Мон вордӥськи 1955-тӥ арын. Куинь пиос пӧлысь мон самой пичиез вал. Ми будӥмы Финляндилэн лымшор палаз. Али отын Ва́нтаа кар интыяськемын.

Вордӥськемелэсь кӧня ке арлы азьлогес анае пылатӥськиз но Иеговалэн Адӟись-Ивортӥсез луиз. Но атаймы пумит вал. Со уг лэзьы вал анаймылы милемын дышетыны но милемыз кенешлэн пумиськонъёсаз нуллыны. Соин ик со милемыз Библиысь зэмлыкъёслы дышетӥз, куке атаймы вӧзамы ӧй вал.

Пичи дыръям ик мынам юн мылкыды вал Иеговалэсь кылзӥськыса улыны. Школаын, сизьым арес дыръям, мон пумит кариськы сиыны финнъёслэсь вирлэсь лэсьтэм табаньзэс (ве́рилятют). Дышетӥсе вожомиз но монэ кужмысь сюдыны тыршиз. Одӥг киыныз со ымме усьтыны тыршиз, нош мукетыныз табанез кутӥз. Но мон быгатӥ солэсь мозмытскыны.

12 арес дыръям атаймы кулӥз. Собере мон быгатӥ христиан пумиськонъёсы ветлыны. Кенешысь агайёс мыным трос саклык висъязы, соин ик мынам Иеговалы матэгес кариськеме потӥз. Мон кутски котькуд нунал Библиез лыдӟыны но публикациосмес пыр-поч эскерыны. Та умой сямъёс мынэсьтым мылкыдме ӝутӥзы пылатӥськыны. Мон пылатӥськи  1969-тӥ арын 8-тӥ гудырикошконэ. Соку мыным 14 арес вал.

Школаме йылпумъяме бере мон пионер луи но, кӧня ке арня ортчыса, кошки Пи́елавесие (Финляндия). Отын тросгес тодытӥсьёс кулэ вал.

Пиелавесиын мон пумитай Си́ркка сузэрез. Мон соку ик адӟи, со зӥбыт-востэм но Иеговаез туж яратэ шуыса. Со уг тыршы вал та дуннеын нимо-дано луыны яке узырмыны. Милям кыкнамылэн ик потэ вал вань кужмысьтымы Иеговалы ужаммы-тыршеммы, кытчы гинэ милемыз медам ыстэ. 1974-тӥ арын 23-тӥ южтолэзе ми кузпалъяськимы. Кузпалъяськеммы бере ик ми кошкимы пичи каре — Ка́рттулае. Отын эшшо но тросгес тодытӥсьёс кулэ вал.

Кузпалъяськеммы бере ик Иегова возьматӥз, ми Эксэйлыкез нырысетӥ интые пуктӥмы ке, со милемлы ваньзэ кулэзэ сётоз шуыса (Матф. 6:33). Кылсярысь, Карттула карын милям машинамы ӧй вал. Нырысь ми велосипедъёсын ветлӥмы. Нош толъёс отын кезьытэсь. Со сяна, кенешмы бадӟым интыын тодытэ вал. Соин ик милемлы машина кулэ вал. Но сое басьтыны милям коньдонмы ӧй вал.

Малпамтэ шорысь ми доры куное лыктӥз пичиез агае. Со милемлы машиназэ кельтӥз. Страховкаез тыремын вал ини. Милемлы бензин гинэ басьтылоно вал. Озьы милям машинамы кылдӥз.

Иегова возьматӥз, милемлы улон понна ваньзэ кулэзэ сётоз шуыса. Нош милемлы Эксэйлыклэсь ужзэ быдэстоно вал.

