Ӕз райгурдтӕн 1955 анзи ӕма ӕртӕ биццеуемӕй адтӕн тӕккӕ кӕстӕр. Мах цардан Финляндий хонсар ӕрдиги, абони горӕт Ва́нтаа кӕми ӕй, уоми.

Мӕ мадӕ донаргъуд райста ӕма Йегови Ӕвдесӕн иссӕй, ку нӕма райгурдтӕн, уомӕй еу цалдӕр анзей размӕ. Фал нӕ фиди зӕрдӕмӕ ӕ нӕуӕг дин нӕ цудӕй. Ӕма ’й нӕ хӕццӕ Библи ахур кӕнун, удта нӕ ӕмбурдтӕмӕ хонун нӕ уагъта. Уомӕ гӕсгӕ нин нӕ мадӕ рӕстдзийнадӕ амудта, нӕ фидӕ нӕ фарсмӕ ку нӕ фӕууидӕ, уӕд.

Сувӕллон уогӕй унаффӕ рахастон, Йеговӕмӕ ке игъосдзӕн. Авд анзи мӕбӕл ку цудӕй, уӕд скъолай нӕ бакумдтон, тогӕй конд финнаг блинчиктӕ хуӕрун, ве́рилятют, зӕгъгӕ. Мӕ ахургӕнӕг исгъӕла ӕй ӕма мин ӕй тухӕйти хуӕрун кодта. Еу къохӕй мин мӕ ростӕбӕл хуӕстӕй, цӕмӕй мин мӕ гъӕлӕс райгон кодтайдӕ, иннемӕй ба вилкӕбӕл блинчик исиста, фал ин вилкӕ ӕ къохтӕй рагӕлстон.

12 анзи мӕбӕл ку цудӕй, уӕд нӕ фидӕ рамардӕй. Уой фӕсте мӕ бон иссӕй ӕмбурдтӕмӕ цӕун. Ӕнсувӕртӕ мӕбӕл тухстӕнцӕ ӕма мӕ хӕццӕ берӕ рӕстӕг ӕрвистонцӕ. Уой фӕрци ме ’ууӕндундзийнадӕ ирӕзтӕй. Библи алли бон кӕсун райдӕдтон ӕма ’й нӕ публикацити фӕрци ӕртастон. Еци хуарз гъуддӕгтӕбӕл ке исахур дӕн, уой фӕрци мӕ бафӕндадтӕй донаргъуд райсун. Гъема 1969 анзи 8 августи, 14 анзи мӕбӕл ку цудӕй, уӕд еци къахдзӕф искодтон.

 Скъола ку фӕдтӕн, уӕд уобӕл берӕ нӕ рацудӕй, ӕма ӕнхӕстрӕстӕг пионерӕй лӕггадӕ кӕнун райдӕдтон. Цалдӕр къуӕрей фӕсте ба Финляндий ӕндӕр горӕт Пи́елавесимӕ цӕрунмӕ рандӕ дӕн. Уоми игъосунгӕнгутӕ нӕ фагӕ кодта.

Пиелавесий базонгӕ дӕн мӕ уарзон бийнойнаг Сиркки хӕццӕ. Куд бонзонгӕ ’й ӕма Йегови куд берӕ уарзуй, уой уайтагъддӕр фӕууидтон. Аци дуйней ӕхецӕн гъӕздугдзийнадӕ ӕма кадӕ нӕ агурдта. Нӕ дууей дӕр фӕндадтӕй не ’гас хъауритӕ дӕр Йеговӕн дӕттун, ӕма нин си уӕлдай н’ адтӕй, кӕми ӕма ин ци хузи лӕггадӕ кӕндзиан, уомӕй. Гъема 1974 анзи 23 мартъий нӕ цард байеу кодтан. Дууемӕй ескумӕ бауолӕфунмӕ рандӕ уни бӕсти, рандӕ ан игъосунгӕнгутӕ никки хъӕбӕрдӕр кӕми нӕ фагӕ кодта, уӕхӕн горӕт Ка́рттулӕмӕ.

