Natawo ako han 1955, ako an putó ha tulo nga kalalakin-an. Nagdaku ako hirani ha sur nga baybayon han Finland, usa nga lugar nga gintatawag na yana nga syudad han Vantaa.

Nabawtismohan an akon nanay sugad nga usa han mga Saksi ni Jehova pipira ka tuig antes ako matawo. Pero an akon tatay nakontra ha kamatuoran ngan waray niya tuguti hi Nanay nga tutdoan kami ha Biblia o iupod kami ha mga katirok han kongregasyon. Salit kon waray hi Tatay, iya kami gintututdoan han nangunguna nga mga kamatuoran ha Biblia.

Tikang pa han akon kabata, masinugtanon na ako kan Jehova. Pananglitan, han syete anyos ako, nasina an akon titser kay diri ako nakaon hin verilättyjä (pancake ha Finland nga may halo nga dugo). Gamit an iya usa nga kamot, ginkaptan niya hin makusog an akon bayhon basi ako ngumanga, ngan iginpipirit niya nga ihungit ha akon an pancake ha tinidor. Ginwirik ko an tinidor basi niya ito mabuhian.

Han 12 anyos ako, namatay an akon tatay. Katapos hito, nakakaatender na ako ha mga katirok han kongregasyon. An mga brother ha kongregasyon nagpakita hin interes ha akon, ngan nagpagios ito ha akon nga mag-uswag ha espirituwal. Nagtikang ako pagbasa han Biblia kada adlaw ngan maduruto nga gin-adman ko an aton mga publikasyon. Tungod hini, nabawtismohan ako ha edad nga 14, han Agosto 8, 1969.

 Waray pag-iha, natapos ko an akon pag-eskwela, ngan nagregular payunir ako. Ha sulod hin pipira ka semana, binalhin ako basi mag-alagad ha lugar nga mas daku an panginahanglan, ha Pielavesi, hirani ha sentro han Finland.

Ha Pielavesi, nakilala ko an babaye nga akon nagin asawa, hi Sirkka. Naruyagan ko gud hiya kay mapainubsanon hiya ngan nahigugma gud kan Jehova. Waray niya hingyapa nga magin sikat o riko. Pariho namon ginhingyap nga mag-alagad kan Jehova hin bug-os tubtob nga posible, anoman nga pribilehiyo ha pag-alagad. Ginkasal kami han Marso 23, 1974. Imbes nga mag-honeymoon, kumadto kami ha Karttula basi mag-alagad, kon diin mas daku an panginahanglan hin mga magwarali han Ginhadian.

Ha tinikangan pa la han amon pag-asawa, iginpakita na ni Jehova nga iya aatamanon an amon materyal nga mga panginahanglan kon uunahon namon an pagpamiling han iya Ginhadian. (Mat. 6:33) Pananglitan, ha Karttula, waray kami awto. Ha siyahan, nagbibisikleta la kami. Pero kon winter mahagkot gud. Basi masangyawan an haluag nga teritoryo han kongregasyon, kinahanglan namon hin awto. Pero waray kami iparalit.

Ha diri ginlalaoman, an usa han akon mga kuya binisita ha amon. Iginhatag niya ha amon an iya awto. Bayad na an insurance, ngan gasolina na la an amon gagastosan. Salit may sarakyan na kami nga amon ginkikinahanglan.

Iginpakita ni Jehova ha amon nga hiya an may responsabilidad ha pag-ataman han amon materyal nga mga panginahanglan. An angay la namon buhaton amo an pag-una han mga buruhaton han Ginhadian.

Samtang naeskwela ha Pioneer Service School han 1978, gindasig kami nga mag-aplay para ha Gilead School, han usa han amon mga instruktor nga hi Raimo Kuokkanen. a Salit nag-aram kami hin Ingles kay karuyag namon makaeskwela. Pero han 1980, antes pa kami makag-aplay, gin-imbitar kami nga mag-alagad ha branch office ha Finland. Hito nga panahon, an mga Bethelite diri puydi mag-aplay para ha Gilead. Pero karuyag namon mag-alagad kon diin an pinakamaopay para kan Jehova, diri an amon ginhuhunahuna nga pinakamaopay. Salit ginkarawat namon an imbitasyon.  Bisan pa hito, padayon kami nga nag-aram hin Ingles bangin man la magkaada kami oportunidad nga makaaplay para ha Gilead.

Paglabay hin pipira ka tuig, nagsiring an Nagmamando nga Lawas nga an mga Bethelite puydi na mag-aplay para ha Gilead. Nag-aplay kami dayon pero diri tungod nga diri kami malipayon ha Bethel. Lugod, karuyag la namon magin available ha pag-alagad ha lugar nga mas daku an panginahanglan kon magigin kwalipikado kami. Nakaeskwela kami ha Gilead School ngan naggradwar han ika-79 nga klase han Septyembre 1985. Ha Colombia an amon asaynment.

