I avungu re rogo 1955, wa ani adu biata nga akumbagude, mi nangia kiaro. Mi asono rogo gu papara Finland du ku sudiyo yo, rogo gu rago i ayambaha awere nga gu gbata nga Vantaa.

Nina azi bapatiza ki da ni Dezire Yekova bete agarã mbata fu i vungu re. Ono tie, buba anaasoga rengo asoga, na ko anaaida nga nina ni wirikipai na ani nga agude te watadu ka ndu na ani tipa adunguratise te. Sidu, ri anaayugo bangua arengo furani nga ga Baibiri ho buba anaadunga ni ho ya.

Natona ho mi adu ni ni gude ka ndu kumbatayo, mi anaaidanga ka basasangba Yekova te. Ni kpiapai, ho garã re adu ni saba, gimi bayugupai adu na zinga na mi bambiko mi anaaringa verilättyjä te, (si nga gu he du ni fiõfiõ ho wa kpakuto nga ga aboro Finiland i abaha na kure). Ri apirĩ ngbare na kura beri sa tipa ka saha si zaki, ri kini asadi ka síhe ku ngbare yo na kura beri. Mi aima du na rengba ka siko ho kusayo ngba beri.

Ho garã re adu ni 12, buba akpi. Tingbafuo gure, mi aima du na rengba kaa ndu tipa adunguratise. Awirina rogo dungurati aima yugo nyemuse fere gbe, na gipai re afõngbadure yo mi mangi sonakumbatayo gbe rogo toro yo. Mi atona geda Baibiri na aˈuru dunduko, na kini wisigi gu gaani awaraga nga ga aKristano kakaka. Gi wene mbakadapai nga ga wisigopai re, nga gu banguapai nasa re mi zi bapatiza na garã re 14, rogo Buza 8, 1969.

Nibasa tingbafuo mi nyasi gimi sukuru, mi atona sunge abazakigene. Vuru bete aposo yo gbua,  mi aga kurogo gu ba nadu na bakere zingo abatungusipai rogoho, Pielavesi yo, mbembedi ku bebere gu ringara yo nga Finland.

Pielavesi yo du mi agbia gu degude ni naye ka da ni diare, nga Sirkka. Mi akpinyemu ri mbiko ri adu na umbasitise na ri aima kpinyemu Yekova ni bakerehe gbe. Ri aagbatanga worimo watadu fiõfiõ raka te. Ani dunduko naaida ka mangasunge fu Yekova wa omerani arengbe na ni na ani adu na nyemu ka manga ai gu sunge i anaafuhe furani. Ani arogotirani rogo Marungu 23, 1974. Kuba gupai nga ani di ongoda ka mera tingbafuo gaani rogatise, ani andu ku Karttula yo, nga gu ba nadu na bakere zingo abatungusipa Kindo rogoho.

Ti kina tonatona gaani rogatise, Yekova aima yugo gupai nga ko nikaa ngera angerafuo gu gaani azingo nga ga borose ka ani peresipa agu apai nga ga Kindo mbatayo. (Mt. 6:33) Ni kpiapai, Karttula yo, tarambiri aadunga berani te. Ti tonatonaha, ani anaata na ngbagida. Ono tie, garã, zere anidu nikerehe. Tipa ka tungusapai rogo gu bakere dagbarago nga ga dungurati, si aaida ani du na tarambiri be rani. Ono marã aadunga berani tipa ka ngbehe te.

Unvurami aye ka bi rani zanga ani inihe nga ko nika ye. Ko ayugu wenesino nifu ko gako tarambiri furani. I aima tumo marã agu awaraga si aaidaha tipaha. Si aaida ani ningbe kina ime we sa ku rogoho. Tingbafuo gure tie, ani agbia gu tarambiri ani aaidaha.

Yekova ayugu gupai nga ko ima dia gu gaani tindiro nga ga ngerafuo gu gaani azingo nga ga borose. Gaani sunge angia ka peresapa Kindo mbatayo.

