Ekj wort aune 1955 jebuaren un sie de jinjsta von dree Junges. Ekj woss em Sieden von Finnlaunt dicht biem Mäa opp – en eene Jäajent, wua de Staut Vantaa nu es.

Miene Mutta leet sikj aus eent von Jehowa siene Zeijen deepen, een poa Joa ea ekj jebuaren wia. Oba mien Voda wia jäajen de Woarheit un leet daut nich, daut miene Mutta met ons Kjinja studieren kunn ooda ons met no de Vesaumlunk nämen kunn. Doawäajen lieed onse Mutta ons de Gruntlieren ut de Bibel, wan ons Voda doa nich dicht bie wia.

Von sea junk aun, wia ekj mie aul eenich, Jehowa emma to jehorchen. Biejlikj aus ekj säwen Joa wia, wort mien Schoolliera mie sea doll, wiels ekj nich wull verilättyjä äten (daut sent finnlauntsche Pankuaken von Bloot). Met eene Haunt drekjt see mie de Baken toop, daut mien Mul opjinkj, un met de aundre Haunt proowd see mie met de Gaufel een Biet Pankuak em Mul to stoppen. Oba ekj heiwd eent aun de Gaufel naun, soo daut dee ut äare Haunt juach.

Mien Voda storf, aus ekj 12 Joa wia. Doahinja kunn ekj dan no de Toopkomes foaren. De Breeda von de Vesaumlunk wieren leeftolich un kjemmaden sikj om mie, un daut brocht mie bat doa, em Jeisteljen verauntokomen. Ekj funk aun, jieda Dach de Bibel to läsen un onse Bieekja goot to studieren. Wäajen ekj dit deed, kunn ekj mie dän 8. August 1969 deepen loten, aus ekj 14 Joa wia.

 Meist fuaz nodäm ekj met de School derch wia, funk ekj met dän Pioniadeenst aun. Een poa Wäakj lota trock ekj no Pielavesi, waut ojjefäa enne Medd von Finnlaunt es, wäajen daut doa aun mea Help fäld.

En Pielavesi lieed ekj Sirkka kjanen, waut lota miene Fru wort. Ekj jleicht ar sea, wäajen see deemootich un sea jeistlich jesonnen wia. See socht nich no Iea un wull uk nich väl em Tieteljen haben. Wie wullen beid soo väl aus mäajlich em Deenst fa Jehowa doonen, krakjt endoont wua ooda waut daut wia. Wie befrieden ons dän 23. Moaz 1974. Enne Städ daut wie wajch fuaren toom Scheengonen haben, trock wie no Karttula, eene kjliene Staut en Finnlaunt, wäajen daut doa aun mea Vekjindja fäld.

Von Aunfank aun, aus wie befriet wieren, haft Jehowa jewäsen, daut hee fa ons em Tieteljen sorcht, wan wie daut Kjennichrikj aune ieeschte Städ stalen (Mat. 6:33). En Karttula haud wie biejlikj kjeene Koa. Aum Aunfank deed wie bloos met Beisikjels foaren, oba enne Winta jinkj daut bat unja null. Toom daut groote Jebiet von de Vesaumlunk derchprädjen, bruck wie eene Koa, oba wie hauden nich soo väl Jelt toom eene kjeepen.

Onverhofs kjeem mien elra Brooda ons besieekjen. Hee säd, wie kunnen siene Koa haben. De Sechaheit wia betolt un wie durwen bloos noch de Tenkj oppfellen. Dan haud wie de Koa, waut ons fäld.

Jehowa haft jewäsen, daut hee siene Veauntwuatunk, fa ons em Tieteljen to sorjen, nojekomen es. Onse Oabeit wia, fa daut Kjennichrikj to schaufen.

