Naburhagwa omu mwaka gwa 1955, nie nali murho omu barhabana basharhu. Nakuliraga hofi n’e eneo y’e mukondwe (Sud) y’e Finlande eba oku burhambi bw’enyanja, eneo emanyikine ene nka vile y’e Vantaa.

Nyama abatizibagwa n’okuba Muhamirizi wa Yehova myaka misungunu embere mburhwe. Cikone larha akag’ihagalika okuli arhanayemereraga nyama akayiga Ebibliya haguma na nirhu erhi kurhuhêka oku ntimanano z’ecigamba. Muli ntyo akarhuyigiriza enyigirizo z’Ebibliya z’omusingi amango larha akag’iba arhaliho.

Kurhenga eburho bwani na kugendekera, nahiga okurhavuna amarhegeko ga Yehova. Kwa lwiganyo, mango maguma erhi ngwerhe myaka nda, mwalimu wani akunira bwenene erhi ndahira okulya e verilättyjä (biryo by’Abafinlandé biba nka capati bibamwo omuko). Kugerera kuboko kuguma, anseza amarhama ly’akanwa kayiguka na kugerera okundi kuboko alonza okunfomeza ikanya lyali kw’ebyo biryo. Nahasha okurhoza er’ikanya kurhenga omu kuboko kwage.

Erhi ngwerhe myaka 12, larha afâ. Enyuma z’aho, naba n’obulyo bw’okukaja oku ntimanano z’ecigamba. Bene wirhu omu cigamba banshibirira omu njira y’olukogo, n’oko kwanshumya njire amajambere g’ekiroho. Narhondera okusoma Ebibliya ngasi lusiku n’okuyiga ebicapo birhu by’Ecikristu n’obushiru. Ezo nkomedu nyinja z’okuyiga zantabala  nabatizibwa omu nsiku 8/8/1969 erhi ngwerhe myaka 14.

Kasanzi kasungunu enyuma z’okuyusa amasomo, naba painiya w’akasanzi koshi. Enyuma za migobe misungunu, nahamira ahali obulagirire bunji bw’abahubiri omu Pielavesi, hofi n’e centre y’e Finlande.

Omu Pielavesi, narhimanana na Sirkka, munyere wayishir’iba mukanie muzigirwa. Namusima bwenene bulya ali mwirhohye anal’izigire Yehova bwenene. Arhal’ilonzize okumanyikana bwenene erhi kuba na birugu binji by’omubiri. Ye na nani rhwal’igwerhe irala ly’okukolera Yehova bwenene nk’oku byakanahashikine, buzira kulaba mikolo ehi rhwahâbwa omw’ikubuliro lyage. Rhwajira obuhya omu nsiku 23/3/1974. Ahali h’okugenda hantu halebe lyo rhuluhuka enyuma z’okujira obuhya, rhwaja e Karttula, hantu hali obulagirire bunji bwenene bw’abahubiri b’Obwami.

Kurhangira oku murhondero gw’obuhya bwirhu, Yehova arhuyeresire oku ashibirira amalagirire girhu g’omubiri rhukahira obunguke bw’Obwami oku nafasi ntanzi omu kalamo kirhu. (Mt. 6:33) Kwa lwiganyo, omu Karttula, rhurhagwerhe mutuga. Oku murhondero rhwakag’ibalama omu kukolesa ikinga. Omu mango g’emboho, emboho yakag’iba nyinji bwenene eyo munda. Lyo rhuhubiri omu eneo nnene bwenene y’ecigamba cirhu, rhwal’ilagirire oku mutuga. Cikone rhurhagwerhe ensaranga z’okugugula.

Buzira kulaliza, mukulu wani ayish’irhulambagirira. Ashagalukira okurhusigira omutuga gwage. Ali erhi amalipa e asiranse, esanse yone rhwali rhwagula, na ntyo rhwaba n’omutuga rhwal’ilagirireko.

Yehova arhuyeresire oku yene ashibirira amalagirire girhu g’omubiri. Ebi rhwal’ishinganine rhujire kwali kuhira obunguke bw’Obwami oku nafasi ntanzi omu kalamo kirhu.

