Au ne fanau i te 1955, te toekimuli o tama‵liki tāgata e tokotolu. Ne tupu aka au i te feitu ki saute o Finland telā e pili ki te tai, i te kogā koga e fakaigoa nei ki te fakai o Vantaa.

A toku mātua ne papatiso e pelā me se tokotasi o Molimau a Ieova mai mua o fanau au. Kae ne ‵teke toku tamana ki te munatonu kae se talia ne ia toku mātua ke suke‵suke fakatasi mo ana tama‵liki io me ave matou ki fakatasiga a te fakapotopotoga. Tela la, e akoako fua ne ia matou ki muna‵tonu fakavae mai te Tusi Tapu māfai ko galo toku tamana i te fale.

Talu mai taku folikiga, ne fakalogo eiloa au ki a Ieova. E pelā mo te taimi ko fitu ei oku tausaga, ne kaitaua mai toku faiakoga me seki manako au o kai ki te verilättyjä (falaoa fakapā‵pa mai Finland e faite ki toto). Ne ‵kumi ne ia oku kalafou ki tena lima e tasi kae fakamaga toku gutu, kae ko tena suā lima e taofi ne ia se foka kae taumafai ke faulu ne ia a te mea‵kai tenā ki toku gutu. Ne mafai eiloa ne au o usu te foka tenā ke to mai tena lima.

I taimi ko 12 oku tausaga, ne mate atu toku tamana. Mai te taimi tenā, ne mafai ei o kau atu au ki fakatasiga a te fakapotopotoga. Ne atafai mai a taina i te fakapotopotoga ki a au, kae ne fai ei ke gasolo au ki mua i te feitu faka-te-agaga. Ne kamata o faitau au ki te Tusi Tapu  i aso katoa kae sukesuke mo te loto finafinau ki tusi faka-Kelisiano. Ona ko mea konei, ne mafai ei au o papatiso kae ko 14 oku tausaga, i a Aokuso 8, 1969.

I taimi eiloa ne oti ei au mai akoga lasaga lua, ne kamata au o paenia tumau. I loto fua i nāi vaiaso, ne fanatu au o tavini i te koga e manakogina i ei a tino talai, i Pielavesi, telā e tu pili ki te kogaloto o Finland.

I Pielavesi, ne fetaui ei au mo te tamaliki fafine telā ne fai fakamuli mo fai taku avaga pele ko Sirkka. Ne fiafia malosi au ki tena uiga agamalu mo tena malosi i te feitu faka-te-agaga. Ne seki kausaki atu a ia ki se tulaga takutakua io me ke maua a kope faka-te-foitino e uke. Ne ma‵nako māua tokolua ke tavini katoatoa atu ki a Ieova, faitalia me ne a tauliaga i te taviniga e maua ne māua. Ne avaga māua i a Mati 23, 1974. I lō te olo atu o malōlō mai tua o te ma avaga, ne olo atu māua o tavini i Karttula, telā e lasi ‵ki te manakoga mō tino talai o te Malo i ei.

Mai te taimi ne avaga ei māua, ne fakaasi mai ne Ieova me ka tausi mai a ia ki mā manakoga i te feitu faka-te-foitino māfai e fakamuamua ne māua a te Malo. (Mata. 6:33) E pelā me se fakaakoakoga, i Karttula, ne seki ai se mā motoka. Muamua, ne fakaaoga ne māua se pasika-ta-ki-vae. Kae i taimi o te ‵tau ‵moko ko gasolo o ‵moko ‵ki eiloa. Ke mafai o talai atu i te koga talai lasi a te fakapotopotoga, e manakogina se motoka. Kae ne seki ai ne ma tupe mo ‵togi se motoka.

Kae ne asi fakapoi atu a toku taina matua ki a māua. Ne tuku mai ne ia mo te kaimalie a tena motoka. Ko oti ne ‵togi a te tupe fakaleoleo. Ne ‵tau fua o ‵togi ne maua a te fiuolo. E se leva, kae ne maua te mā motoka.

Ne fakaasi mai ne Ieova me ne fai eiloa tena tiute o tausi mai ki a māua i te feitu faka-te-foitino. Te mea fua ne ‵tau o fai ne māua, ko te fakamuamua a manakoga o te Malo.

