Na ou fanau i le 1955, ma o aʻu o le uii o tama e toʻatolu. Na ou ola aʻe i le itu i saute o le talafatai o Finilani, i se vaipanoa ua taʻua nei o le aai o Vantaa.

I ni nai tausaga ae ou te leʻi fanau mai, na papatiso ai loʻu tinā o se tasi o Molimau a Ieova. Peitaʻi, na tetee loʻu tamā i le upu moni, ma e na te leʻi faataga loʻu tinā e suʻesuʻe ma i matou pe ave i matou i sauniga a le faapotopotoga. O lea, na ia aʻoaʻoina i matou i upu moni faavae o le Tusi Paia pe a leai lo matou tamā i le fale.

E mai i le taimi na ou laʻitiiti ai, na ou filifili e usiusitaʻi iā Ieova. O se faaaʻoaʻoga, ina ua fitu oʻu tausaga na matuā ita loʻu faiaʻoga ona o loʻu lē ʻai i verilättyjä (o panikeke a Finilani e faaaogā ai le toto). Na tago tui le panikeke i se tui ma oomi oʻu alafau ina ia matala loʻu gutu, ma taumafai e tuu faamalosi le panikeke i loʻu gutu. Ae na ou tago pō ese le tui mai i lona lima.

Na maliu loʻu tamā ina ua 12 oʻu tausaga, ma mafai ai ona ou auai i sauniga a le faapotopotoga. Na matuā naunau uso o le faapotopotoga iā te aʻu, ma na faalaeiauina ai aʻu e agaʻigaʻi i luma faaleagaga. Na amata ona ou faitauina le Tusi Paia i aso taʻitasi ma toʻaga e suʻesuʻe i a tatou lomiga faale-Tusi Paia. O lenā masaniga lelei, na ou filifili ai e papatiso i le 14 o oʻu tausaga iā Aokuso 8, 1969.

Na amata laʻu paeonia sauatoa ina ua uma laʻu aʻoga. E leʻi leva ae ou siitia atu i le mea o loo tele  ai le manaʻoga i Pielavesi, e lata i le ogatotonu o Finilani.

O i inā i Pielavesi na ou feiloaʻi ai i se tamaʻitaʻi e igoa iā Sirkka, o lē na avea ma aʻu avā pele. Na ou matuā fiafia i ona uiga lotomaulalo ma lona malosi faaleagaga. E leʻi manaʻo Sirkka i se tulaga aloaʻia po o le tele o meafaitino. Na ma faanaunau uma e faaaogā o ma ola e auauna ai iā Ieova, e tusa lava po o ā vala o le auaunaga e ma te auauna ai. Na ma faaipoipo iā Mati 23, 1974. Nai lo o le ma malaga e fai se ma honeymoon, ae na ma malaga e auauna i Karttula, o le mea e matuā tele ai le manaʻoga mo tagata talaʻi o le Malo.

E mai i le amataga o le ma aiga, na faamaonia mai ai e Ieova o le a ia tausia o ma manaʻoga faaletino pe a ma faamuamua lona Malo. (Mata. 6:33) O se faaaʻoaʻoga, e leʻi iai se ma taavale i Karttula. Na ma feoaʻi i se uila vilivae. Peitaʻi, na matuā maʻatiʻati le mālūlū pe a oo i le tau mālūlū. Sa manaʻomia se ma taavale e talaʻi ai i le oganuu telē a le faapotopotoga, ae e leʻi lava se ma seleni e faatau ai se taavale.

Na asiasi mai loʻu uso lona lua, ma o se mea e ma te leʻi faatalitalia. Na ia foaʻi mai lana taavale mo i maʻua. Ua uma ona totogi le inisiua, ae e pau le mea e manaʻomia ona fai o le faatau o le penisini. O lea la ua maua le taavale na ma manaʻomia.

Ua faamaonia mai e Ieova, e na te tausia o ma manaʻoga faaletino, ae e pau le mea e manaʻomia ona ma faia, o le faamuamua o manaʻoga o le Malo.

