Ngavualewe mu 1955. Mu vumo dietu, tuavualewe mala thathu, ame gasala songi. Ngakudile gu sud ya Finlande gu dimbo dia Vantaa.

Mama wabuile Temue wa Yehowa ivo yazonda gutuama egi nguvualewe. Uvi tata gakhalelego musuanguluga nu giamatshidia, gakhalelego nji mutshigina egi mama atulongese giamatshidia nga tuye n’enji mu gudibungisa. Hene mama wakhalele gutulongesa Biblia gula tata wakatuga gu inzo.

Sendese ulenge wami, ngakhalele mutshigina gukombelela Yehowa. Tangua ngakhalele nu ivo 7, ndombi wami wanguvidile khabu jiabala, handaga ngatunyile gudia verilattyya (gato ana londa nu mahatshi gu Finlande). Wangubobodiele mbanga, wasendesele gungudisa gato gene gu ngolo. Ngakuatele somo ya gato yakhalele ha mago enji, ngayibishidile.

Tata wafile tangua ngakhalele nu ivo 12. Hene ngasendesele guya mu gudibungisa gua mu hungu. Aphangi a mu hungu anguzumbile muavula, angukuatesele diago ha gukula mu nyuma. Ngasendesele gutanga Biblia lusugu nu lusugu nu gulonguga mikanda yana zola muhiga. Gutshita ngenyi guangukuatesele ha guzula desizio dia ndando. Hene ngabatijiwe tangua ngatagenesele ivo 14 mu 8 Aout 1969.

Tangua ngamanesele khalasa, ngabuile muvundji wa njila wa tangua diagasue. Gungima dia phoso jiazonda, ngayile muhana mago gu Pielavesi handaga guakhalele nu funu ya alongeshi. Dimbo diene diakhala ha katshi dia gifutshi gia Finlande.

 Ame nu Sirkka, tuadimonele gu Pielavesi. Ngamuzumbile handaga wakhalele muthu wa gudibulumuisa nu wakhalele muzumba Yehowa muavula. Gakhalelego mukamba gukhala nu lutumbu nga gukamba gukhala nu ima yavula-vula. Mukut’etu agasue tuakhalele hehi ha gutshita yagasue ha gulandula gukombelela Yehowa; tuakhalele nji hehi ha gutshita ndaga yagasue atutoga. Tuadizudile mu ulo mu 23 Mars 1974. Ha fundo dia guya mu huluguga gungima dia ulo, tuayile mukalegela Yehowa gu dimbo dia Karttula, handaga guakhalele nu funu ya alongeshi a Ufumu.

Tangua tuadizudile mu ulo, Yehowa watukuatesele ha gujiya egi mbawutuhana ima tudi nayo funu gula tuasha Ufumu wenji hafundo dia thomo. (Mat. 6:33) Ha gufezegesa, tangua tuakhalele gu Karttula tuakhalelego nu gamiyo. Thomo tuakhalele muwenda ha velo. Uvi mu sungi ya guhuma, guma guakhalele diago guahuma. Tuakhalele nu funu ya gamiyo ha gulongesa mu mahungu akhalele nu terituare jiakoma. Uvi tuakhalelego nu makuta a gusumba gamiyo.

Mbuta wami wa yala wajile gututala, mu gisagumuisa. Watuhanele gamiyo genji. Watuhanele diago gima tuakhalele nagio funu. Uvi esue tuakhalele musumba phamba esanse.

Yehowa watuhanele diago ima tuakhalele nayo funu. Uvi esue mudimo wetu wakhalele wa gusha Ufumu wa Nzambi ha fundo dia thomo.

Tangua tuanginyile Khalasa dia Avundji a Njila mu 1978, phangi Raimo Kuokkanen, a wakhalele mulongeshi wetu, watuhanele gikhesa ha gungina khalasa dia Gileade. Tuasendesele gulonguga Anglais hagula tuajiya gungina khalasa diene. Uvi mu 1980 gutuama dia gungina khalasa diene, atutamegele gu Betele ya gu Finlande. Mu tangua diene, aphangi a gu Betele akhalelego mungina khalasa dia Gileade. Uvi tuakhalele mutshigina gutshita mudimo fundo Yehowa wakhalele mumona egi didi diabonga mukunda nu esue. Hene tuatshiginyile guya gu Betele. Tualanduile gulonguga Anglais handaga tuakhalele mutangiza egi tuajiya guheta luendu lua gutamegewa mu Khalasa dia Gileade.

