Ñucaca 1955 huatapimi nacirircani. Y quimsa mayor huauquicunatami charini. Ñucaca Finlandia llactamanda costa sur ladomanmi viñarcani. Cunanbica chai pushtutaca Vantaa nishpami rijsin.

Ñuca nara nacirijpillatami ñuca mamitaca testigo de Jehová shina bautizarirca. Shinapash ñuca taitaca ñuca mamita Jehovata ama sirvichunmi jarcaicunata churai callarirca. Shinallata ñucanchicunaman Bibliamanda ama yachachichun, reuniongunamanbash ama apachunmi prohibirca. Chaimandami ñuca mamitaca ñuca taita illajpi ñucanchicunaman Jehová Diosmanda yachachingapaj aprovechan carca.

Uchillamandapachami Jehová Diosta cazunata decidircani. 7 huatacunata charijpimi ñuca profesoraca yahuarta charij verilättyjä nishca tortillata micuchun obligangapaj munarca. Pero na micungapaj munashcamandami ninanda culirarca. Chai tortillata micuchun obligangapami ñucataca shimipi charishpa micuchingapaj munarca. Pero na micungapaj munashpami chai tortillataca alpaman shitarcani.

12 huatacunata charijpimi ñuca taitaca huañurca. Ñuca taita huañushca jipami reuniongunaman rita usharcani. Huauquipanicuna ñucamanda preocuparishcatami cuenta japircani. Chaita cuenta japinami espiritualmente ñaupaman catichun ayudahuarca. Bibliataca cada punllami lii callarircani. Shinallata publicaciongunatapash ali ali estudiangapami esforzarircani. Cashna esforzarimandami 8 de agosto de 1969 huatapi 14 huatacunata charishpa bautizari usharcani.

Colegiota estudiai tucuchishca jipallami precursor regular shina Jehová Diosta sirvi callarircani. Huaquin  semanacuna jipallami Pielavesi pueblopi predicaita ayudangapaj munaimandami chai pueblogupi causangapaj rircani.

Pielavesi llactapica Sirkka panigutami rijsircani. Paica humilde y Jehová Diosta alipacha sirvij huarmigu cashcamandami ninanda alicachishpa ricurcani. Paica minishtirishca cosasgucunata charishpapash cushillami carca. Ishcandillatami Jehová Diosta tucui shungu sirvingapaj munarcanchi. Shinallata ima asignacionda cujpipash ali pactachingapami dispuesto carcanchi. Ñucanchicunaca 23 de marzo de 1974 huatapimi cazararcanchi. Cazarashca jipa luna de mielman rinapa randica Karttula llactapi publicadorcunata minishtijuj pushtuman predicangapami rircanchi.

Cazarashca horasmandapachami Jehová Diosca paipa Gobiernota primero churajpica ñucanchi minishtishca cosasgucunata carashcata cuenta japipashcanchi (Mat. 6:33). Por ejemplo, Karttula llactapi cashpaca shuj carrotaca na charircanchichu. Chaimandami primeroca bicicletagupilla purin carcanchi. Shinapash invierno tiempocunapi ninan chiri chiri caimandami chirita aguantanaca difícil carca. Ashtahuanbash congregacionba territoriocuna jatun jatun cashcamandami shuj carrota minishtircanchi. Pero carrota randingapaca culquiguta na charircanchichu.

Shuj punllaca, na yashcapimi ñuca huauquica ñucanchita visitangapaj shamurca. Shina visitangapaj shamushpami paipa carrotapash ñucanchiman carashpa saquirca. Carromandaca imatapash na paganachu carcanchi. Shinallata carropa segurocunamandapash na paganachu carcanchi. Gasolinatallami churana carcanchi.

Jehová Diospa Gobiernota primero churashpa causajuimanda Jehová Dios ñucanchi minishtirishca cosasgucunata carajushcata cuenta japiparcanchi. Ñucanchicunaca Jehová Diospa Gobiernotalla primero churashpa causanatami dicidiparcanchi.

