Мен 1955 чылда үш оолдуң хеймери болган мен. Амгы үеде Ва́нтаа хоорай турар черге, Финляндияның мурнуу чүгүнге өзүп келген бис.

Мээң төрүттүнерим мурнунда каш чыл бурунгаар авам сугга суктуруп алгаш, Иегованың Херечизи апарган. Ачам аңаа удур болгаш, авамга бисти өөредирин, чыыштарже баарын хоруп каан. Ынчангаш ачавыс чок үеде ававыс бисти библейжи алыс шынга өөредип турган.

Бичии тургаш-ла, Иеговага дыңнангыр болурумну быжыг шиитпирлеп алган мен. Чеди харлыымда школага ве́рилятют чииринден ойталаан мен (хандан кылган фин блинылар). Башкым хорадаанындан мени күш-биле чемгерерин оралдашкан. Ол бир холу-биле чаагымны сегирип алгаш, аксымче блиныны дыгыыр деп турда, ооң холунда серээни ушта шаапкан мен.

Ачам 12 харлыымда чок апаарга, чыыштарже баар аргалыг апарган мен. Ында акылар хөй кичээнгей көргүзерге, бүзүрелим быжыгып эгелээн. Хүннүң-не Библияны номчуп, ном-дептерлерни ханы шинчилеп турган мен. Ол ажыктыг чаңчылдарның ачызында сугга суктурар күзелим тыптып келген.  1969 чылдың август 8-те 14 харлыг тургаш, сугга суктуруп алган мен.

Школа дооскан соонда, удатпаанда долу эгелекчи апарган мен, а каш неделя эрткенде Финляндияның ыраккы Пи́елавесиже көже берген мен. Аңаа суртаалчылар дузазы херек турган.

Пиелавесиге эргим чараш Си́рккамга таваржы берген мен. Мен ооң топтуг-томаанныын болгаш Иеговага изиг ынакшылын дораан эскерип каан мен. Ол ат-алдарже, байлакшылче чүткүл чок турган. Бис ийилээ каяа-даа, кандыг-даа байдалдарга бараалгап, Иеговага бүгү күжүвүстү бээрин күзээн бис. 1974 чылдың март 23-те өгленип алган бис. Чаа өгленген-даа болзувусса, суртаалчылар оон-даа херек черже, Ка́рттула хоорайже көже берген бис.

Кудавыс соонда Чагырганы бирги черге салырывыска, чуртталгавыска херек бүгү чүвени Иегова бээр деп көрген бис (Мф. 6:33). Чижээ, Карттулага машина чок болгаш, эге дээрезинде тергелерлиг чоруп турган бис. Ынчалза-даа ында кыжын дыка соок. Улуг девискээрлиг чыышка суртаалдаарда биске машина херек турган. Арай-ла ону садып аар акшавыс чок болган.

Бир катап улуг акым чедип келгеш, машиназын биске арттырып бергеш, страховказын база төлеп каан. Бис чүгле бензин садар ужурлуг турган бис. Шак ынчаар машина айтырыы шиитпирлеттинген.

Иегова материалдыг талазы-биле дузалажыр деп бо таварылга биске көргүскен. А бистен негеттинип турган чүүл, Чагырганың ажылынга киржири.

1978 чылда Эгелекчилерниң бараалгал школазынга өөренип турувуста, бир башкывыс Ра́ймо Куо́кканен a, Галаад школазынче анкета долдурарын сүмелээн. Ынчангаш англи дыл өөренип эгелээн бис. Ынчалза-даа 1980 чылда анкета долдуруп четтикпээнивисте-ле, бисти Финляндияда салбырже чалаан. Ол үеде вефилчилерни Галаадче  чалавас турган-даа болза, каяа херегивисти ол боду шиитпирлезин деп Иеговага идегээн бис. Галаадче чалапса канчаар дээш, Вефилге англи дылды өөренирин уламчылаан бис.

Каш чыл эрткенде, Удуртукчу чөвүлел вефилчилерге Галаадка өөренирин чөпшээрээн. Вефилге бараалгаарынга дыка ынак турган бис! Ынчалза-даа дораан анкетаны долдурган бис. Дузавыс херек черлерге хөлчок бараалгаксап турган бис. Бисти Галаадтың 79-ку клазынче чалаан. 1985 чылдың сентябрьда доозуптарывыска, бисти Колумбияже чорудупкан.

