe omu kibiina bakooreka ngu nibanfaho, kandi ekyo kikampiga kutunguuka omu by’omwoyo. Nkatandika kushoma Baibuli buri izooba n’okwega gye ebitabo by’ekibiina. Entebeekanisa nungi egyo ey’okweyegyesa niyo yaampweraire kubatizibwa Agusto 8, 1969, nyine emyaka 14.

 Ku naaherize kushoma, nkaba payoniya ow’obutwire. Bwanyima ya saabiiti nkye, nkaza kuheereza ahu ababuurizi baabaire nibendwa munonga omuri Pielavesi, aha gati ya Finland.

Omuri Pielavesi, nkabuganayo Sirkka owaaba naija kuba omukazi wangye omukundwa. Nkamukunda ahabw’okugira ngu akaba ari omucureezi, kandi ari omuntu w’eby’omwoyo. Akaba atarikwenda kurangaanwa nari kusherura eby’obutungi. Twembi tukaba twine ekihika ky’okuheereza Yehova, omu muringo ogurikukirayo oburungi, n’obu twakuhairwe bujunaanizibwa ki. Tukaza omu bushwere Maaci 23, 1974. Omu mwanya gw’okuza kuhuumuraho bwanyima y’okugaitwa, tukaza kuheereza omuri Karttula, ahaabaire hariyo ekyetengo ky’amaani ky’ababuurizi b’Obukama.

Kuruga aha kutandika kw’obushwere bwaitu, Yehova ayorekire ngu naija kutureeberera twayebembeza eby’Obukama. (Mat. 6:33) Nk’eky’okureeberaho, obu twabaire turi omuri Karttula, tukaba tutaine motoka. Omu kubanza tukaba nitugyendera aha gaari. Kwonka, omu bwire bw’obutiti obufuki bukaba buba bwingi munonga. Kubaasa kubuurira omu kicweka kihango eki ekibiina kyabaire nikibuuriramu, tukaba twine kugira emotoka. Kwonka tukaba tutaine sente z’okugigura.

Mukuru wangye akatutaayaayira tutamweteekateekire, kandi yaatuha emotoka ye. Ekaba eshashuriire omushoro. Tukaba nitugura amajuta gonka. Hati, tukaba twine emotoka ei twabaire nitwenda.

Yehova akooreka ngu hati niwe aine obujunaanizibwa bw’okutureeberera omu by’omubiri. Omurimo gwaitu gukaba guri okwebembeza eby’Obukama.

Obu twabaire turi omu Ishomero rya Baapayoniya omuri 1978, omwe aha baabaire nibatwegyesa Raimo Kuokkanen, a akatuhiga kwijuza foomu y’okuza omu Ishomero rya Gileadi. N’ahabw’ekyo, tukatandika kwega Orungyereza kugira ngu tubaase kurizamu. Kwonka omuri 1980, tutakaijwize foomu y’okuza omu Gileadi, tukeetwa kuheereza aha ofiisi y’eitaagi omu Finland. Omu bwire obwo, Ababeseeli bakaba barikwikirizibwa kuza omu Ishomero eryo. Kwonka tukaba nitwenda kuheereza ahu Yehova yaabaire naayenda ngu tuheereze, beitu hatari ahu twabaire nitwenda.  N’ahabw’ekyo, tukaikiriza kuzayo. Kandi tukagumizamu nitwega Orungyereza kugira ngu twatunga omugisha ogundi gw’okuza omu Ishomero rya Gileadi tubaase kurizamu.

Bwanyima y’emyaka mikye, Akakiiko Akareeberezi akaikiriza Ababeseeli kuza omu Ishomero rya Gileadi. Tukaijuza foomu zaitu ahonaaho, tihabw’okugira ngu tukaba tutashemereirwe aha Beseeli, kureka tukaba nitwenda kwehayo kuhwera ahari ekyetengo ky’amaani twaikirizibwa kuza omu ishomero. Tukeetwa omu Ishomero rya Gileadi erya 79, kandi tukariheza Seputemba 1985. Tukoherezibwa kuheereza omuri Colombia.

Ku twabaire turi omuri Colombia, tukabanza kuheereza aha ofiisi y’eitaagi. Nkateeraho kukora ekirikukirayo oburungi omu buheereza bwangye, kwonka bwanyima y’omwaka gumwe turikuheereza aha ofiisi y’eitaagi, nkahurira ndikwenda ngu tuhindure obuheereza. Ogwo nigwo gwabaire omurundi gwangye gw’okubanza kushaba kuhindura obuheereza, kandi nigwo gwahererukireyo. Bwanyima, tukaba abamiisani omu rurembo Neiva, omu kicweka kya Huila.

Ntwire ninkunda okubuurira. Ntakagiire mu bushwere obu naabaire ndi payoniya omuri Finland, nkaba nimbuurira kuruga omu kasheeshe kare kuhitsya omu mwabazyo. Obu twabaire tuherize kutaaha omu bushwere, nyowe na Sirkka tukaba nitubuurira izooba ryona. Kandi ku twabaire tuba nitubuurira omu bicweka bya hare, obumwe tukaba turaara omu motoka yaitu. Ekyo kikaba kituhwera kutuubya aha rugyendo, n’okutandika kare kubuurira izooba eririkukurataho.

