Eni nyi velegidwe khu 1955, nigu nyi diri nandra avbo nya sikhwathana siraru. Nyi dandrede vbafuvbi ni sul ga Finlândia, a gu wulanga muhuno gu tidwago gupwani lidhoropa la Vantaa.

Mamayi wangu a bhabhatisidwe kha nga moyo nya Dzifakazi dza Jehovha myagana hwane na nyi nga si velegwi. Ambari ulolo, papayi wangu a di si dzumeleyi mamayi wangu gu hevbula ni ethu mwendro gu hi dzega hi hongola mitshanganoni nya libandla. Ambari ulolo, uye a hi hevbudzide lisine nya matshina nya milayo nya Bhibhiliya papayi wangu na ri mwalo vbafuvbi.

Gukhugeya wananani wangu nyi di hatha gu thumeya Jehovha. Khu giyeyedzo, tepo nyi nga ba nyiri ni 7 myaga, litshigu limwedo muhevbudzi wangu a di nyi gorogeya kholu nyi nga mba dzumeya gu hodza sikatiyana si nga ba si thedwe novba. A di nyi phwinya sigundru khu libogo limwedo limbe libogo na pharide gikatiyana, a zama gu gi theya kanani gwangu. Nyi si kodzide gu vbepha gikatiyana gi nga ba gi romo mandzani gwaye.

Tepo nyi nga ba nyiri ni 12 myaga papayi wangu a difa. Hwane nya isoso nyi di pheya gu manega mitshanganoni nya libandla. Vandriyathu libandlani va nyi pharide khu ndziya nya yadi nigu isoso si nyi phaside gu dandra khu liphuvboni. Nyi di pheya gu hevbula Bhibhiliya tshigu ni tshigu nyi bwe nyi hevbula mabhuku yathu. Khu kotani nya isoso si nyi giride nyi ninganedwa khu gu bhabhatiswa na nyiri ni 14 myaga khu 8 nya Agosto nya 1969.

 Tepo khiyo nyi nga vbedza gu hevbula, nyi di pheya gu thuma kha nga piyoneiro nya tepo yatshavbo. Hwane nya dzisemana nya dzidugwana nyi di rura nyi hongola omu gu nga ba gu vbwetega ngudzu giphaso tigoni ga Pielavesi vbafuvbi ni Filândia.

Pielavesi nyi tide gyagadzyana gi nga khala mwangadzi wangu nyo golege, Sirkka. Nyi drindridwe gupima khu makhalelo yaye ni edzi a golago khidzo silo nya liphuvbo. Uye kha nga ba a dzi garadzeya gu ghanya ambari gu vbwetedzeya dzithomba. Ethu hi di gu dzi garadzeya gu thumeya Jehovha guya khu tshivba yathu yatshavbo, na si si khatadzisegi omu hi nga hadzi gu rumedwa umo. Hi tshadhide khu 23 nya Março nya 1974. Vbavbandze nya gu hi hongola lua de mel hi di hongola Karttula umo gu nga ba gu vbweta ngudzu giphaso nya vatshumayeli.

Gu khugeya hi nga tshadha, Jehovha a hi yeyedzide gu khuye a na hi khataleya ha gu thangisa Mufumo waye. (Mat. 6:33) Khu giyeyedzo tepo hi nga ba hi romo Karttula hi diri mwalo movha. Gupheyani hi di gu endra khu gu thumisa bhisikaleta. Ganiolu, tepo nya girame gu di gu dzidziya ngudzu. Gasi gu tshumayela gipandreni nya libandla lathu gu di gu vbwetega movha. Ganiolu, hi di ri mwalo dzitsapawu gasi gu renga movha.

Nya mba si vireya, hi di endredwa khu driyangu nya koma. Uye a di hi ninga movha yaye. A di gu livbide dziseghuro. Hi di yede gu renga basi mafura nya movha. Hwane nya isoso hi di renga movha hi nga ba hi yi vbweta.

Jehovha a hi yeyedzide gu khuye a di gu dzi emisede gu hi khataleya khu nyamani. Thumo wathu gu diri gu thangisa Mufumo waye.

Tepo khiyo hi nga ba hi hongola avba nya Xikola nya Thumo nya Wupiyonero khu 1978, Raimo Kuokkanen, a moyo nya vahevbudzi vathu a di hi kutsa gu dzi lovedzisa avbo nya Xikola ya Gileyadhi. Khu kharato, hi di pheya gu hevbula Gingidza ni makungo nya gu hi ninganedwa gu patega avba nya Xikola yoyo. Ganiolu, na hi si dzi lovedzise, hi di ranwa gasi guya thuma Bheteli ya Finlândia. Ga tepo yoyo, Vabhetelita kha va nga ba va yede gu dzi lovedzisa gasi gu hongola Gileyadhi. Ganiolu, ethu hi di gu vbweta gu thuma avba Jehovha a gu wonago nari gwadi, nasiri avba hi nga ba hi gu wona nari gwadi gwathu. Khu kharato, hi di dzumeya kovhinte. Nigu hi simamide gu hevbula Gingiza gasi hi  khala na hi dongide ha gu tshuka hi mana lithomo nya gu hongole Gileyadhi.