I te taimi ne ‵kau māua ki te Akoga mō Paenia i te 1978, ne fakamalosi mai a Raimo Kuokkanen, a se faiakoga e tokotasi o matou ke tusi te ma tusi fakatagi ke ‵kau atu ki te Akoga i Kiliata. Tenā ne kamata ei o tauloto māua ki te ‵gana Palagi mo te fakamoemoega ke mafai o fetaui ‵lei ke ‵kau ki te akoga. Kae i te 1980, mai mua o tusi atu māua,  ne ‵kami atu māua ke ga‵lue i te ofisa lagolago i Finland. I te taimi tenā, e se mafai ne tino o te Peteli o ‵kau atu ki Kiliata. Kae ne ma‵nako māua o tavini atu i te koga telā e manako a Ieova ke tavini māua i ei, kae e se ko te koga telā e ‵lei ki a māua. Tela la, ne talia ne māua te ‵kamiga. Kae ne tumau eiloa māua i te tauloto ki te ‵gana Palagi se iloa fua māfai e maua ne māua te avanoaga ke olo atu ki Kiliata.

I tausaga fakamuli ifo, ne fakalauefa atu ne te Potukau Pule a te ‵kamiga ki te kau Peteli ke mafai o fakatagi atu ke ‵kau ki te akoga i Kiliata. Ne faka‵fonu fakavave ma pepa e se ona ko te mea e se gali ki a māua te Peteli. E gali ‵ki eiloa a te Peteli! Ne ma‵nako fua māua ke mafai o avanoa ke tavini atu i te koga telā e lasi te manakoga i ei māfai e fetaui ‵lei māua ki ei. Ne talia māua ke ‵kau atu ki Kiliata kae ne oti mai māua mo te vasega 79 i a Setema 1985. Ne ‵tofi māua ke ga‵lue i Colombia.

I Colombia, ne ‵tofi muamua māua ke ga‵lue i te ofisa lagolago. Ne taumafai au o fai te ‵toe mea e mafai i taku galuega, kae mai tua o se tausaga i te ofisa lagolago, ne mafaufau au me e manakogina ke fai ne māua se ‵fuliga. Tenei fua te taimi muamua i toku olaga ne fakamolemole atu au mō se tofiga tai ‵kese. Mai tua ifo, ne ‵tofi māua ke tavini atu e pelā me ne misionale i te fakai o Neiva, i te kogā koga o Huila.

Ne fiafia faeloa au ki te galuega talai. Pelā me se paenia taka i Finland, e talai au i nisi taimi mai te taeao ke oko atu loa ki te afiafi. E pelā me se tauavaga ‵fou, ne fakamāumāu foki ne māua mo Sirkka a te aso kātoa i te galuega talai. Kafai e ga‵lue i koga talai ‵mao, e masani o ‵moe sāle māua i te mā motoka, ko te mea ke se uke mā taimi faima‵laga kae fai ei ke maua o ala vave kae kamata o ga‵lue i te suā aso.

E pelā me ne misionale, ne toe maua ne māua te loto finafinau mō te galuega talai pelā mo te taimi muamua. Ne gasolo aka o tokouke a te motou fakapotopotoga, kae ko taina mo tuagane Colombia ne āva, a‵lofa kae fia‵fia.

E isi ne fakai e se ‵mao mai Neiva telā e ga‵lue ei māua, e seai ne Molimau i ei. Ne manavase malosi au ki te auala ke fakaoko atu te tala ‵lei ki koga konā. Kae ona ko te taua a tino ‵teke kolā e ‵nofo i togavao, e fakama‵taku a koga konei ki tino kolā e se ‵nofo i fakai konā. Tenā, ne ‵talo au ke isi se tino i fakai konā ke fai mo Molimau. Ne mafaufau au me e ‵tau mo te tino tenā o nofo i Neiva ke mafai o tauloto ki te munatonu. Tela la, ne ‵talo foki au me kafai ko oti a ia ne papatiso, ka gasolo a ia o matua ‵lei faka-te-agaga kae foki atu ki tena fakai o talai i ei. Ne ‵tau o iloa ne au me isi se auala ‵lei o Ieova ke fakataunu te manakoga tenā i lō au.

E se leva, kae ne kamata o fai te ma akoga faka-te-Tusi Tapu mo te tamataene e igoa ki a Fernando González. Ne nofo a ia i Algeciras, se tasi o fakai telā e seai ne Molimau i ei. Ne faimalaga mai a Fernando i se 50 tupu kilomita (30 mi) ki Neiva o galue. Ne fakatoka faka‵lei a ia ki akoga takitasi kae se leva, mea loa ko kau mai ki fakatasiga katoa. Mai te vaiaso muamua ne fai ei tena akoga, ne fakamaopoopo ne Fernando a nisi tino i tena fakai kae akoako latou ki ana mea ne tauloto mai tena akoga faka-te-Tusi Tapu.

