Taani 1955n yelettaas; taayyo naaˈˈu bayra ishantti deˈoosona. Taani Tohossa Finlandden ha wodiyan Vantta geetetti xeegettiya heeran diccaas.

Taani yelettanaappe amarida layttaappe kase ta aayyiya haattan muukettada Yihoowa Markka gidaasu. Shin ta aaway tumaa eqettiyo gishshawu, ta aayyiya nuna Geeshsha Maxaafaa xannaˈissennaadan woy galchchaa shiiqota efeennaadan diggees. Yaatiyo gishshawu A, aaway baynna wodiyan Geeshsha Maxaafaa tumaa nuna tamaarissaasu.

Taani naatettaappe doommada Yihoowawu azazettays. Leemisuwawu, tawu layttay laappuna gidido wode, ta asttamaariya taani veerilatiya (Finlanddetto doonan suuttaappe giigissido oyttaa) meennan ixxido gishshawu ta bolli keehi hanqqettaasu. A issi kushiyan taani doonaa dooyanaadan ta gacuwa oyqqada, hankko kushiyan qassi he oytta malabaa shuukkan wolqqan barssanawu malaasu. Taani I kushiyappe shuukkaa baqqa olaas.

Taayyo layttay 12 gidido wode ta aaway hayqqiis. Hegaappe simmin, taani galchchaa shiiqota shiiqana danddayaas. Galchchan deˈiya ishantti taayyo kehidoogee taani ayyaanaaban diccanaadan maaddiis. Taani ubba galla Geeshsha Maxaafaa nabbabiyogaanne nu xuufeta loytta xannaˈiyogaa  doommaas. Hegaappe denddidaagan, taani Naase 8, 1969n tawu layttay 14 gidido wode haattan muukettaas.

Taani timirttiya wurssada darin takkennan ubba wode aqinye gidada haggaaziyogaa doommaas. Amarida saaminttatuppe guyyiyan, Finlandden giddo heeran aassiyageeti keehi koshshiyo Peelivese giyo sohuwa haggaazanawu baas.

Peelivesen Sirkko geetettiya yelaga naˈeera gayttaas; A guyyeppe ta siiqo machchiyo gidaasu. A ashkkenne ayyaanaaban gooba gidiyo gishshawu taani O siiqaas. A hayttatanawu woy duretanawu koyukku. Nuuyyo deˈiya haggaazo maatay ayba gidikkonne nuussi danddayettida keenaa Yihoowawu haggaazanawu koyida. Nuuni Laappune 23, 1974n aqo oyqqida. Bullachchaappe simmin nuuni issippe wodiya attiyo sohuwa biyogaa aggidi, Kawotettaa mishiraachchuwa yootiyageeti keehi koshshiyo Karttuula giyosaa biida.

Nuuni aqo oyqqoosappe doommidi Yihooway nuuni A Kawotettaa kaseyikko, I nuussi koshshiyaba kunttanaagaa bessiis. (Mat. 6:33) Leemisuwawu, nuuni Karttuulan deˈiyo wode, nuuyyo kaamee baawa. Koyro heeran nuuni bishkkiliitiya goˈettida. Shin balgguwan keehi meeggees. Nu galchchan deˈiya aaho moottatun sabbakanawu nuuyyo kaamee koshshiis. Shin shammanawu nuuyyo miishshi baawa.

Ta bayra ishay nuuni qoppennan deˈishin nuna oychchanawu yiis. I nuuyyo ba kaamiya kehatettan immiis. He kaamiyawu inshuranssee qanxxettiis. Nuuni nadaajjiya kunttiyogaa xalaalay koshshiis. Hegaappe simmin, nuuyyo koshshiya kaamiya demmida.

Yihooway nuussi koshshiyabaa kunttiyo aawatettaa poliis. Nuuni oottana koshshiyabay A Kawotettaa kaseyiyogaa.

