Nda citiwa kunyamo wo 1955, ame ndumalẽhe pokati komãla vatatu akuenje. Nda kulila kombuelo yo Finlandia, onepa yimue okuti cilo ya kũlĩhĩwa okuti olupale luo Vantaa.

Ina yange wa papatisiwa Ndombangi ya Yehova osimbu ame sia citiwile. Pole, isiange ka solele ocili kuenda ka yonguile okuti ina yange o tu longisa Embimbiliya ale oku tu ambata kolohongele. Omo liaco, eye wa enda oku tu longisa Embimbiliya osimbu isiange ka kasipo.

Tunde vutila nda nõlapo oku vumba Yehova. Ndeci, eci nda kuata anyamo epanduvali, ulongisi wange wo kosikola wa ndi temẽla omo sia tavele oku lia akende a pangiwa losonde. Leka limosi wa ñuata vatama loku yikula omẽla wange kuenje lokuokuo kukuavo, wa seteka oku iñisa vomẽla wange ocinimbu cimue cekende. Pole, ongalufu yaco ndo yi punda.

Eci nda kuata 12 kanyamo, isiange wa fa. Noke nda fetika oku endaenda kolohongele. Vamanji alume vekongelo va ñapeleko calua kuenje, ca ñuatisa oku pamisa ukamba wange la Yehova. Nda fetika oku tanga Embimbiliya oloneke viosi kuenda oku vokiya ombili yange yoku lilongisa alivulu etu. Ombili yaco ya vokiya onjongole yange yoku papatisiwa eci nda kuata 14 kanyamo, keteke 8 Yenyenye, yunyamo wo 1969.

Eci nda mala oku tanga kosikola, nda fetika upange wakundi votembo yosi. Noke liolosemana  vimue, nda ilukila kocikanjo cimue kuli esukila liakundi, kolupale luo Pielavesi ocipepi lo vocakati co Finlandia.

Volupale luo Pielavesi, omo nda kũlĩhĩla ufeko weya oku kala ukãi wange, Sirkka. Ovituwa viaye viwa kuenda ekalo liaye konepa yespiritu, ovio via mbetiya oku u sola. Eye ka sandele ekemãlo ale ovokuasi. Kavali ketu, tua yonguile oku likolisilako oku linga upange wa Yehova, loku tẽlisa ocikele cosi tu tambula. Etu tua kuela keteke 23 Yelombo, 1974. Otembo yetu yoku kala kepuyuko noke yoku kuela, tua yi pesila kupange woku kunda ko Karttula, volupale lumue lutito mua kala esukila liakundi Vusoma.

Tunde eci tua kuela, Yehova wa siata oku lekisa okuti wa laikele oku tu ĩha ovina viosi tua sukilile nda okuti tua pitisa kovaso Usoma. (Mat. 6:33) Ndeci, ko Karttula, ka tua kuatele ekãlu. Kefetikilo tua enda oku linga ungende losikaleta. Pole, kotembo yondombo kua enda oku talala calua. Oco tu kundile vocikanjo cinene cekongelo tua sukilile ekãlu limue. Pole, ka tua kuatele olombongo vioku landa ekãlu.

Eteke limue okuti, ka tua kapeleleko, kota liange weya oku tu nyula. Eye locisola wa tu ĩha ekãlu liaye. Ocicapa cecelela oku enda lalio, ca fetiwile ale. Tua sukilile lika oku landa ongasolina. Kuenje tua kuata ocendelo tua sukilile.

Yehova wa tu lekisa okuti eye wa kuatele ocikele coku tu ĩha ovina viosi tua sukilile. Tua sukilile lika oku pitisa kovaso Usoma.

