N padidu na 1955, N tene dus ermon garandi, i ami i terseru. N kirsi pertu di sul di Finlandia, na un sidadi ku ta comadu gosi di Vantaa.

Ña mame batisadu suma Tustumuña di Jeova puku anus antis di N padidu. Ma ña pape staba kontra bardadi, i ka disa pa ña mame studa Biblia ku nos o lebanu runions di kongregason. Pa kila, i ta nsinanu bardadis simplis di Biblia ora ku ña pape ka sta.

Desdi pikininu, N ta obdisi Jeova. Pur isemplu ocan ku seti anu, ña pursora paña raiba di mi pabia N ka seta kume verilättyjä (pankekas di Finlandia ku ta fasidu ku sangi). Ña pursora pertan keŝadu ku un mon pa yabrin boka, ku utru mon i pega garfu ku tene padas di pankeka pa tenta pun el na boka. N sakudil mon, N bota garfu na con.

Oca ku N tene 12 anu, ña pape falsi. Dipus di kila, N pudi bai runions. Ermons na kongregason mostra interesi na mi, i kila judan fasi progresu spiritual. N kumsa lei Biblia tudu dia i pega tesu na lei no publikasons. Pabia des, N konsigi batisa ku 14 anu, na dia 8 di Agustu di 1969.

Logu dipus ku N kaba skola, N kumsa ku sirbi suma pioneru regular. Alguns semanas dipus, N munda pa sirbi nunde ki ten mas  nesesidadi, na Pielavesi, pertu di sentru di Finlandia.

Na Pielavesi, N kunsi un bajuda ku bin sedu ña minjer ku N gosta ciu del, Sirkka. N gosta del pabia i sedu umildi, i ama Jeova ciu. I ka ta buskaba fama o tene manga di kusas material. Anos tudu dus no misti da no minjor na no sirvisu pa Jeova, i no staba dispostu pa fasi kualker kusa ku no faladu pa fasi. No kasa na dia 23 di Marsu di 1974. En ves di no bai pa lua di mel, no bai sirbi na Karttula, nunde ki tenba mas nesesidadi di publikaduris di Renu.

Disna di kumsada di no kasamenti, Jeova mostranu di kuma i na kuida di no nesesidadis material, si no buska purmeru si Renu. (Mat 6:33) Pur isemplu, na Karttula, no ka teneba karu. Na kumsada, no ta usaba bisikleta. Ma na tempu di friu, kau ta friaba dimas. Pa prega na tiritoriu garandi ku kongregason teneba, no pirsisa di karu. Ma no ka teneba diñeru pa kumpra karu.

Di repenti, ña ermon garandi bin visitanu. Ku bondadi i patinu si karu. I pagaba ja suguru. No pirsisaba so di kumpra kombustivel. Gosi no tene karu ku no pirsisaba del.

Jeova mostranu di kuma, i kumpri ku si responsabilidadi di kuida di no nesesidadis material. Ke so ku no dibi di fasi i pui interesis di Renu na purmeru lugar.

Oca ku no staba na Skola di Sirvisu di Pioneru na 1978, ermon Raimo Kuokkanen, a un di no instrutoris nkoraẑanu pa no prenŝi pitison pa Skola di Jileadi. Pa kila, no kumsa ku studa Inglis pa pudi mati skola. Ma na 1980, antis di no prenŝi pitison, no kumbidadu pa sirbi na filial di Finlandia. Na ki tempu, Betelitas ka pudiba prenŝi pitison pa Jileadi. No misti sirbi nunde ku Jeova pensa i minjor, i ka nunde ku no pensa i minjor. Pa kila, no seta konviti. Mesmu asin, no kontinua studa Inglis si kontra no bin tene oportunidadi di prenŝi pitison pa Jileadi.

 Alguns anus dipus, Korpu Guvernanti fala di kuma Betelitas pudi prenŝi pitison pa Jileadi. No prenŝi pitison logu-logu, ma i ka pabia di kuma no ka staba kontenti di sta na Betel. No kontentiba di sta la! No mistiba so sta dispunivel pa sirbi nunde ki tenba mas nesesidadi, si kontra no kualifika. No kumbidadu pa Jileadi, i no forma na turma 79 na Setembru di 1985. No disignadu pa Kolombia.

