1955 huatapimi huacharircani. Quimsa huahuacunamantaca ñucami último cani. Finlandia llajtapi tiyaj Vantaa nishca ciudadpimi huiñarcani.

Ñuca manaraj huacharijpimi ñuca mamaca testigo de Jehová tucurca. Shinapish ñuca yayaca ñuca mama ñucanchijta Bibliamanta yachachichun, tandanacuicunamanpish pushachunca mana munajchu carca. Chaimi ñuca mamaca ñuca yaya huasipi mana cai horas ñucanchijtaca Bibliamanta yachachij carca.

Uchillamantami Jehová Diosta sirvingapaj esforzarishcani. Por ejemplo, siete huatacunata charijpica escuelapimi ñuca profesoraca yahuarhuan rurashca tortillacunata micuchun obligasha nirca. Chaimi paica chaita micuchun ñuca shimita pascashpa micuchisha nirca. Chashna rurajpipish chaitaca mana micurcanichu.

Doce huatacunata charijpimi ñuca yayaca huañurca. Chai qꞌuipami tandanacuicunaman ri pudircani. Huauqui panicunami Jehová Diosta ashtahuan sirvichun ayudarcacuna. Chaimantami Bibliata, publicacioncunata punllanta estudiai callarircani. Chaicunata rurashcamantami 8 de agosto de 1969-pi 14 huatacunata charishpa bautizarircani.

Colegiota tucuchishca qꞌuipallami precursor regular shina sirvi callarircani. Chaimantami huaquin semanacuna qꞌuipaca Pielavesi lugarman sirvinaman rircani. Chaipica ashtahuan huillajcunatami minishticurcacuna.

 Pielavesi llajtapimi Sirkka shuti panita rijsircani. Paica ashtahuan charinata, rijsishca canata mashcanapaj randica humilde, Jehová Diostami cꞌuyaj carca. Paipishmi Jehová Dios ashtahuan sirvisha nirca. Chaimantami 23 de marzo de 1974-pi cazararcanchij. Cazarashca qꞌuipallami ashtahuan huillangapaj Karttula llajtaman rircanchij.

Cazarashca qꞌuipa Jehová Diosta punta lugarpi churashcamantami paica ñucanchij ima minishtishcataca siempre cushca (Mateo 6:33). Por ejemplo, Karttula llajtapi huillangapajca carrotaca mana charircanchijchu. Chaimantami bicicletapi rij carcanchij. Pero chiri punllacunapi chashna huillanaca dimastij sinchimi carca. Chaimantami chaipi huillangapajca shuj carrota minishtircanchij. Pero carrota randingapajca cullquita mana charircanchijchu.

Shuj punllaca mana yuyashcapimi ñuca huauquica ñucanchijta visitanaman shamurca. Paica paipaj carrotami ñucanchijman convidashpa rirca. Carropaj seguropish ñami pagashca carca. Ñucanchijcunaca gasolinallatami churana carcanchij. Chashnami ñucanchij minishtishca carrota charircanchij.

Jehová Diosta primer lugarpi churashcamantami paica ñucanchij minishtishcata curca.

1978 huatapica precursores regularespaj escuelamanmi rircanchij. Chaipica huauqui Raimo Kuokkanenca, a Galaad escuelaman ringapaj solicitudta jundachichij nishpami animarca. Chaimi ñucanchijca chai escuelaman ringapajca inglesta yachai callarircanchij. Shinapish 1980 huatapica Finlandia llajtallapitaj Betelpi sirvichunmi invitarcacuna. Chai huatacunapica betelitacunaca Galaad nishca escuelaman ringapajca solicitudcunataca mana cachai pudircacunachu. Chaimantami chai escuelaman ringapaj solicitudtaca mana cachai pudircanchij. Shinapish Jehová Diosta cꞌuyashcamantami pai ñucanchijta maipi utilizasha nishcapi cushicuihuan pajtachisha nircanchij. Chaimi Betelpi sirvinaman rircanchij. Shinapish huaquin huatacuna qꞌuipa Galaad escuelaman rinata yuyashpami inglesta yachashpa catircanchij.

Huaquin huatacuna qꞌuipaca Cuerpo Gobernantepi sirvij huauquicunaca “Betelpi cajcuna Galaad nishca escuelaman risha nishpaca  solicitudtami jundachi tucunguichij” nircacunami. Betelpi sirvicushcamantaca cushillami carcanchij. Pero ashtahuan huillajcuna minishtirishca lugarcunapimi sirvinata munarcanchij. Chaimi solicitudta jundachishpa cacharcanchij. Clase 79 de Galaad escuelamanmi ñucanchijtaca invitarcacuna. Septiembre de 1985 huatapi chai escuelata tucuchishca huashaca Colombia llajtapi sirvichunmi cacharcacuna.

Colombia llajtaman chayajpica sucursalpi sirvichunmi cacharcacuna. Shuj huatatami Betelpica tucui pudishcata rurarcani. Shinapish ñucanchij asignacionta cambiachunmi mañarcanchij. Por primera vezmi chaita mañarcanchij. Chaimantami misioneros shina Neivapi saquirij Huila llajtapi sirvinaman cacharcacuna.

