1955 watapi nacekorqani, hermanosniymantaqa aswan sullkʼita kani. Finlandiaj sur ladonpi wiñakorqani, mar kantu qayllapi. Kunantaj chay llajtaqa Vantaa sutikun.

Mamayqa niraj nacekushajtiy bautizakusqa. Jehovaj testigonman tukusqanmantataj, tatayqa mayta phiñakusqa. Chayrayku mana saqejchu noqaykuman Bibliamanta yachachinawaykuta, nitaj tantakuykunasmanpis pusanawaykuta. Chaynejta mamayqa tatay mana wasipi kashajtillan Jehovamanta yachachiwaj kayku.

Wawitamantapacha Jehovatapuni kasukuyta munaj kani. Qanchis watitasniyoj kashajtiy, profesorayqa maytapuni phiñarikorqa verilättyjä nisqata mana mikhuyta munasqaymanta (chayqa yawarmanta ruwasqa). Profesorayqa ujnin makinwan simiyta kichariyta munawarqa, ujnin makinwantaj tenedorwan mikhuchiyta munawarqa. Noqataj makiywan chay tenedorta pampaman kacharicherqani.

Tatayqa 12 watasniyoj kashajtiy wañuporqa. Chaymantapacha tantakuykunaman riyta atillarqaniña. Hermanosqa noqamanta mayta llakikoj kanku, chay yanapawarqa Jehovaman astawan qayllaykunaypaj. Sapa día Bibliata leeyta qallarerqani, publicacionestapis sumajta ukhuncharej kani. Chayta ruwasqayrayku 14 watitasniyoj kashaspa bautizakorqani, 8 de agosto de 1969 watapi.

 Colegiota tukuchasqaymanta pisi tiemponmantaj, precursor regular kayta qallarerqani. Uj mashkha semanasninmantaj Pielavesiman riporqani. Chay llajtitaqa Finlandiaj chaupinnejpi kashan, astawan predicajkunataj necesitakorqa.

Pielavesipeqa Sirkkata rejserqani. Aswan qhepamantaj paywan casarakorqani. Payqa gustawarqa kʼumuykukoj sonqo kasqanrayku, Jehovatataj mayta munakusqanrayku. Payqa mana wajkunawan allinta qhawachikuytachu maskʼaj, nitaj ashkha imasniyoj kaytachu. Iskayniyku tukuy atisqaykuta Jehovapaj llankʼayta munarqayku, ima ruwayllapipis. Noqaykoqa casarakorqayku 23 de marzo de 1974 watapi. Casarakuytawantaj mana pasearejchu rerqayku, manachayqa Karttulaman riporqayku. Chaypeqa predicanapaj ashkha yanapa necesitakusharqa.

Casarakusqaykumantapacha Jehovaqa imatachus necesitasqaykuta qowarqaykupuni, Gobiernonta ñaupajman churasqaykurayku (Mat. 6:33). Karttulapi kashajtiykoqa mana autoyku kapuwarqaykuchu, bicicletallapi purej kayku. Chaywanpis chiri tiempopeqa mana bicicletapi puriyta atikullajchu mayta chirisqanrayku. Congregacionniykoj territorionqa jatun karqa, chaykunasman chayanaykupajtaj autotapuni necesitarqayku. Jinapis mana qolqeyku karqachu autota rantikunaykupaj.

Uj kutitaj ujnin hermanoy, mana suyashajtillayku visitariwarqayku, niwarqaykutaj autonta qopunawaykuta. Chay automantaqa ni mashkhitata paganaykuchu karqa, gasolinallapaj gastanayku karqa. May kusisqapuni kasharqayku autitoyojña kasqaykumanta.

Chay kutipi Jehovaqa sutʼita reparachiwarqayku imatachus necesitasqaykuta qonawaykutapuni. Chaypajqa Gobiernollanta kausayniykupi ñaupajman churanayku karqa.

