Pojkiyon bʼa 1955, sok keʼnani ja mas chʼinon ja bʼa oxwane kermano jbʼajtikoni. Ti kʼiyon mojan bʼa costa sur bʼa Finlandia, bʼa jun lugar ke ja wego naʼubʼalxa sbʼaj jastal Vantaa.

Ja jnani yiʼaj jaʼ jastal testigo bʼa Jyoba jujuntik jabʼil bʼajtanto oj pojkukon. Pe ja jtati, och yil kontra ja smeranili sok stima ja jnani bʼa mi oj skʼul estudiar ja Biblia soka keʼntikoni sok bʼa mok yiʼotikon och ja bʼa reunioniki. Ja yuj, yajni mi teyuk ja jtati, ja yeʼn wani sjeʼakitikon sbʼaja Jyoba.

Man jchʼinil jtsaʼa oj ajyukon bʼa sparte ja Jyoba. Jun sjejel, yajni ayto kiʼoj juke jabʼil, ja jmaestra jelni tajki yujni mi jkʼana oj kabʼ ja verilättyjä (jun tikʼe waʼelal finlandesa bʼa ayiʼoj chikʼ). June ja bʼa skʼabʼi syamaki ja jtiʼi bʼa oj jame sok jaxa pilan skʼabʼi sleʼa modo oj xchʼik xetʼan sok jun tenedor. Jmakʼtsunel ja skʼabʼi, sok mokʼ man piso ja tenedori.

Yajni ayto kiʼoj 12 jabʼil, cham ja jtati. Tsaʼan, bʼobʼxani wajkon ja bʼa reunioniki. Ja hermanoʼiki jelni chamskʼujole bʼa keʼna, sok jani jaw ja jas snikawon bʼa oj kʼikon ja bʼa yaʼteltajel ja Dyosi. Kʼe jkʼumuk kada kʼakʼu ja Biblia sok jkʼulan estudiar ja juʼuntiki. Yuja ajyikuj ja lekil kostumbreʼik it bʼa skʼulajel estudiar, skoltayon bʼa oj kiʼ jaʼ ja bʼa 8 bʼa agosto bʼa 1969 yajni ayto kiʼoj 14 jabʼili.

Tʼusan tsaʼan yajni chʼak ja kestudio, ochyon precursor regular. Jujuntik semana  tsaʼan, wajyon bʼa Pielavesi, jun chonabʼ mojan ja bʼa centro bʼa Finlandia, bʼa waj koltanukon bʼa xcholjel.

Ja bʼa Pielavesi, ti jnaʼa sbʼaj ja Sirkka, bʼa jani kʼot kala cheʼum. Jelni xkʼana yujni chʼin wa xyaʼa sbʼa sok jel syajtay ja Jyoba. Ja yeʼn mini skʼana oj toyjuk sok mi skʼana oj ajyukyuj jitsan jastik sbʼaj. Jchawaniltikon wani xkʼanatikon oj katikonyi ja jasa mas lek ja bʼa yaʼteltajel ja Jyoba sok puesto ajyitikon bʼa skʼulajel chikan jas x-aljikabʼtikon. Nupanitikon bʼa 23 bʼa marzo bʼa 1974. Jaʼuktoma oj wajkotikon bʼa luna de miel, wajtikon koltanel bʼa Karttula, bʼa wantoni skʼana mas Testigoʼik ja bʼa xcholjeli.

Man yajni nupanitikon, ja Jyoba sjeʼunejkitikon ke oj yakitikon ja jastik wa xmakunikujtikon ta wa xkaʼatikon bʼajtan bʼej ja sGobyernoʼi (Mat. 6:33). Jun sjejel, ja bʼa Karttula, mini ajyi jun jkarrotikon. Ja bʼajtanto ti wa xkʼulantikon biajar bʼa jun bicicleta. Pe ja bʼa styempoʼil jel xkoʼ ja cheʼeji, mini xbʼobʼ jkʼuluktikon. Chomajkil, bʼa oj wajkotikon xcholjel ja bʼa territorio mas najat yiʼoj ja kongregasyoni wani xkʼanatikon jun jkarrotikon, pe mini ay kiʼojtikon takʼin bʼa oj mantikon.