Колумбияга баштай Вефилге бараалгап турган бис. Шыдаар шаам-биле кызып турган-даа болзумза, бир чыл эрткенде бараалгалывысты солуп бээрин дилээн мен. Чуртталгам дургузунда акылардан чаңгыс катап ындыг дилегни кылган мен. Бисти Уи́л департаментизиниң эң-не улуг Не́йва деп хоорайынче миссионерлер кылдыр чоруткан.

Мен суртаалдаарынга черле ынак турган мен. Финляндияга эгелекчилей бергеш-ле, чамдыкта даң бажындан тура орай кежээге чедир бараалгап чораан мен. Өөм ишти Сиркка-биле база хүнзедир суртаалдаар турган бис. Ырак девискээрлерже чорааш, машина иштинге удуп хонар бис. Ынчан орукче үе үндүрбейн, дораан-на суртаалдап эгелей бээр бис.

Эгелекчилеп чораан үевистиң одун миссионер бараалгал катап өөскүдүпкен. Чыыжывыс өзүп, акы-угбаларның аразында хүндүткел, ынакшыл болгаш өөрүп четтириишкин тергиидеп турган.

Нейва хоорайның чоок кавы хоорайларынга чаңгыс-даа Иегованың Херечизи турбаан. Ынчангаш олар өөрүшкүлүг медээни канчап билир аарыл деп сагыжым аарып турган. Партизаннар чаа келген улусту өскелээр боорга, Нейвадан алыс шынны хүлээп алыр кижи тыптып кээринге идегээн мен. Ол Бурган-биле найыралын быжыктырып, сугга суктуруп алгаш, төрээн хоорайынга суртаалдап болур турган. Ооң дугайында Иеговага мөргүп турган мен, а ооң шиитпири эң-не дээре болган.

Удатпаанда Ферна́ндо Гонса́лес дээр аныяк оол-биле библейжи кичээлдер эрттирип эгелээн мен. Ол Херечилер чок хоорайларның бирээзи Альхеси́расадан болган. Фернандо ажылдаарда 50 километр ыракта Нейваже барып турган. Ол кичээл бүрүзүнге кызымаккай белеткенип, шупту ужуражылгаларже барып эгелээн. Фернандо бирги неделязында-ла, төрээн хоорайының чурттакчыларын чыып алгаш, өөредип турган.

Фернандо өөренип эгелээш, алды ай болганда, 1990 чылдың январьда сугга суктуруп алган соонда, долу эгелекчилей берген. Ам Альхесирасада Иегованың Херечизи бар апарган. Ынчангаш салбыр айыыл чогун  көргеш, ынаар тускай эгелекчилерни чоруткан. 1992 чылдың февральда ол хоорайга чыыш тургустунган.

Фернандо өске хоорайларга база суртаалдап турган. Өөнүң ишти Ольгага өгленип алгаш, Сан-Висе́нте-дель-Кагуа́нче, Иегованың Херечилери чок черже көже берген. Олар аңаа чыыш тургузарынга дузалашкан. 2002 чылда Фернандону кожуун хайгааракчызы кылдыр томуйлаан, олар ам-даа эргий кезиир бараалгалда.

Фернандонуң таварылгазы мени хөй чүүлге өөреткен. Кезээде дузаны Иеговадан дилээр база мөргүлдеривистиң тода болурунуң чугулазын билип каан мен. Иегова кылып шыдавас чүүлүвүстү кылыптар болгай, чүге дизе дүжүттүң ээзи бис эвес, а Бурган (Мф. 9:38).

1990 чылда биске эргий кезиир бараалгалды дагзып каан. Бир дугаарында Боготе́ деп төп хоорайга баргаш, ол даалганы күүседип шыдавайн баарындан коргуп турган бис. Кадайым-биле тускай салым-чаяан чок бөдүүн болгаш, улуг шимээнниг хоорайга база чурттап өөренмээн бис. Филипчилерге 2:13-те: «Бурган бодунуң күзел-соруунга дүүштүр силерни быжыглап, чүткүүр күзелди-даа, күштү-даа берип турар болгай» дээн («Чаа делегей» очулгазы). Ол сөстерниң биске күүсеттингенин көрдүвүс.

Соонда бисти эгезинде чугаалааным Медельин деп хоорайже томуйлаан. Ында улус кудумчуда кем-херек үүлгедиглеринче безин кичээнгей салбас турган. Бир хүн библейжи кичээл эрттирип турумда, бажың чанынга улус боолажып эгелээн. Мен шалаже чыда дүжер часкан мен. Ынчалза-даа өөредип турган кижим хаайынга-даа какпайн номчуттунуп олурган. Доозупкаш, үне берген. Кезек болганда, ол ийи оглу-биле кирип келгеш таваар: «Буруулуг болдум оолдарымны киирип алыр дээш үне бердим» — дээн.

