I ipwidi nan pahr 1955, oh ngehi me keieu tikitik rehn kiht pwutak silimeno. I tikida wasa me karanih oaroahr ni palieir en Finland, wasa me met kin adaneki kahnimw en Vantaa.

Ei nohnou papidaisla nin duwen emen Sounkadehdehn Siohwa sounpar kei mwohn ei ipwidi. Ahpw, ei pahpao kin uhwong padahk mehlel oh sohte mweidohng nohno en onop reht de waikihtla nan mihting en mwomwohdiso kan. Eri nohno kin padahkihong kiht padahk mengei en Paipel kan ahnsou me pahpa sohte kin mie.

Sangete ahnsou me I tikitik, I sohte kin men sapeikiong Siohwa. Karasepe, ehu ahnsowo ni ei sounpar isuh, ei sounpadahko lingeringerda pahi pwehki ei sohte iang kang verilättyjä (pankeik en Finland me mie nta loale). Elep peho, e padikpene sepeie pwehn kihpeseng eweie, a elep, e song en itonlong ekis pankeiko nan eweie. Ahpw I woakihsang pwohko nan peho.

Ahnsou me I sounpar 12, ei pahpao mehla. Mwurin mwo, I kakehr iang towehda mihting en mwomwohdiso kan. Brother kan nan mwomwohdisou kasalehda arail nsenohkin ie, oh met sewese ien kalaudehla ei karanih Siohwa. I tepida wadek Paipel ehuehu rahn oh pwerisekiong onopki neitail sawasepen Paipel kan. Pwehki met, I kak papidaisla ni ei sounpar 14, nan August 8, 1969.

Sohte pwand mwurin ei neksang sukuhl, I tepida pioneer. Nan wihk keite, I keseula pwehn papah  wasa me mie anahne laud, nan Pielavesi, wasa ehu me karanih nan werengen Finland.

Nan Pielavesi, I tuhwong serepeino me wiahla ei pwoud, Sirkka. I uhdahn poakohng pwehki e kin aktikitik oh uhdahn poakohng Siohwa. E sohte kin rapahki en kepwehpwehla de ndandla. Kiht koaros kin men wia uwen aht kak koaros nan aht papah Siohwa, oh kin men kapwaiada pwukoa koaros me se alehdi. Se kapwopwoudla nan March 23, 1974. Se sohte kohla mwemweit mwurin aht kapwopwoudo, ahpw se kohla papah nan Karttula, wasa me pil mie anahn laud ong sounkalohki Wehio kan.

Sangete ahnsou me se pwopwoudida, Siohwa ketin kasalehiong kiht ehr me e pahn ketin apwaliheki aht anahn kan ma se kin mwohneki mahs sapwellime Wehi. (Mad. 6:33) Karasepe, nan Karttula, sohte warat sidohsa. Nin tapio, se kin dake pwaisikel. Ahpw, ni ahnsou kopou, e kin uhdahn lemwulemwur. Pwehn kohla kalohk nan aht wasahn kalohk kan me uhdahn laud, se anahne sidohsa. Ahpw sohte nait mwohni pwehn pwainda ehu.

Ni aht sohte kasik, riei pwutak keriaun laudo mwemweitdo reht. Ni kadek e kihong kiht warat were sidohsao. Insurance en sidohsao pil pweipweilahr. Ihte me se anahne wia pwainda kahs. Mwurin mwo, miehier sidohsa me se anahne.

Siohwa ketin kasalehiong kiht me e pahn ketin pwukoahki apwaliheki aht anahn kan. Ihte me se pahn wia iei mwohneki mahs Wehio.

Erein aht iang towehda Sukuhl en Pioneer nan 1978, emen aht sounpadahk ko Raimo Kuokkanen, a kangoangehkin kiht sen audehda doaropwehn iang Sukuhl en Kilead. Eri se tepida sukuhlki lokaiahn wai pwe sen kak iang towehda sukuhlo. Ahpw nan 1980, mwohn aht kak audehda doaropweo, se alehdi luhk en papah nan ohpis en Finland. Ni ahnsowo, tohn Pedel kan sohte kak iang Sukuhl en Kilead. Ahpw se men papah wasa me Siohwa ketin kupwurki me keieu mwahu, kaidehn wasa me se medewe me keieu mwahu. Eri se ale luhko. Ahpw, se pousehlahte sukuhlki lokaiahn wai pwe se de peien alehdi luhk en iang Sukuhl en Kilead.

Sounpar kei mwuhr, Pwihn me Kin Apwalih Mwomwohdiso nan Sampah Pwon koasoia me tohn Pedel kan kakehr iang Sukuhl en Kilead. Se mwadangete audehda doaropwehn iang sukuhlo  ahpw kaidehn pwehki se sohte perenki Pedel. Weksang met, se men kaunopadahte pwe ma mie wasa ehu me mie anahn laud sen kohla ie oh ma se warohng. Se iang Sukuhl en Kilead nempe 79 oh kesepwil ni September 1985. Wasa me se kohla ie iei Colombia.