Aune 1978, aus wie bie de Pioniadeenst-School wieren, muntad Raimo Kuokkanen a, waut eent von de Liera wia, ons opp, ons fa de Gilead-School auntojäwen. Doawäajen fung wie aun, Enjlisch to lieren, daut wie kunnen no dise School gonen. Oba aune 1980, ea wie ons fa de Gilead-School aunjejäft hauden, word wie enjelot, en daut Betel en Finnlaunt to deenen. To dee Tiet kunnen de Beteliten sikj nich fa de Gilead-School aunjäwen. Oba wie wullen doa deenen, wua Jehowa daut haben wull un nich doa, wua wie selfst wullen. Doawäajen neem wie de Enlodunk aun. Oba wie proowden doawäajen wieda Enjlisch to lieren, wan wie lota irjentwanea mol de  Jeläajenheit hauden, ons fa de Gilead-School auntojäwen.

Een poa Joa lota säd de Väastaunt, daut de Beteliten sikj nu uk fa de Gilead-School aunjäwen kunnen. Wie jeewen ons fuaz aun, oba nich wiels wie ontofräd wieren em Betel. Daut wia krakjt aundasch! Wie wullen bloos reed sennen, doa to deenen, wua daut aun mea Help fäld, wan wie doatoo to brucken wieren. Ons wort no de 79. Klauss von de Gilead-School enjelot. En Septamba 1985 wia wie met de School derch un dan word wie no Kolumbien jeschekjt.

Onse ieeschte Toodeelunk wia en daut Betel en Kolumbien. Ekj proowd doa mien Bastet to doonen, oba no een Joa em Betel wort ekj en, daut ons eene aundre Toodeelunk fäld. Daut wia daut ieeschte un daut latste Mol, daut ekj no eene aundre Toodeelunk fruach. Doahinja word wie aus Missionoaren no de Staut Neiva jeschekjt en de Huila-Jäajent.

Mie haft daut Prädjen noch emma sea scheen jegonen. Aus ekj noch nich befriet wia un Pionia wia en Finnlaunt, hab ekj eenjemol von tiedich zemorjes bat lot zeowes jeprädicht. Aus wie aum Aunfank befriet wieren, haben ekj un Sirkka uk eenjemol dän gaunzen Dach äwa jeprädicht. Wan wie en een Jebiet prädjen deeden, waut wiet auf wia, schleep wie en onse Koa. Soo brukt wie nich soo lang foaren un kunnen näakjsten Dach fuaz zemorjes wada aunfangen to prädjen.

Aus Missionoaren haud wie wada dänselwjen Iewa to prädjen, aus wie ea hauden. Onse Vesaumlunk en Kolumbien wort jrata un de Breeda un Sestren hauden Respakjt un wieren leeftolich un dankboa.

Nich wiet auf von de Staut Neiva, wua wie aus Missionoaren deenden, wieren eenje Renzhen, wua daut kjeene von Jehowa siene Zeijen jeef. Ekj muak mie Sorjen doaräwa, woo de goode Norecht wudd kjennen en dise Jäajenden jeprädicht woaren. Oba wäajen de Soldoten ut de Boaj sikj unjarenaunda feiten un dootmoaken deeden, wia daut doa sea jefäadlich fa eenen Utlenda. Doawäajen bäd ekj doarom, daut doa wäa von ut dise Renzhen eent von Jehowa siene Zeijen wort. Ekj docht, daut deejanja wudd motten en de Staut Neiva wonen toom de Woarheit lieren. Doawäajen bäd ekj uk doarom, daut deejanja no siene Doop sull goot em Jeisteljen veraunkomen un trigj no siene Renzh trakjen toom doa prädjen. Ekj wudd daut haben sult weeten, daut Jehowa eene bätre Leesunk haud aus ekj.

Meist fuaz nodäm funk ekj aun, met eenen jungen Maun de Bibel to studieren, waut Fernando González heet. Hee wond en eent von de Renzhen, wua daut kjeene von Jehowa siene Zeijen jeef. Fernando fua jieda Wäakj äwa 50 Kjlomeeta (30 Miel) no de Staut Neiva toom doa schaufen. Hee deed fein väastudieren un funk uk fuaz aun, no de Toopkomes to wanken. Fuaz von de ieeschte Wäakj aun, aus hee studieed, kjeem hee met aundre von siene Renzh toop un lieed dee, waut hee bie sien Bibelstudium jelieet haud.