Hwane nya myaga nyo khaguri, Huwo nya Guthangeye yi di dzumeleya Vabhetelita gu dzi lovedzisa gasi gu hongola Gileyadhi. Hi di dzegeya gu dzi lovedzisa, ganiolu kha si thuli gu khiso kha ha nga ba hi tsaka Bheteli. Wulangani nya isoso, hi di gu vbweta gu thuma omu gu nga ba gu vbwetega ngudzu giphaso, ha gu ninganedwa. Hi di dzumeledwa gasi gu hongola Gileyadhi hi bwe hi patega avba nya turma N.° 79 khu Setembro nya 1985. Hi di yede guya thuma Colômbia.

Na hi romo Colômbia, gupheyani hi di rumedwa gasi guya thuma Bheteli. Nyi zamide gu gira satshavbo nyi nga si kodza avba nya thumo wangu. Ganiolu, hwane nya mwaga mowo bheteli, nyi di dzipwa na nyi gu vbweta gu vbindrugedza thumo. Ndrani nya thumo wangu watshavbo, yi diri tepo nyo pheye nyi nga lomba thumo nyo hambane. Hwane nya isoso, hi di rumedwa gasi guya thuma kha nga vamisionariyu, dhoropani ga Neiva avba nya dhepartamentu ya Huila.

Eni nyi ngu wu gola thumo nyo tshumayele. Kha nga olu nyi nga ba nyiri nyonga piyoneru Finlândia nyi di gu tshumayela gukhugeya dzimindrudzile kala wutshigu. Kha nga patwa wu ngarigo gu tshadha, eni ni Sirkka hi di gu vbedza litshigu latshavbo na hi gu tshumayela. Tepo hi nga ba hi tshumayela hwindzo ni gaya, dzimbe dzitepo hi di gu lala movhani. Isoso si hi vbungulede tepo hi nga ba hi yi vbedza khu gu endra si bwe si hi dzumeleya gupheya gu thuma limbe litshigu na gu ngari dzimindru.

Kha nga vamisionariyu, hi pwide litsako hi lipwidego gale thumoni nyo tshumayele. Libandla lathu li di dandra, nigu vandriyathu va Colômbia va di hi yeyedza githawo ni lihaladzo.

Na hi si hongoli hiya thuma Neiva, gu diri ni madhoropa nya mangi ma nga ba mari mwalo Dzifakazi. Eni nyi di gu garadzega khedzi mahungu nya yadi ma nga hadzi gu vboha khidzo ga madhoropa yoyo. Ambari ulolo, khu kotani nya dzinyimbi kha sa nga ba si vbevbugeya vale va nga ba va siri va tigoni mule. Khu kharato, nyi di gombeya nyi lomba gu kheni moyo a khalago ga madhoropa yoyo a khala Fakazi ya Jehovha. Eni nyi di gu pimisa gu kheni muthu yoyo a di yede gu vbanya Neiva gasi gu hevbula lisine. Khu kharato, eni nyi di gombeya gambe gu kheni hwane nya gu ba a bhabhatisidwe, a khala ndriyathu a vidzidwego a bwe a bweleya dhoropani gwaye gasi guya tshumayela. Nyi di yede gu dziti gu kheni Jehovha a na ni makungo nya yadi guvbindra yangu.

Khu gu landreya, nyi di pheya gu hevbula Bhibhiliya ni muphya nyo pwani khu Fernando González. Uye a di gu vbanya Algeciras, a gu lidhoropa limwedo li nga ba liri mwalo Dzifakazi. Fernando a di gu endra tanga nya 50 dzikilometru gasi guya thuma Neiva. Uye a di gu dzi dongiseya gwadi ga gihevbulo ni gihevbulo nigu nya mba hweya a di pheya gu manega ga yatshavbo mitshangano. Gukhugeya ga semana nya gu pheye nya gihevbulo gyaye, Fernando a di gu tshanganisa vathu dhoropani gwaye gasi gu va hevbudza esi a nga ba hevbula avba nya gihevbulo gyaye.