Ku twabaire abamiisani, tukagaruka twagira omujinya omu kubuurira ogu twabaire twine omu kubanza. Ekibiina kyaitu kikatunguuka, kandi ab’eishe-emwe na banyaanyazi-itwe omuri Colombia bakaba nibatutwariza omu muringo gw’ekitiinisa, baine rukundo, kandi barikusiima.

Haihi na Neiva ahu twabaire nituheereza, hakaba hariyo tauni ezaabaire zitarimu Bajurizi ba Yehova. Nkaba ninyerarikiirira oku amakuru marungi gaabaire nigaija kuhika omu bicweka ebyo. Kwonka, ahabw’okugira ngu omu bicweka ebyo hakaba hariyo abaheekyera, abantu abatari b’ekicweka ekyo bakaba bataine burinzi. N’ahabw’ekyo nkashaba ngu omuntu omwe omu tauni ezo abe Omujurizi wa Yehova. Nkateekateeka ngu omuntu ogwo aine kuba naatuura omu Neiva kubaasa kwega amazima. Kandi nkashaba ngu bwanyima y’okubatizibwa atunguukye omu by’omwoyo, reero agaruke omu tauni y’owaabo kubuurira. Nkaba ntarikumanya ngu Yehova aine omuringo murungi gw’okushoboorora oburemeezi obwo, ogurikukira ogwangye.

Omu bwire bukye, nkatandika kwegyesa Baibuli omutsigazi orikwetwa Fernando González. Akaba naatuura omuri Algeciras, emwe ahari tauni ezaabaire zitarimu Bajurizi ba Yehova. Fernando akaba naagyenda orugyendo rwa kiromita 50 (mahiro 30) kuza Neiva kukora. Buri kwega akaba aba atebeekaniise gye, kandi akatandikiraho kuza omu nteerane zoona. Kuruga aha saabiiti y’okubanza obu yaatandika kwega, akaba arundaana abandi ab’omu tauni y’owaabo abeegyesa ebi yaabaire ayega omu Baibuli.

Fernando akabatizibwa Jenwari 1990, bwanyima y’okwega Baibuli kumara ameezi mukaaga. Bwanyima akaba payoniya ow’obutwire. Ahabw’okugira  ngu omuri Algeciras hakaba hariyo Omujurizi wa Yehova orikutuurayo, ofiisi y’eitaagi ekaba neebaasa kwoherezayo payoniya ow’omutaano omu kicweka ekyo. Febwari 1992, ekibiina kikatandikwaho omu tauni egyo.

Mbwenu shi Fernando akabuurira omu tauni y’owaabo yonka? Ngaaha! Ku yaaherize kuza omu bushwere, we n’omukazi we bakaza San Vicente del Caguán, tauni endiijo eyaabaire etarimu Bajurizi ba Yehova. Okwo nayo bakahwera kutandikaho ekibiina. Omu 2002, Fernando akatooranwa kuba omureeberezi wa saketi, kandi we n’omukazi we, Olga, bakiri omu buheereza obwo.

Eky’okureeberaho ekyo, nkakyegyeraho obukuru bw’okugamba kyenyini omu kushaba aha bikwatiraine n’obuheereza bwaitu. Yehova naakora ebi tutarikubaasa. Ahakuba niwe mukama w’eigyesha.—Mat. 9:38.

Omuri 1990, tukashabwa kuza omu buheereza bwa saketi. Saketi yaitu y’okubanza ekaba eri omu orurembo rukuru orwa, Bogotá. Obujunaanizibwa obwo bukatureetera kutiina. Nyowe n’omukazi wangye turi abantu ba butoosha, abataine talanta z’omutaano. Kandi titumanyiriire kutuura omu myanya erimu abantu baingi. Kwonka, Yehova akahikiiriza okuraganisa kwe okuri omu Abafilipi 2:13 aharikugira hati: ‘Ruhanga niwe akorera omuriimwe, akabaha okukunda ebi asiima [n’amaani] g’okubikora.’

Bwanyima, tukoherezibwa omu saketi eya Medellín, orurembo oru naagambaho aha kutandika. Abantu b’omu kicweka ekyo bakaba bamanyiriire obushaarizi butakibatiinisa. Nk’eky’okureeberaho, rimwe nkaba ninyegyesa omuntu Baibuli, batandika kuteera amasasi aheeru y’enju ei twabaire turimu. Nkaba ndihakye kujuumara ahansi, kwonka ou naabaire ninyegyesa akagumizamu naashoma akacweka atuurize. Ku yaaherize kushoma akashohora aheeru. Bwanyima y’akaire, akagaruka n’abaana babiri bato yaangambira aikaikaine ati: “Nsaasira, naabanza kwakira abaana bangye.”