Ho ani aamanga gu Sukuru ni Nga ga Abazakigene rogo gu garã nangia 1978, Raimo Kuokkanen, a nangia kura gaani bayugupai sa angarasi rani tipa ani fu rimorani tipa gu Sukuru Nga ga Girada. Sidu, ani atona wirika pa-Ingirisi na gu sásá nga ka rẽ ka ndu tipa ha. Ono tie, rogo 1980, mbata fu ani fu rimorani tipaha, i ayambu rani tipa ani ndu ka mangasunge rogo gu be-basunge nga ga Finland. Ti gu regbo re, aboro Betere anaafunga rimoyo tipa Girada te. Ono ani aaida ka mangasunge rogo gu ba Yekova abihe nga si ngba angianga rogo gu ba ani abihe nga si ngba ya. Sidu, ani adi gu yambahe re kugume. Ono wa si avura du wo, ani aawirika pa-Ingirisi kindi, isoke,  singia ani agbia gu momu nga ka fu rimo rani tipa Girada.

Fuo bete agarã kusa, Riigbu Bipasunge aidihe fu aboro Betere nga i nifu rimoyo afu tipa Girada. Ani ahisi gu fuomu re nibasa angianga mbiko ani aadunga na ngbarago Betere yo ya te. Anga wo si adu te! Ani aaida gbua kadu regerege ka mangasunge rogo gu ba nadu na bakere zingo rogoho ka ani rẽ. I ayambu rani ku Girada yo na ani ki nyasi gu sukuru re rogo gu riko nangia namba 79 rogo gu garã nangia 1985 rogo Mbirinvuo. I afu rani na sunge ku Colombia yo.

Colombia yo, i afu sunge furani mbata be-basunge yo. Mi aima asada na omere dunduko ka manga gimi sunge, ono tingbafuo garã sa be-basunge yo, mi abihe nga si naida na ariapai. Gure nangia bambata regbo rogo gimi raka yo na kidu ni yangadaha tipa mi sanahe tipa kura sunge kia. Tifuo gure, i akedi rani ni amokedi ku rogo gu gbata nga Neiva, rogo gu paparaha nga Huila.

Mi aima digo ni gbia ngbarago ti sunge tungusapai. Ho mi adu ni ni bakuparanga na kingia bazakigene Finland yo, mi anaatungusapai ti kura aregbo tona kina ngbawiso ki da ku nyemu. Ho ani adu ni ni vovo arogotise, mi gbiati Sirkka anaatungusapai a tona wiso ku nyemu. Ho ani anaamangasunge ni rogo agu adagbarago du ni tuturũ he ti kpurani, ani anaara ti kura aregbo kina vuru gaani tarambiri yo. Gipai re anaaundo na gu regbo ka ani anaagbarasaha kuti nunguro na ani kini tona sunge kina boro ngbawiso rogo gu uru naani ngbefuoho.

Wa ani adu ni amokedi, ani adu kindi zaaza ti ngba sunge tungusapai kina wai ani anaamangaha ti agu aregbo nadu kusayo. Gaani dungurati asono na agu awirina nadu Colombia yo adu na irisa, nyemuse, na ki du na tambuahe.

Agbata kinaho nga gu aDezire Yekova aadunga rogoho ya, nga gu naaturongo na Neiva nga gu gbata ani anaamangasunge rogoyo ya. Mi aabaka kina bangire tipa wai wene pangbanga nika da rogo agu aba re. Ono tie, mbiko gupai nga gu vura naamanga yo na aboro nvuo, agi aba re aadunga ni wene ba fu ayeaye te. Sidu, mi amangi kparakpee tipa gupai nga boro sa rogo agi agbata re da ni Dezire Yekova. Mi aberẽ gupai nga gi boro re ni rakinga kina Neiva ane tipa wa ka ni wirikinga rengo. Sidu tie, mi amangi kparakpee a nga, tifuo gu boro re zi bapatiza, si naida ni mangi sonakumbatayo rogo toro yo na ki karaga ti ni ku rogo gu gbata ni aye rogoho tipa ka tungusapai. Si aaida mi ini gupai nga, Yekova ini gupai du ni wenehe kisusi re.

Ngbutuko tifuo gupai re, mi atona wirikapai na paranga kumba rimoko angia Fernando González. Ko aaraka Algeciras yo, nga gbata sa dagba agu agbata aDezire Yekova aadunga rogoho ya. Fernando anaandu susi akirometere 50 (amairo 30) kaa mangasunge Neiva rogo aposo yo dunduko. Ko anaambakada awirikapai nibasasa dunduko wenengai na fuoho aaturongo te, ko ki tona ndu tipa adunguratise. Ti kina gu bambata poso nangia ga gako wirikapai, Fernando anaadungura kura aboro rogo gu gbata ko anaaraka rogoho ki tona yugo agu apai fuyo ko anaawirikaha vurube gako wirika Baibiri.