Erhi rhuli oku Masomo ga Bapainiya omu mwaka gwa 1978, Raimo Kuokkanen, a muguma w’omu balimu birhu arhuha omurhima rhuyunjuze efomu y’Amasomo g’Egileadi. Muli ntyo, rhwarhondera okuyiga Ecingereza lyo rhuhikiriza ebihûnyirwe ly’omuntu aja kw’ago masomo. Cikone omu mwaka gwa 1980, embere rhuyunjuze eyo fomu, rhwahamagalwa okuj’ikolera oku biro by’etawi omu Finlande. Ago mango Babetelite barhal’iyemerirwe okuyunjuza  efomu y’okuja kw’ago masomo. Cikone rhwal’ilonzize okukolera ahantu Yehova al’irhanyize oku ho hinja kuli rhwe c’arhali aha rhwene rhwal’irhanyize oku ho hinja. Muli ntyo, rhwayemera ogo mulali. Ciru akaba ntyo, rhwagendekera rhwayiga Ecingereza lyo rhuyorha rhucimanyire erhi hakabire obulyo bw’okuyunjuza efomu y’Amasomo g’Egileadi.

Myaka misungunu enyuma z’aho, Embaraza Eri Yalongoza yaderha oku Babetelite banayunjuza efomu y’okuja oku Masomo g’Egileadi. Buzira kurhindira rhwayunjuza ezo fomu, cikone arhali mpu bulya rhurhal’ishagalukire okukolera oku Beteli. Lubero n’oko, rhwal’ilonzize okuyerekana oku rhuli babidu okukolera ahali obulagirire bunji bw’abahubiri erhi rhwakayunjuzize ebihûnyirwe. Rhwayemererwa okuja oku Masomo g’Egileadi rhwanahâbwa ediplome y’isomo lya 79 omu Mwezi gwa 9, 1985. Rhwarhumwa okuj’ikolera e Colombie.

Omu Colombie, burhangiriza rhwarhumwa okukolera oku biro by’etawi. Nacihangana okujira okwani koshi omu mukolo gwani, cikone enyuma za mwaka muguma oku tawi, nabona oku nal’ilagirire oku kushanja omukolo. Obo bo bwali burhanzi bo na buzinda omu kalamo kani nahûnyire banshanje omukolo. Enyuma z’aho, rhwarhumwa okuj’ikola nka bamisiyonere b’omu eneo omu vile y’e Neiva, eba omu eneo y’e Huila.

Ensiku zoshi, nashagalukire omukolo gw’amahubiri. Amango nali painiya mulamba omu Finlande, hali amango nakag’ihubiri kurhenga sezi bwenene kuhika bijingo bwenene. Oku murhondero gw’obuhya bwirhu, kandi nie na Sirkka rhwakag’ihubiri omulegerege goshi. Erhi rhwakajir’ihubiri omu maeneo ga kuli, hali amango rhwakag’igwishira omu mutuga gwirhu. Oko kwakag’ishuba oku mubalamo n’okurhuhashisa rhurhondere amahubiri embere omu lusiku lukulikire.

Nka bamisiyonere b’omu eneo, rhwacib’iba n’obushiru bw’amahubiri rhwal’igwerhe embere. Ecigamba cirhu cayushuka, na bene wirhu na bali birhu b’omu Colombie bali ba bukenge, ba buzigire na ba kuvuga omunkwa.

Hofi n’omu Neiva rhwakag’ikolera, hali evile zirhalimwo Bahamirizi. Nakag’icidosa bwenene gurhi omwanzi mwinja gwakahisire mw’ezo eneo. Cikone enyanya z’ivita, n’ebikundi by’abasoda bagoma, ezo eneo zirhalimwo bulanzi oku bantu barhali baburhwa b’eyo munda. Co cirhumire nakag’isalira habe ciru muntu muguma waba Muhamirizi mw’ezo vile. Nakag’irhanya oku omuntu wa ntyo akabire muntu olamire omu Neiva. Co cirhumire, kandi nakag’isalira oku, enyuma z’okubatizibwa kwage, akule omu hali y’ekiroho anagaluke omu vile yage ly’ajihubirimwo. Nal’ishinganine manye oku Yehova al’imanyire akantu kinja k’okujira lugenda oko kulusha oku nakag’irhanya.