No purmeru disignason na Kolombia seduba na Filial. N tentaba fasi ña minjor na ña disignason, ma dipus di un anu na filial, N pensaba di kuma no pirsisa di mudansa. Pa purmeru i uniku bias na ña vida, N pidi utru disignason. Dipus no disignadu suma misionarius na kampu na sidadi di Neiva, na reẑion di Huila.

N gostaba sempri di pregason. Oca N seduba pioneru solteru na Finlandia, utrora N ta pregaba desdi parmaña sedu te di noti. Oca ku N kasa ku Sirkka no ta pregaba tambi dia ntidu. Ora ku no na prega na tiritorius lunju, utrora no ta durmi na karu. Es ta rapati tempu di bias, i ta pirmitinu kumsa prega sedu na utru dia.

Suma misionarius na kampu no sintiba mesmu animu ku no teneba na pregason. No kongregason kirsi, ermons ku irmas na Kolombia ta mostra rispitu, mostra amor i e ta daba utrus balur.

I ka tenba nin un Tustumuña di Jeova na zonas ku pertuba Neiva, nunde ku no staba. N staba preokupadu dimas di kuma ku bon noba na ciga na ki zonas. Ma pabia di rebeldis, es zonas ka seduba suguru pa kilis ki ka di la. Pa kila, N ora pa un algin di ki zonas sedu Tustumuña di Jeova. N pensaba di kuma ki algin tenba ku mora na Neiva pa aprindi bardadi. N ora tambi pa dipus di ki algin batisadu, pa i sedu maduru na sintidu spiritual, i pa i riba pa si tera pa prega. N sibiba di kuma Jeova tene minjor suluson di ki kil ku N pensaba nel.

Puku tempu dipus, N kumsa studa Biblia ku un joven comadu Fernando González. I moraba na Algeciras, un di zonas ku ka teneba nin un Tustumuña di Jeova. Kada semana, Fernando ta viaẑaba mas di 50 kilometru pa Neiva, pa bai tarbaja. I ta purparaba diritu pa kada studu, i kumsa logu ku mati tudu runions. Disna di purmeru semana di si studu, Fernando ta juntaba jintis na si tabanka i ta nsina elis ke ki aprindi na si studu di Biblia.

Fernando batisa na Janeru di 1990, seis mis dipus ki kumsa studa Biblia. Dipus di kila, i kumsa ku sirbi suma pioneru regular. Suma i ten un Tustumuña di Jeova na Algeciras, gosi i suguru pa filial manda pionerus spesial na ki tabanka. Na Fevereru di 1992, un kongregason formadu na ki tabanka.

Sera ki Fernando konsentra so na prega jintis di si tabanka? Nau! Dipus ki kasa, el ku si minjer e munda pa San Vicente  del Caguán, un utru zona nunde ki ka ten nin un Tustumuña di Jeova. La e juda na forma kongregason. Na 2002, Fernando disignadu suma superintendenti di sirkuitu. El ku si minjer Olga, e kontinua na sirkuitu te aos.

Es spiriensia nsinan importansia di ora aserka di asuntus izatu ku sta ligadu ku no disignasons na organizason di Jeova. Jeova ta fasi ke ku no ka pudi fasi. Na bardadi, i Jeova ki dunu di kebur, i ka anos. — Mat 9:38.

Na 1990 no disignadu pa sirvisu viaẑanti. No purmeru sirkuitu seduba na kapital di Kolombia, Bogotá. No mediba es disignason. Ami ku ña minjer i jintis simplis, no ka tene kapasidadis spesial. Tambi no ka kustuma vivi na un sidadi muvimentadu. Ma Jeova kumpri si purmesa ku sta na Filipensis 2:13. I fala sin: “Deus ku ta tarbaja na bos pa da bos diseẑu ku puder pa kumpri si bon vontadi.”

Dipus, no disignadu pa sirbi na sirkuitu ku sta na zona di Medellín, sidadi ku N falaba del na kumsada. Jintis di la kustuma ku violensia na rua, i ka ta nkomoda elis. Pur isemplu, un bias oca ku N na diriẑiba un studu di Biblia, jintis kumsa ku fugia n̈utru fora di kasa ku N staba nel. N mistiba kai na con, ma studanti di Biblia ka medi, i kontinua lei paragrafu. Oca ki kaba lei i pidin lisensa, i sai fora. Dipus i bin ku dus mininu, ku kalma i fala: “Diskulpa, N dibi di bai buskaba ña fijus.”

