مَیں 1955 چ پیدا ہویا۔ میرے دو بھرا نیں تے مَیں سب توں چھوٹا واں۔ ساڈا گھر فن‌لینڈ دے جنوب چ اِک سمندری علاقے دے نیڑے سی۔ اوہ علاقہ ہُن وَنتا شہر دے ناں توں مشہور اے۔‏

میرے پیدا ہون توں پہلاں ای میری امی نے یہوواہ دے اِک گواہ دے طور تے بپتسمہ لیا سی۔ پر ابو، امی دی سخت مخالفت کردے سن۔ اوہ نئیں چاہندے سن کہ امی سانوں یہوواہ بارے سکھائے یاں سانوں عبادتاں تے لجائے۔ ایس لئی امی سانوں اوہدوں بائبل دی تلیم دیندے سن جدوں ابو گھر نئیں ہوندے سن۔‏

چھوٹی عمر توں ای میرے دل چ یہوواہ لئی بوہت پیار سی تے مَیں اوہنوں خوش کرنا چاہنا ساں۔ جدوں مَیں 7 سال دا ساں تے اِک دن سکول چ اِک ٹیچر نُوں میرے تے بڑا غصہ آیا کیونکہ مَیں اِک ایہو جیہا کھانا کھان توں منع کر دِتا جیہڑا خون نال تیار کیتا جاندا اے۔ ٹیچر نے مینوں پھڑ کے اوہ کھانا زبردستی میرے مُونہہ چ پان دی کوشش کیتی۔ پر مَیں اوہدا ہتھ پراں کر دِتا۔‏

جدوں مَیں 12 سال دا ساں تے میرے ابو فوت ہو گئے۔ ہُن مَیں اسانی نال عبادتاں تے جا سکنا ساں۔ کلیسیا چ بھراواں نے میرے لئی بوہت فکر وکھائی جدی وجہ توں میرے دل چ یہوواہ دی ہور خدمت کرن دی خواہش پیدا ہوئی۔ مَیں روز بائبل پڑھنی شروع کیتی۔ نالے مَیں بڑے شوق نال تنظیم دِیاں کتاباں پڑھنا ساں۔ ایسے وجہ توں مَیں 8 اگست 1969 نُوں 14 سال دی عمر چ بپتسمہ لے لیا۔‏

سکول دی پڑھائی ختم کرن توں بعد مَیں پہل‌کار بن گیا۔ ایہدے کجھ ای ہفتیاں بعد مَیں فن‌لینڈ دے اِک ایہو جہے علاقے چ چلا گیا جتھے مبشراں دی زیادہ ضرورت سی۔‏

اوتھے میری ملاقات سیرکا ناں دی اِک بھین نال ہوئی۔ اوہدی خاکساری تے یہوواہ لئی اوہدا گوڑھا پیار مینوں بوہت پسند آیا۔ ایس لئی مَیں اوہدے نال ویاہ کر لیا۔ اوہنوں پیسے تے چیزاں نال پیار نئیں سی تے نہ ای اوہ دُوجیاں دی واہ واہ پانا چاہندی سی۔ ساڈے دونواں دی دِلی خواہش سی کہ اَسی ودھ‌چڑھ کے یہوواہ دی خدمت کرئیے تے اَسی اوہدے لئی کِتے وی جان لئی تیار ساں۔ ساڈا ویاہ 23 مارچ 1974 نُوں ہویا۔ شادی توں بعد چھٹیاں تے جان دی بجائے اَسی کارتولا چ خدمت کرن لئی چلے گئے جتھے مبشراں دی بڑی ضرورت سی۔‏

ساڈی شادی دے شروع توں ای یہوواہ نے سانوں وکھایا اے کہ جے اَسی اوہدی بادشاہی نُوں سب توں زیادہ اہمیت دَواں گے تے یہوواہ ساڈیاں ضرورتاں دا خیال رکھے گا۔ (‏متی 6:‏33‏)‏ مثال لئی، کارتولا چ ساڈے کول گڈی نئیں سی۔ ایس لئی اَسی سائیکل استمال کرنے ساں۔ پر سردیاں چ اوتھے خون جما دین والی ٹھنڈ پیندی سی۔ ساڈا مُنادی دا علاقہ بوہت ای وڈا سی۔ ایس لئی سانوں اِک گڈی دی لوڑ سی۔ پر ساڈے کول اینے پیسے نئیں سن۔‏

پر فیر اِک دن اچانک میرا وڈا بھرا سانوں مِلن آیا تے اوہنے اپنی گڈی سانوں دے دِتی۔ اوہنے تے ایہدی انشورنس وی کرائی ہوئی سی۔ اَسی بس اوہدے چ پیڑول پوانا سی۔ اَسی اوہدی مہربانی لئی بڑے شکرگزار ساں۔‏

