Nidabadwa mu 1955 ndipo inepano ndine nenze ng’ono maninge pa wana atatu. Nidakulira mu thaundi inango yomwe ili mu dziko ya Finlândia, yomwe manjeuno idziwika kuti thaundi ya Vantaa.

Amayi wangu adabatizika magole yanganani inepano nikanati kubadwa. Koma ababa wangu ambakondwalini kuti amayi akhale wa Mboni za Yahova. Iwo ambabvumizalini kuti amayi ambapfunzire nase Baibolo na kuyenda ku misonkhano. Amayi ambapfunzira nase ababa akachoka.

Inepano kuyambira niri mwana nenze wotsimikiza kubvera Yahova. Mwakulinganiza, nthawe inango penenze na magole 7 aticha wangu wachikazi adakalipa maninge pomwe nidalamba kudya bolo yodziwika kuti verilättyjä (Yokonzewa na magazi yomwe wanthu ambayikonda maninge ku Finlândia). Iwo ambaniphata maputu nkuniphata pakamwa na djanja inango ndipo ku dyanja inango wenze na bolo mweyi kuti anidyese. Koma inepano nidawavuzula nkuwatayisa bolo mweyo.

Penenze na magole 12, ababa wangu adamwalira, patsogolo pake inepano nimbakwanisa kugumanika pa misonkhano bwinobwino. Abale wa mumpingu wathu ambachita nane bwino vinthu ndipo vimwevi vidanithandiza kuti nipite patsogolo mwauzimu. Nidayamba kupfunzira Baibolo ntsiku iliyose na kupfunzira mosamala mabukhu yathu. Kukonda kupfunzira kudanithandiza kuti nikhale na cholinga chobatizika, ndipo nidabatizikadi pa 8 Agosto 1969 nina magole 14.

 Pomwe nidakhala pang’ono kumaliza shikola nidayamba upainiya wokhazikika, ndipo padandopita masondo yang’onong’ono nidayenda kukatumikira ku dera yosowa ku Pielavesi, chapakatikati pa dziko ya Finlândia.

Ku Pielavesi, inepano nidadziwana na ntsikana munango yemwe adadzakhala nkazi wangu wapamoyo dzina yake Sirkka. Nidamukonda maninge ndawa yakuti ni wodzichepesa ndipo ambakonda maninge Yahova. Iye ambafunalini kukhala wobvekera ndipo ambakondwa na vinthu ving’onong’ono vomwe wenze navo. Tose awiri timbafuna kuchita vose vomwe tingakwanise pakutumikira Yahova ndipo timbaganiziralini maninge va maudindo. Tidalowolana pa 23 Março 1974. M’malo mwakuti timbakhale malo yabodzipodzi kuti timbadolerane ndawa yakuti talowolana manjemanje, tidayenda kukatumikira ku dera yosowa ku Karttula.

Kundochokera pa nthawe yomwe tidalowolana, Yahova wakhala ankuonesa kuti adzatipase vofunika pa moyo tikambayikha Ufumu wa Mulungu pa malo yoyamba. (Mat. 6:33) Mwakulinganiza, pakuyamba ku Karttula, tenze tilibe karo, timbandofamba na njinga basi. Koma ikafika mayinza dera mweyi vimbakhala voshupa kuchita maulendo. Kuti tikwanise kukalalikira ku dera ya mpingu wathu timbafunikira karo. Koma tenze tilibe kobiri zogulira karo.

Koma nthawe inango tidandowona m’bale wangu wabwera kudzatizungira ndipo adatipasa karo yake kuti ikhaliretu yathu. Iye wenze adalipira kale vimapepa ku kampani ya chitetezo, ise timbandodekana kuyikhamo mafuta nkumbafambira basi. Karo yomwe timbafuna ire tidakhala nayo manje.

Apa Yahova adawoneseratu kuti adzasiyelini kutithandiza pa vosowa vathu. Isepano timbafunika kuyikha Ufumu pa malo yoyamba basi.

