Ndi biŋ nen kiŋgi maa 1955. Wùr hay swa’a, amaa ndi hay diŋ maa klee yoo ɓaara. Ndi gẽẽ ti jeŋ ɓaŋ ni wãyban Finlande no kay no, ti prog maaga à hay ɗege ɓe ga Vantaa mono.

Man ɓi joŋ batem, lan kol go sedeewa Jeofa kiŋgi go mẽ’ taŋgu biŋgi ɓi. Amaa, sen co jag pan ɓi ga, day se laa hã faage ne man ɓi maaga á mo had wããre Baa ne wùr ga lay, lan maa woge de wùr ti taygeti ga lay. De maaga pan wùr bay we liŋ wa no, man wùr had wããre Baa ne wùr mẽ’ mẽ’ẽ.

Hãã le ti klee ɓi tu, ndi maŋ go ga ndi joŋ joŋre diŋ ne Jeofa. Sen diŋ tee maaga wur po de maaga kiŋgi ɓi hay renam mono, maître wùr sõõ ɓil me ti wer maaga ndi laa re verilättyjä (wayla maa de joŋge de cíi wo ɓi sir Finlande) ga mono. Á ɗaw haw ɓi kwũy de do boŋ ga se bul jag ɓi go, lan ga se hee wayla maa de joŋge de cíin me jag de waŋ. Ndi da’ ẽgre maa ɗaw do ɓe go maaga á mo heen me jag wa.

Pan ɓi húu go de maaga kiŋgi ɓi hay 12 mono. Blam sen, ndi le’ woge ti taygeti sedeewa Jeofa wo. Hẽẽrebe maa ti taygen yãã wo ndi see ɓaara de woore debaŋ, day sen jor glog ɓi maaga ndi mo gẽẽ go ciŋ ti wããre Baa. Ndi tĩĩ wer jaŋ wããre Baa tum lay, lan jaŋ kefder maaga naa wo wer Bible wo de woore tum lay. Jaŋge wããre Baa se de wooren ɓo’ faage me maaga ndi mo joŋ batem go kiŋgi 14, ti naw maa 8 nen Few Joŋfẽnsõõrewa 1969.

 Ig go mẽ’ blam maaga ndi taw go de lycee mono, ndi tĩĩ wer joŋre piyoniyẽ permanaŋ. Lumo po wo go hresge mbag mokay, ndi ya’ wo go Pielavesi nen ɓil Finlande ti ngeel maaga à hay de sãy jar maa kayge ti ti ɓaŋ siigi wããre Baa ni debaŋ mono.

Wo Pielavesi ni mokay, ndi da’ Sirkka, mãy maaga de hay kol ge wãy dage ɓi mono. Ndi hay dage ɓe debaŋ werga á hay fer ti see ɓe gesiŋ debaŋ, lan hay da Jeofa debaŋ lay mono. Á hay bay kiɗgi ga à mo ko se debaŋ wa lay, lan se mo hay de fẽẽre debaŋ wa lay. Wùr hay de ɗiggi ɓog ɓuy maa joŋ joŋre ne Jeofa go de ngar ẽgre wùr ɓuy, koh à mo hã ba ne wùr do diŋ maa hõnlà. Wùr da kããra go nen naw maa 23 nen Few Mene 1974. Nen maaga wùr hay raw ti raŋge maa de woore blam naw dage kããra wùr mono, wùr raw diŋ Karttula ti ngeel maaga à hay de sãy kayge wo ti ni debaŋ ti ɓaŋ siigi wããre mono.