Se tepte doadoahk nan ohpis en Colombia. I song en wia uwen ei kak koaros nan ei pwukoau, ahpw mwurin sounpar ehu nan ohpiso, I pehm me se anahne wekidala aht pwukoa. Ehdin nan ei mour me I pekihda ehu pwukoa tohrohr. Mwurin mwo, se pekederla nin duwen misineri kei nan Neiva, nan kahnimw en Huila.

I kin ahnsou koaros perenki doadoahk en kalohk. Nin duwen pioneer kiripw men nan Finland, ekei pak I kin kalohk sang nimenseng lella nipwong. Ni ei pwopwoudida, ngehi oh Sirkka kin kalohk rahn ehu pwon. Ni aht kin kalohk wasa kan me dohsang imwato, ekei pak se kin pweidi nan warat sidohsao. Met katikala ahnsoun tangasang imwato lel ni wasahn kalohk oh se kak mwadang tepida rahno mwuri.

Nin duwen misineri kei, se pwurehng ahneki soangen ngoangohte me se ahneki mwoweo nan kalohk. Aht mwomwohdisou kekeirda, oh Kristian kan nan Colombia kin kasalehda wahu, limpoak, oh kalahngan.

Mie kisin kahnimw kan me sohte nohn dohsang aht wasao Neiva me sohte Sounkadehde Siohwa kan. I uhdahn pwunodki ia duwen rongamwahwo pahn lella wasa ko. Ahpw pwehki sounpei kan me kin uhwong koperment kin mahmahwen wasao, e uhdahn keper ong aramas me kaidehn tohn wasao. Eri I kin kapakapki me emen sang nan kahnimw pwukat pahn wiahla Sounkadehde. I medewe me soangen aramas menet pahn anahne mi Neiva pwehn sukuhlki padahk mehlel. Ihme kahrehda, I pil kin kapakapki me mwurin eh papidaisla en wiahla brother koahiek men oh pwurala eh wasao pwehn kalohk. Ahpw I sehse me Siohwa ketin koasoanedier mehkot me mwahusang.

Sohte pwand mwurin mwo, I tepida onop Paipel rehn mwahnakapw pwulopwul men me adaneki Fernando González. E kin mi Algeciras, ehu kahnimw ko me sohte Sounkadehde. Fernando kin seiloangki mwail 30 pwehn kohla doadoahk Neiva. E kin kaunopada mwahu ong ehuehu onop en Paipel oh mwadangete tepida iang towehda mihting en mwomwohdiso kan koaros. Tepin wihk me e tepida onopo, Fernando kin kihpene meteikan nan eh kisin kousapwo oh padahkihong irail dahme e sukuhlkihsang eh onop Paipel.

Fernando papidaisla nan January 1990, sounpwong weneu mwurin eh tepida onop. Mwurin mwo, e wiahla emen pioneer. Pwehki miehier emen Sounkadehde nan Algeciras, e solahr keper ohpis en Sounkadehdehn Siohwa kan en kadarala emen pioneer tohrohr wasao. Nan February 1992, mwomwohdiso ehu wiawihda wasao.

Ia duwe, Fernando kin kalohkte nan eh wasao? Soh! Mwurin ara pwopwoudida, ih oh eh pwoudo keseula San Vicente del Caguán, ehu kahnimw me sohte Sounkadehde kan. Wasao ira sewese wiahda mwomwohdiso ehu. Nan pahr 2002, Fernando idihdida nin duwen sounapwalih me kin seiloak, oh ih eh pwoudo, Olga, pousehlahte wia doadoahk en sounapwalih me kin seiloak lel rahnwet.

 Sang ni dahme wiawio, I sukuhlki uwen kesempwalpen en kapakapki oaritik kan me pid aht pwukoahn kalohk. Siohwa kin ketin wia dahme kitail sohte kakohng. Ni mehlel, sapwellime doadoahk wet, kaidehn atail.—Mad. 9:38.

Nan pahr 1990, se alehdi pwukoahn sounapwalih me kin seiloak. Wasa me se wia doadoahko iei kahnimw en Bogotá. Se perki me se sohte pahn kak kapwaiada pwukoa wet. Ngehi oh ei pwoudo sohte ahneki koahiek tohrohr. Oh se sohte ahn mi nan kahnimw ehu me diren aramas. Ahpw, Siohwa ketin kapwaiada sapwellime inou me mi nan Pilipai 2:13: “Koht kin ketin doadoahk ni ahl me kin kaperenda ih ni eh ketin kakehlakahda amwail ineng en wia soahng koaros me e ketin kupwurki.”

Mwuhr, se alehdi pwukoahn sounapwalih me kin seiloak nan wasa ehu nan Medellín, kahnimw me I koasoia nin tapio. Aramas akan wasao uhdahn ahnla kilang tiahk lemei en wasao me kahrehda irail sohla nohn masak. Karasepe, ehu ahnsowo erein ei tepida wia onop en Paipel ehu, aramas kei tepida kasikih emenemen likin ihmw me I kohla ieo. I kereniong rukidi nan tahto, ahpw ohl me I onop reho ni meleilei doulahte wadek parakrapo. Mwurin eh kanekehla eh wadawado, e peki ma e kak pedoila likio. Mwurin ahnsou kis, e pwurodo oh kahre kisin seri riemen oh ni meleilei koasoia: “Kupwurmahk, ahpw I anahne kohla kahrehdo nei seri ka.”