Fernando azi bapatiza rogo Ngi rogo gu garã nangia 1990, adiwi sita tifuo ko tona wirikapai. Tingbafuo gure, ko ada ni bazakigene. Wa boro  aima da sa ni Dezire Yekova Algeciras yo, si aima rẽ awere kadu ni wene ba tipa be-basunge kedi kparakpara abazakigene ku rogo gu gbata re. Rogo Wegebe 1992, i azaki dungurati rogo gu gbata re.

Ya mo Fernando anaamangasunge tungusapai sa kina rogo gu gbata ko adu rogoho? Oó! Tingbafuo ko mangi rogatise, ko na diako aga kurogo gu gbata nga San Vicente del Caguán, nga gu kura gbata aDezire Yekova aadunga rogoho ya. I aundo yo na ki zaki dungurati. Rogo 2002, i asia Fernando ni babi adungurati, ko gbiati diako nga, Olga, namangasunge biko adungurati kindi da ku areme.

Rogo gi kpiapai re, mi awiriki pa wai nyakipa kparakpee nibi kina boro pa gupai si aidaha nibipa gaani asunge nga ga siokrasia. Yekova namanga gupai ka ani aamanganga ha ya. Gu garakaha agaraka tie berewe nga, gako ati du ngaha, angianga gaani ya.​—Mt. 9:38.

Rogo 1990, i afu gu sunge furani nga ga biko rimbasa adungurati. Gaani bambata dagbarago adu rogo gu bagbata nga, Bogotá. Gi sunge re aima ba gunde tirani. Mi gbiati diare nga kungbo wiri aboro gbua, adunga na kparakpara abirĩ sunge ya. Na ani aainidongo tirani na raka rogo bagbata te. Ono tie, Yekova aima digiso gu gako kidohe du rogo AFiripoio 2:13, NW: “Bambiko Mbori nafu nyemupai na ome tipa ani mangipai mbiko wene pangbanga.”

Kusa, i akedi rani na sunge biko adungurati kurogo gu dagbarago nga Medellín, nga gu gbata mi nipepaha ti tonatonaha. Aboro aima inido tiyo yo na azuũ bangiri agene si ki da ni gupai i agundenga behe ya. Ni kpiapai, ti kura regbo sa, mi aanungusa wisigo Baibiri na boro, bundu kini tona kaa su zegiyo rogo gu kporo mi adu rogoho. Mi aima mbeda ka pi sande, ono gu bawisigi Baibiri re aandu kindi kumbatayo kaa geda genewaraga zanga gunde. Ho ko anyasi gedapai ni, ko aya mi mbu wiri regbo fuko na ko akuru ku zegiyo. Tifuo bete regbo, ko akaraga tiko ku dimoyo na rukutu agude ue na ki pe gupai fere zezeredi nga, “Mo mbupai fere, si naaida mi ndu andu ka dia awire.”

Kura aregbo kinaho ani anidu ngba kerepai yo. Ti kura regbo sa, ho ani aatungusapai ni kporo na kporo, diare aoro ki ye fuo re, ri aakio akio be gunde. Ri ape gupai nga boro azumu ri na bundu. Gu naadu tire aima nyasa. Ono tie, kusa, ani aye ka ino gupai nga, anga Sirkka du gu boro re aaida ka no ri te; ko aazumudo gu kumba naasusa mbembedi na ri.

Fuo bete aregbo, ani aagundenga berewe be zuu bangiri gene te. Gu kpiapai nga ga agu awirina naaraka rogo gu rago re aima ngarasa rani nga aguyo naagbiatiyo na zuu wa gere watadu susihe. Ani ada kuti gu digisopai nga, ka si du nga Yekova anaaundo yo aundo, ko nika undo rani aundo a. Ani anaadia gu rugute kugume dedede nga ga agu abaakumba nadu rogo gu dagbarago re, na kini mangipai na rubangirise, na ki mbu tirani ku be Yekova.

