Goola íz 1955 né naca más lahuin de tzón xiin bixiosa né xinaʼya. Goniʼsa gaxca costa sur xtuny Finlandia, toib lagary ni nigoreʼ rimbu buñ láani xomod gudx de Vantta.

Xinaʼya goyonis xomod testigo xtuny Jehová chop tzón íz antes ni ñaala. Per bixiosa diti bioladx galnigolú né diti bidudybu lagary xinaʼya nasuidy né niné lóodo reunión. Por ngú, órni bixiosa diti goyoʼ rioʼ, bisuidybu lóodo de Jehová.

Desde dzú góca mbioxien, goloʼya guica guisoba Jehová. Por ejemplo, dzú gopa gatz íz, xomextriya bidzuitz portín diti gosaguela ñooya verilättyjä (toib guetieen ni biotz runy). Né tiplad ñabu bixalbu roʼya, né stipladcu cuaʼbu láani par nagoʼbu láani roʼya né tenedor. Godapa ñabu, né labúu bicantaʼya tenedor cu ló píis.

Dzú gopa 12 íz, goity bixiosa. Después de ngú, ma labúu goyaʼya reunión. Herman goyoʼ galrrasaʼ por naʼ, né ngú bichiin naʼ par goniʼsa lainy xcudx Jehová. Gosaló biila la Biblia guirá dzú né bisudi publicaciones xtunyno nanoydiguieʼ. Guirá ndeʼ gocnéni naʼ par ñonisa dzú gopa 14 íz, 8 de agost íz 1969.

Después ni bistubylagaʼya scuel, gosaló góca precursor regular. Chop tzón xomal después, goylésa gudx Pielavesi, toib  gudxyen ni goyoʼ gaxca galay Finlandia, par naniya más xtiitz Dios.

Lainy Pielavesi, bimbuya Sirkka, ni nadxin ñac tzeʼela. Ni más bioladxi de láabu, láani ngú que nacbu buñdxo né radzaktzaybu Jehová. Diti goniiny láabu nareʼ loguiaʼbu nili ñapbu xiroʼ cós né nabanybu natzatz. Guiropcado goniiny lóodo ñonydo xchiin Jehová galán né goyoʼdo puext ñonydo nitisi dxiin ni ñaiby herman lóodo. Bitzñado 23 de marz íz 1974. Xalagary ñoʼdo luna de miel, goyoʼdo Karttula, par ñacnédo ro biquiin más Testigos par guiniʼ xtiitz Dios.

Desde ni bunydo galtzeʼel, Jehová ma bislooy lóodo, que xcuentbu ñoʼ nadudybu ni caquiindo, pal nagoʼdo primer lagary Gobierno xtunybu (Mat. 6:33). Por ejemplo, lainy Karttula, diti gopdo camión. Primer la, gorupydo biciclet. Per ló tiemp galnachich, nigolú góc nachich né por ngú, ma diti labúu gorupydo láani. Né láaca, par nanido xtiitz Dios ló territorio xiroʼ xtuny congregación, biquiin ñapdo toib camión, per diti gopdo bidxiich par nasiido láani.

Toibtica dzú, toibtica de buchi bidguen lóodo né, diti gondo pal ñeedbu, né gochbu lóodo que labúu ñanédo xcamionbu. Diti godixdo xitcal, nili seguro xtuny camióncu. Nosi non nagoʼdo gasolin lainyni. ¡Né labúu gopdo toib camión!

Né ngú, biendxichdo que xcuent Jehová goyoʼ nadudy ni caquiindo, nosi ni ñonydo láani ngú, nagoʼdo primer lagary Gobierno xtunybu.

Íz 1978, órni goyoʼdo ló Scuel de Precursor, Raimo Kuokkanen, a toibtica mextra xtunydo, buny animarbu lóodo par nastzaado solicitud par Scuel de Galaad. Por ngú gosalódo bisuidydo diitz inglés, par labúu ñoʼdo Galaad, per diti bixéldo solicitud cu, portín íz 1980, herman biruʼ lóodo ñonydo dxiin lainy sucursal ni noʼ Finlandia. Ló dzúcu, betelitas, diti labúu bistzaayibu solicitud par Galaad. Goniiny ñonydo xchiin Jehová ro nainy láabu, diti ro nainy lóodo. Por ngú cuacuentdo invitación. Per bisuidyrado diitz  inglés, pentzi después labúu nastzaado solicitud par Galaad.

Chop tzón íz después, Tidxó buñ ni nap xiroʼ Galnan, buny aprobar que betelitas labúu ñoʼ puext par ñee Galaad. Por ngú, órcuca bixeldo solicitud xtunydo. Nigolú goyoʼdo nakit lainy Betel, per goniiny lóodo, pal labúuni, ñoʼdo stoib lagary par nanido xtiitz Dios más. Biruʼyibu lóodo ñoʼdo clase número 79 xtuny Galaad, né góc graduardo beʼo septiembre íz 1985. ¿Né púti bixelyibu lóodo? ¡Colombia!