Fernando a di bhabhatiswa khu Janeiro nya 1990, 6 migima hwane na phede gu hevbula. Gukhugeya khu vbovbo, a di pheya gu thuma kha nga piyoneru nya tepo yatshavbo. Olu gu nga ba guri ni Fakazi mweyo Algeciras, si di gu vbevbuga gu bheteli yi rumeya vapiyoneru nyo hathege ga lidhoropa  lolo. Khu Fevereiro nya 1992 li di girwa libandla ga lidhoropa lolo.

Ina Fernando a di hegeya gu tshumayela dhoropani gwaye? Ahihi! Hwane nya gu ba a tshadhide, uye ni mwangadzi waye va di fuluga vaya vbanya San Vicente del Caguán, a gu limbe lidhoropa li nga ba liri mwalo Dzifakazi. Avo va phasedzede gu gira libandla ga lidhoropa lolo. Khu 2002, Fernando a di pheya gu thuma kha nga muwoneleyi nya sirkwitu, nigu uye ni mwangadzi waye Olga va ngo simama avba nya thumo wowu kala muhuno.

Guya khu matshango yaya, nyi hevbude edzi si gu na ni lisima khidzo gu gombeya khu gilo nyo kongome gi gimbeleyanago ni mithumo nya hengeledzano. Jehovha a ngu gira silo hi gu mba si kodza gu gira ethu. Kholu thumo wowu nya gu vbwere khwaye nasiri wathu. — Mat. 9:38.

Khu 1990 hi di rumedwa gasi guya thuma kha nga vawoneleyi nya sirkwitu. Hi phelede gu thuma ga lidhoropa nya likhongolo la Bogotá. Ethu hi di gu thava gu khethu thumo wathu kha wu na nga dugeleya gwadi. Eni ni mwangadzi wangu hi vathu nyo olovelege nigu kha hi giri mithumo nyo hlamadzise. Kha ha nga ba hi olovede gu vbanya ga lidhoropa li gu na ni vathu nya vangi. Ambari ulolo, Jehovha tadziside gitumbiso gyaye gi gomogo omu ga libhuku la Vafilipi 2:13 gi gu khiyo: “Nungungulu khuye a mi ningago tshivba gasi mu kodza gu mu tsakisa khu guvbeleya. Uye a ngu mi ninga gudogoreya ni tshivba nya gu gire isoso.”

Khu gu landreya, hi di rumedwa ga sirkwitu ga Medellín, a gu lidhoropa hi nga li khumbuga gupheyani. Vathu va iyoyo va dandride na va gu wona wughevenga mudziruwani, nigu isoso kha sa nga ba si va thurugisa gambe. Khu giyeyedzo, ga litshigu limwedo nyi nga ba nyi gimbidzisa gihevbulo nya Bhibhiliya, hi dipwa siphisa na si gu vbophoswa vbavbandze nya ndranga nyi nga ba nyi romo ga iyo. Eni nyi di gu vbweta gu dzima khu hwanga, ganiolu gihevbuli gyangu gi di simama gu leri paragrafu nya mba garadzega. Tepo a nga vbedza gu leri a di nyi lomba divalelo a bwe a duga vbavbandze. Hwane nya gitepwana, uye a di wuya ni sanana sivili nya sidugwana a bwe a ganeya gu khuye: “Nyi divaleye, nyi di yede guya dzega sanana sangu.”

Dzimbe dzitepo hi di gu romo mhangoni. Litshigu nyo khaguri na hi gu tshumayela khu ndranga ni ndranga, mwangadzi wangu a di nyi teya na tutuma, na garadzegide. Uye a di khuye, mwama moyo a di gu zama gu nyi vbophosa. Isoso si nyi thurugiside ngudzu. Ganiolu, khu hwane nya isoso hi di tugula gu khethu mwama wule kha nga ba a zama gu vbophosa Sirkka; uye a di gu zama gu vbophosa mwama moyo a nga ba a vbindra khu vbafuvbi gwaye.

Khu gu gimbiya nya tepo hi di oloveya wughevenga wa ruwani. Hi tiyisidwe khu siyeyedzo nya dzimbe Dzifakazi dza Jehovha dza zonani mule dzi nga emisana ni siemo nyo fane ni simbe nyo thise guvbindra sile. Hi di vboheya avba nya gu khethu abari gu Jehovha a va phaside, a na hi phasa anethu. Hi di gira satshavbo gasi gu engisa wusingalagadzi wa madhota ya gipandreni mule, hi dzi vhikeya hi bwe hi diga satshavbo mandzani ga Jehovha.