1978 watapi Precursorespaj Escuelapi kashajtiyku, hermano Raimo Kuokkanenqa a “Galaad Escuelapaj solicitudta juntʼachiwajchej” nispa niwarqayku. Payqa chay escuelamanta ujnin yachachejniyku karqa. Galaad Escuelaman riyta munaspa, inglesta estudiayta qallarerqayku. Chaywanpis 1980 watapi Finlandia sucursalman invitawarqayku, chayraykutaj niña chay escuelapaj solicitudta apacherqaykuchu. Chay kutipi  betelitasqa mana chay escuelapaj solicitudta juntʼachiyta atejchu kanku. Noqaykutaj Jehová munasqanman jinapuni payta sirviyta munarqayku, manataj noqayku munasqaykuman jinallachu. Chayrayku Betelman invitawajtiykoqa chay rato rerqayku. Chaywanpis inglesta estudiallarqaykupuni, “ichapis aswan qhepaman Galaad Escuelaman riyta atisun” nispa.

Uj mashkha watasninman, Diospa Llajtanta Kamachejkunaqa nerqanku betelitasqa Galaad Escuelaman riyta atisqankutaña. Chayta nejtinkukama solicitudniykuta juntʼacherqayku. Pero mana Betelpi kay mana gustawasqaykuraykuchu, manachayqa atikojtenqa munarqaykupuni chay escuelaman riyta, maypichus astawan necesitakun chaypi yanapakamunaykupaj. Ajinamanta Galaad Escuelaman invitawarqayku, clase 79 nisqaman, graduakorqaykutaj septiembre de 1985 watapi. Chay escuelamantataj Colombiaman kachawarqayku.

Colombiaman chayajtiyku, sucursalpi yanapakunaykuta niwarqayku. Chaypeqa asignacionniyta sumajta ruwanaypaj mayta kallpachakorqani. Chaywanpis watanmanqa cambianawankuta munarqani. Chay kutillapi waj asignacionman cambianawankuta mañakorqani. Chayrayku Neiva llajtaman misionerosta jina kachawarqayku, Huila departamentoman.

Predicayqa unaymantapachapuni mayta gustawan. Finlandiapeqa soltero kashaspa, precursor jinañataj sirvishaspa, wakin kuteqa sutʼiyaymantapacha tutakama predicaj kani. Casarakusqaykutawantaj Sirkkawan noqawanqa, ashkha diasta diantinta predicaj kayku. Karu lugaresman predicaj rispataj, wakin kuteqa autollapiña puñoj kayku. Ajinamanta qʼayantenqa predicayta qallarejpacha kayku.

Chayrayku misionerosta jina kachawajtiykoqa, may kusisqapuni kasharqayku ñaupajta jina predicayta atisqaykumanta. Colombiapi congregacionniykoqa wiñashallarqapuni. Chaypi kaj hermanosqa wajkunata mayta respetaj kanku, mayta munakoj kanku, agradecekuytataj yachaj kanku.

Neiva qayllaspeqa ashkha llajtas karqa, nitaj uj hermanollapis chaykunapi karqachu. Mana chay llajtayojchu kajkunapajqa may peligroso karqa, armasniyoj runas kasqanrayku. Chayrayku “chay llajtayoj runas, ¿imaynatá Jehovamanta yachakonqankuri?” nispa nikoj kani. Jehovamantataj mañakorqani chay llajtayoj uj runa Bibliamanta yachakunanpaj, “pero chay runaqa Neivapi tiyakuchun” nispa nerqani. Chantá Jehovaman nillarqanitaj: “Chay runaqa bautizakuytawan sumajta ñauparichun. Chaymantataj llajtanman predicananpaj kutipuchun”, nispa. Chay mañakusqayqa noqapaj may sumaj kaspa jinarqa, Jehovatajrí aswan sumajtaraj yuyashasqa.

Pisi tiemponmantaj Fernando González sutiyoj jovenman Bibliamanta yachachiyta qallarerqani. Payqa Algeciraspi tiyakorqa, maypichus ni uj testigollapis karqachu chay llajtasmanta ujninpi. Payqa sapa semana Neivaman trabajaj jamoj, jamunanpajtaj 50 kilometrosmanta astawan viajaj. Payqa estudianaykupaj tukuyninta sumajta wakichikoj, qallariymantapachataj tukuy reunionesmanña jamoj. Chantapis ñaupaj semanamantapacha, llajta masisninta tantarqa imatachus yachakushasqanta yachachinanpaj.