Huata 1978​pi Escuela del Servicio de Precursorpi cajpimi ñucanchipa instructor, Raimo Kuokkanen a huauquiguca, Escuela de Galaadman ringapaj solicitudta jundachichun animarca. Chaimandami Escuela de Galaadman ringapaj requisitocunata pactachingapaj inglesta yachajuita callarircanchi. Shinapash Escuela de Galaadman ringapaj solicitudtaca na jundachita usharcanchichu. Porque huata 1980​pimi Finlandia llactapa sucursalpi sirvingapaj richunmi invitarca. Chai tiempopica betelitacunaca Escuela de Galaadman ringapaj solicitudta jundachitaca na  usharcachu. Ñucanchicunaca Jehová Dios munashca pushtupi paita sirvingapami munarcanchi. Chaimandami chai invitacionda chasquishpa Finlandia llactapa sucursalpi Jehovata sirvingapaj rircanchi. Pero jipaman Escuela de Galaadman rina oportunidad tiajpica ringapami inglestaca yachajushpa catircanchi.

Huaquin huatacuna jipallami Cuerpo Gobernantemanda huauquicunaca betelitacunapash Escuela de Galaadman ri ushachunmi aprobarca. Chaita uyashpami chai rato solicitudta jundachishpa cacharcanchi. Betelpica cushillami Jehová Diostaca sirvinajuparcanchi, pero ayudachun ashtahuan minishtijuj pushtupi Jehovata sirvingapaj rina munaitami charircanchi. Escuela de Galaadpa clase 79manmi invitarca y septiembre de 1985 huatapimi graduarircanchi. Graduarishca jipaca ñucanchitaca Colombiamanmi cacharca.

Colombiaman chayajpica sucursalpi sirvichunmi cacharca. Sucursalpica usharishcaguta rurashpami trabajangapaj esforzarircani. Pero shuj huata jipallami shuj asignacionman cambiachun mañarcani. Primera vezmi cashna cambiachunga mañarcani. Chaimi Neiva llactaman misionero shina sirvichun cacharca. Cai llactaca Huila nishca pushtupimi carca.

Predicanataca siempremi gushtahuashca. Finlandia llactapi soltero cashpaca precursormi carcani. Huaquinbica ali horata predicangapaj llujshishpaca tutacamanmi predican carcani. Y cazarashpapash ñuca huarmigu Sirkkahuanga punlla enterocunatami predicashpa yalin carcanchi. Huaquinbi caru caru pushtucunaman predicangapaj rina tucushpaca carropimi puñun carcanchi. Shina ruraimandami cayandi punllapaca ñapash predicai callarin carcanchi.

Pundacunaca predicangapaj llujshishpaca ali, cushillapachami sintirin carcanchi. Chaimi misionero shina cutin sirvi callarishpaca shina sintiriparcanchi. Ñucanchi sirvinajushca congregacionbica huauquipanicunaca ashtahuan mirashpami catirca. Y Colombia llactamanda huauquipanicunaca respetuoso, juyaj y agradecidos huauquipanicunami carca.

Neiva ladocunapica ashtaca pueblocunami tiarca. Chaipica ni shuj testigollapash na causarcachu. Chai llactapi guerrillacuna tiashcamandami shuj llactamanda gentecunaca chai pushtupi causangapaj rinaca ninan peligroso carca. Chai pushtucunapi predicangapaca ¿imashinata rita ushanchi? nishpami cutin cutin pensarijurcanilla. Chaimandami Neiva llactamanda shuj personallapash testigo tucushcanman nishpami Jehová Diosta mañai callarircani. Shinallata bautizarishpa, espiritualmente shinlli tucushpaca paipa llactaman tigrashpa predicangapaj decidishcanman nishpapashmi Jehová Diostaca mañarcani. Pero Jehová Diosca ashtahuan mejorta rurangapami pensarishca cashcarca.

Tiempo jipallami Fernando González jovenhuan Bibliamanda yachachi callarircani. Paica Algeciras pueblopimi causarca. Cai pueblopica testigocunaca na tiarcachu. Paica Neiva llactapimi trabajan carca. Chai trabajoman ringapaca 50 kilometrocunatami viajan carca. Paica Bibliamanda estudiangapaj informaciongunataca ali ali prepararishpami shuyan carca. Y Bibliamanda yachajui callarishca horasmandapachami tucui reuniongunaman rin carca. Fernando jovenga Bibliamanda yachajui callarishca semanallatami pai causajuj pushtupi gentecunata tandachishpa Bibliamanda imata yachajushcata paicunaman yachachi callarirca.