Órni bidxindo Colombia, bixelyibu lóodo sucursal ni noʼ gudxcu par ñonydo dxiin. Buni rutigoygaʼlni naʼ par ñoni xchiina galán, per después de tobiz, buni pensary que biquiinna nadzaʼ xchiina. Órcu góc, primer né último buelt lainy xcalnabani ni gonaba nadudyibu stoib asignación naʼ. Órcu bixelyibu lóodo xomod misioneros lainy gudx Neiva, ló estado de Huila.

Naʼ nigolú rioladxi guiniya xtiitz Dios. Lainy gudx Finlandia, dzú yása goni galtzeʼel né góca precursor, goyoʼ ór goniya xtiitz Dios, desde rosildiguieʼ dada órni goyoʼ gueʼel. Né órni nicopyra bunydo galtzeʼel, Sirkka né naʼ, láaca guidopynac dzú gonido xtiitz Dios. Órni goyoʼdo territorio sit, goyoʼ ór gotiasydo lainy camión. Modcu biquiintzaydo xtiempdo, né stoib dzúcu nimaca labúu gosalódo buny predicardo.

Ni bibiguetdo gonido xtiitz Dios, bunyni que nasacdo gan ni gosacdo nírcu por predicación. Congregación ro goyoʼdo goniʼsni, né herman de Colombia, nigolú gopyibu respet, binladxyibu né bidudyibu guixquix lóodo.

Gaxca gudx Neiva goyoʼ stipnés gudxyen ro diti goyoʼ ni toib Testigo. Portín, xtol galrradíil ni goyoʼ lad tipnés buñ né gobierno, gocni toib riesga par buñ ni diti góc de lagarycu. ¿Ximod nadxin galnigolú lagarycu? Guirá ór buni pensary loni. Gosaló buni oración né gonaba Jehová que toibtica buñ de guirá gudxyencu per ni nabés lainy gudx Neiva, nadxin ñac Testigo. Láaca gonaba, que después ni ñonisbu, hermanocu ñac nadip fe xtunybu, né nagoʼbu guicbu nabiguetbu xcudxbu, ro golbu, par naniʼbu xtiitz Dios. Par naʼ, ralooyni modcu nimbu buñ de guirá gudxyencu Jehová; per Jehová, buny pensary stoib mod más galán.

Diti xidzú después, gosaló bisudi la Biblia né toib mbioxhlas ni laa Fernando González, ni golés lainy Algeciras, toibtica de gudxyencu ro diti goyoʼ ni toib Testigo. Goyeebu guirá xomal par bunybu dxiin lainy gudx Neiva, ni bián midid 50 kilómetros (30 millas) de xcudxbu. Bisuidytzaybu guirá información ni nasuidydo, né dada gosaló goyeebu guirá reunión. Láaca, primer xomal, bitopbu tipnés buñ de xcudxbu par nasuidybu guirá buñreʼ ni casuidybu.

Fernando goyonis ló enero íz 1990, nosi xhoop beʼo después ni gosaló bisuidybu, né nimaca gócbu precursor regular. Órni ma goyoʼ toib Testigo lainy Algeciras, sucursal  ma labúu bixel precursores especiales lagarycu. Né ló febrero íz 1992 goyoʼ toib congregación cu.

Per Fernando diti biaʼanbu lainy gudx Algeciras. Después ni cuaʼbu buñ, láabu né tzeelbu, Olga, goyeeyibu stoib gudxyen ro diti goyoʼ ni toib Testigo: San Vicente del Caguán. Cu gocnéyibu par ñoʼ toib congregación. Ló íz 2002 gosalóyibu ló galcircuit, dada nigoreʼ.

Experiencia reʼ bisuidyni naʼ que nigolú rasac gaibyno Jehová ni merpa caquiinno de cós ni radzak né asignación xtunyno. Láabu labúu ronybu, ni lóono diti labúu gonyno. Portín Jehová nac, xpixuan de guirá cosech (Mat. 9:38).

Íz 1990, bidxin góca superintendente de circuit, né primer circuit ro bunydo dxiin gocni lainy Bogotá, capital xtuny Colombia. Sirkka né naʼ nacdo xomodca stipnés buñ, diti napdo toib cós ni nantzaydo ronydo. Né láaca diti biaʼdo nabésdo lainy toib gudxrop. Por ngú asignación cu moda bitzuibyni lóodo. Per Jehová buny cumplirbu ni ná Filipenses 2:13: «Dios ngú ni cadudy galnadip lóoto, né racnébu lóoto par guiniiny lóoto gonyto ni rioladxbu».

Después bixelyibu lóodo Medellín, gudx ni bisetlaya nagaa. Lagarycu xidal buñ ma biaʼ né galrradíil ni rac locay né ma diti bidzuibyibu. Rasetnaladxi que toibtica buelt noʼya lainy toib yoʼ casudi toib buñ de la Biblia, órni bicadiaga gotz tír fuer. Mápa mer ñaʼta layoo, per buñ ni casudi ni ná la Biblia bíilrabu, bunybu suusi diti cayac xitcal. Órni bilox bíilbu, gochbu naʼ que guireʼbu tiprat. Diti goclabu, bibiguetbu né chop mbiox mitien, né gochbu naʼ: «Bitudy láani scásiʼ, per non nicaʼya xiinna».