Petenze ku shikola ya apainiya mu gole ya 1978, m’bale Raimo Kuokkanen, a adatilimbikisa kuti tidzadze fomu ya shikola ya Giliyadi, pamwapo tidayamba kupfunzira Chingelezi kuti tiyenerere kudzangena shikola mweyi. Koma mu 1980, tikanati tadzadza mafomu, tidachemerewa kuti tikatumikire ku Beteli ya ku Finlândia. Magole mwayare wanthu otumikira pa Beteli wenze alibe mwayi wodzadza mafomu ya shikola ya Giliyadi, koma isepano timbafuna kukatumikira kulikose komwe Yahova angatitumize osati komwe isepano tinkufuna. Ndipomwapa tidabvuma kukatumikira ku Beteli. Olo kuti venze teno isepano tidapitiriza kupfunzira Chingelezi.  Koma ko vidakwanisika kuti nthawe inango tidzachemerewe nkuyenda ku shikola ya Giliyadi?

Payadapita magole yang’onong’ono Bungwe Yotonga idabvumiza kuti omwe ankutumikira pa Beteli angambangenembo shikola ya Giliyadi. Pa nthawe imweyireretu tidadzadza mafomu yathu ya shikola ya Giliyadi. Koma sikuti timbachita vimwevi ndawa yakuti timbakondalini kutumikira pa Beteli koma tidachita vimwevi ndawa yofuna kuyenda kulikose komwe kunkudekana thandizo komwe tingabvumiziwe. Mu Setembro 1985 tidachemerewa kuti tikangene shikola ya Giliyadi turma numero 79. Pomwe tidamaliza adatitumiza ku Colômbia.

Pitidafika ku Colômbia, tidauziwa kuti tikatumikire ku Beteli. Nidachita vose vomwe ningakwanise kuti niphate basa pa Beteli, koma pomwe nidamala gole ibodzi nidakumbira kuti anichinje utumiki. Kwenze kuyamba na kumaliza kuchita vimwevi pa moyo wangu. Isepano tidatumiziwa kuti tikachite umishonale ku thaundi ya Neiva, mu dera ya Huila.

Nthawe zose nimbakonda maninge basa yolalikira. Pomwe nenze nikanati nalowola nimbachita upainiya ku Finlândia, Nimbayamba kulalikira machibesebese ndipo nimbafika pa muyi usiku. Pomwe nidalowolana na Sirkka timbachomerera tinkulalikira. Tikayenda kukalalikira kutali, timbagona mu karo yathu, vimwevi vimbathandiza kuti ulendo wathu ukhale wa phindu ndipo vimbathandiza pomwe kuti mangwana yake tiyambe kulalikira machibesebese.

Kuchita utumiki wa umishonale vidachitisa kuti tiyambe pomwe kukondwa maninge na basa yolalikira ninge momwe timbachitira kalekale. Mpingu wathu udakula maninge, isepano tidazindikira kuti abale wa ku Colômbia enze waulemu maninge, okondwa na otembeja.

Kufupi na komwe timbatumikira ku Neiva kwenze kulibe wa Mboni. Inepano nimbafuna maninge kulalikira m’madera mwayare. Koma venze voshupa ndawa kwenze nkhondo ndipo wanthu ochita kubwera ambakhalalini otetezeka mu dera mweyire. Ndipomwapa nimbapemphera kwa Yahova kuti mu mathaundi mwaya mugumanikeko munthu wochinja nkukhala Mboni ya Yahova. Nimbawona kuti pakuti mumathaundi mwaya muli nkhondo, nimbawona kuti munthu muyo adzapfunzirire chonadi komwe kwenze isepano ku Neiva abatizike, apite patsogolo mwauzimu ndipo patsogolo pake adzabwerere kwawo nkuyamba kulalikirambo anango. Nimbaganiziralini kuti Yahova angaphatisire basa njira yabwino maninge kuposha mweyi.

Ka nthawe pang’ono nidayamba kupfunzira Baibolo na kamulumbwana kanango dzina yake Fernando González. Iye ambakhala ku Algeciras, ku thaundi inango ya kumoko komwe kwenze kulibe wa Mboni za Yahova. Fernando ambachita ulendo wa makilometro yoposha 50 kubwera ku Neiva kuti adzaphate basa. Iye ambakonzekera bwino pfunziro iliyose ndipo patsogolo pake adayamba kugumanika pamisonkhano. Ndipo kundochokera sondo yomwe adayamba kupfunzira, Fernando ambapfunzisambo wanthu anango wa muthaundi yake vomwe ambapfunzira m’Baibolo.

