Nateraky tamy 1955 aho. Misy telo mirahalahy zahay le zaho ty faralahy. Nibe tamy faritsy antimo amoron-driakin’ny Failandy any aho. Vantaa moa ty ikaiha an’ny faritsy io henanizao.

Natao batisa mamako, tao vitsivitsy talohan’ny niterahany ahy ka nilasa Vavolombelon’i Jehovah. Fe tena nanohitsy babako ka tsy nengany hampianatsy Baiboly anay mamako, na handay anay mivory. Lafa sendra tsy teo babako, zay mamako vo nampianatsy anay ty fahamarina fototsy amy Baiboly ao.

Mbo kely aho le fa niezaky nanoriky ty fitsipikin’i Jehovah. Tamy zaho fito tao, ohatsy, le neloky ahy madamonay zay satria zaho tsy nety nihina verilättyjä (mofo failandey vita amy pitsoky). Nipiritiny ty fifiko amy zay hisokatsy ty vavako, le natohokiny am-bavako eo raha iny. Fe nahiliko marè ty vavako amy zay tsy voavahany.

Nimaty babako tamy zaho 12 tao. Afaky nivory amy zay aho. Tena nisoa fanahy tamiko ty mpiara-manompo ka lasa nandroso ara-panahy aho. Nanomboky namaky Baiboly sanandro aho sady nazoto nianatsy an’ny boky noho gazetintsika rey. Nana fahazara soa aho ka lasa natao batisa tamy 8 Oòh 1969, tamy zaho 14 tao.

Laha vo nivita ty fianarako, le nanomboky nanao mpisava lala maharitsy aho. Herinandro vitsivitsy tafarani-zay aho nifindra ta Pielavesi, anivonivon’i Failandy any, satria nila mpitory maro tany.

 Lafa zaho ta Pielavesi any, le nifankahita tamy ajà ampela raiky mana anara Sirkka zay. Lasa valiko moa ie. Tena teako ie satria miambany sady tena tea an’i Jehovah. Tsy de tea misehoseho ie na ta hanahanan-draha. Samby naniry hanao ze fara herinay tamy fanompoa an’i Jehovah zahay, sady parè hanao ze asa ampanovy anay. Nifanambaly zahay tamy 23 Marsa 1974. Tsy nandeha nanao volan-tantely zahay fa avy le nandeha ta Karttula any satria tena nila mpitory maro ty tany.

Vo nifanambaly zahay, le nasehon’i Jehovah fa hanome ze raha ilànay ie laha manao voaloha lista ty Fanjakàny zahay. (Mat. 6:33) Tsy nana tomabily, ohatsy, zahay tamy zahay ta Karttula any. Nandeha biskalety avao tse zahay tamy voalohany. Fe lafa niavy ty asotry le nanintsy biby ty tany. Bevata biby ty faritanin’ny fiangonanay ka nila tomabily zahay mba hahafahanay mitory. Fe tsy nanan-drala zahay.

Tsy nampoizinay fa niavy namangy anay zokilahiko, azy narakarahiko iny. Tena nisoa fanahy ie ka nameany anay tomabiliny iny. Fa nivoaloa iaby amin’io ty assurances. Esansy avao ro nivilinay. Ela ty ela ka nahazo tomabily avao zahay.

Nasehon’i Jehovah aminay fa tena manao ty andraikitsiny ie ka nikarakaràny ze raha nilànay. Fe mila manao voaloha lista an’ny Fanjakà iny avao zahay.

Nanao Sekolin’ny Fanompoan’ny Mpisava Lala zahay tamy 1978. Nampirisiky anay Raimo Kuokkanen, a raiky amy mpampianatsy anay rey mba hanao fangataha hanatriky ty Sekolin’ny Gileada. Nanomboky nianatsy safà anglè amy zay zahay soa mba hahafeno fepetra hanatriky an’ny sekoly io. Fe tamy 1980, amy zahay mieritseritsy hameno fangataha iny mihintsy zahay ro nahazo fanasà hanompo amy biron’ny sampan’ny Failandy any. Mbo tsy afaky nanatriky Sekolin’ny Gileada koa moa ty Betelita tamy zay. Fe ta hanompo amy ze pilasy tean’i Jehovah hanompoanay zahay fa tsy amy ze teanay avao. Farany zahay naneky an’ny fanasà iny. Fe mbo niezaky nianatsy safà anglè avao zahay, hay ndre mba ho afaky hanatriky Sekolin’ny Gileada avao ndraiky andro any.