Ivo yazonda gungima, Hunji dia Akulu Atuameji diazuelele egi, aphangi a gu Betele ajiya nji gungina Khalasa dia Gileade. Tuazalesele formilere mbala imoshi, uvi ishigo mukotelesa egi tuakhalelego musuanguluga nu Betele. Tuakhalele mutshigina gukalegela Yehowa mudimo fundo diakhalele nu  funu ya ukuateshi wavula gula atutshigina. Tuanginyile khalasa dia 79, gungima atuhanele diplome mu Septembre 1985. Atutumile gu Colombie.

Tangua tuayile gu Colombie, tuasendesele gukalagala mudimo gu Betele. Ngakhalele mutshita mudimo wami muabonga, uvi gungima dia givo gimoshi ngatangijile egi tuakhalele naye gusombegesa mudimo. Yakhalele mbala ya thomo nu yasuga mu monyo wami ha gutoga egi atutume mu mudimo uko. Gungima atutumile mu mudimo wa gimisionere mu dimbo dia Neiva, mu distrike dia Huila.

Ngakhalele nu gusuanguluga mu mudimo wa gulongesa. Tangua ngakhalele muvundji wa njila gu Finlande, ngakhalele undumbu hene matangua ako ngakhalele mulongesa sendese gimenegena uu nu mu ngueze. Tangua tuadizudile mu ulo nu Sirkka, tuakhalele nji mutshigina gulongesa lusugu luamudidi. Uvi tangua tuakhalele mulongesa mu terituare jia gualeha, matangua ako tuakhalele mubanda guene mu gamiyo getu. Gutshita ngenyi guakhalele gutukuatesa ha gusendesa gulongesa mu gimenegena mu lusugu lualandula.

Tangua tuabuile bamisionere, tuasendesele luko gusuanguluga nu mudimo wagulongesa gifua luholo tuakhalele guyitshita thomo. Hungu dietu diakudile, aphangi a mala nu a akhetu a gu Colombie akhalele nu makalegelo abonga gifua guzumba, ginemua nu khadilo dia guhana mersi.

Membo akhalele hehi nu dimbo dia Neiva akhalelego nga nu Temue wa Yehowa mumoshi. Ngakhalele gudisagesa muavula ha gujiya luholo lukuma luabonga luajiya gulongesewa mu membo ene. Uvi luholo ita yazogele mu dimbo diene, yakhalele lamba gudi ngenji ha guya guene. Hene ngasendesele gutshita gisambu hagula egi nga muthu mumoshi mu membo ene abue Temue wa Yehowa. Ngakhalele mutangiza egi muthu muene wajiya guza mu dimbo dia Neiva ha gulonguga giamatshidia. Ngatshitshile nji gisambu egi gula muthu muene wabatijiwa mbawubua Muklisto wa gukula mu nyuma, ngenyi mbawuya mulongesa lukuma luabonga mu dimbo diawo. Uvi ngakhalele naye gujiya egi, Yehowa mbawutshita ndaga muabonga gubalega luholo ngakhalele naye gutshita.

Gungima, ngasendesele gulonguga Biblia nu muvuala mumoshi wa yala, jina dienji Fernando González. Muvuala muene wakhalele mujinga gu Algésiras, dimbo diene diakhalele mukatshi dia membo anyi akhalelego nga nu Temue wa Yehowa mumoshi. Fernando wakhalele muwenda ba kilometre gubalega 50 ha guheta gu dimbo dia Neiva ha gutshita mudimo. Wakhalele gudilondega muabonga ha gulonguga, wasendesele nji guya mu gudibungisa gua mu hungu mbala imoshi. Tangua Fernando walongugile Biblia mu phoso ya thomo, watamegele athu a mu dimbo diawo ha gualongesa ndaga jialongugile muene.