A o ma auai i le Aʻoga mo le Auaunaga Paeonia i le 1978, na faalaeiauina ai i maʻua e se tasi o faiaʻoga o Raimo Kuokkanen, a ina ia talosaga mo le Aʻoga o Kiliata. Na amata ona aʻo le ma faa-Peretania ona o lo ma sini e ma te fia auai i lenā aʻoga. Ae a o leʻi ma talosaga, na valaaulia i maʻua e auauna i le ofisa o le lālā i Finilani i le 1980. O le taimi lenā e leʻi mafai ona talosaga tagata Peteli e auai i le Aʻoga o Kiliata. Peitaʻi, na ma mananaʻo e auauna i le mea na finagalo Ieova e ma te auauna ai, ae e lē o le mea na ma fia auauna ai. O lea, na ma talia ai le valaaulia. Na faaauau ona aʻo le ma faa-Peretania ina neʻi maua le avanoa e talosaga ai mo Kiliata.

 Na faasafua mai e le Vaega Pule i tausaga mulimuli ane le avanoa mo tagata Peteli e talosaga ai mo le Aʻoga o Kiliata. Na faatumu loa a ma tusi talosaga, ae e leʻi faapea ai e ma te leʻi fiafia i le auaunaga i Peteli. Na ma mananaʻo e faaavanoa atu i maʻua e auauna i le mea o loo tele ai le manaʻoga pe afai e ma te agavaa. Na taliaina le ma talosaga e auai i Kiliata, ma na ma faauu i le vasega lona 79 iā Setema 1985. Na tofia i maʻua i Kolomepia.

Na tofia muamua i maʻua i le ofisa o le lālā i Kolomepia. Na ou galue mamafa i loʻu tofiga. Ae ina ua mavae le tausaga talu ona ma auauna i le lālā, na ou manatu ai ua tatau ona fai se suiga. E pau lenā o le taimi i loʻu olaga na ou talosaga ai e sui loʻu tofiga. O lea, na tofia i maʻua e galulue i le fanua o ni misionare i le aai o Neiva i le vaipanoa o Huila.

O se fiafiaga iā te aʻu le galue i le faiva i le fanua. A o oʻu nofofua ma paeonia i Finilani, na iai taimi na ou talaʻi ai mai i le taeaopō seʻia oo i le afiafipō. Ina ua faatoʻā ma faaipoipo la ma Sirkka, e iai taimi na ma talaʻi ai foʻi i le aso atoa. Na iai taimi na ma momoe ai i le ma taavale a o ma galulue i oganuu mamao. O le faia faapea, na sefe ai le taimi ma mafai ai ona ma vave amata i le aso e sosoo ai.

Talu ai ua ma toe galulue i le fanua o ni misionare, ua toe faaolaola ai lo ma agaga maelega na iai mo le faiva. Na faatoʻateleina la matou faapotopotoga. O uso ma tuafāfine Kolomepia, o ni ē e faaaloalo, agaalofa, ma lotofaafetai.

E leai ni Molimau a Ieova i taulaga na lata i le ma tofiga i Neiva. Na ou tau mafaufau pe e faapefea ona oo le tala lelei i na vaipanoa. Peitaʻi, ona o fetauaʻiga i le vā o fitafita fouvale, e leʻi saogalemu mo tagata ese le talaʻi i na nofoaga. O lea, na ou tatalo ai ina ia avea se tasi mai i na taulaga o se Molimau a Ieova. Na ou manatu e tatau ona nofo lenā tagata i Neiva, ina ia aʻoaʻoina ai le upu moni. O lea, na ou tatalo foʻi pe a uma ona papatiso lenā tagata, o le a ia tuputupu aʻe faaleagaga ma toe foʻi i lona nuu e talaʻi ai. Na tatau ona ou iloa, na silafia lelei e Ieova le auala e faaoo atu ai le upu moni i na taulaga.

E leʻi umi ae amata le ma suʻesuʻega faale-Tusi Paia ma se alii talavou e igoa iā Fernando González. Na nofo o ia i Algeciras, o se tasi o taulaga e leai se Molimau a Ieova e iai. E silia ma le 50 kilomita (30 maila) le mamao e malaga ai Fernando i Neiva mo lana galuega. Na sauniuni lelei o ia mo ana suʻesuʻega, ma na vave lava ona ia auai i sauniga uma. Na amata mai i le uluaʻi vaiaso o lana suʻesuʻega, na faapotopoto ai e Fernando tagata o lona nuu, ma aʻoaʻo i latou i mea na ia aʻoaʻoina mai i lana suʻesuʻega faale-Tusi Paia.