Нӕ киндзӕхсӕвӕри фӕсте нин ӕй Йеговӕ бавдиста, Паддзахади гъуддаг фиццаг бунати ку ӕвӕрӕн, уӕд нин, цӕрунмӕ ӕнӕмӕнгӕй цидӕриддӕр гъӕуй, е ке уодзӕй (Матф. 6:33). Зӕгъӕн, Карттули ку адтан, уӕд нӕмӕ машинӕ н’ адтӕй ӕма фиццӕгти велосипедтӕбӕл цудан. Фал си хъӕбӕр уазал зумӕгтӕ фӕууидӕ ӕма нӕ ӕмбурди устур территорий игъосун кӕнунмӕ машинӕ гъудӕй. Фал нӕмӕ ӕхца ба н’ адтӕй.

Ӕнай-ӕнойти нӕмӕ мӕ хестӕр ӕнсувӕр иссудӕй ӕма нин ӕ машинӕ ниууагъта. Страховкӕбӕл бафиста, мах ба гъудӕй айдагъдӕр артаг ӕлхӕнун. Гъе уотемӕй нӕ фарста ниллух ӕй.

Йеговӕ нин ӕй бавдиста, ӕхцай гъуддаги нӕ батухсун ке некӕд бауадздзӕй. Махӕй еунӕг гъуддаг кӕнгӕ адтӕй: Паддзахади гъуддаг фиццаг бунати ӕвӕрун.

1978 анзи пионерти скъолай ку ахур кодтан, уӕд нӕ нӕ ахургӕнгутӕй еу, Ра́ймо Куо́кканен a, баразӕнгард кодта, цӕмӕй Галаади скъолай ахур кӕнунмӕ курдиадӕ бадӕттӕн. Уомӕ гӕсгӕ англисаг ӕвзаг ахур кӕнун райдӕдтан. Фал курдиадӕ нӕма балӕвардтан, уотемӕй нӕмӕ 1980 анзи Финляндий Вефилмӕ фӕдздзурдтонцӕ. Уӕди рӕстӕг ба Вефили ка лӕггадӕ кодта, уони Галаади скъолай ахур кӕнунмӕ нӕ худтонцӕ. Фал нӕ зӕрдӕ Йеговӕбӕл дардтан – е ниллух кӕнӕд, кӕми гъӕуӕн, уой. Уомӕ гӕсгӕ Вефилмӕ  иссудан, фал англисаг ӕвзаг ахур кӕнун дӕр нӕ ниууагътан. Нӕ зӕрдӕ дардтан, ескӕд нӕ Галаади скъоламӕ ке фӕххондзӕнцӕ.

Цалдӕр анзей фӕсте Разамонӕг совет вефилӕгтӕн уой барӕ равардта, цӕмӕй Галаади скъолай ахур кодтайуонцӕ. Ӕма мах дӕр еци фӕдбӕл курдиадӕ балӕвардтан. Вефили лӕггадӕ кӕнун дӕр нӕ зӕрдӕмӕ хъӕбӕр цудӕй, фал нӕ фӕндадтӕй, фулдӕр пайда кӕми ӕрхӕсдзиан, уоми лӕггадӕ кӕнун. Мах фӕххудтонцӕ Галаади скъолай 79-аг къласмӕ. Нӕ ахур фӕцан 1985 анзи сентябри, ӕма нӕ Колумбимӕ иснисан кодтонцӕ.

Колумбий фиццаг лӕггадӕ кодтан Вефили. Ме ’гас хъауритӕй бӕргӕ архайдтон, фал анзи фӕсте ӕнсувӕртӕн загътон, цӕмӕй нӕ ӕндӕрхузи лӕггадӕ кӕнунмӕ иснисан кӕнонцӕ. Уӕхӕн курдиади хӕццӕ ӕнсувӕртӕмӕ уомӕй фӕстӕмӕ некӕдбал бацудтӕн. Гъема нӕ иснисан кодтонцӕ миссионертӕй Не́йвомӕ, регион Уи́ли устурдӕр горӕтмӕ.