Jun kʼakʼu, june ja bʼa kermanoʼiki jak yulatayotikon bʼa mi yabʼaliluk sok yala kabʼtikon ke oj yakankitikon ja skarro. Mini jtuputikon sok cha mini ja seguroʼili. Kechantani oj chʼiktikonyi gasolina. ¡Man ajyi jun jkarrotikon!

Ja Jyoba ya kiltikon jaman lek ke yeʼnani oj yakitikon ja jastik wa xmakunikujtikoni. Ja jas kechanta oj kʼuluktikoni jani oj katikon bʼajtan bʼej ja sGobyernoʼi.

Ja bʼa 1978, yajni teytikon ja bʼa Eskuela bʼa Precursori, ja Raimo Kuokkanen, a june ja bʼa instructor wajkujtikoni, stsatsankʼujolanotikon bʼa oj chʼiktikon ja solicitud bʼa oj wajkotikon ja bʼa Eskuela bʼa Galaad. Ja yuj kʼe jkʼultikon estudiar inglés bʼa oj bʼutikon ja rekisitoʼik bʼa oj wajkotikon. Pe mini jekatikon ja solicitud, pes ja bʼa 1980 lokjitikon wajel aʼtel ja bʼa Naʼits Betel bʼa Finlandia. Ja bʼa tyempo jaw, ja betelitaʼiki mitoni xbʼobʼ  xchʼike ja solicitud bʼa oj wajuke ja bʼa Galaad. Wani xkʼanatikon ti oj kaʼteltaytikon ja Jyoba ja bʼa wa skʼana, sok mi jaʼuk ja bʼa wa xkʼanatikoni. Ja yuj jkʼulantikon aseptar ja lokjelali. Pe mini katikonkan snebʼjel inglés ta yujkʼa lokjitikontoʼi.

Jujuntik jabʼil tsaʼan, ja Tsome Tojwanum skʼulan aprobar ke ja betelitaʼik ojxa bʼobʼ skʼap sbʼaje bʼa oj wajuke ja bʼa Galaad. Ja yuj wegoxta jekatikon ja solicitud. Jelni gusto aytikon ja bʼa Betel, pe ta wa xbʼutʼutikon ja rekisitoʼiki, cha wani xkʼanatikon oj wajkotikon ja bʼa lugar wa xkʼanxi mas koltanel. Lokjitikon oj wajkotikon ja bʼa clase número 79 bʼa Galaad, sok jkʼulan jbʼajtikon graduar bʼa septiembre bʼa 1985. ¿Sok bʼa jekjitikona? ¡Tini bʼa Colombia!

Yajni kʼotikon ja bʼa Colombia, jekjitikon oj waj aʼtijukotikon ja bʼa Naʼits Betel. Jkʼulan ja janekʼ bʼobʼkuj ja bʼa kaʼteli, pe yajni ekʼta jun jabʼil jpensaraʼan ke wanxa xkʼana oj tukbʼestikon. Jaʼitani ja ekʼele jaw ja bʼa jsakʼanili bʼa jkʼana oj tukbʼes ja kasignasyoni. Anto jekjitikon aʼtel jastal misionero ja bʼa chonabʼ Neiva, ja bʼa departamento bʼa Huila.

Tolabida jel kiʼunej gusto ja xcholjeli. Ja bʼa Finlandia, yajni solteroʼonto sok precursoron, ay ekʼele sajto wala kʼeyon xcholjel sok akwalxa lek wala chʼakyon. Sok yajni ajkʼachto nupanelotikoni, ja Sirkka sok ja keʼn snajtilni kʼakʼu wa xcholotikon. Yajni wala wajtikon ja bʼa territorioʼik mas najati, ay ekʼele ti wa xkan waykotikon bʼa karro. Jachuk mi xchʼayatikon ja tyempo ja bʼa biaje sok ja pilan kʼakʼu sajto wala kʼetikon ja bʼa xcholjeli.