Nuuni 1978n Aqinyetettaa Haggaazuwa Timirtte Keettan tamaariyo wode, nu asttamaaretuppe issoy Irimo Kiwokaneni a nuuni Giiliyade Timirtte Keettan tamaaranawu qitsiya kunttanaadan minttettiis. Yaatin nuuni Giiliyaden tamaaranawu qoppidi Inggilizettuwa tamaariyogaa doommida. Shin nuuni qitsiya kunttanaappe kase, 1980n Finlandde macara biiruwan haggaazanaadan  shoobettida. He wode Beeteelen haggaaziyageeti Giiliyaden tamaaranawu qitsiya kunttana danddayokkona. Shin nuuni nuussi keehi loˈˈo giidi qoppiyosan gidennan, Yihooway nuuyyo keehi loˈˈo giidi qoppiyosan haggaazanawu koyida. Yaatiyo gishshawu, nuuni he shoobiya ekkida. Gidikkonne, nuuni geella Giiliyaden tamaaranawu qitsiya kunttana danddayiyoshsha gi qoppidi Inggilizettuwa tamaariyogaa aggibookko.

Amarida layttaappe guyyiyan, Oosuwa Kaalettiya Citay Beeteelen haggaaziyageeti Giiliyaden tamaaranawu qitsiya kunttanaadan paqqadiis. Nuuni qitsiya sohuwara kunttida; shin yaatidoy Beeteelen haggaaziyogan ufayttibeenna gishshataassa gidenna. Gaasoy hegaappe dummatees! Nuuni danddayikko, aassiyageeti koshshiyo awakka biidi haggaazanawu koyida. Nuuni Giiliyaden tamaaridi Masqqala 1985n 79tta kayan anjjettida. Yaatidi nuuni Kolombbiya maddabettida.

Nuuni koyro Kolombbiya macara biiruwan haggaazanaadan maddabettida. Ta aawatettaa polanawu taassi danddayettida ubbabaa oottaas; shin macara biiruwan issi layttawu haggaaza simmada nuuni hara oosuwa oottana koshshiyabadan qoppaas. Nuuyyo hara oosoy imettanaadan oychchaas; hegaappe kase woy hegaappe simmin hegaadan mule oychcha erikke. Guyyeppe nuuni Huyela moottan deˈiya Neyiva giyo kataman missoonaawe gididi maddabettida.

Taani haggaaziyogan ubbatoo ufayttays. Taani aqo oyqqennan Finlandden aqinye gidada haggaaziyo wode, guuraappe doommada omarssa gakkanawu issi issitoo haggaazays. Qassi ta machchiya Sirkkanne taani gallassa kumettaa haggaazoos. Nuuni haaho moottan haggaaziyo wode issi issitoo nu kaame giddon xiskkoos. Hegee nuuni biyosaa sohuwara gakkanaadan maaddees; qassi kaalliya galla guuraara denddana danddayoos.

Nuuni misoonaawe gidiyo gishshawu, kaseegaadan zaarettidi minni haggaazida. Nu galchchay dicciis; qassi Kolombbiyan deˈiya ishanttinne michchontti bonchchiyageeta, siiqiyageetanne nashshiyageeta.

Nuuni maddabettido Neyive katamaappe darin haakkennan deˈiya katamatun Yihoowa Markki baawa. He heeratun mishiraachchoy gakkanaadan waatana danddayiyo giyagee tana keehi qofissiis. Shin yan geeman olettiyageeti deˈiyo gishshawu, he katama asa gidennaageeti qohettana danddayoosona. Hegaa gishshawu he katamatuppe issi uray Yihoowa Markka gidanaadan woossaas. He uri tumaa tamaaranawu Neyivan deˈana koshshees gaada qoppaas. Yaatiyo gishshawu I haattan muuketti simmidi ayyaanaaban kayma gidanaadaaninne ba biitti guyye simmidi sabbakanaadankka woossaas. Yihooway taagaappe kehiyabaa oottanaagaa taani erana koshshiis.