یہوواہ نے بڑے شاندار طریقے نال ساڈیاں ضرورتاں دا خیال رکھن دی اپنی ذمے‌داری نُوں پورا کیتا۔ ہُن ساڈا فرض سی کہ اَسی اوہدے کم نُوں اپنی زندگی چ سب توں زیادہ اہمیت دیندے رہیے۔‏

جدوں 1978 چ اَسی پہل‌کاراں لئی سکول چ ساں تے سکول لین والے اِک بھرا رائمو کواکنین نے سانوں حوصلہ دِتا کہ اَسی گلئیڈ سکول چ جان لئی درخاست دَئیے۔ ایس منصوبے نُوں پورا کرن لئی اَسی انگریزی سکھنی شروع کر دِتی۔ پر گلئیڈ سکول لئی درخاست دین توں پہلاں ای 1980 چ سانوں فن‌لینڈ دے بیت‌ایل چ خدمت کرن لئی بلا لیا گیا۔ اوس ویلے بیت‌ایل چ خدمت کرن والے بھین بھرا گلئیڈ لئی درخاست نئیں پا سکدے سن۔ پر اَسی اوتھے خدمت کرن لئی تیار ساں جتھے یہوواہ چاہندا سی نہ کہ اوتھے جتھے اَسی چاہنے ساں۔ ایس لئی اَسی بیت‌ایل چ خدمت کرن دی دعوت نُوں قبول کر لیا۔ پر فیر وی اَسی ایہہ سوچ کے انگریزی سکھدے رہے کہ کیہہ پتہ اِک دن سانوں گلئیڈ لئی درخاست دین دا موقع مِل جائے۔‏

کجھ سالاں بعد گورننگ باڈی نے بیت‌ایل چ خدمت کرن والیاں نُوں ایہہ اجازت دے دِتی کہ اوہ وی گلئیڈ سکول لئی درخاست پا سکدے نیں۔ اَسی فوراً گلئیڈ سکول لئی درخاست بھر دِتی۔ پر ایہدی وجہ ایہہ نئیں سی کہ اَسی بیت‌ایل چ خوش نئیں ساں سگوں اَسی اوتھے خدمت کرن لئی تیار ساں جتھے مبشراں دی زیادہ ضرورت سی۔ گلئیڈ سکول لئی ساڈی درخاست قبول ہو گئی تے ستمبر 1985 چ سانوں گلئیڈ دی کلاس نمبر 79 چ بلا‌یا گیا۔ سکول دے بعد سانوں ملک کولمبیا گھلیا گیا۔‏

کولمبیا چ سانوں بیت‌ایل چ خدمت کرن لئی گھلیا گیا۔ اوتھے مَیں پورے جی‌جان نال خدمت کیتی۔ پر اِک سال بعد مَیں محسوس کیتا کہ سانوں تبدیلی دی لوڑ اے۔ ایس لئی مَیں زندگی چ پہلی وار ایہہ درخاست کیتی کہ سانوں کوئی فرق ذمے‌داری دِتی جائے۔ مَیں ایہو جہی درخاست ایس توں بعد کدی نئیں کیتی۔ فیر سانوں مشنریاں دے طور تے شہر نیوا گھلیا گیا جیہڑا خوُیا دے علاقے چ وے۔‏

ہمیشاں توں مینوں مُنادی دا کم بڑا ای پسند اے۔ فن‌لینڈ چ جدوں شادی توں پہلے مَیں پہل‌کار ساں تے مَیں سویرے سویرے مُنادی شروع کرنا ساں تے رات دیر تک کردا رہنا ساں۔ فیر جدوں ساڈا ویاہ ہویا تے سیرکا تے مَیں سارا سارا دن مُنادی کرنے ساں۔ جدوں اَسی کسے دُور دے علاقے چ مُنادی کرنے ساں تے رات نُوں اَسی اپنی گڈی چ ای سو جانے ساں۔ اِنج ساڈا سفر دا ٹائم بچ جاندا سی تے اَسی سویرے سویرے اوس علاقے چ مُنادی شروع کر سکنے ساں۔‏

مشنریاں دے طور تے خدمت کر کے سانوں بڑی خوشی ہوئی تے مُنادی لئی وی ساڈا جوش پہلے ورگا ہو گیا۔ کلیسیا چ مبشراں دی تعداد ودھدی گئی۔ اوتھے دے بھین بھرا ساڈے نال پیار تے عزت نال پیش آندے سن تے ساڈی بڑی قدر کردے سن۔‏