Fernandoca Bibliamanda yachajui callarishca 6 quillacuna jipallami enero de 1990 huatapi bautizarirca. Chai jipagullami precursor shina sirvi callarirca. Algeciras llactapica paimi primer testigo carca. Chaimandami sucursalmanda huauquicunaca precursor  especialcunata cacharca. Febrero de 1992 huatapica shuj congregacionmi tiai callarirca.

Pero Fernandoca Algeciras llactapi predicashpaca na quidarcachu. Paica cazarashca jipaca paipa huarmi Olgandimi San Vicente del Caguanman predicangapaj rirca. Chaipica testigo de Jehovacunaca na tiarcachu. Paicunaca San Vicente del Caguán llactapi shuj congregación tiai callarichunmi ayudarca. Y huata 2002​pica superintendente de circuito shina sirvichunmi asignarca. Y cunangamanmi shina sirvinajun.

Cai experienciaca Jehová Diosta mañajushpaca imatapacha munashcata nishpa mañana cashcatami yachachihuarca. Jehová Diosca ñucanchi na ushashca cosascunatami ruraita ushan. Porque cai obraca Jehová Diospami can (Mat. 9:38).

1990 huatapimi superintendente viajante shina sirvichun nombrahuarca. Ñucanchipa primer circuitoca Bogotá llactami carca. Ñucanchica shuj shuj cosascunata ruranataca na yachaparcanchichu. Ashtahuanbash jatun jatun ciudadpi causana costumbretaca na charircanchichu. Chaimandami ashata manllanajurcanchi. Pero Jehová Diosca Filipenses 2:13​pi nishcashnami ayudarca. Chaipica: “Taita Diosmi quiquingunamanga paipa voluntadta rurachun fuerzata cun. Chaimi paipa voluntadta rurana munaita charichun y chaita pactachichunbash fuerzata cun” ninmi.

Medellín llactapa circuitomanmi asha tiempo jipalla ñucanchitaca cambiarca. Chai llactapi ashtaca nali ruraicuna tiashcamandami chai llactapi gentecunaca yacharishca carca. Chaimandami ima pasajpipash na manllarin carca. Shuj viajeca chai llactapi shuj personamanmi paipa huasipi Bibliamanda yachachijurcani. Justo chai horaspimi callecunapica ashtaca disparocuna uyarirca. Chaita uyashpami ñucaca ninanda manllarishpa alpaman cumurircani. Pero Bibliamanda estudianteca imapash na pasajujpishnami tranquilo Bibliata liishpa catirca. Liita tucuchishpaca “Ñami tigramuni” nishpami llujshirca. Asha rato jipallami ishcai uchilla huahuacunahuan tranquilo tigramurca. Shina tigramushpaca: “Disculpahuai, pero ñuca huahuagucunata apamungapami rina carcani” nihuarcami.

Pero shuj viajeca ashtahuanmi manllarircani. Huasin huasin predicanajujpimi ñuca huarmiguca ninanda manllarishca calpashpa shamurca. Ninanda manllarishcami picharimi disparahuarca nishpami villahuarca. Chaimi ninanda manllarircani. Pero jipamanmi ñuca huarmigupa ladota yalijuj shuj personata disparajushcata yachaj chayarcanchi.

Tiempohuanmi chai nali ruraicunapa chaupipi causanata asha asha yacharircanchi. Huauquipanicunaca cashna nalipacha ruraicunapa chaupipi cashpapashmi aguantashpa shinlli tucushpa ñaupaman catin carca. Shina aguantashpa ñaupaman catichun Jehová Dios paicunata ayudajushpaca ñucanchitapash ayudana cashcatami yarircanchi. Ñucanchicunaca congregacionmanda ancianocunapa consejocunata catingapami ninanda esforzarin carcanchi. Shinallata tucuipimi cuidadota charin carcanchi. Y Jehová Diospa ayudata mañashpami imata cashpapash paipa maquipi saquin carcanchi.