I tenba utru situason pirigosu ku no pasa. Un bias oca no na prega di kasa pa kasa, ña minjer kuri i bin nunde mi ku rostu firidu. I falan di kuma un algin fugial. N pantaba. Ma mas tardi, no diskubri di kuma ki omi ka mistiba fugia Sirkka; ma i mistiba fugia un omi ku staba na pasa pertu del.

Ku tempu no aprindi lida ku violensia na rua. No nkoraẑadu pa koraẑen di ermons lokal ku pasa es tipu di situason o pior. No ciga konkluson di kuma si Jeova juda elis, i na judanu tambi. Sempri no ta sigi konsijus di ansions lokal, no ta toma kuidadu i disa restu na mon di Jeova.

Na bardadi, alguns situasons ka seduba pirigosu suma ku no pensaba. Un bias, N obi suma si dus minjeris staba na jusia risu ku n̈utru fora di kasa ku N staba nel. N ka staba interesadu pa jubi jus, ma dunu di kasa falan pa N bai pa si baranda. Pa fin, kil ku parsiba sedu “jus”, na bardadi, seduba dus papagaiu ku staba na kopia visiñus.

Na 1997, N disignadu suma instrutor di Skola di Trenamentu Ministerial. b N gostaba sempri di bai skolas teokratiku. Ma, nunka N imaẑinaba di kuma N na tene oportunidadi di nsina na un delis.

 Dipus, N sirbi suma superintendenti di distritu. Oca ku es aranẑu kaba, N riba pa sirkuitu. Pa mas di 30 anu, N tene privileẑiu di sirbi suma instrutor i superintendenti viaẑanti. Es disignasons dan manga di bensons. Ma i ka tudu ku seduba fasil. Pera N splika bos.

N seduba un algin disididu dimas. Es judan nfrenta situasons difisil. Ma utrora, N ta seduba dinamiku dimas na tenta kuriẑi asuntus na kongregasons. Un bias, N konsija utrus risu pa e mostra amor i ntindi limiti di utrus. Na bardadi, i na ki mumentu ku N ka teneba es maneras di sedu. — Rom 7:​21-23.

Utrora N ta sintiba disanimadu dimas, pabia di ña erus. (Rom 7:24) I ciga na un pontu ku N pidi Jeova na orason di kuma, i minjor pa N disa sirvisu misionariu i riba pa Finlandia. Ki di noti N bai runion di kongregason. Nkoraẑamentu ku N risibi konvensin di kuma, N dibi di kontinua na ña disignason, i kontinua minjoria ña maneras di sedu. Te aos, N sinti tokadu kuma ku Jeova ruspundi ki orason di manera klaru. Tambi N kontenti ciu manera ki judan ku bondadi vensi ña frakesas.

Ami ku Sirkka no ta gardisi Jeova ciu pa privileẑiu ki danu di pasa kuas tudu no vida na sirvisu di tempu kompletu. Tambi N ta gardisi ciu Jeova manera ki dan es minjer ku ta mostra amor i ku sedu fiel duranti tudu es anus.

I ka na tarda N na tene 70 anu, N na para sirbi suma instrutor na kampu i superintendenti viaẑanti. Ma es ka ta disaniman. Pabia di ke? Pabia N sta konvensidu di kuma, ke ku mas ta kontenta Jeova i ora ku no na sirbil ku umildadi i ngabal ku korson ŝeiu di amor i ku gardisimentu. (Mik 6:8; Mar 12:​32-34) Pa ngaba Jeova, no ka pirsisa di tene un disignason importanti.

Ora ku N jubi pa disignasons ku N risibi, N ta nota di kuma N ka risibi elis pabia di kuma, N mas minjor di ki utrus. Nin N ka tene es privileẑius pabia di un kapasidadi spesial. N ka ciga mesmu di sedu asin! En ves kila, Jeova dan es disignasons pabia di bondadi ku N ka mersi. I dan es privileẑius mesmu ku ña frakesas. N sibi di kuma N konsigi kumpri es disignasons son ku ajuda di Jeova. Asin, ña frakesas mostra puder di Deus. — 2 Kor 12:9.