Inyanak ak nen 1955. Talora kamin sanaagi, tan siak so bolirek. Binmaleg ak ed syudad na Vantaa. Sakey iyan lugar ya asingger ed dayat diad bandad leksab na Finland.

Abautismoan si nanay ko bilang Tasi nen Jehova pigaran taon antis ak ya niyanak. Balet kontra si tatay ko tan agda labay ya iyaralan kami nen nanay. Tan ag-ira onabuloy ya miaral kami. Kanian no anggapoy tatay, sasamboten nen nanay ko ya iyaralan kami na Biblia.

Ugaw ak ni, naaralan ko lay onunor ed si Jehova. Singa bilang nen pitoy taon ko, ampetang so ulo na maestrak ta agko labay so mangan na verilättyjä (pancake ed Finland ya nanlaok na dala). Inkupi-kupit koy sungot ko, pero minesmes toy aping ko pian napilitan ak ya onsangi, insan pilit ton isusubo ed siak imay pancake. Maong labat ta asegpay ko may tinidor.

Nen 12 so taon ko, inatey si tatay ko. Manlapu lad saman, makakapiaral ak la. Maomaong iray agagi ed siak tan aliknak ya inar-aro da ak kanian apaseseg ak ya onaligwas ed espiritual. Ginapoan koy manbasa na Biblia kada agew tan maseet kon aaralen iray publikasyon tayo. Baleg so nitulong to ’tan diad inyaligwas ko, kanian abautismoan ak nen Agosto 8, 1969, nen 14 so taon ko.

Nen asumpal ko lay paneeskuelak, nanregular payunir ak ya tampol. Kayari labat na pigaran  simba, inmalis ak ed Pielavesi, sakey iyan lugar ya daiset so Tasi, tan asingger ed sentro na Finland.

Diman ko akabat si Sirkka, say inad-arok ya asawa. Inmapit so liknaan ko ed sikato ta masimsimpit ya bii tan maespiritual. Aga pabidbir tan aliwan maluho. Labay min dua ya usaren so bilay mi diad panlingkor ed si Jehova tan mabulos min awaten so anggan anton asainmin. Nankasal kami nen Marso 23, 1974. Imbes ya man-honeymoon kami, linma kami ed lugar ya mas baleg so pankaukolan diad Karttula, melag itan ya baley diad Finland.

Nen balon kasal kami nen Sirkka, apruebaan mi ya no unaen mi Panarian, si Jehova lay akauley ed saray pankaukolan mi. (Mat. 6:33) Singa bilang, nen wala kami ed Karttula, anggapoy kotse mi. Bisikleta labat so uusaren mi diad teritorya mi. Balet no panaoy winter, agaylay betel. Talagan kaukolan mi luluganan pian makapanpulong kami. Say problema balet, anggapoy isaliw mi.

Aminsan ya agew, binmisita imay sakey ya kuyak. Abigla kami ta itilak to la kuno may kotse to ta pian walay usaren mi. Abayaran to met lay insurance. Anggapo lay arum ya problemaen mi, gasolina labat. Wala lay luganan ya nausar mi!

Impanengneng nen Jehova ed sikami ya anggapoy nepeg min pampagaan ta obligasyon ton itarya iray pankaukolan mi. Basta tooren mi met so obligasyon mi ya unaen so Panarian.

Nen nanaral kami ed Pioneer Service School nen 1978, pinaseseg kami na instruktor mi ya si Raimo Kuokkanen a ya man-apply ed Gilead School. Kanian ginapoan mi manaral na English pian onkualipika kami. Balet nen 1980, antis kami nin makapan-apply, naimbitaan kami ya manlingkor ed Bethel diad Finland. Diad saman ya panaon, agnayarin man-apply ed Gilead iray Bethelite. Pero naisip mi, aliwan sikami so mandesisyon no iner kami manlingkor ta si Jehova so makaamta no iner so sankaabigan ya pangusaran tod sikami. Kanian inawat mi so imbitasyon na Bethel. Balet intultuloy mi so nanaral na English, agla pigan onsabi panaon ya sarag mi lay man-apply parad Gilead.

 Kalabas na pigaran taon, imbaga na Mananguley ya Ulop ya nayari lan man-apply ed Gilead iray Bethelite. Kanian nan-apply kamin tampol! Pero agto labay ya ibagan agkami maliket ed Bethel. Labalabay mi asainmin mi, balet labay mi met so pausar no iner so mas baleg so pankaukolan. Akaawat kami na imbitasyon ya manaral ed koma-79 ya klase na Gilead tan nan-graduate kami nen Setyembre 1985. Say asainmin mi et diad Colombia.

