Haʼu moris iha tinan 1955, no iha maun naʼin-rua. Haʼu sai boot iha rai-Finlándia nia kosta súl, iha área ida neʼebé ema agora koñese nuʼudar sidade Vantaa.

Tinan balu antes haʼu moris, amá hetan batizmu nuʼudar Testemuña ba Jeová. Maibé apá kontra lia-loos no la fó lisensa ba amá atu estuda ho ami no la husik amá atu lori ami ba reuniaun. Tan neʼe, kuandu apá sai mak amá hanorin ami kona-ba Bíblia.

Husi kiʼik kedas, haʼu hakarak kaer metin ba Jeová nia matadalan. Porezemplu, bainhira haʼu tinan hitu, haʼu-nia mestre hirus tebes haʼu tanba haʼu lakohi han verilättyjä, neʼe mak ema Finlandés nia hahán neʼebé iha raan. Ho liman ida nia buti haʼu-nia hasan, no koko hatama hahán neʼe ba haʼu-nia ibun hodi uza garfu. Maibé ikusmai haʼu konsege halo garfu neʼe monu husi ninia liman.

Bainhira haʼu tinan 12, apá mate. Tuirmai, haʼu livre atu tuir reuniaun sira. Irmaun sira iha kongregasaun hatudu interese no laran-diʼak ba haʼu, no neʼe book haʼu atu laʼo ba oin iha dalan espirituál. Haʼu komesa lee Bíblia loroloron no badinas atu estuda ita-nia publikasaun sira. Toman diʼak sira-neʼe ajuda haʼu atu bele hetan batizmu kuandu haʼu tinan 14 iha 8 Agostu 1969.

 Lakleur depois remata eskola, haʼu komesa serbí nuʼudar pioneiru regulár. Semana balu liutiha, haʼu muda ba fatin neʼebé presiza liután haklaken-naʼin, iha distritu Pielavesi, iha rai-Finlándia nia parte klaran.

Iha Pielavesi, haʼu hasoru irmán naran Sirkka. Haʼu laran-monu ba nia tanba nia hatudu hahalok haraik an no hadomi tebes Jeová. Nia la buka oin no kontente ho moris neʼebé simples. Ami hakarak tebes atu aumenta ami-nia serbisu ba Jeová, no ami prontu atu serbí nia iha situasaun naran deʼit. Ami kaben iha 23 Marsu 1974. Maibé duké bá feriadu, ami deside atu bá serbí iha Karttula neʼebé presiza liután haklaken-naʼin.

Husi tempu neʼebé ami foin kaben, Jeová hatudu ba ami katak nia sei tau matan ba ami-nia presiza fíziku se ami buka uluk ninia Ukun. (Mt 6:33) Porezemplu, iha Karttula, ami la iha karreta. Foufoun, ami saʼe bisikleta deʼit. Maibé rai-Finlándia mak malirin tebetebes. Atu bele haklaken iha kongregasaun nia territóriu neʼebé luan loos, ami presiza karreta ida. Maibé ami la iha osan atu sosa karreta.

Derrepente deʼit, haʼu-nia maun mai vizita ami. Nia hatudu laran-diʼak hodi fó ninia karreta ba ami. Ami la presiza selu buat ida, ami presiza deʼit enxe mina. Ikusmai, ami iha duni karreta neʼebé ami presiza.

Jeová hatudu katak nia sei tau matan ba ami-nia presiza fíziku. Buat neʼebé ami presiza halo mak tau uluk ninia Ukun iha ami-nia moris.

Bainhira ami tuir Eskola Pioneiru iha tinan 1978, ami-nia instrutór ida naran Raimo Kuokkanen a anima ami atu hatama formuláriu ba Eskola Gilead. Entaun ami komesa aprende língua Inglés hodi ami bele kumpre kritéria atu tuir eskola neʼe. Maibé iha tinan 1980, antes ami bele aplika ba Eskola Gilead, ami simu konvite atu serbí iha sukursál Finlándia. Iha tempu neʼebá, ema Betel labele aplika ba Eskola Gilead. Maibé, ami prontu atu serbí iha fatin naran deʼit tuir Jeová nia hakarak, tan neʼe ami tama Betel. Maski nuneʼe, ami nafatin aprende Inglés tanba hanoin keta iha futuru ami iha oportunidade atu tuir Eskola Gilead.

 Tinan balu liutiha, Grupu Administradór fó sai katak ema Betel bele tuir Eskola Gilead. Tan neʼe, ami prenxe kedas formuláriu atu tuir, laʼós tanba ami la kontente iha Betel, maibé tanba ami hakarak serbí iha fatin neʼebé presiza. Ami simu konvite atu tuir Eskola Gilead no ami gradua husi klase 79 iha fulan-Setembru 1985. Ikusmai, ami simu knaar atu serbí iha rai-Kolómbia.

Iha rai-Kolómbia, ami-nia knaar primeiru mak atu serbí iha sukursál. Haʼu hakaʼas an atu halaʼo haʼu-nia knaar, maibé liutiha tinan ida, haʼu hanoin haʼu presiza troka haʼu-nia knaar. Ba dala primeiru iha haʼu-nia moris, haʼu husu atu simu knaar seluk. Tuirmai, ami simu knaar nuʼudar misionáriu iha sidade Neiva, iha área Huila.