Ti tĩĩgi wer dage kããra wùrn tu mokay, Jeofa ngaɓ go ne wùr ga se da’ ɗeŋ fẽẽre maaga wùr de sãy ɓaara ti yaŋ ne wùr hayga wùr kaŋ twaywaŋ maa ni ɓen we go peel fẽẽren ɓuy no. (Mat. 6:33) Ko ba ɗa, de maaga wùr wo Karttula ne kay mono, wùr hay bay de mooda wa. Taŋgu mo kay, wùr hay raŋge ti felew. Amaa nen hiver ti wur maaga ngeel go de wooge keɓ keɓ debaŋ mono, wùr hay de sãy mooda ti maaga wùr mo sii wããre Baa go ɓi leege maaga tayge wùr ni mo ɓuy. Amaa wùr hay bay de suŋgu do maa yee mooda wa.

Wur po, de maaga wùr hay bay gorge wa, maa kluu ɓi po boŋ a hee jag ne wùri. Wer yaŋ maa ɓil ɓen, se hã mooda maa ɓen go ne wùri. Se hay go de poɗ assurance ɓen pa. Joŋre wùr hay gwan diŋ yeege noo maa kaage ɓil ɓe tawa tu. Blam sen, wùr hay da’ mooda maaga sãy ɓe hay ti wùr mo so no.

Jeofa hay ngaɓ go ne wùr ga fẽẽre maaga wùr de sãy ɓaara ti mo ɓuy, se hã ra yaŋ ne wùri. Joŋre wùr hay diŋ maaga wùr mo ɓo’ twaywaŋ maa ni Baan go peel fẽẽren ɓuy tawa tu.

De maaga wùr ti lakol maa joŋre jar piyonyẽ wo nen kiŋgi maa 1978 mono, Raimo Kuokkanen, a jobo yoo jar had wùr wo boŋ, jor glog wùr maaga wùr mo bag jag see wùr go maa woge ti lakol Galaade. Wùr tõõ wer had angle maa bag jag  see wùr go maa woge ti lakol se no. Amaa nen kiŋgi maa 1980, taŋgu maaga wùr yer demande maa lakol Galaad mono, à ɗe wùr wo joŋ joŋre ti Betel maa Finlande no. Ti wur sen, à hay bay de hã fããge ne jar maa ti Betel wo maa yer demande maa lakol Galaad wa. Wùr hay de sãy joŋ joŋre diŋ ti ngeel maaga co jag Jeofa, bay diŋ ti ngeel maaga co jag wùr wa. Wer sen, wùr yãã ga wùr wo ti Betele. Amaa, wùr ya’ mbe wer had angle de peel ni maa bag jag see wùr go ga ti ba ga à fer yaŋ ɓo’ faage lakol Galaad ne jar maa ti Betel wo wur po laybla no.

Kiŋgi blam sen mbage, tayge jar maa peel sedeewa Jeofa hã wo faage ne jar maa ti Betel wo maa yer demande maa lakol Galaad. Wùr yer demande deparday tu, amaa bay diŋ werga wùr hay bay de fruygi ti Betel wa na wa. Ba yaw mono, wùr hay de sãy joŋ joŋre ti ngeel maaga à de sãy jar ni mono! À ɗe wùr ti lakol Galaad, lan wùr da’ diplom klass maa 79 nen kiŋgi maa 1985 no. À laa wùr wo Kolombi.

Taŋgu tu à laa wùr wo ti filiyal Kolombi. Ndi hay dur go de ẽgre ɓi ɓuy maa joŋ joŋre ti ngeel se no, amaa kiŋgi blam boŋ mokay, ndi wo koge ga à mo hay coo joŋre wùr no. Diŋ fẽn maa taŋgu maa boŋ nen naw ɓin ga ndi wii ga à mo coo joŋre wùrn lay so mono. Blam, à laa wùr wo ɓil ville Neiva, ti prog maa Huila no.