Ha Colombia, an amon siyahan nga asaynment ha branch office. Nangalimbasog ako nga buhaton an akon pinakamaopay ha akon asaynment, pero paglabay hin usa ka tuig ha branch, inabat ko nga kinahanglan namon hin pagbag-o. First time ha akon kinabuhi ngan hito la nga panahon, naghangyo ako hin iba nga asaynment. Katapos, igin-asayn kami sugad nga mga misyonero ha field, ha syudad han Neiva, ha rehiyon han Huila.

Pirme gud ako nalilipay ha ministeryo. Han olitawo pa ako nga payunir ha Finland, usahay nagsasangyaw ako temprano ha aga tubtob ha gab-i. Ngan han bag-o pa la kami nga mag-asawa ni Sirkka, nagsasangyaw liwat kami ha bug-os nga adlaw. Kon nagsasangyaw kami ha higrayo nga mga teritoryo, usahay ha amon sarakyan kami nakaturog. Tungod hito nakakatipid kami hin panahon ngan temprano pa kami nga nakakagtikang ha pagsangyaw ha sunod nga adlaw.

Sugad nga mga misyonero, gin-abat namon utro an sugad nga kadasig nga amon gin-abat hadto para ha ministeryo. Nag-uswag an amon kongregasyon, ngan an kabugtoan ha Colombia matinalahuron, mahigugmaon, ngan maapresyaron.

Waray mga Saksi ha kahigrani nga mga bungto ha amon asaynment ha Neiva. Nababaraka gud ako kon paonan-o an maopay nga sumat makakaabot hito nga mga lugar. Pero tungod han girra han mga girilya, ini nga mga lugar delikado para ha mga diri taga-didto. Salit nag-ampo ako nga unta may magin Saksi ha usa hini nga mga bungto. Nahunahuna ko nga dapat mag-ukoy hiya ha Neiva basi mahibaro ha kamatuoran. Salit gin-ampo ko liwat nga katapos han iya bawtismo, magin hamtong hiya ha espirituwal ngan bumalik ha iya lugar basi magsangyaw. Nasantop ko nga hi Jehova may mas maopay nga solusyon kay ha akon ginhuhunahuna.

Waray pag-iha, nagin Bible study ko an usa nga batan-on nga hi Fernando González. Naukoy hiya ha Algeciras, usa han mga bungto nga waray Saksi. Hi Fernando nagbibiyahe hin sobra 50 ka kilometro tikadto ha Neiva basi magtrabaho. Nangangandam gud hiya hin maopay ha kada namon pag-aaram ngan inatender dayon hiya ha ngatanan nga katirok. Tikang ha siyahan nga semana han amon pag-study, gintitirok ni Fernando an iba nga taga-didto ha ira ngan igintututdo ha ira an iya nahibaroan ha iya pag-Bible study.

Hi Fernando nabawtismohan han Enero 1990, unom ka bulan tikang han nag-aram hiya. Katapos, nagin regular payunir hiya. Tungod kay may Saksi na nga taga-Algeciras, diri na delikado nga magpadara an branch office hin mga espesyal  payunir hito nga lugar. Han Pebrero 1992, may kongregasyon nga naporma hito nga bungto.

Didto la ba hi Fernando nagsangyaw ha ira bungto? Diri! Katapos magpakasal, hiya ngan an iya asawa binalhin ha San Vicente del Caguán, usa pa nga bungto nga waray Saksi. Binulig hira didto ha pag-establisar hin kongregasyon. Han 2002, nagin paramangno han sirkito hi Fernando, ngan tubtob yana, hiya ngan an iya asawa nga hi Olga aada ha pagbiyahe nga buruhaton.

Nahibaroan ko hito nga eksperyensya, nga importante gud an pagin espisipiko han aton mga gin-aampo parte ha aton teokratiko nga mga toka. Kaya buhaton ni Jehova an diri naton kaya. Ngani, iya ini nga pag-ani, diri aton.—Mat. 9:38.

Han 1990, gin-asayn kami ha pagbiyahe nga buruhaton. An amon siyahan nga sirkito ha Bogotá, an kapital nga syudad. Nahadlok kami kay bangin diri namon mabuhat hin maopay ini nga toka. Kami han akon asawa mga ordinaryo la nga tawo, waray bisan ano nga espesyal nga talento. Ngan diri kami hiara ha pag-ukoy ha matawo nga syudad. Pero gintuman ni Jehova an iya saad nga mababasa ha Filipos 2:13: “An Dios, uyon ha iya nalilipayan, amo an nagpapakusog ha iyo, naghahatag ha iyo han hingyap ngan han gahum ha pagbuhat.”

Ha urhi, naasayn kami ha usa nga sirkito ha lugar han Medellín, an syudad nga akon gin-unabi ha tinikangan. An mga tawo didto hiara na gud ha mga kasamok ha kalsada ngan diri na hira nahahadlok hito. Pananglitan, usa ka beses han nagka-conduct ako hin Bible study, nagkaada purupsilay ha gawas han balay nga akon ginbibisita. Mahapa na unta ako, pero an akon Bible study nagpadayon la ha pagbasa han parapo, ngan kalmado la hiya. Han natapos hiya magbasa, nagsarit hiya nga magawas. Waray pag-iha, binalik hiya upod an duha nga bata ngan kalmado nga nasiring, “Pasensya na, pero ginpauli ko la an akon mga anak.”