Huillanataca siempremi munashcani. Finlandia llajtapi soltero precursor cashpaca tutamanta chishicamami huillaj carcani. Cazarashca qꞌuipapish ñuca huarmihuanmi huaquin punllacunataca tucui punllata huillashpa pasaj carcanchij. Caru llajtacunaman rishpaca huaquinpica carrollapitajmi dormij carcanchij. Chashnami cayandij punllapajca huillashpa cati pudircanchij.

Cutin predicacionpi ocupari pudishcamantaca cushillami carcanchij. Ñucanchijman cachashca congregacionpish ashtahuan ashtahuan mirarishpami catirca. Colombiamanta huauqui panicunaca respetajcuna, llaquijcuna, cꞌuyajcunami carcacuna.

Neiva ciudadpica muyundijtami achca pueblocuna tiyarca. Pero cai pueblocunapica shuj testigollapish mana tiyarcachu. Cai pueblitocunapica guerrillas nishca grupocunami tiyarca. Shujtaj llajtacunamanta cajcunapaj chaiman rinaca peligrosomi carca. Chaimi “¿alli huillaicunataca chai pueblocunamanca ima shinashi chayachishun?” nishpami tapurij carcani. Yaya Diostaca “chai pueblocunamanta shamuj shuj runata Neivapi taringapaj, shinallataj chai runa canmanta yachachun, bautizarichun, espiritualmente sinchi tucuchun ayudahuai” nishpami mañarcani. Ñucaca “chai runaca espiritualmente sinchi tucushca qꞌuipa paipaj pueblopi huillanamanmi ringa” nishpami yuyarcani. Pero Jehová Diosca ñuca mañaitaca ñuca mana yuyashca shinami cutichirca.

Huaquin punllacuna qꞌuipaca shuj joventami Bibliamanta yachachi callarircanchij. Paipaj shutica Fernando Gonzalezmi can. Paica Algeciras nishca pueblomantami carca. Chai pueblopipish testigocunaca mana tiyarcachu. Fernandoca Neiva llajtapimi trabajanaman shamuj carca. Chaipajca 50 kilometrocunatami viajana carca. Paica Bibliamanta yachangapajca siempremi allichirij carca. Punta cutin paihuan parlashca punllamantami tucui tandanacuicunamanpish shamuj carca. Pai ima yachacushcacunatapish paipaj vecinocunata tandachishpami yachachij carca.

Fernandoca seis quillacunata Bibliamanta yachacushca qꞌuipallami enero de 1990 huatapi bautizarirca. Bautizarishca qꞌuipallami paica precursor regular tucurca. Chaimi sucursalca Algeciras pueblopi shuj testigo tiyashcata ricushpaca huaquin precursores especialesta cacharca. Febrero de 1992-pajca chai pueblopica punta congregacionmi tiyai callarirca.

 Shinapish Fernandoca Algeciras pueblopica mana sirvishpa saquirircachu. Cazarashca huashaca paica paipaj huarmi Olgahuanmi San Vicente del Caguán nishca pueblopi sirvinaman rircacuna. Chai pueblopipish testigocunaca mana tiyarcachu. Pero paicunami shuj congregación chaipi tiyachun ayudarcacuna. Fernandoca 2002 huatamantami superintendente de circuito shina sirvicushca.

Ñucanchij asignacioncunata pajtachingapajca Jehová Diosmi achcata ayudashca. Cai experienciami chaitaca yachachishca. Jehová Diosca ‘chagrapaj dueñomi’ can. Chaimantami paipaj munai pajtarichunca tucuita rurai tucun (Mateo 9:38).

1990 huatapimi Bogotá llajtapi superintendente de circuito shina sirvi callarircani. Por primera vezmi shuj jatun ciudadpi sirvinaman rircanchij. Ñuca huarmipish, ñucapish ima habilidadta, ima talentocunataca mana charinchijchu. Chaimi ¿ñuca asignacionta pajtachi pudishachu? nishpa sustarij carcani. Pero Filipenses 2:​13-pi nishca shinaca Diosmi pai munashca shinallataj paipaj munaita rurachun munaitapish, fuerzatapish cushpa sinchiyachirca.

Qꞌuipaca Medellín circuitoman sirvinaman cacharcacuna. Chai llajtapi gentecunaca mana allicunata ricushpaca mana mancharijcunachu carca. Por ejemplo shuj cutinca Bibliamantami shuj huasipi yachachicurcani. Chaimi mana yuyashcapi balacunahuan disparai callarishcata uyarcani. Ñucaca chai ratomi pambapi siririsha nircani. Shinapish Bibliamanta yachacujca ima mana pasaj layami Bibliata liyishpa catirca. Liyinata tucuchishca qꞌuipaca ñami tigramugrini nirca. Chai qꞌuipaca ima mana tucushca shinami paipaj ishqui huahuacunahuan tigramurca. Paica: “Quishpichihuai ñuca huahuacunatami ricunaman rina carcani” nircami.