Haʼu sempre gosta haklaken. Bainhira haʼu sei klosan no serbí nuʼudar pioneiru iha rai-Finlándia, dala ruma haʼu haklaken sedu husi dadeer toʼo kalan. Kuandu ami foin kaben, haʼu no Sirkka mós uza loron tomak atu haklaken. Bainhira ami haklaken iha fatin neʼebé dook, dala ruma ami toba deʼit iha karreta. Neʼe hamenus tempu neʼebé ami presiza gasta atu halo viajen, no ami bele komesa kedas haklaken iha loron tuirmai.

Nuʼudar misionáriu, ami bele sente fali laran-manas hanesan uluk kona-ba serbisu haklaken. Ami-nia kongregasaun sai boot liután, no irmaun-irmán sira iha rai-Kolómbia hatudu respeitu, domin, no agradese.

Ami serbí iha sidade Neiva, no neʼe besik sidade kiʼik oioin neʼebé seidauk iha Testemuña. Haʼu hanoin barak kona-ba oinsá liafuan diʼak bele toʼo iha área sira-neʼe. Maibé tanba funu, perigu ba ema estranjeiru atu bá fatin sira-neʼe. Entaun haʼu halo orasaun hodi husu Jeová atu ema ida iha área sira-neʼe bele sai Testemuña ida. Haʼu espera katak ema neʼe hela iha sidade Neiva no nia bele aprende lia-loos. Tan neʼe, haʼu mós halo orasaun katak depois ema neʼe hetan tiha batizmu, nia sei sai ema Kristaun neʼebé maduru no tuirmai fila fali ba ninia rai. Maibé Jeová iha solusaun neʼebé diʼak liu fali haʼu-nia hanoin.

Lakleur, haʼu komesa estuda Bíblia ho mane joven ida naran Fernando González. Nia hela iha Algeciras, neʼe mak sidade kiʼik ida neʼebé seidauk iha Testemuña. Baibain Fernando halo viajen ba kilómetru 50 liu atu bele serbisu iha Neiva. Nia sempre prepara didiʼak ba ninia estuda no komesa tuir kedas reuniaun hotu. Hahú husi semana primeiru neʼebé nia estuda Bíblia, Fernando komesa halibur ema iha ninia rai no hanorin sira buat neʼebé nia aprende ona husi Bíblia.

Fernando estuda Bíblia durante fulan neen deʼit. No nia hetan batizmu iha fulan-Janeiru 1990. Tuirmai, nia komesa serbí nuʼudar pioneiru regulár. Tanba iha ona Testemuña ida neʼebé hela iha Algeciras, sukursál haruka pioneiru espesiál atu serbí iha neʼebá. Iha fulan-Fevereiru 1992, kongregasaun ida harii iha neʼebá.

 Fernando haklaken deʼit iha ninia sidade ka lae? Lae! Depois nia kaben, nia ho ninia feen Olga muda ba San Vicente del Caguán, neʼe mak sidade kiʼik seluk neʼebé seidauk iha Testemuña. Sira ajuda atu harii kongregasaun ida iha neʼebá. Iha tinan 2002, Fernando simu knaar nuʼudar katuas área. No sira kontinua halaʼo knaar neʼe toʼo ohin loron.

Husi esperiénsia neʼe, haʼu aprende katak importante atu halo orasaun neʼebé espesífiku kona-ba ita-nia knaar iha lia-loos. Jeová bele halo buat neʼebé ita labele halo. Tuir loloos, nia mak tau matan ba serbisu haklaken, laʼós ita.—Mt 9:38.

Iha tinan 1990, haʼu simu knaar atu serbí nuʼudar katuas área. Fatin primeiru neʼebé ami serbí mak iha sidade kapitál Bogotá. Ami hanoin katak ami labele halaʼo knaar neʼe ho didiʼak. Ami mak ema baibain deʼit no la iha talentu ruma. Ami mós la toman atu hela iha sidade boot. Maibé Jeová kumpre ninia promesa iha Filipe 2:13: “Maromak mak fó forsa ba imi, hodi fó ba imi hakarak no kbiit atu halo buat neʼebé nia hakarak.”

Lakleur, ami serbí fali iha área Medellín, neʼe mak sidade neʼebé ohin haʼu temi ona. Ema iha neʼebá toman ona ho violénsia no la hakfodak ho ida-neʼe. Porezemplu, loron ida kuandu haʼu halaʼo hela estudu Bíblia, ema komesa tiru malu iha uma oin. Haʼu besik atu hakruʼuk tun ba rai, maibé estudante Bíblia kalma nafatin no kontinua lee parágrafu. Bainhira nia lee hotu tiha, nia husu lisensa atu bá liʼur. Liutiha tempu balu, nia tama fali uma-laran ho oan naʼin-rua no ho kalma hatete: “Deskulpa, haʼu presiza bá foti haʼu-nia oan sira.”