Kasanzi kasungunu enyuma z’aho, narhondera okuyiga Ebibliya na musole muguma wakag’ihamagalwa Fernando González. Al’ilamire omu Algeciras, vile nguma muli zirya vile zirhalimwo Bahamirizi. Fernando akag’ijira omubalamo gwa bilometre bilushire 50 ly’ahika e Neiva oku kazi. Akag’irheganya bwinja ngasi ifunzo na ho n’aho arhondera okuyisha oku ntimanano zoshi z’ecigamba. Kurhondera omugobe murhanzi Fernando arhonderaga okuyiga Ebibliya, akagusanya abandi bantu omu vile yage n’okubayigiriza ebi akag’iyiga kugerera ifunzo lyage ly’Ebibliya.

 Fernando abatizibwa omu Mwezi gwa 1, 1990, myezi ndarhu enyuma z’okurhondera ayiga Ebibliya. Enyuma z’aho, aba painiya w’akasanzi koshi. Bulya omu Algeciras mwalikolaga muli muhubiri muguma muburhwa wamo, ebiro by’etawi byakarhumirage bapainiya ba pekee mw’eyo eneo buzira kuyobohera obulanzi bwabo. Omu Mwezi gwa 2, 1992, ecigamba carhondezibwa mw’eyo eneo.

Ka Fernando akag’ihubiri omu vile yabo yone? Nanga! Enyuma z’okuja omu buhya, ye na mukage bahamira omu San Vicente del Caguán, yindi vile erhalimwo Bahamirizi. Barhabala okurhondeza ecindi cigamba eyo munda. Omu mwaka gwa 2002, Fernando ajirwa mwangalizi w’omuzunguko, na ye na mukage Olga, bagendekire omu mukolo gw’omuzunguko kuhika ene.

Kugerera ebi nacibwinire, nayizire oku kuli kwa bulagirire bwenene okusalira lugenda ebintu by’obwalagale biyerekire emikolo yirhu y’eciteokrasi. Yehova anajire ebi rhurhakahash’ijira. Okuderha okuli, omukolo gw’okusarula guli gwage ci gurhali gwirhu.—Mt. 9:38.

Omu mwaka gwa 1990, rhwarhumwa omu mukolo gw’omuzunguko. Omuzunguko gwirhu gwa burhanzi gwali omu Bogotá, vile nkulu y’eco cihugo. Ogo mukolo gwarhuyobohya. Nie na mukanie rhuba bantu barhalengeriri rhurhanajira buhashe boshi-boshi bwago-bwago. Na kandi rhurhal’ikomire okulama omu vile nnenene erimwo bantu banji na mikolo minji. Cikone Yehova ahikirizize eciragane cage ciri omu Abafilipi 2:​13, cidesire ntya: “Mungu ye, enyanya z’obulonza bwage bwinja, omushumya, n’okumuha irala n’emisi y’okujira.”

Enyuma z’aho, rhwarhumwa omu muzunguko gw’omu Medellín, vile naganiriraga oku murhondero gw’eci cigabi. Abantu b’eyo munda bal’ikomire bwenene obuminya bujirwa omw’ibarabara burhanacikag’ibayobohya. Kwa lwiganyo, mango maguma erhi ndi nalongoza ifunzo ly’Ebibliya, abantu barhondera okulashana embunga z’enyumpa nalimwo. Nali hofi ngwishire oku idaho cikone omwanafunzi w’Ebibliya agendekera asoma ecifungo arhanahuliganaga. Erhi ayusa okusoma, ampûna hisanzi hisungunu arhang’ihuluka. Enyuma za hisanzi hisungunu agaluka adwirhe bana babirhi barho anaderha ntya erhi anarhulirire, “Ombabalire, nal’igwasirwe ngend’ilerha abana bani.”

Hali agandi mango rhwakag’iba rhuli omu kanga kazibu. Mango maguma erhi rhuli rhwahubiri nyumpa oku yindi, mukanie ayisha alibirhire emunda ndi erhi analiko ecoba emalanga. Aderha oku hali omuntu walashaga amasoro emunda ali. Oko kwanyobohya bwenene. Cikone buzinda rhwamanya oku oyo walashaga amasoro arhal’ilonzize okulasha Sirkka; cikone al’ilonzize okulasha omuntu wageraga aha burhambi bwage.

Enyuma za kasanzi kalebe, obo buminya bw’omw’ibarabara burhacikag’irhuyobohya. Rhwahâbwa omurhima n’okurhahuligana kw’Abahamirizi ba mw’eyo eneo bakag’icibonera akanga ka ntyo n’akandi kanga kabi bwenene. Rhwabona oku, erhi akaba Yehova akag’ibarhabala akarhurhabire nirhu. Ngasi mango rhwakag’irhumikira amahano g’abagula ba mw’eyo eneo, rhwakajira ebihûnyirwe lyo rhucilanga n’okuleka ebindi omu maboko ga Yehova.