Per diti ngúsi góc galnadzuiby ni gopdo. Toibtica buelt, canido xtiitz Dios yoʼ por yoʼ, órni tisintiempsi bieed tzeʼela caxony né niquiichbeebu. Nigolú cadzuibybu né gochbu naʼ que toib buñguieeu bicuaʼc láabu, né naʼ láaca bidzubi. Per bidudydo cuent que buñguieeucu bicuaʼc toib xoʼ ni godudy cueʼbu, diti láabu.

Conforma godudy tiemp, bianédo galrradíil né guirá cós mal ni góc lagarycu. Nigolú bidziguiaʼdo balaati buny guantary herman guirá galnagan xomod ndeʼ né ni más xiroʼ. Né bunydo pensary que pal Jehová cayacné layibu, láaca sacnébu lóodo. Guirá ór bisobdo consej ni bidudy ancianos xtuny congregaciones lóodo, gopdo cuidad né láaca bisiando láani ladxña Jehová.

Nigolú, goyoʼ ór diti tampa gocni toib riesga xomod bunydo pensary. Por ejemplo, rasetnaladxi que toibtica buelt noʼya lainy toib yoʼ, órni bicadiaga fuer, ralooyni chop buñgonaʼ cacalsaʼyibu né canidieeyibu. Naʼ diti goniiny ñaana xi cayac, per ni nac xpixuan yoʼcu, gochbu naʼ nitixlóya par nabiʼya xi cayac. ¡Órni bibiʼya, nacmu chop lórien ni bisuʼ mod rony xpesinbu!

Ló íz 1997, herman goniʼ gaca mextra de Escuela de Entrenamiento Ministerial. b Nigolú bioladxi ñaʼya scuel ni ragoʼ xcudx Jehová, per dipa buni pensary pal ñaca mextra ló toibni, gocni toib galnasác.

De ngú, láaca góca superintendente de distrit. Per, órni binitlóni, bibigueta ló galcircuit. Ma sanéya más de 30 íz, xomod instructor né superintendente de circuit. Ló guirá responsabilidad reʼ, ma cuaʼya xiroʼ galnasác, per láaca cualóya tipnés galnagan. ¿Xigony raniya láani?

Naana que naca toib buñ naguch. Ndeʼ racnéni naʼ par labúu goni gan galnagandaʼ, per rioʼ ór láaca ronyni que gaca nanoy órni rony corregir tipnés galnagan ni rioʼ lainy congregación. Por ejemplo, goyoʼ ór nadox goniya ro goodxi herman que non naslooyibu galrronladx né diti ñacyibu nigolú nanoy né stipnés. Per cualidades cu, ngú ni biatz naʼ (Rom. 7:21-23).

Rioʼ ór rareʼgana xtol mod naca (Rom. 7:24). Toibtica buelt nigolú gosac mala, né goodxi Jehová que más galán ma diti ñaca misionero né nabiguetta Finlandia. Per dzúcu ló reunión bicadiaga toib cós ni buny que nadudi cuent que diti non nasiana asignación xtuni né ñooni dxiin par natzaʼya mod naca. Dipa sialadxi mod nayadit ni cuapy Jehová oración xtuni. Láaca radudi guixquix láabu, portín racnébu naʼ né galrronladx par guitzaʼya mod naca.

Sirkka né naʼ diti napdo diitz par guidudydo guixquix Jehová, por galnasác ni napdo ni casi guidopy xcalnabanydo goyodieʼdo ló xchiin Jehová. Láaca radudi guixquix Jehová portín bidudybu toib gonaʼ ni nac tzeʼela, ni gondxiʼ né gocné naʼ guirá íz reʼ.

Mápa mer guisaʼya 70 íz, né por ngú ma diti saca instructor né circuit. Per ngú diti ragoʼ nabann naʼ. ¿Xigony? Portín nandxichi que par gonyxiroʼya Jehová diti fuerspa gapa toib responsabilidad ni guibiʼ buñ. Ni más rasac láani ngú, gacno buñdxo né gonyno xchiimbu, né gonyxiroʼno láabu né guidopy xcalnabanyno né guidudyno guixquix láabu (Miq. 6:8; Mar. 12:32-34).

De goloʼ nabanni, ma gopa xidal asignaciones sacróyen. Per órni roni pensary ló guirá íz ni ma godudy, radudi cuent que diti gocni portín ñaca más galán que stipnés, o ñantzaya ñoni toib cós. ¡Yaca! Xalagary ngú, ná diti roni tipnés cós galán, Jehová bidudy láani por xcalrronladxbu. Pal diti ñacnébu naʼ, dipa labúu ñoni xchiina. Labúu guiniya que xcalnadip Dios nigolú racnéni naʼ (2 Cor. 12:9).