Игъосун кӕнун алкӕддӕр мӕ зӕрдӕмӕ хъӕбӕр цудӕй. Финляндий пионерӕй лӕггадӕ кӕнун ку райдӕдтон, уӕд еуӕй-еухӕттити сӕумӕрагийӕй ӕнафонӕмӕ фегъосун кӕнинӕ. Сиркки хӕццӕ нӕ цард ку байеу кодтан, уӕддӕр бонсауизӕрмӕ игъосун кодтан. Игъосун кӕнун идард ескумӕ ку рандӕ уианӕ, уӕдта хатгай машини бахсӕвеуат кӕнианӕ. Уотемӕй нӕ иннӕ бон надбӕл рӕстӕг харз кӕнун нӕбӕл фӕгъгъӕуидӕ, ӕма нӕ бон фӕууидӕ сӕумӕраги игъосун кӕнун райдайун.

Миссионертӕй лӕггадӕ кӕнун ку райдӕдтан, уӕд бабӕй нӕ реуи иссугъдӕй, пионертӕй лӕггадӕ кӕнгӕй си ци арт цӕфстӕй, еци арт. Не ’мбурд устурдӕр кодта. Хуӕртӕ ӕма ӕнсувӕртӕ кӕрӕдзей уарзтонцӕ ӕма нимадтонцӕ, удта боззӕрдӕ адтӕнцӕ.

Нейвомӕ хӕстӕг горӕтти еу Йегови Ӕвдесӕн дӕр н’ адтӕй. Уомӕ гӕсгӕ хъӕбӕр тухстӕн, еци рауӕн цӕрӕг адӕн хуарз хабар куд базондзӕнцӕ, уобӕл. Змӕнтгути туххӕй еци горӕти ӕрцӕуӕггӕгтӕн хъӕбӕр тӕссаг адтӕй. Уомӕ гӕсгӕ мӕ зӕрдӕ дардтон, Нейвой еске рӕстдзийнадӕ ке базондзӕй, донаргъуд ке райсдзӕй ӕма уой фӕсте ба ӕ райгурӕн горӕти ке игъосун кӕндзӕй. Уой туххӕй Йеговӕмӕ кувтон. Фал Йеговӕ никки хуӕздӕр цидӕр ӕргъуди кодта.

Уобӕл берӕ нӕ рацудӕй, ӕма Библи ахур кӕнун райдӕдтон еу ӕригон лӕхъуӕн Фернандо Гонсалеси хӕццӕ. Е цардӕй Альхеси́расе, игъосунгӕнгутӕ кӕми н’ адтӕй, еци горӕттӕй еуеми. Фернандой Нейвомӕ кустмӕ цӕун фӕгъгъӕуидӕ 50 километри. Библий ахуртӕмӕ ӕхе хъӕбӕр хуарз цӕттӕ кодта ӕма еци фӕдбӕл ӕмбурдтӕмӕ цӕун райдӕдта. Библи ахур кӕнун ку райдӕдта, еци къуӕрейӕй фӕстӕмӕ ӕ горӕти цӕрӕг адӕни ӕрӕмбурд кӕнидӕ ӕма ци базонидӕ, уой син радзоридӕ.

Фернандо донаргъуд райста 1990 анзи январи, Библи ахур кӕнун ку райдӕдта, уобӕл ӕхсӕз мӕйи ку рацудӕй, уӕд. Уой фӕсте ба ӕнхӕстрӕстӕг пионерӕй лӕггадӕ кӕнун райдӕдта. Нур Альхесирасе фӕззиндтӕй бунӕттон Йегови Ӕвдесӕн. Уомӕ гӕсгӕ еци горӕтмӕ иснисан кодтонцӕ сӕрмагонд пионерти, уомӕн ӕма си ӕрцӕуӕггӕгтӕн игъосун кӕнун тӕссаг нӕбал адтӕй. 1992 анзи феврали еци горӕти ӕмбурд фӕззиндтӕй.