Ndi da sii wããre Baa debaŋ tum. De maaga ndi hay diŋ piyoniyẽ maaga hay bay wãy ɗa wo Finlande mono, ndi hay sii wããre de jag toŋ hãã de law. De maaga ndi da wãy go mono, wùr de Sirkka hay siigi hẽẽ sii wããre Baa. De maaga wùr sii wããre wo ti sir maa hãã hãã wo mono, day maa po wùr na diŋ ɓil mooda wùrn tu. Doo sen ne kay, se joŋ ga ngeel maa sii wããre maa toŋ joŋ go maŋ see wùri, lan ga wùr mo tõõ wer sii wããren go gus lay.

De maaga à laa wùr wo doo misiyoner ne mono, wùr hay de fruygi doo maaga wùr hay taŋgu ti siigi wããre Baa ne pa. Tayge wùrn hay seege ciŋ, hẽẽrebe maa Kolombin wo de hooge sugi, wo de dage ɓili, lan wo de yaŋ debaŋ lay.

Ti ngeel maaga wùr hay wo ni mono, sir hay wo ni ngaɓa debaŋ maaga sedeewa Jeofa bay wo ni wa. Ndi hay wii jag see ɓi tum ga à joŋ joŋge maaga wããre Baa mo hay wo go de siigi ti ngeel sen wo lay là. Amaa, wer waŋ maaga hay wo ni mono, á hay bay gus see jar maaga wo waare ɓi sir sen maaga á mo sii wo wããre ni wa. Ndi ɗig pa ga jobo maa de maŋ sen mo hay joŋ wo Neiva maaga á mo had wããre Baa. Day ndi tos pa ga blam batem ɓe mono, blo sen mo kol go kretiyẽ maa de ruggi, lan mo fer le sii wããre Baa ɓi sir ɓe. Ndi hay bay ɗiggi ga Jeofa de ɗiggi ti fẽn sen de woore de daŋ maaga ndi hay ɗiggi ɓe mo wa.

Blam sen mẽ’ ndi tõõ wer had Bible ne blo po à ɗen ga Fernando Gonzalez. Se hay go de hayle Algeciras, ville po boŋ yoo maa ngaɓa wo ga sedeewa Jeofa bay wo ni wa mono. Fernando hay seege kilomeder 50 maa woge Neiva ti joŋre ɓe. Á hay go bag jag see ɓe de woore see hadge Bible ɓe no, lan se tõõ wer woge ti taygeti wo deparday tu lay. De maaga á tõõ wer had Bible ne kay tu mono, Fernando tay ti jar maa tigriŋ wo ɓi leege Algeciras maa had fẽn maaga se laa ti hadge Bible ɓen ne hara lay.

 Few hiira’ blam maaga se tĩĩ wer had Bible mono, Fernando joŋ batem go, nen kiŋgi maa 1990 no. Blam sen se kol piyoniyẽ permanaŋ. Werga sedeewa Jeofa hay wo go Algeciras ni boŋ so mono, hẽẽne maaga ɓo’ piyoniyẽ spesiyal wo ni hay bay wa so. Nen Few Darge nen kiŋgi maa 1992 mono, à caa tayge wo ɓil ville sen ni.

Fernando hay sii wããre diŋ Algeciras tawa yaw? Baywa! Blam maaga á da wãy go mono, saara de wãy ɓe ur wo wo go San Vicente del Caguán, ville maaga sedeewa Jeofa hay bay wo ni wa. Wo ni saara kay maa caa tayge. Nen kiŋgi maa 2002 mono, Fernando kol diŋ jee raŋ tayge. Saara de wãy ɓe Olga wo hãã wara ti joŋre sen ɗa.

Fẽẽre maaga hres nen naw Fernando had me ga á de el debaŋ maaga naa mo tos ti joŋre maaga Jeofa de hã rage ne naa do mono. Jeofa joŋ fẽẽre maaga naa bay de kããge maa joŋ rage wa. Á diŋ weege coore maa ɓe, amaa bay maa naa wa.—Mat. 9:38.