Hegaappe simmin darin takkennan Fernanddo Gonzaleza giyo yelagaa Geeshsha Maxaafaa xannaˈissiyogaa doommaas. I Yihoowa Markkati baynna katamatuppe issuwa gidida Aljjesiraasen deˈees. Fernanddoy oosuwawu 50 kilo meetiriya haakkidi deˈiya Neyiva saaminttan saaminttan manddarees. I xinaatiyawu loytti giigettees, qassi shiiqota ubbaa shiiqiyogaa sohuwara doommiis. Fernanddoy xannaˈiyogaa doommido koyro saaminttaappe  doommidi ba kataman deˈiya asaa shiishshidi I Geeshsha Maxaafaa xannaˈidi eridobaa eta tamaarissees.

Fernanddoy xannaˈiyogaa doommin usuppun aginaappe guyyiyan Ichchashe 1990n haattan muukettiis. Hegaappe simmin, ubba wode aqinye gidiis. Aljjesiraasen issi Yihoowa Markkay deˈiyo gishshawu, macara biiroy he heeran dumma aqinyiya maddabanawu hirggissiyabi baawa. Usuppune 1992n he kataman galchchay eqqiis.

Fernanddoy ba kataman xalla sabbakidee? Chii! I aqo oyqqi simmidi ba keettaayera Yihoowa Markki baynna San Vasent Del Kahawan giyo katamaa biis. Eti yan galchchay eqqanaadan maaddidosona. Fernanddoy 2002n woradaa xomoosiyagaa gididi sunttettiis; qassi inne A machchiya Olga hanno gakkanawu woradaa oosuwa oottoosona.

Yihoowa haggaazuwa xeelliyagan loytti qonccissidi woossiyogee keehi koshshiyogaa taani ha hanotaappe tamaaraas. Nuuni danddayennabaa Yihooway oottees. Qassi cahaa oosoy nuugaa gidennan Yihoowagaa.—Mat. 9:38.

Nuuni 1990n yuuyidi xomoosiyo oosuwa oottanaadan maddabettida. Nu koyro woraday waanna katama gidida Boogotaana. Nuuni he aawatetta loytti polana danddayokko giidi yayyida. Ta keettaayyiyanne taani dumma eri baynna asa. Qassi nuuni asay dariyo kataman deˈi erokko. Shin Yihooway Piliphphisiyuusa 2:13n qaalaa gelidobaa poliis: “Xoossai inttena bau eeno giissanaadaaninne qassi i qoppidobaa intte oottanaadan intte giddon ubba wode oottees.”

Taani doomettan yootido Mediline giyo katamaa heeran woradaa oosuwa oottanaadan guyyeppe maddabettida. Yan diccida asay makkalanchchati oottiyobaa meezetido gishshawu yayyenna. Leemisuwawu, issi wode taani Geeshsha Maxaafaa xannaˈissaydda deˈishin taani biido keettaa heeran amaridaageeti issoy issuwa bolli zayyiya tokkosiyogaa doommidosona. Taani saˈan zinˈˈidaashin he xinaatee woppu giidi menttuwa nabbabiis. I nabbabiyogaa wurssidi kare kiyiis. Darin takkennan ba naaˈˈu guutta naata ekkidi yiis; yaatidi liiqo qaalan hagaadan giis: “Tawu atto ga; ta guutta naata ehaanawu baas.”

Daganttiyabay nuna gakkido hara wodetikka deˈoosona. Issi wode nuuni sooppe soo haggaaziiddi deˈishin ta machchiya kokkoraydda taakko woxxaydda yaasu. Issi uri I bolli tokkosidoogaa taayyo yootaasu. Hegan taani dagammaas. Shin zayyiya oyqqida bitanee Sirkki bolli gidennan, I mataara kanttiya bitaniya bolli tokkosidoogaa guyyeppe akeekida.

Amarida wodiyappe guyyiyan, makkalaa darin yayyiyogaa aggida. Hegaa malanne keehi iita hanotay gakkin mino gidida yan deˈiya Yihoowa Markkatun keehi minettida. Yihooway eta maaddikko nunakka maaddana giidi ammanettida. Cimati immiyo kaaletuwa ubbatoo kaalloos; qohiyabatuppe kasetidi naagettoos; qassi harabaa Yihoowawu aggibayoos.