Фернандо айдагъ ӕ райгурӕн горӕти нӕ игъосун кодта. Бийнонтӕ ку искодта, уӕд ӕ  бийнойнаг Ольги хӕццӕ цӕрунмӕ рандӕ ’й горӕт Сан-Висе́нте-дель-Кагуа́нмӕ. Уоми дӕр н’ адтӕй Йегови Ӕвдесӕнтӕ. Ӕма си фӕстӕдӕр се ’нхуси фӕрци ӕмбурд фӕззиндтӕй. 2002 анзи Фернандой иснисан кодтонцӕ районон цӕстӕдарӕгӕй, ӕма ӕ бийнойнаги хӕццӕ абони уӕнгӕ дӕр еци хузи лӕггадӕ кӕнунцӕ.

Аци хабарӕй ӕй балӕдӕрдтӕн, куд ӕхсидзгӕ ’й Йеговӕй ӕнхус корун ӕма бӕлвурд цӕйдӕрти туххӕй ковун. Йегови бон ӕй искӕнун, мах цӕбӕл не ’схъаурӕ кӕнӕн, уой, уомӕн ӕма хуми Хецау е ӕй, мах нӕ, фал (Матф. 9:38).

1990 анзи мӕ иснисан кодтонцӕ районон цӕстӕдарӕгӕй. Нӕ фиццаг район адтӕй Колумбий сӕйраг горӕт Боготе́. Мах тарстан, еци ихӕсбӕл ке не ’схъаурӕ кӕндзиан. Ӕз ӕма мӕ бийнойнаг хумӕтӕг адӕн ан, дессаги искурдиӕдтӕ нӕмӕ нӕййес. Удта ахур н’ адтан устур горӕтти цӕрунбӕл дӕр. Фал Филиппӕгтӕмӕ 2:13 уӕхӕн дзурдтӕ финст ес: «Хуцау уӕ ӕхуӕдӕг, ӕхцӕуӕн ин ци ӕй, уомӕ гӕсгӕ федар кӕнуй, цӕмӕй уӕ фӕндгӕ дӕр кӕна ӕма архайгӕ дӕр кӕнайтӕ». Ӕма ’й мах нӕхецӕй фӕууидтан, аци дзурдтӕ куд ӕнхӕст кӕнунцӕ, уой.

Фӕстӕдӕр ба нӕ район адтӕй, уӕлдӕр ци горӕти кой кодтон, е, Медельин. Уоми адӕн фудгъуддӕгтӕбӕл уотӕ исахур ӕнцӕ, ӕма сӕмӕ се ’ргом дӕр нӕбал ӕздахтонцӕ. Еу уӕхӕни Библий ахур уагътон, ӕма хӕдзари рази ӕхсун райдӕдтонцӕ. Минкъий ма, ӕма мӕ фур тӕссӕй зӕнхӕбӕл фӕхъхъан адтайнӕ, фал Библи ке хӕццӕ ахур кодтон, е цума неци адтӕй, уотӕ идарддӕр дӕр абзац кастӕй. Каст ку фӕцӕй, уӕд хатир ракурдта ӕма ӕндӕмӕ рацудӕй. Цӕйбӕрцӕдӕр рӕстӕги фӕсте ӕ дууӕ минкъий биццеуей хӕццӕ ӕрбацудӕй ӕма загъта: «Бахатир кӕнӕ, фал мӕ аци дууей медӕмӕ ӕрбакӕнун гъудӕй».

Уӕхӕн тӕссаг уавӕртӕ ма никкидӕр адтӕй. Еу уӕхӕни хӕдзарӕй-хӕдзарӕмӕ игъосун кодтан. Уӕд дин мӕмӕ Сирккӕ еугур фӕлорсӕй ӕрбалигъдӕй ӕма мин уотӕ бакодта, уӕдӕйти, дан, мӕ ӕхсгӕ кодтонцӕ. Фур тӕссӕй мӕ къӕхтӕ фӕддон ӕнцӕ, фал ӕй фӕстӕдӕр базудтан, Сиркки фехсунмӕ ке нӕ гъавтонцӕ, фал, ӕ фарсмӕ ка фӕцӕй, еци адӕймаги.