Kasabi mid Colombia, say inmunan asainmin mi et diad Bethel. Amasya ak ed asainmin ko, balet kayari na sakey taon, nan-request ak ya umanen day asainmin mi. Diad interon bilay ko, diad saman ak labat nan-request na onman. Kanian inyasain da kami bilang misionero diad Neiva, sakey ya syudad diad rehyon na Huila.

Labalabay koy manpulong. Diad Finland, nen balolaki ak ni, no maminsan onggapo ak lan manpulong na kakkabuasan tan nasabik anggad labi. Nen balon kasal kami nen Sirkka, sanagew kami met ya manpulong. No arawrawi teritorya mi, no maminsan diad kotse la so ugipan mi pian makapanpulong kamin tampol kaimbuasan to tan agnaupot so oras mi ed pambiahe.

Nen misionero kami la, pinmawil iman ya seseg mi ed ministeryo. Dinmakel kami ed kongregasyon. Marespeto, maar-aro, tan maapresya iray agagi ed Colombia.

Wala ray baley diad kaliberliber na Neiva ya anggapon balot so Tasi. Sankanonot ko no panon kasin napulongan iray totoo ditan. Magulo ed saratan ya lugar ta dakel so rebelde ed gobierno. Delikado parad saray dayo so onla ditan. Kanian impikasik ya wala komoy anggan sakey ya magmaliw ya Tasi diad saratan ya baley. Say walad isip ko, atan ya too et kailangan ya manayam ed Neiva pian naamtaan toy katuaan. Kanian impikasik met ya kayari ton nabautismoan et onaligwas ya tampol tan napakiwas ya ompawil ed lugar to pian pulongan iray kabaleyan to. Anta manaya walay mas marakep ya plano nen Jehova.

Ag-abayag, walay inyaralan ko ya balolaki ya say ngaran to et Fernando González. Taga Algeciras si Fernando, sakey ed saramay baley ya anggapoy Tasi. Pero, ombiabiahe na manga masulok ya 50 kilometro paonlad Neiva ta ditan mantratrabaho. Talagan ipaparaan to iray aaralen mi tan aatendian toy amin ya aral. Manlapud samay unonan simba na impanaral toy Biblia, iimbitaan to ray kabaleyan to insan to ibangat ed sikara iray nanaaralan to.

Kayari labat na anem bulan, nen Enero 1990, abautismoan si Fernando. Insan nanregular payunir. Lapud wala lay Tasi ed Algeciras, nayari lan mangibaki so branch office na espisyal payunir ed satan ya lugar. Nen Pebrero 1992, wala lay kongregasyon ditan.

Kasin ditan labat so nampulongan nen Fernando? Andi! Nen angasawa la, inmalis iran sanasawa diad San Vicente del Caguán, sakey nin baley ya anggapoy Tasi. Tinmulong irad man anggad walay abuon kongregasyon. Insan nen 2002, nagmaliw ya manangasikaso na sirkito si Fernando. Sikato tan say asawa ton si Olga et manlilingkor ni anggad natan diad kimey ed sirkito.

 Naaralan ko ed sayan agawa ya importantin espisipiko tayon ipikasi ed si Jehova so asainmin tayo. Amay iisipen tayon singa imposible, sarasarag ton gawaen. Tutal, sikato so “Katawan na panag-ani,” aliwan sikatayo.​—Mat. 9:38.

Nen 1990, inyasain kami ed kimey ed sirkito. Say unonan sirkito mi et diad Bogotá, say capital city na Colombia. Aburido kami nen asawak no kasin sarag mi iyan asainmin. Ordinaryo kami labat ya totoo tan anggapoy espisyal ya abilidad mi. Insan agkami apasal ya manayam ed syudad. Balet tinulongan kami nen Jehova. Talagan tua imay walad Filipos 2:13 ya “say Dios so mamapabiskeg ed sikayo, ya iiter tod sikayo so panlabay tan pakayarin onkiwas, a saya et panliliketan to.”

Insan nen kien, inyasain kami ed sirkito diad syudad na Medellín, atan may lugar ya binitlak diad gapo. No walay gulo ed karsada, anggapo lay pibabali na saray totoo ta apasal la ra. Wala may aminsan ya legan ak ya mangiyaaral, walay paltogan diad paway na abung na samay study’k. Onkebkeb ak lawari, balet amay study’k kakkalmado labat tan tuloytuloy ya manbabasay parapo. Kayari ton nambasa, nampatanir ya agano ta onla kunod paway. Kapawil to, walay kaiba ton duaran angkekelag ya ugugaw. Kuan to: “Pasensia ki la, inalak labat irayay anako.”