Aʼtel yajkʼachil ekʼele jastal misionero ja bʼa campo cha yani kabʼtikon ja junxta gustoʼil kiʼojtikon ajyi ja bʼa xcholjeli. Ja kongregasyon bʼa wantikon koltaneli ochni kʼiʼuk, sok jaxa hermanoʼik bʼa Colombia jelni xkiswaniye, wa xyajtaniye sok jel xyaʼawe tsʼakatal.

Mojan ja bʼa Neiva ay jitsan yal lugar bʼa mitoni jun Testigo ay. Pe yuja tiroʼaneli mini jel seguroʼuk sbʼaja matik mi ti sbʼajuke tiwi. ¿Jastal xa oj kʼotuk ja smeranil ja bʼa lugarik jaw? Mini xkaʼakan spensarajel. Kʼe kayi orasyon ja Jyoba ke june ja bʼa lugarik jaw aʼoch jun Testigo bʼa tey bʼa Neiba. Cha jkʼanayi ke tsaʼan yajni yiʼajta jaʼi, ja hermano jaw akʼiʼuk ja bʼa yaʼteltajel ja Dyosi sok cha akumxuk ja bʼa slugari bʼa oj xchole. Lajansok jelni lek bʼa keʼna; pe jastalni oj majlaxuk ajyi, ja Jyoba aytoni yiʼoj jun jasunuk masto lek ke yuja jbʼaji.

Ekʼ tʼusan ja tyempo, kʼe kayi estudio bʼa Biblia jun kerem sbʼiʼil Fernando González, bʼa ti sbʼaj bʼa Algeciras, june ja bʼa yal lugarik mito ay Testigo. Ja yeʼn wani xwaj aʼtijuk kada semana ja bʼa Neiva, bʼa wa xkan mas ja 50 kilometroʼiki. Jelni lek xchapa sbʼaj bʼa kada estudio, sok man ja bʼa sbʼajtanil ekʼele yiʼaj ja estudioʼi mini xyakan wajel ja bʼa reunioniki. Chomajkil, ja bʼa sbʼajtanil semana ja bʼa yestudioʼi, kʼe stsom sbʼajsok jujuntik kristyanoʼik ja bʼa slugari bʼa oj sjeyile ja jas wan snebʼjeli.

Yajni kechanto wake ixaw wan skʼulajel estudiar, ja Fernando yiʼaj jaʼ bʼa enero bʼa  1990, sok tixta och precursor regular. Ja wego ayxa jun Testigo ja bʼa Algecirasi, ja Naʼits Betel bʼobʼxa sjek precursorik especial bʼa jun modo seguro. Sok ja bʼa febrero bʼa 1992, ja tiw kujlaji jun kongregasyon.

Pe ja Fernando mini ti kan xchol bʼa Algeciras. Tsaʼan yajni nupanita, ja yeʼn sok ja xcheʼum Olga, wajye bʼa pilan lugar bʼa mito ay Testigoʼik: ja San Vicente del Caguán. Ja tiw cha koltaniye bʼa yajel kujlajuk jun kongregasyon. Sok ja bʼa 2002, ja Fernando aji och biajante, man jtyempotik jachtoni wane aʼtel.

Ja experiencia it sjeʼaki ke yajni wa xkʼumantik ja Jyoba, jelni tʼilan la kaltikyabʼ ja jas mero wa xkʼanatik ja bʼa jastik ti chʼikan soka bʼa kasignasyontiki. Ja yeʼn wani xbʼobʼ skʼul jastik bʼa mi xbʼobʼ jkʼuluktik ja keʼntiki. Pes ja Jyoba yeʼnani ja Yajwalil ja alaji (Mat. 9:38).