Fernando walongugile Biblia mbeji 6, wabatijiwe mu Janvier 1990. Gungima, wabuile muvundji wa njila wa tangua diagasue. Muthu mumoshi wa gu Algésiras wabuile Temue wa Yehowa, hene Betele yatumine pionye spesiale ha guya mulongesa guene. Mu Fevrier 1992, azolele hungu mu dimbo diene.

Phangi Fernando galongeselego phamba mu dimbo diawo, uvi walongesele nji mu membo ako. Gungima dia gudizula mu ulo, Fernando nu mukaji’enji Olga ayile gu Saint Vincent de Caguan, dimbo diene diakhalelego nji nga nu Temue wa Yehowa mumoshi. Azolele hungu guene. Mu 2002  atombele phangi Fernando ha gubua mutadi muwendji, muene nu mukaji’enji Olga alanduile gutshita mudimo wene.

Ndaga yene yangulongesele egi idi diago nu ndando ha gutshita gisambu gudi Yehowa mukunda nu ndaga imoshi ngenyi tudi nayo funu mu mudimo wenji. Yehowa wana tshita ndaga jinyi esue tuajiyilego gutshita. Muguzuela guabonga, udi mudimo wenji, uvi ushigo wetu.​—Mat. 9:38.

Mu 1990 atutumile ha gutshita mudimo wa mutadi muwendji. Fundo dia thomo tuayile mutshita mudimo wene diakhalele mu dimbo dia Bogota. Tuakhalele muvua woma egi mbatushigo mutagenesa ginemo giene muabonga. Ame nu mukaji’ami, tuakhalelego nu eksperianse mu mudimo wene. Tuakhalele khenji tuajingilego mu dimbo diana kalegewa ndaga jiavula. Uvi Yehowa wataganesele ndaga yalayele muene idi mu Filiphi 2:13 egi: “Handaga Nzambi wana gumihana nzala nu ngolo jia gutshita ndaga hagula mumusuanguluise.”

Ngungima, atutumile ha guya gu khanda ya Medellín, dimbo ngazuelela gu thunda. Athu a mu dimbo diene akhalele ajidila gale gumona athu mutshita ndaga jia khuta mu njila, uvi yakhalelego guasagesa. Ha gufezegesa, lusugu lumoshi ngakhalele mulongesa muthu mumoshi Biblia, uvi athu asendesele guloza mata hanze ya luphango ngakhalele. Ngakhalele mutshigina gubanda mu mavu, uvi muthu ngakhalele mulongesa Biblia walanduile gutanga paragrafe guvua woma ndo. Tangua diamanesele muene gutanga, wanguwambelele egi udi mutshigina guzoga hanze, wazogele. Gungima wavutugile nu ana a zonda mbadi, wazuelele mu dijui dia tuluga egi: “Ngutotesele, ngayi muzula an’ami.”

Gudi nu ndaga jiko jiatshitshile egi tukhale mu gingonza. Lusugu lumoshi tuakhalele mulongesa inzo nu inzo, mukaji’ami wajile nu gulenga phushi nu gudigita muavula. Wazuelele egi muthu mumoshi walozele uta gukhanda yenji. Yanguhanele diago woma. Gungima, tuakotelesele egi muthu muene gakhalelego mutshigina guloza Sirkka, uvi walozele yala mumoshi wakhalele mubalega gungima dienji.

Gungima dia matangua avula, ndaga jia khuta jiakhalelego luko gutuhana woma. Khadilo diabonga dia Matemue a Yehowa akhalele mutagana nu ndaga jia lamba gifua esue nu ndaga jiko jiabola, diatukuatesele muavula diago. Tuakotelesele egi luholo Yehowa wakhalele guaakuatesa, nu esue nji mbawutukuatesa. Tuakhalele mulandula malongo akhalele gutuhana akulu, tuakhalele nji gudibamba nu gushila Yehowa mutshima.

Uvi ndaga jiko jiakhalelego diago jia gingonza gifua luholo tuakhalele mutangiza. Lusugu lumoshi ngakhalele mu luphango lumoshi mulongesa, ngavuile matululu gifua akhetu mbadi akhalele gudishingana mu dijui diakola hanze ya luphango luene. Ngayilego mutala akhetu ene, uvi fumi’a inzo wanguwambelele ha guya gumusanga ha fundo dia guhululugila. Ndaga jia sombegesele, tangua diabembele ene gumana tukhusu tuyadi tuakhalele guatetesa.