May iba pa nga panhitabo nga nanelikado kami. Makausa, han nagbabalay-balay kami, an akon asawa nagdadalagan tikadi ha akon, ngan maduas hiya. Siring niya may nagpusil ha iya. Nakalasan ako hito. Pero nasabtan gihap namon nga diri hi Sirkka an ginpupusil, kondi an lalaki nga nalabay ha iya luyo.

Paglabay han panahon, nahiara na kami ha kasamok ha kalsada. Nadasig kami han kaisog han mga Saksi didto nga naatubang hin pariho nga sitwasyon ngan mas grabe pa. Nakasiring kami nga kon ginbubuligan hira ni Jehova, iya liwat kami bubuligan. Pirme namon ginsusunod an mga sagdon han mga tigurang didto, naghihirot, ngan an iba hi Jehova na an bahala.

Syempre, an iba nga mga kahimtang diri man delikado sugad han amon ginhuhunahuna. Makausa, may nabatian ako nga nag-iinsultohay nga duha nga babaye nga dagku an tingog ha gawas han balay nga akon ginbibisita. Diri ako interesado magkita hin nagrarasonay, pero ginsidngan ako han tagbalay nga kumadto ha iya ha may balkon. Katapos, nasabtan namon nga mga pikoy la ngay-an an “nagrarasonay” nga nagsisinubad ha ira mga amyaw.

Han 1997, nagin instruktor ako han Ministerial Training School. b Naruruyag gud ako pirme pag-atender ha teokratiko nga mga eskwelahan, pero waray ko gud maimadyin nga magkakaada ako hinin makalilipay nga pribilehiyo han pagin instruktor.

Ha urhi, nag-alagad ako sugad nga paramangno han distrito. Han ginwara ito nga kahikayan, binalik ako ha sirkito nga buruhaton. Salit ha sobra 30 ka tuig, nai-enjoy ko an pag-alagad sugad nga instruktor ngan nagbibiyahe nga paramangno. Tungod hini nga mga asaynment nagkaada ako damu nga bendisyon. Pero diri ito pirme masayon. Isusumat ko kon kay ano.

May kompyansa ako ngan may marig-on nga personalidad. Nakabulig ini ha akon nga maatubang an magkuri nga kahimtang. Pero danay, sobra an akon kadasig ha pangalimbasog nga matadong an mga problema ha mga kongregasyon. Usa ka beses, may ginsagdonan ako nga magin mahigugmaon ngan makatadunganon ha iba. Pero hito nga panahon, diri ko liwat naipapakita ito nga mga kalidad.—Roma 7:​21-23.

Tungod han akon mga kapakyasan, usahay nanluluya gud ako. (Roma 7:24) Makausa, igin-ampo ko kan Jehova nga mas makakaopay kon diri na ako magmisyonero ngan umuli na la ha Finland. Hito nga gab-i, inatender ako ha katirok. Nakombinse ako han pagdasig nga akon nabatian ha katirok nga dapat ako magpabilin ha akon asaynment ngan padayon nga mangalimbasog ha pag-ato ha akon mga kaluyahan. Tubtob yana, napaparig-on ako nga ginbaton gud ni Jehova ito nga pag-ampo. Dugang pa, naapresyar ko gud nga ginbuligan niya ako nga malamposan an akon mga kaluyahan.

Mapasalamaton gud kami ni Sirkka kan Jehova nga nagkaada kami pribilehiyo nga mas hilawig nga panahon an amon nagamit ha bug-os panahon nga pag-alagad. Mapasalamaton gud liwat ako kan Jehova nga gintagan niya ako hin mahigugmaon ngan matinumanon nga asawa tikang pa hadto.

Diri na maiha ma-70 anyos na ako ngan maundang na ha pagin field instructor ngan ha pagin paramangno han sirkito. Pero diri ako nasusubo tungod hito. Kay ano? Kay kombinsido ako nga an nakakapasidungog gud kan Jehova amo an pagdayaw nga puno hin gugma ngan pagpasalamat, ngan pag-alagad nga ginkikilala an mga limitasyon. (Mic. 6:8; Mar. 12:​32-34) Diri naton kinahanglan nga magkaada hin espesyal nga pribilehiyo para mapasidunggan hi Jehova.

Kon ginhihinumdom ko an mga asaynment nga akon nakarawat, nahuhunahuna ko nga waray ko ito makarawat tungod kay mas maopay ako ha iba; o nakarawat ko ini nga mga pribilehiyo tungod kay may espesyal ako nga abilidad. Diri gud ito an rason! Lugod, iginhatag ha akon ni Jehova ini nga mga toka tungod han iya diri matupngan nga pagkabuotan. Iginhatag niya ha akon ini nga mga pribilehiyo bisan pa han akon mga kaluyahan. Maaram ako nga nabuhat ko ini nga mga asaynment tungod la ha bulig ni Jehova. Salit nakita ko an gahum han Dios tungod han akon mga kaluyahan.—2 Cor. 12:9.