Рӕстӕг рацудӕй, ӕма еци уавӕртӕбӕл исахур ан, ӕма уотӕ хъӕбӕр нӕбал тарстан. Бунӕттон Йегови Ӕвдесӕнтӕ нин нӕ нифс хъӕбӕр федар кодтонцӕ. Етӕ никки тӕссагдӕр уавӕрти бахауиуонцӕ. Мах уотӕ сагъӕс кодтан: «Кӕд Йеговӕ уонӕн ӕнхус кӕнуй, уӕд махӕн дӕр банхус кӕндзӕй». Мах алкӕддӕр архайдтан, бунӕттон хестӕр нӕлгоймӕгтӕ цард багъӕуай кӕнуни туххӕй ци амундтӕ раттиуонцӕ, уонӕмӕ гӕсгӕ, иннӕ гъуддӕгтӕ ба Йегови барӕ бакӕнианӕ.

Игъосун кӕнгӕй нӕбӕл ходӕг цаутӕ дӕр ӕрцӕуидӕ. Еу уӕхӕни фегъустон, гъӕунги кадӕр куд гъӕр кӕнуй. Уотӕ мӕмӕ фӕккастӕй, ӕма дууӕ силгоймаги хилӕ кӕнунцӕ. Хъӕбӕр мӕ нӕ фӕндадтӕй гъе уомӕ кӕсун, фал ци хӕдзари адтӕн, уони уосӕ мин ниллигъстӕ кодта, цӕмӕй тургъӕмӕ рацӕуон. Куд рабӕрӕг ӕй, уотемӕй еци фӕдес исистонцӕ дууӕ попугаййи, синхи силгоймӕгти фӕнзтонцӕ.

1997 анзи мӕ иснисан кодтонцӕ Лӕггадӕ фӕххуӕздӕр кӕнуни скъолай b ахургӕнӕгӕй. Мӕ зӕрдӕмӕ алкӕддӕр цудӕй нӕ организаций скъолати ахур кӕнун. Фал мӕ сӕри къуми дӕр некӕд адтӕй, еци скъолатӕй сӕ еуеми ахургӕнӕг ке уодзӕн.

Фӕстӕдӕр лӕггадӕ кодтон облӕстон цӕстӕдарӕгӕй. Облӕстон цӕстӕдаргутӕ ке нӕбал уодзӕй, уой фӕдбӕл унаффӕ хаст ку ’рцудӕй, уӕд бабӕй мӕ нӕуӕгӕй районон цӕстӕдарӕгӕй иснисан кодтонцӕ. Мадта ӕдеугурӕй еумӕ 30 анземӕй фулдӕр лӕггадӕ кӕнун нӕ организаций скъолати ахургӕнӕгӕй ӕма районон цӕстӕдарӕгӕй. Еци ихӕстӕ ӕнхӕст кӕнгӕй берӕ арфӕдзийнӕдтӕй исхайгин ан. Фал алкӕд ӕнцон нӕ фӕууидӕ. Уомӕй мӕ ци зӕгъун фӕндуй?

Ӕз дӕн федар уодигъӕди хецау, ӕма мин е ӕнхус кӕнуй зиндзийнӕдти сӕрти хезунмӕ. Фӕууидӕ уотӕ дӕр, ӕма хъӕбӕр зӕрдиагӕй архайдтон, цӕмӕй ӕмбурди кӕцидӕр гъуддӕгтӕ фӕххуӕздӕр адтайуонцӕ. Фал мин хатгай фегӕр уидӕ. Гъуди ма ’й кӕнун, еухатт ӕнсувӕртӕн куд лӕдӕрун кодтон, уарзгӕй ӕма лӕдӕргӕй ке гъӕуама архайонцӕ. Фал уой дзоргӕй мӕхе фӕрсӕй ку фӕууидтайнӕ. Уарзондзийнадӕ кӕмӕн нӕ фагӕ кодта, е мӕхуӕдӕг адтӕн (Ром. 7:21–23).

