Ndakazyalwa mu 1955, alimwi ndendime musyoonto akati kabana basankwa botatwe. Ndakakomenena kufwaafwi ankomwe iili kumusanza kwa Finland, mucilawo lino ciitwa kuti dolopo lya Vantaa.

Bamaama bakabbapatizyigwa akuba umwi wa Bakamboni ba Jehova kakuceede myaka misyoonto kuti ndizyalwe. Nokuba boobo, bataata tiibakali kukayanda kasimpe alimwi kunyina nobakali kubazumizya bamaama kutuyiisya tobana naa kututolelezya kumiswaangano yambungano. Aboobo bakali kutuyiisya njiisyo zyamu Bbaibbele zyantalisyo ciindi bataata batanooliko.

Kuzwa kubwana, ndilamumvwida Jehova. Mucikozyanyo, ciindi cimwi nondakajisi myaka yakuzyalwa iili 7, bayi bangu kucikolo bakandinyemena akaambo kakuti tiindakali kulya kkekke iitwa kuti verilättyjä akaambo kakuti bakali kubikkilizya abulowa nobakali kwiipanga. Bakandijata akusola kujalula mulomo wangu kutegwa bandilisye kkekke eeyi kubelesya mfwoloko. Pele ndakacikonzya kwiitapula mfwoloko kuzwa mujanza lyabo.

Bataata bakafwa nondakajisi myaka iili 12. Aciindi aawa, ndakatalika kujanika kumiswaangano yambungano. Bakwesu mumbungano bakatalika kundibikkila maano, aboobo eeci cakapa kuti ndiyaambele kumuuya. Ndakatalika kubala Bbaibbele abuzuba alimwi akubala mabbuku eesu cakusitikila. Kucita boobu kwakandigwasya kubweza ntaamu yakubbapatizyigwa kandijisi myaka iili 14, mu August 8, 1969.

 Nondakamanizya cikolo, ndakatalika bupainiya bwaciindi coonse. Nokwakainda nsondo zisyoonto, ndakaunka kuyoobelekela kubusena bubulide ku Pielavesi, mucisi ca Finland.

Ku Pielavesi, ndakabonana aba Sirkka, balo kumbele ibakaba bakaintu bangu. Ndakatalika kubayanda akaambo kakuti bakali kulicesya alimwi bakali kumuyanda kapati Jehova. Tiibakali kuliyandawida mpuwo naa zintu zyakumubili. Toonse twakalikanzide kubelekela Jehova cakumaninina, tacikwe makani amulimo ngotwakali kuyoopegwa. Twakakwatana mu March 23, 1974. Mpoonya muciindi cakuunka kuyoolyookezya nowakamana mucado wesu, twakaunka kuyoobelekela ku Karttula, kwalo ikwakali kuyandika bakambausi ba Bwami banji.

Kuzwa kumatalikilo aacikwati cesu, Jehova watondezya kuti wakali kuyootulanganya kumubili ikuti twasaanguna kuyandaula Bwami bwakwe. (Mt. 6:33) Mucikozyanyo, ku Karttula tiitwakajisi moota. Aboobo kumatalikilo twakali kubelesya ncinga. Pele ciindi camupeyo kwakali kutontola kapati. Kutegwa tucikonzye kukambauka mucilwo cambungano calo icakali cipati kapati, twakali kuyandika moota. Pele tiitwakajisi mali aakuula moota.

Cakutayeeyela, mupati wangu wakatuswaya. Mpoonya wakatupa moota yakwe kuti katubelesya. Zyoonse zyakalibbadeledwe kale. Twakali kuyandika buyo kuula mungwimba. Aboobo, aciindi awa twakaba amoota njotwakali kuyandika.

Jehova wakatondezya kuti ngowakajisi mukuli wakulanganya nzyotwakali kuyandika kumubili. Mulimo wesu wakali buyo wakubikka Bwami mubusena bwakusaanguna.