Ami hasoru situasaun perigu oioin. Loron ida, kuandu ami haklaken husi uma ba uma, Sirkka halai ba haʼu no haree hanesan ninia oin kamutis. Nia dehan mane ida koko atu tiru nia. Haʼu hakfodak. Ikusmai ami hatene katak loloos mane neʼe la hanoin atu tiru Sirkka, maibé mane neʼe hakarak tiru ema seluk neʼebé liu daudaun iha Sirkka nia sorin.

Neineik-neineik, ami aprende oinsá atu la sai pániku demais kuandu violénsia akontese. Ami hetan anima husi irmaun-irmán sira neʼebé tahan situasaun sira hanesan neʼe no mós situasaun neʼebé aat liután. Ami rekoñese katak se Jeová ajuda sira, nia mós sei ajuda ami. Ami sempre halo tuir matadalan husi katuas sira, kuidadu an nafatin, no husik buat hotu iha Jeová nia liman.

Situasaun balu la perigu hanesan buat neʼebé foufoun ami hanoin. Loron ida, kuandu haʼu iha vizita fali nia uma, haʼu hanoin haʼu rona feto naʼin-rua hakilar malu iha uma oin. Haʼu lakohi bá haree feto sira-neʼe diskute malu, maibé uma-naʼin bolu haʼu atu hamriik no haree. Loloos, laʼós feto naʼin-rua mak hakilar malu, maibé manu-loriku rua mak hasara hela viziñu.

Iha tinan 1997, haʼu simu knaar nuʼudar instrutór ba Eskola Treinu Atan Kristaun. b Haʼu sempre hafolin eskola sira husi ita-nia organizasaun, maibé haʼu nunka imajina katak haʼu sei hetan priviléjiu atu hanorin iha eskola ida.

Tuirmai, haʼu simu knaar nuʼudar katuas vizitante. Bainhira organizasaun hapara ona arranju kona-ba katuas vizitante, haʼu komesa serbí fali nuʼudar katuas área. Entaun ba tinan 30 liu, haʼu serbí nuʼudar katuas área no instrutór. Haʼu simu bensaun oioin nuʼudar haʼu halaʼo knaar sira-neʼe. Maibé laʼós situasaun hotu mak fasil. Haʼu sei esplika liután.

Haʼu mak ema neʼebé iha konfiansa makaʼas. Ida-neʼe ajuda haʼu kuandu haʼu hasoru situasaun susar. Maibé dala ruma haʼu laran-manas demais atu koko hadiʼa problema sira iha kongregasaun. Loron ida, haʼu laran-manas atu fó konsellu ba ema balu atu hatudu domin no la ulun-toos. Maibé loloos iha tempu neʼebá, haʼu rasik la hatudu hahalok sira-neʼe.—Rom 7:​21-23.

Dala ruma haʼu sente laran-kraik tebes tanba haʼu-nia fraku sira. (Rom 7:24) Loron ida, haʼu halo orasaun ba Jeová no hatete katak diʼak liu haʼu para haʼu-nia knaar nuʼudar misionáriu no fila fali ba rai-Finlándia. Iha kalan neʼebá, haʼu tuir reuniaun. Reuniaun neʼe anima haʼu atu kontinua halaʼo haʼu-nia knaar no hakaʼas an nafatin atu hadiʼa haʼu-nia fraku sira. Dalan neʼebé Jeová hatán haʼu-nia orasaun book tebes haʼu-nia laran toʼo ohin loron. Haʼu mós hafolin tebes dalan neʼebé nia ajuda haʼu ho laran-diʼak atu hadiʼa haʼu-nia fraku sira.

Ami agradese tebes ba Jeová tanba hetan priviléjiu atu bele serbí nia tempu-tomak durante tempu kleur. Haʼu mós agradese ba Jeová tanba hetan feen neʼebé hatudu domin no laran-metin durante tinan barak.

Lakleur tan haʼu sei tinan 70 no presiza para nuʼudar instrutór no katuas área. Maibé neʼe la halo haʼu sente triste. Tanbasá? Tanba haʼu fiar katak buat neʼebé importante ba Jeová mak ita serbí nia ho haraik an no fó hahiʼi ba nia ho domin no agradese. (Miq 6:8; Mc 12:​32-34) Atu bele fó hahiʼi ba Jeová, ita la presiza iha knaar neʼebé importante.

Nuʼudar haʼu hanoin fali kona-ba knaar oioin neʼebé haʼu simu, haʼu rekoñese katak haʼu simu knaar sira-neʼe laʼós tanba haʼu mak diʼak liu fali ema seluk, ka tanba haʼu iha abilidade espesiál ruma. Jeová hatudu laran-diʼak neʼebé boot hodi fó knaar sira-neʼe mai haʼu, maski haʼu iha fraku oioin. No haʼu hatene katak haʼu bele halaʼo knaar sira-neʼe ho susesu tan deʼit Jeová nia ajuda. Ho ida-neʼe, kuandu haʼu fraku haʼu bele sente Jeová nia kbiit.—2 Kor 12:9.