Ak mlechell er a 1955 el kot el kekerei er a retedei el sechal. Ak mlukeroul er a dimes er a beluu er a Finland er bita er a daob, el chelechang e ngokedongall el Vantaa.

A delak a miltecholb el ta er a Sioning er a Jehovah er a sesei el rak er uchei er ak mechell. Me nguaisei a demak ulemtok er a klemerang e dimlak lekengei er a delak me losuub lobengkemam me a lechub e lobekemam el mora miting er a ongdibel. Me ngullisechakl er kemam a uchetemel osisechakl er a Biblia sel lak lengar bita er kemam a demmam.

Sera kngalek el me klou e ak dilechor el kirel a Jehovah. El ua tiang, a ta el taem er a le 7 a rekik e a sensei er ngak a kmal mlo kesib a rengul er a lak kkengei el mengang a verilättyjä (pancake er a Finland el ngar ngii a rasech er ngii). Nguleba ta er a chimal el lomet a otengek el melasem el open er a ngerek, e a bita el chimal a melasem el loba taod el loltuu er a pancake er a ngerek. Me ak chillebedii tia el taod er a chimal me ngrirebet.

Sera le 12 a rekik e ngmlo smecher a demak. Uriul er tiang e ngmlo sebechek el ngar er a miting. A rudam er a ongdibel a kmal ullecholt er a klemeriarreng er ngak me tia uldbechak el mo olengeriakl er a tekoi er a klereng. A kulemuchel el menguiu er a Biblia er a bek el sils e blak a renguk el mesuub aika el babilenged. Tiakid a uchul me ngmlo sebechek el metecholb er a le 14 a rekik er a August 8, 1969.

 Sera ktobed er a skuul e a kulemuchel el regular pioneer. Chelsel a sesei el sandei e ak millukl el mora Pielavesi, el beluu lousbech a ngeso el kmeed er a belngel a Finland.

Ak mle meet er a Sirkka er a Pielavesi, el ngii a ta er a klebesei e ngmo bechik. Ngkmal mle soak ngii le ngii el mle ngariou a rengul e kmal betik a rengul er a Jehovah. Ngdimlak losiik a chetengakl me a lechub e ngkerruul. Aki di diul mle somam el mo mui el mesiou er a Jehovah, e kilengei el mo meruul a ngii di el ngerang el ngar er a omesiungam. Me aki mlo bechiil er a March 23, 1974. Ngdimlak ki bo mou honeymoon, aki bai millilt el melukl el mo mesiou er a Karttula, el ngii a mle lmuut el kmal ousbech a ngeso er a ruumerk er a klumech.

Ngdi mle uchelel a chebechiielam e a Jehovah ochotii er kemam el kmo, ngmo omekerreu er kemam er aike el ki mousbech a lsekum aki nguu a Renged el mo kot. (Mt. 6:33) El ua tiang, ngdimlak a mlimam er aki mngar er a Karttula. Me aki mlara rrat. Engdi sel blsechel a kelekolt e ngkmal imis el mo mekelekolt. Me aki uluusbech er a mlai el mo oldingel le ngkmal mle klou a territory. Engdi ngdimlak a ududam me ngdimlak el sebecham el mecherar a mlimam.

A ta er a klebesei e a obekuk a mle oldingel er kemam. Ngmle offer er a mlil er kemam. Ngmla kokedir a insurance me aki di uluusbech lomechar a cheluchemam. Me ngmlo er ngii a mlimam.

A Jehovah ulechotii er kemam el kmo ngmo omekerreu aike el ki mousbech er a bedengam. Me a ngerechelam a di mo nguu a Renged el mo kot.