 Ne papatiso a Fernando i a Ianuali 1990, se ono masina mai tua o te taimi ne kamata ei o fai tena akoga. Mai tua ifo, ne fai a ia pelā me se paenia tumau. Ona ko isi se Molimau i Algeciras, ko mafai o ‵tofi aka ne te ofisa lagolago ne paenia fakapito ki te koga tenā. I a Fepuali 1992, ne fakatu ei se fakapotopotoga i te fakai tenā.

E mata, ne gata fua te talaiga a Fernando i tena fakai? Ikai! I tena otiga ne avaga, ne olo atu lāua mo tena avaga ki San Vicente del Caguán, se suā fakai telā e seai ne Molimau i ei. Ne fesoasoani atu lāua o fakatu se fakapotopotoga i konā. I te 2002, ne ‵tofi aka a Fernando ke fai pelā me se ovasia o te seketi, kae ne tumau lāua mo tena avaga ko Olga, i te galuega e pelā me ne ovasia faima‵laga ke oko mai ki aso nei.

Mai te tala tenei, ne tauloto ne au te tāua ke ‵talo ki mea tāua kolā e isi se lotou sokoga ki ‵tou galuega faka-te-agaga. E fai ne Ieova a mea kolā e se mafai ne tatou o fai, me ko ia te Matai o te galuega ki te ‵katiga o saito.—Mata. 9:38.

I te 1990, ne ‵tofi māua ke ga‵lue pelā me ne ovasia faima‵laga. A te seketi muamua ne ‵tofi māua ki ei ko te laumua ko Bogotá. Ne manava‵se māua ki te mā tofiga tenei. A māua mo taku avaga e seai ne mā taleni fakapito. Kae ne seki ola lele eiloa māua i se fakai telā e tokouke a tino i ei. Kae ne fakataunu ne Ieova tena tautoga i te Filipi 2:13: “Ko te Atua eiloa telā e fai ne ia koutou ke ma‵losi, i te tukuatuga o te fiafia mo te ‵mana ke ga‵lue koutou.”

Fakamuli ifo, ne ‵tofi māua ki se seketi i te kogā koga o Medellín, te fakai telā ne taku atu ne au i te kamataga. A tino kolā ne ola i konā ko masani ki fakasauaga i auala, tela la ko seai se ma‵taku i a latou. E pelā mo se taimi e tasi ne fai ne au se akoga faka-te-Tusi Tapu, kae ne kamata o fana‵fana a tino mai tua o te fale tenā. Ne kamata au o gasue o ‵muni i te fola, kae ko taku tino akoga ne tumau loa i te faitau te palakalafa e aunoa mo te mataku. I tena otiga ne faitau, ne fai mai ke fano aka a ia ki tua. E se leva, foki mai ei ki loto mo tama‵liki fo‵liki e tokolua, kae faipati mai mo te atafai, “Fakatoese atu, au ne fano o puke mai aku tama‵liki.”

E isi ne taimi ne ‵tu foki mā ola i se tulaga fakamataku. I se taimi e tasi i te galuega talai mai fale ki fale, ne tele mai taku avaga, kae ko fakalau‵tea aka loa ana foliga. Ne fai mai me isi se tino ne fana ne ia tou fafine. Ne manavase ‵ki au. Kae ne iloa aka ne māua fakamuli me i te tagata tenā ne seki manako o fana a Sirkka; ne fana ne ia se suā tagata telā ne sasale atu i tafa o tou fafine.

Fakamuli loa, ne seki toe manava‵se māua ki fakasauaga kolā e fai i auala. Ne fakamalosigina māua ne te loto ma‵losi o Molimau kolā e fe‵paki mo fakalavelave penā io me ma‵sei atu. Ne fakaiku aka ei ne māua me kafai ne fesoasoani atu a Ieova ki a latou, ka fesoasoani mai foki a ia ki a māua. Ne faka‵logo faeloa māua ki manatu fesoasoani a toeaina i konā, fakagalue auala puipui kae tuku atu te ‵toega ki lima o Ieova.