Issi issi hanotati nuuni qoppidoogaadan nuna qohiyageeta gidokkona. Issi wode taani biido keettaappe kareera naaˈˈu maccaasati issoy issuwa cayiyogaa milatiya cenggurssaa siyaas. Taani palamaa siyanawu koyabeennaba gidikkokka,  keettaa goday baranddaakko taani kiyanaadan yootiis. Hanotaa akeekiyo wode “palamaa” milatiyabay naaˈˈu kafoti asaa qullidi sissiyo cenggurssaa.

Taani Galchchan Oottiyageeti Loohiyo Timirtte Keettan b tamaarissiyagaa gidada 1997n sunttettaas. Taani tiˈokiraase timirtte keettatun tamaariyogaa ubbatoo nashshikkonne tamaarissiyagaa gidiyo ha ufayssiya aawatettaa demmana gaada mule qoppa erikke.

Guyyeppe, awuraajjaa xomoosiyagaa gidada haggaazaas. Awuraajjaa xomoosiyagaa gididi oottiyogee attido wode, taani zaarettada woradaa oosuwa oottiyogaa doommaas. Yaaniyo gishshawu taani tamaarissiyagaanne yuuyyidi xomoosiyagaa gidada 30​ppe dariya layttawu ufayssan haggaazaas. Ha aawatettati daro anjjuwa demissidosona. Shin issi issitoo metiyabati gakkidosona. Ane hegaa qonccissays.

Taani mino asa. Waayissiya hanotata genccanaadan hegee tana maaddiis. Shin taani galchchatun issi issi allalleta giigissanawu issi issitoo bessiyagaappe aaruwan baaxetaas. Amaridaageeti harata siiqanaadaaninne eta hanotaa akeekanaadan mintta zoraas. He wodetun tawukka he eeshshati koshshidoogee garamissiyaba.—Roo. 7:21-23.

Taani baliyobatuppe denddidaagan issi issitoo hidootaa qanxxaas. (Roo. 7:24) Issi wode taani, misoonaawe gidada haggaaziyogaa aggada Finlandde simmiyakko taayyo keehi loˈˈo gaada Yihoowa woossaas. He galla omarssi taani galchchaa shiiquwa shiiqaas. Taani he shiiquwan siyidobay tawu imettida aawatettaa aggana koshshennaagaanne ubbatoo ta balaa giigissanawu baaxetana koshshiyogaa ammananaadan oottiis. Yihooway he woosaa zaarido gishshawu hanno gakkanawu ta A keehi galatays. Qassi taani ta balaa giigissanaadan I tana kehatettan maaddido gishshawu keehi nashshays.

Sirkkanne taani nu deˈuwappe dariya baggaa ubba wode haggaazuwan Yihoowawu haggaazido gishshawu nuuni A keehi galatoos. He wodetun siiqiyanne ammanettida machchiyo Yihooway tawu immido gishshawukka taani A wozanappe galatays.

Taayyo layttay 70 matiis; qassi taani Geeshsha Maxaafaa timirtte keettatun tamaarissiyogaanne yuuyyada xomoosiyogaa aggiyogee attenna. Shin taani hegan azzanikke. Ayssi giikko, Yihooway nuuni awu ashkketettan haggaaziyogaanne siiqoynne galatay nuna denttettin wozanappe A sabbiyogaa xoqqu ootti xeelliyogaa taani loytta ammanettays. (Mik. 6:8; Mar. 12:32-34) Yihoowa sabbanawu nuuyyo dumma maati koshshenna.

Taani kase oottidobata qoppiyo wode, hegaa oottidoy haratuppe aadhdhiya asa gidiyo gishshawu woy tawu dumma eray deˈiyo gishshawu gidennaagaa akeekaas. Gaasoy hegaappe dummatees! Yihooway tawu he aawatettata immidoy ba aaro kehatettaana. Taani balikkokka I tawu he aawatettata immiis. Yihooway maaddido gishsha xallawu he aawatettata polidoogaa taani erays. He wodetun, ta daafuran Xoossaa wolqqay qoncciis.—2 Qor. 12:9.