Khu lisine, simbe siemo kha sa nga ba siri mhango nya yikhongolo nga edzi hi nga ba hi pimisa khidzo. Ga litshigu limwedo, nyi di gira nga khatshi nyi dipwa vanyamayi vavili va nga ba va valana vbavbandze nya ndranga ya oyu nyi nga ba nyi mu  wuseya. Eni kha nya nga ba nyi vbweta gu wona gu ganedzisana gogo, ganiolu mune ndranga a di nyi kutsedzeya gu hongola iyoyo. Ganiolu, hi di tugula gu khethu gu diri dzipapaghayo dzimbili dzi nga ba dzi pimedzeya vavhizinyu.

Khu 1997, nyi di hathwa gasi gu khala muhevbudzi nya Escola de Formação Ministerial. b Tepo yatshavbo nyi ngu gola gu patega omu nya dzixikola nya Mufumo. Ganiolu, kha nya nga ba nyi pimiside gu kheni nyi na tshuka nyi mana lithomo nya gu hevbudze ga mweyo yakone.

Khu gu landreya, nyi di pheya gu thuma kha nga muwoneleyi nya dhistritu. Tepo thumo wowu wu nga emiswa, nyi di bweleya nyi ya thuma kha nga muwoneleyi nya sirkwitu. Khu tanga nya 30 myaga, nyi tsakide khu gu thuma kha nga muhevbudzi ni muwoneleyi a gimbiya-gimbiyago. Mithumo yeyi yi ngu resa makategwa nya mangi. Ganilou, khandri tepo yatshavbo si nga gimbiya nga edzi hi nga ba hi si vireya khidzo. Ema nyi tshamuseya.

Eni nyi di tiyide. Isoso si nyi phaside gu emisana ni sigaradzo. Ambari ulolo, dzimbe dzitepo nyi ngu thuma ngudzu khu sighingi gasi gu lulamisa silo nyo khaguri libandlani. Ga giemo nyo khaguri nyi di gengedza vandriyathu gasi gu yeyedza lihaladzo vambe ni gu dinganiseya. Ganiolu, ga giemo gyagimwegyo nyi di gu keneledwa khu makhalelo yamamowo. — Rom. 7:21-23.

Khu kotani nya sihoso sangu, dzimbe dzitepo nyi di gu dzipwa na nyi vbede ngudzu tshivba. (Rom. 7:24) Ga tepo nyo khaguri, nyi di embeya Jehovha khu nombelo gu kheni i tshukwana nyi ema gu thuma kha nga misiyonaryu nyi bweleya Finlândia. Ni wutshigu nyi di hongola mitshanganoni nya libandla. Esi nyi nga sipwa mitshanganoni si nyi phaside gu tiyisega gu kheni nyi di yede gu simama avba nya thumo wangu nyi bwe nyi tshukwadzisa gu mba vbeleya gwangu. Kala muhuno, nyi ngu hlamadziswa khedzi Jehovha a nga hlamula khidzo nombelo wangu. Gu diga isoso, nyi ngu bonga ngudzu khu gu ba a nyi phaside gu pala gu wegeleya gwangu.

Eni ni Sirkka, hi ngu bonga Jehovha khu lithomo hi nga manega nalo nyo vbedze womi wathu watshavbo thumoni nya tepo yatshavbo. Eni nyi ngu bonga ngudzu Jehovha khu gu ba a nyi ningide nyamayi a gu na ni lihaladzo, nigu a simamidego gu tumbega yatshavbo myaga yeyi.

Nya mba hweya nyi na gira 70 myaga nigu nyi na ema gu thuma kha nga muhevbudzi ni muwoneleyi a gimbiya-gimbiyago. Ambari ulolo, isoso kha si nyi vbedzi tshivba. Khu ginani? Kholu nyi ngu tiyisega gu kheni egi gi zundzago Jehovha, khu gu mu thumeya khu gu dzi nogisa ni gu mu dhumisa khu monyo wathu wu tadego khu lihaladzo ni gu bonga. (Mik. 6:8; Marko 12:32-34) Kha si vbwetegi gu hi manega ni thumo nya wukhongolo gasi gu zundza Jehovha.

Nya gu khedza hwane, nyi wona mithumo yatshavbo nyi giridego, nyi tugude gu kheni kha nya gira mithumo yeyi khu gu ba nyi ninganedwa nyonga mwendro khu gu ba nyiri ni makodzelo nyo hlamadzise. Wulangani nya isoso, Jehovha a nyi ningide mithumo yeyi khu kotani nya wuwadi waye. Uye a nyi ningide malungelo yoyo ambari olu nyi nga ba nyi hosisa. Egi nyi gitigo khu gu nyi si kodzide gu gira mithumo yeyi khu gu phaswa basi khu Jehovha. Khu ndziya yeyi, gu mba vbeleya gwangu gu yeyedzide tshivba ya Nungungulu. — 2 Kor. 12:9.