Mu 1978, notwakali ku Cikolo Camulimo Wabupainiya, mukwesu Raimo Kuokkanen, a umwi wabamayi ibakali kutuyiisya, wakatukulwaizya kulembela ku Cikolo ca Gileadi. Aboobo twakatalika kwiiya mwaambo wa Cikuwa katujisi makanze akuti tukeelele kunjila. Nokuba boobo, katutanalembela, twakatambwa kubelekela kuofesi yamutabi ku Finland. Aciindi aawa, aabo babelekela a Beteli tiibakali kuzumizyigwa kulembela ku Gileadi. Pele twakali kuyanda kubelekela kooko nkwaatusalila Jehova, ikutali nkotuyanda. Aboobo, twakazumina kuyoobelekela ku Beteli. Nokuba boobo, twakazumanana kwiiya Cikuwa nkaambo ambweni  kumbele twakali kuyooba acoolwe cakulembela ku Gileadi.

Nokwakainda myaka iili mbwiibede, bamu Kabunga Keendelezya bakaamba kuti abalo aabo babelekela a Beteli balakonzya kulembela ku Gileadi. Aboobo twakalembela mpoonya-mpoonya, pele ikutali akaambo kakuti tiitwakali kukukkomanina kubelekela a Beteli. Muciindi caboobo, twakali kuyanda kubelekela kooko kwakali kuyandika babelesi banji kuti naa tweelela. Twakatambulwa ku Gileadi akumanizya kkilasi yanamba 79 mu September 1985. Twakatumwa kuyoobelekela ku Colombia.

Ku Colombia, twakasaanguna kutumwa kuyoobelekela ku ofesi yamutabi. Ndakali kusolekesya kubeleka kusikila mpondigolela mumulimo ngondakapedwe, pele nokwakainda mwaka katuli amutabi, ndakalimvwa kuti twakeelede kucincwa mulimo. Kwaciindi cakusaanguna mubuumi bwangu, ndakalomba kuti bandicince mulimo. Kuzwa waawo, twakatumwa kuyoobeleka katuli bamisyinali mudolopo lya Neiva mucooko ca Huila.

Lyoonse ndilaukkomanina mulimo wakukambauka. Kandili painiya uutakwete ku Finland, zimwi ziindi ndakali kukambauka kuzwa kuseeni mane kusikila kumangolezya. Katuli banabukwetene bapya, mebo abakaintu bangu ba Sirkka twakali kukambauka buzuba boonse. Ciindi notwakali kukambaukila kumasena aakali kulamfwu ankotwakali kukkala, zimwi ziindi twakali koona mumoota wesu. Kucita boobu kwakali kutugwasya kujana ciindi cakulyookezya mpoonya akutalika lweendo buzuba butobela.

Mbuli bamisyinali, busungu bwesu mumulimo wakukambauka bwazumanana mbuli kumatalikilo. Mbungano yesu yakakomena alimwi bakwesu abacizyi baku Colombia bakali kutulemeka, kutuyanda alimwi akutulumba.

Mumadolopo aakali aafwaafwi kuzwa nkotwakali kubelekela ku Neiva kwakanyina Bakamboni. Tiindakazyi makani mabotu mbwaakali kuyoosika kumasena aaya. Nokuba boobo, akaambo kabasikalumamba bazangi, masena aaya akali kuyoosya kapati kwaaambisya kuli baabo batakali kukkala mumadolopo aaya. Aboobo ndakali kupailila kuti kubota muntu umwi mumadolopo aaya akabe Kamboni. Ndakali kulombozya kuti muntu ooyu kakkala mu Neiva kutegwa ayiye kasimpe. Kunze lyaboobo, alimwi ndakali kupailila kuti kubota aakumana kubbapatizyigwa akabe mukwesu uusimide alimwi akujoka kumunzi okwabo kutegwa akakambauke. Tiindakazyi kuti Jehova wakajisi nzila iinda kubota kwiinda yangu.

Nokwakainda ciindi cisyoonto, ndakatalika kwiiya Bbaibbele amukubusi umwi wazina lya Fernando González. Wakali kukkala ku Algeciras idolopo lyatakajisi kamboni naba omwe. Nsondo ansondo, Fernando wakali kweenda makkilomita aayinda ku 50 kuunka ku Neiva kumulimo. Wakali kulibambila kabotu ciiyo cimwi acimwi alimwi kalitanalampa wakatalika kujanika kumiswaangano yambungano yoonse. Nsondo njoonya njaakatalika kwiiya, Fernando wakatalika kubaambila mbaakali kukkala limwi mudolopo nzyaakali kwiiya kuzwa mu Bbaibbele.