Hariho embeera ezindi obu twabaire tweshanga omu kabi. Eizooba rimwe, ku twabaire nitubuurira enju aha nju, omukazi wangye akaija nairuka atiniire. Akagira ngu hariho owaabaire arihakye kumuteera eisasi. Ekyo kikaantiinisa munonga. Bwanyima, tuketegyereza ngu owaateire eisasi akaba atarikwenda kurasha Sirkka, kureka akaba naarasha omushaija owaabaire ari aha rubaju rwe.

Obwire ku bwahingwireho, tukeega kwemera obushaarizi bw’omu kicweka ekyo. Tukagumibwa okugumisiriza kw’ab’eishe-emwe b’ekicweka ekyo abaabaire nibahikwho embeera nk’ezo, n’ezirikukiraho obubi. Tukagira ngu Yehova ku araabe naabahwera, naitwe naija kutuhwera. Butoosha tukaba tukuratira obuhabuzi bw’abareeberezi b’omu kicweka ekyo, twegyendesereze, kandi twesiga Yehova.

Kwonka, embeera ezimwe zikaba zitari z’akabi nk’oku twabaire nituteekateeka. Eizooba rimwe, tukahurira nk’abakazi babiri barikutongana aheeru y’enju ei naabaire naataayiiremu. Nkaba ntarikukunda kureeba abantu barikutongana, kwonka ou naabaire ntaayaayiire akangyemesereza kuza aha ibaraza kureeba. Ku  twashohweire, tukashanga ngu ebinyonyi bibiri by’enkushu nibyo byabaire ‘nibitongana’ birikutooreza abataahi.

Omuri 1997, nkatooranwa kwegyesa omu Ishomero y’Abaheereza. b Butoosha nkaba ninkunda kuza omu mashomero g’ekibiina, kwonka nkaba ntarikuteekateeka ngu ninyija kutunga omugisha gw’okwegyesa omu rimwe aha mashomero ago.

Bwanyima, nkaheereza nk’omureeberezi wa disiturikiti. Entebeekanisa egyo ku yaayemereziibwe, nkagaruka naaba omureeberezi wa saketi. Okumara emyaka 30, ntwire ninyegyesa omu mashomero g’ekibiina kandi nk’omureeberezi wa saketi. Obujunaanizibwa obwo bwona mbutungiremu emigisha mingi. Kwonka, tikugira ngu buri kimwe kitwire nikigyenda gye. Ka mbagambire ebyabaireho.

Ndi emanzi kandi niinyeyikiiririzamu. Eki kimpweraire kuraba omu mbeera zigumire. Kwonka obumwe, ngizire omujinya mwingi omu kuteeraho kushoboorora enshonga ezirikuba ziri omu bibiina. Kandi, naayehanangiriza bamwe kugira rukundo n’okuba abaringaniire. Ekirikutangaaza, naanye nkaba ndemwa kworeka emitwarize egyo.—Rom. 7:​21-23.

Obumwe ninyehurira kubi ahabw’obweremwa bwangye. (Rom. 7:24) Eizooba rimwe, nkagambira Yehova ngu kikaabaire kirungi naaruga omu buheereza bw’obumiisani nkagaruka Finland. Omwabazyo ogwo, nkaza omu ruteerane rw’ekibiina. Ebi naahuriire bikangumya kandi byampamiza ngu nyine kuguma omu buheereza bwangye, n’okugumizamu ninkora aha butahikiirira bwangye. N’okuhitsya hati, ninkwatwaho ku ndikwijuka oku Yehova yaagarukiremu okushaba okwo. Ekindi, ninsiima munonga oku yaampweraire kusingura obweremwa bwangye.

Nyowe na Sirkka nitusiima munonga Yehova ahabw’omugisha gw’okumara ekicweka kihango ky’emyaka yaitu omu buheereza obw’obutwire. Kandi niimusiima ahabw’okumara emyaka egi yoona ndikumuheereza, n’ahabw’okumpa omukazi oine rukundo, kandi omwesigwa.

Omu bwire bukye ninza kuhitsya emyaka 70 kandi ninza kuba nyine kurekura obujunaanizibwa bwangye obw’okwegyesa omu mashomero n’okutaayaayira ebibiina. Kwonka, eki tikirikungwista kubi. Ahabw’enki? Ahakuba nimpamiza kimwe ngu ekirikukirayo kushemeza Yehova, n’okumuheereza omu bucureezi kandi tukamuhimbisa twihire aha mutima ogwijwire rukundo n’okusiima. (Mik. 6:8; Mak. 12:​32-34) Tikirikutwetegyesa kuba twine obujunaanizibwa bw’amaani kubaasa kuhimbisa Yehova.

Ku ndikuteekateeka aha bujunaanizibwa obu ntungire, ninyetegyereza ngu tindabuhairwe ahabw’okugira ngu ninkira abandi, nari ahabw’okugira ngu nyine okubaasa kw’omutaano. Kureka, Yehova abumpaire ahabw’embabazi ze ezitanshemereire. Ampaire obujunaanizibwa obwo bwona, n’obu ndaabe nyine obweremwa. Mbaasize kubuhikiiriza ahabw’obuhwezi bwa Yehova. Omu muringo ogwo, obweremwa bwangye bworekire amaani ga Ruhanga.—2 Kor. 12:9.