Өске-даа айыылдыг байдалдарга таварышкан бис. Бир катап бажыңнар кезип суртаалдап турувуста, Сиркканың арны куурара берген хенертен меңээ халып келгеш, ам чаа мени адып турду дээн. Кортканымдан бүгү бодум соолаш дээн. Ынчалза-даа Сирккаже эвес, а өске кижиже боолап турган болган.

Чоорту ындыг чуртталгага чаңчыга берген бис. Оон-даа дора байдалдарга таварышкан дидим Херечилерниң чижээ бисти сорук киирип турган. Иегова оларга дузалажып турар, биске база албан дузалажырында чигзиниг чок. Тус черде удуртукчу акыларның сүмезин эдерип, оваарымчалыг болуп, арткан бүгү чүүлдү Иеговаже чууй каапкан бис.

Суртаалга солун таварылгалар база турган. Чижээ, бир катап кудумчуда алгы-кышкы дыңналган. Ийи херээженниң маргыжы деп бодааш, ону көрүксевээн мен. Ынчалза-даа  бажың ээзиниң аайы-биле үнүп кээримге, ийи попугай улус үнүн өттүнүп алгыржып турар болган.

1997 чылда Бараалгалды экижидериниң школазынга b башкылаар даалга алган мен. Организацияның школаларынга өөрениринге ынак турган мен. Ынчалза-даа аңаа башкылаар деп черле бодаваан мен.

Удатпаанда меңээ область кезиирин дааскан. Ону бөдүүнчүдүптерге, кожуун бараалгалынче эглип келген мен. Ынчап кээрге, 30 чыл ажыг башкылап, эргий кезиир хайгааракчы кылдыр бараалгап, хөй йөрээлдерни алган мен. Ынчалза-даа шупту чүве ындыг-ла амыр эвес болганын тайылбырлап берейн.

Шиитпирлиг чаңым бергелерни ажып эртеринге дузалап турган. Ынчалза-даа чыыштарда четпестерни эдер дээш, эмин эрте бээр болган мен. Акыларга ынакшылдыг, бодамчалыг болурун барык негээнимни сактыр мен. Ынчан бодумну кыдыындан көрген болзумза, ынакшыл оларга эвес, а меңээ четпейн турган (Рим. 7:21—23).

Чамдыкта частырыгларым дээш, муңгаралга бастыра бээр турган мен (Рим. 7:24). Безин бир катап Иеговага миссионер бараалгалымны каапкаш, Финляндияже чорууйн деп турган мен. Ол кежээ хурал болган. Аңаа кайнаар-даа чорбайн, аажы-чаңымны эдерин Иегова бүзүреткен. Бурган мөргүлүмге канчаар тода харыылап, сеткилимни доюлдурупканын ам-даа сактыр мен. Бо чылдар дургузунда шыдамыы-биле четпес талаларым-биле туржурунга дузалашканы дээш, Иеговага дыка-ла өөрүп четтирер-дир мен!

Чуртталгавыстың хөй кезиинде долу бараалгаар арганы бергени дээш, Иеговага Сиркка-биле дыка-ла өөрүп четтирер-дир бис! Оон аңгыда, бо чылдар дургузунда мени деткип келген, Иегованың берген ынакшылдыг, шынчы өөм иштин үнелээр мен.

Удавас 70 харлаар болгаш, башкылаар база эргий кезиир бараалгалым доозар мен. Ол дээш муңгаравас мен. Чүге дизе Иеговага биче сеткилдии-биле, чүрээвистиң ханызындан бараалгаанывыс чугула деп бүзүрээр мен. Бистиң ынакшылывысты болгаш өөрүп четтиргенивисти көөрү аңаа дыка аянныг (Мих. 6:8; Мк. 12:32—34). Иегованы алдаржыдар дизе, тускай бараалгалдыг болуру албан эвес.

Янзы-бүрү даалгаларны өске улустан дээре азы салым-чаяанныг дээш эвес алганымны, эрткен чуртталгамдан көрген мен. Четпестерим турган-даа болза, Иегова эгээртинмес ачы-буянныг болгаш, ол даалгаларны меңээ бүзүрээн. Хүлээлгелеримни чүгле Иегованың дузазы-биле күүседип шыдаар мен. Өскээр чугаалаар болза, Бурганның күжү мээң кошкаам дамчыштыр илерээр (2 Кор. 12:9).