Fernando leet sikj em Jaunewoa 1990 deepen, sas Moonat nodäm hee aunjefongen haud to studieren. Doahinja funk hee dan met dän Pioniadeenst aun. Wäajen daut en Algeciras nu eent von Jehowa siene Zeijen jeef, wia daut nu secha jenuach, daut daut Betel doa Sondapionieren  hanschekjen kunn. Em Feebawoa 1992 wort en dise Renzh eene Vesaumlunk oppjestalt.

Deed Fernando bloos en siene Renzh prädjen? Nä! Nodäm hee sikj befriet haud, trocken hee un siene Fru no San Vicente del Caguán. Daut wia uk eene Renzh, wua daut noch kjeene von Jehowa siene Zeijen jeef. Dee holpen met, doa uk eene Vesaumlunk opptostalen. Aune 2002 wort Fernando Kjreisoppsechta un daut es, waut hee un siene Fru Olga bat vondoag dän Dach noch doonen.

Von dise Erfoarunk hab ekj jelieet, daut et sea wichtich es, om eenselne Sachen to bäden, wan daut om de Oppgowen en Jehowa siene Organisazion jeit. Jehowa kaun daut doonen, waut wie nich kjennen – daut es je siene Arnt, nich onse! (Mat. 9:38).

Aune 1990 wort ekj Kjreisoppsechta. Dän ieeschten Kjreis, waut wie hauden, wia en de Hauptstaut Bogotá. Wie sorjden ons doaräwa, daut wie dise Oppgow nich wudden fein doonen. Ekj un miene Fru sent gaunz jeweenelje Menschen un haben nich besondre Gowen. Un wie wieren daut nich jewant, en soone drocke Staut to läwen. Oba Jehowa haft sien Vespräakjen emma jehoolen, waut hee en Filippa 2:13 jeef: “Gott wirkjt en junt beides, daut wellen un daut foadich moaken, soo aus am daut jefelt”.

Lota haud wie eenen Kjreis en de Jäajent Medellín; daut es de Staut, wua ekj aum Aunfank von räd. De Menschen doa wieren daut soo jewant, daut doa Jewault oppe Gauss wia, daut dee sikj nich mol mea oppräajden. Biejlikj opp eene Sauz, aus ekj bie een Bibelstudium wia, wort doa buten Verdäa jeschoten. Ekj wull mie fuaz oppe Flua dollajen, oba de Bibelschiela läsd doa eenen Varsch un muak bloos wieda, aus wan nuscht wia. Aus hee ieescht verecht haud, stunt hee opp un säd, daut hee een bät rutgonen wudd. Een Stootskje wieda kjeem hee met siene twee Kjinja toop wada nenn un säd gaunz ruich: “Ekj must ieescht mol gonen miene Kjinja holen.”

Wie beläwden uk noch aundre Tieden, wua daut jefäadlich wia. Opp eene Sauz, aus wie von Hus to Hus prädjen jinjen, kjeem miene Fru no mie jerant un wia blauss em Jesecht. See säd, daut wäa no ar jeschoten haud. Mie jinkj daut sea derch. Oba lota word wie en, daut de Maun met de Flint goanich no Sirkka jeschoten haud, oba no eenen Maun, waut doa dicht bie ar jegonen wia.

Met de Tiet lieed wie, met de Jewault oppe Gauss foadich to woaren. De Breeda un Sestren beläwden uk aul dit un noch väl schlemmre Sachen un bleewen doawäajen staunthauft, un daut jeef ons Moot. Wie kunnen vestonen, daut wan Jehowa dee holp, wudd hee uk ons halpen. Wie wieren väasechtich un hilden ons emma aun dän Rot, waut de Eltestasch ons jeewen, un daut äwaje äwaleet wie Jehowa.