Tao vitsivitsy tafarani-zay, le nivola ty Filan-kevi-pitantana hoe afaky manatriky Sekolin’ny Gileada ty Betelita. Avy le nameno fangataha zahay. Fe tsy midika zay hoe tsy niteanay ty niasa tamy Betela ao. Mifanohitsy amy zay aza ka!  Ta hanompo amy ze pilasy mila mpitory maro avao zahay laha voatendry. Nekè hanao Sekolin’ny Gileada kilasy faha-79 zahay, le nizarà diplômy zahay tamy Septambra 1985. Nivoatendry ta Kolombỳ any zahay.

Nitendrè hiasa tamy biron’ny sampana any tse zahay lafa niavy ta Kolombỳ any. Niezaky nanao soa ty asa nanendrea ahy aho, fe tao raiky tafarani-zay, le tsapako hoe nila niova fanendrea zahay. Vo sambako tamy zay nangataky fanendrea hafa, sady tamin’iny avao aho ro nanao ani-zay. Nitendrè ho misionera amy tanàn’ny Neiva, amy faritsin’ny Huila any amy zay zahay tafarani-zay.

Fa nitea nanompo tamy faritany eny avao aho bakany zay. Tamy zaho mbo nimpisava lala sady mbo tsy nanambaly ta Failandy any, ohatsy, le nisy fotoa aho nitory baka amy maraindray le zisiky hariva. Tamy zahay amy Sirkka vo nifanambaly koa, le matetiky zahay nitory manontolo andro. Lafa zahay nitory tamy pilasy lavitsy an’ny tranonay rey, le matetiky zahay niroro tanaty tomabilinay ao avao. Mba tsy lany fotoa zahay amy zay sady afaky manomboky alohaloha lafa hamarain’iny.

Lafa zahay nanao misionera, le tsapanay hoe mbo tsy niova ty zotom-ponay fa mbo nanahaky taloha rey avao. Nitombo ty fiangona nisy anay. Tsy vitani-zay fa tena manaja olo ty rahalahy noho anabavy a Kolombỳ any, sady be fitiava rozy no mahay mankasitraky.

Misy tanà kelikely maromaro tsy misy Vavolombelon’i Jehovah rezay tsy lavitsy an’i Neiva, tanà nanendrea anay iny. Tena niasa loha aho hoe hanao akory ty hiavian’ny vaovao soa amy tanà kelikely rey eny. Fe tena nampatahotsy ty nandeha eny ho an’olo tsy tompon-tany satria nisy olo mifanafiky tany. Farany nivavaky aho mba hisy olo baka amy raiky amy tanà rey ho lasa Vavolombelon’i Jehovah. Nieritseritsy aho hoe hipetraky a Neiva any olo zay mba hianatsy fahamarina. Nivavaky koa aho mba ho lasa rahalahy matotsy olo io lafa vita batisa, sady himpoly amy tanàny any ie mba hitory. Haiko fa nana vahaolana soa kokoa mandilatsy ty nieritseretiko Jehovah.

Tsiela tafarani-zay, nisy pamaraky raiky mana anara Fernando González zay nanomboky nianatsy Baiboly. Nipetraky tan’Algeciras any ie, amy raiky amy tanà kelikely tsy nisy Vavolombelon’i Jehovah rey any. Nandeha lala 50 kilometra mahery eo Fernando sankerinandro, mba hiasa ta Neiva any. Tena nomaniny soa ty fianara kiraidraiky, sady avy le nanomboky nanatriky ty fivoria iaby koa ie. Laha vo nanomboky nianatsy ie tamy herinandro iny, le navoriny ty olo tamy tanàn-drozy iny ao bakeo nampianariny an-drozy ty raha nianarany.