Huaquinbica huaquin situaciongunaca ñucanchi pensashcashna peligroso peligrosoca na carcachu. Por ejemplo, shuj viajeca shuj huasipi shuj familiatami visitajurcani. Chaipimi canllapi ishcai huarmicuna nali shimicunata nishpa, ninanda fiñanajunajujtashna uyarcani. Ñucaca shina fiñanajunajujta ricungapaca na munarcanichu. Pero huasi dueñaca  ricui nishpami atichihuarca. Chaimi ricungapaj quimirircani. Shina quimirishpami ishcai uchilla lorocunalla vecinocuna imata nin cashcata ninajushcata ricurcani.

1997 huatapica Escuela de Entrenamiento Ministerial b nishcapi instructor shina yachachichunmi nombrahuarca. Cai escuelaman rinataca ninandami gushtaparcani. Pero cai escuelapi yachachina bendicionda charinataca yaitapash na yaparcanichu.

Jipamanga superintendente de distrito shina sirvichunmi nombrahuarca. Pero superintendente de distrito shina sirvina arreglocuna ñana tiajpica, superintendente de circuito shinami cutin sirvi callarircani. Cunanbica ña 30 huatacunata yalimi instructor y superintendente viajante shina Jehová Diosta sirvijupani. Cai asignaciongunata pactachijushpaca ashtaca bendiciongunatami charipashcani. Pero na siemprechu fácil cashca.

Ñucaca shinllilla caractertami charipashcani. Shina shinllilla persona canami imapa shinlli situacionguna ricurijpica chimbapurachun ayudahuashca. Pero huaquinbica congregacionbi pitapash corregina cajpica yapallami shinlli cashcani. Por ejemplo, huaquinbica huauquipanicunataca juyaihuan intindinami canguichi nishpa consejashpaca shinlli shinllimi nin carcani. Pero huauquipanicunataca juyaihuan intindina cualidadtaca na charircanichu. Chaimandami chai cualidadta charingapaj esforzarina carcani (Rom. 7:​21-23).

Huaquinbica ñucapa pandarishcacunamandami desanimado sintirin carcani (Rom. 7:24). Shuj viajeca llaqui llaquipacha sintirimandami Jehová Diostaca misionero shina sirvinata saquishpa, Finlandia llactaman tigranarapashmi ali canman nishpami mañarcani. Chai punllaca reuniondami charircanchi. Chai reunionbimi, ñuca asignacionda pactachishpa catingapaj esforzarina cashcata y ñucapash cambiocunata rurashpa catingapaj esforzarina cashcatami cuenta japircani. Ñucapa mañashcacunata Jehová Dios imashina contestashcataca nunca na cungashachu. Shinallata Jehová Diosca ñucata juyaihuan cambiocunata rurachun ayudashcamandami ninanda agradicipani.

Ñucaca, ñuca huarmigu Sirkkandimi cazi tucui ñucanchi causaipi Jehová Diosta tiempo completopi sirvi ushashcamandami paitaca ninanda agradicipanchi. Shinallata ñuca huarmiguta carahuashcamandapashmi Jehová Diostaca ninanda agradicipani. Ñuca huarmiguca ashtaca huatacunatami juyaihuan tucuipi apoyahuajushca.

Ñallami 70 huatacunata cumpligrini. Chaimandami instructor y superintendente viajante shinaca ñana sirvi ushagrini. Shina cashpapash na llaquiripanichu. Porque Jehová Diosta cushilla sirvingapaca jatun responsabilidadcunata charinaca na minishtirinllu. Jehová Diosta tucui shungu sirvina, paita tucui shungu juyana y agradicishcata ricuchinami ashtahuan importante can (Miq. 6:8; Mar. 12:​32-34).

Ñuca causaipica tauca asignaciongunata pactachishpami cushilla yalipashcani. Pero cai asignaciongunataca shujcunamanda ashtahuan yali cashcamanda o imatapash ashtahuan ali rurai ushashcamandaca na chasquipashcanichu. Jehová Dios carajpillami cai bendiciongunataca charipashcani. Shinallata paipa ayudahuanllami ñucaman cushca responsabilidadcunataca ali pactachita usharcani. Jehová Diosca paipa poderhuanmi ñucataca shinllichishpa tucuipi ayudahuajushca (2 Cor. 12:9).