نیوا دے آلے دَوالے کئی ایہو جہے پِنڈ سن جنہاں چ کوئی یہوواہ دا گواہ نئیں سی۔ مَیں ایس گلوں پریشان ساں کہ اوہناں لوکاں تک خوش‌خبری کیویں پونچے گی۔ دہشت‌گرداں دی وجہ توں باہر دے لوکاں لئی اوہناں علاقیاں چ جانا بڑا خطرناک سی۔ ایس لئی مَیں دُعا کرنا ہُنا ساں کہ اوہناں علاقیاں چ کوئی بندہ یہوواہ دا گواہ بن جائے۔ پر مینوں لگدا سی کہ ایہدے لئی ضروری اے کہ اوہ بندہ نیوا چ رہندا ہوئے۔ ایس لئی مَیں دُعا کرنا ہُنا ساں کہ بپتسمے دے بعد اوہ بندہ ودھ‌چڑھ کے یہوواہ دی خدمت کرے تے واپس اپنے پِنڈ جا کے مُنادی کرے۔ پر مینوں پتہ ہونا چاہی دا سی کہ یہوواہ کول میرے توں وی ودھیا حل ہوئے گا۔‏

ایہدے کجھ عرصے بعد مَیں اِک جوان آدمی نُوں بائبل کورس کرانا شروع کیتا جدا ناں فرنینڈو گانزالس سی۔ اوہ الگی‌سیراس چ رہندا سی جیہڑا اوہناں پِنڈاں چوں اِک سی جتھے کوئی یہوواہ دا گواہ نئیں سی۔ فرنینڈو 50 توں وی زیادہ کلومیٹرسفر کر کے کم لئی نیوا آندا سی۔ اوہ بائبل کورس لئی ہر واری بڑی چنگی تیاری کردا سی تے چھیتی ساریاں عبادتاں تے وی آن لگ پیا سی۔ بائبل کورس شروع کرن دے پہلے ہفتے توں ای فرنینڈو اپنے پِنڈ دے لوکاں نُوں جمع کر کے اوہناں نُوں اوہ گلاں دَسن لگ پیا جیہڑیاں اوہ بائبل کورس چ سکھ رہیا سی۔‏

بائبل کورس شروع کرن دے بس 6 مہینے بعد فرنینڈو نے جنوری 1990 چ بپتسمہ لے لیا تے بعد چ پہل‌کار بن گیا۔ ہُن برانچ نُوں لگیا کہ اوس علاقے چ خاص پہل‌کاراں نُوں گھلیا جا سکدا اے کیونکہ اوتھے اِک مقامی بندہ یہوواہ دا گواہ بن گیا سی۔ فروری 1992 چ اوس پِنڈ چ اِک کلیسیا بن گئی۔‏

کیہہ فرنینڈو صرف اپنے پِنڈ چ ای مُنادی کردا رہیا؟ ویاہ دے بعد اوہ  تے اوہدی بیوی سین وی‌سنتے دلکاگوان چلے گئے کیونکہ اوس پِنڈ چ وی کوئی یہوواہ دا گواہ نئیں سی۔ اوہناں دی محنت دی وجہ توں اوتھے اِک کلیسیا بن گئی۔ 2002 چ فرنینڈو حلقے دا نگہبان بن گیا تے اوہ تے اوہدی بیوی اولگا حالے تک ایہہ خدمت کر رہے نیں۔‏

ایس تجربے توں مَیں سکھیا کہ خاص خاص معاملیاں بارے دُعا کرنا کِنّاں ضروری اے تاکہ اَسی یہوواہ دی خدمت چ اپنیاں ذمے‌داریاں نُوں پورا کر سکئے۔ یہوواہ اوہ کر سکدا اے جو ساڈے لئی ناممکن اے کیونکہ ایہہ کم ساڈا نئیں سگوں اوہدا اے۔—‏متی 9:‏38‏۔‏

1990 چ مینوں حلقے دے نگہبان دے طور تے خدمت کرن دی ذمے‌داری دِتی گئی۔ ساڈا پہلا حلقہ کولمبیا دا درالحکومت شہر بوغوتا سی۔ سانوں لگیا کہ اَسی ایس ذمے‌داری دے قابل نئیں آں۔ مَیں تے میری بیوی عام جہے لوک آں تے ساڈے کول کوئی خاص ہنر نئیں اے۔ نالے اَسی پہلاں کدی وی کسے وڈے شہر چ نئیں رہے ساں۔ پر یہوواہ نے فِلپّیوں 2:‏13 چ لکھیا اپنا ایہہ وعدہ پورا کیتا:‏ خدا خوشی نال توانوں ہمت بخشدا اے تاکہ تواڈے چ ایہو جہے کم کرن دی خواہش تے طاقت پیدا ہوئے جیہڑے اوہنوں پسند نیں۔‏