Shuj cutinca huasin huasinmi predicacurcanchij. Ñapish ñuca huarmica yallitaj mancharishcami ñucapajman shamurca. Paica pitajshi ñucata dispararca nijpimi achcata mancharircani. Pero qꞌuipaca chai runa ñuca huarmita mana disparacushcatami yachaj chayarcanchij. Ashtahuanpish ñuca huarmipaj ladollapi pasacuj runatami disparashca carca.

Tiempohuanca cashna laya llaquicunata ricuna, uyanaca ñucanchijpajca normalmi tucurca. Ñucanchij huauqui panicuna cashna shina llaquicunahuan ahuantacujta ricushpaca achcatami animarircanchij. Llaquicunata ahuantangapaj Jehová Dios paicunata ayudacushcata ricushpaca ñucanchijtapish ayudanatami cuentata curcanchij. Siempremi congregacioncunapi sirvij ancianocuna cushca consejocunata cazungapaj esforzarishcanchij. Shinallataj Jehová Dios ñucanchijta cuidanapimi confiashpa catishcanchij.

Maipica ñucanchij yuyashca shinaca mana tanto llaquicuna tiyarcachu. Por ejemplo, shuj cutinca shuj huasiyujtami visitanaman rircani. Ñapish canllaman ishqui huarmicuna sinchita rimanacucujtami uyarcani. Ñucaca pi sinchita rimanacucushcata ricunaman rinataca mana munarcanichu. Pero huasiyujca cutin cutinmi “ima tucucushcata ricunaman shamui” nirca. Ricunaman rijpica ishqui loritocunallami vecinocuna shina yallitaj coleranacushpa parlanacushcacuna carca.

1997 huatapimi Entrenamiento Ministerial nishca escuelapi yachachichun ñucataca churarcacuna. b Chai escuelaman rinataca siempremi munashca carcani. Pero chai escuelacunapi yachachij canataca mana nunca yuyashcachu carcani.

Qꞌuipaca superintendente de distrito shinami sirvi callarircani. Pero cai arreglo tucurijpica cutinmi superintendente de circuito shina sirvircani. 30 huatacunata yallimi superintendente shina, instructor shina sirvicushcani. Chashna responsabilidadcunata pajtachicujpica Jehová Diosca achcatami bendiciashca. Shinapish mana jahuallachu cashca.

Ñucaca serio, tucuita alli rurangapaj yallitaj trabaj runami cani. Chashna cashcamantami ñuca causaipi jarcaicuna ricurijpica chaicunata chꞌimbapurai tucushcani. Shinapish congregacionpi huauqui panicunata cꞌuyaihuan, respetohuan ayudanaca sinchimi cashca. Por ejemplo, huaquin huauquicunataca “shujtajcunataca cꞌuyaihuan, pacienciahuanmi tratana canguichij” nishpami sinchita cunaj carcani. Shinapish ñucarajmi chai cualidadcunata ricuchinata minishtircani (Romanos 7:​21-23).

Caicunapi mejorashpa catina cashcata ricushpaca huaquinpica achcatami desanimarini (Romanos 7:24). Shuj punllaca yallitaj llaquilla sintirishcamantami Jehová Diostaca: “Misionero canatami saquisha nini. Ñuca llajtamanpish tigrasha ninimi” nishpa mañarcani. Shinapish chai tutallapitajmi tandanacuipica “ñucanchij asignacioncunata pajtachi pudingapajca punllatami mejorashpa catina canchij” nijta uyarcani. Chaita uyashpaca Jehová Dios ñuca mañaita cutichishcatami ricurcani. Mejorashpa catingapaj Jehová Dios achcata ayudashcata ricushpaca cushillami sintirini.

Cai tucui huatacunata tiempo completopi sirvichun ñucanchijta utilizashcamantaca ishquindijmi Jehová Diostaca pagui ninchij. Ashtahuanpish shuj sumaj huarmita cushcamantapish pagui nini. Cai tucui huatacunatami paipaj cꞌuyaita, paipaj apoyotapish charishcani.

Ñallami 70 huatacunata charigrini. Chaimi instructor shina, superintendente shina ña mana sirvi tucushachu. Shinapish mana llaquirinichu. Jehová Diosta jatunyachingapajca chashna responsabilidadcunata charinaca mana minishtirishcachu can. Jehová Diosta tucui shunguhuan sirvinami tucuimanta yalli valishca can (Miqueas 6:8; Marcos 12:​32-34).

Cai tucui huatacunapica alaja asignacioncunatami cushicuihuan pajtachi pudishcani. Shinapish shujtajcunamanta yalli cashcamanta o huaquin habilidadcunata charishcamantaca cai privilegiocunataca mana charishcanichu. Ashtahuanpish Jehová Dios llaquij cashcamantami, ñuca mejorashpa catina cashpapish cai sumaj privilegiocunata ñucaman cushca. Jehová Dios ñucata mana ayudashca cajpica caicunataca mana pajtachi tucuimanchu carcani. Jehová Diosllami mejorashpa catichunca poderta cushpa sinchiyachishca (2 Corintios 12:9).