Anay jeʼm amtyɨy 1955, y maaj ajaʼyukpɨk de tukuteen antɨwɨtam. Amɨja jeʼm tɨgan̈juj de Vantaa, toomi Finlandia.

Anaapa chin̈ juʼuts Jehová itestigo wiñtyi iga anaʼyiñ. Anjaatun̈ tsaam ijoʼykaʼ, iñɨʼmay anaapa iga odoy an̈kejaytyaʼmiñ jeʼm Biblia y odoytyim ananɨktaʼmiñ jeʼm an̈tuʼumaajiyaj. Jeʼyukmɨ jesɨk anjaatun̈ dyaʼ itypa idyɨk, anaapa an̈kejaytyaʼmpa.

Dende amaañjom ampɨk anjɨɨxi iga an̈kuyooxaap Jehová. Jesɨk anaity idyɨk siete anamtyɨy ammaestra pɨɨmi ijoʼykaʼ iga dyaʼ an̈kɨʼɨs tuum torta iga watneta idyɨk kun nɨʼɨpiñ. An̈aʼyay anjɨp y kun pɨɨmimɨ akkɨʼɨspa idyɨk, pero ɨch anakyaʼgɨyay jeʼm ikɨʼ y dyaʼ an̈kɨʼɨs.

Anjaatun̈ kaʼ jesɨk anaity idyɨk 12 anamtyɨy. Okmɨ wɨa mu annɨk jeʼm an̈tuʼumaajijomyaj. Jeʼm tɨwɨtam tsaam ateguedayaj y yɨʼp anmajan̈chiʼ iga amɨjaiñ espiritualmente. Moj ammay jeʼm Biblia tumtum jaama y an̈wɨkuyujkayaj jeʼm totjaayiyaj, yɨʼbam ayooxpaʼt iga wɨaiñ anchin̈ jesɨk anaity idyɨk 14 anamtyɨy, jeʼm jaama 8 de agosto de 1969.

Jesɨk aput secundaria anaktsukum jeʼm precursorado regular. Weeñi semanas okmɨ nɨk aityi Pielavesi, tuum tɨgan̈juj iga  ity nookoʼ de Finlandia jemum moj anan̈mat.

En Pielavesi, añixpɨk Sirkka, kun jempɨk maaj okmɨ an̈koʼmɨʼyba idyɨk. Tsaam an̈kusuʼnɨy iga jeʼ ikwiñkejpa modestia y ityoyba Jehová. Jeʼ dyaʼ iniitytyoʼoba idyɨk jaʼyan̈ tyidyin̈kej. An̈wɨstɨktam an̈wɨkuyooxatamtoʼoba Jehová y an̈wattamtoʼoba juʼptyin̈kej yooxakuy iga achiʼityamtaiñ. An̈koʼmɨytyaʼm jeʼm jaama 23 de marzo de 1974. Jesɨgam anɨktaʼm Karttula, juutytyim dyaʼ i Testigojyaj.

Dende jesɨk an̈koʼmɨytyaʼm, anaʼmnetaʼm juutypɨk Jehová akuixñetaʼm (Mat. 6:33). Jemɨk Karttula, asɨʼɨtaʼmpa idyɨk bicicletayukmɨ iga dyaʼ anaitytyaʼm tuum carro, pero jesɨk nuʼkpa jeʼm pagak tsaam idyɨk tan̈kaʼ. Y atogoyaytyaʼm idyɨk tuum carro iga jeʼm kumun iniity idyɨk jaʼyan̈ territorio, pero dyaʼ atumiñɨytyaʼm iga anjuytyaʼmpa.

Tuum jaama, tuum antɨɨwɨ miñ ajooyaytyaʼm y asajchityaʼm jeʼm icarro, yajneum idyɨk iyoj y numaaj ixunba iga anakkaʼmaytyaʼmiñ gasolina. ¡Sɨɨ anaitytyaʼmum idyɨk tuum carro!

Jehová an̈kejaytyaʼm iga achiʼityaʼmpa jempɨk atogoyaytyaʼm. Siiga juchixkej an̈kuyooxataʼmpa idyɨk.