Kobinali, kanga kaguma na kaguma karhali kadarhi nk’oku rhwakag’irhanya. Mango maguma,  nayumva izu liri nka lya bakazi babirhi bakag’ijacirana embuga z’enyumpa nal’itemberire. Ntal’ilonzize okulola oku kadali cikone omumvirhiza wani ambwira oku nje omu paillote yage. Cikone ako kali “kadali” egarhi ka bakasuku babirhi bakag’iyiganya izu ly’abalungu.

Omu mwaka gwa 1997, naba mwalimu oku masomo gakag’ihamagalwa Shule ya Mazoezi ya Kihuduma. b Ensiku zoshi, nakag’ishagalukira okuja oku masomo g’eciteokrasi, cikone nta mango narhanyize oku nanahâbwa olukengwa lwinja lw’okuyigiriza oku masomo malebe g’eciteokrasi. Enyuma z’aho, naba mwangalizi w’ewilaya.

Erhi ogo mupango guyimanzibwa, nacib’iba mwangalizi w’omuzunguko. Muli ntyo omu myaka elushire 30, nashagalukire okukola nka mwalimu na mwangalizi w’omuzunguko. Eyo mikolo yandwirhire migisho minji. Cikone, rhurhajiraga eyo mikolo buzira mazibu goshi-goshi. Lekagi mpugûle.

Ntaba mulembu. Oko kwantabire ndwise akanga kazibu. Cikone, hali amango nayerekine obushiru burhalusire olugero omu kulonza okukubûla ebintu omu bigamba. Hali amango nahanwire baguma na baguma buzibu-zibu oku babe ba buzigire na ba lugero kuyerekera abandi. Eby’okushesa, mw’ago mango, lyo nani nabuzire ago morhere go nago.—Rm. 7:​21-23.

Enyanya z’obuzamba bwani, hali amango nakag’iciyumva mvunisire omurhima bwenene. (Rm. 7:24) Mango maguma, nabwira Yehova omw’isala oku kwakabire kwinja kuli nie ndeke omukolo gw’obumisiyonere n’okugaluka e Finlande. Mw’ebyo bijingo, naja oku ntimanano y’ecigamba. Ebi nayumvirhe kw’eyo ntimanano byanyemeza n’obwalagale oku nal’ishinganine ngendekere omu mukolo gwani n’okugendekera nakola oku buzamba bwani. Oku Yehova ashuzagya er’isala omu njira y’obwalagale, kucigendekire kwampuma oku murhima kuhika ene. Kandi, mvuzire omunkwa okubona antabire omu njira y’olukogo lyo mpima obuzamba bwani.

Nie na Sirkka rhunaciyumve rhuvuzire Yehova omunkwa bwenene oku lukengwa rhwabire nalo lw’okugeza hofi akalamo kirhu koshi omu mukolo gw’akasanzi koshi. Kandi mvuzire Yehova omunkwa bwenene okubona ampire omukazi w’obuzigire na mwishwekerezi eyi myaka yoshi.

Ndi hofi nyeneze myaka 70 n’okuleka omukolo gwani nka mwalimu na mwangalizi w’omuzunguko. Cikone, oko kurhangayisizi. Bulya gurhi? Bulya nyemire n’obwalagale oku ebikuza Yehova bwenene kuli kumukolera n’olugero, okumuzigira n’okumuvuga omunkwa n’omurhima gwirhu goshi. (Mik. 6:8; Mk. 12:​32-34) Rhurhashinganini rhumanyikane bwenene lyo rhukuza Yehova.

Erhi nkengera emikolo najijire, nampugûkwe oku ntahabâgwa eyo mikolo bulya nali mwinja kulusha abandi erhi bulya njira buhashe bulebe bwago-bwago. Lubero n’oko, Yehova ampire eyo mikolo enyanya z’olukogo lwage lurhashinganinwi. Ampire eyo mikolo ciru akaba nal’igwerhe obuzamba. Manyire oku nahashire okuhikiriza eyo mikolo kugerera oburhabale bwa Yehova. Mw’eyo njira, obuzamba bwani bwayerekine emisi ya Nnâmahanga.—2 Kr. 12:9.