Fernando, adabatizika mu Janeiro 1990 pomwe padandomala minyezi 6 ankupfunzira Baibolo. Patsogolo pake adayamba kutumikira ninge mpainiya wokhazikika. Na Mboni ibodzi kumoku ku Algeciras, venze vobveka kuti Ofesi ya Nthambi itumize apainiya wapadera ku dera mweyi. Mu Fevereiro 1992, mpingu udakhazikisiwa mu thaundi mweyi.

Koma Fernando sikuti ambandolalikira mu thaundi ya kwawo basi. Padalowola, iye na nkazi  wake adafuluka nkuyenda ku San Vicente del Caguán, yomwe ni thaundi inango komwe kwenzebe Mboni za Yahova. Kumuko iwo adathandiza kukhazikisa mpingu. Mu 2002, Fernando adayikhiwa kukhala wonyang’anira dera ndipo iye pabodzi na nkazi wake Olga, ankupitiriza kutumikira pa utumiki moyu mpakana manje.

Vimwevi vidanikumbusa kuti tikambapemphera tichadekana kumbatomoleratu vomwe Yahova ankufuna kutithandiza pa Utumiki wathu na vose vofunikira pa utumiki muyo. Yahova angatichitire vinthu vomwe patekha tingakwaniselini, viri teno ndawa yakuti iye ndiye mwinichiro wa basa mweyi yokolola.—Mat. 9:38.

Mu 1990 tidachinjiwa kuti timbaphate basa ya wonyang’anira dera ndipo komwe tidayambira utumiki muyo ni ku thaundi ikulu ya Bogotá. Vimwevi vidatichitisa kuti tikhale na nkhawa ndawa yakuti tenze tikanati tadjaira kukhala mu thaundi ikulu yomwe ina wanthu azinji. Inepano na nkazi wangu tilibe kupfunza maninge ndipo tilibe luso yapadera. Koma taona momwe Yahova wakwanirisira mawu yake yogumanika pa lemba ya Afilipi 2:13: yomwe inena kuti: ‘Mulungu ndiye yemwe akulimbikisani, iye ndiye yemwe akupasani ntima wofuna kuchita vomwe iye akonda na mphanvu yochitira vinthu vimwevo.’

Patsogolo pake tidatumiziwa kuti tikaphate basa ya wonyang’anira dera ku Medellín, yomwe ni thaundi yomwe nafotokoza kumayambiriro kule. Wanthu wa kumoko wenze adadjaira vinthu va uchigananga vomwe vimbachitika m’misewu ndipo ambaviyikhiralini nzeru maninge. Mwakulinganiza, ntsiku inango piningachitisa pfunziro ya Baibolo, tidandobva mpfuti yalira pafupi na nyumba yomwe tenze, ine nenze wokonzeka kudzigwesera pasi ndipo pfunziro yangu idapitiriza kuwerenga ndime modekha ninge palibe chomwe chinkuchitika, pomwe iye adamaliza kuwerenga adanikumbira kuti abule panja, pa nthawe pang’ono iye adabwererako na wana wake awiri ndipo adaniyankhula ntima uli m’malo kuti: “Pepani nimbakatenga wana awa.”

Isepano tidagumanambo na vinthu vopasa mantha. Ntsiku inango tinkulalikira nyumba na nyumba nkazi wangu adabwera ankuthamanga uku ankuchita mantha na kunjenjemera, iye adanena kuti munthu munango wenze adamulata na mpfuti kuti amulizire. Nidakalipa maninge koma patsogolo pake nidazindikira kuti munthu muyo ambafunalini kulizira nkazi wangu. Koma ambafuna kulizira mwamuna munango yemwe ambagwata pafupi na Sirkka.

Pakuti abale wa kumoko ambachitalini mantha, vimwevi vidatithandiza kuti tikhale olimba ntima pa vinthu vopasa mantha maninge ndipo tidakhala otsimikiza kuti peno Yahova ankuthandiza abale mwawa na isembo angatisiyelini. Kuchokera mwapa timbaphatisa basa malangizo ya akulu wa kumoko ndipo nthawe zose timbakhala osamala nkusiya vose m’manja mwa Yahova.