Natao batisa Fernando tamy Zanviè 1990, zany hoe enim-bola tafaran’ny nanombohan’ny fianarany. Lasa mpisava lala maharitsy ie tafarani-zay. Tsy de natahotsy nanendry mpisava lala manoka amy tanàn’ny Algeciras any sasy ty biron’ny sampana nanomboky teo, satria fa misy Vavolombelon’i Jehovah raiky tompon-tany ty any. Tamy Fevriè 1992 amy zay le nisy fiangona raiky niforo tamy tanà io any.

Kindraindraiky avao va Fernando vo nitory tamy tanàny io ao? Aha! Lafa nanambaly ie le nifindra ta San Vicente del Caguán any rozy, zany hoe amy tanà kelikely hafa tsy misy Vavolombelon’i Jehovah any. Nanampy tamy fanorena fiangona raiky  amy tanà io any rozy. Tamy 2002 amy zay, nivoatendry ho mpiandraikitsin’ny faritsy Fernando, le mbo manao ty asan’ny faritsy avao ie henanizao miaraky amy Olga valiny.

Nianarako baka amy tantara io hoe tena ilà ty manao vavaky voafaritsy soa lafa amy raha mifandramby amy asa ampanovin’i Jehovah antsika. Vitan’i Jehovah ty manao ze raha tsy vitantsika. Sady tsy zay avao fa ie ro Tompon’ny vokatsy fa tsy tsika.​—Mat. 9:38.

Nivoatendry hanao ty asan’ny faritsy zahay tamy 1990. Tamy renivohitsin’ny Bogotá any ty tanà voalohany nitsidihinay. Natahotsy zahay tsy no tsy hahavita soa an’ny fanendrea anay iny. Tsy nana fahaiza manoka zahay morovaly sady tsy zatsy nipetraky tamy tanà bevata. Fe fa nampitamà Jehovah amy Filipianina 2:13 ao hoe: “Ndranahary ro manome hery anareo satria teany ty manao ani-zay, ka ataony ze hahavy anareo haniry noho hanao raha.” Nitanterahin’i Jehovah vatany raha zay.

Tafarani-zay zahay nivoatendry tamy faritsin’ny Medellín any, amy tanà niresahiko tamy voalohany teroy iny. Satà ty olo any le nisy olo nangalangalatsy mban-dala eny. Tena fa nahazatsy ty olo any raha zay ka fa tsy nahataitsy an-drozy. Nampianatsy Baiboly, ohatsy, aho ndraiky andro zay, le kanikanin’iny nanomboky nisy olo nifampitifitifitsy ty ambalikin’ny trano nampianarako iny ao. Nitonta ambany eo aho kanefa lahilahy nampianariko iny mbo nanohy namaky fehintsoratsy avao sady tsy taitsy. Lafa nivitany vaky raha iny, le niala tsiny tamiko ie bakeo niboaky amonto any. Nilitsy ie bakeon’iny le nanday ajà roe. Tsy taitsy avao ie nivola hoe: “Azafady fa mbo nangalaky an’ny anako reto aho.”

Fa ho niazon-draha ndraiky koa zahay tafarani-zay. Nitory santrano zahay ndraiky zay. Amy zahay mitsanga am-baravaran’olo eo iny amy zay, niavy bakany valiko lomay namonjy ahy sady atao raha natahotsy ie. Nivola ie fa nisy lahilahy zao nitifitsy azy. Lasa natahotsy koa aho. Fe nihainay tafarani-zay hoe tsy Sirkka nikendren’ny mpangalatsy iny io fa lahilahy raiky hafa nandalo tanilan’i Sirkka teo zay.

Lafa nandeha ty fotoa, le lasa tsy de natahotsy sasy zahay. Nampahery anay ty nahita ty herim-pon’ny Vavolombelon’i Jehovah tompon-tany niatriky raha nitovy aminay rey, ty sisany aza mbo mandilatsini-zay. Nieritseritsy amy zay zahay hoe laha nanampy an-drozy Jehovah, le tsy maintsy hanampy anay koa ie. Nijanjininay soa ty torohevitsy namean’ny anti-panahy tan-tanà eo, niamby soa koa zahay, sady niantehitsy tamy Jehovah.