Oba nich aule Loagen wieren soo schlemm, aus wie dochten. Opp eene Sauz hieed ekj soo waut, aus wan twee Frues sikj hinja daut Hus, waut ekj besocht, utbrelden un utflieekjten. Ekj wull soone Striedarie nich seenen, oba de Huswieet kroagd mie hinjarem Hus. Dan wort ekj en, daut doa goanich eene Striedarie wia – daut wieren bloos  Papajeien, waut daut nodeeden, woo de Nobasch sikj emma streeden.

Aune 1997 wort ekj een Liera en de School toom em Deenstaumt utlieren. b Ekj hab daut noch emma väl jeräakjent, no de veschiedne Schoolen to gonen, waut de Organisazion haft, oba ekj wudd kjeenmol jedocht haben, daut ekj noch wudd daut Väarajcht haben, doa uk een Liera to sennen.

Lota deend ekj aus Distrikjtoppsechta. Oba aus sikj daut met de Distrikjtoppsechta opphieed, wia ekj wada Kjreisoppsechta. Ekj hab fa äwa 30 Joa aus Liera ooda aus reisenda Oppsechta jedeent. Dise Toodeelungen haben mie väl Säajnungen jebrocht. Oba dauts nich emma leicht jewast. Lot mie junt mol sajen, waut ekj doamet meen.

Ekj hab eene stoakje Perseenlichkjeit. Daut haft mie jeholpen, met schwoare Loagen foadich to woaren. Oba eenjemol sie ekj uk to driest jewast, wan ekj proowd enne Vesaumlungen Sachen trajchttostalen. Eenjemol hab ekj wäm strenjen Rot jejäft, daut dee sull leeftolich un derchjedocht sennen met de aundre. Oba daut fonje es, daut ekj dan jroz selfst nich leeftolich un derchjedocht wia (Reem. 7:21-23).

Wäajen miene Fäla hab ekj mie eenjemol sea mootloos jefeelt (Reem. 7:24). Opp eene Sauz säd ekj to Jehowa em Jebäd, daut et veleicht daut Baste wia, daut ekj nich mea Missionoa wia un bloos trigj no Finnlaunt trock. Dän Owent haud wie Vesaumlunk. Waut ekj doa hieed, jeef mie de Sechaheit, daut ekj sull Missionoa bliewen un wieda aun miene Onvolkomenheit schaufen. Bat vondoag dän Dach jeit mie daut sea to Hoaten, woo kloa Jehowa mien Jebäd beauntwuaten deed. Ekj sie uk sea dankboa, daut hee mie leeftolich jeholpen haft, met miene Schwakheiten foadich to woaren.

Ekj un Sirkka sent soo dankboa, daut Jehowa ons de Iea jejäft haft, daut jratste Poat en ons Läwen em Voltietdeenst to sennen. Ekj sie Jehowa uk soo dankboa, daut hee mie eene true un leeftolje Fru jejäft haft, waut mie aul dise Joaren unjastett haft.

Ekj woa nu meist fuaz 70 Joa woaren un dan woa ekj nich mea aus Liera un Kjreisoppsechta deenen. Oba dit moakt mie nich mootloos. Wuarom nich? Wiels ekj sie mie gaunz secha, daut daut, waut Jehowa daut Dolste ieet es, daut wie en sienen Deenst bescheiden sent un am ut Leew un Dankboakjeit lowen (Micha 6:8, NW; Mar. 12:32-34). Toom Jehowa ieren bruck wie nich eene besondre Oppgow.

Wan ekj soo trigjdenkj aun miene Oppgowen, kaun ekj kloa seenen, daut ekj dee nich jekjräajen hab, wäajen ekj bäta wia aus aundre, uk nich, wäajen ekj mie doa bäta met vestunt aus een aundra. Daut wia krakjt aundasch! Jehowa haft mie dise Oppgowen bloos jejäft, wiels hee een friejäwaja Gott es. Hee jeef mie dise Oppgowen, wan ekj uk een deel Schwakheiten haud. Ekj weet, daut ekj dee bloos met Jehowa siene Help hab kunt derchfieren. Doawäajen saj ekj: “Derch miene Schwakheiten es Gott siene Krauft kloa to seenen jewast” (2. Kor. 12:9).