Fernando wakabbapatizigwa mu January 1990, nokwakainda myezi iili 6 kuzwa ciindi naakatalika kwiiya Bbaibbele. Kumane wakaba painiya waciindi coonse. Lino mbwaanga mudolopo lya Algeciras  kwakaba Kamboni, cakali cuuba-uba kuti baku ofesi yamutabi batume bapainiya baalubazu kubusena oobu. Mu February 1992, kwakapangwa mbungano mudolopo eeli.

Sena Fernando wakali kukambaukila buyo mudolopo eeli? Peepe! Naakakwata walo abakaintu bakwe bakalongela kudolopo lya San Vicente del Caguán lyalo lyatakajisi Bakamboni. Okuya bakatalisya mbungano. Mu 2002, mukwesu Fernando wakasalwa kuba mulangizi wabbazu alimwi walo abakaintu bakwe ba Olga, bazumanana mumulimo wamubbazu kusikila sunu.

Eezyi zyakandicitikila, zyakandiyiisya mbociyandika kapati kupailila zintu zigaminide zijatikizya mulimo ngondapegwa. Jehova ulacita zintu nzyotutakonzyi kucita swebo. Amana buya, mulimo wakutebula nguwakwe, tauli wesu pe.—Mt. 9:38.

Mu 1990 twakatumwa kuyoobelekela mumulimo wakweendeenda. Bbazu lyakusaanguna motwakabelekela, lyakali mudolo pati lya Bogotá. Twakalimvwa kuti tiitwakali kuyoocikonzya kuubeleka kabotu mulimo ooyu. Mebo abakaintu bangu aaciindi aawa tiitwakajisi luzyibo luli loonse. Alimwi tiitwakazyibide kukkala mudolopo lilaabantu banji. Nokuba boobo, Jehova wakacizuzikizya cisyomezyo cakwe cili kulugwalo lwa Bafilipi 2:13 ilwaamba kuti “Leza ngonguwe uumupa nguzu, uumupa kuti kamukanza alimwi anguzu zyakucita zintu akaambo kaceeco cimubotela walo.”

Mukuya kwaciindi, twakatumwa kuyoobelekela mudolopo lya Medellín ndyondaambide kumatalikilo. Bantu mudolopo eeli bakalizyibide kubona nkondo mumigwagwa cakuti kunyina nobakali kuyoowa babona bantu balwana. Mucikozyanyo, ciindi cimwi nondakali kusololela ciiyo ca Bbaibbele, bantu bakatalika kudubaulana aanze. Ndakayoowa cakuti nguzu zyakandimana, pele muntu ooyo ngondakali kuyiisya Bbaibbele walo wakazumanana kubala muncali kaumukkede moyo. Naakamana kubala, wakalomba kuti aunke aanze. Kumane wakapiluka kali aabana bobilo, kumwi kaumukkede moyo wakati, “Mundijatile ndali kuyooleta bana bangu.”

Kuli ziindi azimwi notwakali muntenda. Bumwi buzuba notwakali mumulimo wakuŋanda aŋanda, bakaintu bangu bakaboola kababalika, kumwi kabayoowede kapati. Bakaamba kuti kuli mwaalumi wali kuyanda kubadubula. Wakandeenda mubili. Pele twakazyoozyiba kuti mwaalumi ooyo tanaakali kuyanda kudubula mbabo; wakali kuyanda kudubula mwalumi iwakali kwiinda munsi abakaintu bangu.

Mukuya kwaciindi, andiswe twakacileka kuyoowa ciindi notwamvwa bantu balwana. Twakakulwaizyigwa akuliyumya kwa Bakamboni bakubusena oobu ibakalijana kale mubukkale buli boobu alimwi abumbi bwiinda waawa. Twakasinizya kuti, ikuti Jehova wakabagwasya, nkokuti andiswe uyootugwasya. Lyoonse twakali kulutobela lulayo ndobakali kutupa baalu bakubusena oobo, twakalipakamene alimwi akusiya zimbi mumaanza aa Jehova.