Mu 1997 angutombele ha gubua mulongeshi gu École de formation ministérielle. b Sendese  mualeha ngakhalele musuanguluga ha gungina makhalasa a Ufumu. Uvi ngatangijilego nga hazonda egi ngajiya guheta luendu lua gulongesa mu khalasa dimoshi mukatshi dia makhalasa ene.

Gungima ngabuile mutadi muwendji wa distrike. Tangua muhiga wakatuile mudimo wa mutadi muwendji wa distrike, ngasendesele luko gutshita mudimo wa mutadi muwendji wa circonscription. Ivo 30 yabalega gale, ngana suanguluga gulongesa mu khalasa dia Ufumu nu mudimo wami wa mutadi muwendji. Midimo yene yana gungubatela gubonga guavula. Uvi matangua ako, yakhalelego yaleba hagutshita ndaga jiene jiagasue. Luholo lutshi?

Ngana khala nu gikhesa giavula. Khadilo diene diangukuatesele ha gukolesela mu malamba ngataganele nawo. Matangua ako ngakhalele nu gikhesa giavula ha gulondega ndaga mu mahungu. Lusugu lumoshi ngawawambelele aphangi ako nu gikhesa giagasue ha guzumba athu ako nu gutuna gukhala enya ndaga jiakola-kola. Uvi muguzuela guabonga ame hakhami ngakhalelego nu makalegelo ene mu tangua diene.​—Roma 7:21-23.

Matangua ako ngakhalele muleba muila, handaga ngakhalelego mutaganesa ndaga jiko. (Roma 7:24) Lusugu lumoshi ngawambelele Yehowa mu gisambu egi, idi ndaga yabonga egi ngubembe gami mudimo wa gimisionere nguvutuge gu Finlande. Mungueze ya lusugu luene, ngayile mu gudibungisa gua mu hungu. Ndaga ngavuile mu gudibungisa guene, jiangukuatesele ha gulandula gutshita mudimo wami wa gimisionere nu gutshita ngolo ha gusombegesa makalegelo ami. Henyaha, ngudi nu gusuanguluga luholo Yehowa wahenele mvutu gu gisambu giami. Uu nu mangino, ngana hana Yehowa mersi luholo luangukuatesele muene ha gubinga guleba guami.

Ame nu mukaji’ami Sirkka tuana hana Yehowa mersi yavula luholo luatuhanele muene luendu lua gubalegesa masugu avula mu mudimo wa tangua diagasue. Ngudi nji muhana Yehowa mersi luholo luanguhanele muene mukhetu wabonga, wana gumuzumba nu wana gungukuatesa mu ivo eyi yagasue tuabalegesa gale mu mudimo wenji.

Gualeha ndo ngudi mutagenesa ivo 70, mbangubemba gukalagala mudimo wa gulongesa mu makhalasa a Ufumu nu mudimo wa mutadi muwendji. Uvi ngushigo muvua gikenene mukunda nu ndaga yene. Handaga ngana sha diago mutshima egi ndaga yana suanguluisa Yehowa muavula idi egi, tuana gumukombelela nu gudibulumuisa guagasue, tuana gumutumbuisa nu mutshima wetu wagasue, tuana gumuzumba nu tuana gumuhana mersi. (Mika 6:8; Mako 12:32-34) Ha gutumbuisa Yehowa, ishigo mutoga egi tudi naye gukhala nu ginemo gimoshi gia ndando.

Gula ngatangiza inemo ngahetele, ngana kotelesa egi ngayihetelego handaga ngakhalele nu makalegelo abonga gubalega athu ako; nga ndo idi handaga ngudi nu ndunge jiavula diago. Ishigo diago ngenyi! Uvi Yehowa wanguhanele luendu lua gutshita midimo eyi mukunda nu khenda jienji jiavula. Ikhale ngakhalele nu guleba uvi Yehowa wana gungukuatesa ha gutshita midimo yene. Ngana jiya egi, Yehowa wangukuatesele ha gutagenesa inemo yene. Ngenyi, ngolo jia Nzambi jiangukuatesele ha gumutumbuisa, ikhale ngakhalele muthu wa guleba.​—2 Kol. 12:9.