Koma nthawe zinango timbandochita mantha na vinthu vomwe venzelini vogopsa. Nthawe inango nenze nyumba ya m’bale munango ndipo nidabva ninge akazi awiri ankuyankhula mokuwa pafupi na nyumba yetenze. Inepano nimbafunalini kuwona wanthu ankugegedzana, koma munikachiro wa mwapo adangingimira kuti niyende naye pabodzi kuti nikawone nekha vomwe  vimbachitika. Patsogolo pake nidazindikira kuti enzelini wanthu omwe “ambagegedzana” koma venze vimbalani vikulu vikulu vochita kuweta vomwe vimbatewedzera mavizinyo.

Mu 1997, nidayikhiwa kuti nikhale mpfunzisi wa Shikola ya Olalikira Utumiki. b Kwa ine venze vokomedza kungena shikola zopfunzisa Baibolo koma nenze nikalibe naganizirako kuti ntsiku inango nidzakhale mpfunzisi wa mashikola mwaya.

Patsogolo pake, nidatumikira ninge wonyang’anira chigawo, utumiki moyu paudayimisiwa nidayamba pomwe kutumikira ninge wonyang’anira dera. Manje papita magole 30 ndipo nakhala wokondwa maninge kutumikira ninge mpfunzisi komasoti ninge wonyang’anira dera. Nagumana madaliso yazinji ndawa ya mautumiki mwaya. Koma sikuti nthawe zose vimbanifambira bwino. Lekani nikusimbireni bwinobwino ndawa yake ninkulewa tene.

Inepano ninabvuto yakuti nikawona bvuto nifuna kuyikonzeratu, vimwevi vanithandiza maninge kuti nikhale wolimba pa mabvuto yomwe nakhala ninkugumana nayo. Koma nthawe zinango nimbachita vinthu monyanyira nikafuna kukonza mabvuto mumpingu. Nthawe inango nidauza abale kufunika kwa kukhala wachikondi na wachikatikati pochita vinthu na anango. Powapasa malangizo mwaya inepanoletu ndine nidachita vinthu monyanyira maninge ndipo nilibe kuwachitira vinthu mwachikondi na mwachikatikati.—Aro. 7:21-23.

Nthawe inango nikhala wokwinyirira maninge ndawa ya vinthu vomwe niphonyesa. (Aro. 7:24) Nthawe zinango nidapemphera kwa Yahova kuti vingakhale bwino kuti nisiye utumiki wa umishonale nkubwerera ku Finlândia. Koma ntsiku mweyireretu nidayenda kumisonkhano ndipo vomwe nidakabva vidanitsimikizira kuti ninkudekana kupitiriza pa utumiki wangu nkumbayesesa kulimbana na uchimo. Nikaganizira vomwe nidamukumbira Yahova na momwe adanidawirira nidabwisiwa maninge mpaka lero. Kuingizira mwapa nitembeja maninge Yahova ndawa yochita nane vinthu modekha ndipo anithandiza kugwebana na vophonya vangu.

Inepano na Sirkka tinkutembeja maninge Yahova ndawa yakutipasako mwayi wochita utumiki wa nthawe zose. Ndipo inembo ninkutembeja maninge Yahova ndawa yonipasa nkazi wokhulupirika na wachikondi pa magole yose mwaya.

Manjemanje inepano nikwanise magole 70 ndipo nidzafuneke kusiya kutumikira ninge mpfunzisi na kusiya pomwe basa yonyang’anira dera. Koma vimwevi vinifokesalini olo pang’ono. Mukudziwa ndawa chani? Ndawa ninkutsimikiza kuti Yahova awona kuti chofunika kwa iye ni kumutumikira modzichepesa, kumukonda maninge na kumutembeja. Vimwevi ndivo vomwe vibweresa ulemelero kwa Mulungu. (Mika 6:8; Maliko 12:32-34) Kuti tilemekeze Yahova vitofunalini kukhala pa utumiki wobvekera.

Nikanyang’ana m’mambuyo nkuwona mautumiki yomwe nachita sikuti nidatambira mautumiki mwaya ndawa kuti ndine wofunika maninge kuposha anango panango kukhala na buya yapadera neye. Koma Yahova adanipasa mautumiki yake mwaya ndawa ya kukoma ntima kwake kukulu. Ndipo iye adabvuma kuti nichite mautumiki mwaya podiya kuti niphonyesa vinthu ndipo ninkudziwa kuti nidakwanisa kuchita vose vimwevi ndawa yothandiziwa na Yahova. Ndipomwapa inepano ninkunena kuti vofoka vangu vichitisa kuti mphanvu ya Mulungu iwoneke.—2 Akor. 12:9.