Sera ki bora Skuul el Kirir a re Pioneer er a 1978 e a Raimo Kuokkanen, a el ta er a ullisechakl er tia el skuul a millisiich er kemam el mo apply el mora skuul er a Gilead. Me aki ulemuchel el mesuub a tekoi er a Merikel, el moktek er kemam a qualify el mo er tia el skuul. Engdi a 1980 er a uchei er a lebo er ngii a techellam el apply el mong, e te mle invite er kemam el mo mesiou er a branch er a Finland. Ngar tiakid el taem e a re Bethelite a diak el sebechir el apply el mora Gilead. Engdi ngmle somam el mesiou er a rolel e a Jehovah dilu el kmo ngkot lungil el diak el rolel el ki mulemdasu er ngii. Me aki kilengei er ongit el mora Bethel. Me nguaisei aki millemolem el mesuub a tekoi er a Merikel lomech er a lebo er ngii a techellam el apply el mora Gilead.

 Sesei el rak er uriul e a Governing Body a dilu el kmo a rengar er a Bethel a sebechir el apply el mora Gilead. Me aki mle apply. Tia diak el belkul a kmo ngdimlak el deu a rengmam el ngar er a Bethel, e ngbai mera el mle dmeu a rengmam! Engdi ngmle somam el mo mesiou el ngar er aike el lmuut el lousbech er a klou el ngeso, a lsekum e ngsebecham. Me te kilengei er kemam me aki tilobed er a 79 el klas er a Gilead er a September 1985. A assignment er kemam a mle Colombia.

Sera ki mkot el mora Colombia e te mle assign er kemam el mora branch. Ak mlora tkurrebab el klisichek el meruul er a assignment er ngak engdi uriul er a ta el rak e ak mlo feel el kmo a kuusbech omelodech. Me ngketengek er a klengar er ngak e di mle ta el tiakid el taem e a kullengit me lemengodech a assignment er ngak. Me te mle reassign er kemam el mo missionari er a Neiva, el ngar er a Huila.

Ngak a kot el soak a berkel a klumech. Sera kmesobil el pioneer er a Finland e ak ulemerk er a kmal dirk tutau el mo late er a klebesei. E sera ki dirk bo bechiil e ngak me a Sirkka mle blechoel el loldingel el ta el sils. Sel ki momerk el mora cheroid el basio e ngngar ngii aike el taem el ki di bechiuaiu er a mlai. Tia uchul me ngdimlak ki mongoit er a klou el taem el lomekall e sebecham el mereched el mo omerk er a klumech er a ongingil el sils.

Sera ki mluut el mo missionari e aki dirrek el liluut el moba tia el osisiu el klemeriarreng el kirel odingel. A ongdibel a mlo betok a rechad er ngii, me a rudam me a rudos er a Colombia kmal uleba omengull, bltikerreng, me a omereng el saul.

Ngar ngii a bebil el basio el mla er ngii a delengchokl er ngii el kmeed er a Neiva el dimlak a Sioning er ngii. Ak mle bekikl el kmo ngmekera e a ungil chais a mo oberk el mora ika el basio. Me nguaisei engdi ngii el mla er ngii a cheldebechel er a rechad loldechelakl a uchul me ngmle kengaol obo er aika el basio a lsekum ngdiak mchad er ngii. Me ak milluluuch lolengit me bo lsebechel a ta er a chad er aika el basio el mo Sioning. Engdi ak millatk el kmo ngika el chad a kirel el kiei er a Neiva e suubii a klemerang. Me ak dirrek el milluluuch el kmo a uriul er a lemetecholb e lemukeroul er a klemerang e lluut el mora belual el mo omerk er a klumech. Ngmle kirek el medengei el kmo a Jehovah a ngar ngii a lmuut el ungil rolel e ngmo sumecheklii tiang.

Kedeb el taem er uriul e ak ulemuchel el mesuub a Biblia lobengkel a kekerei el chad el Fernando González. Ngika kiei er a Algeciras el ta er aike el basio el diak a Resioning el kiei er ngii. A Fernando a mlara Algeciras el 30 el mael a cherridel el me oureor er a Neiva. Ngika kmal mle ungil prepare el kirel a study er ngii e di mle mereched el mo omuchel el ngar er a miting. Sel sandei er a lomuchel er omesubel er a Biblia e ngmilengideb er a rebebil el ngar er tia el belual e ullisechakl er tir aike el lesiluub er a Biblia.