Nen kiŋgi maa 1990 mono, à kol wùr jar maa raŋ tayge. À laa wùr taŋgu tu diŋ Bogotá, ti kapital maa kolombi no. Wùr hay joŋ hẽẽne ga joŋre sen bag jag go do wùr de woore ga. Wùr de wãy ɓi wùr hay mbe doo jar maa ɓuy no lay koɗ no, ɗeŋ joŋ mopo go sara de jar lan hay bay go nen wùr tinoo ta’ wa. Wùr hay bay de had lagge ɓi ville maaga jar ni ngaɓa debaŋ wa. Amaa, Jeofa bag jag wããre ɓe maaga á hay wãã ɓil Filip wo 2:13 ga: ‘Werga diŋ Baa de dage ɓen jor glog ɓay, hã ɗiggi wo de ẽgre maa joŋ joŋre ne nday’ mo go.

Go blam à laa wùr wo ti prog maa Medellín, ville maaga ndi hay wãã le go ti ɓe taŋgu la mono. Jar maa ti sir sen hay wo go de hadge de waŋ debaŋ hãã nen maaga jiili ɓaara hay bay naa rage wa so. Sen diŋ tee maaga wur po ndi hay had wããre Baa ne jobo, jar le’ ma’ wúu de ngar tiŋ maaga wùr hay ni mono. Ndi hay de sãy suugi gesiŋ ti, amaa jee maaga ndi de had wããre Baa ne hẽn mbe de seege de jaŋgen desãy. De maaga á taw jaŋgen go mokay, se wii me ga ndi mo gor se mẽ’ ɗa, se wo le siigi ɗa. Blam sen, se fer le de weere ɓe maa ɓogn wo do, day se raw wããge me ga, “Ndo fug mbo ɓil go me ti koɗ so, ndi hay raw kiɗ weere ɓi wo no.”

Wur maa po hay joŋ wo ga wùr hay nen ngeel maa de gayri pa. Wur po, wùr hay sii wããre Baa maa jag-tiŋ jag-tiŋ, wãy ɓi ur ɗee le see ɓi go de caa jiili. Se wãã me ga jobo hay ma’ wúu le ne se ti. Sen daŋ jiili ɓi go debaŋ. Amaa, wùr wo go laage blam ga jee ma’ wúun hay geɗer le bay diŋ Sirkka wa, amaa, diŋ jobo maaga hay hresge ti jeŋ ɓe ni maŋ caw koɗe.

Wo iggi go mẽ’ mokay, waŋn bay joŋ hẽẽne ne wùr wa so. Saɓlaŋ hẽẽrebe maa ti ngeel maa sen ga hay wo yiŋgi de tee re sen lay coɓ wùri. Wùr raw wããge ga hayga Jeofa yaŋ kay rage no, ni se kay wùr yaŋ lay. Wùr hay tum hoo sug ti yaŋ maaga jar maa peel tayge hãn wo maaga wùr mo hay ko ɗeŋ seele wùri, lan wùr mo men Jeofa joŋ fẽẽre lan wo no.

Cwãy tu, re maa po hay bay wo go de Hãã debaŋ doo maaga wùr hay ɗig ne wa. Wur maa po, sug ɓi laa wããre de maŋ gẽẽge naare wo ɓog ɗar kẽẽ faale tiŋ maaga ndi hay wo ni mono. Ti  ɓi hay bay wo de kaŋge ti wããre sen ni wa, amaa, jee tiŋn baa me le ti ngeel po go ciŋ hãã maa koge ɓe. Wùr wo da’ge mokay paga se hay diŋ kulee wo de bir jag jar leege ɓaara wo.

Nen kiŋgi maa 1997 mono, à ya’ me jee had jar ti école de formation ministerielle. b Ndi hay tum da lakol théocratique wo debaŋ, amaa ndi hay bay de ɗiggi ga ndi joŋ yaŋ jee hadge ti maa po yoo ɓaara ni wa.