Eci tua kala oku pindisiwa kosikola yakundi votembo yosi kunyamo wo 1978, manji Raimo Kuokkanen, a umue pokati kalongisi, wa tu vetiya oku pindisiwa Kosikola yo Gileada. Omo liaco, tua fetika oku lilongisa ongelesi locimãho coku enda kosikola yaco. Kuenje, kunyamo wo 1980, osimbu ka tua vilikiyiwile oku enda kosikola yaco, tua lalekiwa oku ka talavaya ko Betele ko Finlandia. Kotembo yaco, vana va talavaya ko Betele ka va ponduile oku pindisiwa kosikola yo Gileada. Pole, etu tua yonguile oku kuatisa kupange wa Yehova, okuti ka tu nõla ocitumãlo. Omo liaco, tua tava elaleko liaco. Pole, ndaño ndoco, tu amamako oku lilongisa ongelesi, oco ci leluke nda tua kuata epuluvi lioku pindisiwa kosikola yo Gileada.

Noke lianyamo amue, Osungu Yolombangi  Via Yehova ya eca onumbi yokuti vamanji ko Betele va ponduile oku pindisiwa kosikola yo Gileada. Etu tua soneha lonjanga ocicapa caco, pole, ka tua ci lingile omo okuti ka tua yonguile vali oku talavaya ko Betele. Hacoko! Etu tua yonguile oku lieca olumue oco tu talavaye oku kuli esukila nda okuti tua nõliwa. Etu tua tava kelaleko lioku pindisiwa ko Gileada kuenda tua malusula ocisoko 79 kosãi Yenyenye Linene, yunyamo wo 1985. Noke tua tumiwa ko Kolombia.

Ko Kolombia, tete tua tumiwa ko Betele. Nda seteka oku linga cosi ndi tẽla kocikele cange, pole noke liunyamo umosi ko Betele, nda limbuka okuti nda sukilile oku linga epongoloko limue. Ya kala onjanja yatete haiyo ya sulako komuenyo wange oku pinga ocikele cimue cikuavo. Kuenje tua tumiwa vocikanjo volupale luo Neiva, vimbo lio Huila. H.

Ame olonjanja viosi ndi sole calua upange woku kunda. Eci nda kala ukundi wotembo yosi ko Finlandia okuti otembo yaco handi sia kuelele, nda solaile oku kunda lomẽle kuenda koñolosi. Noke yoku kuela, ame la Sirkka tua enda oku pita otembo yalua veteke loku kunda. Eci tu kundila kovitumãlo vi kasi ocipãla lonjo yetu, tua enda oku lala vekãlu lietu. Ca enda oku tepulula otembo tu pesela koku linga ovongende loku tu ecelela oku fetika selo upange woku kunda.

Upange wumisionaliu wa tu kuatisa oku tumbulula ombili tua kuatele ale kupange woku kunda. Ekongelo lietu ko Kolombia lia kula kuenda vamanji va kala vakuesumbilo, vakuacisola kuenda vakualopandu.

Valupale amue ocipepi lolupale luo Neiva, ka mua kaile Olombangi Via Yehova. Ame nda enda oku sakalala calua lonjila ndomo olondaka viwa via laikele oku pitĩla kalupale aco. Pole, omo liuyaki, ka via kaile ovitumãlo via kolapo ku vana ka va tungile valupale aco. Omo liaco, nda likutilila oco umue pokati kolonungi vialupale aco, a linge Ombangi ya Yehova. Ame nda simile okuti omunu waco wa sukilile oku kala vo Neiva oco a lilongise ocili. Kuenje nda likutililavo oco okuti, noke yoku papatisiwa amamako oku kula konepa yespiritu kuenda o tiukila kolupale luaye oco a ka kunde. Nda sukilile oku kũlĩha okuti Yehova o kuete onjila ya velapo yoku ci linga okuti yange yi sule.

Noke liotembo yimue, nda fetika oku longisa Embimbiliya kumalẽhe umue o tukuiwa Fernando González. Eye wa kala kolupale luo Algeciras, lumue pokati kalupale ana okuti ka kua kaile Olombangi Via Yehova. Fernando wa sukilile oku enda eci ci soka 50 kolokilometulu toke ko Neiva oco a ka talavaye. Eye wa enda oku pongiya ciwa alilongiso aye kuenda wa fetika oku endaenda kolohongele viosi. Fernando kosemana yatete yelilongiso, wa fetika oku ongolola omanu vakuavo vo volupale luaye kuenda oku va longisa ovina a lilongisa Vembimbiliya.