Bwini mbwakuti, bukkale bumwi tiibwakali kuyoosya kapati mbuli mbotwakali kubuyeeyela. Aciindi cimwi, ndakamvwa cakali kulimvwisya mbuli kuti mbaamakaintu bobilo bakali kutukilana aanze aaŋanda mpondakaswaide. Tiindakali kuyanda kumvwa nzyobakali kwaamba, pele  mukamwiniŋanda wakandiitila aanze. Mpoonya twakajana kuti zyakali ziyuni zyobilo zitegwa bacinkwenga naa basicikwele izyakali kwiiya mbobaambaula basimukoboma.

Mu 1997, ndakasalwa kuba mwiiyi wa Cikolo Cakwiiya Mulimo. b Lyoonse ndakali kukukkomanina kapati kujanika kuzikolo zya Bwami, pele tiindakali kuyeeyela kuti inga ndaakupegwa coolwe cilibedelede cakuba mwiiyi wacikolo cimwi.

Kumbele, ndakabeleka kandili mulangizi wacooko. Ciindi bubambe oobu nobwakamana, ndakapilusyigwa mumulimo wabbazu. Aboobo kwamyaka yiinda ku 30, ndilikkomene kubeleka kandili mwiiyi wazikolo zya Bwami alimwi akuba mulangizi wabbazu. Milimo eeyi yandiletela zilongezyo zinji. Buumi tiibwakali bwa samba tulye, bwakali buyumu. Amuleke ndipandulule ncondaambila boobu.

Ndili muntu sicamba kapati. Eeci cilandigwasya ciindi nondalijana mubukkale bukatazya. Nokuba boobo, zimwi ziindi ndilaciindizya kululamika zintu mumbungano. Aabona ndilabakulwaizya bamwi kutondezya luyando alimwi akuba bantu banyoneka. Mukubula coolwe, muziindi eezyo andime ndakabula bube oobu.—Rom. 7:​21-23.

Akaambo kakulezya kwangu, zimwi ziindi ndakali kutyompwa kapati. (Rom. 7:24) Aciindi cimwi, ndakaambila Jehova mumupailo kuti inga cabota kuleka buyo mulimo wabumisyinali akujokela ku Finland. Buzuba mbubonya oobo kumangolezya, ndakajanika kumuswaangano wambungano. Nzyondakamvwa kumuswaangano oyu zyakandikulwaizya kuzumanana amulimo wangu akubelekela moomo mondakali kulezya. Naaba mazuba aano, ndicigambwa kubona Jehova mbwaakawiingula mupailo wangu. Kuyungizya waawo, ndilalumba kapati kubona mbwaakandigwasya kuzunda kulezya kwangu.

Mebo abakaintu bangu, tulamulumba kapati Jehova akaambo kacoolwe ncotujisi cakumubelekela mumulimo waciindi coonse. Alimwi ndilamulumba kapati Jehova akaambo kakundipa mukaintu ngondiyandisya kapati alimwi uusyomeka.

Ino-ino ndilakkwanya myaka iili 70, aboobo ndilaleka kubeleka kandili mwiiyi wazikolo zya Bwami alimwi amulimo wamubbazu. Nokuba boobo, tanduuside akaambo kaceeci. Nkaambo nzi? Nkaambo kakuti ndilisinizyide kuti cintu cimukkomanisya kapati Jehova nkumubelekela cakusyomeka alimwi akumutembaula akaambo kakuti tulamuyanda akulumba. (Mik. 6:8; Mk. 12:​32-34) Kulemeka Jehova tacaambi kuti tweelede kuti katubeleka mulimo waalubazu.

Ndalanga milimo eeyi iikkomanisya njondali kubeleka, ndilimvwa kuti tiindakali kupegwa coolwe cakwiibeleka akaambo kakuti ndilayandika kapati kwiinda bamwi; alimwi tiindakapegwa mikuli eeyi akaambo kakuti ndijisi luzyibo lunji. Muciindi caboobo, Jehova wakandipa coolwe cakubeleka milimo yoonse eeyi akaambo buyo kaluzyalo lwakwe. Wakandipa mikuli yoonse eeyi nokuba kuti ndilalezya. Ndilizyi kuti ndacikonzya kwiibeleka milimo yoonse eeyi akaambo kakugwasyigwa a Jehova. Munzila eeyi, kulezya kwangu kwatondezya nguzu zyajisi Leza.—2 Kor. 12:9.