En 1978, jesɨk aitytyaʼm idyɨk jeʼm Escuela del Servicio de Precursor, Raimo Kuokkanen, a aanmajan̈chiʼityaʼm iga anɨktaʼmiñ jeʼm Escuela de Galaad. Jeʼyukmɨ moj an̈kuyujkataʼm inglés, kun jeʼm jɨɨxi iga anakupaktaʼmiñ tyityam nasuntaap idyɨk iga wɨaiñ annɨktaʼm. Pero dyaʼ an̈kutsattaʼm jeʼm solicitud iga en 1980 atɨʼptamta iga nɨguiñ akuyooxaoʼoyityam jeʼm sucursal de Finlandia. Peʼm tiempo jeʼm betelitas dyaʼ wɨap idyɨk iñɨkyaj Galaad. An̈kuyooxatamtoʼoba idyɨk Jehová juuty jeʼ ixunba, dyaʼ juuty aɨchtyam ansuntaʼmpa. Jeʼyukmɨ ampɨktson̈taʼm jeʼm invitación. Pero seguido an̈kuyujkataʼm inglés siiga maaj okmɨ wɨapnam idyɨk annɨktaʼm Galaad.

Maaj okmɨ jeʼm Kumun Nayooxaoyyajpaʼap nɨmyaj iga jeʼm betelitas wɨaptyim iñɨkyaj Galaad. Jeʼyukmɨ jikskɨy an̈kutsattaʼm  jeʼm solicitud. Mex iga amaymaytyam jemɨk Betel anɨktamtoʼobatyim idyɨk juuty maaj nasuntaap yooxpadoʼoyi. Atɨʼptamta iga anɨktaʼmiñ jeʼm clase número 79 de Galaad, y kuyaj en septiembre de 1985. ¡Y akutsattamta Colombia!

Jesɨk anuʼktaʼm Colombia, akutsattamta iga akuyooxaoytyaʼmiñ en jeʼm sucursal. An̈wɨwattɨʼp jeʼm anyooxakuy, pero jesɨk kaʼps tuum amtyɨy ankujɨɨs iga atogoyaytyaʼm idyɨk tuum kukaki. Numaaj tyun̈kɨy an̈waʼk iga akukagayaytyaiñ jeʼm anyooxakuy. Jesɨgam akutsattamta juʼuts misioneros jemɨk Neiva, tuum an̈eymɨ de Huila.

Tsaam an̈kusuʼnɨʼyba jeʼm an̈matkuy. Jemɨk Finlandia, jesɨk an̈kutyumnam idyɨk y aprecursor, anan̈matpa idyɨk tsuʼuytyiñam hasta jeexpam kupiʼichaap. Y jesɨk an̈koʼmɨy kun Sirkka jeempɨktyim idyɨk an̈wattaʼmpa. Jesɨk anɨktaʼmpa idyɨk jeʼm territorios maaj juʼumɨ amon̈taʼmpa jeʼm carro. Jeempɨgam jesɨk kukejpa idyɨk jobitytyi mojpa anan̈mattaʼm.

Tsaam amaymaywattaʼm iga eybɨk moj aputyityam jeʼm an̈matkuyjom. Jeʼm kumunjom juuty akuyooxaoytyaʼmpa idyɨk majtyim jaʼyan̈yaj, y jeʼm tɨwɨtam tsaam toyoyyajpa y ikwiñkejyajpa idyɨk respeto.

Toomi juuty ity Neiva, ity waatyi tɨgan̈juj juuty dyaʼ i Testigo. Iga tsaam ity an̈aajiyaj peʼm an̈eymɨyaj tan̈kaʼ tañity jeem. ¿Juutypɨk iixpɨkyajpa idyɨk Jehová? Seguido anjɨɨs. Y moj an̈waʼgay Jehová iga tuum jempɨk ityyaj en Neiva tsɨʼyiñ juʼuts Testigo. An̈waʼgaytim iga okmɨ iga chin̈iñ mɨjajiñ espiritualmente, ipɨguiñ ijɨɨxi iga seedyiñ jeʼm an̈eymɨ juuty mɨjaneʼ y mojiñ in̈kejay tun̈gakyaj. Ɨch anjɨɨs iga yɨʼp jeʼ tuum wɨbɨk jɨɨxi, pero Jehová iniity idyɨk tuum maaj wɨbɨk.

Maaj okmɨ tuum pɨɨxiñ iñɨɨyipɨk Fernando González moj ikuyujkaʼ jeʼm Biblia, jeʼ ity idyɨk jeʼm tɨgan̈juj Algeciras, juuty dyaʼ i ni tuum Testigo. Jeʼ nɨkpa idyɨk yooxaaji tumtum semana Neiva, y witypa idyɨk tuumtsam 15 horas iga wɨaiñ iñuʼk. Iwɨtsakpa idyɨk ityumpɨy jempɨk ikuyujkaʼaba y dyaʼ an̈togoʼyba idyɨk jeʼm an̈tuʼumaajiyaj. Jeʼm wiñtyipɨk semana, in̈tuʼumawat weeñiyaj jempɨk ityyaj jeʼm ityɨgan̈jom y moj in̈kejay jempɨk sɨʼ idyɨk ikuyujkaʼ.