Fernando wa papatisiwa kosãi ya Susu yunyamo wo 1990, noke yolosãi epandu tunde eci a fetika oku lilongisa. Noke wa linga ukundi wotembo yosi. Omo okuti ko Algeciras kua kala ale Ombangi yimue ya Yehova, ca tavele okuti o Filiale yi tuma akundi va likasi kocitumãlo caco. Kosãi ya Kayovo yunyamo wo 1992, kua sokiyiwa ekongelo limue.

 Anga hẽ Fernando wa kundila lika volupale a kala? Sio! Noke lioku kuela, eye lukãi waye va ilukila ko San Vicente do Caguán, olupale lukuavo okuti ka kua kaile Olombangi Via Yehova. Ovo va kuatisa oku tumbika ekongelo limue. Kunyamo wo 2002, Fernando wa nõliwa oco a nyule akongelo kuenda eye lukãi waye Olga, va kasi oku amamako kupange waco toke cilo.

Kulandu waco ndanda lilongisa okuti, ci kuete esilivilo oku likutilila catiamẽla kovina vimue kocikele cetu kupange wa Yehova. Yehova wa linga ovina ka tu tẽla oku linga. Ocili okuti, upange waco woku ungula waye, hawetuko.—Mat. 9:38.

Kunyamo wo 1990 tua tambula ocikele coku nyula akongelo. Ocikanjo catete tua nyula, olupale luo Bogotá. Tua kala lusumba nda hẽ tu ka tẽlisa ciwa ocikele caco. Ame lukãi wange, ka tua tangele calua kuenda ka tua kuatele ovoloño a likasi. Pole, Yehova wa tẽlisa ohuminyo yaye yi sangiwa ku va Filipoi 2:13: “Suku eye una okuti, omo lionjongole yaye yiwa o kasi oku talavaya vokuene kuenda u wĩhi onjongole longusu yoku linga ovina viosi.”

Noke tua tumiwa oku ka nyula ocikanjo co Medellín, olupale luna nda tukula kefetikilo. Omanu vo volupale luaco, ka va kuatele vali usumba lungangala momo ca va kile ale. Ndeci, onjanja yimue eci nda kala oku songola elilongiso Liembimbiliya, omanu va fetika oku li loya ovo muẽle posamua yonjo nda kala. Ame nda kala lusumba walua pole, ulume nda kala oku longisa wamamako oku tanga ocinimbu okuti, ka kuatele usumba. Eci a mala oku tanga, wa pinga ongecelo kuenje wa enda posamua. Noke eye wa tiuka lomãla vavali kuenda wa popia hati, “ngecele, pole nda sukilile oku kopa omãla vange.”

Tua kuatele ocitangi cikuavo. Onjanjanja yimue eci tua kala oku kundila konjo lanjo, ukãi wange weya lolupesi kokuange kuenda wa kala ndu okuti wa hongua. Eye wa popia okuti, ulume umue nda wo loya. Ca ñokela usumba. Pole, noke tua limbuka okuti ulume waco ka yonguile oku loya Sirkka; eye wa kala oku loya ulume umue wa kala ocipepi la Sirkka.

Vokuenda kuotembo, ka tua kuatele vali usumba lungangala waco. Tua pamisiwa lutõi Wolombangi Via Yehova vio pocitumãlo, vina via pita ale lovitangi viaco kuenda evi via piãlapo vali. Tua sokolola ndoco, nda Yehova wa va kuatisa, eye o ka tu kuatisavo. Olonjanja viosi tua enda oku ivaluka alungulo akulu vekongelo vo pocitumãlo atiamẽla koku enda lutate kuenda oku kolela ku Yehova.