Ja bʼa 1990, aji ochkon biajante, sok ja bʼajtan circuito ajikitikoni ti waj bʼa Bogotá, ja kapital bʼa paisi. Ja Sirkka sok ja keʼn kʼotelotikoni kristyanoʼik bʼa mi jel chapanuke sok jachukotikon jastal ja tuki, mini ay jas wa xnaʼatikon bʼa jel chaʼanyabʼal. Cha mini kʼajyelukotikon ajyel bʼa jun niwan chonabʼ. Ja yujil, ja kasignasyontikoni wani xya xiwkotikon tʼusan. Pe ja Jyoba ya kʼot smeranil ja jas wa xyala ja bʼa Filipenses 2:13: «Ja Dyosi, yeʼnani ja maʼ wa sbʼutʼuwex ipal sok yeʼnani wa xyawilex ja kʼankʼunel sok ja ipal bʼa skʼulajel».

Mas tsaʼan jekjitikon bʼa Medellín, ja chonabʼ bʼa jtaʼa tiʼal ja bʼajtanto. Ja tiw ay jitsan kristyanoʼik bʼa jelxa kʼajyiyeta soka spekʼjel chikʼ ja bʼa calle sok mixato xiwye. Wa xjul jkʼujol jun ekʼele yajni teyon bʼa jun naʼits wanon skʼuljel jun estudio, abʼxi ay maʼ wan tujkʼanel ja bʼa juera. Ja keʼn kolxani jip jbʼaj bʼa piso, pe ja kestudiante snochoyi skʼumajel ja parrapo bʼa lajansok mi jas wan ekʼel. Yajni chʼak skʼumuki, yalakabʼ ke oj eltʼani. Tsaʼan yajni ekʼta jun yal jutsʼin, kumxisok chawane yal untik, sok lamanxta yalakabʼi: «Aʼawon perdon, pe tʼilan elyon yuja kuntikili».

Pe mini jaʼita waj ja ekʼele jaw ja xiwtikoni. Jun ekʼele yajni wantikon xcholjel bʼa naʼitsaltik, junta chʼaykʼujol ja jcheʼumi ajnelxta jak staʼon bʼa sakbʼita el ja yelawi. Xiwelxtani ay yalakabʼ ke ay maʼ wan tujkʼajelyuj, sok ja keʼn cha jelni xiwyon. Pe tsaʼan kaʼa jbʼajtikon kuenta ke mi yeʼnuk wan tujkʼajel, wani tujkʼajel jun winik bʼa ti wan ekʼel mojan bʼa stsʼeʼel.

Yajni ekʼ ja tyempo takal takal kʼajyitikon yiljel tʼusan ja spekʼjel chikʼi. Jelni chaʼanyabʼal xkilatikon ja jastal tsats aye sok wa xkuchyujile ja hermanoʼik bʼa wa stʼaspune ekʼeleʼik jastal it ma masto peor. Kʼot kiltikon ke ta ja Jyoba wan skoltajel ja yeʼnleʼi, cha ojni skoltayotikon ja keʼntikoni. Mini katikonkan snochjel ja srasonik ja ansyanoʼik ja bʼa kongregasyoniki, jelni xtalnay jbʼajtikon sok jaxa tuki wa xkatikonkan bʼa skʼabʼ ja Jyoba.

Pe mini spetsaniluk ekʼele jel xiwela sbʼaj jastal wa xpensaraʼantikon. Jun sjejel, wa  xjul jkʼujol bʼa jun ekʼele yajni ay maʼ wanon yulatajel bʼa jun naʼits, ja bʼa juera kabʼ lajansok chawane ixuke tsatsxta wane yutjel sbʼaje. Ja keʼn mini xkʼana oj waj kʼel ja kʼumal yiʼojeʼi, pe ja swinkil ja naʼitsi man ya kʼokxukon bʼa oj kʼele. Ja jas ekʼi, ¡eske kechanta chabʼ yal loroʼik wane snochjel ja besinoʼiki!

Ja bʼa 1997, aji ochkon instructor ja bʼa Eskuela de Entrenamiento Ministerial. b Tolabida kiʼunej gusto ajyel ja bʼa eskuelaʼiki, pe mini bʼa jpensaraʼan ta oj ajyukuj ja tsamal cholal bʼa sjejel june ja bʼa eskuelaʼiki.