Fernando chin̈ en enero de 1990, nasneʼ seis meses idyɨk iga mojneʼ kuyuuji y jobitytyi tsɨʼy juʼuts precursor regular. Sɨɨ iga ityum idyɨk tuum Testigo en Algeciras, jeʼm sucursal ikutsat precursores especiales peʼm an̈eymɨ. Y en febrero de 1992 watta tuum kumun.

Pero Fernando dyaʼ tsɨʼy en Algeciras. Okmɨ iga an̈koʼmɨy, jeʼ y jeʼm iyoomoʼ Olga, nɨkyaj tun̈gak tɨgan̈juj juuty dyatyim i Testigojyaj: San Vicente del Caguán. Jeem yoxpadoyyaj iga idyiñ tuum kumun. Y jeʼm amtyɨy 2002 tɨʼpyajta iga kuyooxaoyyajiñ juʼuts circuito, y seguido kuyooxaoyñeyaj.

Yɨʼp nasɨyoʼoyi an̈kejay iga tsaam importante tan̈waʼgay Jehová iga tayooxpaʼdyiñ  kun jeʼm yooxakuy tachiʼiñewɨʼɨp. Jeʼ wɨap iwat jempɨk taɨchtyam dyaʼ tawɨataʼmpa. Jeʼm cosecha Jehová imɨʼɨchiʼ (Mat. 9:38).

En 1990, atsakta juʼuts superintendente de circuito y moj anjooyajtyaʼm Bogotá. Sirkka y ɨch ajeextyamtyim idyɨk juʼuts tun̈gakyaj, dyaʼ anan̈juynetam idyɨk iga aitytyaʼmpa tuum mɨjpɨk ciudad. Jeʼyukmɨ akɨɨn̈netam idyɨk uxan̈. Pero Jehová ikkupak jempɨk nɨmpa Filipenses 2:13: «Porque Dios iwatpa mimicht́ámaŋjo̱m juuts je iwɨ̱aŋja̱m. Michiiba jém wɨbɨc jɨ̱xi iga iŋwatpa juuts je ixunpa, miyo̱xpátpa iga wɨa̱iñ iŋwɨ̱watta».

Maaj okmɨ aknɨktamta jeʼm circuito de Medellín, jeʼm wiñyipɨk tɨgan̈juj iga anjɨykiʼmneʼ. Jeem jaʼyan̈yaj in̈juyneyajum jeʼm an̈aajiyaj y dyam kɨɨn̈yajpa. An̈jɨɨspa iga tun̈kɨy jesɨk akkuyujoʼyba idyɨk ansɨʼ, y ammaton̈ iga tujnɨɨmpa idyɨk ixɨʼyaj an̈nasmɨʼ. Ɨch atoʼksnean̈tɨn̈ba idyɨk naxyukmɨ, pero jempɨk sɨʼ idyɨk anakkuyuj seguido imay y dyaʼ ityegueda. Jesɨk yaj, anɨʼmay iga putpa idyɨk, okmɨ nuʼk kun wɨsteen xutyu tsɨxtyam y anɨʼmay: «Perdón oy ammets ammanɨktam».

Y dyaʼ numaaj yɨʼp atsɨgan̈jeʼktaʼm. Tun̈kɨy jesɨk aputnetam idyɨk jeʼm an̈matkuyjom miñ poyjiimɨ anyoomoʼ y pɨɨmi kupoʼobayñeʼ idyɨk. Y anɨʼmay iga tujneta idyɨk, ɨch pɨɨmi an̈jeʼk. Pero okmɨ an̈kutɨʼɨyɨytaʼm iga dyaʼ jeʼ sɨʼ ityujta, jeʼ idyɨk tuum pɨɨxiñ iga jeʼmtyim nɨki.

Ustam ustam moj anan̈yujtam jeʼm an̈aaji. Antsoowaixtyaʼmpa idyɨk iga jeʼm tɨwɨtam iyaʼachɨyyajpa yɨkxpɨk nasɨyoʼoyiyaj y tun̈gakyaj maaj dyaʼ wɨtampɨk. Anaʼmtaʼm iga Jehová sɨʼ idyɨk iyooxpaʼtyaj, an̈kupɨktaʼm iga jeempɨktyim idyɨk iwatpa kun aɨchtyam. Juchixkej an̈kupɨktaʼm jeʼm jɨɨxian̈chioʼoyiyaj iga achiʼityaʼmpa idyɨk jeʼm ancianojyaj, anakuixtyamtaap idyɨk y an̈kupɨktaʼmpa iga Jehová ayooxpaʼttaʼmpa idyɨk.