A Fernando a miltecholb er a January 1990, el ngii a elolem el buil er uriul er a lomuchel el mesuub. Ngika mlo regular pioneer. Me chelecha el lengar ngii a chad er a Algeciras el mla mo Sioning, e ngmlo sebechel a branch el assign er a re special pioneer el mo er tia el basio. Me a February 1992 e ngmlo er ngii ongdibel er ngii.

 Me a Fernando ngdi ulemerk er a belual? Ngdiak! A uriul er a bo lebechiil e ngii me a bechil a millukl el mora San Vicente del Caguán el lmuut el ta er a basio el diak a Resioning er ngii. Ngar isei e te ullengeseu el toketekii a ongdibel. Sera 2002 e a Fernando miltutk el mo circuit overseer, me ngii me a bechil er a Olga melemolem el meruul er tia el ureor el mei er chelechang.

Ngoeak tia el experience e ak silubii a klungel a ultutelel a le specific a nglunguched el kirel a ngerecheled er a Jehovah. A Jehovah meruul aike el diak el sebeched el kutmokl. Tiang a sim er ngii el diak el sim er kid.—Mt. 9:38.

Sera 1990 e te mle assign er kemam el mo oldingel ongdibel. Me a kot el assignment er kemam a mlo oldingel ongdibel el ngar er a Bogotá, el capital er a Colombia. Aki mle medakt el kmo ngmo el mo diak ki mrellii a ngerechelam. Ngak me a bechik a di hutsu el chad el diak a ileakl el duch el ki molab. E dimlak ki smau el kiei er a city. Me nguaisei engdi a Jehovah ultutii a telbilel el ngar er a Filipi 2:13 el kmo: “Dios a di blechoel el oureor er a rengmiu me bo le somiu e le sebechiu el meruul a ikel soal.”

Uriul e te mle assign er kemam el mora Medellín, el sel beluu el kulsaod er ngii er a uchelel. A rechad er tiang a kmal mle smau a odechelakl me a omelemall er a rechad me ngdimlak el bother er tir. El ua tiang, a ta el taem e ak milsuub lobengkel a ta el chad e ngmo er ngii a kaibeboes er rikl. Me a leko ak mo terrob er a chutem engdi ngika el chad a millemolem el menguiu el ua lak a ngerang. Sera bo lemerek el menguiu e ngullengit el mo er rikl e mei. Me ak milengiil el telkib e ngmei ngii me a reteru el mekekerei el ngelekel el kmal chelellakl a rengul el melekoi el kmo, “Mousubes ngmle kirek el mo melai er a rengelekek.”

Ngdirrek el mla er ngii a lmuut el bebil er a kdekudel el tekoi el dilubech. A ta el taem e aki uleldingel obliil e a bechik a remurt el mei el di cheleleu a medal. Ngdilu el kmo ngmla er ngii a chad el lulemoes el bedul ngii. Ngkmal mlo ouedikel a renguk. Me nguaisei engdi uriul e aki mlo medengei el kmo ngika el chad a dimlak lomoes er a Sirkka e ngbai ulemoes el bedul a chad el mirrael el me engelakl er ngii.

Cherengel a taem e ngmlo diak ki msal medakt a odechelakl me a omelemall er a rechad el mla er ngii. Te kmal millisiich a rengmam a Resioning el chad er tia el beluu el kmal mle meduch a rengrir el loutekangel chouaika el blekeradel me a lmuut el mekngit el blekeradel. Aki mlo melatk el kmo a lsekum a Jehovah olengeseu er tir e ngdirrek el mo ngosukemam. Aki mle blechoel el oltirakl a advice er a remechuodel el chad er tia el beluu, e mle kerekikl, e milecherei er a chimal a Jehovah.

Nguaisei a bebil el blekeradel a dimlak el sal kdekudel el ua ki mulemdasu er ngii. A ta el taem e aki ulerrenges er a reteru el redil el kautoketok el melekoi a kmal mekngit el tekoi er a ikrel a blai el ki blo moldingel er ngii. Ngdimlak el soak el lomes er tir el kautoketok engdi ngika el chad er a blai a dilu er ngak me kbora berangdang er a blai. Tia el “klautoketok” a mle delongelel a teblo el iakkotsiang el mesuub er a retonari.