Pole, akalo amue ka a kokele usumba ndeci tua simile. Eteke limue nda yeva akãi vavali va kala oku lihoya posamua yonjo nda kala oku nyula. Ame sia yonguile oku tala oku lihoya kuaco, pole muelianjo wa ndi sapuila oco tu tundile posamua. Pole, eci tua tunda, tua limbuka okuti va kala oku linga “onjuela yaco,” olonjila vavali vi tukuiwa okuti kalongo vina vi setukula omanu va lisunguile lavo.

Kunyamo wo 1997, nda tambula ocikele coku kala ulongisi Wosikola Yoku Pindisa Vamanji  Alume ka va Kuelele. b Olonjanja viosi nda solaile oku pindisiwa kolosikola Viusoma, pole, sia simĩle okuti eteke limue ndi ka kala ulongisi.

Noke, nda tambula ocikele coku nyula ovivanja. Eci upange waco wa liwekapo, nda tiukila vali kupange woku nyula akongelo. Kuenje, pa pita ale 30 kanyamo tunde eci ñasi kupange woku longisa kolosikola kuenda oku nyula akongelo. Ovikele viaco via siata oku ndi nenela asumũlũho alua. Pole, ka ca lelukile. Linga ndi ci lombolole.

Ame nda kuatele ovituwa vimue ka via lelukile. Eci ca ñuatisa oku liyaka lakalo ka a lelukile. Omo liaco, olonjanja vimue ndi lekisa ombili yalua koku tetulula ovitangi vimue vio vekongelo. Onjanja yimue nda vetiya vamue oku kala vakuacisola kuenda oku lekisa esunguluko la vakuavo. Pole, oku popia ocili, vapuluvi aco nda sukililevo oku lekisa ovituwa viaco.—Va Rom. 7:21-23.

Omo liahonguo ange, olonjanja vimue nda endaile oku yeva esumuo lialua. (Va Rom. 7:24) Vapuluvi aco, nda enda oku likutilila ku Yehova oco ndi siepo upange wumisionaliu loku tiukila ko Finlandia. Vuteke umue nda endele kohongele yimue. Evetiyo nda tambula kohongele yaco, lia ñuatisa oku limbuka okuti ndi pondola oku amamako oku kala kocikele cange kuenda oku likolisilako oku mioñolola ovituwa viange. Keteke liaco, nda limbuka ndomo Yehova a tambulula ohutililo yange. Handi vali, ndi pandula calua ndomo eye a siata oku ndi kuatisa lohenda oku yula ahonguo ange.

Ame la Sirkka, tu pandula calua Yehova omo liesumũlũho tua kuata lioku talavaya kupange ulikasi wotembo yosi. Ndi pandulavo Yehova omo lioku nyĩha ukãi umue ukuacisola haeye ukuacili vokuenda kuanyamo a-a.

Ndopo ndi ka tẽlisa 70 kanyamo kuenje ndi ka liwekapo oku kala ulongisi wolosikola kuenda ukuakunyula akongelo. Pole, si ka sumua omo liepongoloko liaco. Momo lie? Momo nda kolela okuti, ceca esivayo ku Yehova oku u fendela lesuluviko, oku u sivaya locisola kuenda lolopandu. (Mika 6:8; Mar. 12:32-34) Oco tu sivaye Yehova, ka tu sukila oku kuata ocikele cimue ca velapo.

Eci ndi sokolola kovikele nda kuata, ndi limbuka okuti sia vi tambuile omo nda velelepo vakuetu, ale nda kuatele ovoloño amue a likasi. Hacoko! Pole, Yehova wa nyĩha ovikele viaco omo liohenda yaye. Eye wa nyĩha ovikele viaco ndaño lahonguo ange. Nda kũlĩha okuti nda siata lika oku tẽlisa ovikele viaco, omo liekuatiso lia Yehova. Omo liaco, ahonguo ange a situlula unene wa Suku.—2 Va Kor. 12:9.