Dyaʼ juchixkej naspa jempɨk ɨchtyam an̈kujɨɨstaʼmpa idyɨk. Juʼuts akwiñkejoʼoyi, an̈kujɨɨspa iga jesɨk nɨkneʼ idyɨk anjooyay tuum yoomoʼ, ammaton̈ iga keʼnam wɨsteen yoomtam an̈aapa ixɨʼyaj. Ɨch dyaʼ anaʼmtoʼoba idyɨk jeʼm an̈aaji, pero jeʼm tɨk iomi anɨʼmay iga aaʼmpudyiñ. ¡Wɨsteen loros sɨʼ idyɨk iwatkiʼpsyaj jeʼm vecinos!

En 1997, atsakta juʼuts instructor de la Escuela de Entrenamiento Ministerial. b Tsaam an̈kusuʼnɨy iga atɨʼpta yɨʼp escuelas teocráticas, pero dyaʼ an̈kujɨɨs iga achiʼityaap idyɨk yɨʼp yooxakuy.

Okmɨ atsakta juʼuts superintendente de distrito. Pero jesɨk kuyaj eybɨk atsakta juʼuts circuito. Nɨkiam maaj de 30 amtyɨy iga sɨʼ an̈kuyooxaoy juʼuts instructor y  superintendente viajante. Yɨʼpyaj yooxakuyyaj achiʼiñeyaj jaʼyan̈ kumaykedoʼoyiyaj pero anan̈teeñkamoknetyim kutɨʼɨchiyaj.

Iga uxan̈ kamam ananmaj, ayooxpaʼtneʼ anyaʼachɨy jeʼm kutɨʼɨchiyaj, pero a veces iwatnetyim iga an̈kamam jɨyayyajiñ jeʼm tɨwɨtam. Juʼuts akwiñkejoʼoyi, a veces pɨɨmi anjɨyayyajpa jeʼm tɨwɨtam jesɨk annɨʼmayyajpa iga majnam ikwiñkejyajiñ toyoʼoyi y ikutɨʼɨyɨyyajiñ tun̈gakyaj. Jeʼm cualidades jempɨk ɨch atogoyay idyɨk iga majnam anakwiñkejiñ (Rom. 7:​21-23).

A veces an̈yaʼkpa iga ajeex (Rom. 7:24). Tun̈kɨy pɨɨmi idyɨk an̈yaʼkneʼ y annɨʼmay Jehová iga maaj wɨɨ siiga dyam akuyooxaoʼyba juʼuts misionero y aseedyiñ Finlandia. Pero peʼm jaama jempɨk an̈kumaton̈ jeʼm an̈tuʼumaajijom ayooxpaʼt iga seguido akuyooxaoʼyiñ y an̈wɨtsaguiñ anjɨɨxi. Dyaʼ an̈kujaʼamaʼyba juutypɨk Jehová ikutson̈ba jeʼm anan̈wejpadoʼoyi. Tsaam antsoowaixpa iga jeʼ ayooxpaʼtneʼ kun toyoʼoyi y ayooxpaʼtnetyim iga an̈wɨtsaguiñ jeʼm anjɨɨxi.

Sirkka y ɨch dyaʼ wɨap anyojaytyam ityumpɨy jempɨk Jehová achiʼiñetam iga wɨaneʼ an̈kuyooxataʼm a tiempo completo. Amaymaytyim iga achiʼiñeʼ tuum wɨbɨk anyoomoʼ iga ayooxpaʼtneʼ y akwiñkejayñeʼ ityoyoʼoyi.

Dyam jaʼyñeʼ anakkaʼpspa 70 anamtyɨy y dyam wɨap an̈kuyooxaoy juʼuts instructor y superintendente viajante. Pero dyaʼ an̈yaʼkpa. ¿Tyiʼiga? An̈wɨkupɨkneʼ iga Jehová ichoowaixpa jempɨk an̈watpa dyaʼ tyi ijoo siiga anaity tuum yooxakuy jeʼm kumunjom. Jeʼ tsaam ichoowaixpa jesɨk tan̈kuyooxaap kun modestia y tan̈kujiʼppa kun toyoʼoyi y kun maymayaaji (Miq. 6:8; Mar. 12:​32-34).

Jehová pɨɨmi akumayketneʼ jeʼm añityijom, achiʼ jaʼyan̈ yooxakuy dyaʼ iga awɨap idyɨk an̈wat jaʼyan̈ tyidyin̈kej. Akwiñkejay jeʼm iyaʼachan̈jamoʼoyi mex iga atan̈kaɨy. Kun jeʼm iyooxpadoʼoyi wɨa mu anakkupak jeʼm yooxakuyyaj. Wɨap annɨm iga jeʼm Dios ipɨɨmi ayooxpaʼtneʼ (2 Cor. 12:9).