Ono tie, gu kura apai aagberãnga agberã nikerehe wa gu ani aaberãha te. Rogo kura uru sa, mi agi fugo wa ka i ya adee ue nataka ngbayo na kini senge tiyo rogo gu kporo mi andu ku rogoho. Nyemu bi aboro i nipoi aadunga tire te, ono irakporo  aya fere, mi ye fuo ri ku ngbadimo ndugu yo. Atika wari, gu “paya” re adu dagba azire ue nga akukuru naawirika gari amurakporo.

Rogo 1997, i asia re ni gu bayugupai nga ga Gu Sukuru du Tipa Raba Amoyambu. b Mi adu na tambuahe ti aregbo dunduko tipa kaa manga agu asukuru nga ga siokrasia, ono mi aaberãnga patire nga mi adu na gu momu nga ka yugopai rogoho te.

Kusa, mi amangisunge ni babi rimbasa adungurati. Ho i arugusi gu mbakadapai re ni, i akaraga re berewe kuti ngba sunge biko adungurati. Sidu, tipa agarã awere niima susa 30 , mi ima gbia ngbarago ti gu sunge nga ga bayugupai na sunge biko adungurati. Agi asunge re aima du ni mburu pa dungu amaku. Ono tie, anga apai dunduko ni du taata te. Mi sakingo rogoyo.

Mi ningia gu boro nidu na bakere kido kuti tire. Gipai re ima undo re mi mangipai kuti agu akpakarapai mi nagbia tire na ni. Ono tie, ti kura aregbo, mi naasada ka ruga apai zaaza rogo adungurati kisusi wai si aidaha. Ti kura aregbo, mi aima ngarasa bete aboro i du na nyemuse kidu na ruru bipai tipa kura aboro. Ono kina ti gu bangisa regbo re a, mi aadunga na agu asino re te.​—Rom. 7:21-23.

Mbiko gimi aingahe, si naasa re asa ti kura aregbo, mi du na gberãrago. (Rom. 7:24) Ti kura regbo sa, mi ape gupai fu Yekova rogo kparakpee yo nga, si angba gbe ka mi mbu sunge amokedi na ki karaga tire ku Finland yo. Rogo gu nyemu re, mi andu tipa gu dunguratise nga ga dungurati. Gu ngarasaro mi agbiaha yo asa re mi da kuti gupai nga, si aidanga mi mbu gimi sunge te, si naida mi naandu kumbatayo kindi kaa mangapai sa kuti azangarengba. Da ku areme, mi na bakere tambuahe tipa wai Yekova akaragapai sa gu gi kparakpee re. Kurigure, mi na bakere tambuahe tipa wai ko naundo re rogo nyemuse yo tipa mi dibe gimi arungbura.

Mi gbiati Sirkka na bakere tambuahe fu Yekova tipa gu momu nga ka mangasunge na gaani regbo ni bakerehe ti ngba sunge Kindo ti aregbo dunduko. Mi a na bakere tambuahe fu Yekova tipa fu ko gu dee fere vuru agi agarã yo re dunduko du na nyemuse kidu niruru ri.

Barambeda, garãre nika da nga 70 na mi ki mbu agu amomu nga ga du ni bayugupai na ni gu babiapai ninaata ata. Ono tie, mi na gberãrago mbiko gipai re te. Tipagine adunga mi ti ni na gberãrago ya? Bambiko mi idi kuti gupai nga, gupai nafu taarimo fu Yekova gbe nga ani irisiko na umbasitise na kini sambuoko kina boro ngbaduraniyo mbiko nyemuse na gaani tambuahe fuko. (Mika 6:8; Mk. 12:32-34) Tipa ka irisa Yekova, si aidanga ani du na kina nyanyakipa sunge berani te.

Ho mi angera ni kusayo ka bi agu asunge mi nagbia ngbarago ti mangaha, mi ima rugatire na gupai nga, mi aagbianga agi asunge re mbiko pare nanyaki ti ga kura aboro te; watadu mi aagbianga agi amomu re a mbiko gupai nga mi adu na kparakpara tandu mangapai te. A nga wo si adu te! Kuba gure, Yekova afu agi asunge re fere mbiko gu gako weneringise arẽnga aboro tipaha ya. Ko afu agi amomu re fere mi ki vura du vurũ na gimi arungbura. Mi ini gupai nga mi adu na rengba ka manga agi asunge re mbiko kina ga Yekova undo. Ngba gi gene re, gimi arungbura ima yugopa ga Mbori ome.​—2 Kor. 12:9.