Хатгай мӕ рӕдудтити туххӕй мӕхемӕ нийгъосинӕ (Ром. 7:24). Еухатт гъе уотӕ тухст адтӕн, ӕма Йеговӕн загътон, хуӕздӕр ке адтайдӕ, цӕмӕй миссионерӕй мабал лӕггадӕ кӕнон ӕма Финляндимӕ раздӕхон. Еци изӕр нӕмӕ ӕмбурд адтӕй. Уоми мин Йеговӕ мӕ нифс хъӕбӕр бафедар кодта ӕма мин ӕй балӕдӕрун кодта, кӕми гъӕун, уоми ке дӕн. Гъудӕй мӕ идарддӕр дӕр мӕ уодигъӕдӕбӕл косун. Йеговӕ мин мӕ кувдбӕл куд исдзуапп кодта, е мӕ зӕрдӕбӕл хъӕбӕр бамбалдӕй ӕма ’й абони уӕнгӕ дӕр гъуди кӕнун. Ӕз си хъӕбӕр боз дӕн, уал анзей дӕргъи мин фӕразонӕй ӕма фӕлмӕнӕй ке ӕнхус кодта мӕ гъӕндзийнӕдти хӕццӕ тох кӕнунмӕ.

Мах Сиркки хӕццӕ Йеговӕй куд боз ан, уомӕн зӕгъӕн дӕр нӕййес! Уӕхӕн кадӕй нӕ исхайгин кодта, ӕма ин нӕ бон адтӕй нӕ царди фулдӕр хай ӕнхӕстрӕстӕг лӕггадӕ кӕнун. Удта ма Йеговӕй хъӕбӕр боз дӕн, уӕхӕн уарзӕгой ӕма мин еузӕрдон бийнойнаг ке ес. Е алкӕддӕр мӕ фарсмӕ адтӕй ӕма мин ӕнхус кодта.

Тагъд рӕстӕги мӕбӕл 70 анзи исӕнхӕст уодзӕй, ӕма ахургӕнӕгӕй, удта районон цӕстӕдарӕгӕй нӕбал лӕггадӕ кӕндзӕн. Фал уобӕл нӕ тухсун, уомӕн ӕма ’й федарӕй зонун: Йеговӕн ӕхсидзгӕдӕр ӕй, цӕмӕй ин бонзонгӕй ӕма ӕгас зӕрдӕй лӕггадӕ кӕнӕн. Хъӕбӕр ӕхцӕуӕн ин фӕууй, ку ’й фӕууинуй, ке ’й уарзӕн ӕма си ӕ хуарздзийнӕдти туххӕй боз ке ан (Мих. 6:8; Мар. 12:32–34). Цӕмӕй Йегови кадгин кӕнай, уой туххӕй ӕнӕмӕнгӕ нӕй организаций цӕхуӕндӕр кадгин ихӕстӕ ӕнхӕст кӕнун.

Мӕ цардмӕ фӕстӕмӕ ку ракӕсун, уӕд ӕй фӕллӕдӕрун, Йеговӕ мин цӕхуӕндӕр ихӕстӕ уой туххӕй ке нӕ бабарӕ кӕнидӕ, ӕма иннетӕй хуӕздӕр кенӕ искурдиадгиндӕр дӕн. Уӕхӕн кадӕ мин искӕнидӕ е ’стур хуарзӕнхи фӕрци, кӕд мӕмӕ берӕ гъӕндзийнӕдтӕ адтӕй, уӕддӕр. Ӕз ӕй зонун, еци ихӕстӕ ӕнхӕст кӕнун мӕ бон ӕрмӕстдӕр Йегови ӕнхуси фӕрци ке иссӕй. Уомӕ гӕсгӕ мӕ бон ӕй зӕгъун: Хуцауи хъаурӕ ӕхе ӕнхӕстӕй бавдесуй, лӕмӕгъ ку фӕуун, уӕд! (2 Кор. 12:9).