E tonu, nisi fakalavelave e se fakama‵taku e pelā mo te mea ne mafau‵fau māua ki ei. I se taimi e tasi, ne lagona ne au ne leo o fāfine e  tokolua e fakatau kinau mai tua o te fale ne asi au ki ei. Ne seki fia onoono sāle au ki taua, kae ne fai mai loa te tino i te fale tenā ke fanatu au ki tua i te fakaosoga o te fale. Kae ne poi eiloa au me i te “kinauga” telā ne lagona ne au, ne koke fua e lua kolā e ‵kopi ne lāua a pati a tuakoi.

I te 1997, ne ‵tofi au ke fai pelā me se faiakoga o te Akoga Fakamasani mō Tavini Fakafaifeau. b Ne fiafia faeloa au o kau atu ki akoga faka-te-agaga konei, kae ne seki mafaufau lele au me ka maua ne au te tauliaga fakafiafia ke fai mo faiakoga i ei.

Fakamuli ifo, ne tavini atu au e pelā me se ovasia faimalaga. I te taimi ne taofi aka ei te fakatokaga tenā, ne toe foki atu ki te galuega a ovasia o te seketi. Tela la, mō se 30 tupu tausaga, ne fiafia au o tavini atu e pelā me se faiakoga mo se ovasia faimalaga. Ne maua ne au mai i ei a fakamanuiaga e uke. Kae ne seki faigofie eiloa a mea katoa. Ke fakamatala atu ne au.

Au se tagata loto malosi. Ne fesoasoani mai te uiga tenei ke fakafesagai atu au ki fakalavelave faiga‵ta. Kae ne loto finafinau au i nisi taimi o faka‵tonu aka a mea e ‵tupu i te fakapotopotoga. Ne fakamalosi ne au a nisi tino i nisi taimi ke fakaasi atu te alofa mo te loto malamalama ki nisi tino. Kae se mea fakapoi me ne kamata o ‵galo atu i au a uiga konā i te taimi eiloa tenā.—Loma 7:​21-23.

Ona ko toku tulaga sē ‵lei katoatoa, ne loto vāivāi au i nisi taimi. (Loma 7:24) I se taimi e tasi, ne ‵talo atu au ki a Ieova me se mea ‵lei ke tiakina taku galuega fakamisionale kae foki atu ki Finland. I te afiafi tenā, ne kau atu au ki se fakatasiga a te fakapotopotoga. A fakamalosiga ne maua ne au i ei, ne fai ei ke loto talitonu au me e ‵tau o tumau au i taku galuega kae ke taua atu faeloa ki oku vāivāiga. Ke oko mai nei, koi otia eiloa au i te auala ne tali mai ne Ieova a taku ‵talo tenā. E se gata i ei, e loto fakafetai eiloa au ki te auala ne fesoasoani mai a ia mo te atafai ke manumalo au i oku vāivāiga.

Ne loto fakafetai eiloa māua mo Sirkka ki a Ieova mō te tauliaga ke fakaaoga a te ‵toega o mā olaga i te taviniga tumau. E loto fakafetai foki au ki a Ieova mō te tukumaiga ne ia ki au se avaga alofa kae fakamaoni i tausaga katoa konei.

Ko pili nei o kātoa toku 70 tausaga, ko taofi ei oku tauliaga e pelā me se faiakoga mo se ovasia faimalaga. Kae e se fanoanoa eiloa au i ei. Kaia? Me e talitonu katoatoa au me i te ‵toe mea telā e tāua ki a Ieova, ko tatou ke tavini atu ki a ia mo te loto maulalo kae ‵viki atu mo te loto telā e ‵fonu i te alofa mo te loto fakafetai. (Mika 6:8; Male. 12:​32-34) Ke faka‵malu a Ieova, e se manakogina ke takutakua tatou.

Kafai e toe kilo au ki tua i galuega kolā ne fai ne au, e masaua eiloa ne au me seki maua ne au ona ko toku ‵lei atu i nisi tino; io me ne maua ne au a tauliaga konei ona ko au e tu ‵kese. E se penā loa! Ne tuku mai ne Ieova a galuega konei ona ko tena alofa tauanoa. Ne tuku mai ne ia a tauliaga konei faitalia toku tulaga sē ‵lei katoatoa. E iloa ne au, me ne mafai o fakataunu a oku tōfiga konei ona fua ko te fesoasoani o Ieova. I te faiga tenei, ne fakamaluga aka ei te malosi o te Atua, e auala i oku vāivāiga. —2 Koli. 12:9.