Go blam, ndi hay diŋ jee ko nen ti joŋre jar raŋ tayge wo (surveillant de district). De maaga à wãã ga joŋre sen mo hay wa so mono, ndi fer ti joŋre raŋge taygen tigriŋ. Kiŋgi go de daŋ 30, ndi hay diŋ jee hadge ti lakol wo, lan jee raŋ tayge wo. Ndi hay da’ bosa’ wer joŋre sen wo debaŋ. Amaa se hay bay gus wa ane. Ndi sii wer may ga ndi wãã ne la ne nday ɗa.

Ndi diŋ jobo maa de ẽgre ga ndi kaŋ ɗiggi ti see ɓi. Sen hay kay me maa ‘wũy re wo. Amaa, day maapo de maaga ndi le’ ‘wũy re maa ti tayge wo we no ndi hay bay desãy wa. Wur maa po, ndi ruu jar maa po maaga á mo hay wo de dage lan ɗiggi de woore see jare. Amaa de ngar ngeel sen, ndi ti see ɓi tu ndi hay bay naa nen joŋre sen wo go wa lay.—Rom. 7:​21-23.

Ndi ko see ɓi go de wooge de ngar ngeel maa po wer fẽẽre maaga ndi joŋ ra bay ti ngeel ɓe wa mono. (Rom. 7:24) De ngar ngeel maa po ta’, ndi wãã ne Jeofa ga ɗawa diŋ ga ndi men joŋre misiyonern go, lan ndi fer Finlande. De law wur sen ndi wo ti taygeti. Fẽẽre maaga ndi laa ti taygen hã bawge go me ga ndi mo hay mbi ti joŋre misiyoner no, lan ndi ya’ wer coo joŋre ɓi maa de baywooren wo no. Hãã wara, á du’ jag jiili ɓi de maaga ndi ɗig ti ɗeŋ maaga Jeofa yiŋ jag me de woore ti tosge ɓi maa wur sen mono. De daŋ sen ɓuy pa mono, ɗeŋ maaga Jeofa kay me desãy maa naa blum hugli ɓin wo co jag ɓi debaŋ.

Ɓil wùr hay de fruygi debaŋ de Sirkka ti maaga á joŋ ga wùr mo joŋ daŋge naw wùrn ɓuy ti joŋre maa ɓen mono. Ɓil ɓi go de fruygi debaŋ pa ti maaga Jeofa hã wãy maa de dage lan de deele me nen kiŋgi sen ta’ ɓuy mono.

Kiŋgi ɓi joŋ ge go 70 la maŋ, day ndi joŋ ge jee hadge ti lakol wo, lan jee raŋ tayge wo ga so. Amaa, sen bay go de caa jiili ɓi wa. Wer mayse là? Werga ndi go de bawge jag jiili ga co jag Jeofa diŋ ga naa mo togoɗ ne de fer ti gesiŋ, lan ga naa mo goŋ ne go de jiili maa de dage, lan de fruygi. (Mis. 6:8; Mark 12:​32-34) Á bay naŋ ga naa mo joŋ joŋre maaga go tinoo ta’ maa togoɗ Jeofa wa.

De maaga ndi fer ɗiggi ti joŋre maaga à hay hã ra me mono, ndi ko ga à hay hã ra me bay diŋ werga ndi hay de daŋ jar lan wo wa; bay wer maaga ndi hay de kããge maa joŋ fẽẽre de daŋ jar lan wo wa pa. Bay koh mẽ’ wa! Ba yaw mono, Jeofa hã joŋre sen wo me diŋ wer yaŋ ɓe maaga tee ɓe bay wa mono. Á hã joŋre sen wo me, koh mbe de hugli ɓin wo ɓuy. Ndi de koge ga diŋ de ẽgre maa ni Jeofan ga ndi bag jag joŋre sen wo go mono. Se diŋ de sen so ga hugli ɓin naa nen ẽgre maa ni Baan go mo so no.—2 Kor. 12:9.