Na papatiso Fernando iā Ianuari 1990 ina ua mavae le ono masina talu ona fai lana suʻesuʻega. Na avea foʻi o ia ma paeonia sauatoa. Talu ai ua iai se Molimau a Ieova e nofo i Algeciras, ua mafai nei loa ona auina atu e le ofisa o le lālā ni paeonia faapito i lenā nofoaga. Na faavaeina se faapotopotoga i lenā taulaga iā Fepuari 1992.

Pe na gata ai le talaʻiga a Fernando i lona nuu? E leai. Ina ua uma ona faaipoipo Fernando, na la siitia atu ma lana avā i San Vicente del Caguán o se isi taulaga e leai ni Molimau a Ieova e nonofo ai. Na la fesoasoani e amata se faapotopotoga  i inā. Na tofia Fernando i le 2002 e auauna o se ovasia matagaluega, ma o loo faaauau ona la galulue ma lana avā o Olga i le galuega femalagaaʻi e oo mai i le asō.

O lenei mea na tupu, na ou aʻoaʻoina ai le tāua o le tatalo i ni mataupu patino e fesootaʻi i o tatou tofiga faaleagaga. E mafai ona faia e Ieova mea e lē oo i ai lo tatou malosi. O Ieova e ana le seleselega, ae e lē o i tatou.—Mata. 9:38.

I le 1990, na tofia ai aʻu e auauna o se ovasia femalagaaʻi. O le ma matagaluega muamua, sa iai i le laumua o Bogotá. Na tele mea na faapopoleina ai i maʻua i lenei tofiga. O i maʻua o ni tagata faatauvaa e leai ni tomai faapitoa. E ma te lē masani foʻi i le ola i se aai e tumutumu ai tagata. Ae na faataunuu e Ieova lana folafolaga i le Filipi 2:13: “O le Atua, o lē o loo faamalosia outou e tusa ma lona finagalo malie, e na te foaʻi atu iā te outou le faanaunauga faapea le malosi e galulue ai.”

Mulimuli ane, na tofia i maʻua e galulue i le matagaluega i le aai o Medellín, lea na ou taʻua muamua. Na masani tagata o lenā aai i fetauaʻiga i luga o auala, ma na pei lava o se meanoa iā i latou. O se faaaʻoaʻoga, a o oʻu faia se suʻesuʻega faale-Tusi Paia, na pāpā fana i fafo o le fale lea na ou iai. Na ou tau faapaʻū i lalo, ae na faaauau ona faitau e le tagata suʻesuʻe le palakalafa e pei lava e leai se mea o tupu. Ina ua uma ona faitau le palakalafa, na ia faapea mai seʻi alu atu i fafo. E leʻi umi ae toe foʻi mai ma ni tamaiti lāiti se toʻalua ma faapea mai i se auala toʻafilemu: “Faamalie atu, na ou alu atu e aumai laʻu fanau.”

E iai foʻi isi taimi na lamatia ai o ma ola. I se tasi aso a o matou talaʻi mai i lea fale i lea fale, na tamoʻe saoasaoa mai laʻu avā ua matuā fefe lava. Na ia fai mai na fana o ia e se tagata, ma na ou matuā popole ai lava. Ae na ma iloa mulimuli ane, e lē o Sirkka lea na taumafai le tamāloa e fana, ae o le isi tamāloa sa i autafa o Sirkka.

Na iʻu ina ma iloa le mea e fai pe a tutupu ni fetauaʻiga i luga o auala. Na faalaeiauina i maʻua i le lototetele o uso ma tuafāfine i inā, o ē na sili atu ona matuiā tulaga na fetaiaʻi ma i latou. Na ma iloa, pe afai na fesoasoani Ieova iā i latou, o le a ia fesoasoani mai foʻi iā i maʻua. Na ma utagia fautuaga a toeaina o le faapotopotoga, gaoioi ma le faautauta, ma tuu lo ma faatuatuaga iā Ieova.