1978-тӥ арын ми дышетскимы Пионеръёсты дышетӥсь школаын. Ра́ймо Куо́кканен a агай, одӥгез дышетӥсьмы, мылкыдмес ӝутӥз Галаад школае заявление гожтыны. Соин ик ми англи кылэз дышетыны кутскимы. Но ми заявление гожтыса ӧм вуэ — 1980-тӥ арын милемыз Финляндиысь филиалэ ӧтизы. Соку Вефильын ужась-тыршисьёсты Галаад школаын дышетскыны уг ӧтё вал. Но ми ваньзэ Иегова кие сётӥмы, со ачиз мед быръёз шуыса,  кытын ми кулэгес. Соин ик ми Вефиле кошкимы. Но англи кылэз дышетэмысь ӧм дугдэ, Галаадын дышетскыны луонлык кылдӥз ке, дась мед луомы шуыса.

Кӧня ке ар ортчыса, Кивалтӥсь кенеш Вефильын ужась-тыршисьёслы лэзиз Галаад школаын дышетскыны. Ми соку ик заявление гожтӥмы. Милемлы Вефильын но ужаны-тыршыны туж кельше вал, но милям потэ вал Иеговалы ужаммы отын, кытын ми тросгес пайда вайысалмы. Милемыз ӧтизы Галаад школалэн 79-тӥ классаз дышетскыны. 1985-тӥ арын куарусёнэ, дышетскеммес йылпумъяммы бере, милемыз Колумбие ыстӥзы.

Колумбиын ми нырысь Вефильын ужамы-тыршимы. Мон ужме быдэсъяны туж тырши ке но, ар ортчыса, мон кури, милемыз мукет интые мед ыстозы шуыса. Талэсь азьвыл но со бере мон агайёслы сыӵе куронэн ноку но ӧй вазиськылы ни. Милемыз ыстӥзы Уи́ла департаментысь Не́йва каре.

Мыным котьку кельше вал тодытыны. Финляндиын пионер луэме бере ик мон куддыръя ӵукнаысен бер ӝытозь тодытӥсько вал. Сирккаен кузпалъяськеммы бере но ми быдэс нуналъёсын тодытӥмы. Дормылэсь кыдёке кошкыкумы, ми машинаямы ик кӧлӥськомы вал. Мукет нуналаз, сюреслы дырмес быдтытэк, ми тодытыны кутскиськомы вал.

Миссионеръёс луыса ужаса-тыршыса, милям сюлэмъёсмы нош ик ӝуаны кутскизы, пионеръёс луыса ужакумы-тыршыкумы кадь. Кенешмы будэ вал, нош агайёс но сузэръёс куспын гажан, яратон но тау карон мылкыд вал.

Нейва котырысь каръёсын одӥг Адӟись-Ивортӥсь но ӧй вал. Мон туж сюлмаськисько вал, кызьы со интыосысь адямиос ӟеч иворез кылозы. Кивалтэтлы пумит мынӥсь адямиосын сэрен лыктэмъёслы отчы ветлыны кышкыт вал. Соин ик мынам потэ вал, со каръёсысь кин ке Адӟись-Ивортӥсь мед луоз шуыса. Мон малпасько вал сыӵе адямиез Нейва карысь шедьтыны. Со Иеговалы матэгес кариськысал, пылатӥськысал но аслаз караз берытскысал ӟеч иворез тодытыны. Та сярысь мон Иеговалы вӧсяськи. Но Иегова умойгес амал шедьтӥз.

Ӝоген мон Библиез дышетыны кутски Ферна́ндо Гонса́лес нимо егит пиосмуртэн. Со улэ вал Альхеси́рас карын, кытын Адӟись-Ивортӥсьёс ӧй вал. Фернандо ужаны ветлэ вал Нейва каре, 50 иськем кеме. Со котькуд дышетонмылы умой дасяськиз но соку ик пумиськонъёсы ветлыны кутскиз. Дышетыны кутскемез бере ик Фернандо, аслаз карысьтыз адямиосты люкаса, тодэмзэ соослы вера вал.

Фернандо пылатӥськиз 1990-тӥ арын, толшоре, дышетыны кутскемез бере куать толэзь ортчыса. Собере со пионер луиз. Табере Альхесирас карын но Адӟись-Ивортӥсь вал. Соин ик филиал отчы нимысьтыз пионеръёсты ыстӥз, малы ке шуоно со туж кышкыт ӧй вал ни. 1992-тӥ арын, тулыспалэ, со карын кенеш кылдытэмын вал.