بعد چوں سانوں میداعین دے علاقے چ خدمت کرن لئی گھلیا گیا جدا ذکر مَیں شروع چ کیتا سی۔ اوس شہر چ جُرم ایناں عام سی کہ ایہنوں ویکھ کے لوک حیران نئیں ہوندے سن۔ مثال لئی، اِک واری جدوں مَیں اِک گھر چ بہہ کے بائبل کورس کرا رہیا ساں تے اچانک گلی چ گولیاں چلنیاں شروع ہو گئیاں۔ گولیاں توں بچن لئی مَیں زمین تے لیٹن والا ساں۔ پر بائبل کورس کرن والا بندہ آرام نال پیراگراف پڑھدا رہیا۔ پیراگراف پڑھن دے بعد اوہ باہر گیا۔ تھوڑی دیر بعد اوہ اپنے دو بچیاں نُوں لے کے واپس آیا تے آرام نال کہیا:‏ ”‏معاف کرنا، مَیں بس ویکھن گیا ساں کہ بچے ٹھیک نیں۔“‏

ایہو جہے ہور واقعے وی ہوئے۔ اِک وار جدوں اَسی گھر گھر مُنادی کر رہے ساں تے میری بیوی بھجی بھجی میرے کول آئی۔ اوہدا رنگ اُڈیا ہویا سی۔ اوہنے کہیا کہ کسے نے اوہدے تے گولی چلائی۔ ایہہ سُن کے مَیں بوہت ڈر گیا۔ بعد چوں سانوں پتہ چلیا کہ اوس بندے نے گولی سیرکا تے نئیں سگوں اوس آدمی تے چلائی سی جیہڑا اوہدے اَگوں لنگھ رہیا سی۔‏

وقت دے نال نال اَسی ایہو جہے حالاتاں چ جینا سکھ لیا۔ سانوں اوتھے رہن والے بھین بھراواں دی ہمت توں بڑا حوصلہ مِلیا جنہاں نے ایس توں وی بھیڑے حالات ویکھے سن۔ اَسی سوچیا کہ جے یہوواہ اوہناں دی مدد کر رہیا اے تے اوہ ساڈی وی مدد کرے گا۔ اَسی ہمیشاں مقامی بزرگاں دِیاں ہدیتاں نُوں منیا، احتیاط توں کم لیا تے باقی سب کجھ یہوواہ دے ہتھاں چ چھڈ دِتا۔‏

پر کجھ واقعے اونے خطرناک نئیں سن جِنّاں اَسی سوچیا سی۔ اِک واری جدوں مَیں اِک بندے نُوں اوہدے گھر بائبل کورس کرا رہیا ساں تے مینوں لگیا کہ گلی چ دو عورتاں لڑ پئیاں نیں تے اِک دُوجے نُوں گالاں کڈھ رہیاں نیں۔ مینوں اوہناں دی لڑائی ویکھن دا کوئی شوق نئیں سی۔ پر جدوں بائبل کورس کرن والے بندے نے مینوں باہر آن لئی کہیا تے فیر مینوں پتہ چلیا کہ ایہہ کوئی لڑائی نئیں سی سگوں دو طوطے گوانڈھیاں دی نقل لا رہے سن۔‏

1997 چ مینوں تنظیم دے اِک سکول چ تربیت دین دی ذمے‌داری دِتی گئی۔ ایہہ سکول غیر شادی‌شُدہ بھراواں لئی سی۔‏ a مینوں تنظیم دے سکولاں توں  تربیت حاصل کر کے بوہت فائدہ ہویا سی۔ پر مَیں کدی وی نئیں سوچیا سی کہ اِک دن مینوں تنظیم دے کسے سکول چ تربیت دین دا شرف ملے گا۔‏

بعد چوں مَیں صوبے دے نگہبان دے طور تے خدمت کیتی۔ جدوں اوہ بندوبست ختم ہو گیا تے مَیں فیر توں حلقے دے نگہبان دے طور تے خدمت کرن لگ پیا۔ مَیں 30 سالاں توں وی زیادہ عرصے توں ایہہ ذمے‌داری نبھا رہیا واں تے ایہدے نال نال مَیں کدی کدی تنظیم دے سکولاں چ وی تربیت دینا واں۔ ایہناں ذمے‌داریاں دی وجہ توں مینوں بوہت ساریاں برکتاں مِلیاں نیں۔ پر مینوں مشکلاں دا وی سامنا ہویا اے۔‏