Misy raha sisany aloha tsy mampidi-doza araky ty ieritseretantsika azy. Ndraiky andro, ohatsy, le naharè feo atao raha ampela roe nifamaly aho tambalikin’ny tranon’olo nitsidihiko zay tao. Tsy nahakinto ahy ty hanenty an’ny raha iny, fe nitaomin’ny tompon-trano iny hiboaky amonto any aho. Kay hondy raha iny perroquets roe nampimpoly ty raha nataon’olo tan-tanà eo avao.

Nivoatendry hampianatsy tamy Sekoly Fampiofana ho amy Fanompoa b aho, tamy 1997. Fa  niteako avao bakany zay ty nanatriky sekoly ara-baiboly. Fe tsy nieritseretiko mihintsy hoe hahazo tombotsoa hampianatsy amy ty raiky amy raha rey aho.

Lasa mpiandraikitsin’ny vondrom-paritsy aho tafarani-zay. Lafa nandeha ty fotoa le nifoana raha zay, farany aho nampoly ho mpiandraikitsin’ny faritsy ndraiky. Fa 30 tao mahery zay ty naha mpampianatsy noho mpiandraikitsin’ny faritsy ahy, le falifaly aho manao an’ny raha reo. Maro biby ty fitahia niazoko ndre tsy mora tamiko aza ty nanao an’ny asa nanendrea ahy reo. Ao moa fa hohazavaniko.

Olo tsy mora kivy aho sady somary natoky tena. Nanampy ahy hahay hiatriky raha sarotsy raha zay. Fe somary nafanafana fo aho kindraiky lafa nandamy raha amy fiangona eo. Ndraiky zay, ohatsy, le nampirisihiko mafy ty olo sisany amy fiangona eo mba ho be fitiava noho hahay handanjalanja. Fe mampalahelo fa kay zaho toy tsy nana an’ny toetsy rey tamy fotoa io.​—Rom. 7:21-23.

Lasa nikivy biby aho vokatsin’ny raha zay. (Rom. 7:24) Nivavaky amy zay aho ndraiky zay, le nivola tamy Jehovah hoe soa kokoa vasa hoasako laha mijano tsy ho misionera aho le moly a Failandy any. Nandeha nivory aho harivan’iny. Tena nampahery ahy ty raha nireko tany. Hitako hoe tokony hanohy an’ny asa nanendrea ahy iny avao aho sady tsy ho kivy fa hiezaky avao. Tena nidosiky ty foko ty nahita ty fomba namalean’i Jehovah ty vavaky nataoko tamy andro iny. Tena misaotsy azy koa aho satria nisoa fanahy tamiko ie ka nanampy ahy handresy ty fahalemeako.

Tena misaotsy an’i Jehovah zahay amy Sirkka satria nameany tombotsoa zahay ka afaky nampiasa ty fiainanay hanaova fanompoa manontolo andro. Tena mankasitraky an’i Jehovah koa aho satria nameany valy tena tea ahy noho tsy mivaliky, tanatin’ny tao maro zay.

Kely sisa le fa ho feno 70 tao aho ka tsy afaky hampianatsy amy sekoly ara-baiboly noho hanao ty asan’ny faritsy sasy. Fe tsy ataoko mampalahelo ahy raha zay. Fa manino? Satria matoky tanteraky aho fa laha manompo an’i Jehovah araky ty itiavany azy avao zahay, le zay ro tena manome voninahitsy azy. Mahazo voninahitsy koa ie laha midera azy amy fo zahay sady asehonay hoe teanay ie sady ankasitrahanay ze raha ataony ho anay. (Mika 6:8; Mar. 12:32-34) Tsy hoe lafa mana tombotsoa avao tsika vo afaky manome voninahitsy an’i Jehovah.

Tena niteako ty asa nampanovy ahy. Lafa zaho mandiniky an’ny raha rey, le mieky aho hoe Jehovah ro nahavy ahy hahazo an’ny raha rey satria nisoa fanahy tamiko ie, fa tsy hoe tena maeva ahy raha rey na hoe zaho ro tena mahay raha mandilatsy ty olo hafa. Nameany an’ny tombotsoa rey aho ndre eo aza ty fahalemeako. Haiko fa tsy ho nivitako mihintsy ty hanatanteraky an’ny asa nanendrea ahy rey laha tsy nanampy Jehovah. Zay antony ivolanako io hoe nahazo ty heri-Ndranahary aho lafa nalemy.​—2 Kor. 12:9.