Wala ray agawa ya talagan adawdawit so bilay mi. Aminsan ya manpupulong kamid kaabungan, batik si Sirkka ed siak. Manputi bosaleg to! Wala kunoy laki ya malabay ya mamaltog ed sikato. Ataktakot ak! Pero naamtaan mi ya aliwa manayan si Sirkka so labay ton paltogen, noagta amay lakin asingger ed sikato.

Asabi panaon, apasal kami met la ed ontan iran situasyon. Manbilib kami ed saray agagi ya asali da met itan, say arum ingen et mas grabe ni. Makapaseseg so pakpel da. Kuan mi nen Sirkka, ‘No tutulongan ira nen Jehova, di tulongan to ta met sirin.’ Pero siempre, manaalwar kami nin siansia. Uunoren mi ray bilin na saray elder tan ipapalima mi la ed si Jehova so bilay mi.

Balet wala met iray makapalek ya agawa. Aminsan nen manpupulong kamid kaabungan, walay arengel kon duaran bii ya mankokolkol. Siempre agko labay ya nanengneng so pankokolkol da, balet intagar ak na unabung ed balkonahe. Kanengneng ko, aliwa manayan duaran bii so mankokolkol, noagta duaran parrot ya aaligen day ibabaga na kaabay.

Nen 1997, inyasain ak bilang instruktor ed Ministerial Training School. b Amtak ya balibali manaral ed onia ran eskuelaan. Balet agkon balot naisip ya siak lan mismo so manbangat. Nanliketan ko itan ya asainmin.

Insan nen kien, nanlingkor ak bilang manangasikaso na distrito. Nen nakal la ’tan ya uksoyan, pinmawil ak ed kimey diad sirkito. Kanian diad masulok ya 30 taon, nanliketan ko iray nanduruman asainmin. Asalik so nagmaliw  ya instruktor, manangasikaso na distrito, tan manangasikaso na sirkito. Dakdakel so naawat min bendisyon lapud sarayan asainmin. Pero siempre, wala met iray subok.

Say sakey et say mismon ugalik. Siak imay too ya no walay labay kon nagawa, talagan pampursigian ko. Akatulong itan ya ugalik pian agak onsuko anggano mairap so situasyon. Balet no maminsan, nasosobraan ko lalo la no walay nanengneng kon kaukolan ya ipetek ed kongregasyon. Aminsan, prangkak ya sinimbawa so arum ya agagi ya magmaliw iran maaro tan makonsidera ed arum. Pero agko aliklikas ya siak ya mismo et agko nipanengneng so panangaro tan konsiderasyon nen sinimbawak ira.​—Roma 7:21-23.

No maminsan, nadidismaya ak ed sarilik lapud saray kakapuyan ko. (Roma 7:24) Aminsan ingen, imbagak ed si Jehova ya ontunda kami la amo ed panlilingkor mi bilang misionero tan ompawil kami la ed Finland. Diad saman ya labi, akiaral kami. Walay punto ya tinalakay ed saman ya aral ya akakombinse ed siak ya mansiansia ed asainmin ko, tan apaseseg ak ya kaukolan kon tuloytuloy ya labanan iray kakapuyan ko. Makakaakis ak kada no nanononotan ko iman ya ebat nen Jehova ed pikakasik. Tan diad tua, misatsalamat ak ed sikato ta maan-anos to ak ya tutulongan ed saray kakapuyan ko.

Misatsalamat kami nen Sirkka ed si Jehova lapud inikdan to kami na pankanawnawa ya usaren so interon bilay mi ya manlingkor ed sikato ya full-time. Misatsalamat ak met ya maong ed si Jehova ta inikdan to ak na maar-aro tan masuportan asawa.

Asingger ak lan man-70. No nasabik la itan ya edad, ontunda ak la ed panlilingkor ko bilang instruktor tan manangasikaso na sirkito. Pero anggano manguman so asainmin ko, agak maermen. Ta amtak ya say importante ed si Jehova et mapaabeba tayon manlilingkor ed sikato, tan sikatoy idadayew tayo lapud inar-aro tan misatsalamat tayod sikato. (Miq. 6:8; Mar. 12:32-34) Napagalangan tayoy Jehova anggano anggapoy espisyal ya pribilehyo tayo.

No pawilen ko iray nanduruman asainmin ko, amtak ya niiter iraman ed siak aliwan lapud mas maong ak nen say arum odino lapud maabilidar ak. Imbes, inter nen Jehova iratan ed siak lapud agnaparaan ya kaabigan to. Inmatalek to iratan anggano wala ray kakapuyan ko. Diad tua, agko iratan nagawaan no anggapoy tulong to. Kanian nibagak ya lalon anengneng so biskeg na Dios lapud saray kakapuyan ko.​—2 Cor. 12:9.