 Fernandoqa estudiasqanmanta sojta killasninman bautizakorqaña, enero de 1990 watapi. Bautizakusqantawankamataj precursor regular kayta qallarerqa. Algeciraspi uj testigoña kasqanraykutaj, sucursalqa precursores especialesta mana manchachikuspa kachallarqaña. Febrero de 1992 watapitaj uj congregación chaypi rikhurerqa.

Fernandoqa mana llajtan Algecirasllapichu predicarqa. Casarakuytawanqa paywan warmin Olgawan waj llajtaman riporqanku, San Vicente del Caguanman. Chaypipis manallataj testigos karqachu, uj congregación rikhurinanpajtaj yanapakullarqankutaj. Kunanqa 2002 watamantapacha congregacionesta waturishanku.

Chaypi yachakorqani uj asignacionniymanta Jehovawan parlarispaqa, sutʼisituta ninay kasqanta imatachus munasqayta. Payqa cosechaj Dueñon kasqanrayku, mana atisqanchejtapis ruwayta atin (Mat. 9:38).

1990 watapeqa congregacionesta waturinayta niwarqanku, Colombiaj capitalnin Bogotapitaj chayta ruwayta qallarerqayku. Noqaykoqa tukuy runas jinalla kayku, nitaj imatapis may sumajta ruwayta yachaykuchu. Chantapis mana chay jina jatun llajtapi tiyakuyman yachasqachu karqayku. Chay imasrayku uj chhikata manchachikorqayku chaypi congregacionesta waturiyta. Chaywanpis rikuyku Jehovaqa Filipenses 2:13 versiculopi nisqanta juntʼasqantapuni. Chaypi nin: “Diosqa qankunata kallpachasunkichej ruwayta munanaykichejpaj, ruwayta atinaykichejpajtaj. Chaytaj payta kusichisqanman jina kashan”, nispa.

Tiemponmantaj Medellinpi congregacionesta visitanaykuta niwarqayku, imaynatachus qallariypi willarerqaykichej jina. Chaypi tiyakoj runasqa callespi maqanakuykunaman yachasqaña kasqanku, chayrayku niña manchikojchu kanku. Uj kuteqa uj wasipi Bibliamanta yachachisharqani, jinallapitaj jawapi baleanakuyta qallarerqanku. Noqaqa pampaman choqakunaypajña kasharqani, estudioytaj ni imapis pasashanmanchu jina siga leeshallarqapuni. Leeyta tukuspataj uj ratito llojsinanta niwarqa. Ratitonmantaj iskay juchʼuy wawas aysarisqa yaykumorqa, niwarqataj: “Perdonariwanki, wawasniyta pusarimunay karqa”, nispa. Uyantaj ni imaynita mancharisqachu kasharqa.

Mana chay kutillachu ajinata mancharikorqayku. Uj kutipi wasimanta wasi predicashajtiyku, señorayqa may mancharisqa corremuspa niwarqa: “Uj runa baleawaspa casi japʼirpachiwan”, nispa. Chayta niwajtin noqapis maytapuni mancharikorqani. Chaymantaraj repararqayku chay runaqa mana señoraytachu baleashasqanta, manachayqa ladonta pasaj runata.

Tiempowanqa ajinata kausakuyman tumpata yachaykukorqayku. Hermanosqa ajinaspi, aswan mancharina imaspi rikukuspapis aguantallarqankupuni. Chaytaj noqaykutapis mayta yanapawarqayku. Nerqaykutaj: “Jehová paykunata yanapashan chayqa, noqanchejtapis yanapallawasuntaj”, nispa. Chay congregacionesmanta ancianospa yuyaychasqankuta kasukuspa, sumajta qhawarikuspapuni purej kayku, tukuy imatataj Jehovaj makinman saqepoj kayku.