 Фернандо аслаз караз гинэ ӧз тодыты. Ольгаен кузпалъяськемзы бере соос кошкизы Сан-Висе́нте-дель-Кагуа́н каре. Отын но Адӟись-Ивортӥсьёс ӧй вал. Соос юрттӥзы со интыын кенеш кылдытыны. 2002-тӥ арын агайёс куризы Фернандоез ёросэз чаклась луыса ужаны-тыршыны. Соос кышноеныз али но озьы ужало-тыршо на.

Фернандоен луэм учыр монэ дышетӥз, котьку но Иеговалы вӧсяськоно, солы ваньзэ пыр-поч верано но солэсь юрттэтсэ куроно шуыса. Иегова быгатэ лэсьтыны сое, мае ми асьмеос ноку ӧй быгатысалмы, малы ке шуоно со — Аранлэн кузёез, ми ӧвӧл (Матф. 9:38).

1990-тӥ арын монэ куризы ёросэз чаклась луыса ужаны-тыршыны. Нырысетӥ ёросмы вал Богота́ шоркарын. Ми сюлмаськимы, та ужез быдэстыны ум быгатэ шуыса. Малы ке шуоно ми огшоры адямиос, мукетъёсызлэсь номырин пӧртэм ӧвӧл, бадӟым карын улыны дышемын ӧвӧл. Но Филиппыослы 2:13 гожтэмын: «Аслыз ярамон луон понна Инмар тӥлесьтыд мылкыддэс ӝутэ, ӟеч ужъёс тӥледыз лэсьтытэ». Ми ас выламы шӧдӥмы, кызьы та кылъёс быдэсмо.

Берлогес милям ёросмы вал Медельин. Та кар сярысь мон кутсконаз верай вал ини. Отысь адямиос йыружъёслы сокем дышемын вал, сыӵе учыръёслы нокыӵе саклыксэс уг висъяло вал ини. Огпол, одӥг пиосмуртэн Библиез дышетыкум, корка вӧзын ыбылӥськыны кутскизы. Мон выж вылэ выдыны дась вал ини. Нош со пиосмурт нокыӵе кариськытэк лыдӟонзэ азьланьтӥз. Лыдӟонзэ йылпумъямез бере со ураме потӥз. Кӧня ке дыр ортчыса, со кык пичи пиосыныз берытскиз но шуиз: «Вождэс эн вае, мыным соосты доре пыртоно вал».

Милям мукет кышкыт учыръёсмы но вал. Огпол, коркась корка тодытыкумы, мон доры Сиркка бызьыса лыктӥз. Солэн ымнырыз кӧдэктэмын вал. Со вераз, сое ыбыны туртто вал шуыса. Кышкаменым мон юзыр-кезьыр луи. Берлогес ми тодӥмы, ыбыны туртто вылэм пиосмуртэ, кудӥз Сиркка вӧзтӥ ортче вал.

Дыр ортчемъя ми сыӵе улонлы дышимы. Ми туж паймиськомы вал, макем кышкасьтэмесь со интыысь Адӟись-Ивортӥсьёс, кудъёсыз эшшо но кышкытгес учыръёсын пумиськылӥзы. Ми малпаськиськомы вал тазьы: Иегова соослы юрттэ бере, со милемлы но юрттоз. Ми котьку лыдэ басьтӥськомы вал отын улӥсь тӧроослэсь визь-кенешъёссэс, чакласькиськомы вал, нош кылемзэ Иегова кие сётӥськомы вал.

Тодытыкумы серемес учыръёс но вал. Кылсярысь, огпол мон кылӥ урамысь кесяськем куараосты. Мон малпай, кык кышномуртъёс ченгешо шуыса. Сыӵе учыр шоры мынам учкеме уг поты вал, но коркалэн кузёез косӥз монэ азбаре потыны. Мон адӟи, кык попугайёс «ченгешо» вал шуыса. Соос бускель кышномуртъёссылэн кадь куараосын кесясько вал.