Sera 1997 e te tiltkak el mo olisechakl er a Ministerial Training School. b Ngkmal mle soak el ngar er aike el skuul el loruul a cheldebechel, engdi ngdimlak kullatk el kmo a ta er a klebesei e ngmo er ngii a ileakl el techellek el lolisechakl er a ta er ngii.

Uriul e ak mlo mesiou el district overseer. Sera bo lak tia el ngerachel e ak liluut el mo circuit overseer. Me ngmla mo betok er a 30 el rak el kulisechakl a skuul e kusiou el odam loldingel ongdibel. Aika el assignment a mla mo uchul a betok el klengeltengat. Me nguaisei engdi tia diak el belkul a kmo ngmle beot. Ka mek explain.

Ngak a kmal mesisiich a blekerdelek el chad. Tia mla ngosukak lotekau a meringel el blekeradel. Me nguaisei engdi ngngar ngii aike el taem el blok mesisiich el mesmechokl a tekoi er a chelsel ongdibel. A ta el taem e ak millisiich er a rechad me bo lolecholt a bltikerreng me a tabesul uldasu el mora rebebil. Engdi ngngar er a chelsel aika el taem er a kulekoi er tir e ngak me ak dirrek el mle olengesenges er aika el blekeradel.—Rom 7:​21-23.

Chelitechetuk a uchul me ngngar ngii aike el taem el kmal mo mechitechut a renguk. (Rom 7:24) A ta el taem e ak milluluuch el melekoi er a Jehovah el kmo ngbai ungil a bo lak missionari e kluut el mora Finland. Seikid el kesus e ak mlora miting er a ongdibel. Aike el krirenges er a miting ulterekeklii a renguk el kmo ngungil a kulemolem el meruul er a assignment er ngak e kuureor er a chelitechetuk. Mo lmuut er chelecha el sils me ngkmal rutechii a renguk er a rolel e a Jehovah mle bleketakl longer tia el nglunguchek. Ak dirrek el kmal oba omereng el saul el kirel a rolel e ngmla ngosukak el mo mesisiich er a chelitechetuk.

Ngak me a Sirkka kmal oba omereng el saul el mora Jehovah el kirel a ileakl el techall el ki mngiluu el luluusbech er a klou el tedobech er a klengar er kemam el ngar er a mui el taem el omesiou. Ak dirrek el kmal oba omereng el saul el mora Jehovah el milskak a kmal ungil e blak a rengul bechiil el redil er aika el mereko el betok el rak.

Ngdi kmedung e ngmo 70 a rekik me ngmo diak kulab a ileakl el techall el olisechakl a skuul e oldingel ongdibel. Engdi ngdiak el mekngit a renguk. E ngerang? E le kmal oumerang el kmo sel kot el soal a Jehovah a dosiou er ngii loba klengariourreng e doldanges er ngii loba rengud el mui er a bltikerreng me a omereng el saul. (Mik. 6:8; Mk. 12:​32-34) Ngdiak dousbech er a klou a ultutelel el ngerachel el mo mengebkall er a Jehovah.

Sel kullatk aika el betok el assignment el kuleldeu er a renguk er ngii e ak mo mtebengii el kmo, ngdimlak kngai le ngak el kuk ungil er a rebebil me a lechub e lengar ngii a kmal ungil duch er ngak. Ngkmal diak leuaisei! A Jehovah milskak aika el ngerachel le ng krasia er ngii a uchul. Ngmilskak aika el ileakl el ngerachel alta ngmla er ngii a chelitechetuk. Ak medengei el kmo ngdi mle sebechek el kutmokl loeak a ngelsuil a Jehovah. Ngoeak tia el rolel e a chelitechetuk a mla ochotii a klisichel a Dios.—2 Ko. 12:9.