میریاں خوبیاں نے میری مدد کیتی اے کہ مَیں اوکھے حالاتاں دا سامنا دلیری نال کر سکاں۔ پر کدی کدی کلیسیاواں دے معاملیاں نُوں ٹھیک کرن لئی مَیں حدوں ودھ جوشیلا ہو جانا ساں۔ کئی وار مَیں دُوجیاں نُوں سمجھانا ساں کہ بھین بھراواں نال پیش آندے ویلے پیار تے لچک‌داری دی خوبی وکھانی چاہی دی اے۔ پر افسوس دی گل اے کہ اوس ویلے مَیں آپ ایہہ خوبیاں نئیں وکھا رہیا ساں۔—‏رومیوں 7:‏21-‏23‏۔‏

اپنیاں کمزوریاں دی وجہ توں کدی کدار مَیں بوہت بے‌حوصلہ ہویا واں۔ (‏رومیوں 7:‏24‏)‏ اِک واری مَیں دُعا چ یہوواہ نُوں کہیا کہ شاید بہتر اے کہ مَیں اپنی مشنری خدمت چھڈ کے واپس فن‌لینڈ چلا جاواں۔ اوس شام مَیں عبادت چ جیہڑیاں گلاں سُنیاں، اوہناں توں مینوں ایناں حوصلہ مِلیا کہ مَیں فیصلہ کیتا کہ مینوں اپنی خدمت جاری رکھنی چاہی دی اے تے اپنیاں کمزوریاں تے کم کردے رہنا چاہی دا اے۔ اوہ دن مینوں اَج تک یاد اے کیونکہ مَیں صاف صاف ویکھیا کہ یہوواہ نے میری دُعا دا جواب کیویں دِتا اے تے ایس گل نے میرے دل نُوں چُھو لیا۔ نالے مَیں یہوواہ دا دِلوں شکرگزار آں کیونکہ اوہنے میری مدد کیتی اے تاکہ مَیں اپنیاں کمزوریاں تے قابو پا سکاں۔‏

سیرکا تے مَیں یہوواہ دے بڑے شکرگزار آں کہ اوہنے سانوں ایہہ شرف دِتا اے کہ اَسی جوانی توں لے کے بڑھاپے تک کل‌وقتی طور تے اوہدی خدمت کر سکئے۔ نالے مَیں یہوواہ دا بڑا شکرگزار آں کہ اوہنے مینوں اینی چنگی تے وفادار بیوی دِتی اے۔‏

چھیتی ای مَیں 70 سالاں دا ہو جاواں گا۔ ایس لئی مَیں حلقے دے نگہبان دے طور تے اپنی خدمت جاری نئیں رکھ سکاں گا تے نہ ای میرے کول تنظیم دے سکولاں چ تربیت دین دی ذمے‌داری ہوئے گی۔ پر مَیں ایس گلوں مایوس نئیں آں کیونکہ مینوں ایس گل تے پورا بھروسا اے کہ یہوواہ دی نظر چ سب توں اہم ایہہ وے کہ اَسی خاکساری نال اوہدی خدمت کریئے۔ نالے اوہ چاہندا اے کہ ساڈا دل اوہدے لئی محبت تے شکرگزاری نال بھریا ہووے۔(‏میکاہ 6:‏8؛‏ مرقس 12:‏32-‏34‏)‏ یہوواہ دی وڈیائی کرن لئی ایہہ ضروری نئیں کہ ساڈے کول کوئی خاص ذمے‌داری ہوئے۔‏

جدوں مَیں تنظیم چ اپنیاں ذمے‌داریاں بارے سوچنا واں تے مینوں احساس ہوندا اے کہ مینوں ایہہ ذمے‌داریاں ایس لئی نئیں مِلیاں کیونکہ مَیں دُوجیاں نالوں بوہتا لائق آں یاں میرے چ کوئی خاص صلاحیت اے۔ ایہدی بجائے مینوں ایہہ ذمے‌داریاں صرف یہوواہ دی عظیم رحمت دی وجہ توں مِلیاں نیں۔ اوہنے میریاں کمزوریاں دے باوجود مینوں اپنی خدمت چ استمال کیتا اے تے مینوں پتہ اے کہ صرف یہوواہ دی مدد نال ای مَیں اپنیاں ذمے‌داریاں نُوں پورا کر سکیا واں۔ ایس لئی مَیں کہہ سکنا واں کہ میریاں کمزوریاں چ خدا دی طاقت ظاہر ہوئی اے۔—‏2-‏کُرنتھیوں 12:‏9‏۔‏