Tsaʼan, cha aji ochkon biajante bʼa distrito. Pe yajni chʼay ja jaw, cha kumxiyon ja bʼa aʼtel bʼa biajanteʼi. Ayxa mas ja 30 jabʼil wanon aʼtel jastal instructor sok biajante. Ja cholalik it yaʼunej kabʼ stsamalil bʼa jitsan slekilalik, pe mini tolabida pasil wajeluk. ¿Jas yuj jach wa xkala?

Wa xnaʼa ke ayni kiʼoj jun jmodo bʼa jel kalax. Ja jaw skoltunejon bʼa kuchelkuj ja wokoliki, pe chomajkil ay ekʼele jel estricto yaʼunej ajyukon bʼa stojbʼesel jujuntik jastik ja bʼa kongregasyoniki. Jun sjejel, ay ekʼele jel directo wa xkala yabʼye jujuntik hermanoʼik ke tʼilani a-sjeʼeyi yajtanel sok ayabʼye stojol ja tuki. Ja mas tuki, eske ja bʼa ekʼeleʼik jaw, jani ja modoʼalik wanto skʼana oj ajyukuj ja keʼni (Rom. 7:​21-23).

Ay ekʼele jel jkʼulunej jbʼaj desanimar yuja jpaltaʼiki (Rom. 7:24). Jun ekʼele jel tuk ayon xkabʼi sok kala yabʼ ja Jyoba bʼa orasyon ke ja jas mas leki jani oj kakan ajyel jastal misionero sok oj kumxukon man Finlandia. Pe ja kʼakʼu jaw ja bʼa reunión ajyiʼi, kabʼ jun jasunuk bʼa ya jkʼuʼuk ke tʼilan mi oj kakan ja kasignasyoni sok stojbʼesel ja jmodoʼi. Nunka oj chʼay jkʼujol ja jastal sjakʼaki ja Jyoba ja korasyoni. Chomajkil, jelni xkayi tsʼakatal yujni tsamalxta skoltunejonjan bʼa stojbʼesel ja jpaltaʼiki.

Ja Sirkka soka keʼn jelni xkatikonyi tsʼakatal ja Jyoba yuja cholal yaʼunejkitikon bʼa aʼtel bʼa tyempo tsʼikan snajtil ja bʼa jsakʼaniltikoni. Cha jelni xkayi tsʼakatal yuja yaʼunejki jun jcheʼum bʼa jel xyajtani sok skoltunejonjan snajtil ja bʼa jabʼilik it.

Ojxtani jtaʼ ja 70 jabʼili, ja yuj oj kakan ajyel jastal instructor sok biajante. Pe ja jaw mi xya tristeʼaxukon. ¿Jas yuj miyuki? Pes yujni jkʼuʼunej lek ke bʼa stoyjel ja Jyoba mini tʼilan oj ajyukawuj cholalik bʼa jel xpaywani. Ja jasun mas tʼilani jani chʼin oj kaʼ jbʼajtik bʼa yaʼteltajel sok stoyjel sok spetsanil jkʼujoltik bʼa ayiʼoj yajtanel sok wa xyaʼa tsʼakatal (Miq. 6:8; Mar. 12:​32-34).

Snajtil ja bʼa jsakʼanili kabʼunej stsamalil bʼa jitsan asignasyon bʼa jel tsamalik. Yajni wa xka juljkʼujol ja bʼa tyempo ekʼta, wa xkʼot kil ke ja cholalik kiʼoji mini jaʼuk yuja mas lekon ma ay jas jel chaʼanyabʼal wa xnaʼa. ¡Jaʼuktoma! Ama yuj ja jpaltaʼiki, ja Jyoba yaki yuja lekil skʼujol mi xbʼajixiʼi. Lek mi jaʼuk yuja skoltaneli, mini lajxelkuj skʼulajel ja cholalik it. Wani xbʼobʼ kal ke yuja yip ja Dyosi yaʼunej tojbʼuk ja jpaltaʼiki (2 Cor. 12:9).