 Wakin kutisqa mana yuyasqaykuman jinapunitajchu karqa. Uj kuteqa uj wasipi kashajtiy, jawapi iskay warmis qhaparinakushasqankuta jina uyarerqani. Noqaqa chay chʼajwashasqankuta mana qhawariyta munarqanichu, wasiyoj señorataj niwarqa qhawarinaytapuni. Chaypitaj iskay loritoslla chʼajwashasqanku, vecinospa parlasqankuta yachapayaspa.

1997 watapeqa, Escuela de Entrenamiento Ministerial b nisqapi yachachinayta niwarqanku. Diospa llajtanpi kaj escuelasman reyqa maytapuni gustawan, ni jaykʼajtaj yuyarqanichu chaykunamanta ujninpi noqa yachachinayta. Chayqa may sumajpuni karqa noqapaj.

Chaymantataj superintendente de distrito jina sirverqani. Superintendente de distrito manaña kananta nejtinkutaj, watejmanta congregacionesta waturerqani. 30 watas kurajtaña yachachej jina sirvishani, congregacionestataj waturishani. Chay jinasmanta Jehovata sirvispa ashkha bendicionesta japʼini. Chaywanpis wakin kuteqa mana atinapaj jinallachu karqa. Imaraykuchus chayta nisqayta willarisqaykichej.

Noqaqa mana imatapis manchachikullanichu. Ajina kasqaytaj yanapawan imatapis atipayta atinallaypaj. Chaywanpis wakin kuteqa ajina kasqayrayku, congregacionespi imatapis mana kʼachallamantachu cheqancharqani. Wakin kuteqa hermanosta uyankupi nej kani aswan munakuyniyoj kanankuta, wajkunatataj entiendeyta yachanankuta. Noqataj chay kutispi mana chay nisqayman jinachu ruwasharqani (Rom. 7:21-23).

Wakin kuteqa ajina kasqayrayku mayta desanimakorqani (Rom. 7:24). Uj kuteqa may llakisqapuni kashasqayrayku, Jehovaman nerqani: “Manaña misionero kanaypaj jinachu kani, Finlandiallaman kutipusaj”, nispa. Chay chʼisitaj tantakuypi uyarisqayqa kallpachawarqa chay asignacionniyta ama saqepunaypaj, aswan sumaj cristiano kanaypajtaj siga kallpachakunaypaj. Nipuni qonqakusajchu Jehová ajina sutʼisituta kutichiwasqantaqa. Jehovaman mayta agradecekuni aswan sumaj cristianoman tukunaypaj may munakuywan yanapawasqanmanta.

Iskayniyku maytapuni Jehovaman agradecekuyku casi tukuy kausayniykupi tiempo juntʼasqata paypaj llankʼasqaykumanta. Chantapis maytapuni Jehovaman agradecekuni sumaj warmita qowasqanmanta. Señorayqa kay tukuynin wataspi maytapuni munakuwan, yanapawantaj.

Tumpamantawanqa 70 watasniyta juntʼasajña. Chayrayku niña escuelaspi yachachiyta atisajchu, niñataj congregacionesta waturiyta atisajchu. Chaytaj mana llakichiwanchu. Noqaqa yachani Jehovata jatunchanapajqa mana may jatun ruwaykunasniyojchu kananchej kasqanta. Aswan sumajqa kʼumuykukoj sonqoyoj kay, Jehovatataj tukuy sonqonchejwan jatunchay, agradecekuy ima (Miq. 6:8; Mar. 12:32-34).

Kunankamaqa sumaj ruwaykunata Diospa llajtanpi japʼini. Chaykunatataj mana wajkunamanta aswan sumaj kasqayraykuchu, nitaj imatapis aswan sumajta ruwayta yachasqayraykuchu japʼini. Pantaj runa kajtiypis, Jehová chay ruwaykunata qowarqa jatun khuyakuyninrayku. Manachus yanapawanman karqa chayqa, sapallaymantaqa ni jaykʼaj chay imasta ruwayta atiymanchu karqa. Sutʼita niyman Diospa atiynenqa pisi kallpa kasqaypi astawan rikukusqanta (2 Cor. 12:9).