Mie ahnsou teikan me se pil mihla nan keper. Ehu ahnsowo erein aht kalokalohk ei pwoudo tangodo rehi oh mesen masepwehk. E nda me mie me kasikih. I pwuriamweila. Ahpw, mwuhr se esehda me ohl me kesiko sohte kasikih Sirkka; ahpw e kasikih ohl emen me alu limwah.

Mwuhr, se sohla nohn kin perki tiahk lemei me kin wiawi. Se ale kangoang sang Sounkadehde kan sang wasao me kin lelohng irair kan me duwehte met oh suwedsang. Se medewe me ma Siohwa kin ketin sewesewese irail, e pahn pil ketin sewesei kiht. Se kin ahnsou koaros peikiong kaweid sang elder ko, kanahieng en dehr lelohng keper, oh mweidohng Siohwa soahng teikan koaros.

Ei mehlel, ekei irair sohte uhdahn keper nin duwen me se medewe. Ehu ahnsowo, I mwomwen rong lih riemen akamaipene likin ihmw me I kalohk ieo. I sohte men rong akamaio, ahpw tohnihmwo kangoange ien kohieila ni eh palangko. I esehda me serehd riemen me alahlasang ahn mehn mparail ko arail akamai.

Nan pahr 1997, I idihdda nin duwen sounpadahk en Sukuhl en Brother kan ong Pwukoa Tohrohr kan. b I kin ahnsou koaros perenki iang towehda sukuhl en sapwellimen Siohwa pwihn, ahpw I sohte kasik en iang ale pwais kaselel en iang kasukuhlih meteikan.

Mwuhr, I kin papah nin duwen sounapwalih me kin seiloakla ni mwomwohdiso kan pak ehu nan sounpar ehu (district overseer). Ni ahnsou me doadoahk wet sohla, I pwurala wia doadoahk en sounapwalih me kin seiloak. Eri daulih sounpar 30, I kin perenki ei papah nin duwen sounpadahk  men oh sounapwalih me kin seiloak. Pwukoa pwukat wahdo kapai tohto. Ahpw, soahng pwukat sohte kin ahnsou koaros mengei. I pahn kawehwehda.

I wia soangen aramas me eh lamalam kin uhdahn kehlail. Met kin sewese ie ni ei kin lelohng apwal. Ahpw ekei pak, I kin nohn ngihtehtehki en kapwungala soahng kan nan mwomwohdiso. Ehu ahnsowo, I kihong kaweid kehlail ong ekei ren kasalehda limpoak oh toupahrek ong meteikan. Ahpw ni mehlel, ngehi me sohte kasalehda soangen irair ko.—Rom 7:​21-23.

Pwehki ei sapwung ko, ekei pak I kin uhdahn mworusala. (Rom 7:24) Ehu ahnsowo, I kapakapkiong Siohwa me e pahn keieu mwahu ma I kohkohsang ei pwukoahn misinerio oh pwurala Finland. Ni soutik en rahno, I iang towehda mihting en mwomwohdiso ehu. Dahme I rong nan mihtingo kamehlelehiong ie me I anahne mihmihte nan ei pwukoau oh pousehlahte kamwahwihala ei soh unsek kan. Lel rahnwet, ei kilang ni sansal Siohwa eh ketin sapengala ei kapakapo uhdahn sair ie. Patehng met, I uhdahn kalahnganki me ni kadek e kin ketin sewese ien powehdi ei luwet kan.

Ngehi oh Sirkka uhdahn kalahngankihong Siohwa aht pai kaselel en doadoahngki pali laud en aht mour en papah ih. I pil uhdahn kalahngankihong Siohwa eh ketikihong ie ei pwoud me kin poakohng ie oh loalopwoatohng ie erein sounpar tohto.

Kereniong I pahn lel sounpar 70 oh pahn uhdihsang wia ei pwukoahn sounapwalih me kin seiloak oh sounpadahk. Ahpw, I sohte nsensuwedki met. Dahme kahrehda? Pwehki I uhdahn kamehlele me dahme kin keieu kawauwih Siohwa iei aht kin ni mpahi papah oh kapinga ih sang aht mohngiong me diren limpoak oh kalahngan. (Maika 6:8; Mark 12:​32-34) Pwehn kawauwih Siohwa, se sohte anahne ahneki pwukoa tohrohr.

Ni ei medewehla pwukoa kan me I kin perenki, I wehwehkihda me I sohte alehdi pwukoa pwukat pwehki I mwahusang meteikan; de pwehki I ahneki koahiek ehu me uhdahn tohrohr. Ahpw, Siohwa ketikihong ie pwukoa pwukat pwehki sapwellime kadek kalahngan. E ketikihong ie kapai pwukat mendahki ei luwet kan. Ihete pwehki sapwellimen Siohwa sawas me kahrehda I kak kapwaiada pwukoa pwukat. Ni ahl wet, ei luwet kan kin kasansalehda sapwellimen Koht kehl.—2 Kor. 12:9.