Peitaʻi, o isi taimi na ma mafaufau e matuā leaga lava se mea o loo tupu, ae e lē o le mea moni lenā. O se faaaʻoaʻoga, i se tasi aso na ou mafaufau o loo misa ni fafine se toʻalua i fafo o le fale na ou asiasi i ai. Ou te leʻi ano i le mea na tupu, ae na fai mai le tagata e ona le fale ou te alu atu i luma o le poletito. O le mea e mālie ai, e lē o se misa, ae o ni koke se lua o loo faataʻitaʻi le auala e tautatala ai tuaoi.

Na tofia aʻu o se faiaʻoga i le Aʻoga mo Toleniga i le Faiva b i le 1997. Ou te talisapaia i taimi uma le auai i aʻoga faale-Tusi Paia. Ae ou te leʻi mafaufau  o le a ou maua lenei faaeaga tautele o le avea ma faiaʻoga.

Mulimuli ane, na ou auauna o se ovasia itumalo. Ae na ou toe foʻi e galue o se ovasia matagaluega, ina ua lē toe faaauau tofiga o ovasia itumalo. E silia ma le 30 tausaga o oʻu maua le faaeaga e avea o se faiaʻoga ma se ovasia femalagaaʻi. Na ou tofo i le tele o faamanuiaga a o oʻu auauna i na tofiga. Peitaʻi, e tele luʻi na aofia ai. Seʻi oʻu faamatala atu nisi o na luʻi.

O aʻu o se tagata e lototele ma sogasogā. O uiga na sa fesoasoani iā te aʻu i taimi faigatā o loʻu olaga. Peitaʻi, na iai taimi na ou soona maelega ai ma taumafai e faasaʻo mataupu i faapotopotoga. Na ou tinoū foʻi e faalaeiau isi ina ia faaalia le agaalofa ma le magafagafa pe a feutagaʻi ma isi. Ae o le mea e faanoanoa ai, ou te leʻi faaalia na uiga i na taimi.—Roma 7:​21-23.

Na iai taimi na ou lagona ai le lotovaivai ona o oʻu vaivaiga. (Roma 7:24) E iai se aso na ou tatalo ai iā Ieova, e sili pe a ou toe foʻi i Finilani ae faamuta laʻu auaunaga o se misionare. I le afiafi o le aso lava lenā, na ou auai ai i se sauniga a le faapotopotoga. Na faalaeiauina aʻu i lenā sauniga ina ia ou tumau pea i loʻu tofiga, ma faaauau ona ou galue e faaleleia oʻu vaivaiga. E pāʻia pea loʻu loto pe a ou mafaufau i le auala na tali ai e Ieova laʻu tatalo i lenā aso. Ou te matuā talisapaia foʻi le auala ua fesoasoani mai ai ma le agalelei Ieova ina ia foʻia oʻu vaivaiga.

E ma te matuā lotofaafetai ma Sirkka iā Ieova, ona o lenei faaeaga o le faaaogā o o ma ola mo le tele o tausaga i le auaunaga faataimi atoa. Ou te matuā lotofaafetai foʻi iā Ieova i lona foaʻi mai o se avā alofa ma faamaoni mo le tele o nei tausaga.

Ua toeitiiti atoa le 70 o oʻu tausaga. O le a lē toe avea la aʻu o se faiaʻoga i aʻoga faale-Tusi Paia ma se ovasia femalagaaʻi. Ae ou te lē lotovaivai ai. Aiseā? Auā ou te talitonu, e sili ona faamamaluina Ieova pe a tatou auauna iā te ia ma le lotomaulalo, ma vivii atu iā te ia mai i o tatou loto e tumu i le alofa ma le talisapaia. (Mika 6:8; Mare. 12:​32-34) Ina ia faamamaluina Ieova, e lē manaʻomia ona tatou maua ni faaeaga e matilatila ai i tatou i le vaaiga a uso.

Pe a ou toe mafaufau i faaeaga na ou olioli ai, ua ou iloa ai ou te leʻi mauaina nei faaeaga ona e faapea e sili atu aʻu i lo o isi, pe ona o ni oʻu tomai faapitoa. Peitaʻi, na tuuina mai e Ieova nei faaeaga iā te aʻu, ona o lona agalelei faifua. Na faasafua mai e Ieova nei faaeaga iā te aʻu, e ui i oʻu vaivaiga. O lana fesoasoani ua mafai ai ona ou faataunuu nei tofiga. O le mea moni, ua faasilisilia le malosi o Ieova ona o mea ua ou vaivai ai.—2 Kori. 12:9.