1997-тӥ арын монэ куризы Ужан-тыршонэз умоятон школаын дышетыны b. Мыным котьку кельше вал Библейской школаосын дышетскыны. Но мон ноку ӧй малпа, кыӵе ке школаын дышетӥсь луо шуыса.

Берлогес монэ куризы улосэз чаклась луыса ужаны-тыршыны. Куке ужпум кутэмын вал, улосэз чакласьёс уз луэ ини шуыса, мон нош ик ёросэз чаклась луыса ужаны-тыршыны кутски. Озьыен, дышетӥсь луыса, улосэз но ёросэз чаклась луыса мон 30 арлэсь кемагес ужасько-тыршисько ини. Та дыр куспын мынам трос бакель каронъёсы вал. Но котьку ик капчи ӧй вал. Мар сярысь мынам вераме потэ?

Мон юн сямо адями. Та юрттэ мыным шуг-секытъёсты чиданы. Но куддыръя, кенешъёсын шуг-секытъёссэс сэрттыкумы-пертчыкумы, мон асме укыр чурыт возисько вал. Огпол мон агайёсты косӥсько вал яратӥсесь но валасесь луыны. Но адӟе вал тӥ соку монэ! Зэмзэ вераса, мыным аслым сыӵе сямъёс уг тырмо вал (Рим. 7:21—23).

Янгышъёсыным сэрен куддыръя мынам киосы воксё лэзисько вал (Рим. 7:24). Огпол мон Иеговалы верай, миссионер луыса ужаны-тыршыны уг быгатӥськы ни но Финляндие берытскисько шуыса. Со ӝытэ ик кенешлэн пумиськоназ Иегова монэ оскытӥз, мон кулэ интыын шуыса: мыным ас интыям кылёно но азьланяз но сямъёсме умоятыны тыршоно. Мынам сюлмам ик пыриз, кызьы Иегова вӧсяськонэлы ответ сётӥз. Со сярысь мон али ке но тодӥсько на. Мон туж тау карисько Иеговалы, вань улонэ ӵоже со мыным чидаса но лякытэн юрттэ шуыса тырмымтэосыным нюръяськыны.

Кылъёс ик уг шедё вераны, макем ми тау кариськомы Иеговалы, сомында аръёс ӵоже вань дырмес сётыса ужаны-тыршыны быгатӥмы шуыса. Озьы ик мон ялан тау шуисько Иеговалы яратӥсь оскымон кышное понна, кудӥз вань та аръёс ӵоже мыным юрттӥське.

Ӝоген мыным 70 арес тырмоз. Соин ик дышетӥсь луыса но ёросэз чаклась луыса ужаны-тыршыны мон уг быгаты ни. Но мон уг сюлмаськиськы, малы ке шуоно Иегова уг учкы, кыӵе ужез ми быдэсъяськомы. Иеговалэн потэ, ми зӥбыт-востэмесь мед луомы но солы вань сюлмысьтымы мед ужаломы-тыршомы шуыса. Со туж шумпотэ, куке милям сюлэммы сое яратонэн но солы тау каронэн пачылме (Мих. 6:8; Марк 12:32—34). Иеговаез данъян понна кыӵе ке нимысьтыз ужез быдэсъяны одно ик кулэ ӧвӧл.

Быдэс улонэ ӵоже пӧртэм ужъёсты быдэсъяй ке но, мон валасько, мон мукетъёсызлэсь умойгес ӧвӧл но мынам кыӵе ке нимысьтыз быгатонлыкъёсы ӧвӧл шуыса. Иегова мыным та ужъёсты оскиз, мынам тырмымтэосы шоры учкытэк. Мон тодӥсько, Иеговалэн юрттэменыз гинэ та ужъёсты быдэстыны быгатӥсько шуыса. Мукет сямен вераса, куке мон ляб, Инмар мыным кужым сётэ (2 Кор. 12:9).